1 2 3 4 5 6 7 8 9 10 11 12 13 14 15 16
The bigynnynge of the gospel of Jhesu Crist, the sone of God. As it is writun in Ysaie, the prophete, Lo! I sende myn angel bifore thi face, that schal make thi weye redy bifore thee. The voice of oon cryinge in desert, Make ȝe redy the weye of the Lord, make ȝe his pathis riȝtful. Jhon was in desert baptisynge, and prechinge the baptym of penaunce, in to remiscioun of synnes. And alle men of Jerusalem wenten out to him, and al the cuntre of Judee; and weren baptisid of him in the flood of Jordan, knowlechinge her synnes. And John was clothid with heeris of camelis, and a girdil of skyn abowte his leendis; and he eet locustus, and hony of the wode, and prechide, seyinge, A strengere than I schal come aftir me, of whom I knelinge am not worthi for to vndo, or vnbynde, the thwong of his schoon. I haue baptisid ȝou in water; forsothe he shal baptise ȝou in the Holy Goost. And it is don in thoo dayes, Jhesus came fro Nazareth of Galilee, and was baptisid of Joon in Jordan. And anoon he styinge vp of the water, sayȝ heuenes openyd, and the Holy Goost cummynge doun as a culuere, and dwellynge in hym. And a voys is maad fro heuenes, Thou art my sone loued, in thee I haue plesid. And anon the Spirit puttide hym in to desert. And he was in desert fourty dayes and fourty niȝtis, and was temptid of Sathanas, and was with beestis, and angelis mynystriden to hym. Forsothe after that Joon was taken, Jhesus came in to Galilee, prechinge the gospel of the kyngdam of God, and seiynge, For tyme is fulfillid, and the kyngdam of God shal come niȝ; forthinke ȝee, or do ȝee penaunce, and bileue ȝee to the gospel. And he passynge bisidis the see of Galilee, say Symont, and Andrew, his brother, sendynge nettis in to the see; sothely thei weren fishers. And Jhesus seide to hem, Come ȝee after me; I shal make ȝou to be maad fishers of men. And anoon the nettis forsaken, thei sueden hym. And he gon forth thennes a litil, say James of Zebede, and Joon, his brother, and hem in the boot makynge nettis. And anoon he clepide hem; and Zebede, her fadir, left in the boot with hirid seruauntis, thei sueden hym. And thei wenten forth in to Cafarnaum, and anoon in the sabotis he gon yn into the synagoge, tauȝte hem. And thei wondreden on his techynge; sothely he was techynge hem, as hauynge power, and not as scribis. And in the synagoge of hem was a man in an vnclene spirit, and he criede, seyinge, What to vs and to thee, thou Jhesu of Nazareth? haste thou cummen bifore the tyme for to destroie vs? Y woot that thou art the holy of God. And Jhesus thretenyde to hym, seyinge, Wexe dowmb, and go out of the man. And the vnclene goost debrekynge hym, and cryinge with grete vois, wente awey fro hym. And alle men wondriden, so that thei souȝten togidre amonge hem, seyinge, What is this thinge? what is this newe techyng? for in power he comaundith to vnclene spiritis, and thei obeyen to hym. And the tale, or tything, of hym wente forth anoon in to al the cuntree of Galilee. And anoon thei goynge out of the synagoge camen in to the hous of Symont and Andrew, with James and Joon. Sothely and the modir of Symontis wif sik in feueris restide, or lay; and anoon thei seien to hym of hir. And he cummynge to, reride hir vp, the hond of hir taken, and anoon the feuere left hire, and she mynystride to hem. Forsothe the euenynge maad, whenne the sone wente doun, thei brouȝten to hym alle hauynge yuel, and hauynge deuelis. And al the cite was gaderid at the ȝate. And he helide many that weren traueilide with dyuers soris, and he castide out many deuelis, and he suffride hem nat for to speke, for thei knewen hym. And in the morewynge ful erly he rysynge, gon out, wente in to desert place, and preiede there. And Symont suede hym, and thei that weren with hym. And whanne thei hadden founden hym, thei seiden to hym, For alle men seeken thee. And he seith to hem, Go we in to the nexte townes and citees, that and there I preche, for to this thing I came. And he was prechynge in the synagogis of hem, and in alle Galilee, and castynge out fendis. And a leprous man cam to hym, bisechynge hym, and, the knee folden, seide, Ȝif thou wolt, thou maist clense me. Forsothe Jhesus, hauynge mercy on hym, streiȝt out his hond, and, touchynge hym, seith to hym, I wole, be thou maad clene. And whanne he hadde seide, anoon the lepre partide awey fro hym, and he is clensid. And he thretenyde to hym, and anoon he putte hym out, and seith to hym, Se thou, seie to no man; but go, shewe thee to the princis of prestis, and offre for thi clensynge tho thingis that Moyses badde, in to witnessynge to hem. And he, gon out, biganne to preche, and diffame, or puplishe, the word, so that nowe he miȝte nat opynly go in to the citee, but be with out forth in deserte placis; and thei camen to gidre to hym on alle sydis.
And eft he entride in to Capharnaum, after eiȝte days. And it is herd, that he was in an hous, and many camen togidre, so that it tok nat, nether at the ȝate. And he spac to hem a word. And there camen to hym men bryngynge a man sike in palesie, the whiche was borun of foure. And whanne thei miȝte nat offre hym to hym for the campanye of peple, thei maden the roof nakid, wher he was; and makynge opyn, thei senten doun the bedd, in whiche the sike man in palasie lay. Sothely whanne Jhesus say the feith of hem, he seith vnto the sike man in palasie, Sone, thi synnes ben forȝouen to thee. Forsothe there weren summe of the scribis sittynge, and thenkynge in her hertis, What spekith he thus? He blasfemeth; who may forȝeue synnes, no but God alone? The whiche thing anoon knowen by the Holy Goost, for thei thouȝten so with inne hem self, Jhesus seith to hem, What thenken ȝee these thingis in ȝoure hertis? What is liȝtere for to seie to the sike man in palasie, Synnes ben forȝouen to thee, or for to seie, Ryse, take thi bed, and walke? Sothely that ȝee wite that mannes sone hath powere in erthe to forȝeue synnes, he seith to the sike man in palasie, I seie to thee, ryse vp, take thi bed, and go in to thin hous. And anoon he roos vp, and, the bed taken vp, he wente bifore alle men, so that alle men wondriden, and honouriden God, seyinge, For we sayen neuer so. And he wente out eftsone to the see, and al the cumpanye of peple cam to hym; and he tauȝte hem. And whenne he passide, he say Leui Alfey sittynge at the tolbothe, and he seith to hym, Sue thou me. And he rysynge suede hym. And it is don, whenne he sat at the mete in his hous, many puplicanys and synful men saten togidre at the mete with Jhesu and his disciplis; sothely there weren manye that foleweden hym. And scribis and Pharisees seeyinge, for he eet with puplicanys and synful men, seiden to his disciplis, Whi ȝoure maister etith and drinkith with puplicanys and synners? This thing herd, Jhesus seith to hem, Hoole men han no nede to a leche, but thei that han yuele; forsothe I cam not for to clepe iuste men, but synners. And disciplis of Joon and the Pharisees weren fastynge; and thei camen, and seien to hym, Whi disciplis of Joon and of Pharisees fasten, but thi disciplis fasten nat? And Jhesus seith to hem, Whether the sonnys of weddyngis mown faste, as long as the spouse is with hem? Hou longe tyme thei han the spouse with hem, thei mowe nat faste. Forsothe dayes shulen come, whenne the spouse shal be taken awey from hem, and thanne thei shulen faste in thoo days. No man seweth a pacche of rude, or newe, clothe to an old clothe, ellis he takith awey the newe supplement, or pacche, and a more brekynge is maad. And no man sendith newe wyn in to oold botelis, or wyne vesselis, ellis the wyn shal berste the wyn vesselis, and the wyn shal be held out, and the wyne vesselis shulen perishe. But newe wyn shal be sent in to newe wyn vesselis. And it is don eftsoone, whanne the Lord walkide in the sabothis by the cornes, and his disciplis bigunnyn to passe forth, and plucke eris. Sothly the Pharysees seiden, Loo! what don thi disciplis in sabotis, that is nat leeueful. And he seith to hem, Radde ȝee neuere what Dauyth dide, whanne he hadde neede, and he hungride, and thei that weren with hym? Hou he wente in into the hous of God, vndir Abiathar, prince of prestis, and eete loouys of proposicioun, the whiche it was nat leeful to ete, no but to prestis alone, and he ȝaue to hem that weren with hym. And he seide to hem, The sabote is maad for man, and nat a man for the sabote; and so mannys sone is lord also of the saboth.
