1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40
Thes ben the names of the sones of Yrael, that ȝeden into Egipte with Jacob; eche with her housholdes ȝeden yn; Ruben, Symeon, Leuy, Judas, Isachar, Zabulon, and Beniamyn, Dan, and Neptalym, Gad, and Aser. Thanne weren alle the soules of hem that ȝeden out of the hipe of Jacob seuenti and fyue. Joseph forsothe was in Egipte; the which deed, and alle hys bretheren, and al his cosynage, the sones of Yrael wexen, and as burionynge ben multiplied, and thei strengthid fulfilliden the erthe. Thanne a newe kyng roos vpon Egipte, that knewe not Joseph, and he seide vnto his puple, Loo! the puple of the sones of Yrael is myche, and stronger than we; cometh, wiseli oppresse we it, lest perauenture thei ben multiplied, and, if batayle aryse aȝens vs, it be addid to oure enemyes, and, we ouercomen, he go out of the loond. And so he bifore putte to hem maystris of werkis, that thei shulden ouertraueylen hem with birthens. And thei bildeden to Pharao the citees of tabernacles, Phiton, and Ramesses. And in as myche as thei oppressiden hem, so myche more thei weren multiplied, and wexen. And the Egipciens hatiden the sones of Yrael, and tourmentiden, scornynge to hem, and enuyinge; and to bitternes thei brouȝten her lijf with harde werkis of cley and tyle, and with al seruage, thurȝ the which thei weren thrist down in werkys of the erthe. And the kyng of Egipte seide to the mydwyues of Ebrews, of the whiche oon was clepid Sephora, and that other Fua, comaundynge hem, Whanne ȝe shulen serue the wymmen of Ebrew, to taken her children of her wombe, and the tyme of birthe come, if it be a maal, sleeth hym; if a femaal, kepith. Forsothe the mydwyues dredden God, and diden not after the heeste of the kyng of Egipte, but kepten the males. The whyche to hym clepid, seide the kyng, What now is this ȝe wolden do, that the knaue children ȝe wolen kepe? The whiche answerden, Wymmen of Ebrew ben not as the wymmen of Egipte, thei forsothe han the kunnyng of mydwyuyng, and er we comen to hem, thei ben delyuered. Thanne God dide wel to the mydwyues; and the puple growide, and was coumfortid greetli. And for the mydwiues dredden God, he byldyd to hem housis. Thanne Pharao comaundide to al his puple, seiynge, What euer of maal kynde shal be born, throwe ȝe it in to the flode; what euer of femaal, kepith.
Aftir this ȝede out a man of the hows of Leuy, and tok a wijf of his lynage, that conceyuede, and bar a child, and, seynge hym shaply, hydde hym thre monethis. And whanne he myȝte hide hym no lenger, he tok a ionket of resshen, and glewide it withe glewishe cley, and with picche, and putte the litil faunt with ynne, and sette out hym in the flaggi place of the brinke of the flode, his sister stondynge afer, and biholdynge the auenture of the thing. And, loo! the douȝter of Pharao descendide for to be wasshid in the flode, and hir mayden seruauntis ȝeden bi the brynke of the flode. The which, whanne she hadde seen the ionket in the growyng place of resshes, sente oon of hir mayden seruauntis, and, it brouȝte forth, opnynge and biholdynge in it a litil child wepynge, hauynge rewth of it, seith, Of the children of Ebrews he is. To whom the sister of the child, Wolt thow, she seith, that Y go, and clepe to thee a womman of Ebrew, that may norishe the child? She answerde, Go. The mayden child ȝede, and clepide hir moder. To whom spak the dowȝtir of Pharao, Tak, she seide, this child, and norisch to me, and Y shal ȝyue to thee thi mede. The womman tok, and norisshide the child, and ful waxen tok to the dowȝter of Pharao, whom she clepide to hir in steede of a sone; and she clepide his name Moyses, seiynge, For of the water Y tok hym. In thilke daies, after Moyses was waxen, goon out to his bretheren, sawȝ the tourmentyng of hem, and a man of Egipte smytynge oon of the Ebrews, his britheren. And whanne he hadde beholdun al abowt hider and thider, and no man he hadde seen to be nyȝ, the Egipcien smytun he hidde in the soonde. And goon out another day, he bihelde two Ebrews chidynge, and he seide to hym that dyde the wrong, Whi smytist thow thi brother? The which answerde, Who ordeynede thee prince and domesman vpon vs? Whether thow wole slee me, as thow slewe ȝistirday the Egipcien? Moyses dradde, and seith, What manere is maad opyn this word? And Pharao herde this word, and souȝte to slee Moyses, the which fleynge fro hys siȝt, dwelte in the loond of Madyan, and sat bisidis a pitt. Forsothe there weren to the preest of Madian seuen douȝtres, the whiche comen to drawe watir; and, the water goters fillid, thei coueytiden to water the flok of hyr fader. There ouercamen shepherdes, and threwen hem out; and Moyses aroos, and, the mayden children defendid, he watride her sheep. The whiche, whanne thei were turnyd aȝen to Jetro, her fader, he seide to hem, Whi ben ȝe comen swifter than ȝe ben wonte? Thei answerden, A man of Egipte hath delyuered vs fro the hoond of the shepherdis; also and he hath drawun water with vs, and ȝyue drynke to the sheip. And he, Where is he? he seith, whi han ȝe laft the man? clepe ȝe hym, that he eete breed. Than Moyses swere, that he shulde dwelle with hym; and he tok a wijf, Sephoram, the douȝter of hym. The which bar to hym a sone, that he clepide Gersan, seiynge, A comlyng Y was in a straunge loond. And another forsothe she bar, whom he clepide Elieȝer, seiynge, sothe the God of my fader is myn helper, and hath delyuered me fro the hoond of Pharao. After myche forsothe of tyme died the kyng of Egipte, and inwardly weilynge the sones of Yrael for the werkis, crieden out, and the crye of hem to God of her werkis steyde vp. And he herde the weilyng of hem, and was recordid of the boond of pees, that he couenauntide with Abraham, Ysaac, and Jacob; and he bihelde the children of Yrael, and knewe hem.
Moyses forsothe fedde the sheip of Jetro, hys wyues fader, preest of Madian; and whanne he had dreuen the flok to the ynnermore partis of deserte, he cam to the hil of God, Oreb. And the Lord apperide to hym in a flawme of fier fro the mydle of a busshe, and he sawȝ that the busshe was ofier, and was not brent. Thanne seide Moyses, Y shal go, and se this greet siȝt, whi the busshe is not brent. And the Lord biholdynge that he ȝede to seen, clepide hym fro the mydle of the busshe, and seith, Moyses! Moyses! The which answerde, Y am nyȝ. And he, Ne come thow, he seith, no nerre hidur, but lowse thow thi shoyng fro thi feyt; the place forsothe that thow stondist yn is an holi loond. And he seith, Y am the God of thi fader, God of Abraham, and God of Ysaac, and God of Jacob. Moises hidde his face, forsothe he dorst not loke aȝens God. To whom the Lord seith, I haue seen the affliccioun of my puple in Egipte, and Y haue herd the crye of it, for the hardnes of hem that ben before to the werkis. And knowynge the sorwe of it, Y descendide to delyuere it fro the hoondis of Egipciens, and Y shal lede out fro that loond into a good loond and a wide, into a loond that flowith mylk and hony, to the places of Chananey, and Ethey, Amorrei, and Phereȝei, Euehey, and Jebusey. Thanne the crye of the children of Yrael is comen to me, and Y haue seen the affliccioun of hem, with the which thei ben oppressid of the Egipcyens. But come, and Y shal sende thee to Pharao, that thow lede my puple, the sones of Yrael, out of Egipte. And Moyses seide to God, Who am Y, that I shulde goo to Pharao, and lede out the sones of Yrael fro Egipte? The which seide to hym, I shal be with thee, and this thow shalt haue to tookun, that I haue sent thee, whanne thow shalt lede my puple fro Egipte, thow shalt do sacryfice to God vpon this hil. Moyses seith to God, Loo! Y shal goo to the sones of Yrael, and Y shal seie to hem, the God of ȝoure fadris hath sent me to ȝow; if thei seyn to me, what is his name, what shal Y seye to hem? The Lord seyde to Moyses, I am the which Y am; he seith, thus thow shalt seye to the children of Israel, He that is hath sent me to ȝow. And eftsones God seith to Moyses, Thes thingis thow shalt seye to the sones of Yrael, The Lord God of ȝoure fadrys, God of Abraham, and God of Ysaac, and God of Jacob, hath sent me to ȝow; this is name to me withouten ende, and this my memoriale in generacioun and into generacioun. Goo, and gedere togidere the aldyr men of Yrael, and thow shalt seye to hem, The Lord God of ȝoure fadris hath apeeryd to me, God of Abraham, and God of Ysaac, and God of Jacob, seiynge, Visytynge Y haue visitid ȝow, and Y haue seen alle thingis that haue fallun to ȝow in Egipte; and Y seyde, that Y shal lede ȝow out fro the affliccioun of Egipte into the loond of Chananei, and Ethei, and Amorrei, Phereȝey, and Euehi, and Jebusey, to the loond flowynge mylk and hony. And thei shulen here thi voyce; and thow shalt goon yn, and the alder men of Yrael to the kyng of Egipte, and thow shalt seye to hym, The Lord God of Ebrews hath clepid us; we shulen goon a weye of thre dayes into wildernes, that we doon sacrifice to the Lord oure God. But Y wote, that the kyng of Egipte shal not ȝyue ȝow leue that ȝe goon, but bi strong hoond; forsothe Y shal strecche out myn hoond, and Y shal smyte Egipte in alle my merueyles, that Y am to do in the mydle of hem, and after thes thingis he shal ȝyue to ȝow leue. And Y shal ȝeue grace to this puple bifore the Egipciens, that whanne ȝe gon out, ȝe shulen not goon out voyd; but a womman shal aske of hir neiȝbore and of hir gest silueren and goldun vessels, and clothes, and ȝe shulen ligge hem vpon ȝoure sones, and vpon ȝoure douȝtres, and ȝe shulen spoyle Egipte.
