The eldere man to Gayus, moost dere, whom I loue in treuthe. Moost dere, of alle thingis I make preyer, thee for to entre, and fare welsumly, as thi soule doith welsumly. I ioyede ful greetly, britheren comynge, and witnessyng beringe to thi treuthe, as thou walkist in treuthe. I haue not more grace of thes thingis, than that I here my sones for to walke in treuthe. Moost dere, thou doist feithfully, what euer thou werchist in to britheren, and this thing in to pilgrimys, whiche ȝelden witnessing to thi charite in siȝt of the chirche; whom thou wel doyng ledist forth worthily to God. Sotheli for his name thei wenten forth, nothing takinge of hethen men. Therfore we owen for to receyue siche manere men, that we be euene werchers of treuthe. I shulde haue write perauenture to the chirche, but this Diotropis, that loueth for to bere primacye in hem, receyueth not vs. For this thing, if I shal come, I shal moneste his werkes, whiche he doith, garringe, or chidinge, in to vs with yuele wordis. And as thes thinges suffisen not to him, nether he receyueth britheren, and forbedith hem that receyuen, and castith out of the chirche. Moost dere, nyle thou sue yuel thing, but that that is good thing. He that doith wel, is of God; he that doith yuel, seeth him not. Witnessing is ȝolde to Demetrie of alle men, and of treuthe it silf; but and we beren witnessing, and thou hast knowun, for oure witnessing is trewe. I hadde many thinges for to wrijte to thee, but Y wolde not wrijte to thee bi ynke and penne. Forsothe I hope anoon for to see thee, and we shulen speke mouth to mouth. Pees to thee. Frendes greten thee wel. Grete thou wel frendes bi name.
Copyright © 2013–2026 Jeremy J. Johnson. All rights reserved.