And he entride eftsoone in to the synagoge, and ther was a man hauynge a drye hond. And thei aspieden hym, ȝif he helide in sabothis, for to accuse hym. And he seith to the man hauynge a drye hond, Ryse in to the mydil. And he seith to hem, Is it leeueful to do wel in the sabothis, or yuele? for to make a soule saaf, whether to lese? And thei weren stille. And he biholdynge hem aboute with wrathe, hauynge sorwe vpon the blyndnesse of her herte, seith to the man, Holde forth thin honde. And he helde forth, and the honde is restorid to hym. Sothely Pharisees goynge out anoon, maden a counseil with Herodyans aȝeins hym, hou thei shulden lese hym. Forsothe Jhesus with his disciplis wente to the see; and myche cumpanye from Galilee and Judee suede hym, and fro Jerusalem, and fro Ydume, and biȝendis Jordan, and thei that aboute Tyre and Sydon, a grete multitude, heerynge the thingis that he dide, camen to hym. And Jhesus seith to his disciplis, that the litil boot shulde serue hym, for the cumpanye of peple, lest thei oppressiden hym; sothely he helide many, so that thei felden fast to hym, that thei shulden touche hym. Forsothe hou many euere hadden soris, or woundis, and vnclene spiritis, whenne thei seien hym, felden down to hym, and crieden, seyinge, Thou art the sone of God. And gretely he manasside hem, that thei shulden nat make hym opyn, or knowen. And he styinge in to an hil, clepide to hym whom he wolde; and thei camen to hym. And he made, that there weren twelue with hym, and that he shulde sende hem for to preche. And he ȝaue to hem power of heelynge siknessis, and of castynge out fendis. And to Symount he putte name Petre, and James of Zebede and Joon, the brother of James, and he putte to hem names Boonerges, that is, the sones of thondrynge; and Andrew and Philip, and Bartholomewe and Mathew, and Thomas and James Alfey, and Thadee and Symount Cananee, and Judas Scarioth, that bitraide hym. And thei comen to an hous, and the cumpanye of peple came togidre eftsoone, so that thei miȝte not nether ete breed. And whanne his kynnesmen hadden herdde, thei wenten out for to holde hym; sothely thei seiden, for he is turnyd in to wodenesse. And the scribis that camen doun fro Jerusalem, seiden, For he hath Belsebub, and for in the prince of deuels he castith out fendis. And, hem gadrid togidre, he seide to hem in parablis, Hou may Sathanas caste out Sathanas? And if a rewme be departide in itself, the ilke rewme may not stonde. And if an hous be disparpoilid on it self, thilke hous may not stonde. And if Sathanas hath risen aȝeins hym self, he is disparpoilid, and he shal not mowe stonde, but hath an ende. No man, gon in to a stronge mannes hous, may take awey his vessels, no but he bynde firste the stronge man, and thanne he shal diuersly rauyshe his hous. Trewly I seie to ȝou, for alle synnes and blasphemyes, by whiche thei han blasfemed, shulen be forȝouen to the sones of men. Sothely he that shal blasfeme aȝeins the Holy Gost, shal not haue remissioun in to with outen eend, but he shal be gilty of euerlastynge trespas. For thei seiden, He hath an unclene spirit. And his modir and bretheren comen, and thei stondynge with oute forth, senten to hym, clepynge hym. And a cumpany sat aboute hym; and thei seien to hym, Lo! thi modir, and thei bretheren with outen forth seken thee. And he answerynge to hem seith, Who is my modir and my bretheren? And biholdynge hem aboute, that saten in the cumpas of hym, he seith, Lo! my modir and my bretheren. Forsoth who that doth the will of God, he is my brother, and my sister, and modir.
And eft Jhesus bigan for to teche at the see; and myche cumpany of peple is gedrid to hym, so that he styinge in to a boot, sat in the see, and al the cumpany of peple was aboute the see, on the lond. And he tauȝte hem in parablis many thingis. And he seide to hem in his techynge, Heere ȝee. Loo! a man sowynge goth out for to sowe. And the while he sowith, an other seed felde aboute the wey, and briddis of heuene, or of the eire, camen, and eeten it. Forsothe an other felde doun on stony placis, wher it had nat myche erthe; and anoon it sprong vp, for it hadde nat depnesse of erthe. And whenne the sunne rose vp, it welwide for heete, and it dried vp, for it hadde not roote. And an other felde doun into thornes, and thornes stieden vp, and strangliden it, and it ȝaue not fruyt. And an other felde doun in to good lond, and ȝaue fruyt, styinge vp, and wexinge; and oon brouȝte thritty fold, and oon sixtyfold, and oon an hundridfold. And he seide, He that hath eris of heeryng, heere. And whenne he was singuler, or by hym silf, the twelue that weren with hym axiden hym for to expowne the parable. And he seide to hem, To ȝou it is ȝouen for to knowe the mysterie, or pryuite, of the kyngdam of God. Sothely to hem that ben with oute forth, alle thingis ben maad in parablis, that thei seynge se, and se nat, and thei heerynge heere, and vnderstonde not; that sum tyme thei be conuertid, and synnes be forȝouen to hem. And he seith to hem, Witen not ȝee this parable? and howe ȝee shulden knowe alle parablis? He that sowith, sowith a word. These sothly ben that aboute the weye, where the word is sowun; and whenne thei han herd, anoon cometh Sathanas, and takith awey the word that is sowun in her hertis. And also these ben that ben sown on a stoon, the whiche whanne thei han herd the word, anoon taken it with ioye; and thei han nat roote in hem silf, but thei ben temporal, that is, lasten a lityl tyme; afterward tribulacioun sprongen vp, and persecucioun for the word, anoon thei ben sclaundrid. And there ben other that ben sowun in thornis; these it ben, that heeren the word, and myseiste of the world, and disseit of richessis, and other charge of coueitise entrynge ynne, strangulen the word, and it is maad with outen fruyt. And these it ben that ben sowun on good lond, the whiche heren the word, and taken, and maken fruyt, oon thritti fold, oon sixti fold, and oon an hundrid. And he seide to hem, Wher a lanterne come, that it be put vndir a bushel? wher not, that it be put vpon a candil stike? Forsothe ther is no thing hid, that shal not be maad opyn; nether ony thing is preuy, the whiche shal not come in to apert. If ony man haue eeris of heryng, heere he. And he seide to hem, Se ȝee what ȝee heeren. In what mesure ȝee meten, it shal be meten to ȝou, and be kast to ȝou. Sothely it shal be ȝouen to hym that hath, and it shal be taken awey from hym that hath not, also that that he hath. And he seide, So the kingdom of God is, as if a man caste seed in to the erthe, and it slepe, and ryse vp in niȝt and day, and brynge forth seed, and wexe faste, the while he wote not. Forsothe the erthe by his owne worchynge makith fruyt, first an erbe, or grene corn, afterward an eere, afterward ful fruyt in the ere. And whanne of it silf it hath brouȝt forth fruyt, anoon he sendith a sikil, or hook, for rype corn cometh. And he seide, To what thing shulden we likene the kyngdom of God? or to what parable shulen we comparisoune it? As a corn of seneueye, the which whann it is sowun in the erthe, is lesse than alle seedis that ben in erthe; and whanne it is bredd, or quykened, it styȝeth vp in to a tree, and is maad more than alle wortis, or erbis; and it shal make grete braunchis, so that briddis of heuene mowe dwelle vndir the shadewe ther of. And in many siche parablis he spac to hem a word, as thei miȝten heer; sothely he spak not to hem with outen parable. Forsothe he expounyde to his disciplis alle thingis on sidis hond, or by hem self. And he seith to hem, in that day, whenne euenyng was maad, Passe we aȝeinward. And thei leeuynge the cumpanye of peple, taken hym, so that he was in the boot; and other bootis weren with hym. And a greet storme of wynd is maad, and sente wawis in to the boot, so that the boot was ful. And he was in the hyndir part of the boot, slepynge on a pilewe. And thei reysen hym, and seien to hym, Maistre, perteneth it nat to thee, that we perishen? And he rysynge vp, manasside to the wynd, and seide to the see, Be stille, wexe doumb. And the wynd ceeside, and greet pesiblenesse is maad. And he seith to hem, What dreden ȝee? Nat ȝit han ȝee feith? And thei dredden with greete dreed, and seiden to eche other, Who, gessist thou, is this? for the wynd and the see obeyshen to hym.
And thei camen ouer the wawe of the see into the cuntree of Genazareth. And anoon a man in vnclene spirit ran out of a biryel, to hym goynge out of the boot. The whiche man hadde an hous in graues, or biriels, and nether with chaynis now miȝte eny man bynde hym. For oft tymes he bounden in stockis and chaynes, hadde broken the chaynes, and hadde brokun the stockis to smale gobetis, and no man miȝte daunte, or make tame, hym. And euer more, niȝt and day, in biriels and hillis, he was cryinge, and betynge hym silf with stoones. Sothely he seynge Jhesus afer, ran, and worshipide hym. And he cryinge with greet voice, seide, What to me and to thee, thou Jhesu, the sone of God hieste? I conioure thee bi God, that thou tourmente not me. Forsothe Jhesus seide to hym, Thou vnclene spirit, go out fro the man. And Jhesus axide hym, What name is to thee? And he seith to hym, A legioun is name to me; for we ben manye. And he preide hym myche, that he shulde nat put hym out of the cuntreie. Forsothe there was there aboute the hill a flock of hoggis lesewynge in feeldis. And the spiritis preieden Jhesu, seyinge, Sende vs into hoggis, that we entre into hem. And anoon Jhesus grauntide to hem. And the vnclene spiritis entriden in to the hoggis, and with greet bire, or haste, the floc was cast doun in to the see, to tweyne thousynde, and thei ben strangelid in the see. Sothely thei that fedden hem, fledden, and tolden in to the citee, and in to the feeldis; and thei wenten out, for to see what was don. And thei camen to Jhesu, and thei seen hym that was traueilid of the fend, sittynge clothid, and of hoole mynde; and thei dreden. And thei tolden to hem, that sayen, hou it was don to hym that hadde a fend, and of the hoggis. And thei bygunnen for to preie hym, that he shulde go awey fro her coostis. And when he stiede in to a boot, he that was traueilid of the deuel, bygan to preye hym, that he shulde be with hym. Sothly Jhesus resceyued hym nat, but seith to hym, Go thou in to thin hous to thine, and telle to hem, hou many thingis the Lord hath don to thee, and hadde mercy of thee. And he wente forth, and bigan for to preche in Decapoly, that is, a cuntree of ten citees, hou manye thingis Jhesus hadde don to hym; and alle men wondriden. And whanne Jhesus hadde stiede in to the boot eftsoone ouer the see, myche cumpanye of peple cam togidre to hym, and was aboute the see. And oon of the princis of synagogis, by name Jayrus, cam, and seyinge hym, fel doun at his feet, and preiede hym myche, seyinge, For whi my douȝter is in the laste thingis; come thou, putte thin hond on hire, that she be saaf, and lyue. And he wente forth with hym, and myche cumpanye of peple suede hym, and oppresside hym. And a womman that was in the flux of blood twelue ȝere, and hadde suffride many thingis of ful many lechis, and spendid alle hir thingis, and no thing prophitide, but more hadde worse, whanne she hadde herd of Jhesu, she cam in the cumpanye byhynde, and touchide his cloth. Sothly she seide, For if I shal touche or his cloth, I shal be saaf. And anoon the welle of blood is dried vp, and she felide in body that she was helid of the wound, or sikenesse. And anoon Jhesus knowynge in hym silf the vertu that was gon out of hym, he, turned to the cumpenye, seith, Who touchede my clothis? And his disciplis seiden to hym, Thou seest the cumpenye pressinge thee, and seist thou, Who touchide me? And Jhesus lokide aboute, for to see hir that hadde don this thing. Forsothe the womman dredinge and quakynge, witynge that it was don in hir, cam, and fel down bifore him, and seide to hym al treuthe. Forsothe Jhesus seide to hir, Douȝtir, thi feith hath maad thee saf; go in pees, and be saf fro thi sykenes. Ȝit him spekynge, messageris camen to the prince of a synagoge, seyinge, For thi douȝtir is deed; what traueilist thou the maistir ferthere? Forsothe the word herd that was seide, Jhesus seith to the prince of the synagoge, Nyle thou drede, oonly byleue thou. And he resceyuede not ony man to sue him, no but Petre, and James, and John, the brother of James. And thei camen in to the hous of the prince of the synagoge. And he siȝ noyse, and men wepinge and weilinge moche. And he gon yn, seith to hem, What ben ȝee troublid, and wepyn? The wenche is not deed, but slepith. And thei scorneden him. Forsothe alle kast out, he takith the fadir and modir of the wenche, and hem that weren with him, and thei entren yn, where the wenche lay. And he holdinge the hond of the wenche, seith to hir, Tabita, cumy, that is interpretid, or expownid, Wenche, to thee I seie, rise thou. And anon the wenche roos, and walkide; sothly she was of twelue ȝeer. And thei weren abaischt with greet stoneyinge. And he comaundide to hem greetly, that no man schulde wite it. And he comaundide to ȝiue to hir for to ete.