Moyses answerde, and seith, Thei shulen not leue me, ne here my voyce; but seyn, The Lord apeeryde not to thee. Thanne he seide vnto hym, What is that that thow holdist in thin hoond? He answerde, A ȝerde. And the Lord seide, Throw it into the erthe; he threwe it, and it was turned into a boske eddre, so that Moyses fleiȝ. And the Lord seide, Strecch out thin hoond, and tak his tayle; he strauȝte out, and helde, and it was turned into a ȝerde. That thei bileuen, he seith, that God of thi fadres aperide to thee God of Abraham, and God of Ysaac, and God of Jacob. And the Lord seide eftsones, Putte thin hoond into thi bosum; the which whanne he hadde putt into his bosum, he brouȝte it forth leprows, at liknes of snow. Drawe aȝen, he seith, the hoond into thi bosum: he aȝen drewȝ, and brouȝte it forth eftsones, and it was lijk vnto the tother fleshe. If thei leuen not, he seith, to thee, ne here the word of the former signe, thei shulen leue to the word of the signe that folweth; and if forsothe they leuen not to thes twey signes, ne heren thi voys, tak water of the floode, and heeld it out vpon the drye loond, and what euere thow drawist of the floode, it shal be turned into bloode. Moyses seith, Lord, Y biseche, I am not wel spekynge fro ȝisterday and fro the thridde dai hens; and sith thow spak to thi seruaunt, Y am of more latsum and of more slow tonge. The Lorde seide to hym, Who made the mouth of man, or who forgide the dowmbe and the deef, the seer and the blynde? whether not Y? Goo thanne, I shal be in thi mouth, and Y shal teche thee what thow shalt spek. And he, Y biseche, he seith, Lord, sende whom thow art to sende. The Lord wrooth aȝens Moyses, seith, Aaron, thi brother, Leuyte, I wote that he is a fayr speker; loo! he shal goo out into thin aȝen goynge, and seynge thee he shal be glad in herte. Spek to him, and put my wordis in his mouth, and Y shal be in thi mouth and in his mouth; and Y shal shewe to ȝou what ȝe shulen do. He shal speke for thee to the puple, and he shal be thi mouth; thow forsothe shal be to hym in thes thinges, that pertenen to God. And this ȝerde tak in thin hoond, in the which thow art to doon signes. Moyses ȝede, and turned aȝen to Jetro, his wyues fader, and he seide to hym, Y shal goo, and turn aȝen to my bretheren in to Egipte, that Y se if thei ȝit lyuen. To whom seide Jetro, Goo in pees. Thanne the Lord seide to Moyses in Madian, Goo, and turn aȝen into Egipte; forsothe alle thei ben deede, that souȝten thi lyf. Moyses tok his wyf, and his sones, and putte hem upon an asse, and he is turned aȝen into Egipte, berynge the ȝerde of God in his hoond. And the Lord seide to hym turnynge aȝen into Egipte, Looke, that alle the signes worthi to be shewid thow do, the whiche Y haue putte in thin hoond, before Pharao; Y shal hardun his herte, and he shal not leeue the puple; and thow shalt seye to hym, Thes thingis seith the Lord, My sone first getun Yrael; Y seide to thee, leeue my sone, that he serue to me; and thow woldist not leeue hym; loo! Y shal slee thi first gotun sone. And whanne he was in the weie, in the syde turnyng place to reste, the Lorde ȝede aȝens hym, and wold slee hym. Anoon Sephora tok a ful sharp stoon, and kitte al aboute the vttermore skynne of the ȝerde of hir sone, and it touchide his feet; and she seith, A spouse of blodis thow art to me. And she lafte hym, for the circumsicioun, aftir that she hadde seid, A spouse of blodes thou art to me. The Lord forsothe seide to Aaron, Goo into the aȝen comyng to Moises, into desert; the which ȝede to mete with hym into the hil of God, and he kysside hym. And Moyses tolde Aaron alle the wordis of the Lord, for the whiche he sente hym, and the toknes that he comaundyde. And thei comen togidere, and thei gadereden togidere alle the alder men of the sones of Yrael. And Aaron spak alle the wordis, that the Lord hadde seyde to Moyses; and he dide the signes beforn the puple; and the puple bileuede; and thei herden that the Lord hadde visitid the sones of Yrael, and that he hadde biholdun the affliccioun of hem; and redi thei anourden.
Aftir thes thingis ȝeden in Moyses and Aaron, and seiden to Pharao, Thes thingis seith the Lord God of Yrael, Leeue my puple, that thei doo sacrifice to me in desert. And he answerde, Who is the Lord, that I here his voys, and leeue Yrael? Y knowe not the Lord, and Yrael Y shal not leeue. Thei seiden, The God of Ebrews hath clepid vs, that we goon the weie of thre dayes into wildernes, and sacrifye unto the Lord oure God, lest perauenture falle to us pestilence, or swerd. The kyng of Egipte seith to hem, Whi, Moyses and Aaron, bisyen ȝe the puple fro her werkis? Go ȝe to ȝoure charges. And Pharao seide, Mych is the puple of the loond; ȝe seyn that the folk vudur growith; myche more, if ȝe ȝyuen hem reste fro werkis. He comaundide thanne that day to the maystris of werkis, and to the constreyners of the puple, seiynge, No more ȝe shal ȝyue chaf to the puple, that tiles ben maad as before; but goo thei hem siluen, and gadere stoble; and the mesure of tyles that thei before maden, ȝe shulen putt vpon hem, and ȝe shulen not lassen eny thing; forsothe thei ben voyd, and therfor thei cryen out, seiynge, Goo we, and sacrifye we to oure God; be thei oppressid with werkis, and fulfille thei hem, that thei assenten not to lesynge wordis. Thanne, goon out, the maystris of werkis and the constreyners seyden to the puple, Thus seith Pharao, Y ȝyue ȝou not chaf; goth, and gederith, where euer ȝe mowen fynde; ne eny thing shal be lasse of ȝoure werk. And the puple is scaterid thurȝ out al the loond of Egipte to be gadered chaf. And the maystris of werkis greetly stoden, seiynge, Fulfilleth ȝoure werk eche day, as before ȝe weren wont to doon, whanne chaf was ȝouun to ȝou. And thei ben tourmentid, that weren maystris to the werkis of the children of Yrael, of the constreyners of Pharao, seiynge, Whi han ȝe not fulfillid the mesure of tylis, as bifore, nowther ȝistirday ne to day? And the maystrys of the children of Yrael camen, and crieden out to Pharao, seiynge, Whi dost thow thus aȝens thi seruauntis? Chaf ben not ȝouun to vs, and tiles aliche many ben comaundid. Loo! we thi seruauntis ben betun with scourges, and wrongfuli it is doon aȝens thi puple. The which seith, Ȝe tenden to ydelnes; and therfor ȝe seyn, Go we and sacrifye to the Lord; goth thanne and worchith; chaf shal not be ȝouun to ȝow, and ȝe shulen ȝelde the customyd noumbre of tilys. And the maystris of the sones of Yrael seen hem seluen into yuel, for that it was seide to hem, There shal not be maad lasse eny thing of the tiles bi eche daies. And thei aȝen wenten to Moyses and to Aaron, that stoden euen aȝens, goynge out fro Pharao, and thei seiden to hem, Se the Lord, and deme, for to stynken ȝe han maad oure smel before Pharao and his seruauntis; and ȝe han ȝouun hym a swerd, that he slee vs. And Moyses turnede aȝen to the Lord, and seith, Lord, whi hast thow turmentid this puple? whi hast thow sent me? Fro that tyme forsothe that Y ȝede yn to Pharao for to spek in thi name, he turmentide thi puple, and thow hast not delyuered hem.
And the Lord seide to Moyses, Now thow shalt seen, what thingis Y am to do to Pharao; forsothe bi a strong hoond he shal leeue hem, and in a myȝti hoond he shal throwe hem out of his loond. And the Lord spak to Moyses, seiynge, Y the Lord, that aperyde to Abraham, and to Ysaac, and to Jacob in the God Almyȝti; and my name Adonay Y shewyde not to hem; and I couenauntide a boond of pees with hem, that Y shulde ȝyue hem the loond of Chanaan, the loond of her pilgrimage, in the which thei weren comlyngys. Y haue herd the weylyng of the children of Yrael, in the which the Egipciens han oppressid hem, and Y haue recordide of my couenaunte. Therfore sey to the sones of Yrael, Y the Lord, that shal lede ȝow out of the traueilous prisoun of Egipciens; and delyuere fro seruage; and forbigge in an ouerpassyng arm, and in greet domes; and Y shal tak ȝow to me into a puple, and Y shal be ȝoure Lord; and ȝe shulen knowe, that Y am the Lord ȝoure God, that hath ladde ȝow out fro the traueylows prisoun of Egipciens, and brouȝte ȝow into the loond, vpon the which Y haue lift up myn hoond, that Y ȝyue it to Abraham, Ysaac, and Jacob, and Y shal ȝyue it to be had to ȝow; I a Lord. Thanne Moyses tolde alle thes thingis to the sones of Yrael, the whiche assentiden not to hym for the angwisch of spyryt, and the moost hard werk. And the Lord spak to Moyses, seiynge, Goo yn, and spek to Pharao, the kyng of Egipte, that he leeue the sones of Yrael from his loond. Moyses answerde before the Lord, Loo! the sones of Yrael heren me not, and what manere shal Pharao here, namelich sith Y am vncircumcidid in lippes? And the Lord spak to Moyses and Aaron, and ȝaf a maundement to the sones of Yrael, and to Pharao, the kyng of Egipte, that thei leden the sones of Yrael out of the loond of Egipte. Thes be the princis of the housholdis bi her meynese. The sones of Ruben, the first goten of Yrael, Enoch, and Fallu, Esrom, and Carmy; thes the cognaciouns of Ruben. The sones of Symeon, Jamuel, and Jamyn, and Adod, and Jachym, and Soer, and Saul, the sone of Chananytidis; thes the progenyes of Symeon. And thes the names of the sones of Leuy bi her cognaciouns, Gerson, and Caath, and Merary. Forsothe the ȝeres of the lijf of Leuy weren an hundred and seuen and thretti. The sones of Gerson, Lobny and Semei, by her cognaciouns. The sones of Caath, Amram, and Ysuar, and Ebron, and Oziel; the ȝeris forsothe of the lijf of Caath an hundryd and six and thretti. The sones of Merary, Mooly and Musi. Thes the cognaciouns of Leuy bi her meynese. Amram forsothe tok a wijf, Jochabed, the douȝter of the brother to hys fader, the which bar to hym Aaron, and Moysen, and Mary; and the ȝeris of the lijf of Amram weren an hundryd and seuen and thretti. And the sones of Ysuar, Chore, and Naphes, and Zethry. The sones forsothe of Oziel, Mysael, and Elizaphan, and Sethri. Aaron forsothe tok a wijf, Elizabeth, the dowȝter of Amynadab, the sister of Naason, the which bar to hym Nadab, and Abyut, and Aleazar, and Ythamar. The sones forsothe of Chore, Aser, and Elchana, and Abiasab; thes ben the cognaciouns of Chorytis. And forsothe Eliazar, the sone of Aaron, tok a wijf of the dowȝtris of Phatiel, the which bar to hym Phynees. Thes ben the princis of the Leuytis meynese bi her cognaciouns. This is Aaron and Moyses, to whom the Lord comaundide, that thei shulden lede the sones of Yrael out of the loond of Egipte be her companyes; thes ben that speken to Pharao, the kyng of Egipte, that thei leden the sones of Yrael out of Egipte; this is Moyses and Aaron, in the day that the Lord spak to Moyses in the loond of Egipte. And the Lord spak to Moyses, seiynge, Y the Lord; spek to Pharao, kyng of Egipte, alle thingis that Y speke to thee. And Moyses seith bifore the Lord, Loo! Y am vncircumcidid in lippys, what manere shulde Pharao here me?
