In the secounde ȝeer of Darius, kyng of Persis, in the sixte moneth, in oo day of the moneth, the word of the Lord is maad in the hond of Aggey, prophete, to Zorobabel, sone of Salatiel, duyke of Juda, and to Jhesu, the greet prest, sone of Josedech, sayinge, These thingus saith the Lord of oostis, sayinge, This peple saith, Ȝit cummeth not the tyme of the hous of the Lord to be beeldid. And the word of the Lord is maad in the hond of Aggey, prophete, sayinge, Wher it is tyme to ȝou, that ȝe dwelle in housis couplid with tymbre, and this hous desert? And now these thingus saith the Lord God of oostis, Putte ȝe ȝour hertis vpon ȝour wayes. Ȝe han sown myche, and brouȝten in litil; ȝe han eten, and ȝe ben not fulfillid; ȝe han drunke, and ȝe ben not ful of drinke; ȝe hilliden ȝou, and ȝe ben not maad hote; and he that gadrid hijris, sente hem in to a sac, or bagge, hoolid, or broken. These thingus saith the Lord of oostis, Putte ȝe ȝour hertis vpon ȝour wayes. Stye ȝe vp in to the mounteyn, bere ȝe treese, and bielde ȝe an hous; and it shal be acceptable to me, and Y shal be glorifiede, saith the Lord. Ȝe bihelden to more, and loo! it made lesse; and ȝe brouȝten in to hous, and Y blewe it out. For what cause, saith the Lord of oostis? for myn hous is desert, and ȝe hasten eche man in to his hous. For this thing heuens ben forbeden, that thei shulden not ȝeue dew; and the erthe is forbeden, that it shulde not ȝeue his buriownyng. And Y clepide dryenesse vpon erthe, and vpon mounteyns, and vpon whete, and vpon wyn, and vpon oyle, and what euer thingus the erthe bringeth forth; and vpon men, and vpon beestis, and vpon al labour of hondis. And Zorobabel, sone of Salatiel, herde, and Jhesus, the grete prest, sone of Josedech, and alle relikis of the peple, the voys of her God, and the wordis of Aggey, prophete, as the Lord God of hem sente hym to hem; and al the peple dredde of the face of the Lord. And Aggey saide, a messangere of the Lord, of messangers of the Lord to the peple, sayinge, Y am with ȝou, saith the Lord. And the Lord reyside the spirit of Zorobabel, sone of Salatiel, duyk of Juda, and the spirit of Jhesu, the grete prest, sone of Josedech, and the spirit of the relikis of alle peple; and thei entriden, and maden werk in the hous of the Lord of hoostis, her God, in the twentithe day and fourthe of the moneth, in the sixte moneth, in the secounde ȝeer of Darius, kyng.
In the seuenthe moneth, in the twentithe and firste of the moneth, the word of the Lord is maad in the hond of Aggey, prophete, sayinge, Speke thou to Zorobabel, sone of Salatiel, duyk of Juda, and to Jhesu, the greet preest, sone of Josedech, and to other of the peple, sayinge, Who in ȝou is left, that sawȝ this hous in his first glorie? and what seen ȝe this now? wher it is not thus, as it be not in ȝour eeȝen? And now, Zorobabel, be thou coumfortid, saith the Lord, and Jhesu, greet preest, sone of Josedech, be thou coumfortid, and al peple of the lond, be thou coumfortid, saith the Lord of oostis; and do ȝe, for Y am with ȝou, saith the Lord of oostis. The word that Y couenauntide with ȝou, whanne ȝe wenten out of the lond of Egypt, and my Spirit shal be in the mydil of ȝou, Nyl ȝe dreede, for these thingus saith the Lord of oostis, Ȝit oo lytil thing, or tyme, is, and Y shal moue heuen, and erthe, and the se, and dryenesse; and Y shal moue alle folkis, and the desirid to alle folkis shal cume; and Y shal fulfille this hous with glorie, saith the Lord of oostis. Myn is syluer and myn is gold, seith the Lord of oostis. The glorie of this laste hous schal be greet, more than of the firste, seith the Lord of oostis. And in this place I schal ȝyue pees, seith the Lord of oostis. In the foure and twentithe of the nynthe moneth, in the secunde ȝeer of Darius, kyng, the word of the Lord is maad to Aggey, prophete, seiynge, These thingus saith the Lord God of oostis, Axe prestis the lawe, sayinge, Ȝif a man shal take halewid fleshe in the heme of his clothinge, and shal touche of the heeȝnesse therof brede, or potage, or wyne, and oyle, or eche mete, wher it shal be halewid? Sotheli prestis answerynge sayden, Nay. And Aggey saide, Ȝif a man defoulid in soule shal touche of alle these, wher it shal be defoulid? And prestis answerden, and saiden, It shal be defoulid. And Aggey answerde, and saide, So this peple, and so this folk byfore my face, saith the Lord, and so al werc of her hondis; and alle thingus that thei shuln offre there, shuln be defoulid. And now putte ȝe ȝour hertis, fro this day and aboue, byfore that a stoon vpon a stoon was putt in the temple of the Lord, whenne ȝe wenten to an hep of twenty bushellis, and there weren maad ten; ȝe entriden to the pressour, that ȝe shulden presse out fifty galouns, and ther weren maad twenti. Y smote ȝou with brennynge wynd, and mildew, and hayl, and alle the werkis of ȝour hondis; and ther was not in ȝou that turnede aȝein to me, saith the Lord. Putte ȝe ȝour hertis of this day, and in to cummynge, fro the fourthe and twentithe of the ninthe moneth, fro the day in whiche foundementis ben casten of the temple of the Lord, putte ȝe vppon ȝour herte. Wher now seed is in buriownyng? and ȝit the vyne ȝerd, and fijge tree, and powme garnet, and the tree of olyue florishide not. Of this day Y shal blesse. And the word of the Lord is maad the secounde tyme to Aggey, in the foure and twentithe of the moneth, saiynge, Speke thou to Zorobabel, duyk of Juda, sayinge, Y shal moue heuen and erthe to gydre, and Y shal distruye the sete of rewmys, and Y shal breke the strengthe of the rewme of heithen men, and Y shal distruye the foure horsid cart, and the styer therof; and the horsis shuln go doun, and the styers of hem, a man in swerd of his brother. In that day, saith the Lord of oostis, thou Zorobabel, sone of Salatiel, my seruaunt, Y shal take to thee, saith the Lord; and Y shal putte thee as a sygnet, for Y cheese thee, saith the Lord of hoostis.
Copyright © 2013–2026 Jeremy J. Johnson. All rights reserved.