And Jhesus gon out thennis, wente in to his owne cuntree; and his disciplis folwiden him. And the saboth maad, Jhesus bigan for to teche in a synagoge. And manye heeringe wondriden in his techinge, seyinge, Of whennis to this alle these thingis? and what is the wysdom that is ȝouun to him, and suche vertues the whiche ben maad by his hond? Wher this is not a smyth, or carpenter, the sone of Marie, the brother of James and Joseph and Judas and Symound? wher and his sistris ben nat here with vs? And thei weren sclaundrid in him. And Jhesus seide to hem, For a prophete is not with outen honour, no but in his owne cuntree, and in his hows, and in his kyn. And he myȝte not make there ony vertu, no but heelide a fewe sike men, the hondis put to. And he wondride for the vnbileue of hem. And he wente aboute castelis in enuyrown, techinge. And he clepide twelue, and bigan for to sende hem bi tweyne; and ȝaf to hem power of vnclene spiritis, and comaundide hem, that thei schulde not take ony thing in the weye, no but a ȝerd oonly, not a scrippe, not bred, neither money in the girdil, but schoon with sandalies, that ben opyn aboue, and that thei weren not clothid with tweie cootis. And he seide to hem, Whidir euere ȝee schulen entre in to an hous, dwelle ȝe there, till ȝe gon out thennis. And who euere schulen not resseyue, ne heere ȝou, ȝe goynge out fro thennes shake awey the powdre fro ȝoure feet, in to witnessinge to hem. And thei goynge out, prechiden, that men schulden do penaunce. And thei castiden out many fendis, and anoyntiden with oyle manye syke men, and thei weren heelid. And kyng Eroude herde, forsothe his name was maad opyn, and he seide, For Johne Baptist hath risun aȝen fro deed men, and therfore vertues worchen in hym. Sothely othere seiden, For it is Ely; but othere seiden, For it is a prophete, as oon of prophetis. The whiche thing herd, Eroude seith, Whom I haue bihedid, John, this hath risun fro deed men. Forsothe the ilke Eroude sente, and held Joon, and bond him in to prisoun, for Erodias, the wyf of Philip, his brother; for he hadde weddid hir. Sothly Johne seide to Eroude, It is not leefful to thee, for to haue the wyf of thi brother. Erodias forsothe leide aspies to him, and wolde sle him, and miȝte not. Sothly Eroude drede John, witinge him a iust man and hooly, and kepte him. And him herd, he dide many thingis, and gladly herde hym. And whanne a couenable day hadde fallun, Eroude in his birthe day made a soupere to the princis, and tribunys, and to the firste, or gretteste, of Galilee. And whanne the douȝter of thilke Erodias hadde entrid yn, and lepte, and pleside to Eroude, and also to men restynge, the kyng seide to the wenche, Axe thou of me what thou wolt, and I schal ȝyue to thee. And he swoor to hir, For what euere thou schalt axe, I schal ȝyue to thee, thouȝ the half of my kyngdom. The whiche, whanne sche hadde gon out, seide to hir modir, What schal I axe? And she seide, The heed of John Baptist. And whanne she hadde entrid anon with haste to the kyng, she axide, seyinge, I wole that anoon thou ȝyue to me in a dische the heed of John Baptist. And the kyng was sory for the ooth, and for men sittinge to gidere at mete he wolde not hir be maad sory; but a manquellere sent, he comaundide the heed of John Baptist for to be brouȝt. And he bihedide him in the prison, and brouȝte his heed in a dische, and ȝaf it to the wenche, and the wench ȝaf to hir modir. The which thing herd, his disciplis camen, and token his body, and puttiden it in a buriel. And apostlis comynge to gidere to Jhesu, tolden to hym alle thingis, that thei hadden don, and tauȝt. And he seith to hem, Come ȝe by ȝou selue in to a desert place; reste ȝe a litel. Forsoth there weren manye that camen, and wenten aȝen, and thei hadden not space for to ete. And thei stiȝynge in to boot, wenten in to a desert place by hem selue. And thei syȝen hem goynge awey, and manye knewen, and goynge on feet fro alle citees, thei runnen to gidere thidir, and came bifore hem. And Jhesus goynge out syȝ moche cumpanye, and hadde mercy on hem, for thei weren as scheepe not hauynge a shepherde. And he bigan for to teche hem manye thingis. And whanne moche our was maad now, his disciplis camen nyȝ, seyinge, This place is desert, and now the our hath passid; leeue hem, that thei goynge in to the nexte townes or vilagis, bye to hem metis whiche thei schulen ete. And he answerynge seith to hem, Ȝyue ȝe to hem for to ete. And thei seiden to hym, Goynge bye we loues with two hundrid pens, and we schulen ȝyue to hem for to ete. And he seith to hem, Hou many loues han ȝe? Go ȝe, and se. And whanne thei hadden knowun, thei seien, Fyue, and two fyschis. And he comaundide to hem, that thei schulden make alle men sitte to mete aftir cumpenyes, vpon greene hey. And thei saten down by parties, by hundridis, and fyfties. And the fyue looues taken, and two fyschis, he biholdynge in to heuene, blesside, and brak loouis, and ȝaf to his disciplis, that thei schulden putte bifore hem. And he departide two fyschis to alle; and alle eeten, and weren fillid. And thei token the relyues of broken mete, twelue coffyns full, and of the fyschis. Sothli thei that eeten, were fyue thousynd of men. And anon he constreynede his disciplis for to stiȝe vp in to a boot, that thei schulden passe bifore him ouer the see to Bethsayda, the while he lefte the peple. And whanne he hadde left hem, he wente in to an hil, for to preie. And whanne euenyng was, the boot was in the myddil see, and he aloone in the lond; and he syȝ hem trauelinge in rowynge; sothli the wynd was contrarie to hem. And aboute the fourthe waking of the nyȝt, he wandrynge on the see cam to hem, and wolde passe hem. And thei, as thei syȝen him wandrynge on the see, gessiden for to be a fantum, and crieden; forsoth alle syȝen hym, and thei weren disturblid. And anon he spak with hem, and seide to hem, Triste ȝe, I am; nyle ȝe drede. And he cam vp to hem in to the boot, and the wynd ceesside. And thei more wondriden with ynne hem; for thei vndirstoden not of the looues; sothli her herte was blyndid. And whanne thei hadden passid ouer the see, thei camen in to the lond of Genazareth, and setten to londe. And whanne thei hadden gon out of the boot, anon thei knewen him. And thei rennynge thurȝ al that cuntree, bigunnen to bere aboute in beddis hem that hadden hem yuele, where thei herden him be. And whidur euere he entride yn to vilagis and townes, or in to citees, thei puttiden syke men in stretis, and preieden him, that thei schulden touche either the hem of his cloth; and how manye euere touchiden him, weren maad saf.