And the Lord seide to Moyses, Loo! Y haue ordeyned thee the god of Pharao; and Aaron, thi brother, shal be thi prophete. Thow shalt spek to hym alle thingis that Y seende to thee, and he shal spek to Pharao, that he late the sones of Yrael out of his loond. And Y shal ful harden his herte, and Y shal multiplie toknes and signes worthi to be shewid in the loond of Egipte, and he shal not here ȝow; and Y shal seend yn myn hoond upon Egipte, and Y shal lede myn oost, and my puple, the sones of Yrael, out of the loond of Egipte bi the grettist domes; and the Egipciens shulen knowe, that Y am a Lord, that may strecche out myn hoond vpon Egipte, and lede the sones of Yrael out of the myddil of hem. And so diden Moyses and Aaron; as the Lord comaundide, so thei diden. Forsothe Moyses was of eiȝti ȝeris, and Aaron of eiȝty and thre, whanne thei spaken to Pharao. And the Lord seide to Moyses and Aaron, Whanne Pharao shal sey to ȝou, Shew to us signes, thow shalt sey to Aaron, Tak thin ȝerde, and throw it bifore Pharao, and be it turned into a bosk eddre. And so Moyses and Aaron, goon yn to Pharao, diden as the Lord comaundide; and Aaron tok the ȝerde bifore Pharao and his seruauntis, that was turnyd into a boske addre. Pharao forsothe clepid sages, and clepers of deuels to doon yuel, and thei also diden bi Egipciens enchauntyngis, and sum priue thingis lyik manere; and eche threwe forth her ȝerdes, that weren turned into dragouns; but the ȝerde of Aaron deuouride her ȝerdes. And the herte of Pharao was myche hardid, and he herde hem not, as the Lord comaundide. Forsothe the Lord seide to Moyses, Engregid is the herte of Pharao, he wole not leeue the puple; go to hym eerli; loo! he shal goon out to the watris, and thow shalt stoond into his aȝen comyng upon the brynk of the floode; and thow shalt tak the ȝerde, that was turned into a dragoun, in thin hoond, and thow shalt sey to hym, The Lord God of Ebrews hath sent me to thee, seiynge, Leeue my puple, that thei sacrifye to me in desert; and vnto now thow woldist not heren. Thanne thes wordis the Lord seith, In that thow shalt knowe, that Y am a Lord; loo! Y shal smyit with the ȝerde, that is in myn hoond, the water of the floode, and it shal turne into bloode; the fisshis forsothe, that ben in the floode, shulen dye; and the water shal stynke, and turmentid shulen be the Egipciens drynkynge of the water of the floode. And the Lord seid to Moyses, Sey thow to Aaron, Tak thi ȝerde, and strecche thin hoond out vpon the watris of Egipte, and vpon her floodes, and her ryuers, and mershis, and alle lakis of watris, that thei ben turned into bloode; and that there be corrupte rennying bloode in al the loond of Egipte, as wel in treen vessel as in stony. And so Moyses and Aaron diden, as the Lord comaundide; and arerynge the ȝerde, he smote the watris of the floode before Pharao and his seruauntis, the which was turned into blood; and the fisshes, that weren in the floode, dieden; and the floode stonke, that the Egipciens myȝten not drinke the water of the flood; and there was bloode in al the loond of Egipte. And the clepers of deuels to doon yuel of the Egipciens diden in liyk manere in her enchauntyngis; and the herte of Pharao was myche hardid; and he herde hem not, as the Lord comaundide. And he turnede hym self awey, and ȝede into his hows, ne he putte not to the herte, also this while. Forsothe alle the Egipciens deluyden bi enuyroun of the floode, that thei myȝten drynk the water; forsothe thei miȝten not drynk of the water of the floode. And seuen dayes weren fulfillid, after that the Lord hadde smyten the floode.
Forsothe the Lord seide to Moyses, Goo into Pharao, and thow shalt sey to hym, Thes thingis seith the Lord, Leeue my puple, that he sacrifye to me; ellis forsothe if thow wolt not leeue hem, loo! Y shal smyte alle thi coostis with frogges; and the floode shal boyl up froggis, that shulen steyn vp, and goo in to thin hows, and into thi bedchaumbre, and vpon thi beddynge, and into the houses of thi seruauntis, and into thi puple, and into thi ouenes, and in to the relyues of thi metis; and to thee, and to thi puple, and to alle thi seruauntes shulen goon yn froggis. And the Lord seide to Moyses, Sey to Aaron, Strecche out thi hoond vpon floodes, and vpon ryuers, and mershes; and brynge out frogges vpon the loond of Egipte. And Aaron strauȝte out the hoond vpon the watris of Egipte; and there steyden vp frogges, and couerden the loond of Egipte. And the clepers of deuels diden by her enchauntyngis lijk maner; and brouȝten out frogges vpon the loond of Egipte. Forsothe Pharao clepide Moyses and Aaron, and seiden to hem, Preye ȝe the Lord, that he do awey frogges fro me, and fro my puple; and Y shal lat the puple, that thei sacryfye to the Lord. And Moyses seide to Pharao, Ordeyn me a tyme, whan Y shal preye for thee, and for thi seruauntis, and for thi puple, that the frogges ben dreuen a wey fro thee, and fro thin hows, and fro thy seruauntis, and fro thi puple; and oonly in the floode thei abiden. The which answerde, To morwe. And he, After thi word, he seith, Y shal do, that thow knowe, for there is not a Lord as oure God; and the frogges shulen goon awey from thee, and from thin hows, and fro thi children, and fro thi seruantis, and fro thi puple; and oonli in the floode thei shulen abijd. And Moyses and Aaron ȝeden out fro Pharao. And Moyses criede to the Lord, for the biheeste of froggis, that he couenauntide to Pharao. And the Lord dide after the word of Moyses; and the frogges weren deed of the howsis, and of the townes, and of the feeldes; and thei gedered hem togidere into greet heepes withouten noumbre, and the erthe stonke. Pharao forsothe seynge that there was ȝeue rest, his herte engredgide, and herde not hem, as the Lord comaundide. And the Lord seide to Moyses, Spek to Aaron, Strecche out thi ȝerde, and smyit the powdre of the erthe, that there ben stynggynge gnattes in al the loond of Egipte. And he dide so; and Aaron strauȝte out the hoond, holdynge the ȝerde, and he smote the powdre of the erthe; and there weren maad stynggynge gnattes in men, and in beestis; al the powdre of the erthe is turnyd into stynggynge gnattes thurȝ out al the loond of Egipte. And liyk manere diden the clepers of deuels in her enchauntyngis, that thei myȝten dryue out the stynggynge gnattes, and thei myȝten not; and stynggynge gnattes weren bothe in men and in beestis. And the clepers of deuels seiden vnto Pharao, The fyngur of God ys here. And the herte of Pharao was greetli hardid, and he herde hem not, as the Lord hadde comaundide. And the Lord seide to Moyses, Aryse eerli, and stoond before Pharao, forsothe he shal goon out to the watris; and thow shalt sey to hym, Thes thingis seith the Lord, Leeue my puple, that thei sacrifye to me; and if thow late hem not, loo! Y shal seende into thee, and into thi seruauntis, and into thi puple, and into thin howses, al kynde of fliȝis; and the howsis of Egipte shulen be fulfillyd with fliȝis of dyuerse kynde, and al the loond in which thei shulen ben. And Y shal mak merueylows in that day the loond of Gessen, in the which is my puple, that there ben not there fliȝis; and wyte thow that Y am Lord in the myddel of the erthe; and Y shal sette partynge bitwix my puple and thi puple; to morwe shal be this tokne. And so dide the Lord. And there cam the moost greuows fliȝe in to the hows of Pharao, and of his seruauntis, and into al the loond of Egipte; and the loond was corrupte of lyche maner fliȝis. And Pharao clepide Moyses and Aaron, and seith to hem, Gooth, and sacrifieth to the Lord ȝoure God in this loond. And Moyses seith, It may not be doo so; the abhomynaciouns forsothe of Egipciens shulen we offre to oure Lord? that if we sleen thes thingis that Egipciens heryen beforn hem, they shulen felle us down with stones. We shulen goon the weye of three dayes into wildernes, and we shulen sacryfie to the Lord oure God, as he hath comaundid vs. And Pharao seid, Y shal leeue ȝow, that ȝe sacrifie to the Lord ȝoure God in deserte; neuertheles go ȝe a wey no ferthere; preieth for me. And Moyses seith, Y goon out fro thee shal preye the Lord; and the fliȝe shal goo a wey fro Pharao, and fro his seruauntis, and fro his puple to morwe; neuertheles wole thou no more desceyue me, that thow lat not the puple sacryfie to the Lord. And Moyses goon out fro Pharao preiede the Lord, that dide aftir his word, and he tok awey fliȝes fro Pharao, and fro the seruauntis, and fro his puple; there ouerlafte not oon forsothe. And the herte of Pharao was engredgid, so that ȝit this while he wolde not leeue the puple.
To Moyses forsothe seyde the Lord, Goo yn to Pharao, and spek to hym, Thes thingis seith the Lord God of Ebrews, Leeue my puple, that it sacrifie to me; that if ȝit thow forsakist, and holdist hem, loo! myn hoond shal be vpon thi feeldis, vpon horsis, and assis, and chamels, and oxen, and sheip, a ful greuows pestilence; and the Lord shal do a meruelows thing bitwix possessiouns of Yrael and the possessions of Egipcyens, that no thing algatis perishe of thes thingis that pertenen to the sones of Yrael. And the Lord ordeynede a tyme, seiynge, To morwe the Lord shal do this word in the loond. The Lord dide thanne this word the tother day, and alle the beestis of Egipciens dyeden; of the beestis forsothe of the children of Yrael no thing algat perishide. And Pharao sent to looke, ne eny thing was deed of thes thingis that Yrael hadde; and the herte of Pharao was inwardly agreued, and he lafte not the puple. And the Lord seyde to Moyses and Aaron, Tak ȝe hoondes ful of asken fro the chymney, and Moyses sprenge it into heuene before Pharao; and be there powdre vpon al the loond of Egipte; and there shulen ben in men and yn beestis biles, and bleynes swellynge, in al the loond of Egipte. And thei token asken of the chymney, and they stoden before Pharao; and Moyses sprengide it into heuene; and there ben maad woundes of the swellynge bleynes in men, and in beestis; ne the clepers of deuels myȝten stoonde before Moyses, for the woundis that weren in hem, and in al the loond of Egipte. And the Lord hardid the herte of Pharao, and he herde not hem, as the Lord spak to Moyses. And the Lord seide to Moyses, Eerli aryse, and stoond before Pharao, and thow shalt sey to hym, Thes thingis seith the Lord God of Ebrews, Lat my puple, that he sacrifie to me; for in this while Y shal sende alle my veniaunces vpon thin herte, and vpon thi seruauntis, and vpon thi puple, that thou knowe, that there is noon like me in al the loond. Now forsothe I shal stretche out the hoond, and Y shal smyit thee and thi puple with pestilence, and thou shalt perisshe fro the erthe; therfor forsothe Y haue sett thee, that Y shewe my strengthe in thee, and my name be toold in eche loond. Ȝit thow holdist my puple, and wole not leeue it? Loo! Y shal reyne to morwe this same our ful myche hawle, what maner was not in Egipte, fro the day that it was sett, vnto the tyme that is now. Seend thanne now riȝt, and gedere togidere thi beestis, and al that thou hast in the feelde; men forsothe, and beestis, and alle that shulen be foundun withouten, and not gedered togidere fro watres, and the hawle fal vpon hem, thei shulen die. He that dradde the word of the Lord, of the seruauntis of Pharao, made his seruauntis and beestis flee togidere into howsis; he forsothe that rouȝte not the word of the Lord, left his seruauntis and beestis in the feeldis. And the Lord seide to Moyses, Strecche out thin hoond into heuene, that there be maad hawle in al the loond of Egipte, vpon men, and vpon beestis, and vpon al erbe of the feelde in the loond of Egipte. And Moyses strauȝte the ȝerde into heuene; and the Lord ȝaf thundres, and hawle, and dyuersly rennynge leytis vpon the erthe; and the Lord reynede hawle vpon the loond of Egipte; and hawle, and fier mengid togidere weren brouȝt; and it was of so greet mychelnes, how greet bifore neuer apeeride in al the loond of Egipte, sith that folk was maad. And the hawle smoot in al the loond of Egipte alle that weren in feeldes, fro man vnto beest; and al erbe of the feelde smoote the hawle, and eche tree of the cuntree it breke togidere; oonly in the loond of Gessen, where weren the children of Yrael, the hawle fel not. And Pharao sente, and clepide Moyses and Aaron, seiynge to hem, Y haue synned also now; the Lord is riȝtwiys, Y and my puple wickid; preye ȝe the Lord, that the thundres of God and the hawle leeuen of, and Y shal leten ȝow, and ȝe shulen dwelle here no more. Moyses seith, Whanne Y shal goon out fro the citee, Y shal strecche out my hoond to the Lord, and the thundres shulen ceesse, and hawle shal not be, that thow knowe, for of the Lord is the erthe; forsothe Y knowe, that thow and thi seruauntis dreden not ȝit the Lord God. The flax thanne and barlich was hurt, for that that the barlich was grene, and the flax now buriownde coddes; whete forsothe and corn weren not hurt, for thei weren of late growyng. And Moyses goon out fro Pharao, and out of the citee, strauȝte the hondes to the Lord, and thundres and hawle ceesiden, and no more droppide the reyn vpon the loond. Pharao forsothe seynge that the reyne hadde ceesid, and hawle, and thundres, encreesid the synne; and the herte of hym and of hys seruauntis is engredgid, and his herte was ful myche hardid; and he lafte not the sones of Yrael, as the Lord comaundide by the hoond of Moyses.
