1 2 3 4 5 6 7 8 9 10 11 12 13 14 15 16 17 18 19 20 21
In the bigynnynge was the word, that is, Goddis sone, and the word was at God, and God was the word. This was in the bigynnynge at God. Alle thingis ben maad by hym, and with outen him is maad noȝt, that thing that is maad. Was lyf in him, and the lyf was the liȝt of men; and the liȝt schyneth in derknessis, and derknessis tooken not it. A man was sent fro God, to whom the name was Joon. This man cam in to witnessinge, that he schulde bere witnessinge of the liȝt, that alle men schulden bileue bi him. He was not the liȝt, but that he schulde bere witnessing of the liȝt. It was verri liȝt, which liȝtneth ech man comynge into this world. He was in the world, and the world was maad bi him, and the world knew him not. He cam in to his owne thingis, and hise receyueden not him. Forsothe hou manye euere receyueden him, he ȝaf to hem power for to be maad the sones of God, to hem that bileuen in his name; whiche not of blodis, nether of the will of fleisch, nether of the will of man, but ben born of God. And the word, that is, Goddis sone, is maad fleisch, or man, and hath dwellid in vs, and we han seyn the glorie of him, the glorie as of the oon bigetun of the fadir, the sone ful of grace, and of treuthe. John berith witnessing of him, and cryeth, seyinge, This it was, whom I seide, He that cometh aftir me, is maad bifore me, for he was the formere than I; and of the plente of him we alle han takun, and grace for grace. For the lawe is ȝouun by Moyses; forsoth grace and treuthe is maad by Jhesu Crist. No man euere syȝ God, no but the oon bigetun sone, that is in the bosum of the fadir, he hath told out. And this is the witnessing of John, whanne Jewis senten fro Jerusalem prestis and dekenys to hym, that thei schulden axe him, Who art thou? And he knowelechide, and denyede not, and he knowlechide, For I am not Crist. And thei axiden him, What therfore? art thou Elye? And he seide, I am not. Art thou a prophete? And he answeride, Nay. Therfore thei seyden to him, Who art thou? that we ȝyue answere to thes that sente vs. What seist thou of thi silf? He seith, I a vois of the crying in desert, Dresse ȝe the wey of the Lord, as Ysaye, the prophete, seyde. And thei that weren sente, weren of the Pharisees. And thei axiden him, and seiden to him, What therfore baptysist thou, if thou art not Crist, nethir Elye, nether prophete? John answeride to hem, seyinge, I baptise in watir, sothli the myddil man of ȝou stood, whom ȝe knowen not; he it is, that cometh aftir me, that is maad bifore me, of whom I am not worthi, that I vnbynde the thwong of his schoo. Thes thingis ben don in Bethany ouer Jordan, wher John was baptisinge. Another day John syȝ Jhesu comynge to him, and he seith, Lo! the lomb of God; lo! that doith a wey the synnes of the world. This is, of whom I seide, Aftir me cometh a man, that is maad bifore me; for he was the formere than I. And I knewe not him, but that he be schewid in Israel, therfore I cam baptisinge in watir. And John bar witnessing, seyinge, For I siȝ the spirit comynge doun, as a culuere fro heuene, and dwellinge on him. And I knew not him; but he that sente me for to baptise in watir, seyde to me, On whom thou schalt se the Spirit comynge doun, and dwellinge on him, this it is, that baptisith in the Hooly Gost. And I syȝ, and bar witnessing, for this is the sone of God. Another day John stood, and tweyne of his disciplis; and he biholdinge Jhesu walkynge, seith, Lo! the lomb of God. And tweye disciplis herden him spekynge, and folwiden Jhesu. Sothli Jhesu conuertid, and seynge hem suwynge him, seith to hem, What seken ȝe? Whiche seiden to him, Raby, that is interpretid, Maistir, where dwellist thou? He seith to hem, Come ȝe, and se ȝe. Thei camen, and syȝen where he dwelte; and thei dwelten at him in that day. Sothli the our was as the tenthe. Forsothe Andrew, brother of Symount Petre, was oon of the tweyne, that herden of John, and hadde sued him. This fond first his brother Symount, and he seith to him, We han founde Messias, that is interpretid Crist; and he ledde him to Jhesu. Sothli Jhesu biholdinge him, seide, Thou ert Symount, the sone of Johanna; thou schalt be clepid Cephas, that is interpretid Petre. Forsothe on the morwe he wolde go out in to Galilee, and he fond Philip; and Jhesu seith to him, Sue thou me. Philip was of Bethsayda, the citee of Andreu and Petre. Philip fond Nathanael, and he seith to him, We han founden Jhesu, the sone of Joseph, of Nazareth, whom Moyses wroot in the lawe and prophetis. And Nathanael seide to him, Of Nazareth may sum good thing be? Philip seith to him, Come, and se. Jhesu syȝ Nathanael comynge to him, and he seith of him, Lo! verily a man of Israel, in which is no gile. Nathanael seith to him, Wherof hast thou knowe me? Jhesu answeride, and seith to him, Bifore that Philip clepide thee, whanne thou were vndir the fyge tree, I syȝ thee. Nathanael answeride to him, and seith, Rabi, thou ert the sone of God, thou ert kyng of Israel. And Jhesu answeride, and seide to him, For I seyde to thee, I syȝ thee vndir the fige tree, thou bileuest; thou schalt se more than these thingis. And he seide to hem, Treuli I seie to ȝou, ȝe schulen se heuene openyd, and the aungels of God stiȝynge vp and comynge doun on mannis sone.
And the thridde day weddingis ben maad in the Cane, or town, of Galilee; and the modir of Jhesu was there. Sothli Jhesu is clepid, and his disciplis, to the weddingis. And wyn faylinge, the modir of Jhesu seide to him, Thei han not wyn. And Jhesu seith to hir, What to me and to thee, thou womman? myn our cam not ȝit. The modir of him seith to the mynystris, What euere thing he schal seie to ȝou, do ȝe. Forsothe ther weren put sixe stoonun pottis, aftir the clensinge of Jewis, takinge ech tweyne or thre mesuris. Jhesu seith to hem, Fille ȝe the pottis with water. And thei filliden hem, til to the hiȝeste part. And Jhesu seith to hem, Drawe ȝe now, and bere ȝe to architriclyn, that is, prince in the hous of thre stagis. And thei token. And as architriclyn tastide the watir maad wyn, and he wiste not wherof it was, sothli the mynystris wisten, that drowen watir, architriclyn clepith the spouse, and seith to him, Ech man puttith first good wyn, and whanne men schulen be fillid, thanne that that is worse; sothli thou hast kept good wyn til to now. Jhesu dide this the bigynnynge of signes in the Cane of Galilee, and schewide his glorie; and his disciplis bileueden in to him. Aftir thes thingis he cam doun to Capharnaum, and his modir, and his britheren, and his disciplis; and thei dwelten there not many dayes. And the paske of Jewis was nyȝ, and Jhesu wente vp to Jerusalem. And he fond in the temple men sellinge scheep, and oxen, and culueris, and chaungeris sittinge. And whanne he hadde maad as a scourge of smale coordis, he castide out alle of the temple, and oxen, and scheep; and he schedde out the moneye of chaungeris, and turnede vpsodoun the bordis. And he seide to hem that selden culueris, Take a wey fro hennis thes thingis, and nyle ȝe make the hous of my fadir an hous of marchaundise. Forsothe his disciplis hadden mynde, for it is writun, The feruour of loue of thin hous hath etun me. Therfore the Jewis answeriden, and seyden to him, What syngne, or tokene, schewist thou to vs, for thou doist thes thingis? Jhesu answeride, and seyde to hem, Vndo ȝe this temple, and in thre dayes I schal reyse it. Therfore the Jewis seyden to him, In fourty and sixe ȝeeris this temple is byldid, and thou in thre dayes schalt reyse it? Forsothe he seide of the temple of his body. Therfore whanne he hadde rysun fro deed men, his disciplis hadden mynde, for he seyde this thing; and thei bileueden to the scripture, and to the word that Jhesu seide. Forsothe whanne Jhesu was at Jerusalem in pask, in the feeste day, manye bileuyden in his name, seynge the syngnes of him that he dide. Sothli Jhesu him silf bileuede not hym silf to hem, for that he knew alle men; and for it was not nede to hym, that eny man schulde bere witnessing of man, sothli he wiste what was in man.
Forsothe ther was a man of Pharisees, Nicodeme bi name, a prince of Jewis. He cam to Jhesu in the nyȝte, and seide to him, Raby, we witen, for of God thou hast come a maistir; sothli no man may do thes signes that thou dost, no but God were with him. Jhesu answeride, and seyde to him, Treuli, treuli, I seye to thee, no but a man schal be born aȝen, he may not se the kyngdom of God. Nycodeme seide to him, How may a man be born, whanne he is olde? wher he may entre aȝen in to his modris wombe, and be born aȝein? Jhesus answeride, Treuli, treuli, I seie to thee, no but a man schal be born aȝen of watir, and of the Hooly Gost, he may not entre in to the kyngdom of God. That that is born of fleisch, is fleisch; and that that is born of spirit, is spirit. Wondre thou not, for I seye to thee, It bihoueth ȝou for to be born aȝein. The spirit brethith wher it wole, and thou heerist his vois, but thou wost not, fro whennis he cometh, or whidir he goth; so is ech man that is borun of the spirit. Nycodeme answeride, and seide to him, Hou mown thes thingis be don? Jhesu answeride, and seyde to him, Art thou a maistir in Israel, and knowist not thes thingis? Treuli, treuli, I seye to thee, for that that we witen, we speken, and that that we han seyn, we witnessen, and ȝe taken not oure witnessing. If I haue seid to ȝou ertheli thingis, and ȝe bileuen not, how if I schal seie to ȝou heuenli thingis, schulen ȝe bileue? And no man styeth in to heuene, no but he that cam doun fro heuene, mannis sone that is in heuene. And as Moyses reride vp a serpent in desert, so it bihoueth mannus sone for to be areysid vp, that ech man that bileueth in to him, perische not, but haue euerelastinge lyf. Forsothe God so louede the world, that he ȝaf his oon bigetun sone, that ech man that bileueth in to him perische not, but haue euere lasting lyf. Sothli God sente not his sone in to the world, that he iuge the world, but that the world be sauyd by hym. He that bileueth in to him, is not demyd, or dampnyd; forsothe he that bileueth not, is now demed, for he bileueth not in the name of the oon bigetun sone of God. Sothli this is the dom, for liȝt cam in to the world, and men louede more derknessis than liȝt; forsoth her workis weren yuele. Sothli ech man that doth yuele, hatith liȝt; and he cometh not to the liȝt, that his workis be not reproued, or vndirnomun. Sothli he that doth treuthe, cometh to the liȝt, that his workis be schewid, for thei ben don in God. Aftir thes thingis Jhesu cam, and his disciplis, in to the lond of Judee, and there he dwellide with hem, and baptiside, or cristenede. Sothli John was baptisynge in Ennon, bisydis Salym, for many watris were there; and thei camen, and weren baptisid. Sothli John was not ȝit sent in to prisoun. Sothli a questioun, or axyng, is maad of Johnis disciplis with the Jewis, of the purificacioun, or clensing. And thei camen to John, and seyde to him, Rabi, or maistir, he that was with thee ouer Jordan, to whom thou hast born witnessinge, lo! he baptyseth, and alle men comen to him. John answeride, and seyde, A man may not take ony thing, no but it be ȝouun to him fro heuene. Ȝe ȝou silf beren witnessing to me, that I seyde, I am not Crist, but for I am sent bifore him. He that hath a spousesse, or wyf, is the spouse, or hosebonde; forsothe a frend of the spouse, that stondith, and heerith him, ioyeth in ioye, for the vois of the spouse. Therfore in this thing my ioye is fillid. It bihoueth him for to wexe, forsoth me to be menusid, or maad lesse. He that cam fro aboue, is aboue alle; he that is of the erthe, spekith of the erthe; he that comith fro heuene, is aboue alle. And this thing that he syȝ, and herde, he witnessith, and no man takith his witnessing. Forsoth he that hath takun his witnessing, hath markid that God is sothfast. Forsoth he whom God sente, spekith the wordis of God; forsothe not to mesure God ȝyueth the spirit. The fadir loueth the sone, and he hath ȝouun alle thingis in his hond. He that bileueth in to the sone, hath euere lastinge lyf; forsothe he that is vnbileueful to the sone, schal not se euerelasting lyf, but the wraththe of God dwellith on hym.