And Pharisees and summe of scribis comynge fro Jerusalem, camen to gidere to him. And whanne thei hadden seyn summe of his disciplis ete breed with comune hondis, that is, not waischun, thei blamyden. Forsoth Pharisees and alle Jewis eten not, no but thei waisschen ofte her hondis, holdinge the tradiciouns, or statutis, of eldere men. And thei turnynge aȝen fro chepynge, eten not, no but thei ben waischun; and manye othere thingis ben, that ben takun to hem for to kepe, waischingis of cuppis, and cruetis, and of vessels of bras, and of beddis. And Pharisees and scribis axiden him, seyinge, Whi gon not thi disciplis aftir the tradicioun of eldere men, but with comyne hondis thei eten bred? And he answeringe seide to hem, Ysaie propheciede wel of ȝou, ypocritis, as it is writun, This peple worschipith me with lippis, forsothe her herte is fer fro me; in veyn trewli thei worschipen me, techinge doctrinys and preceptis of men. Forsoth ȝe forsakinge the maundement of God, holden the tradiciouns of men, waischingis of cruetis, and cuppis; and manye othere thingis lyke to thes ȝe don. And he seide to hem, Wel ȝe han maad the maundement of God voyde, that ȝe kepe ȝoure tradicioun. Forsoth Moyses seide, Worschipe thi fadir and thi modir; and he that schal curse fadir or modir, by deeth deie he. Sothli ȝe seyen, If a man schal seye to fadir or to modir, Corban, that is, What euere ȝifte of me, schal profite to thee; and ouer ȝe suffren not him do ony thing to fadir or modir, brekynge the word of God by ȝoure tradicioun, that ȝe han ȝouun; and ȝe don manye othere suche thingis. And he eftsoone clepinge to the cumpanye of peple, seide to hem, Ȝe alle heere me, and vndirstonden. No thing with outen man is entringe in to him, that may defoule him; but tho thingis that comen forth of man, tho it ben that defoulen a man. Forsoth if ony man haue eeris of heeringe, heere he. And whanne he hadde entrid in to an hous, fro the cumpany of peple, his disciplis axiden him the parable. And he seith to hem, So and ȝe ben vnprudent, or vnwyse. Vndirstonden ȝe not, for al thing withoute forth entringe in to a man, may not defoule him? for it hath not entrid into his herte, but in to the wombe, and bynethe it goth out, purgynge alle metis. Sothli he seide, For the thingis that gon out of a man, tho defoulen a man. Forsoth fro withynne, of the herte of men comen forth yuele thouȝtis, auoutries, fornicaciouns, mansleyngis, theftis, couetises, or ouer hard kepynge of goodis, wickidnesses, gyle, vnchastite, yuel yȝe, blasphemyes, pride, folye. Alle thes yuelis fro withynne comen forth, and defoulen a man. And Jhesus risynge thennis, wente in to the endes of Tyre and Sidon. And he gon in to an hows, wolde no man wite; and he miȝte not dare, or be priuy. Sothli a womman, anon as sche herde of him, which wommanis douȝtir hadde an vnclene spirit, entride, and fel doun at his feet. Sothli the womman was hethene, of the generacioun of Sirefen And she preide him, that he wolde caste out a deuel fro hir douȝtir. The which seide to hir, Suffre thou the sones be fulfild first; it is not good to take the bred of sones, and sende to houndis. And she answeride, and seide to him, Forsothe, Lord; for whi and litle welpis eten vndir the bord, of the crummes of children. And Jhesus seith to hir, For this word go, the fend is went out of thi douȝtir. And whanne she hadde gon hom, she fond the wenche sittinge on the bedd, and the deuel gon out fro hir. And eftsoone Jhesus goynge out fro the endis, or coostis, of Tire, cam thurȝ Sidon to the see of Galilee, that is bitwixe the myddil endis of Decapoleos. And thei leeden to him a deef man and doumb, and preieden him, that he putte to him the hond. And he takynge him asydis fro the cumpanye, sente his fyngris in to his litle eeris; and spetinge towchide his tunge. And he biholdynge in to heuene, sorwide withynne, and seith, Effeta, that is, Be thou openyd, And anon his eeris weren openyd, and the bond of his tunge is unbounden, and he spak riȝtly. And he comaundide to hem, that thei schulden seye to no man; forsoth how moche he comaundide to hem, so moche more thei prechiden more, and by that the more thei wondriden, seyinge, He dide wel alle thingis, and deef men he made to heere, and doumbe for to speke.
In tho dayes, whanne moche cumpenye of peple was with Jhesu, and hadde not what thei schulden ete, his disciplis gaderid to gidere, he seith to hem, I haue rewthe on the cumpanye of peple, for loo! now the thridde day thei susteynen, or abyden me, and han not what thei schulen ete; and if I leeue hem fastinge in to her hous, thei schulen faile in the weye; forsothe summe of hem camen fro fer. And disciplis answeriden to him, Wherof a man schal mowe fille hem with looues here in wildirnesse? And he axide hem, How manye looues han ȝe? The whiche seiden, Seuene. And he comaundide the cumpanye to sitt doun on the erthe. And he takynge seuene looues, and doynge thankynges, brak, and ȝaf to his disciplis, that thei schulden putte forth. And thei setten forth to the cumpany. And thei hadden a fewe smale fischis; and he blesside hem, and comaundide for to be put forth. And thei eeten, and ben fulfild; and thei token vp that lefte of relyf, or smale gobatis, seuene leepis. Forsoth thei that eeten, weren as foure thousand of men; and he lefte hem. And anon he wente vp in to a boot, with his disciplis, and cam in to the partis of Dalmamytha. And Pharisees wenten out, and bigunnen to seke, or axe, with him, axynge a tokene of hym fro heuene, temptinge hym. And he sorwynge withynne in spirit, seith, What sekith this generacioun a tokene? Treuly I seie to ȝou, if a tokene schal be ȝouun to this generacioun. And he leeuynge hem, wente vp eftsoone in to a boot, and wente ouer the see. And thei forȝaten to take breed, and thei hadden not with hem no but o loof in the boot. And he comaundide to hem, seyinge, Se ȝe, and be ȝe war of the sourdowȝ of Pharisees, and sourdowȝ of Eroude. And thei thouȝten oon to another, seiynge, For we han not breed. The which thing knowun, Jhesus seith to hem, What thenke ȝe, for ȝe han not breed? Ȝit ȝe knowen not, ne vndirstonden; ȝit ȝe han ȝoure herte blyndid. Ȝe hauynge yȝen, seen not, and ȝe hauynge eeris, heeren not; nether ȝe han mynde, whanne I brak fyue looues in to fiue thousande, and hou manye coffyns ful of brokene mete ȝe token vp? Thei seyn to him, Twelue. Whanne and seuene looues in to four thousande of men, how many leepis of brokene mete ȝe token vp? And thei seyen, Seuene. And he seide to hem, How vndirstonden ȝe not ȝit? And thei comen to Bethsayda, and thei bryngen to him a blynd man, and preieden hym, that he schulde touche him. And the hond of the blynd man takun, he ledde him out of the streete, and spetynge in to his yȝen, his hondis put to, he axide him, if he syȝ ony thing. And he biholdinge, seith, I se men as trees walkynge. Aftirward eftsoones he puttide hondis on his yȝen, and he bigan for to se, and he is restorid, so that he syȝ clerely alle thingis. And he sente him in to his hous, seyinge, Go in to thi hous; and if thou schalt go in to the streete, seye to no man. And Jhesus entride yn and his disciplis in to the castels of Sezarie of Philip. And in the weye he axide his disciplis, seiynge to hem, Whom seyn men me for to be? The whiche answeriden to hym, seiynge, Summe, John Baptist; othere seyn, Helye; but othere seyn, as oon of the prophetis. Thanne he seith to hem, But whom seye ȝe me for to be? Petre answeringe, seith to him, Thou ert Crist. And he thretenyde hem, that thei schulden nat seie to ony man of him. And he bigan for to teche hem, for it bihoueth mannis sone suffre manye thingis, and to be reproued of the hiȝeste prestis, and of eldere men, and scribis, and to be slayn, and aftir thre dayes, for to rise aȝen. And he spak playnli the word. And Petre takynge him, bygan for to blame him. The which turnyd, seynge his disciplis, manaside Petre, seiynge, Go aftir me, Sathanas; for thou sauerist not tho thingis that ben of God, but tho thingis that ben of men. And the cumpanye of peple gederid, with his disciplis, he seide to hem, If ony man wole sue me, denye he him self, and take he his cros, and sue he me. Sothly who so wole make his soule, that is, his lyf, saf, he schal leese it; forsothe he that schal leese his soule, that is, his lyf, for me and the gospel, schal make it saf. Sothli what profiteth it a man, if he wynne al the world, and do peyringe to his soule? or what chaungyng schal a man ȝyue for his soule? Forsoth who that schal knoleche me, and my wordis in this generacioun auoutresse, and mannis sone schal knowleche him, whanne he schal come in the glory of his fadir, with his aungels.
And he seide to hem, Treuly I seie to ȝou, for ther ben summe of men stondinge here, the whiche schulen not taste deeth, til thei sen the rewme of God comynge in vertu. And aftir sixe dayes Jhesus took Petre, and James, and John, and ledith hem by hem selue aloone in to an hiȝ hil; and he is transfigurid byfore hem. And his clothis ben maad schynynge and white ful moche as snow, and which maner clothis a fullere, or walkere of cloth, may not make white on erthe. And Helye with Moyses apperide to hem, and thei weren spekynge with Jhesu. And Petre answeringe seith to Jhesu, Maistir, it is good vs for to be here; make we here thre tabernaclis, oon to thee, oon to Moyses, and oon to Helye. Sothli he wiste not what he schulde seie; forsothe thei weren agast by drede. And ther is maad a cloude schadewinge hem; and a voys cam of the cloude, seyinge, This is my mooste deereworthe sone, heere ȝe him. And anon thei biholdinge aboute, syȝe no more any man, no but Jhesus oonly with hem. And hem comynge down fro the hil, he comaundide hem, that thei schulde not telle to any man tho thingis that thei hadde seyn, no but whanne mannis sone hath risun fro deede spiritis. And thei heelden the word at hem silf, sekynge what schulde be, whanne he hath risun fro deede. And thei axiden him, seyinge, What therfore seyn Pharisees and scribis, for it bihoueth Helye for to come first. The which answeringe seith to hem, Whanne Helye schal come first, he schal restore alle thingis; and hou it is writun in to mannis sone, that he suffre many thingis, and be despisid. But I seie to ȝou, for and Helye is comun, and thei diden to him what euere thingis thei wolden, as it is writun of him. And he comynge to his disciplis, syȝ a greet cumpany aboute hem, and scribis axynge with hem. And anon al the cumpanye seynge Jhesu, was astoneyed, and thei dreden; and thei rennynge to, greeten him. And he axide hem, What seken ȝe among ȝou? And oon of the cumpany answeringe seide, Maistir, I haue brouȝt to thee my sone hauynge an vnclene spirit; the which wher euere he schal take hym, hirtith him, and he frothith, or vometh, and betith to gidere with teeth, and wexith drye. And I seide to thi disciplis, that thei schulden caste hym out, and thei myȝten not. The which answeringe to hem seide, A! thou schrewid generacioun and out of bileue, hou longe schal I be at ȝou, hou longe schal I suffre ȝou? Brynge ȝe hym to me. And thei brouȝten hym to. And whanne he hadde seyn him, anon the spirit troublide him; and he cast doun in to the erthe, was walewid frothinge. And he axide his fadir, Hou moche of tyme it is, sithen this thing fel to him? And he seith, Fro childhod; and ofte he hath sent him and in to fier and in to watir, that he schulde leese him; but and if thou maist ony thing, help vs, hauynge mercy on vs. Sothli Jhesus seith to him, If thou maist bileue, alle thingis ben possible to a man bileuynge. And anon the fadir of the child criynge with teeris seide, Lord, I bileue; help thou myn vnbileuefulnesse. And whanne Jhesus hadde seyn the company of peple rennynge to gidere, he manaside to the vnclene spirit, seyinge to him, Thou deef and doumb spirit, I comaund thee, go out fro him, and entre not more in to him. And he criynge, and moche to-breidynge him, wente out fro him; and he is maad as deed, so that manye seiden, that he was deed. Forsoth Jhesus holdynge his hond, lifte vp him; and he roos. And whanne he hadde entrid in to an hous, his disciplis axiden him priuely, Whi myȝten not we caste hym out? And he seyde to hem, This kynde in no thing may go out, no but in preier and fastinge. And thei gon fro thennis, wenten forth in to Galile; and he wolde no man wite. He tauȝte his disciplis, and seide to hem, For mannus sone schal be bitrayed in to the hondis of men, and thei schulen sle him, and he slayn, on the thridde day schal rise aȝen. And thei knewen not the word, and dredden for to axe him. And thei camen to Cafarnaum. Which whenne he was in the hous, axide hem, What tretiden ȝe in the weie? And thei weren stille; sothli thei disputiden among hem in the weie, who of hem schulde be more. And he sittinge clepide the twelue, and seith to hem, If any man wole be the first among ȝou, he schal be the laste, and mynystre of alle. And he takinge a childe, ordeynede him in the myddil of hem; whom whanne he hadde byclippid, he seith to hem, Who euere schal receyue oon of suche children in my name, he receyueth me; and who euere receyueth me, he receyueth not me aloone, but him that sente me. John answeride to him, seyinge, Maistir, we syȝen sum oon for to caste out fendis in thi name, the which sueth not vs, and we han forbedun him. Sothli Jhesus seith to him, Nyle ȝe forbede him; ther is no man that doth vertu in my name, and may soone speke yuele of me. Forsothe he that is not aȝens vs, is for vs. Sothli who euere schal ȝyue drynke to ȝou a cuppe of cold watir in my name, for ȝe ben of Crist, treuly I seie to ȝou, he schal not leese his mede. And who euere schal sclaundre oon of thes litle bileuynge in me, it is good to him that a mylne stoon of assis were don aboute his necke, and were sent in to the see. And if thin hond sclaundre thee, kitt it awey; it is good to thee feble to entre in to lyf, than hauynge twey hondis go in to helle, in to fier that neuere schal be quenchid, where the worm of hem deieth not, and the fier is not quenchid. And if thi foot sclaundre thee, kitt it of; it is good to thee for to entre crokid in to euerlasting lyf, than hauynge twey feet to be sent in to helle of fier, that neuer schal be quenchid, where the worm of hem deieth not, and the fier is not quenchid. That if thin yȝe sclaundre thee, cast it out; it is good to thee for to entre gogil yȝed in to rewme of God, than hauynge twey yȝen for to be sent in to helle of fier, where the worm of hem deieth not, and the fier is not quenchid. Forsoth euery man schal be saltid, or maad sauori, with fier, and euery slayn sacrifice schal be sauorid with salt. Salt is good thing; that if salt be vnsauori, in what thing schulen ȝe make it sauori? Haue ȝe salt in ȝou, and haue ȝe pees among ȝou.