And the Lord seide to Moyses, Goo yn to Pharao, Y forsothe haue hardid the herte of him, and of his seruauntis, that Y make thes my signes in hym; and thow telle in the erres of thi sone and of thi cosyns, how ofte sithes Y haue born doun togidere the Egipciens, and haue doon toknes in hem; and knowe ȝe for Y a Lord. Thanne Moyses and Aaron ȝeden yn to Pharao, and seiden to hym, Thes thingis seith the Lord God of Hebrews, How long wolt thow not be suget to me? Leeue my puple, that it sacrifie to me; yf forsothe thow withstonde, and wole not leeue it, loo! Y shal leede yn to morwe a locust into thi coostis, that shal couer the vttermost of the erthe, that eny thing of it shal not apeere, but be etun that was lafte to the hawle; forsothe he shal gnawe alle trees that buriounen in the feeldes; and thei shulen fulfille thin howses, and of thi seruauntis, and of alle the Egipcyens, how many han not seen thi fadris, ne her fadris, sith thei weren born vpon erthe, vnto the day that is now. And he turnede hym a wey, and ȝede out fro Pharao. And the seruauntis of Pharao seiden to hym, How long shulen we suffre this sclaundre? Leeue the men, that thei sacrifye to the Lord her God; seest thow not, that Egipte perishith? And thei clepeden aȝen Moyses and Aaron to Pharao, the which seide to hem, Goth, and sacrifieth to the Lord ȝoure God; who forsothe ben that ben to goon? Moyses seith, With oure children and aldren we shulen goon; and with sones, and douȝtres, with sheip, and droues; it is forsothe the solempnyte of the Lord oure God. And Pharao answerde, So the Lord be with ȝow, what maner thanne Y shal leeue ȝow and ȝoure children? to whom is it dout, that ful yuel ȝe thenken? It shal not be doon so, but go ȝe oonly men, and sacryfye to the Lord; this forsothe and ȝoure seluen askiden. And anoon thei weren put out fro the siȝt of Pharao. And the Lord seide to Moyses, Strecche out thin hoond vpon the loond of Egipte, to a locust, that it stey vp vpon the loond, and deuowre al herbe that to the hawle was laft of. And Moyses strauȝte out the ȝerde vpon the loond of Egipte, and the Lord brouȝte yn a brennynge wynde al that day and nyȝt; and the morwe tyde biganne, a brennynge wynd reride vp locustes, the whiche steiden vp fro al the loond of Egipte, and seeten in alle the coostis of Egipciens vnnoumbrable, whiche maner before that tyme weren not, ne afterward ben to comen. And thei couerden al the vttermost party of the loond, wastynge alle thingis; thanne the heerbe of the loond was deuowryd, and what euer thing of apples that was in trees, that the hawle hadde laft; and algatys no grene thing was laft in the trees and in heerbis of the loond, in al Egipte. Wherfor hiynge Pharao clepide Moyses and Aaron, and seide to hem, Y haue synned in the Lord ȝoure God, and yn ȝow; but now forȝyue ȝe the synne to me; also this sithe prey ȝe the Lord ȝoure God, that this deeth he doo a wey fro me. And Moyses ȝede out fro the siȝt of Pharao, and preide the Lord; the which made blow the moost hidows wynde fro the west, and the locust takun he threwe a fer into the reed see; and there laft not forsothe oon in alle the coostis of Egipte. And the Lord hardide the herte of Pharao, and he lafte not the children of Yrael. Forsothe the Lord seide to Moyses, Strecche out thin hoond into heuene, and be there derknes vpon the loond of Egipte, so thik that thei mown be gropid. And Moyses strauȝte out the hoond into heuene, and orrible derknesses ben maad in al the loond of Egipte; thre dayes no man myȝte se his brother, ne mouede him out of that place that he was ynne; where euer the children of Yrael dwelten, was liȝt. And Pharao clepide Moyses and Aaron, and seide to hem, Gothe, and sacrifieth to the Lord; ȝoure sheep oonli and droues abiden thei stil; ȝoure children goo thei with ȝow. Moyses seith, Forsothe oostis and brent sacrifices thow shalt ȝyue to vs, that we offren to the Lord oure God; alle the flockis shulen goon with vs; there shal not leeue a clee of the thingis that ben necessarie into the heriyng of the Lord oure God, namely, whan we knowen not what shal be offryd, to the tyme that we comen fullich to that place. And the Lord hardide the herte of Pharao, and he wold not leeue hem. And Pharao seide to Moyses, Goo awey fro me, and be war that thow se no more my face; what euer day thow aperist to me, thow shalt dye. Moyses forsothe answerde, So be it doon, as thow hast spokun; Y shal se no more thi face.
And the Lord seide to Moyses, Ȝit with o veniaunce Y shal touche Pharao and Egipte, and aftyr thes thingis he shal leeue ȝow, and constreyne to goon out. Thanne thow shalt seie to al the puple, that a man aske of his freend, and a womman of hir neiȝbore, silueren and goldun vessels, and clothis; forsothe the Lord shal ȝyue grace to his puple befor the Egipcyens. And Moyses was a ful greet man in the loond of Egipte, before the seruauntis of Pharao and al the puple; and seith, Thes thingis seith the Lord, At myd nyȝt Y shal goon yn to Egipte; and there shulen dye alle the fyrst gotun in the loond of Egipciens, fro the first gotun of Pharao, that sittith in his see, vnto the first gotun of the handmayden, that is at the queern; and alle the first gotun of beestis; and there shal be a greet crye in al the loond of Egipte, what maner was not bifore, ne aftirward is to come. Anentis forsothe alle the children of Yrael there shal not grucche a dog, fro man vnto beeste; that ȝe knowen, bi how myche myracle the Lord dyuydide the Egipciens and Yrael. And alle thes thi seruauntys shulen descende to me, and thei shulen preye for me, seyynge, Go out thow, and al the puple that is suget to thee; after thes thingis we shulen goon out. And greetly wrooth he ȝede out fro Pharao. The Lord forsothe seyde to Moyses, Pharao shal not here ȝow, that many signes be doon in the loond of Egipte. Moyses forsothe and Aaron diden alle the signes and alle the toknes worthi shewynge, that ben wrytun, before Pharao; and the Lord hardide the herte of Pharao, ne he lafte the sones of Yrael fro his loond.
The Lord forsothe seyde to Moyses and Aaron in the loond of Egipte, This moneth to ȝow the bigynnynge of the monethis shal be the first in monethes of the ȝeer. Spek ȝe to al the cumpanye of the sones of Yrael, and sey ȝe to hem, The tenthe day of this moneth tak echon a lombe bi meynese and her howsis; if forsothe the noumbre is to litil, that it may not suffice to eet the lombe, he shal tak his neiȝbore, that is ioyned to his hows after the noumbre of the soules, that may suffice to the etyng of the lombe. Forsothe it shal ben a lombe withouten wemme, a maal of o ȝeer; after the which riyt ȝe shulen take also a kydde; and ȝe shulen kepe it vnto the fourtenthe day of this moneth; and al the multitude of the sones of Yrael shal offre it at euen. And thei shulen take of his bloode, and leggen vpon either post, and in the thresshwoldes of the howses, in the whiche thei shulen eet it; and thei shulen eet flesh that nyȝt, rostid with fier, and therf looues with wylde letuse. Ȝe shulen not eten of it eny thing raw, ne sothun with water, but oneli rostid with fier; the heed with his feet and entrayls ȝe shulen vowre; ne there shal not leeue of it eny thing to to morwen; and if eny thing be laft, with fier ȝe shulen brenne it. So forsothe ȝe shulen eten it; ȝe shulen girde about ȝoure reynes, and ȝe shulen haue shoon in ȝoure feet, holdynge staues in hoondis; and ȝe shulen eete hastiliche; it is forsothe phase, that is to seye, the passyng forth of the Lord. And Y shall passe thurȝ al the loond of Egipte that nyȝt, and Y shal smyit alle the first gotun in the loond of Egipte, fro man vnto beeste; and in alle the goddis of Egipte Y shal make domes; Y a Lord. The bloode forsothe shal be to ȝow into tokne, in the housis in the which ȝe shulen be; and Y shal se the bloode, and Y shal ouerpasse ȝow; and there shal not be in ȝow a veniaunce destruyinge, whanne Y shal smyit the loond of Egipte. Forsothe ȝe shulen han this day into mynde, and ȝe shulen halwe it solempne to the Lord in ȝoure generaciouns with heriyng euerlastynge. Seuen daies ȝe shulen eten therf breed; in the first day there shal be no sour dowȝ in ȝoure howses; who so euer etith sowred breed, shal perishe that soule fro Yrael, fro the first day vnto the seuenthe day. The first day shal be holy and solempne, and the seuenthe day shal be wurshipful in the same feeste; no thing of werk ȝe shulen doon in hem, out tak thes that perteyneth to etyng; and ȝe shulen kepe therf breed. Forsothe in that same day Y shal leede ȝoure oost out of the loond of Egipte; and ȝe shulen kepe this day in ȝoure generaciouns in ryte euerlastynge. The firste moneth, the fourtenth day of the moneth, at euen, ȝe shulen eet therf breed, vnto the oon and twentith day of the same moneth at euen. Seuen dayes soure breed shal not be foundun in ȝoure howses; who so etith soure breed, his soule shal perishe fro the companye of Yrael, as wel of cumlyngis, as of with ynne borne of the loond. Al soure breed ȝe shulen not eet, and in alle ȝoure dwellyng places ȝe shulen eet therf breed. Moyses forsothe clepide alle the eldren of the sones of Yrael, and seyde to hem, Gothe, takynge a beeste bi ȝoure meynese, offre ȝe paske; and the litil sprynkil of ysop wetith in bloode, that is in the nethir threswold, and sprengith of it the ouerthreswold, and either post; noon of ȝow alle shal go out of the dore of his hows vnto the morwen tyde. The Lord forsothe shal passe forth smytynge the Egipciens; and whanne he seeth the bloode in the threswald, and in either post, he shal ouer goo the dore of the hows, and he shall not suffre the smyter goo into ȝoure howsis, and hurten. Kepe thow this word lawful to thee and to thi sones vnto withouten ende. And whanne ȝe shulen goon into the loond that the Lord is to ȝyue to ȝow, as he hath bihotun, ȝe shulen kepe thes cerymonyes; and whanne ȝoure sones shulen seye to ȝow, What is this religioun? ȝe shulen seye to hem, It is the sacrifice for the ouercomun enemys of the passing of the Lord, whanne he passide forthe vpon the hows of the sones of Israel in Egipte, smytyng the Egipciens, and oure hows delyuerynge. And the puple bowid anowryde. And the sones of Yrael goon out, diden as the Lord comaundyde to Moyses and Aaron. It was doon forsothe in the myddil of the nyȝt, the Lord smoot alle the fyrst gotun in the loond of Egipte, fro the fyrst gotun of Pharao, that sat in his see, vnto the first gotun of the caytif womman, that was in prisoun, and alle the first gotun of beestis. And Pharao aroos the nyȝt, and alle his seruauntis, and al Egipte; and ther was sprongun a greet crye in Egipte; and forsothe there was not an hows, in the which leye not the deed. And Moyses and Aaron