Therfore as Jhesu knew, that Pharisees herden, that Jhesu makith mo disciplis and baptysith, than John, thouȝ Jhesu baptiside not, but his disciplis, he lefte Judee, and wente aȝen in to Galilee. Sothli it bihofte him to passe bi Samarie. Therfore Jhesu cam in to a citee of Samarie, that is seyde Sycar, bisydis the manere, or feeld, that Jacob ȝaf to Joseph, his sone. Forsoth the welle of Jacob was there; sothli Jhesu maad wery, or feynt, of the iurney, sat thus on the welle. Sothli the our was, as the sixte, or vndurn. A womman cam of Samarie, for to drawe watir. Jhesu seith to hir, Ȝyue to me for to drynke. Forsoth his disciplis hadden gon in to the citee, that thei schulden bye metis. Therfore the ilke womman of Samarie seith to him, How thou, whanne thou ert a Jew, axist of me for to drynke, which am a womman of Samarie? forsothe Jewis vsen not with Samaritans. Jhesu answeride, and seide to hir, If thou wistist the ȝifte of God, and who it is, that seith to thee, Ȝyue to me for to drynke, thou perauenture schuldest haue axid of him, and he schulde haue ȝouun to thee quyk watir. The womman seith to him, Sire, nether thou hast in what thing thou schalt drawe, and the pitt is deep; therfore wherof hast thou quyk watir? Wher thou art more than oure fadir Jacob, that ȝaue to vs this pitt? and he drank therof, and his sones, and his beestis. Jhesu answeride, and seide to hir, Ech man that drynkith of this watir, schal thirste eftsoone; forsothe he that schal drynke of the watir that I schal ȝyue to him, schal not thirste in to with outen ende; but the watir that I schal ȝyue to him, schal be maad in him a welle of watir, spryngynge vp in to euerelastinge lyf. The womman seith to him, Sire, ȝyue to me this watir, that I thirste not, nether come hidir for to drawe. Jhesu seith to hir, Go, clepe thin hosebonde, and come hidur. The womman answeride, and seide, I haue not an hosebonde. Jhesu seith to hir, Thou seidist wel, For I haue not an hosebonde; forsoth thou hast had fyue hosebondis, and he whom thou hast, is not thin hosebonde. This thing thou seidist sothli. The womman seith to him, Lord, I se, for thou art a prophete. Oure fadris worschipiden in this hil, and ȝe seyn, for at Jerusalem is a place, wher it bihoueth for to worschipe. Jhesu seith to hir, Womman, bileue to me, for the our schal come, whanne nether in this hil, nether in Jerusalem, ȝe schulen preye, or worschipe, the fadir. Ȝe worschipen that that ȝe witen not; we worschipen that that we witen; for heelthe is of Jewis. But the our cometh, and now it is, whanne trewe worschiperis schulen worschipe the fader in spirit and treuthe; forwhi and the fadir sekith suche, that schulen worschipe him. God is a spirit, and it bihoueth hem that worschipen him, for to worschipe in spirit and treuth. The womman seith to him, I woot for Messias is comen, that is seid Crist; therfore whanne he schal come, he schal telle to vs alle thingis. Jhesu seith to hir, I am, that speke with thee. And anon his disciplis camen, and wondriden, for he spak with a womman; netheles no man seide, What sekist thou, or, What spekist thou with hir? Therfore the womman lefte the watir pott, and wente in to the citee, and seith to tho men, Come ȝe, and se ȝe the man, that seide to me alle thingis what euere thingis I haue don; wher he is Crist? And thei wenten out of the citee, and thei camen to hym. In the mene while his disciplis preieden him, seyinge, Raby, or maistir, ete. Sothli he seide to hem, I haue mete for to ete, that ȝe witen not. Therfore the disciplis seiden to gidere, Wher ony man brouȝte to him for to ete? Jhesu seith to hem, My mete is, that I do the will of him that sente me, and that I performe the work of him. Wher ȝe seyn not, for ȝit foure monethis ben, and rype corn cometh? Lo! I seie to ȝou, lift vp ȝoure yȝen, and se ȝe the regiouns, or cuntrees, for now thei ben white to ripe corn. And he that repith takith hyre, or mede, and he that gederith, fruit in to euerelasting lyf; that and he that sowith haue ioye to gidere, and he that repith. In this thing sothli the word is trewe, for another is that sowith, and another that repith. I sente ȝou for to repe, that that ȝe traueliden not; othere men traueliden, and ȝe entriden in to her trauelis. Forsoth of the citee many Samaritans bileueden in to him, for the word of the womman beringe witnessing, For he seide to me alle thingis, what euere thingis I dide. Therfore whanne Samaritans camen to him, thei preieden him, that he schulde dwelle there; and he dwelte there twey dayes. And many mo bileueden for his word, and seyden to the womman, For now not for thi speche we bileuen; forsoth we han herd, and we witen, for this is verily the sauyour of the world. Forsoth aftir twei dayes he wente thennis, and wente in to Galilee. Sothli Jhesu bar witnessing, for a prophete in his owne cuntree hath not honour, or worschip. Therfore whanne he cam in to Galilee, men of Galilee receyueden him, whanne thei hadden seyn alle thingis that he hadde don in Jerusalem, in the feeste day, or haliday; and sothli thei hadden come to the feeste day. Therfore he cam eftsoone in to Cana of Galilee, where he made the watir wyn. And sum litil king was, whos sone was syk at Capharnaum. Whanne this hadde herd, for Jhesu schulde come fro Judee in to Galilee, he wente to him, and preiede him, that he schulde come doun, and heele his sone; forsoth he bigan to deye. Therfore Jhesu seide to him, No but ȝe schulen se tokenes and grete wondris, ȝe bileuen not. The litil kyng seith to him, Lord, come doun, bifore my sone deye. Jhesu seith to him, Go, thi sone lyueth. The man bileuede to the word, that Jhesu seide to hym, and he wente. Sothli now him comynge doun, the seruauntis camen aȝens him, and telden to him, seyinge, For his sone lyuede. Therfore he axide of hem the our, in whiche he hadde betere. And thei seiden to him, For ȝistirday in the seuenthe our the feuere lefte him. Therfore the fadir knew, that the ilke our it was, in which Jhesu seide to him, Thi sone lyueth; and he bileuede, and al his hous. Jhesu dide eft this secunde tokene, whanne he cam fro Judee in to Galilee.
Aftir thes thingis was a feeste day of Jewis, and Jhesu wente vp to Jerusalem. Forsoth in Jerusalem is a stonding watir of beestis, that in Ebrew is named Bethsayda, hauynge fiue litle ȝatis. In thes lay a greet multitude of langwischinge men, blynde, krokid, drye, abidinge the stiring of the watir. Forsothe the aungel of the Lord aftir tyme cam doun in to the stonding watir, and the watir was moued; and he that first cam doun in to the sisterne, aftir the mouyng of the watir, was maad hool of what euere siknesse he was holdun. Forsothe sum man was there, hauynge eiȝte and thritti ȝeeris in his syknesse. Whanne Jhesu hadde seyn him liggynge, and hadde knowe, for now he hadde moche tyme, he seith to him, Wolt thou be maad hool? The syke man answeride to him, Lord, I haue not a man that whanne the water schal be troublid, he sende me in to the sisterne; forsoth the while I com, another goth down bifore me. Jhesu seith to him, Ryse vp, taak thi bed, and wandre. And a non the man is maad hool, and took vp his bed, and wandride. And saboth was in that day. Therfore the Jewis seyden to him that was maad hool, It is saboth, it is not leefful to thee, for to take thi bed. He answeride to hem, He that maade me hool, seide to me, Taak thi bed, and wandre. Therfore thei axiden him, Who is that man, that seide to thee, Taak thi bed, and wandre? Sothli he that was maad hool, wiste not who it was. Forsothe Jhesu bowide him fro the cumpany ordeyned, or sett, in the place. Aftirward Jhesu fond him in the temple, and seide to him, Lo! thou ert maad hool; now nyle thou do synne, leste ony thing worse bifalle to thee. The ilke man wente, and telde to the Jewis, for it was Jhesu that maad him hool. Therfore the Jewis pursueden Jhesu, for he dide this thing in the saboth. Forsoth Jhesu answeride to hem, My fadir worchith til now, and I worche. Therfore thanne the Jewis souȝten more for to slee hym, for not oonly he brak the saboth, but and he seide his fadir God, makinge him euene to God. And so Jhesu answeride, and seide to hem, Treuli, treuli, I seie to ȝou, the sone may not of him silf do ony thing, no but that thing that he schal se the fadir doynge; what euere thingis sothli he doith, thes thingis and the sone also doith. Forsothe the fadir loueth the sone, and schewith to him alle thingis that he doith; and he schal schewe to him more workis than thes, that ȝe wondre. Forsothe as the fadir reysith deede men, and quykeneth, so and the sone quykeneth whiche he wole. Sothli neither the fader iugeth ony man, but hath ȝouun al the dom to the sone, that alle men honoure the sone, as thei honouren the fadir. He that honoureth not the sone, honoureth not the fadir that sente him. Treuli, treuli, I seye to ȝou, for he that heerith my word, and bileueth to him that sente me, hath euere lasting lyf, and cometh not in to dom, but passith fro deeth in to lyf. Treuli, treuli, I seye to ȝou, for the our cometh, and now it is, whanne deede men schulen heere the vois of Goddis sone, and thei that schulen heere, schulen lyue. Sothli as the fader hath lyf in him silf, so he ȝaf and to the sone for to haue lyf in him silf; and he ȝaf to him power for to make dom, for he is mannis sone. Nyle ȝe wondre this thing, for the our cometh, in which alle men that ben in buriels, schulen heere the vois of Goddis sone. And thei that han do goode thingis, schulen come forth in to rysinge aȝen of lyf; forsothe thei that han don yuele thingis, in to rysinge aȝen of dom. I may not of mysilf do ony thing, but as I heere, I iuge, and my dom is iust, for I seke not my wille, but the will of the fadir that sente me. If I bere witnessing of my silf, my witnessing is not trewe; another is that berith witnessing of me, and I woot for his witnessing is trewe, that he berith of me. Ȝe senten to John, and he bar witnessing to the treuthe. Sothly I take not witnessing of man; but I seie thes thingis, that ȝe be saf. Sothli he was a lanterne brennynge and schynynge, or ȝyuynge liȝt; forsothe ȝe wolden glade at oon our in his liȝt. Sothli I haue more witnessing than John, forsoth the workis that my fadir ȝaf to me that I performe hem, the ilke workis that I do beren witnessyng of me, that the fadir sente me. And the fadir that sente me, he bar witnessing of me. Nethir ȝe herden euere his vois, nethir sayȝen his licnesse, or foorme. And ȝe han not his word dwellinge in ȝou; for ȝe bileuen not to him, whom he sente. Seke ȝe scripturis, in whiche ȝe gessen to haue euerlastinge lyf; and tho it ben, that beren witnessing of me. And ȝe wolen not come to me, that ȝe haue lyf. I take not clernesse of men; but I haue knowen ȝou, for ȝe han not the loue of God in ȝou. I cam in the name of my fadir, and ȝe token not me. If another schal come in his owne name, ȝe schulen receyue him. How mown ȝe bileue, that receyuen glorie ech of other, and ȝe seken not the glorie that is of God aloone? Nyle ȝe gesse, that I am to accusinge ȝou anemptis the fadir; it is Moyses that accusith ȝou, in whom ȝe hopen. Forsoth if ȝe bileueden to Moyses, perauenture ȝe schulden bileue and to me; sothli he wroot of me. Sothli if ȝe beleuen not to his lettris, how schulen ȝe bileue to my wordis?