And Jhesus risynge vp fro thennis, cam in to the endis of Jude ouer Jordan; and eftsoones the cumpanyes of peple camen to gidere to him, and as he was wont, eftsoone he tauȝte hem. And Pharisees comynge nyȝ, axiden him, If it be leefful to a man for to leeue, or forsake, his wyf? temptinge him. And he answeringe seith to hem, What comaundide Moyses to ȝou? The whiche seiden, Moyses suffride to write a libel of forsakinge, and to forsake. To whom Jhesus answeringe seith, To the hardnesse of ȝoure herte Moyses wroot to ȝou this precept. Forsothe fro the bigynnyng of creature God made hem male and female; and he seide, For this thing a man schal leeue fadir and modir, and schal clefe to his wif, and thei schulen be tweyne in o fleisch. And so now thei ben not tweyne, but o fleisch. Therfore that thing that God ioynede to gidere, no man departe. And eftsoone in the hows his disciplis axiden him of the same thing. And he seith to hem, Who euere schal leeue his wyf, and wedde another, he doth auoutrie vpon hir. And if the wyf schal leeue hir hosebonde, and be weddid to another, she doth auoutrie. And thei offriden to him litle children, that he schulde touche hem; sotheli disciplis thretenyden to men offringe. Whom whanne Jhesus hadde seyn, he baar heuye, or vnworthili, and seith to hem, Suffre ȝe litle children for to come to me, and forbede ȝe hem not, forsoth of suche is the kyngdom of God. Treuli I seie to ȝou, who euere schal not receyue the kyngdom of God as this litle child, he schal not entre in to it. And he biclippinge hem, and puttinge hondis vpon hem, blesside hem. And whanne Jhesus was gon out in the weye, o man rennynge bifore, the kne bowid, preiede him, seiynge, Goode maistir, what schal I do, that I receyue euerlastinge lyf? Forsothe Jhesus seide to him, What seist thou me good? No man good, no but God aloone. Thou hast knowen the comaundementis, do thou non auoutrie, sle not, stele not, seie not fals witnessinge, do no fraude, worschipe thi fadir and modir. And he answeringe seith to him, Maistir, I haue kept alle these thingis fro my ȝouthe. Sothli Jhesus biheld him, and louyde hym; and he seide to him, O thing failith to thee; go thou, selle thou what euere thingis thou hast, and ȝyue to pore men, and thou schalt haue tresour in heuene; and come, sue thou me. The which maad sorwful in the word, wente awey mornynge, forsoth he was hauynge many possesciouns. And Jhesus biholdinge aboute, seith to his disciplis, How hard thei that han money schulen entre in to the kyngdom of God. Forsothe the disciplis weren stoneyed in his wordis. And Jhesus eftsoone answeringe seith to hem, Ȝe litle sones, how hard thing it is, men tristynge in richessis for to entre in to the kyngdom of God. It is liȝter, or esyer, a camel for to passe thorw a nedlis yȝe, than a riche man for to entre in to the kyngdom of God. Whiche wondriden more, seyinge at hem selue, And who may be maad saf? And Jhesus biholdinge hem, seith to hem, Anentis men it is impossible, but not anemptis God; for alle thingis ben possible anemptis God. And aftirward Petre bigan for to seye to him, Loo! we han left alle thingis, and han sued thee. Jhesus answeringe seith, Treuli I seie to ȝou, ther is no man that schal leeue hous, or bretheren, or sistris, or fadir, or modir, or sones, or feeldis for me and for the gospel, the which schal not taken an hundridfold so moche now in this tyme, housis, and bretheren, and sistris, and modris, and sones, and feldis, with persecuciouns, and in the world to comynge euerlasting lyf. Forsoth many schulen be, the firste the laste, and the laste the firste. Forsothe thei weren in the weye stiȝynge to Jerusalem; and Jhesus wente bifore hem, and thei wondriden, and folowinge dredden. And eftsoone Jhesus takinge to twelue, bygan to seye to hem, what thingis weren to come to him. For lo! we stiȝen to Jerusalem, and mannus sone schal be bitrayed to the princes of prestis, and to scribis, and to eldere men; and thei schulen dampne him by deeth, and thei schulen bytake him to hethene men. And thei schulen scorne him, and byspeete him, and beete him; and thei schulen sle him, and in the thridde day he schal ryse aȝen. And James and Jon, Zebedees sones, camen nyȝ to him, seyinge, Maistir, we wolen, that what euere we schulen axe, thou do to vs. And he seide to hem, What wolen ȝe that I do to ȝou? And thei seiden, Ȝyue to vs, that we sitten that oon at thi riȝthalf, and the tothir at the left, in thi glorie. Forsothe Jhesus seith to hem, Ȝe witen not what ȝe schulen axe; mown ȝe drynke the cuppe, the which I am to drynke, or be waischun with the baptym, in which I am baptisid? And thei seiden to him, We mown. Sothli Jhesus seith to hem, Treuli ȝe schulen drynke the cuppe that I drynke, and ȝe schulen be waischun with the baptym, in which I am baptisid; sothli for to sitte at my riȝthalf or lefthalf is not myn to ȝyue to ȝou, but to which it is ordeyned. And the ten heeringe hadden endignacioun of James and John. Sothli Jhesus clepinge hem, seith to hem, Ȝe witen, that thei that semen, or ben seyn, to haue princehed on folkis, lordschipen, or ben lordis, of hem, and the princes of hem han power of hem. Forsoth it is not so in ȝou, but who euere schal wolle be maad more, schal be ȝoure mynystre, and who euere schal wolle be the firste in ȝou, schal be seruaunt of alle. Forwhi and mannis sone cam not, that it schulde be mynystrid to him, but that he schulde mynystre, and ȝyue his soule, or lyf, redempcioun, or aȝen biyng, for manye. And thei camen to Jerico; and him goynge forth fro Jerico, and his disciplis, and a ful moche cumpany of peple, the sone of Tymey, Barthymeus, blynd, saat bisydis the weye beggynge. The which whanne he hadde herd, for it is Jhesus of Nazareth, bigan to crie, and seye, Jhesu, the sone of Dauith, haue mercy on me. And manye thretnyden hym, that he schulde be stille; and he criede moche more, Jhesu, the sone of Dauith, haue mercy on me. And Jhesu stondinge comaundide hym for to be clepid; and thei clepiden the blynde man, seiynge to him, Be thou of betere herte, ryse vp, he clepith thee. The which, his cloth cast away, sturtinge cam to him. And Jhesus answeringe seide to him, What wolt thou I schal do to thee? The blynde man seide to him, Maistir, that I se. Sothli Jhesus seide to him, Go thou, thi feith hath maad thee saaf. And anon he syȝ, and suede him in the weye.
