Poul, the boundun of Crist Jhesu, and Tymothe, brothir, to Filomon, bilouyd, and oure helper, and to Apya, moost dere sistir, and to Archip, oure euene knyȝt, and to the chirch that is in thin hous, grace to ȝou, and pees of God oure fadir, and of the Lord Jhesu Crist. I do thankyngis to my God, euer more makynge mynde of thee in my preieris, heeringe thi charite and feith, that thou hast in the Lord Jhesu, and in to alle hooly men, that the comunynge of thi feith be maad opyn, in knowynge of al good thing in Crist Jhesu. Forsoth I hadde greet ioye and comfort in thi charite, for the entraylis of hooly men restiden by thee, brothir. For which thing I hauynge moche trust in Crist Jhesu, for to comaunde to thee that that perteyneth to thing, or profiteth; for charite I beseche more, sithen thou art such as Poul old, now forsoth and the boundyn of Jhesu Crist. I biseche thee for my sone Onesyme, whom I in bondis bigat, the which sum tyme was to thee vnprofitable, forsothe now profitable and to thee and to me; whom I sente aȝen to thee. Forsoth resceyue thou him as myn entraylis; whom I wolde withholde with me, that he schulde serue for thee to me in bondis of the gospel; forsoth withoute thi counceil I wolde not do, that thi good schulde not be as of nede, but willeful. Forsoth perauenture therfore he departide fro thee at oon our, that thou schuldist resceyue hym into withouten ende; now not as a seruaunt, but for a seruaunt a moost dere brother, moost to me; forsoth how moche more to thee, and in fleisch and in the Lord? Therfore if thou hast me a felowe, resceyue him as me; forsoth if he hath ony thing anoyed thee, or owith, rette thou this thing to me. I Poul wroot with myn hond, I schal ȝelde; that I seye not to thee, that and thou owist to me thi silf. So, brother, I schal vse thee in the Lord; fulfille myn entraylis in Crist. I tristnynge of thin obedyence wroot to thee, witynge for thou schalt do and ouer that that I seye. Also forsoth and make redy to me an ooste, or hous for to dwelle inne; forwhi I hope by ȝoure preieris me for to be ȝouun to ȝou. Epefras, myn euene caytif, or prisoner to gidere, in Crist Jhesu, greetith thee wel, and Mark, Aristark, Demas, Lucas, myn helpers. The grace of oure Lord Jhesu Crist with ȝoure spirit. Amen.
Copyright © 2013–2026 Jeremy J. Johnson. All rights reserved.