Aftir thes thingis Jhesu wente ouer the se of Galilee, that is Tiberiadis. And a greet multitude suede him; for thei syȝen the tokenes, that he dide on hem that weren syke. Therfore Jhesu wente in to an hil, and there he sat with his disciplis. Forsoth pask was ful nyȝ, a feeste day of Jewis. Therfore whanne Jhesu hadd lyft vp the yȝen, and hadde seyn, for a greet multitude cam to him, he seith to Philip, Wherof schulen we bie loues, that thes men ete? Sothli he seide this thing, temptinge him; forsoth he wiste what he was to doynge. Philip answeride to him, The looues of two hundrid pens suffysen not to hem, that ech man take a litle what. Oon of his disciplis, Andrew, the brother of Symount Petre, seith to him, O child is here, that hath fyue barley looues and tweye fysches; but what ben thes thingis among so many men? Therfore Jhesu seith, Make ȝe men for to sitte at the mete. Forsoth there was myche hey in the place. Therfore men saten at the mete, in noumbre as fyue thousandis. Therfore Jhesu took fyue looues, and whanne he hadde do thankingis, he departide to men sittinge at mete, also and of the fischis, as myche as thei wolden. Forsothe as thei ben fillid, he seide to his disciplis, Gedere ȝe the relyfs that ben left, that thei perischen not. Therfore thei gedriden, and filleden twelue coffyns of relyfs of the fyue barly looues and tweye fischis, that leften to hem that haddun etun. Therfore tho men, whanne thei hadden seyn the tokene, or myracle, that he hadde don, seyden, For this is verily the prophete, that is to comynge in to the world. Therfore whanne Jhesu hadde knowun, for thei weren to comynge that thei schulden rauysche him, and make him kyng, he aloone fledde eft in to an hil. Sothli as euentyd was maad, his disciplis wenten doun to the see. And whanne thei hadden stiȝed vp in to the boot, thei camen ouer the see in to Capharnaum. And derknessis weren now maad, and Jhesu hadde not comen to hem. Forsothe a greet wynde blowynge, the see roos vp. Therfore whanne thei hadden rowid as fyue and twenty furlongis or thritty, thei seen Jhesu walkinge on the see, and to be maad next to the boot; and thei dredden. Sothli he seyde to hem, I am; nyle ȝe drede. Therfore thei wolden take him in to the boot, and anon the boot was at the lond in to which thei wenten. On the tothir day the cumpanye, that stood ouer the see, syȝ, for there was non othir boot there no but oon, and for Jhesu entride not with his disciplis in to the boot, but his disciplis aloone wenten. Forsothe othere bootis camen fro Tiberiade bisydis the place, where thei eeten breed, doynge thankingis to God. Therfore whanne the cumpany hadden seyn, for Jhesu was not there, nethere his disciplis, thei stiȝeden in to bootis, and camen to Capharnaum, sekinge him. And whanne thei hadden founden him ouer the see, thei seyden to him, Raby, hou hast thou com hidur? Jhesu answeride to hem, and seyde, Treuli, treuli, I seie to ȝou, ȝe seken me, not for ȝe syȝ the tokenis, or myraclis, but for ȝe eeten of looues, and ben fillid. Worche ȝe not mete that perischith, but that dwellith in to euerlastinge lyf, which mete mannis sone schal ȝyue to ȝou; forsothe God the fadir bitokenede, or markede, him. Therfore thei seiden to him, What schulen we do, that we worche the workis of God? Jhesu answeride, and seide to hem, This is the work of God, that ȝe bileue in to him, whom he sente. Therefore thei seiden to him, Therfore what tokene doist thou, that we se, and bileue to thee? what worchist thou? Oure fadris eeten manna in desert, as it is writun, He ȝaf to hem breed fro heuene for to ete. Therfore Jhesu seith to hem, Treuli, treuli, I seie to ȝou, not Moyses ȝaf to ȝou very breed fro heuene, but my fadir ȝyueth to ȝou verri breed fro heuene; sothli it is verri breed that cometh doun fro heuene, and ȝyueth lyf to the world. Therfore thei seiden to him, Lord, euere ȝyue to vs this breed. Sothly Jhesu seide to hem, I am breed of lyf; he that cometh to me, schal not hungre; he that bileueth in me, schal neuere thirste. But I seide to ȝou, for and ȝe han seyn me, and ȝe bileueden not. Al thing, that the fadir ȝyueth to me, schal come to me; and I schal not caste out him, that cometh to me. For I cam doun fro heuene, not that I do my wille, but the wille of him that sente me. Forsothe this is the wille of him that sente me, the fadris, that al thing that the fadir ȝaf to me, I leese not of it, but aȝen reise it in the laste day. Sothly this is the wille of my fadir that sente me, that ech man that seeth the sone, and bileueth in to him, haue euerlasting lyf; and I schal aȝen reyse him in the laste day. Therfore Jewis grucchiden of him, for he hadde seyd, I am breed that cam doun fro heuene. And thei seiden, Wher this is not Jhesu, the sone of Joseph, whos fadir and modir we han knowun? Therfore hou seith this, I cam doun fro heuene? Therfore Jhesu answeride, and seide to hem, Nyle ȝe grucche to gidere. No man may come to me, no but the fadir that sente me, schal drawe him; and I schal aȝen reyse him in the laste day. It is writun in prophetis, And alle men schulen ben able to be tauȝt of God. Ech man that herde of the fadir, and lernede, cometh to me. Not for ony man syȝ the fadir, no but this that is of God, this syȝ the fadir. Sothli, sothli, I seye to ȝou, he that bileueth in me, hath euerlasting lyf. I am the breed of lyf. Ȝoure fadris eeten manna in desert, and ben deede. This is breed comynge doun fro heuene, that if ony man schal ete therof, he deyeth not. I am quyk breed, that cam doun fro heuene. If ony man schal ete of this bred, he schal lyue with outen ende. And the breed that I schal ȝyue, is my fleisch for lyf of the world. Therfore the Jewis chidden to gidere, seyinge, Hou may this ȝyue to vs his fleisch for to ete? Therfore Jhesu seith to hem, Treuly, treuli, I seye to ȝou, no but ȝe schulen ete the fleisch of mannis sone, and drynke his blood, ȝe schulen not haue lyf in ȝou. He that etith my fleisch, and drynketh my blood, hath euerlasting lyf, and I schal aȝen reyse him in the laste day. Forsoth my fleisch is verily mete, and my blood is verily drynke. He that etith my fleisch, and drynkith my blood, dwellith in me, and I in him. As my fadir lyuynge sente me, and I lyue for the fadir, and he that etith me, schal lyue for me. This is breed, that cam doun fro heuene. Not as ȝoure fadris eeten manna, and ben deed; he that etith this breed, schal lyue with outen ende. He seide thes thingis in the synagoge, techinge in Capharnaum. Therfore manye of his disciplis heeringe, seyden, This word is hard, who may heere him? Forsoth Jhesu witynge anemptis him silf, for his disciplis grucchiden of this thing, seide to hem, This thing sclaundrith ȝou? Therfore if ȝe schulen se mannis sone stiȝynge vp, wher he was bifore? It is the spirit that quykeneth, the fleysch profiteth nothing; the wordis that I haue spokun to ȝou, ben spirit and lyf. But ther ben summe of ȝou that bileuen not. Sothli Jhesu wiste at the bigynnynge, whiche weren bileuynge, and who was to bitrayinge him. And he seide, Therfore I seide to ȝou, that no man may come to me, no but it were ȝouun to him of my fadir. Fro this tyme manye of his disciplis wenten abak, and now wenten not with him. Therfore Jhesu seide to the twelue, Where and ȝe wolen go awey? Therfore Symount Petre answeride to him, Lord, to whom schulen we go? Thou hast wordis of euerelasting lyf; and we han bileuyd, and knowun, for thou art Crist, the sone of God. Therfore Jhesu answeride to hem, Wher I chees not ȝou twelue, and oon of ȝou is a deuel? Forsothe he seide of Judas of Symount, of Scarioth, forsoth this was to bitraiynge him, whanne he was oon of twelue.
Forsothe aftir thes thingis Jhesu walkide in to Galilee, for he wolde not walke in to Judee, for the Jewis souȝten for to sle him. Sothli ther was in the nexte a feeste day of Jewis, Scenofegia, that is, a feeste of tabernaclis. Forsothe his bretheren seiden to him, Passe fro hennis, and go in to Judee, that and thi disciplis se thi werkis that thou doist; forsothe no man doth ony thing in hid place, or priuy, and he sekith to be in to opyn. If thou dost thes thingis, schewe thi silf to the world. Forsothe nether his britheren bileueden in to him. Therfore Jhesu seith to hem, My time cam not ȝit, but ȝoure tyme is euermore redy. The world may not haue hatid ȝou, sothli it hatith me; for I bere witnessing therof, for the workis of it ben yuele. Stiȝe ȝe vp at this feeste day, but I schal not stiȝe vp at this feeste day, for my tyme is not ȝit fillid. Whanne he hadde seid thes thingis, he dwelte in Galilee. Forsothe as his britheren stiȝeden vp, thanne and he stiȝede vp at the feeste day, not opynli, but as in pryuei. Therfore the Jewis souȝten him in the feeste day, and seiden, Wher is he? And moche grucching was of him in the cumpany of peple. Forsothe summe seiden, For he is good; forsoth othere seiden, Nay, but he disceyueth the cumpanyes; netheles no man spak opynly of him, for the drede of Jewis. Forsothe now the feeste day medlinge, or goynge bitwixe, Jhesu wente vp in to the temple, and tauȝte. And the Jewis wondriden, seyinge, Hou kan this man lettris, sithen he hath not lernyd? Jhesu answeride to hem, and seide, My doctrine is not myn, but his that sente me. If ony man schal wilne to do his wille, he schal knowe of the techinge, wher it be of God, wher I speke of my silf. He that spekith of himself, sekith his owne glorie; forsoth he that sekith the glorie of him that sente him, this is sothfast, and vnriȝtfulnesse is not in him. Wher Moyses ȝaf not to ȝou a lawe, and no man of ȝou doth the lawe? What seken ȝe to sle me? The cumpany answeride, and seide, Thou hast a deuyl; who sekith for to sle thee? Jhesu answeride, and seide to hem, I haue don o work, and alle ȝe wondren. Therfore Moyses ȝaf to ȝou circumcisioun; not for it is of Moyses, but of fadris; and in the saboth ȝe circumsididen a man. If a man takith circumcisioun in the saboth, that the lawe of Moyses be not brokun, han ȝe indignacioun, or wraththe, to me, for I made al the man hool in the sabot? Nyle ȝe deme vp the face, but deme a riȝtful dom. Therfore summe of Jerusalem seiden, Wher this is not, whom the Jewis seken to slee? and lo! he spekith opynly, and thei seyn no thing to him. Wher the princes knewen verili, for this is Crist? But we witen this man, of whennis he is; forsoth whanne Crist schal come, no man wot of whennis he is. Therfore Jhesu criede in the temple, techinge hem, and seyinge, And ȝe witen me, and of whennis I am; and I cam not of my silf, but he is trewe that sente me, whom ȝe knowen not. I woot him, and if I schal seie for I woot not him, I schal be lyk to ȝou, a lyere; and I woot him, for of him I am, and he sente me. Therfore thei souȝten for to take him, and no man sente in to him hondis, for his our cam not ȝit. Sothli many of the cumpanye bileueden in to him, and seiden, Whanne Crist schal come, wher he schal do mo tokenes, than this doth? Pharisees herden the cumpenye of peple grucchinge of him thes thingis; and the princes of Pharisees senten mynistris, that thei schulden take him. Therfore Jhesu seide to hem, Ȝit a litel tyme I am with ȝou, and I go to the fadir, that sente me. Ȝe schulen seke me, and ȝe schulen not fynde; and where I am, ȝe mown not come. Therfore the Jewis seiden to hem silf, Whidur is this to goynge, for we schulen not fynde him? wher he is to goyinge in to scateringe, or distroyinge, of hethene men, and is to techinge hethene men? What is this word, which he seide, Ȝe schulen seke me, and ȝe schulen not fynde; and where I am, ȝe mown not come? Forsoth in the laste day of the grete feeste, Jhesu stood, and criede, seyinge, If ony man thirstith, come he to me, and drynke he. He that bileueth in to me, as the scripture seith, Flodis of quyke watir schulen flowe of his wombe. Sothli he seide this thing of the Hooly Goost, whom men bileuynge in to him weren to takinge; forsoth the Spirit was not ȝit ȝouun, for Jhesus was not ȝit glorified. Therfore of that cumpanye, whanne thei hadden herde thes wordis of him, thei seiden, This is verili a prophete. Othere seiden, This is Crist. Forsoth summe seiden, Wher Crist cometh fro Galilee? Wher the scripture seith not, that of the seed of Dauith, and of the castel of Bethleem, where Dauith was, Crist cometh? And so dissencioun is maad in the cumpany for him. Forsothe summe of hem wolden take him, but no man sente hondis on him. Therfore the mynistris camen to the bischopis and Pharisees, and thei seiden to hem, Whi brouȝte ȝe not him? The mynistris answeriden, Neuere man spak so, as this spekith. Therfore the Farisees answeriden to hem, Wher and ȝe be disceyued? wher ony of the princes bileueden in to him, or of the Pharisees? But this cumpany of peple, that knew not the lawe, ben cursid. Nycodeme seith to hem, he that cam to him in nyȝte, that was oon of hem, Wher oure lawe demeth a man, no but first it haue herd of him, and knowe what he doth? Thei answeriden, and seiden to him, Wher and thou ert a man of Galilee? Seke thou scripturis, and se thou, for a prophete rysith not of Galilee. And thei turnedyn aȝen, ech in to his hows.