clepid in the nyȝt, Pharao seith, Ryseth, and goth out fro my puple, and ȝe and the sones of Yrael; gothe, and sacrifieth to the Lord, as ȝe seyn; ȝoure sheip and ȝoure droues takith, as ȝe han askid; and goynge a wey blesse ȝe to me. And the Egipciens nediden the puple to goon out of the loond swiftly, seiynge, Alle we shulen dye! Thanne the puple tok sprengid meel, or it were sowrid; and byndynge it in chaf, putte vpon her shuldres. And the sones of Yrael diden as the Lord comaundide to Moyses; and thei askiden of the Egipciens silueren and goldun vessels, and myche clothing. Forsothe the Lord ȝaf grace to the puple before the Egipciens, that thei wolden leene hem; and thei spuyleden the Egipciens. And the sones of Yrael ȝeden fro Remesse into Sochoth, almoost six hundryd thowsynd of foot men, with outen children and wymmen; but and the comoun of either sex or kynde vnnoumbrable steyden vp with hem; sheip, and droues, and ful many hauynge lijf of dyuerse kynde. And thei bakiden meele, that a litil before sprengide thei token out of Egipte, and thei maden therf looues vnder asken; and thei myȝten not be maad sowre, the Egipciens constreynynge to goon out, and not suffrynge to mak eny dwellyng, ne eny thing of sowel there com to to maken redi. The dwellyng places forsothe of the sones of Yrael, that thei dwelliden yn Egipte, was of four hundred and thretti ȝeer; the whiche fulfillid, the same day ȝede al the oost of the Lord out of the loond of Egipte. This is nyȝt of the Lord able to be kept, whanne he ladde hem out of the loond of Egipte; this owen to kepe alle the sones of Yrael in her generaciouns. The Lord forsothe seide to Moyses and Aaron, This is the religioun of phask; ech alien shal not ete therof; al forsothe seruaunt bouȝt be he circumcidid, and so eet he; comlyng and hyryd seruaunt shulen not eet thereof; in oon hows it shal be etun, ne ȝe shulen not bere of his fleshe out, ne boon of it ȝe shulen breek. Alle the companye of the sones of Yrael shal doo it; that if eny of pilgrymes wole come into ȝoure heriyng of religioun, and do the pask of the Lord, before eche maal child of him shal be circumcidid, and thanne with riȝt he shal halewe, and he shal be togidere as a with ynne gotun of the loond; if eny forsothe be not circumcidid, he shal not ete therof. The same lawe shal be to the with ynne gotun, and to the comlyng tilyer, that pilgrimagith anentis ȝow. And alle the sones of Yrael diden as the Lord comaundide to Moyses and Aaron. And in the same day the Lord ladde the sones of Yrael out of the loond of Egipte, bi her companyes.
Forsothe the Lord spak to Moyses, seiynge, Halwe to me alle the fyrst gotun that openith the wombe in the sones of Yrael, as wel of men as of beestis, alle forsothe ben myne. And Moyses seide to the puple, Hath mynde of this day, in the which ȝe ben goon out of Egipte, and of the hows of thraldom, for yn a strong hoond the Lord hath lad ȝow out of this place, that ȝe eeten not sowrid breed. To day ȝe goon out, in the moneth of new fruytis; and whanne the Lord shal leede thee into the loond of Chananey, and Ethei, and Amorrei, and Euehi, and Jebusei, that he swoore to thi fadrys, that he shulde ȝyue to thee, the loond flowynge mylk and hony, and ȝe shulen halwe this manere of holy thingis this moneth. Seuen dais ȝe shulen eete therf breed, and in the seuenthe day shal be the solempnyte of the Lord; therf breed ȝe shulen eete seuen dayes, there shal not apere anentis thee eny thing maad sowre, ne in alle thi coostis. And thow shalt telle to thi sone that day, seiyng, This is that the Lord hath doon to me, whanne Y ȝede out of Egipte. And it shal be as a tokne in thin hoond, and as mynde before thin eyen, that the lawe of the Lord euermore be in thi mouth; forsothe in strong hoond the Lord ladde thee out of Egipte, and of the hows of thraldom. Thow shalt kepe this maner heriyng the ordeyned tyme, fro dayes into dayes. And whanne the Lord shal leede thee into the loond of Chananei, as he hath sworn to thee, and to thi fadris, and shal ȝyue it to thee, thow shalt seuer al that openeth wombe, to the Lord, and that that cheef is in thi beestis; what euer thow shalt haue of maal kynde, thow shalt halwe it to the Lord. The first gotun of an asse thow shalt chaunge for a sheip, the which if thow aȝen biyst not, thow shalt sleen; alle. forsothe the first gotun of man of thi sones thow shalt aȝen bye in priys. And whanne thi sone shal aske thee to morwe, seiynge, What is this? thow shalt answere to hym, In a stronge hoond the Lord hath lad us out of the loond of Egipte, fro the hows of thraldom; for whanne Pharao was hardyd, and wold not leeue vs, the Lord slowe al the first gotun in the loond of Egipte, fro the first gotun of man vnto the first gotun of beestis; therfor Y offre to the Lord al that openeth wombe of maal kynde, and al the first gotun of my sones Y aȝen bye. It shal be thanne as a tokne in thin hoond, and as a thing hongid vp for recordyng before thin eyen, therthurȝ that in a strong hoond the Lord hath lad vs out of Egipte. Thanne whanne Pharao hadde leten out the puple, God ladde hem not out bi the weie of the loond of Philisten, the which is nyȝ; holdynge lest perauenture it shulde othenkyn hym, if it hadde seen bateyls aȝens hym to aryse, and turnen aȝen into Egipte; but he ladde hem about bi the weie of desert, that is biside the reed see. And armed steyden vp the sones of Yrael fro the loond of Egipte. Forsothe Moyses tok the boons of Joseph with hym, therthurȝ that he hadde with ooth chargid the sones of Yrael, seiynge, God shal vysyte ȝow, and ber ȝe my boons out hens with ȝow. And thei goon from Sochoth, setten tentis in Etham, in the vttermest coostes of wildirnes. The Lord forsothe wente beforn hem to be shewide the weie, bi day in the pilere of a clowde, and bi nyȝt in a piler of fier, that he were leder of the weye either tyme; neuer faylide of the piler of the clowde bi day, ne the piler of fier bi nyȝt, before the puple.
And the Lord spak to Moyses, seiynge, Spek to the sones of Yrael; turned sette thei tentis forn aȝens Phyayroth, that is bitwix Magdalum and the see, aȝenst Beelsephon; in his siȝt ȝe shulen sett tentis vpon the see. And Pharao is to sey vpon the sones of Yrael, Thei ben artid togidere in a loond, desert hath enclosid hem. And Y shal harden his herte, and he shal pursue ȝow, and Y shal be glorified in Pharao, and in alle his oostis; and the Egipciens shulen wyte for Y am a Lord; and thei diden so. And it is told to the kyng of Egipciens, that the puple hadde flowun; and ful myche chaungid is the herte of Pharao, and of his seruauntis vpon the puple, and thei seiden, What wole we doon, that we leeuen Yrael, lest it serue not to vs? Thanne he ioynede the chare, and al his puple he tok with hym; and he tok six hundryd chosun charys, and al that of chares was in Egipte, and the leders of his oost. And the Lord hardide the herte of Pharao, the kyng of Egipte, and he pursuede the sones of Yrael; and thei weren goon out in a hiȝe hoond. And whanne the Egipciens pursueden the steppes of the goers before, thei fonden hem in the tentis vpon the see; alle the ridynge, and the chares of Pharao, and al the oost weren in Phyayroth, aȝens Beelsephon. And whanne Pharao was nyȝ, the sones of Yrael, heuynge vp her eyen, seyen the Egipciens after hem, and thei dradden greetli; and thei crieden to the Lord, and seiden to Moyses, Perauenture there weren not sepulcris in Egipte, therfor thow tok vs, that we dieden in wildernes? what woldist thow do this, that thow woldist lede vs out of Egipte? Was not this the word that we spaken to thee in Egipte, seyinge, Goo awey fro vs, that we seruen to the Egypcyens? it is forsothe myche betere to serue to hem, than to dye in wildernes. And Moyses seide to the puple, Wole ȝe not drede, stondeth, and seeth the greet wondres of God, that he is to doon to day; forsothe the Egipciens that ȝe now seen, ȝe shulen seen no more vnto with outen ende; the Lord shal fiȝt for ȝow, and ȝe shulen hoold ȝoure pees. And the Lord seide to Moyses, What cryest thow to me? Spek to the sones of Yrael, that thei goon forth; thow forsothe arere thin ȝerde, and strecche out thin hoond vpon the see, and dyuyde it, that the sones of Yrael goon thurȝ the drye, in the myddil see. Y forsothe shal harden the hertes of the Egipciens, that thei pursue ȝow, and Y shal be glorified in Pharao, and in al his oost, and in the chares, and in the riders; and the Egipciens shulen wyte that Y am Lord God, whanne Y shal be glorified in Pharao, and in chares, and in his ryders. And the aungel of the Lord, that ȝede before the castels of Yrael, takynge hym self ȝede after hem, and with hym togidere the pilere of the clowde, the forthermore leeuynge bihynde the bak, stode bitwix the tentis of Egipciens and the tentis of Yrael; and there was a derk clowde, and liȝtynge the nyȝt, so that to hem self togidere al the tyme of the nyȝt thei myȝten not cum nyȝ. And whanne Moyses hadde strauȝt out his hoond vpon the see, the Lord tok it awey, blowynge an hidous wynde, and brennynge al nyȝt, and he turnede it into drowȝt; and the watir was dyuydid. And the children of Irael wenten yn thurȝ the myddel of the drye see; forsothe the water was as a wal at the riȝt syde of hem and the lefte. And the Egipciens pursuynge, ȝeden yn after hem, al the horsyng of Pharao, his chares, and his ryders, bi the myddil of the see. And now was comun the morwetide, and loo! the Lord biholdynge vpon the tentes of the Egypciens, by the pilere of fyer, and of the clowde, slewe the oost of hem; and he turnede vpsedown the wheles of the chares, and thei weren born into the depthe. Thanne seiden the Egipciens, Flee we Yrael; forsothe the Lord fyȝtith for hem aȝens us. And the Lord seith to Moyses, Strecche out thin hoond vpon the reed see, that the watris turnen aȝen to Egipciens, vpon the chares, and the horsmen of hem. And whanne Moyses hadde strauȝt out the hoond aȝens the see, fyrst the morwetide it was turned aȝen to the rather place; and the Egipciens fleynge, watres aȝen comen, and the Lord wrapte hem with ynne in the myddel floodes. And the watris weren turned aȝen, and thei couerden the chares, and the horsmen of al the oost of Pharao, the whiche folwynge weren goon into the see; ne oon forsothe ouerlafte not of hem. Forsothe the sones of Yrael fulliche ȝeden thurȝ the myddil of the drye see, and the watris weren to hem as for a wal, fro the ryȝt half and fro the left half. And the Lord delyuerede Israel in that day fro the hoond of the Egipciens, and thei seen the Egipciens deed vpon the brenk of the see, and the greet hoond that the Lord hauntide aȝens hem; and the puple dredde the Lord, and leueden to the Lord, and to Moyses his seruaunt.