And whanne Jhesus cam nyȝ to Jerusalem and to Betanye, to the mount of Olyuete, he sendith two of his disciplis, and seith to hem, Go ȝe in to the castel that is aȝens ȝou; and anon ȝe entrynge in thidur schulen fynde a colt tyed, on the which non of men sat ȝit; vnbynde ȝe, and bryng him. And if ony man schal seie ony thing to ȝou, seie ȝe, that he is nedeful to the Lord, and anon he schal leeue him hidur. And thei goynge forth, founden a colt bounden byfore the ȝate with outeforth, in the meeting of tweye weyes; and thei vnbounden him. And summe of men stondinge there seiden to hem, What don ȝe, vnbyndinge the colt? And thei seiden to hem, as Jhesus comaundide to hem; and thei leften hem. And thei brouȝten the colt to Jhesu, and thei puttiden to him her clothis, and Jhesus sat vpon him. Forsothe manye strewiden her clothis in the weye, sotheli othere men kittiden bowis, or braunchis, fro trees, and strewiden in the weye. And thei that wenten bifore, and that sueden, cryeden, seyinge, Osanna, blessid is he that cometh in the name of the Lord; blessid the kyngdom that cometh of oure fadir Dauith; Osanna in hiȝtees. And he entride in to Jerusalem, in to the temple; and alle thingis seyn aboute, whanne the our was now euenyng, he wente in to Betanye, with twelue. And another day, whanne he wente out of Betanye, he hungride. And whanne he hadde seyn a fyge tree afer hauynge leeuys, he cam, if happily he schulde fynde ony thing therynne; and whanne he cam to it, he fond no thing, out taken leeuys; for it was no tyme of fygis. And Jhesus answeringe seide to it, Now no more with outen ende ony man ete fruyt of thee. And his disciples herden; and thei camen to Jerusalem. And whanne he hadde entrid in to the temple, he bigan for to caste out men sellinge and biggynge in the temple; and he turnyde vpsodoun the boordis of chaungeris, and the chaieris of men sellinge culueris; and he suffride not, that ony man schulde bere a vessel thurȝ the temple. And he tauȝte hem, seyinge, Wher it is not writun, For myn hous schal be clepid the hous of preiynge to alle folkis? forsoth ȝe han maad it a den of theues. The which thing herd, the princes of prestis and scribis souȝten hou thei schulde leese him; forsoth thei dreden hym, for al the cumpanye of peple wondride on his teching. And whanne euenyng was maad, he wente out of the citee. And whanne thei passiden eerly, thei syȝen the fige tree maad drye fro the rootis. And Petre hauynge mynde, seide to him, Maistir, lo! the fyge tree, whom thou cursedist, hath dryed vp. And Jhesus answeringe seith to him, Haue ȝe the feith of God; treuli I seie to ȝou, that who euere seith to this hil, Take, and sende in to the see; and doutith not in his herte, but bileueth, for what euere he schal seye, be it maad, it schal be maad to him. Therfore I seie to ȝou, alle thingis what euere thingis ȝe preiynge schulen axe, bileue ȝe that ȝe schulen take, and thei schulen come to ȝou. And whanne ȝe schulen stonde for to preie, forȝyue ȝe, if ȝe han ony thing aȝens ony man, that and ȝoure fadir that is in heuenes, forȝyue to ȝou ȝoure synnes. That if ȝe schulen not forȝyue, neither ȝoure fadir that is in heuenes, schal forȝyue ȝou ȝoure synnes. And eftsoone thei camen to Jerusalem. And whanne he walkide in to the temple, the hiȝeste prestis, and scribis, and eldere men camen niȝ to him, and seien to him, In what power doist thou thes thingis? or who ȝaf to thee this power, that thou do thes thingis? Forsothe Jhesus answeringe seith to hem, And I schal axe ȝou o word, and answere ȝe to me, and I schal seie to ȝou, in what power I do thes thingis. Whether was the baptym of John of heuene, or of men? answere ȝe to me. And thei thouȝten with inne hem selue, seiynge, If we schulen seie of heuene, he schal seie to vs, Whi therfore bileuen ȝe not to him; if we schulen seie of men, we dreden the peple; for alle men hadden John, for he was verily a prophete. And thei answeringe seyen to Jhesu, We witen neuere. And Jhesu answeringe seith to hem, Neither I seie to ȝou, in what power I do thes thingis.
And Jhesus bigan to speke parably, or in parablis. A man plauntide a vyneȝerd, and puttide aboute an hegge, and dalf a lake, and bildide a tour, and hirede it to erthe tilieris, and wente forth in pilgrymage; and sente to the erthe tilieris in tyme a seruaunt, that he schulde receyue of the fruyt of the vyneȝerd at the erthe tilieris. The whiche beten him takun, and leften him voyde. And eftsoone he sente to hem a nother seruaunt, and thei woundiden him in the heed, and ponyscheden with chidingis, or reprouyngis. And eftsoone he sente another, and thei slowen him, and othere mo, betynge summe, but sleynge othere. Therfore ȝit he hauynge a sone most dereworth, and to hem he sente him the laste, seyinge, For by hap thei schulen schame my sone, or drede with reuerence. Forsothe the tenauntis seyden to hem self, or to gidere, This is the eier; come ȝe, sle we him, and the eritage schal be oure. And thei takynge him, castiden out withoute the vyneȝerd, and slowen. Therfore what schal the lord of the vyneȝerd do? He schal come, and leese the tenauntis, and ȝyue the vyneȝerd to othere. Wher ȝe han not rad this scripture, The stoon the which men bildinge han dispisid, this is maad in to the heed of the corner? This thing is maad of the Lord, and is wondirful in oure yȝen. And thei souȝten for to holde him, and thei dreden the cumpanye of peple; sothli thei knewen for to hem he seide this parable; and him left, thei wenten away. And thei senden to him summe of the Farisees and Erodians, for to take hym in word. The whiche comynge seyn to hym, Maistir, we witen for thou ert sothfast, and reckist not of ony man; sothly neither thou seest in to face of man, but thou techist the wey of God in treuthe. Is it leefful for to ȝyue tribute to Cesar, or we schulen not ȝyue? The which witinge her priuey falsnesse, seith to hem, What tempten ȝe me? brynge ȝe to me a peny, that I se. And thei offriden to him. And he seith to hem, Whos is this ymage, and the in wrytinge? Thei seien to him, Cesaris. Forsothe Jhesus answeringe seith to hem, Therfore ȝelde ȝe to Cesar that ben of Cesar, and to God tho thingis that ben of God. And alle wondriden on him. And Saducees, that seyen no resurecioun to be, camen to him, and axiden him, seyinge, Maistir, Moyses wroot to vs, that if the brother of a man were deed, and lefte a wyf, and lefte not sones, his brother take his wyf, and reyse vp seed to his brothir. Therfore seuene britheren weren; and the firste took a wyf, and is deed, no seed left. And the secunde took hir, and he is deed, and neither this lefte seed. And the thridde also. And seuene tooken hir, and lefte not seed. And the womman the laste of alle is deed. Thanne in the resureccioun, whanne thei schulen rise aȝen, whos wyf of these schal sche be? sothly seuene hadden hir wyf. And Jhesus answeringe seith to hem, Wher ȝe erren not therfore, not knowinge the scripturis, nother the vertu of God? Forsothe whanne thei schulen rise aȝen fro deed men, neither thei wedden, nother ben weddid, but thei schulen be as aungels of God in heuenes. Sothli of deed men, that thei rysen aȝein, han ȝe not rad in the book of Moyses, on the bousche, hou God seide to him, seiynge, I am God of Abraham, and God of Ysaac, and God of Jacob? He is not God of deede men, but God of lyuynge men; therfore ȝe erren moche. And oon of the scribis, that hadde herd hem sekynge to gidere, cam niȝ, and seyinge that he hadde wel answerid hem, axide hym, which was the firste maundement of alle. Jhesus answeride to him, that the firste of alle comaundementis is, Heere, Israel, the Lord thi God is oon; and thou schal loue the Lord thi God of al thin herte, and of al thi soule, and of al thi mynde, and of al thi vertu, or myȝte. This is the firste maundement. Forsothe the secunde is lyk to this, Thou schalt loue thi neiȝebore as thi silf. Ther is non othir maundement more than these. And the scribe seith to him, Maister, in treuthe thou hast wel seid; for o God is, and ther is non, out taken him; and that he be loued of al herte, and of al thouȝt, or mynde, and of al vndirstondinge, and of al the soule, and of al strengthe, and to loue the neiȝebore as him silf, is more than alle brend offringis and sacrificis. Jhesus forsothe seyinge that he hadde answerid wysely, seide to him, Thou ert not fer fro the kyngdom of God. And now no man durste axe him. And Jhesus answeringe seide, techinge in the temple, Therfore how seyn scribis, Crist for to be the sone of Dauith? To whom Dauith him silf seide in the Hooly Gost, The Lord seide to my lord, Sitte on my riȝthalf, til I putte thin enemyes the stool of thi feet. Therfore Dauith him silf seith him a lord, and wherof is he his sone? And moche cumpany gladli herde him. And he seide to hem in his teching, Be ȝe war of scribis, that wolen wandre in stoolis, and be salutid in chepinge, and sitte in synagogis in the firste chaires, and the firste sitting places in soperis; the whiche deuouren the housis of widewis, vndir colour of long preier; thei taken lenger dom. And Jhesus sittinge aȝeins the treserie, biheld hou the cumpany of peple caste money in to the tresorie; and manye riche castiden many thingis. Sothli whanne o pore widowe hadde comen, sche sente tweye mynutis, that is, a ferthing. And his disciplis clepid to gidere, he seith to hem, Treuly I seie to ȝou, for this pore widowe sente more than alle, that sente in to the tresorie. Sothli alle sente of that thing that was plenteuous to hem; but this of hir myseste sente alle thingis that she hadde, al hir lyflode.