Forsothe Jhesu wente in to the mount of Olyuete. And erly eft he cam in to the temple; and al the peple cam to him; and he sittinge tauȝte hem. Sothli scribis and Pharisees bryngen a womman take in auowtrie, and settiden hir in the middil, and seiden to him, Maistir, this womman is now takun in auoutrie. Forsoth in the lawe Moyses comaundide vs for to stoone siche; therfore what seist thou? Sothli thei seiden this thing temptinge him, that thei myȝten accuse him. Forsothe Jhesu bowinge him silf doun, wrot with the fyngir in the erthe. Sothly whanne thei lastiden, or contynuede, axinge him, he reiside him silf, and seide to hem, Which of ȝou that is with oute synne, first sende a stoon in to hir. And eft he bowinge doun him silf, wroot in the erthe. Sothli thei heeringe thes thingis, wenten awey oon aftir an other, thei bigynnynge at the eldere men; and Jhesu dwelte aloone, and the womman stondinge in the myddel. Sothli Jhesu reisynge him silf seide to hir, Womman, wher ben thei that accusiden thee? no man dampnede thee. The which seyde, No man, Lord. Jhesu seith to hir, Nether I schal dampne thee; go thou, and now aftirward nyle thou do synne. Therfore eft Jhesu spak to hem, seyinge, I am the liȝt of the world; he that sueth me, walkith not in derknessis, but schal haue the liȝt of lyf. Therfore the Pharisees seiden, Thou berist witnessing of thi silf; thi witnessing is not trewe. Jhesu answeride, and seide to hem, And if I bere witnessing of my silf, my witnessing is trewe; for I woot fro whennis I cam, and whidur I go. Forsothe ȝe witen not fro whennus I come, or whidur I go. Forsoth ȝe demen vp the fleisch, I deme not ony man; and if I deme, my dom is trewe, for I am not aloone, but I and the fadir that sente me. And in ȝoure lawe it is writun, for the witnessing of twei men is trewe. I am, that bere witnessing of my silf, and the fadir that sente me, berith witnessing of me. Therfore thei seiden to him, Wher is thi fadir? Jhesu answeride, Nether ȝe witen, or knowen, me, nether ȝe witen my fadir; if ȝe wisten me, perauenture and ȝe schulden wite my fader. Jhesu spak thes wordis in the treserie, techinge in the temple; and no man took him, for his our cam not ȝit. Therfore eft Jhesu seide to hem, Lo! I go, and ȝe schulen seche me, and ȝe schulen deye in ȝoure synne; whidur I go, ȝe mown not come. Therfore the Jewis seiden, Wher he schal sle him silf, for he seith, Whidur I go, ȝe mown not come? And he seide to hem, Ȝe ben of bynethe, I am of aboue; ȝe ben of this world, I am not of this world. Therfore I seide to ȝou, For ȝe schulen dye in ȝoure synnes; forsothe if ȝe schulen not bileue for I am, ȝe schulen deye in ȝoure synne. Therfore thei seiden to him, Who art thou? Jhesu seide to hem, The bigynnyng, or the firste of al thing, which and speke to ȝou. I haue many thingis for to speke, and deme of ȝou, but he that sente me is sothfast; and I speke in the world thes thingis, that I herde of him. And thei knewen not, for he seide his fadir God. Therfore Jhesu seith to hem, Whanne ȝe han reysid mannis sone, thanne ȝe schulen knowe, for I am, and of my silf I do no thing; but as my fadir tauȝte me, I speke thes thingis. And he that sente me is with me, and lefte not me aloone; for I do euere tho thingis, that ben plesaunt to him. Him spekinge thes thingis, many men bileueden in to him. Therfore Jhesu seide to the Jewis, that bileueden in to him, If ȝe schulen dwelle in my word, verili ȝe schulen be my disciplis; and ȝe schulen knowe the treuthe, and the treuthe schal delyuere ȝou. Therfore the Jewis answeriden to him, We ben the seed of Abraham, and to no man we seruyden euere; hou seist thou, Ȝe schulen be free? Jhesu answeride to hem, Treuli, treuli, I seie to ȝou, for ech man that doth synne, is the seruaunt of synne. Sothli the seruaunt dwellith not in the hous, into withouten ende, the sone dwellith into withouten ende. Therfor if the sone schal delyuere ȝou, verili ȝe schulen be free. I woot for ȝe ben Abrahams sones, but ȝe seken for to sle me, for my word takith not in ȝou. And I speke tho thingis, that I syȝ at my fadir; and ȝe don tho thingis, that ȝe syȝen at ȝoure fadir. Thei answeriden, and seiden to him, Abraham is oure fadir. Jhesu seith to hem, If ȝe ben the sones of Abraham, do ȝe the werkis of Abraham. Sothli now ȝe seken to sle me, a man that haue spoken to ȝou treuthe, that I herde of God; Abraham dide not this thing. Ȝe don the workis of ȝoure fadir. And so thei seiden to him, We ben not born of fornycacioun; we han o fadir, God. Therfore Jhesu seide to hem, If God were ȝoure fadir, sothli ȝe schulden loue me; forsothe I procedide, or cam forth, of God, and cam; nether sothli I cam of my silf, but he sente me. Whi knowen ȝe not my speche? for ȝe mown not heere my word. Ȝe ben of the fadir, the deuel, and ȝe wolen do the desyris of ȝoure fadir. He was a mansleere fro the bigynnyng, and in treuthe he stood not; for treuthe is not in him. Whanne he spekith a lesinge, he spekith of his owne thingis; for he is a lyiere, and fadir of it. Sotheli for I seye treuthe, ȝe bileuen not to me. Who of ȝou schal reproue me of synne? if I seie treuthe, whi bileuen ȝe not to me? He that is of God, heerith the wordis of God; therfore ȝe heeren not, for ȝe ben not of God. Therfore the Jewis answeriden, and seiden, Wher we seyn not wel, for thou art a Samaritan, and hast a deuel? Jhesu answeride, and seide, I haue not a deuel, but I honoure my fadir, and ȝe han vnhonourid me. Forsothe I seke not my glorie; ther is, that sekith, and demeth. Treuli, treuli, I seie to ȝou, if ony man schal kepe my word, he schal not se, or taaste, deeth in to with outen ende. Therfor the Jewis seiden, Now we han knowen, for thou hast a deuel. Abraham is deed, and the prophetis, and thou seist, If ony man schal kepe my word, he schal not taaste deeth in to with outen ende. Wher thou ert more than oure fadir Abraham, that is deed, and the prophetis ben deede; whom makist thou thi silf? Jhesu answeride, If I glorifie my silf, my glorie is noȝt; my fadir is, that glorifieth me, whom ȝe seyn, for he is ȝoure God. And ȝe han not knowen him, forsoth I haue knowe him; and if I schal seye for I woot not him, I shal be a lyere lyk to ȝou; but I woot him, and I kepe his word. Abraham, ȝoure fader, ful out ioyede, that he schulde se my day; and he syȝ, and he ioyede. Therfore the Jewis seyden to him, Thou hast not ȝit fifty ȝeer, and hast thou seyn Abraham? Therfore Jhesu seide to hem, Treuli, treuli, I seye to ȝou, bifore that Abraham was maad, I am. Therfore thei token stoones, that thei schulden caste in to him; sothli Jhesu hidde him, and wente out of the temple.
And Jhesu passinge, syȝ a man blynd fro the birthe. And his disciplis axiden him, Raby, that is, Maistir, who synnede, this man, or his fadir and modir, that he schulde be born blynd? Jhesu answeride, Nether this man synnede, neither his fadir and moder; but that the werkis of God be schewid in hym. It bihoueth me for to worche the werkis of him that sente me, the while the day is; the nyȝt schal come, whanne no man may worche. Hou longe I am in the world, I am the liȝt of the world. Whanne he hadde seid thes thingis, he spette in to erthe, and made cley of the spotle, and leyde, or bawmede, the cley on his yȝen, and seide to him, Go, and be thou wayschen in the watir, or cisterne, of Siloe, that is interpretid, Sent. Therfore he wente, and waischide, and cam seynge. And so neiȝeboris, and thei that hadden seyn hym byfore, for he was a beggere, seiden, Wher this is not he, that sat, and beggide? Othere men seiden, this it is; othere men forsothe, Nay, but it is a lyk of him. Forsoth he seide, For I am. Therfore thei seiden to him, How ben thin yȝen openyd to thee? He answeride, The ilke man, that is seid Jhesu, made cley, and anoyntide myn yȝen, and seide to me, Go thou to the watir, or cisterne, of Siloe, and waische; and I wente, and waischide, and syȝ. And thei seiden to him, Wher is he? He seith, I woot not. Thei leden him that was blynd to the Pharisees. Forsoth it was saboth, whanne Jhesu made cley, and openyde his yȝen. Eft Pharisees axiden him, how he hadde seyn. Sothly he seide to hem, He puttide to me cley on the yȝen; and I waischide, and I se. Therfore summe of Pharisees seiden, This man is not of God, for he kepith not the saboth. Othere men seyden, How may a man synnere do thes syngnys, or myraclis? And dyuysioun was among hem. Therfore thei seyn eftsoone to the blynd man, What seist thou of him, that openyde thin yȝen? Sothli he seide, For he is a prophete. Therfore Jewis bileueden not of him, for he was blynd, and hadde seyn, til thei clepiden his fadir and modir, that hadde seyn. And thei axiden hem, seyinge, Is this ȝoure sone, whom ȝe seyn, for he is born blynd? hou therfore seeth he now? His fadir and modir answeriden to hem, and seyden, We witen, for this is oure sone, and for he is born blynd; sothli how he seeth now, we witen not, or who openyde his yȝen, we witen not; axe ȝe him, he hath age, speke he of him silf. His fadir and modir seiden thes thingis, for thei dredden Jewis; forsoth now the Jewis hadden conspirid, that if ony man knowlechide him Crist, he schulde be don out of the synagoge. Therfore his fadir and modir seiden, For he hath age, axe ȝe him. Therfore eftsoone thei clepiden the man, that was blynd, and seyden to him, Ȝyue thou glorie to God; we witen, for this man is a synner. Therfore he seide, If he is a synner, I woot not; o thing I woot, for whanne I was blynd, now I se. Therfore thei seiden to him, What dide he to thee? how openyde he thin yȝen? He answeride to hem, I seide to ȝou now, and ȝe herden; what wolen ȝe eftsoone heere? wher and ȝe wolen be maad his disciplis? Therfore thei wariden, or cursiden, him, and seiden, Be thou his disciple; we ben disciplis of Moyses. We witen, for God spak to Moyses; forsoth we witen noȝt this, of whennis he is. The ilke man answeride, and seide to hem, Forsoth in this thing is wonderful, that ȝe witen not of whennis he is, and he hath opened myn yȝen. Sothli we witen, for God heerith not synneris, but if ony man is worshiper of God, and doth his wille, hym he heerith. Fro the world it is not herd, that ony man openyde the yȝen of a blynd born man; no but this were of God, he myȝte not do ony thing. Thei answeriden, and seiden to him, Thou art al boren in synnes, and techist thou vs? And thei castiden out him. Jhesu herde, for thei han cast out him; and whanne he hadde founden him, he seide to him, Bileuest thou in to the sone of God? He answeride, and seide, Lord, who is he, that I bileue in to him? And Jhesu seide to him, And thou hast seyn him, and he it is, that spekith with thee. And he seide, Lord, I bileue. And he fallinge doun, worshipide him. Therfore Jhesu seide to him, I cam in to this world, in to dom, that thei that seen not, se, and thei that seen, be maad blynde. And summe of the Pharisees herden, that weren with him, and thei seiden to him, Wher and we ben blynde? Jhesu seide to hem, If ȝe weren blynde, ȝe schulden not haue synne; but now ȝe seyn, For we seen, ȝoure synne dwellith.
Treuli, treuli, I seie to ȝou, he that cometh not in by the dore in to the fold of the scheep, but stiȝeth vp by another weye, is nyȝt thef and day thef. Forsothe he that entrith by the dore, is the schepherde of the scheep. To this the porter openeth, and the scheep heeren his vois, and he clepith his owne scheep by name, and ledith out hem. And whanne he hath sent out his owne scheep, he goth bifore hem, and the scheep suwen him; for thei knowen his vois. Sothli thei suwen not an alien, but fleen fro him; for thei han not knowen the voys of alyens. Jhesu seide to hem this prouerbe; forsoth thei knewen not what he spak to hem. Therfore Jhesu seide to hem eftsoone, Treuli, treuli, I seie to ȝou, for I am the dore of the scheep. Alle how manye euere camen, ben nyȝt theues and day theues, but the scheep herden not hem. I am the dore. If ony man schal entre by me, he schal be saued; and he schal go yn, and schal go out, and he schal fynde lesewis. A niȝt theef cometh not, no but that he stele, and sle, and leese; I cam, that thei haue lyf, and haue more plenteuously. I am a good schepherde; a good schepherde ȝyueth his soule, that is, his lyf, for his scheep. Forsoth a marchaunt, or hyred hyne, and that is not schepherde, whos ben not the scheep his owne, seeth a wolf comynge, and he leeueth, or forsaketh, the scheep, and fleeth; and the wolf rauyschith, and disparplith, or scaterith, the scheep. Forsoth the marchaunt fleeth, for he is a marchaunt, and it perteyneth not to him of the scheep. I am a good schepherde, and I knowe my scheep, and my scheep knowen me. As my fadir hath knowun me, and I knowe the fadir; and I putte my lyf for my scheep. And I haue othere scheep, that ben not of this folde, and it bihoueth me for to leede hem to, and thei schulen heere my vois; and it schal be maad o fold and o schepherde. Therfore the fadir loueth me, for I putte my soule, that eftsoone I take it. No man takith it fro me, but I putte it fro my silf. I haue power for to putte it, and I haue power for to take it eftsoone. This maundement I haue take of my fadir. And so dissencioun was maad among the Jewis for thes wordis. Forsoth manye of hem seiden, He hath a deuel, and maddith, or wexith wood; what heeren ȝe him? Othere men seiden, Thes wordis beth not of a man hauynge a fend. Wher a deuel may opene the yȝen of blynde men? Forsothe newe feestis of halwing of the temple ben maad in Jerusalem, and it was wyntir. And Jhesu walkide in the temple, in the porche of Salomon. Therfore Jewis enyyrowneden him, and seiden to him, Hou longe dost thou a wey oure soule? if thou ert Crist, seie to vs opynly. Jhesu answeride to hem, I speke to ȝou, and ȝe bileuen not; the workis that I do in the name of my fadir, thes beren witnessing of me. But and ȝe bileuen not, for ȝe ben not of my scheep. My scheepe heeren my vois, and I knowe hem, and thei suen me. And I ȝyue to hem euerelasting lyf, and thei schulen not perische in to with outen ende, and ony man schal not rauysche hem of myn hond. That thing that my fadir ȝaf to me, is more than alle; therfore no man may rauysche fro my fadris hond. I and the fadir ben o thing. Jewis token vp stoones, for to stoone hym to the deeth. Jhesu answeride to hem, I haue schewid to ȝou manye goode werkis of my fadir, for which werk of hem stoonen ȝe me? The Jewis answeriden to him, We stoonen not thee of good work, but of blasphemye, and for thou, sithen thou art a man, makist thi silf God. Jhesu answeride to hem, Wher it is not writun in ȝoure lawe, For I seide, Ȝe ben goddis? If he seide hem goddis, to whiche the word of God is maad, and the scripture, which the fadir halwide, and sente in to the world, may not be vndon, and ȝe seyn, for I blaspheme, for I seide, I am Goddis sone? If I do not the workis of my fadir, nyle ȝe bileue to me; sothli if I do, thouȝ ȝe wolen not bileue to me, bileue ȝe to the workis; that ȝe knowe and bileue, for the fadir is in me, and I in the fadir. Therfore thei souȝten for to take him, and he wente out of her hondis. And he wente eftsoone ouer Jordan, in to that place where John was first baptisinge, and he dwelte there. And manye camen to him, and seiden, Forsoth John dide no signe, or myracle; forsothe alle thingis what euere John seide of this, weren sothe. And manye bileueden in to him.