Thanne Moyses soong, and the sones of Israel, this ditee to the Lord; and seiden. Synge we to the Lord, forsothe gloriously he is magnyfied; the hors and the steyer up he threwe down into the see. My strengthe and my preysyng the Lord; and he is maad to me into helthe. This my God, and hym Y shal gloryfie; the God of my fader, and hym Y shal enhaunce. The Lord as a man fiȝter, Almyȝti his name; the chare of Pharao and his oost he threwe fer into the see. His chosun princes weren turned vpsedoun in the reed see; the depe watris couerden hem; thei descendiden into the depthe as a stoon. Lord, thi riȝt hoond is magnyfied in strengthe; thy ryȝt hoond, Lord, hath smytun the enemye. And in multitude of thi glorie thow hast put doun alle myn aduersaryes; thow hast sent thi wrath, that deuowride hem as stoble. And in the spirit of thi woodnes watris ben gederid togidere; the flowynge water stode, the depe watris ben gederid to gidere in the myddil see. The enemye seide, Y shal pursue, and Y shal tak; robries Y shal dyuyde, my soule shal be fulfillid. I shal drawe out my swerd; and myn hoond shal slee hym. Thi spiryt blewe, and the see couerde hem; and thei ben vnder dreynt as leed in hidows watris. Who, Lord, is lijk to thee in strong thingis, who is lijk to thee? thow doer of greet thingis in holynes, and feerful, and preysable, and doynge merueyls. Thow hast strauȝt out thin hoond, and the erthe hath deuourid hem; a duke thow hast ben in thi merci to thi puple, that thow hast aȝenbouȝt; and thow hast born it in thi strengthe to thin holi dwellyng place. Puples steiden vp, and ben wrooth; sorwes withheelden the dwellers of Philistien. Thanne ben disturbid the princes of Edom; tremblyng withheelde the strong men of Moab. Alle the dwellers of Chanaan aȝenfrusshiden for ferde; inward drede fal vpon hem, and outward drede in the mykilnes of thin arme. Be thei maad vnmouable as a stoon, to the tyme, Lord, that thi puple passe; to the tyme that thi puple passe, this that thow hast weeldid. Thow shalt lede hem yn, and thow shalt plaunt in the hil of thin heritage; with thi moost stedfast dwellyng, Lord, that thow hast wrouȝt; Lord, thi seyntuarye, that thin hondes fastiden. The Lord shal regne withouten ende and ouer. Forsothe Pharao, rydynge with charys, and his horsmen ȝeden yn to the see, and the watris of the see the Lord aȝenbrouȝte vpon hem; the sones forsothe of Yrael ȝeden thurȝ the drye, in the myddil of it. Thanne Mary, a prophetesse, the sister of Aaron, tok a tympan in hir hoond, and alle the wymmen ȝeden out after hir, with tympanes and daunses; with the whiche she before songe, seiynge, Synge we to the Lord, gloriously forsothe he is magnyfyed; the hors and his steier up he threw doun into the see. Forsothe Moyses tok Yrael fro the reed see, and thei ȝeden out into the desert of Sur, and thei ȝeden thre dayes thurȝ wildirnes, and thei fonden no watyr. And thei camen into Marath, and thei myȝten not drynk the watris of Marath, forthi that thei weren bitter; wherfor and a couenable name he putte to the place, clepynge it Mara, that is, bitternes. And the puple grucchide aȝens Moyses, seiynge, What shulen we drynk? And he cryede to the Lord, the which shewide hym a tree; the which whanne he hadde put into the watris, thei weren turned into swetnes. There he ordeynede to him heestis and domes, and there he temptide hym, seiynge, If thow herist the voys of the Lord thi God, and dost that that is ryȝt before hym, and obeyshist to his maundementis, and kepist alle his heestis, al the langour that I putte in Egipte, Y shal not brynge yn vpon thee; I forsothe am the Lord thi Sauyour. The sones of Yrael forsothe camen into Helym, where weren twelue welles of watris, and seuenti palme trees, and thei meueden tentis bisides the waters.
And thei ȝeden forth fro Helym, and al the multitude of the sones of Yrael cam into desert of Syn, that is bitwix Helym and Synai, the fiftenthe day of the secounde moneth after thei weren goon out of the loond of Egipte. And alle the congregaciouns of the sones of Yrael grucchiden aȝens Moyses, and aȝens Aaron, in wildernes. And the sones of Yrael seiden to hem, Wolde God we hadden be deed bi the hoond of the Lord in the loond of Egipte, whanne we seeten vpon the pottis of flesh, and eten breede in fulnes; whi hast thow ladde vs into this desert, that thow myȝtist slee al this multitude with hungur? The Lord forsothe seide to Moises, Y shal reyn to ȝow looues fro heuene; the puple goo out that he gadere that sufficen bi eche dayes; that Y tempte hym, whether he goo in my lawe, or noon. The sixte day forsothe greithe thei that thei bryngen yn, and dowble be there that thei weren wont to gedere bi eche dayes. And Moyses and Aaron seiden to alle the sones of Yrael, At euen ȝe shulen wyte that the Lord hath lad ȝow out of the loond of Egipte; and the morwetide ȝe shulen se the glorye of the Lord; I haue herd forsothe ȝoure grucchyng aȝens the Lord; what forsoth ben we, that ȝe grucchen aȝens vs? And Moyses seith, The Lord shal ȝyue to ȝow at euen flesh for to eete, and eerli looues in fulnes, for thi that he hath herd ȝoure grucchyng, the which ȝe han grucchid aȝens hym; what forsothe ben we? ne aȝens vs is ȝoure grucchyng but aȝens the Lord. And Moyses seide to Aaron, Sey to al the congregacioun of the sones of Yrael, Goo ȝe to before the Lord, forsothe he hath herd ȝoure grucching. And whanne Aaron spak to al the companye of the sones of Yrael, thei bihilden to wildernas, and loo! the glorye of the Lord aperyde in a clowde. Forsothe the Lord spak to Moyses, seiynge, Y haue herd the grucchyng of the sones of Yrael; spek thow to hem, At euen ȝe shulen eete flesh, and eerli ȝe shulen be fillid with looues, and ȝe shulen wyte that Y am the Lord ȝoure God. Thanne it was doon at euen, and steiynge vp a curlew couerde the tentis, and eerly dew cam by the enuirown of the tentis. And whanne it hadde couerde the vttermore parti of the erthe, it aperid in wildernes lassid, and as with a pestel pownyd, into the lyknes of an hoore frost vpon the erthe. The which thing whanne the sones of Yrael hadden seen, thei seiden togidere, Man hu? that bitokneth, what is this? forsothe thei knewen not what it was. To whom Moyses seith, This is the breed that the Lord hath ȝouun to ȝow for to eete. This is the word that the Lord comaundide, Echon gedere of it how myche it sufficith for to eete, the tenthe part of thre busshels bi ech heedes, after the noumbre of soules that dwellen in the tabernacle, so ȝe shulen taak. And so dyden the sones of Yrael, and thei gadreden another more, another lesse; and thei mesurden it at the mesure of gomor, that is, of threttenthe pownde, with the tenthe part of two pownde; ne he that gederede more hadde more, ne he that gaderyde lesse foond lesse, but eche after that that he myȝte eete gadreden. And Moyses seide to hem, No man leeue therof vnto the morwen; the whiche herden him not, but sum therof lafte vnto the morwen, and it biganne to boyle wormes, and stonk; and Moyses was wrooth aȝens hem. Forsothe eche gaderede the morwetide as myche as myȝte suffice to ete, and whanne the sunne bigan to heet, it moltid. The sixte day forsothe thei gadreden dowble metis, that is to seye, two gomors bi eche man. And alle the princes of the multitude camen, and tolden to Moyses, the which seith to hem, This is that the Lord spak, The rest of the holy day is halwid to the Lord, to morwe al that is to worchynge dothe, and that ben to seething seetheth, and what euer shal be relif, leith vp til to morwe. And thei diden so as Moyses hadde comaundide, and it stonk not, ne worme was founde there yn. And Moyses seide, Etith that to day, for it is the saboth of the Lord, yt shal not be founde to day in the feelde; six dayes gedere ȝe, in the seuenthe day forsothe is the saboth of the Lord, therfor it shal not be foundun. The seuenthe day cam, and goon out of the puple that thei myȝten gedere, thei fonden noȝt. And the Lord seide to Moyses, How long wolen ȝe not kepe my maundementis, and my lawe? Seeth that the Lord shal ȝyue to ȝow a saboth, and therfore he shal ȝyue to ȝow the sixt day dowble meetis; dwel euerechon anentis hym silf, no man goo out of his place the seuenthe day. And the puple halowide the seuenthe day. And the hows of Yrael clepide the name of it man, that was as the seed of coliaundre white, and the taast of it as of tryed floure with hony. And Moyses seyde, This is the word that the Lord comaundide, Fulfil thow gomor of it, and be it kept into generaciouns afterward to comen, that thei knowen the breed with the which Y norshide hem in wildernes, whanne ȝe weren lad out of the loond of Egipte. And Moyses seide to Aaron, Tak a vessel, and putte ther yn man, how myche may take gomor, and ley vp before the Lord, to kepe into ȝoure generaciouns, as the Lord comaundide to Moyses; and Aaron putte it in the tabernacle, to be reserued. And the sones of Yrael eten man fourti wynter, to the tyme that thei camen into a loond able to dwel yn; with this meet thei weren norishid forto thei towcheden to the coostys of the loond of Chanaan. Gomor forsothe is the tenthe party of ephi, that is, a mesure of thre busshels.