And whanne he wente out of the temple, oon of his disciples seith to him, Maistir, bihold, what maner stoones, and what manere bildingis. And he answeringe seith to him, Seeste thou alle thes greete bildingis? ther schal not be left a stoon vpon a stoon, the which schal not be distroyed. And whanne he sat in the mount of Olyuete aȝens the temple, thei axiden hym by hem silue, Petre, and James, and John, and Andrew, Seie thou to vs, whanne thes thingis schulen be maad, and what tokene, whanne alle thes thingis schulen bigynne for to be endid. And Jhesus answeringe bigan for to seie to hem, Se ȝe, that no man disceyue ȝou; for many schulen come in my name, seiynge, For I am; and thei schulen disceyue manye. Sothli whanne ȝe schulen heere batels and opyniouns of bateils, drede ȝe not; forsothe it bihoueth these thingis for to be don, but not ȝit anon the ende. For folk schal rise vpon folk, and rewme vpon rewme, and erthe mouyng schal be by places and hungur; bigynnyngis of sorwis these thingis. Sothli se ȝe ȝou silf, for thei schulen take ȝou in counceils, and ȝe schulen be beten in synagogis; and ȝe schulen stonde bifore kyngis and domesmen for me, in to witnessing to hem. And in to alle folkis it bihoueth first the gospel for to be prechid. And whanne thei schulen lede ȝou bitrayinge, nyle ȝe thenke what ȝe schulen speke, but speke ȝe that thing that schal be ȝouen to ȝou in that our; sothli ȝe ben not spekinge, but the Hooly Gost. Forsothe a brother schal bitraye the brother in to deeth, and the fadir the sone, and sones schulen ryse to gidre aȝens fadris and modris, and ponysche hem by deeth. And ȝe schulen be in hate to alle men for my name; but he that schal susteyne in to the ende, this schal be saf. Forsothe whanne ȝe schulen se the abhomynacioun of discomfort, stondinge wher it owith not; vndirstonde he that redith; thanne thei that be in Judee, flee in to hillis. And he that is aboue the roof, come he not doun in to the hous, neithir entre he, that he take ony thing of his hows; and he that schal be in the feeld, turne not aȝen byhynde for to take his cloth. Sothli wo to hem that ben with childe, and norischinge in tho dayes. Therfore preie ȝe, that thei ben not don in wyntir. Forsoth the ilke dayes of tribulacioun schulen be suche, whiche manere weren not fro the bygynnynge of creature, the which God made, til now, neither schulen be. And no but the Lord hadde breiggid tho dayes, al fleisch, or mankynde, hadde not be saf; but for the chosene whom he chees, the Lord hath breiggid dayes, or maad schort. And thanne if ony man schulde seie to ȝou, Lo! here is Crist, loo! there, beleue ȝe not. For fals Cristis and fals prophetis schulen ryse vp, and schulen ȝyue tokenes and grete wondris, to disceyue, if it may be don, ȝhe, the chosene. Therfore se ȝe; loo! I haue bifore seid to ȝou alle thingis. But in tho dayes, aftir that tribulacioun, the sunne schal be maad derk, and the mone schal not ȝyue hir schynyng, and sterris of heuenes schal be fallinge doun, and vertues that be in heuenes, schulen be mouyd. And thanne thei schulen se mannis sone comynge in cloudis of heuene, with greet vertu and glorie. And thanne he schal sende his aungels, and schal gedre his chosene fro foure wyndis, fro the loweste thing of erthe vnto the hiȝeste thing of heuene. Forsothe of the fyge tree lerne ȝe the parable. Whanne now his braunche schal be tendre, and leeuys ben sprongen out, ȝe witen for somer is in the nexte. So and whanne ȝe schulen se alle these thingis ben maad, wite ȝe, that it is in the nexte in the doris. Treuly I seye to ȝou, for this generacioun schal not passe awey, til alle these thingis be don. Heuene and erthe schal passe, forsothe my wordis schulen not passe. Treuly of that day or our no man woot, nethir aungelis in heuene, nether the sone, no but the fadir. Se ȝe, wake ȝe, and preie ȝe; sothli ȝe witen not, whanne tyme is. For as a man the which gon fer in pilgrimage, lefte his hous, and ȝaf to his seruauntis power of euery work, and comaundide to the porter, that he schulde wake. Therfore wake ȝe, forsothe ȝe witen not, whanne the lord of the hous cometh, in the euentide, or in the mydnyȝt, or kockis crowynge, or morwynge; lest whanne he schal come sudenly, he fynde ȝou slepinge. Forsothe that that I seie to ȝou, I seie to alle, Wake ȝe.
Forsothe pask and the feeste of therf looues withouȝten sourdowȝ was aftir the secunde day. And the hiȝeste prestis and scribis souȝten, hou thei schulden holde him with gile, and sle. Sothli thei seiden, Not in the feeste day, lest perauenture noyse were maad in the peple. And whanne he was at Betanye, in the hous of Symount leprous, and restid, a womman comynge, hauynge a box of precious oynement spikanard; and the box brokun, helde out on his heed. Forsoth ther weren summe beringe vnworthily, or heuyli, with ynne hem silf, and seyinge, Wherto is this loss of oynement maad? For this oynement myȝte haue be sold more than for thre hundrid pens, and be ȝouun to pore men. And thei groyneden in to hir. Sothli Jhesus seide, Suffre hir; what be ȝe heuy to hir? she hath wrouȝt good work in me. For euer more ȝe schulen haue pore men with ȝou, and whanne ȝe schulen wolle, ȝe mown do wel to hem; forsoth ȝe schulen not euermore haue me. She dide that that she hadde; sche bifore cam for to anoynte my body into buriynge. Treuli I seie to ȝou, where euere this gospel schal be prechid in al the world, and that this womman hath done, schal be told in to mynde of hir. And Judas Scarioth, oon of the twelue, wente to the hiȝeste prestis, that he schulde bitray him to hem. The whiche heerynge ioyeden, and bihiȝten hem to ȝyue him money. And he souȝte how he schulde bitraye him couenably. And the firste day of therue loues, whenne pask was offrid, disciplis seyn to him, Whidir wolt thou we go, and make redy to thee, that thou ete pask? And he sendith tweyne of his disciplis, and seith to hem, Go ȝe in to the citee, and a man beringe a galoun of watir schal renne to ȝou, or come aȝens ȝou; suwe ȝe him. And whidir euere he schal entre, seye ȝe to the lord of the hous, For the maister seith, Wher is my fulfilling, or etyng place, where I schal ete pask with my disciplis? And he schal shewe to ȝou a greet souping place strewid, and there make ȝe redy to vs. And his disciplis wenten forth, and camen in to the citee, and founde as he hadde seid to hem; and thei maden redy pask. Sothli euen maad, he cam with twelue. And hem sittinge at the mete, and etinge, Jhesus seith, Treuli I seie to ȝou, for oon of ȝou that etith with me, schal bitraye me. And thei bigunnen for to be sori, and to seie, ech by hym silf, Whether I? The which seith to hem, Oon of twelue that puttith yn the hond with me in the plater. And sothli mannis sone goth, as it is writun of him; forsoth wo to that man, bi whom mannis sone schal be bitrayd. It were good to him, if that ilke man hadde not be borun. And hem etinge, Jhesus took bred, and blessinge brak, and ȝaf to hem, and seith, Take ȝe; this is my body. And the cuppe takun, he doynge gracis ȝaf to hem, and alle drunkun therof. And he seith to hem, This is my blood of the newe testament, the which schal be shedd out for manye. Treuly I seie to ȝou, for now I schal not drynke of this fruit of vyne, til in to that daye whanne I schal drynke it newe in the rewme of God. And the ympne, or heriynge, seid, thei wenten out in to the hil of Olyues. And Jhesus seith to hem, Alle ȝe schulen be sclaundrid in me in this niȝt; for it is writun, I schal smyte the schepherde, and the scheep of the floc schulen be disparplid. But aftir that I schal ryse aȝen, I schal go bifore ȝou in to Galilee. Forsoth Petre seith to him, And if alle schulen be sclaundrid, but not I. And Jhesus seith to him, Treuly I seie to thee, for thou to day bifore the cok in this nyȝt twyes ȝyue vois, thries thou ert to denye me. And he spak more, And if it bihoue me to dye to gidere with thee, I schal not denye thee. Sothli and lyk manere alle seiden. And thei camen in to a place, to whom the name Gethsamany. And he seith to his disciplis, Sitte ȝe here, the while I preie. And he takith Petre and James and John with him, and bigan for to drede, and to heuye. And he seith to hem, My soule is sorwful til to the deeth; susteyne ȝe, or abide ȝe, here, and preie ȝe with me. And whanne he hadde gon forth a litel, he felde down on the erthe, and preiede, that, if it myȝte be, the our schulde passe fro him. And he seide, Fadir, alle thingis ben possible to thee, turne fro me this cuppe; but not that I wole, but that that thou. And he cam, and fond hem slepynge. And he seith to Petre, Symount, slepist thou? myȝtist thou not wake with me oon our? Wake ȝe, and preie ȝe, that ȝe entre not in to temptacioun; forsothe the spirit is redy, but the fleisch syk. And eftsoone he goynge preiede, the same word seyinge. And he turnyd aȝen eftsoone, fond hem slepinge; sothli her yȝen were greuyd. And thei knewen not, what thei schulden answere to him. And he cam the thridde tyme, and seith to hem, Slepe ȝe nowe, and reste ȝe; sothli it sufficith. The our cometh; loo! mannis sone schal be bitrayed in to hondis of synful men. Ryse ȝe, go we; loo! he that schal bytraye me is nyȝ. And, ȝit him spekinge, Judas Scarioth, oon of the twelue, cam, and with him moche cumpeny with swerdis and staues, sent fro the hiȝeste prestis, and scribis, and fro the eldere men. Forsothe the traitour hadde ȝouun to hem a tokene, seyinge, Whom euere I schal kisse, he it is; holde ȝe him, and lede ȝe warly, or queyntely. And whanne he cam, anon he cominge to him, seith, Maistir; and he kisside him. And thei layden hondis in to him, and heelden him. Sothli oon of men stondinge aboute, ledinge out a swerd, smot the seruaunt of the hiȝeste prest, and kitte of to him an eere. And Jhesus answeringe seith to hem, As to a thef ȝe han gon out with swerdis and staues, for to take me? Forsoth day by day I was at ȝou, techinge in the temple, and ȝe heelden not me; but that the scripturis be fulfillid. Thanne him forsakun, alle his disciplis fledden. Sothli sum ȝong man, clothid with lynnen cloth on the bare, suede him; and thei heelden him. And the lynnen cloth forsakun, he nakid fleiȝ awey fro hem. And thei ledden Jhesu to the hiȝeste prest. And all camen to gidere in to oon, the prestis and the scribis and eldere men. Forsoth Petre suede him afer til with ynne in to the halle of the hiȝeste prest. And he sat with the mynystris, and warmyde him at the fier. Forsothe the hiȝeste prestis, and al the counceil, souȝten witnessinge aȝens Jhesu, that thei schulen ȝyue him to deeth; nether thei founden. Sothli manye seiden fals witnessinge aȝens him, and the witnessingis weren not couenable. And summe risynge souȝten fals witnessing aȝens hym, seyinge, For we han herd him seiynge, I schal vndo this temple maad with hondis, and aftir the thridde day I schal bilde a nother not maad with hondis. And the witnessing of hem was not couenable. Forsothe the hiȝeste prest rysinge vp in to the myddel, axide him, seyinge, Answerist thou not ony thing to tho thingis that ben put to thee of these? Sothli he was stille, and no thing answeride. Eftsoone the hiȝest prest axide him, and seide to him, Ert thou Crist, the sone of blessid God? Sothli Jhesus seide to him, I am; and ȝe schulen se mannis sone sittinge on the riȝt half of the vertu of God, and comynge in cloudis of heuene. Forsoth the hiȝest prest, kittinge his clothis, seith, What ȝit desyren we witnessis? Ȝe han herde blasphemye. What semeth to ȝou? The whiche alle condempneden him for to be gilty of deeth. And summe bigunnen for to bispitte him, and to hide his yȝen, and smyte him with boffatis, and seie to him, Prophecie thou. And the mynystris beeten him with strokis, or boffatis. And whanne Petre was in the halle bynethen, oon of the hand maydens of the hiȝest prest cam. And whanne sche hadde seyn Petre warmynge him, sche biholdinge him seith, And thou wast with Jhesu of Nazareth. And he denyede, seyinge, Nethir I woot, nether I haue knowun, what thou seist. And he wente forth bifore the halle; and anon the cok song. Eftsone forsothe whanne a nother hand mayde hadde seyn him, she bigan for to seie to men stondinge aboute, For this is of hem. And he eftsone denyede. And aftir a litil, eftsoone thei that stooden nyȝ, seiden to Petre, Verily thou ert of hem, forwhi and thou ert of Galilee. Sothli he bigan for to curse and swere, For I knowe not this man, whom ȝe seyn. And anon eftsoones the cok song. And Petre bithouȝte on the werd that Jhesus hadde seid to him, Bifore the cok synge twyes, thries thou schalt denye me. And he bigan for to wepe.