Forsothe ther was sum syk man, Lazarus of Bethanye, of the castel of Mary and Martha, his sistris. Forsoth Mary it was, which anoyntide the Lord with oynement, and wipte his feet with hir heeris, whos brother Lazarus was syk. Therfore his sistris senten to him, seyinge, Lord, lo! he whom thou louest, is syk. Forsoth Jhesu heeringe seide to hem, This sicknesse is not to the deeth, but for the glorie of God, that Goddis sone be glorified bi it. Sothli Jhesu louede Martha, and hir sistir Marye, and Lazarus. Therfore as Jhesu herde, for he was syk, thanne sothli he dwellide in the same place tweye dayes. Therof aftir thes thingis he seide to his disciplis, Go we eft in to Judee. Disciplis seyen to him, Raby, or maistir, now the Jewis souȝten for to stoone thee, and eft thou gost thidur? Jhesu answeride, Wher ther ben not twelue ouris of the day? If ony man schal wandre in the day, he hirtith not, for he seeth the liȝt of this world. Sothli if he schal wandre in the nyȝt, he hirtith, for liȝt is not in him. He seith thes thingis, and aftir thes thingis he seith to hem, Lazarus, oure frend, slepith, but I go for to reyse him fro slepe. Therfore his disciplis seiden, Lord, if he slepith, he schal be saf. Forsothe Jhesu hadde seid of his deeth; but thei gessiden, that he seide of the slepinge of sleep. Thanne therfore Jhesu seide to hem opynli, Lazarus is deed; and I enioye for ȝou, that ȝe beleue, for I was not there; but go we to him. Therfore Thomas, that is seid Didymus, seide to euen disciplis, And go we, that we deye with him. And so Jhesu cam, and fond him hauynge now foure dayes in the graue. Sothli Bethanye was bisydis Jerusalem, as fiftene furlongis. Forsothe manye of Jewis camen to Marie and Martha, for to comforte hem of her brother. Therfore as Martha herde, for Jhesu cam, she renneth to him; Marie forsothe sat at hom. Therfore Martha seide to Jhesu, Lord, if thou haddist be here, my brother hadde not be deed. But and now I woot, that what euere thingis thou schalt axe of God, God schal ȝyue to thee. Jhesus seith to hir, Thi brother schal ryse aȝen. Martha seith to him, I woot, for he schal ryse aȝen in the aȝenrysing in the laste day. Jhesu seith to hir, I am aȝenrisyng and lyf; he that bileueth in me, ȝhe, if he schal be deed, schal lyue; and ech that lyueth, and bileueth in me, schal not deie with outen ende. Bileuyst thou this thing? She seith to him, Forsothe, or ȝhe, Lord, I haue bileuyd, for thou art Crist, the sone of quyk God, that hast come in to this world. And whanne she hadde seide this thing, she wente, and clepide Marie, hir sistir, in silence, or stilnesse, seyinge, The maistir cometh, and clepith thee. She, as she herde, roos anon, and cam to him. Sothli Jhesu cam not ȝit in to the castel, but he was ȝit in that place, wher Martha hadde comen aȝens him. Therfore the Jewis that weren with hir in the hous, and comfortiden hir, whanne thei siȝen Marie, for soone she roos, and wente out, sueden hir, seyinge, For she goth to the graue, for to wepe there. Forsothe Marie, whanne she hadde seyn wher Jhesu was, seynge him felde to his feet, and seide to him, Lord, if thou haddist be here, my brother hadde not be deed. Therfore as Jhesu siȝ hir wepynge, and the Jewis that weren with hir wepinge, he made noyse in spirit, and troublide him silf, and seide, Wher han ȝe putt him? Thei seyen to him, Lord, come and se. And Jhesu wepte. Therfore the Jewis seiden, Lo! hou he louede him. Forsothe summe of hem seiden, Wher this man that openyd the yȝen of the born blynde, miȝte not make that and this deiede not? Therfore Jhesu eft makynge noyse in him silf, cam to the graue. Forsothe ther was a denne, and a stoon was put theron. Jhesu seith, Take ȝe a wey the stoon. Martha, the sistir of him that was deed, seith to him, Lord, he stynkith now, sothli he is of foure dayes. Jhesus seith to hir, Wher I haue not seid to thee, for if thou schalt bileue, thou schalt se the glorie of God? Therfore thei tooken a wey the stoon. Forsothe the yȝen reysid vpward, Jhesu seide, Fadir, I do thankyngis to thee, for thou herdist me; forsoth I wiste, for thou euere heerest me, but for the peple that stondith aboute, I seide, that thei bileue, for thou hast sent me. Whanne he hadde seid thes thingis, he criede with greet vois, Lazarus, come thou out. And anoon he that was deed, cam forth, bounden the hondis and feet with bondis, and his face was boundun with a sudarie, or sweting cloth. Jhesu seith to hem, Vnbynde ȝe him, and suffre ȝe go awey. Therfore manye of the Jewis that camen to Marie and Martha, and syȝen what thingis he dide, bileueden in to him. Sothli summe of hem wenten to Pharisees, and seiden to hem, what thingis he dide. Therfore the bischops and Pharisees gedriden a counceil aȝens Jhesu, and seiden, What don we? for this man doth many signes, or myraclis. If we leeue him thus, alle men schulen bileue in to him; and Romayns schulen come, and schulen take oure place and flok. Forsoth oon of hem, Cayfas by name, whanne he was bischop of that ȝeer, seide to hem, Ȝe witen no thing, nethir thenken, for it spedith to ȝou, that o man deie for the peple, and that alle folk perische not. Forsoth he seide not this thing of him silf, but whanne he was bischop of that ȝeer, he prophesiede, for Jhesu was to deyinge for the folk, and not oonly for the folk, but that he schulde gedere in to oon the sones of God that weren scaterid. Therfore fro that day thei thouȝten for to sle him. Therfore Jhesu walkide not now opynli at the Jewis; but he wente in to a cuntree bisydis the desert, in to a citee, that is seid Effrem, and there he dwelte with his disciplis. Forsothe the pask of Jewis was next, and many of the cuntree stiȝeden vp to Jerusalem the day bifore pask, for to halowe hem selue. Therfore thei souȝten Jhesu, and spaken to gidere, stondinge in the temple, What gessen ȝe, for he cometh not to the feeste day? Forsothe the bischopis and Pharisees hadden ȝouun a maundement, that if ony man knew wher he is, he schewe, that thei taken hym.
Therfore Jhesu bifore sixe dayes of pask cam to Bethanye, wher Lazarus was deed, whom Jhesu reyside. Forsoth thei maden to him a sopere there, and Martha mynistride to hym; Lazarus forsothe was oon of men sittinge at the mete with him.Therfore Marie took a pound of oynement spikenard, or trewe narde, precious, and anoyntide the feet of Jhesu, and wipte his feete with her heeris; and the hous is fillid of the sauour of oygnement. Therfore Judas Scarioth, oon of his disciplis, that was to bitraynge hym, seide, Whi this oygnement is not seeld for thre hundrid pens, and is ȝouun to nedy men? Forsoth he seide this thing, not for it perteynede to him of nedy men, but for he was a theef, and he hauynge pursis baar tho thingis that weren sent. Therfore Jhesu seide, Suffre ȝe hir, that in to the day of my birying she kepe that; forsothe ȝe schulen euer haue pore men with ȝou, sothli ȝe schulen not euere haue me. Therfore myche cumpany of the Jewis knewe, that Jhesu was there; and thei camen, not oonly for Jhesu, but for to se Lazarus, whom he reysede fro deede men. Forsothe the princes of prestis thouȝten for to sle Lazarus, for manye of the Jewis for hym wente awei, and beleueden in to Jhesu. Forsothe on the morwe a myche cumpany, that cam togidere at the feeste day, whanne thei hadden herd, for Jhesu cometh to Jerusalem, tooken braunchis of palmes, and camen forth aȝens him, and crieden, Osanna, blessid is he, that cometh in the name of the Lord, king of Israel. And Jhesu fond a litil asse, and sat on him, as it is writun, The douȝtir of Syon, nyle thou drede; lo! thi king cometh, sittinge on the colt of a sche asse. His disciplis knewen not first thes thingis, but whanne Jhesu is glorified, thanne thei recordiden, or hadden mynde, for thes thingis weren writen of him, and thes thingis thei diden to him. Therfore the cumpany baar witnessing, that was with him, whanne he clepide Lazarus fro the graue, and reyside him fro deede men. Therfore and the cumpany cam metinge to him, for thei herden him to haue don this signe. Therfore the Pharisees seiden to hem selue, Ȝe seen, for we profiten no thing; lo! al the world wente aftir him. Forsothe ther weren summe hethen men, of hem that hadden styȝed vp for to worschipe in the feeste day. Therfore thes camen to Philip, that was of Bethsaida of Galilee, and preieden him, seyinge, Sire, we wolen se Jhesu. Philip cometh, and seith to Andrew; eft Andrew and Philip seiden to Jhesu. Sothli Jhesu answeride to hem, seyinge, The our cometh, that mannis sone be clarified. Treuli, treuli, I seie to ȝou, no but a corn of whete fallinge in to the erthe schal be deed, it dwellith aloone; sothli if it schal be deed, it bringith moche fruyt. He that loueth his soule, that is, lyf, schal leese it; and he that hatith his soule, that is, lyf, in this world, kepith it in to euerelasting lyf. If ony man seruith to me, sue he me; and where I am, there and my mynystre, or seruant, schal be. If ony man schal mynistre to me, my fadir schal worschipe him. Now my soule is troublid, and what schal I seye? Fadir, saue me fro this our; but for that thing I cam in to this our; fadir, clarifie thi name. Therfore a vois cam fro heuene, seyinge, And I haue clarified, and eft I schal clarifie. Therfore the cumpany that stood, and herde, seide, thundir to be maad; othere men seiden, an aungel spak to him. Jhesu answeride, and seide, This vois cam not for me, but for ȝou. Now is dom of the world, now the prince of this world schal be cast out. And if I schal be enhaunsid fro the erthe, I schal drawe alle thingis to my silf. Sothli he seide this thing, signifiynge bi what deeth he was to deiynge. The cumpany answeride to him, We han herd of the lawe, for Crist dwellith in to with outen ende; and hou seist thou, It bihoueth mannis sone for to be arerid? Who is this mannis sone? Therfore Jhesu seith to hem, Ȝit a litil liȝt is in ȝou; walke ȝe, the while ȝe han liȝt, that derknessis catche not ȝou; and he that wandrith in derknessis, woot nere whidur he goth. The while ȝe han liȝt, byleue ȝe in to liȝt, that ȝe be the sones of liȝt. Jhesu spak thes thingis, and wente, and hidde him fro hem. Sothli whanne he hadde don so manye signes, or myraclis, byfore hem, thei bileueden not in to him; that the word of Ysaie, the prophete, schulde be fillid, which he seide, Lord, who bileuede to oure heering, and to whom is the arm of the Lord schewid? Therfore thei myȝten not bileue, for eft Ysaye seide, He hath blyndid her yȝen, and he hath endurid, or maad hard, the herte of hem, that thei se not with yȝen, and vndirstonde not with herte; and that thei be conuertid, or al turned, and I heele hem. Ysaie seid thes thingis, whanne he syȝ the glorie of hym, and spak of him. Netheles and of the princes manye bileueden in to him, but for the Farisees thei knowlechiden not, that thei schulden not be cast out of the synagoge; forsothe thei loueden the glorie of men, more than the glorie of God. Forsothe Jhesu cryede, and seide, He that bileueth in to me, bileueth not in to me, but in to him that sente me. He that seeth me, seeth him that sente me. I liȝt cam in to the world, that ech man that bileueth in to me, dwelle not in derknessis. And if ony man schal heere my wordis, and schal not kepe, I deme not him; forsoth I cam not, that I deem the world, but that I make the world saf. He that dispisith me, and takith not my wordis, hath him that schal iuge him; the word that I haue spoken, that schal deme him in the laste day. For I haue noȝt spokun of my silf, but the fadir, that sente me, ȝaf to me a maundement, what I schal seie, and what I schal speke. And I woot, for his maundement is euerelasting lyf; therfore tho thingis that I speke, as the fadir seide to me, so I speke.