Thanne goon forth al the multitude of the sones of Yrael fro the desert of Syn, bi her mansiouns, after the word of the Lord, setten tentis into Raphidym, where was not water to the puple for to drynke. The which ianglynge aȝens Moyses, seith, Ȝif to vs water, that we drynken. To whom answerde Moyses, What iangle ȝe aȝens me, whi tempte ȝe the Lord? The puple thanne thristide there, for meschef of water, and it grucchide aȝen Moyses, seiynge, Whi hast thow maad vs to goo out of Egipte, that thow myȝte slee vs, and oure fre children, and beestes, thurȝ thrist? Moyses forsothe criede to the Lord, seiynge, What shal Y do to this puple? ȝit a litil while, and it shal stonen me. The Lord seide to Moyses, Goo before the puple, and tak with thee of the aldren of Yrael, and the ȝerde, with the which thow smoot the floode tak in thin hoond, and goo; loo! Y shal stoond before thee there, vpon the stoon of Oreb, and thow shalt smyte the stoon, and there shal goon out of it water, that the puple drynk. Moyses dide so beforn the eldren men of Yrael; and he clepide the name of that place Temptynge, for the ianglyng of the sones of Yrael, and for thei temptiden the Lord, seiynge, Whether is God in vs, or noon? Forsothe Amalech cam, and fauȝte aȝen Yrael in Raphidym. And Moyses seide to Josue, Chees men, and thow goon out, fiȝt aȝens Amalech, to morwen; and Y shal stoond in the frount of the hil, hauynge the ȝerde of God in myn hoond. Josue dide as Moyses had spokun, and he fauȝte aȝens Amalech. Moyses forsothe, and Aaron, and Hur steiden vp vpon the cop of the hil; and whanne Moyses rereden vp the hoondes, Yrael ouercom; ellis forsothe if he a litil abatide, Amalech ouercam. Forsothe the hoondes of Moyses weren heuy; thanne thei, takynge a stoon, puttiden vnder hym, in the which he sete. Aaron forsothe and Hur susteyneden the hoondes of hym, on either syde; and it was doon, that the hoondes of hym werieden not, vnto the goyng down of the sunne. And Josue made Amalech to flee, and the puple of hym, in the mouth of the swerd. And the Lord seide to Moyses, Wryte this in the book for mynde, and tak in the eeris of Josue; forsothe Y shal do a wey the mynde of Amalech vnder heuene. And Moyses bilde an auter, and clepide the name of it The Lord myn enhaunsyng, seiynge, For the hoond of the Lord oonli, and the batayle of God it was aȝens Amalech, fro generacioun into generacioun.
And whanne Jethro, the preest of Madian, cosyn to Moyses, hadde herd alle thingis that God dide to Moyses, and to Yrael his puple, forthi that the Lord hadde ladde Yrael out of Egipte, he tok Sephoram, the wijf of Moyses, whom he sente aȝen, and the two sones of hym, of whom oon was clepid Gersan, seiynge the fader, a comlyng Y was in an alien loond, the tother forsothe Eliezar, God forsothe, seith, myn helper of my fader, and he hath delyuered me fro the swerd of Pharao. Thanne cam Jetro, cosyne to Moyses, and the sones of hym and his wijf, to Moyses in desert, where he hadde sett tentis biside the hil of God. And he sente to Moyses, seiynge, I, thi cosyn Jethro, come to thee, and thi wijf, and thi two children with hir. The which, goon out into the aȝencomyng of his cosyn, lowtide, and kisside hym, and thei salutiden hem silf togidris with pesible wordis. And whanne he was goon into the tabernacle, Moyses tolde to his cosyn alle thingis that God hadde doon to Pharao, and to the Egipciens, for Yrael, and al the traueyle that hadde fallun to hem in the weye, fro the which the Lord hadde delyuered hem. And Gethro was glad vpon alle the goodis that the Lord dide to Yrael, forthi that he hadde delyuered hym fro the hoondis of the Egipciens; and seith, Blissid be the Lord God that hath delyuered ȝou fro the hondes of the Egipciens, and fro the hoond of Pharao, that hath drawun out his puple fro the hoond of Egipte; now I haue knowun for greet is the Lord aboue alle goddis, forthi that thei prowdli diden aȝens hem. Thanne Jethro, the cosyn to Moyses, offrede to God brent sacrifices, and oostes; and Aaron, and alle the aldren of Yrael, camen, that thei myȝten eete breed with hym before God. Another forsothe day Moyses sat for to deme the puple, the which stood niȝ to Moyses, fro morwe to euen. The which thing whanne his cosyn hadde seen, that is, alle thingis that he dide in the puple, seith, What is this that thow dost in the puple? whi alone sittist thow, and al the puple abidith fro morwetide vnto euen? To whom answerde Moyses, To me cometh the puple, sechynge the sentence of God; and whanne there fallith to hem eny strijf, thei comen to me, that Y deme betwix hem, that Y shewe the heestis of God, and his lawe. And he, Not good thing, he seith, thow dost, thow art consumyd with foli labour, and thow and thi puple that is with thee; ouer thi strengthes is this doyng of causis, alone that thow shalt not mowe susteyne. But here my wordis and counsels, and the Lord shal be with thee; be thow to the puple in thes thingis that perteynen to God, that thow telle to hem that ben seyd; and thow shewe to the puple the serymonyes, and the ryte of heriyng, and the weie bi the whych thei owen to goon yn, and the werk that thei owen to doon. And puruey of al the puple men myȝti, and dredinge God, in whom be trewthe, and the whiche haten aueryse; and ordeyne of hem rewlers vpon thowsaundes, and rewlers vpon hundrethes, and rewlers vpon fifti, and rewlers vpon ten, that mowen deme the puple al tyme; and what euer shal be more, telle thei it to thee, and deme thei the lasse thingis oonli, that liȝter it be to thee, the charge partid vnto othere. And if thow dost thus, thow shalt fulfil the comaundement of God, and his heestis thow may susteyne; and al this puple shal turne with pees to her places. The whiche thingis herd, Moyses dide alle thingis that he meuyde to. And dowȝti men, chosun of al Yrael, he ordeyned hem princes of the puple, rewlers vpon thowsandes, and rewlers vpon hundrethis, and rewlers upon fifti, and rewlers vpon ten, that demeden the puple al tyme; what euer forsothe were harder, thei tolden to hym, oonli the liȝter thingis demynge. And he lafte his cosyn, the which turnyd aȝen, ȝede into his loond.
The thridde moneth of the goyng of Yrael out of the loond of Egipte, in this day thei camen into the wildernes of Synai; for thei goon forth fro Raphidym, and comynge vnto deserte of Synay, setten tentis in the same place; and there Yrael ficchid tentis, forn aȝens the hil. Moyses forsothe steyde vp into the hil to God; and the Lord clepide hym fro the hil, and seith, Thes thingis thow shalt seye to the hows of Jacob, and thow shal telle to the sones of Yrael, Ȝoure self han seen what I haue doon to the Egipciens, what maner wise Y haue born ȝou vpon the weenges of eglis, and haue takun to me. If thanne ȝe heren my voys, and kepen my couenaunt, ȝe shulen be to me into my propre tresour of alle puples; myn forsothe is al the erthe; and ȝe shulen be to me into a preestis kyngdom, and an holi folk; thes ben the wordis that thou shalt spek to the sones of Yrael. Moyses cam, and clepide togidere the more men thurȝ birthe of the puple, he expownede alle the wordes that the Lord hadde comaundid. And al the puple answerde togidere, We shulen doon alle the thingis that the Lord hath spokun. And whanne Moyses hadde told the wordis of the puple to the Lord, the Lord seyde to hym, Now riȝt Y shal com to thee in derknes of a clowde, that the puple here me spekynge to thee, and leue to thee, into with outen eende. Thanne Moyses tolde the wordes of the puple to the Lord, that seide to hym, Goo to the puple, and halwe hem to day and to morwen, and wasshe thei her clothis, and be thei redi into the thridde day; in the thridde day forsothe the Lord shal dessende before al the folk vpon the hil of Synay. And thow shalt ordeyn termes to the puple, bi enuyroun; and thow shalt seye to hem, Be war that ȝe steyen not into the hil, ne touche the endes of it; eche that touchith the hil, with deth shal dye. Hondes shulen not touche hym, but with stones he shal be pressid down, or he shal be stickid with dartis; whether he be beest, or man, he shal not lyue; whanne the trumpe begynneth to crie, thanne stey they vp into the hil. And Moyses descendide fro the hil to the puple, and halowede yt; and whanne thei haddun wasshun her clothes, he seith to hem, Be ȝe redi into the thridde day, and neiȝe ȝe not to ȝoure wyues. And now the thridde day was comen, and the morwetide was ful cleerid; and loo! thundres biganne to be herd, and leytes to shynen, and the moost thik clowd to couer the hil; and the crye of the trump more hidously made noyse, and the puple dredde, that was in the tentes. And whanne Moyses hadde led hem out into the aȝen comyng of God, fro the place of the tentes, thei stoden at the rotes of the hil. And al the hil of Synay smokide, forthi that the Lord descendide vpon it in fier; and the smeek steyde vp of it as of a furneys, and al the hil was ful feerful; and the sown of the trompe litil mele spronge into more, and lenger was strecchid. Moyses spak, and the Lord answerde hym, and the Lord descendide vpon the hil of Synay, in that cop of the hil, and he clepide Moyses in the heiȝt of it. Whider whanne he hadde steied vp, he seide to hym, Descende, and as with ooth charge the puple, lest perauenture it wole passe ouer the termes to se the Lord, and of hem perisshe a myche multitude; the preestis forsothe that camen nyȝ to the Lord, be thei halewed, lest Y smyte hem. And Moyses seide to the Lord, The comounte may not stey vp into the hil of Synay; thow forsothe hast witnessid, and comaundid seiynge, Put the termes about the hil, and halwe it. To whom seith the Lord, Goo, descende, and thow shalt stey vp, and Aaron with thee; the preestis forsothe and the puple passe thei not the termes, ne steye thei vp to the Lord, lest perauenture he slee hem. And Moyses steiede vp to the puple, and alle thingis tolde to hem.
And the Lord spak alle thes wordes to Moyses, Y am the Lord thi God, that hath lad thee out of the loond of Egipte, fro the hows of thraldom. Thow shalt not haue alyen goddis before me. Thow shalt not mak to thee grauen thing, ne eny liknes that is in heuene aboue, and that is in erthe benethe, ne of hem that ben in watrys vnder erthe; thow shalt not anoure hem, ne herye hem; I forsothe am the Lord thi God, strong gelows, visitynge the wickidnes of fadris in sones into the thridde and the ferthe generacioun of hem that hatiden me, and doynge merci into thousyndes to hem that louen me, and kepen myn heestis. Thow shalt not tak the name of the Lord thi God in veyn, ne forsothe the Lord shal haue innocent hym, that takith the name of the Lord his God in ydel. Haue mynde to halwe thin holy day; sixe daies thow shalt worche, and doon alle thi werkis; the seuenthe forsothe day is the haliday of the Lord thi God; thow shalt not doon al werk, thow, and thi sone, and thi dowȝter, and thi seruaunt, and thin handmayden, thi beeste, and comlyng that is with ynne thi ȝatis; sixe forsothe daies God made heuene and erthe, the see, and alle thingis that ben in hem, and he restide the seuenthe day; therfore the Lord blisside to the holi day, and halwide it. Honour thi fader and thi moder, that thou be of long lijf vpon erthe, that the Lord thi God shal ȝyue to thee. Thow shalt not slee. Thow shalt do no leccherye. Thow shalt not do thefte. Thow shalt not spek aȝens thi neiȝbore fals witnes. Thow shalt not coueyte the hows of thi neiȝbore, ne thow shalt desyre the wijf of hym, ne seruaunt, ne hoondmayden, ne oxe, ne asse, ne alle thingis that ben of hym. Al the puple forsothe herde voyces, and sawȝ lawmpes, and herde the sown of the trompe, and the hil smokynge; and ferde and smitun togidere with vttermore drede, thei stoden afer, seiynge to Moyses, Spek thow to vs, and we shulen here; spek not the Lord to vs, lest perauenture we dien. And Moyses seide to the puple, Wole ȝe not drede, that forsothe God proue ȝow he cam, and that the drede of hym were in ȝow, and that ȝe synnen not. And the puple stood afer; Moyses forsothe cam nyȝ to the derknes, in the which was God. And the Lord seide forthermore to Moyses, Thes thingis thow shalt seye to the sones of Yrael, Ȝe han seen that from heuene I haue spokun to ȝow; ȝe shulen not mak with me silueren goddis, ne goldun goddis ȝe shulen mak to ȝow. An auter of erthe ȝe shulen mak to me, and ȝe shulen offre vpon it ȝoure brent sacrifices, and pesible, ȝoure sheep, and oxen, in al place in the which shal be mynde of my name; I shal com to thee, and Y shal blesse to thee. That if a stonen auter thow makist to me, thow shalt not edifie that of hewun stoons; if forsothe thow rerist thi grauynge yrun vpon it, it shal be polutid. Thow shalt not stey vp bi greeses to myn auteer, lest thi filthe be shewyd.