And anon the morwe maad, the hiȝeste prestis, makinge counceil with the eldere men, and scribis, and al the counceil, byndinge Jhesu, ledden, and bitooken to Pilat. And Pilat axide him, Art thou kyng of Jewis? And he answeringe seith to him, Thou seyst. And the hiȝeste prestis accusiden him in manye thingis. Pilat forsothe eftsoone axide him, seyinge, Thou answerist not ony thing? Seest thou, in how manye thingis thei accusen thee? Forsothe Jhesus more no thing answeride, so that Pilat schulde wondre. Forsoth by a solemne day he was wont to leeue to hem oon bounden, whom euere thei axiden. Forsoth there was he that was seid Barabas, that was boundun with sleeris of men, and that hadde don manslauȝtre in seducioun, that is, debaat in cytee. And whanne the cumpany hadde stiȝe vp, he bigan for to preye, as he euermore dide to hem. Sothely Pilat answeride to hem, and seide, Wolen ȝe I leeue to ȝou the kyng of Jewis? Sothli he wiste, that the hiȝeste prestis hadden taken him by enuye. Forsothe the bischopis stireden the cumpenye of peple, that more he schulde leeue to hem Barabas. Forsoth eftsoone Pilat answeringe seith to hem, What therfore wolen ȝe I schal do to the kyng of Jewis? And thei eftsoone crieden, Crucifie hym, or put hym on the cros. Forsoth Pilat seide to hem, Sothli what of yuel hath he don? And thei crieden more, Crucifie him. Sothli Pilat willinge for to do ynow to the peple, lefte to hem Barabas, and bitook to hem Jhesu, smyten, or betun, with scourgis, that he schulde be crucified. Forsothe knyȝtis ledden him withynne, in to the floor of the moot halle, and clepiden to gidere al the cumpenye of knyȝtis, and clothiden him with purpur. And thei foldinge a corowne of thornes, puttiden to him; and bigunnen for to greet him, sayinge, Hail, thou kyng of Jewis. And thei smyten his heed with a reede, and bispatten him; and puttinge her knees thei worshipiden him. And aftir that thei hadden scornyd him, thei vnclothiden him fro purpur, and clothedyn him with his clothis, and ledden him, that thei schulde crucifie him. And thei constreyneden sum man passynge forth, Symount of Syrenen, comynge fro the town, the fadir of Alysandre and Rufe, that he schulde take his cross. And thei ledden him in to a place Golgotha, that is interpretid, or expowned, the place of Caluarie. And thei ȝauen him for to drynke wyn meddelid with myrre, and he took not. And thei crucifiynge him departiden his clothis, sendinge lot, who what schulde take. Forsoth it was the thridde our, that men clepen vndrun, and thei crucifieden him. And the title of his cause was writun, Jhesus of Nazareth, kyng of Jewis. And thei crucifien with him twey theues, oon at the riȝthalf, and oon at his lefthalf. And the prophecie is fulfild that seith, And he is gesside, or ordeyned, with wickide men. And passinge forth thei blasfemyden him, mouynge her heedis, and seyinge, Fyȝ! thou that distroyest the temple of God, and in thre dayes aȝen bildest it; thou comynge down fro the cros, make thi self saf. Also and the hiȝeste prestes scornynge him, ech to other, with scribis, seiden, Crist, kyng of Yrael, maade othere men saf, he maye not saue him silue. Come he down now fro the cross, that we se, and bileue. And thei that weren crucified with him, puttedyn wrong, or fals repref, to him. And the sixte our, or mydday, maad, derknessis ben maad vpon al the erthe til in to the nynthe our, that is, noon. And in the nynthe our Jhesus criede with greet vois, seyynge, Heloy, Heloy, lamazabatany, the which interpretid is, My God, my God, whi, or wherto, hast thou forsake me? And summe of men stondinge aboute heeringe seiden, Lo! he clepith Hely. Sothli oon rennynge, and fillinge a sponge with vynegre, and puttinge aboute to a reede, ȝaue him drynke, seyinge, Suffre ȝe, se we, if Hely come for to do hym down. Forsoth Jhesus, a greet vois sent out, deiede, or sente out the breth. And the veil of the temple is kitt in to tweyne fro the hiȝeste til to down, or bynethe. Forsoth centurio seynge, the which stood euene aȝenst, for so criynge he hadde deied, seith, Verrili, this man was Goddis sone. Sothli there weren and othere wymmen biholdinge fro affer, among whiche was Mary Mawdeleyn, and Mari of James the lasse, and modir of Joseph, and Salome. And whanne Jhesus was in Galilee, thei folowiden him, and mynystriden to him, and manye othere wymmen, that to gidere stiȝeden vp with him to Jerusalem. And whanne euentyd was now maad, for it was the euentyd bifore the saboth, Joseph of Armathie, the noble decurioun, that hadde ten men vndir him, cam, the which and he was abidinge the rewme of God; and hardily he entride in to Pilat, and axide the body of Jhesu. Forsothe Pilat wondride, if he hadde now deied. And centurio axid to, or brouȝt to, he axide him, if he were now deed; and whanne he hadde knowun of centurio, he ȝaf the body of Jhesu to Joseph. Sothli Joseph byinge him lynnen cloth, and doynge him doun, wlappede in the lynen cloth, and puttide in a newe sepulcre that was hewen in a stoon, and walewid to a stoon at the mouth of the sepulcre. Marie Mawdeleyn forsothe, and Marie of Joseph biheelden, where he was putt.
And whanne the saboth hadde passid, Marie Mawdeleyn, and Marie of James, and Salome bouȝten oynementis, that thei comynge schulden anoynte Jhesu. And ful eerly in oon of woke dayes, thei camen to the sepulcre, the sunne now sprungen vp. And thei seiden to gidere, Who schal turne aȝen to vs the stoon fro the dore of the sepulcre? And thei biholdinge syȝen the stoon walewid awey, forsoth it was ful greet. And thei goynge yn into the sepulcre syȝen a ȝong oon, hilid with a whit stoole, sittinge at the riȝt half; and thei weren abaist, or greetli aferd. The which seith to hem, Nyle ȝe drede; ȝe seken Jhesu of Nazareth crucified; he hath risun, he is not heere; lo! the place where thei puttiden him. But go ȝe, seye ȝe to his disciplis, and to Petre, for he schal go byfore ȝou in to Galilee; there ȝe schulen se him, as he seide to ȝou. And thei goynge out fledden fro the sepulcre; forsothe drede and quakynge hadde assaylid hem, or gon in to hem, and to no man thei seiden ony thing, forsoth thei dredden. Sothly Jhesus, rysinge erly in the first day of the wouke, apperide firste to Mary Mawdeleyn, of whom he hadde cast out seuene deuelis. She goynge tolde to hem that weren with him, hem weylinge and wepynge. And thei heeringe that he lyuede, and was seyn of hir, bileueden not. Sothli after thes thingis tweyne of hem wandringe, he is schewid in an other lyknesse, or figure, to hem goynge in to a toun. And thei goynge toolden to othere, nethir thei bileuyden to hem. Forsoth at the laste, hem enleuene restinge, Jhesus apperide to hem, and reprouyde the vnbileue of hem, and the hardnesse of herte, for thei bileuyden not to hem, that hadden seyn him to haue risun fro deede. And he seide to hem, Ȝe goynge in to al the world, preche the gospel to ech creature. He that schal bileue, and schal be baptisid, or cristenyd, schal be sauyd; sothli he that schal bileue not, schal be dampned. Forsoth these tokenes schulen sue hem, that schulen bileue. In my name thei schulen cast out fendis; thei schulen speke with newe tungis; thei schulen do awey serpentis; and if thei schulen drynke ony venym, or deedli thing, that bryngith deeth, it schal not noye hem. Thei schulen putte hir hondis vpon sike men, and thei schulen haue wel. And sothli the Lord Jhesu, aftir that he hadde spoke to hem, is takun vp in to heuene, and sittith on the riȝthalf of God. Sothli thei gon forth prechiden euerywhere, the Lord worchinge with, and conferminge the word with signes folowinge.
Copyright © 2013–2026 Jeremy J. Johnson. All rights reserved.