Forsothe bifore the feeste day of pask Jhesu witinge, for his our cometh, that he passe of this world to the fadir, whanne he hadde loued hise that weren in the world, in to the ende he louede hem. And the souper maad, whanne the deuel hadde sent now in to the herte of Judas, that Judas of Symount Scarioth schulde bitraye him, he witinge for the fadur ȝaf alle thingis to him in to hondis, and that he wente out fro God, and goth to God, risith fro the souper, and puttith his clothis; and whanne he hadde takun a lynnen cloth, he bifore girde him. Aftirward he sente water in to a basyn, and bigan for to waische disciplis feet, and to wype with the lynnen cloth, with which he was bifore gird. Therfore he cam to Symount Petre, and Petre seith to him, Lord, waischist thou to me the feet? Jhesu answeride, and seide to him, What thingis I do, thou woost not now; forsothe thou schalt wite aftirward. Petre seith to him, Thou schalt not waische to me the feet, in to with outen ende. Jhesu answeride to him, If I schal not waische thee, thou schalt not haue part with me. Symount Petre seith to him, Lord, not oonly my feet, but and the hondis and the heed. Jhesu seide to him, He that is waischun, hath no nede no but that he waische the feet, but he is clene al; and ȝe ben clene, but not alle. Forsothe he wiste, who schulde bitraye him; therfore he seide, Ȝe ben not clene alle. Therfore aftir that he waischide the feet of hem, he took his clothis; and whanne he hadde restid aȝen, eft he seide to hem, Ȝe witen what I haue done to ȝou. Ȝe clepen me maistir and lord, and ȝe seyn wel; forsoth I am. Therfore if I, lord and maistir, haue waische ȝoure feet, and ȝe owen to waische another the totheris feet; for I haue ȝouun ensaumple to ȝou, that as I haue don to ȝou, so and ȝe do. Treuli, treuli, I seie to ȝou, the seruaunt is not more than his lord, neither apostle is more than he that sente him. If ȝe witen thes thingis, ȝe schulen be blessid, if ȝe schulen do hem. I seie not of alle ȝou, I woot whiche I haue chosun; but that the scripture be fillid, He that etith my breed, schal reyse his heele aȝens me. Treuli, treuli, I seie to ȝou, bifore it be don, that whanne it schal be don, ȝe bileue for I am. Treuli, treuli, I seye to ȝou, he that taketh whom euere I schal sende, receyueth me; forsothe he that receyueth me, receyueth him that sente me. Whanne Jhesu hadde seid thes thingis, he was troblid in spirit, and witnesside, and seide, Treuli, treuli I seie to ȝou, oon of ȝou schal bitraye me. Therfore the disciplis lokiden to gidere, doutynge of whom he seide. Therfore oon of his disciplis was restinge in the bosum of Jhesu, whom Jhesu louede. Therfore Symount Petre bekenyde to him, and seith to him, Who is it, of which he seith? And so whanne he hadde restid aȝen on the brest of Jhesu, he seith to him, Lord, who is it? Jhesu answeride, He it is, to whom I schal dresse breed dipped yn. And whanne he had dippid yn breed, he ȝaf to Judas of Symount Scariot. And aftir the morsel, thanne Sathanas entride in to him. And Jhesu seith to him, What thing thou dost, do thou sunnere. Forsoth no man sittinge at the mete wiste this thing, to what thing he seide to him. Forsothe summe gessiden, for Judas hadde pursis, that Jhesu hadde seid to him, Bye thou tho thingis, that ben nedeful to vs at the feeste day, or that he schulde ȝyue sum thing to nedy men. Therfore whanne he hadde take the morsel, he wente out a non; forsoth it was nyȝt. Therfore whanne he hadde gon out, Jhesu seide, Now mannis sone is clarified, and God is clarified in him. If God is clarified in him, and God schal clarifye him in him silf, and a non he schal clarifie him. Litil sones, ȝit a litil I am with ȝou; ȝe schulen seke me, and, as I seide to the Jewis, Whidur I go, ȝe mown not come; and to ȝou I seie now. I ȝyue to ȝou a newe maundement, that ȝe loue to gidere, as I louede ȝou, that and ȝe loue to gedere. In this thing alle men schulen knowe, for ȝe ben my disciplis, if ȝe schulen haue loue to gidere. Symount Petre seith to hym, Lord, whidir goist thou? Jhesu answeride, Whidir I go, thou maist not sue me now, but thou schalt sue aftirward. Petre seith to him, Whi may I not sue thee now? I schal putte my soule, that is, lyf, for thee. Jhesu answeride, Thou schalt putte thi soule, that is, lyf, for me? Treuli, treuli, I seie to thee, the koc schal not crowe, til thou schalt denye me thries.
And he seith to his disciplis, Be not ȝoure herte disturblid, nether drede it; ȝe bileuen in to God, and bileue ȝe in to me. In the hous of my fadir ben many dwellingis; if any thing lesse, I hadde seid to ȝou, for I go for to make redy to ȝou a place. And if I schal go, and schal make redy to ȝou a place, eftsoone I schal come, and I schal take ȝou to my silf, that where I am, and ȝe be. And whidur I go, ȝe witen, and ȝe witen the wey. Thomas seith to him, Lord, we witen not whidur thou goist, and hou mown we wite the weye? Jhesu seith to him, I am weye, treuthe, and lyf; no man cometh to the fadir, no but by me. If ȝe hadden knowen me, sothli ȝe hadden knowen and my fadir; and aftirward ȝe schulen knowe him, and ȝe han seyn him. Philip seith to him, Lord, schewe to vs the fadir, and it suffisith to vs. Jhesu seith to him, So moche tyme I am with ȝou, and han ȝe not knowun me? Philip, he that seeth me, seeth and the fadir. Hou seist thou, Schewe to vs the fadir? Bileuest not thou, for I am in the fadir, and the fadir is in me? I speke not of my silf the wordis that I speke to ȝou; sothli the fadir dwellinge in me, he doith the workis. Beleue ȝe not, for I am in the fadir, and the fadir is in me? Ellis bileue ȝe for thilke workis. Treuli, treuli, I seie to ȝou, he that bileueth in to me, and he schal do the workis that I do; and he schal do more workis than thes, for I go to the fadir. And what euere thing ȝe schulen axe the fadir in my name, I schal do this thing, that the fadir be glorified in the sone. If ȝe schulen axe ony thing in my name, I schal do it. If ȝe louen me, kepe ȝe my comaundementis. And I schal preie the fadir, and he schal ȝyue to ȝou another coumfortour, the spirit of treuthe, that he dwelle with ȝou into with outen ende; which spirit the world may not take, for it seeth not him, neither woot him. Forsothe ȝe schulen knowe him, for he schal dwelle at ȝou, and he schal be in ȝou. I schal not leeue ȝou fadirlees, I schal come to ȝou. Ȝit a litil, and the world seeth not me now; forsoth ȝe schulen se me, for I lyue, and ȝe schulen lyue. In that day ȝe schulen knowe, for I am in my fadir, and ȝee in me, and I in ȝou. He that hath my comaundementis, and kepith hem, he it is that loueth me; sothli he that loueth me, schal be loued of my fadir, and I schal loue him, and I schal schewe to him my silf. Judas seith to him, not he of Scarioth, Lord, what is don, for thou art to schewe to vs thi silf, and not to the world? Jhesus answeride, and seide to him, If ony man loueth me, he schal kepe my word; and my fadir schal loue him, and we schulen come to him, and we schulen make dwellinge at him. He that loueth me not, kepith not my wordis; and the word which ȝe han herd, is not myn, but his that sente me, the fadris. Thes thingis I haue spokun to ȝou, dwellinge at ȝou; forsoth the Hooly Gost, coumfortour, whom the fadir schal sende in my name, he schal teche ȝou alle thingis, and schal schewe, or remembre, to ȝou alle thingis, what euer thingis I schal seye to ȝou. Pees I leeue to ȝou, my pees I ȝyue to ȝou; not as the world ȝyueth, I ȝyue to ȝou; be not ȝoure herte disturblid, neither drede it. Ȝe han herd, for I seide to ȝou, I go, and come to ȝou. If ȝe louedyn me, forsoth ȝe schulden haue ioye, for I go to the fadir, for the fadir is more than I. And now I haue seid to ȝou, bifore it be don, that whanne it schal be don, ȝe bileue. Now I schal not speke many thingis to ȝou; forsoth the prince of this world cometh, and he hath not ony thing in me. But that the world knowe, for I loue the fadir, and as the fadir ȝaf comaundement to me, so I do. Ryse ȝe, go we hennis.
I am a verri vyne, and my fadir is an erthe tilier. Ech syoun, or braunche, not berynge fruit in me, he schal do a wey it; and ech that berith fruit, he schal purge it, that it more bere fruit. Now ȝe ben clene, for the word that I haue spokun to ȝou. Dwell ȝe in me, and I in ȝou; as a braunche may not make fruit of him silf, no but it schal dwelle in the vyne, so nether ȝe, no but ȝe schulen dwelle in me. I am a vyne, ȝe ben the braunchis. He that dwellith in me, and I in him, this berith moche fruit, for with outen me ȝe mown no thing do. If ony man schal not dwelle in me, he schal be sent out as a braunche, and schal wexe drye; and thei schulen gadere him, and thei schulen sende him in to the fier, and he brenneth. If ȝe schulen dwelle in me, and my wordis schulen dwelle in ȝou, what euere thing ȝe schulen wilne, ȝe schulen axe, and it schal be do to ȝou. In this thing my fadir is clarified, that ȝe brynge moost fruyt, and ȝe be maad my disciplis. As my fadir louede me, and I louyde ȝou; dwelle ȝe in my loue. If ȝe schulen kepe my comaundementis, ȝe schulen dwelle in my loue; as and I haue kept the comaundementis of my fadir, and I dwelle in his loue. Thes thingis I spak to ȝou, that my ioye be in ȝou, and ȝoure ioye be fillid. This is my comaundement, that ȝe loue to gidere, as I louede ȝou. No man hath more loue than this, that ony man putte his soule, that is, lyf, for his frendis. Ȝe ben my frendis, if ȝe schulen do tho thingis, that I comaunde to ȝou. Now I schal not seye ȝou seruauntis, for the seruaunt woot not, what his lord schal do; forsothe I haue seid ȝou frendis, for alle thingis what euere I herde of my fadir, I haue maad knowun to ȝou. Ȝe han not chosun me, but I chees ȝou; and I haue put ȝou, that ȝe go, and brynge fruit, and ȝoure fruit dwelle; that what euere thing ȝe schulen axe the fadir in my name, he ȝyue to ȝou. Thes thingis I comaunde to ȝou, that ȝe loue to gidere. If the world hatith ȝou, wite ȝe, for it hadde me in hate first than ȝou. If ȝe hadden be of the world, the world schulde loue that thing that was his; but for ȝe ben not of the world, but I chees ȝou fro the world, therfore the world hatith ȝou. Haue ȝe mynde of my word, which I seide to ȝou, The seruaunt is not more than his lord. If thei han pursuwed me, and thei schulen pursue ȝou; if thei han kept my word, and thei schulen kepe ȝoure. But thei schulen do to ȝou alle thes thingis for my name, for thei witen not him that sente me. If I hadde not come, and hadde not spoke to hem, thei schulden not haue synne; forsoth now thei han not excusacioun of her synne. He that hatith me, hatith and my fadir. If I hadde not don werkis in hem, whiche non othir man dide, thei schulden not haue synne; forsoth now and thei han seyn, and hatid me and my fadir. But that the word be fillid, that is writun in the lawe of hem, For thei hadden me in hate with outen cause, or freely. Forsoth whanne the cumfortour schal come, which I schal sende to ȝou fro the fadir, a spirit of treuthe, the whiche procedith, or cometh forth, of the fadir, he schal bere witnessing of me; and ȝe schulen bere witnessing, for ȝe ben with me fro the bigynnyng.
Thes thingis I haue spokun to ȝou, that ȝe ben not sclaundrid. Thei schulen make ȝou with oute synagogis, but the our cometh, that ech man that sleeth ȝou, deme him silf for to ȝyue sacrifice to God. And thei schulen do to ȝou thes thingis, for thei han not knowe the fadir, nethir me. But thes thingis I spak to ȝou, that whanne the our of hem schal come, ȝe haue mynde, for I seide to ȝou. I seide not to ȝou thes thingis fro the bigynnyng, for I was with ȝou. And now I go to him that sente me, and no man of ȝou askith me, Whidur thou goist? but for I haue spokyn to ȝou thes thingis, sorwe, or heuynesse, hath fulfillid ȝoure herte. But I seie to ȝou treuthe, it spedith to ȝou, that I go; sothli if I schal not go awey, the coumfortour schal not come to ȝou; forsoth if I schal go a wey, I schal sende hym to ȝou. And whanne he schal come, he schal reproue the world of synne, and of riȝtfulnesse, and of dom. Forsothe of synne, for thei han not bileuyd in to me; forsothe of riȝtfulnesse, for I go to the fadir, and now ȝe schulen not se me; forsothe of dom, for the prince of this world is now demyd. Ȝit I haue many thingis for to seie to ȝou, but ȝe mown not bere now. Sotheli whanne the ilke spirit of treuthe schal come, he schal teche ȝou al treuthe; sothli he schal not speke of him self, but what euere thingis he schal heere, he schal speke; and he schal telle to ȝou the thingis that ben to comynge. He schal clarifie me, for of myne he schal take, and schal telle to ȝou. Alle thingis, what euere thingis the fadir hath, ben myne; therfore I seide to ȝou, for of myne he schal take, and schal telle to ȝou. A litil, and now ȝe schulen not se me; and eft a litil, and ȝe schulen se me, for I go to the fadir. Therfore summe of his disciplis seiden to gidere, What is this thing that he seith to vs, A litil, and ȝe schulen not se me; and eft a litil, and ȝe schulen se me, for I go to the fader? Therfore thei seiden, What is this, that he seith to vs, A litel? we witen not what he spekith. Forsothe Jhesu knew, for thei wolden axe him, and he seide to hem, Of this thing ȝe seken a mong ȝou, for I seide, A litil, and ȝe schulen not se me; and eft a litel, and ȝe schulen se me. Treuli, treuli, I seye to ȝou, for ȝe schulen morne and wepe, forsothe the world schal enioye; forsothe ȝe schulen be sorwful, but ȝoure sorwe schal turne in to ioye. Sothly a womman whanne sche berith child, hath sorwe, for hir our cometh; forsothe whanne sche hath borun a sone, now sche thenkith not on the pressure, or charge, for ioye, for a man is borun in to the world. And therfore ȝe han now sorwe, sothli eft I schal se ȝou, and ȝoure herte schal enioye, and no man schal take fro ȝou ȝoure ioye. And in that day ȝe schulen not axe me ony thing; treuli, treuli, I seie to ȝou, if ȝe schulen axe the fadir ony thing in my name, he schal ȝyue to ȝou. Til now ȝe axiden not ony thing in my name; axe ȝe, and ȝe schulen take, that ȝoure ioye be ful. I haue spokun to ȝou thes thingis in prouerbis, or derke saumplis; the our cometh, whanne now I schal not speke to ȝou in prouerbis, but opynly of my fadir I schal telle to ȝou. In that day ȝe schulen axe in my name; and I seie not to ȝou, for I schal preye the fadir for ȝou; forsothe he the fadir loueth ȝou, for ȝe han loued me, and han bileuyd, for I wente out fro God. I wente out fro the fadir, and I cam in to the world; eftsoones I leeue the world, and I go to the fadir. His disciplis seyen to him, Lo! now thou spekist opynli, and thou seist no prouerbe. Now we witen, for thou wost alle thingis; and it is no nede to thee, that ony man axe thee. In this thing we bileuen, for thou wentist out fro God. Jhesu answeride to hem, Now ȝe bileuen. Lo! the our cometh, and now it cometh, that ȝe be disparplid, or scaterid, ech in to his owne thingis, and leeue me aloone; and I am not aloone, for the fadir is with me. Thes thingis I haue spokun to ȝou, that ȝe haue pees in me; in the world ȝe schulen haue pressing, or ouerleying, but triste ȝe, I haue ouercome the world.
Jhesu spak thes thingis, and the yȝen lift vp in to heuene, he seide, Fadir, the our cometh, clarifie thi sone, that thi sone clarifie thee. As thou hast ȝouun to him power of ech fleisch, or man, that al thing that thou hast ȝouun to hym, he ȝyue to hem euerlasting lyf. Forsothe this is euerlasting lyf, that thei knowe thee aloone verry God, and whom thou sentist, Jhesu Crist. I haue clarifyed thee on erthe, I haue endid the werk, that thou hast ȝouun to me, that I do. And now, fadir, clarifie thou me at thi silf, with clerenesse that I hadde at thee, bifore the world was maad. I haue schewid thi name to the men, whiche thou hast ȝouun to me of the world; thei weren thine, and thou hast ȝouun hem to me, and thei han kept thi word. And now thei han knowun, for alle thingis that thou hast ȝouun to me, ben of thee. For the wordis that thou hast ȝouun to me, I ȝaf to hem; and thei han takun, and han knowun verili, for I wente out fro thee; and thei bileuyden, for thou sentist me. I preie for hem, not for the world, but for hem, that thou hast ȝouun to me, for thei ben thine. And alle myne thingis ben thine, and thin thingis ben myne; and I am clarified in hem. And now I am not in the world, and thes ben in the world, and I come to thee. Hooli fadir, kepe hem in thy name, whiche thou hast ȝouun to me, that thei be oon, as and we. Whanne I was with hem, I kepte hem in thi name; whiche thou hast ȝouun to me, I kepte, and no man of hem perischide, no but the sone of perdicioun, or dampnacioun, that the scripture be fillid. Forsothe now I come to thee, and I speke thes thingis in the world, that thei haue my ioye fillid in hem silf. I ȝaf to hem thi word, and the world hadde hem in hate; for thei ben not of the world, as and I am not of the world. I preie not, that thou take a wey hem fro the world, but that thou kepe hem fro yuel. Thei ben not of the world, as and I am not of the world. Halwe thou hem in treuthe; thi word is treuthe. As thou sentist me in to the world, and I sente hem in to the world. And I halwe my silf for hem, that and thei be halwid in treuthe. Sotheli I preie not oonli for hem, but and for hem that ben to bileuynge in to me bi the word of hem; that alle thei be oon, as thou, fadir, in me, and I in thee, that and thei in vs be oon; that the world bileue, for thou hast sent me. And I haue ȝouun to hem the clerenesse, that thou hast ȝouun to me, that thei be oon, as and we ben oon; I in hem, and thou in me, that thei be endid in oon; and that the world knowe, that thou sentist me, and hast louyd hem, as thou hast louyd and me. Fadir, I wole that and thei whiche thou hast ȝouun to me, be with me where I am, that thei se my cleernesse, that thou hast ȝouun to me; for thou louedist me bifor the makinge of the world. Riȝtful fadir, the world knew not thee, forsothe I knew thee, and thes knowen, for thou sentist me. And I haue maad thi name knowe to hem, and schal make knowe; that the loue by which thou hast loued me, be in hem, and I in hem.
Whanne Jhesu hadde seid thes thingis, he wente out with his disciplis ouer the strond of Cedron, where was a ȝerd, or a gardyn, in to which he entride, and his disciplis. Sothli and Judas, that bitraiede him, wiste the place, for ofte Jhesu cam to gidere thidur with his disciplis. Therfore whanne Judas hadde takun a cumpany of kniȝtis, and of the bischopis and Pharisees mynystris, he cam with lanternis, and brondis, and armys. And so Jhesu witinge alle thingis that weren to comynge on him, wente forth, and seith to hem, Whom seken ȝe? Thei answeriden to him, Jhesu of Nazareth. Jhesu seith to hem, I am. Forsoth and Judas that bitrayede hym, stood with hem. Therfore as he seide to hem, I am, thei wenten a bak, and felden doun in to erthe. Eft he axide hem, Whom seken ȝe? Forsoth thei seiden, Jhesu Nazaren. He answeride to hem, I seide to ȝou, for I am; therfore if ȝe seken me, suffre ȝe thes to go a wey. That the word which he seide schulde be fillid, For I loste not ony of hem, whiche thou hast ȝouun to me. Forsothe Symount Petre hauynge a swerd, drouȝ it out, and smot the seruaunt of the bischop, and kitte of his litil riȝt eere. Forsothe the name of the seruaunt was Malkus. Therfore Jhesu seide to Petre, Sende thou the swerd in to the schethe; wolt thou not, that I drynke thilke cuppe, that my fadir ȝaf to me? Therfore the cumpany of knyȝtis, and the tribune, and the mynystris of Jewis, token Jhesu, and bounden him, and ledden him first to Annas; sothli he was fadir of Cayphas wyf, that was bischop of that ȝeer. Sothli it was Cayphas, that ȝaf counceil to the Jewis, that it spedith o man for to deie for the peple. Therfore Symount Petre suede Jhesu, and another disciple; forsoth thilke disciple was knowun to the bischop. And he entride yn with Jhesu, in to the halle of the bischop; sothly Petre stood at the dore withoute forth. Therfore the tothir disciple, that was knowun to the bischop, wente out, and seide to the womman kepinge the dore, and ledde yn Petre. Therfore the handmayde, kepere of the dore, seide to Petre, Wher and thou art of the disciplis of this man? He seide, I am not. Forsoth the seruauntis and mynystris stooden at the colis, for it was coold, and thei warmyden hem; sothli and Petre was with hem, stondinge and warmynge him. Therfore the bischop axide Jhesu of his disciplis, and of his teching. Jhesu answeride to him, I haue spokun opynly to the world; I tauȝte euere in the synagoge, and in the temple, whidur alle the Jewis camen to gidere, and in priuy I spak no thing. What axist thou me? axe hem that herden, what I haue spokun to hem; lo! thei witen, what thingis I haue seyd. Whanne he hadde seid thes thingis, oon of the mynystris stondinge nyȝ, ȝaf a boffat to Jhesu, seyinge, Answerist thou so to the byschop? Jhesu answeride to him, If I haue spokun yuele, bere thou witnessing of yuel; sothli if wel, whi smytist thou me? And Annas sente him boundun to Cayfas, the bischop. Forsothe Symount Petre was stondynge and warmynge him; therfore thei seiden to him, Wher and thou art his disciple? He denyede, and seyde, I am not. Oon of the bischopis seruauntis, cosyn of hym, whos litel eere Petre kittide of, seyde, Wher I syȝ not thee in the gardyn with hym? Therfore eft Petre denyede, and anoon the koc crew. Therfore thei leden Jhesu to Cayfas, in to the moot halle; sothli it was morwetyde, and thai entriden not in to the moot halle, that thei schulden not be defoylid, but that thei schulden ete paske. Therfore Pilat wente out with oute forth to hem, and seide, What accusing brynge ȝe aȝens this man? Thei answeriden, and seiden to hym, If this were not a mysdoer, we hadden not bitakun hym to thee. Therfore Pilat seith to hem, Take ȝe him, and deme ȝe him, vp ȝoure lawe. Therfore thei seyden to him, It is not leefful to vs for to slee ony man; that the word of Jhesu schulde be fillid, which he seide, signyfiynge bi what deeth he was to deiynge. Therfore eft Pilate entride in to the moot halle, and clepide Jhesu, and seide to him, Ert thou king of Jewis? Jhesu answeride, and seide to him, Seist thou this thing of thi silf, ether othere seiden to thee of me? Pilat answeride, Wher I am a Jew? Thi folk and bischopis bytokun thee to me; what hast thou don? Jhesu answeride, My kyngdom is not of this world; if my kyngdom were of this world, sothly my mynystris schulden stryue, that I schulde not be takun to the Jewis; now forsothe my kyngdom is not of hennis, or of this place. And so Pilat seide to him, Therfore art thou kyng? Jhesu answeride, Thou seidist, for I am a kyng. To this thing I am born, and to this I cam in to the world, that I bere witnessing to treuthe. Ech that is of treuthe, heerith my voys. Pilat seith to him, What is treuthe? And whanne he hadde seid this thing, eft he wente out to the Jewis, and seide to hem, I fynde no cause in him. Forsoth it is a custom to ȝou, that I delyuer oon to ȝou in pask; therfore wolen ȝe I schal dismytte to ȝou the kyng of Jewis? Therfore thei cryeden eft alle, seyinge, Not this, but Barabas. Forsothe Barabas was a theef.
Therfore Pilat took thanne Jhesu, and scourgide. And knyȝtis foldinge a crowne of thornes, puttiden on his heed, and diden aboute him a cloth of purpur, and camen to him, and seiden, Heyl, kyng of Jewis. And thei ȝauen to hym boffatis. Eft Pilat wente out, and seide to hem, Lo! I lede him to ȝou with oute forth, that ȝe knowe, for I fynde no cause in him. Therfore Jhesu wente out, beringe a crowne of thornes, and a clooth of purpur. And he seith to hem, Loo! the man. Therfore whanne the bischopis and mynystris hadde seyn him, thei crieden, seyinge, Crucifie, crucifie him. Pilate seith to hem, Take ȝe him, and crucifie ȝe, sothli I fynde no cause in him. The Jewis answeriden to him, We han a lawe, and vpon the lawe he owith to deie, for he made him Goddis sone. Therfore whanne Pilat hadde herd this word, he dredde more. And he wente in to the moot halle eft, and seyde to hym, Of whennus art thou? Forsothe Jhesu ȝaf not answere to him. Pilat seith to him, Spekest thou not to me? Wost thou not, for I haue power for to crucifie thee, and I haue power for to delyuere thee? Jhesu answeride, Thou schuldist not haue ony power aȝens me, no but it were ȝouuen to thee fro aboue; therfore he that bitook me to thee, hath the more synne. Therof, or fro thennus, Pilat souȝte for to delyuere Jhesu; forsothe the Jewis crieden, seyinge, If thou leeuyst this man, thou ert not frend of Cesar; for ech man that makith him silf kyng, aȝen seith Cesar. Therfore Pilat, whanne he hadde herd thes wordis, ledde Jhesu forth, and saat for domesman in a place, that is seide Licostratos, in Ebrew forsothe Golgatha, in Englisch, place of Caluarie. Forsoth it was the makinge redy, or euyn, of pask, as the sixte our, or mydday. And he seith to the Jewis, Loo! ȝoure kyng. Forsoth thei cryeden, seyinge, Do awey, do awey; crucifie hym. Pilat seith to hem, Schal I crucifie ȝoure kyng? The bischopis answeriden, We han no kyng no but Cesar. Therfore thanne Pilat bitook him to hem, that he schulde be crucifyed. Forsothe thei token Jhesu, and ledden out. And he berynge to him silf a cros wente out in to that place, that is seid of Caluarie, in Ebrew Golgatha; where thei crucifieden him, and othere tweye with him, on this syde and on that syde, forsothe Jhesu the myddil. Forsothe and Pilat wroot a title, and puttide on the cross; sothli it was writun, Jhesu Nazaren, kyng of Jewis. Therfore manye of the Jewis radden this title, for the place where Jhesu was crucifiede, was nyȝ the citee, and it was writen in Ebrew, Greek, and Latyn. Therfore the bischops of Jewis seiden to Pilat, Nyle thou write kyng of Jewis, but for he seyde, I am kyng of Jewis. Pilat answeride, That that I haue writen, I haue writen. Therfore the knyȝtis whanne thei hadden crucified him, token his clothis, and maden foure partis, to ech knyȝt a part, and a coote. Forsothe the coote was with out seem, and aboue wouun bi al. Therfore thei seiden to gidere, Kitte we not it, but leye we lott, whos it is; that the scripture be fillid, seyinge, Thei partiden my clothis to hem, and in to my cloth thei senten lott. And sothli knyȝtis diden thes thingis. Forsothe bisydis the cross of Jhesu stooden his modir, and Marie Cleaphe, the sister of his modir, and Marie Maudeleyn. Therfore whanne Jhesu hadde seyn the modir, and the disciple stondinge, whom he louede, he seith to his modir, Womman, lo! thi sone. Aftirward he seith to the disciple, Lo! thi modir. And fro that our the disciple took hire in to his thingis. Aftirward Jhesu witinge, for now alle thingis ben endid, that the scripture schulde be fillid, he seith, I thirste. Sothli a vessel was putt ful of vynegre. Thei forsothe puttinge aboue with ysope the spounge ful of vynegre, offriden to his mouth. Therfore whanne Jhesu hadde take vynegre, he seide, It is endid. And the heed bowid doun, he bitook the spirit. Therfore for it was the makynge redy of pask, that the bodies schulde not dwelle in the cross in the saboth, for that day of saboth was greet, the Jewis preieden Pilat, that the hupis of hem schulden be brokun, and takun awey. Therfore knyȝtis camen, and sothly thei braken the thiȝes of the firste, and of the tothir, that was crucified with him. Forsothe whanne thei hadden come to Jhesu, as thei syȝen him deed thanne, thei braken not his thiȝes; but oon of the knyȝtis openyde his syde with a sper, and a noon bloot and watir wente out. And he that syȝ, bar witnessing, and his witnessing is trewe; and he woot for he seith trewe thingis, that ȝe bileue. Forsothe thes thingis ben don, that the scripture schulde be fillid, Ȝe schulen not breke, or make lesse, a boon of him. And eft anothir scripture seith, Thei schulen se in to whom they piȝten thorw. Sotheli aftir thes thingis Joseph of Armathi preiede Pilat, that he schulde take awey the body of Jhesu, for that he was a disciple of Jhesu, forsothe priuey, for the drede of Jewis. And Pilat suffride. Therfore he cam, and took awey the body of Jhesu. Sothli and Nycodeme cam, that hadde come first to Jhesu in the nyȝt, beringe a medlynge of myrre and aloes, as an hundrid pound. Therfore thei token the body of Jhesu, and bounden it in lynnen clothis with oynementis, as it is custom to Jewis for to birye. Sothli in the place wher he was crucified, was a ȝerd, and in the ȝerd a newe graue, in which not ȝit ony man was put. Therfore there for the makynge redy of Jewis, for the graue was nyȝ, thei puttiden Jhesu.
Forsothe in the oon of the saboth, that is, of the woke, Mary Mawdeleyn cam erly, whanne derknessis weren ȝit, at the graue. And she syȝ the stoon turned aȝen fro the graue. Therfore she ran, and cam to Symount Petre, and to anothir disciple, whom Jhesu louyde, and seith to hem, Thei han take the Lord fro the graue, and we witen not, where thei han put him. Therfore Petre wente out, and thilke othere disciple, and thei camen to the graue. Forsoth thei tweyne runnen to gidere, and thilke other disciple ran bifore sunner than Petre, and cam first to the graue. And whanne he hadde ynbowyd him, he syȝ the scheetis putt, nethelees he entride not. Therfore Symount Petre cam suynge hym, and he entride in to the graue, and he syȝ the scheetis putt, and the sudarie that was on his heed, not putt with the scheetis, but by it silf wlappid in to o place. Therfore thanne and thilke disciple that cam first to the graue, entride, and syȝ, and bileuede. Forsothe thei wisten not the scripture, for it bihofte him for to ryse aȝen fro deede men. Therfore the disciplis wenten eft to hem selue. Forsoth Marie stood at the graue withoute forth wepynge. Therfore while she wepte, sche bowide hir, and biheld forth in to the graue. And she syȝ twey angelis sittynge in whyt, oon at the heed and oon at the feet, wher the body of Jhesu was putt. Thei seyn to hir, Womman, what wepist thou? She seid to hem, For thei han takun a wey my lord, and I woot not, where thei han putt him. Whanne she hadde seid thes thingis, she was turnyd a bak, and syȝ Jhesu stondinge, and wiste not for it was Jhesu. Jhesu seith to hir, Womman, what wepist thou? whom sekist thou? She gessinge for he was a gardener, seith to him, Sire, if thou hast takun him vp, seye to me, where thou hast put him, and I schal take him a wey. Jhesu seith to hir, Marie. She conuertid seith to him, Rabbony, that is seid, maistir. Jhesu seith to hir, Nyle thou touche me, for I haue not ȝit styȝed to my fadir; forsothe go to my britheren, and seye to hem, I stye to my fadir and ȝoure fadir, to my God and ȝoure God. Mary Mawdeleyn cam, tellinge to disciplis, For I syȝ the Lord, and thes thingis he seide to me. Therfore whanne euentid was in that day, oon of the sabotis, and the ȝatis weren schitt, where disciplis weren gederid, for the drede of Jewis, Jhesu cam, and stood in the myddel of hem, and seide to hem, Pees to ȝou. And whanne he hadde seid this thing, he schewide to hem hondis and the syde; therfore the disciplis ioyeden, the Lord seyn. Therfore he seith to hem eft, Pees to ȝou; as the fadir sente me, and I sende ȝou. Whanne he hadde seid thes thingis, he blew ynne, and seide, Take ȝe the Hooly Gost; whos synnes ȝe schulen forȝyue, thei ben forȝouun; and whos synnes ȝe schulen withholde, thei ben withholdun. Forsothe Thomas, oon of the twelue, that is seid Didymus, was not with hem, whanne Jhesu cam. Therfore othere disciplis seiden, We han seyn the Lord. Forsothe he seide to hem, No but I schal se in his hondis the ficching of naylis, and schal sende my fyngris in to places of naylis, and I schal sende myn honde in to his syde, I schal not bileue. And aftir eiȝte dayes eft his disciplis weren with ynne, and Thomas with hem. Jhesu cam, the ȝatis schitt, and stood in the myddel, and seide, Pees to ȝou. Aftirward he seith to Thomas, Bryng yn hidur thi fyngur, and se myn hondis, and bryng to thin hond, and send in to my syde, and nyle thou be vnbileueful, but feithful. Thomas answeride, and seide to him, My Lord and my God. Jhesu seith to him, Thomas, for thou hast seyn me, thou bileuedist; blessid ben thei, that syȝen not, and han bileuyd. Forsothe and Jhesus dide manye othere signes in the syȝt of his disciplis, whiche ben not writun in this book. Forsothe thes ben writun, that ȝe bileue, for Jhesu is Crist, the sone of God, and that ȝe bileuynge haue lyf in his name.
Aftirward Jhesu eft schewide him to his disciplis, at the see of Tyberias. Sothli he schewide thus. Ther weren to gidere Symount Petre, and Thomas, that is seid Didymus, and Nathanael, that was of the Cane of Galilee, and the sones of Zebedee, and tweye othere of his disciplis. Symount Petre seith to hem, I go for to fysche. Thei seyn to him, And we comen with thee. And thei ȝeden out, and stiȝeden in to a boot. And in that niȝt thei token nothing. Forsoth the morwe maad, Jhesu stood in the brynke; nethelees the disciplis knewen not, for it was Jhesu. Therfore Jhesu seith to hem, Children, wher ȝe han ony soupynge thing? Thei answeriden, Nay. He seide to hem, Send ȝe the nett in to the riȝthalf of the rowyng, and ȝe schulen fynde. Therfore thei senten the nett, and now thei myȝten not drawe it, for multitude of fyschis. Therfore thilke disciple, whom Jhesu louede, seide to Petre, It is the Lord. Symount Petre, whanne he hadde herd for it was the Lord, girte him with a coote, sothli he was nakid, and sente him in to the see. Sothli othere disciplis camen by boot, for thei weren not fer fro the lond, but as two hundrid cubitis, drawynge the nett of fischis. Therfore as thei camen doun in to the lond, thei syȝen colis put, and a fysch put aboue, and breed. Jhesu seith to hym, Brynge ȝe of the fischis, whiche ȝe han taken now. Symount Petre stiȝede vp, and drowȝ the nett in to the lond, ful of grete fischis, an hundrid fyfti and thre; and whanne thei weren so greete, the nett is not brokun. Jhesu seith to hem, Come ȝe, ete ȝe. And no man of the sittinge at mete durste axe him, Who art thou, witinge for it is the Lord. And Jhesu cam, and took breed, and ȝaf to hem, and the fysch also. Now this thridde day Jhesu is schewid to his disciplis, whanne he hadde rise aȝen fro deed men. Therfore whanne thei hadden etyn, Jhesu seith to Symount Petre, Symount of John, louest thou me more than thes don? He seith to hym, Ȝhe, Lord, thou wost for I loue thee. Jhesu seith to him, Feede thou my lambren. Eft he seith to hym, Symount of John, louest thou me? And he seith to him, Ȝhe, Lord, thou wost for I loue thee. He seith to him, Feede thou my lambren. He seith to him the thridde tyme, Symount of John, louest thou me? Petre is sori, for he seith to him the thridde tyme, Louest thou me, and he seith to him, Lord, thou wost alle thingis; thou wost for I loue thee. Jhesu seith to him, Feede thou my scheep. Treuli, treuli, I seie to thee, whanne thou were ȝongere, thou girdedist thee, and wandridest where thou woldist; sothli whanne thou schalt wexe eldere, thou schalt holde forth thin hondis, and anothir schal girde thee, and leede thee whidir thou wolt not. Sothli he seide this thing, signyfyinge by what deeth he was to glorifiynge God. And whanne he hadde seid thes thingis, he seith to him, Sue thou me. Petre conuertid syȝ thilke disciple, whom Jhesu louede, and which restide in the souper on his brest, and he seide to hym, Lord, who is it, that schal bitraye thee? Therfore whanne Petre hadde seyn this disciple, he seith to Jhesu, Lord, what forsothe this? Jhesu seith to him, So I wole him dwelle til I come, what to thee? sue thou me. Therfore this word wente out among britheren, for thilke disciple deyeth not. And Jhesu seide not to him, for he deieth not, but, So I wole him dwelle til I come, what to thee? This is thilke disciple, that berith witnessing of thes thingis, and wroot thes thingis; and we witen, for his witnessing is trewe. Forsothe there ben and manye othere syngnes, or myraclis, that Jhesu dide, whiche if thei ben writun by eche by hem silue, I deme neither the world him silf to mowe take tho bookis, that ben to be writun.
Copyright © 2013–2026 Jeremy J. Johnson. All rights reserved.