Thes ben the domes, that thow shalt purpose to hem. If thow bye an Ebrew seruaunt, sixe ȝeer serue he to thee, in the seuenthe ȝeer he shal goo out fre, freliche; with what maner clothing he com yn, with siche he go out; and if he is hauynge a wijf, and the wijf goo out at ones. If forsothe the lord ȝyue to hym a wijf, and she ber sones and dowȝtris, the womman and the fre children of hir shulen be of his lord; he forsothe shal goo out with his clothing. That if the seruaunt seie, Y loue my lord, and wijf, and fre children, I shal not goon out fre; the lord offre hym to the goddis, and he shal be presentid to the dore, and postes; and he shal thril his eer with an alle, and he shal be to hym a seruaunt into the world. If eny sille his dowȝter into a seruaunt, she shal not goo out as handmaydens weren wont to goon out; if she displese in the eyen of hir lord, to whom she was takun, he shal leeue hir; forsothe to an alyen puple he shal not haue power of sillyng, if he leeue hir. If forsothe he spouse hir to his sone, after the maner of dowȝtres he shal do to hir; and if he tak another womman to hym, he shal puruey to the mayden bridalis and clothes, and the pryse of the clennes he shal not denye. If thes thre thingis he do not, she shal goon out frelich with outen money. Who smytith a man, wilnynge to slee, with deeth die he; who forsothe is not aweytid, but God hath takun hym into his hondes, Y shal ordeyne to thee a place whidyr hym awe to flee. If eny man of auysement sle his neiȝbour and by aspyes, fro myn auteer thow shalt pul hym, that he be slayn. Who smytith his fader, or moder, with deeth dye he. Who cursith his fader, or moder, be he deed. Who stelith a man, and sellith hym, conuycte of the trespas, with deeth dye he. If men chiden, and that oon smyte his neiȝbour with stoon, or with fist, and he be not deed, but lye in the bed, if he aryse and goo out vpon his staf, he shal be ynnocent that smoot; so neuertheles that he restore the bisy traueils of hym, and the expensis into leches. Who so smyteth his seruaunt, or handmayden, with a ȝerde, and thei dien in her hondes, he shal be gilti of deedly blame. If forsothe he lyue ouer a day, or two, he shal not be vndurcast to that peyne, for the money of hym he is. If men chiden, and a man smyte a womman with child, and make forsothe the child deed born, but she lyueth, he shal be vndurcast to the harme, as myche as the housbond of the womman wole aske, and domes men shulen deme. If forsothe hir deeth folwe, he shal ȝeld lijf for lijf, eye for eye, tooth for tooth, hoond for hoond, foot for foot, brynnyng for brynnyng, wounde for wounde, blones for blones. If eny man smyte the eye of his seruaunt, or of hondmayden, and make hem pure blynde, he shal leeue hem free for the eye that he hath drawun out. A tooth forsothe if eny man smyte out to his seruaunt, or to his handmayden, liyk maner he shal leeue hem free. If an oxe with the horn smyte a man, or a womman, and thei weren deed, he shal be throwun doun to deeth with stones, and his flesh shal not be etun, and the lord shal be innocent of the oxe. And if an oxe be an hornputter fro ȝisterday and the thridde day hens, and thei han warned the lord of hym, befor witnes, and the lord hath not holdun hym yn, and he slee a man, or womman, the oxe shal be throw doun to the deeth with stones, and the lord of it thei shulen slee; and if pryis be set to hym, he shal ȝyue for his lijf what euer be askid. The sone forsothe and the douȝter if it smyte with horn, to the lijk sentence he shal vnderligge. If seruaunt and hondmayden it aseyl, thretti ownces of siluer he shal ȝyue to his lord; the oxe forsothe shal be throwun down with stoons. If eny man open a cystern, and delue, and not couerith it, and oxe or asse fal into it, the lord of the cistern shal ȝeeld the prijs of the beestis, and that that is deed shal be his. If an alyen oxe wounde an oxe of another mannus, and he were deed, the quyk oxe thei shulen selle, and thei shulen dyuyde the prijs; the careyn forsothe of the deed thei shulen depart bitwix hem. If forsothe he wiste, that the oxe was an hornputter fro ȝisterday and fro the thridde day hens, and his lord kepide hym not, he shal ȝeeld oxe for oxe, and the hool careyn he shal al take.
If eny man hath stoln sheep, or oxe, and sleeth, or sellith, fyue oxen for oon oxe he shal restore, and foure sheep for o sheep. If a theef brekynge an hows, or were foundun vndurmynynge, and with a wounde takun were deed, the smyter shal not be gilti of the blood; and if the sunne sprongne he do that, he hath doon manslauȝter, and he shal die. And if he haue not to ȝelde for the thefte, he shal be soold; and if there be founde anentis hym lyuynge that that he hath stoln, either oxe, or asse, or sheep, the dowble he shal restore. If eny man harme feeld, or vynȝeerd, and leeue his beeste, that it waste other mennus thingis, what euer best thing he hath in his feeld, or vynȝeerd, he shal restore for estymacioun of the harm. If fyer goon out fynde eeres, and cacche the rekes of corn, or the corn stondynge in feeldis, he shal ȝeeld the harm that tyndeth the fier. If eny man leene money to a freend, or vessel into kepyng, and fro hym that tok thei weren takun awey bi theft, if the theef be foundun, he shal ȝeeld the dowble. And if the theef is vnknowun, the lord of the hows shal be presentid to the goddis, and he shall sweer, that he strauȝte not hoond into the thing of his neiȝbore, for to be don gijl; as wel in oxe, and in asse, and sheep, and clothing; and what euer of harm he maye brynge yn, to the goddis the cause of either shal com, and if thei demen, he shal ȝeeld the dowble to his neiȝbour. If eny leene to his neiȝbore oxe, asse, sheep, and al beeste to kepynge, and it were deed, or feblishid, or takun of enemyes, and no man se it, there shal be the lawe of ooth in the mydle, that he strauȝte not out the hoond to the thing of his neiȝbore; and the lord shal tak the ooth, and he shal not be constreyned to ȝeeld aȝen. That if thruȝ theft it were takun awey, he shal restore the harm to the lord; and if it be etun of a beeste, brynge he forthe to hym that that is slayn, and he shal not restore. Who of his neiȝbore eny thing of thes askith to borwe, and it were enfeblished, or deed, the lord not present, he shal be compellid to ȝeeld; and if the lord were present, he shal not restore, moost if the hirid was soold, for mede of his werk. And if eny man bere down a mayden not ȝit spowsid, and he sleep with hir, he shal dowe hir, and he shal haue hir to wijf. And if the fader of the mayden wole not ȝyue, he shal ȝeeld the money, after the maner of dowyng, that maydens weren wont to tak. Clepers of deuels thow shalt not suffre to lyue. What man so gothe togidere with a beeste, with deeth die he. Who offreth to goddis, but to the Lord oonly, be he slayne. A comlyng thow shalt not mak sory, ne turment hym; forsothe comlyngis and ȝoure seluen weren in the loond of Egipte. To the wydowe and the faderles child thow shalt not anoye. If thow harmest hem, thei shulen crye to me, and Y shal here the crye of hem, and my woodnes shal dedeyn, and Y shal smyte ȝow with swerd, and ȝoure wyues shulen be wydewes, and ȝoure sones faderles. And if thow leenyst money to my pore faderles child, that dwellith with thee, thow shalt not constreyn hym, as a fraward asker, ne thow shalt not oppresse him with vsurys. If thow takist of thi neiȝbore a clooth wed, before the goynge down of the sunne thow shalt ȝeeld it to hym; that is forsothe al oonli thurȝ which is couerid the clothing of his flesh, ne he hath noon other, in the which he sleep; if he crye to me, Y shal here hym; for Y am mercyable. To the goddis thow shalt not bacbite, and to the prince of thi puple thow shalt not curse. Thy dymes and fyrst fruytis thow shalt not tarye to offre. The first gotun of thi sones thow shalt ȝyue to me; of oxen forsothe, and sheep thow shalt doon lijk maner; seuen dayes be he with his moder, and the eiȝtith day thow shalt ȝeeld hym to me. Ȝe shulen be holy men to me; the flesh that were before tastid of beestis ȝe shulen not eete, but ȝe shulen caste it to doggis.
Thow shalt not tak the voys of leesynge, ne ligge to thin hoond, that for the vnpyteuows thow seye fals witnes. Thow shalt not folwe the puple to doon yuel, ne in dome of many thow shalt assente to the sentence, that thow goo out of the weye of trewthe. Of the pore forsothe thou shalt not haue merci in cause of strijf. If thou aȝen come to the ox of thin enemy, or to the errynge asse, lede aȝen to hym. If thow se an asse of hym that hatith thee lye vnder the charge, thow shalt not ouerpasse, but thow shalt vnderheue with hym. Thow shalt not bowe awey in the dome of the pore. Lesyng thow shalt flee. The innocent and the ryȝtwis thow shalt not slee, for Y am aduersarye aȝens the unpiteuows. Ne tak thou ȝiftes, that also blynden wise men, and turnen vpsedoun the wordis of riȝtwys men. To the pilgrime thow shalt not be greuous; ȝe knowen forsothe the lyues of comlyngis, for and ȝe ȝoure silf weren pylgrimys in the loond of Egipte. Sixe ȝeer thow shalt sowe thi loond, and thow shalt gedere togidere the fruytis of it; the seuenthe forsothe ȝeer thow shalt leeue it, and thow shalt mak reste, that pore men of thi puple eeten, and what euer shal be relif, eete the beestis of the feeld; so thow shalt doon in thi vyne ȝeerd, and in thin oliue ȝeerd. Sixe dayes thow shalt worche, the seuenthe day thow shalt ceese, that the oxe reste, and thin asse, and the sone of thin handmayden be refreshid, and the comlyng. Alle thingis that Y haue seyd to ȝow, kepith; and bi the name of straunge goddis thow shalt not sweer, ne shal not be herd of ȝoure mouth. Thre sithes thurȝ eche ȝeer feeste dayes thow shalt halowe to me. The solempne of therf looues thow shalt kepe; seuen dayes thow shalt eete therf looues, as Y haue comaundid to thee, in the tyme of the moneth of new fruytis, whanne thow ȝedist out of Egipte; thow shalt not apere in my siȝt voyde; and the solempnete of the moneth of the cheef fruytes of thi werk, what euer thingis thow shalt sowe in thi feelde; and the solempnete in the goyng out of the ȝeer, when thow hast gedered togidere alle thi fruytis fro the feeld. Thries aȝeer shal apere al thi maal child before the Lord thi God. Thow shalt not offer vpon sour dowȝ the blood of thi sacrifice; ne there shal not leeue the talowȝ of my solempnete vnto the morwen. The cheef fruytis of the tilthe of thin erthe thow shalt bere into the hows of the Lord thi God. Thow shalt not seethe a kydde in the mylk of his moder. Loo! Y shal seende myn aungel, that he goo before thee, and kepe in the weye, and lede into the place that Y haue greithid. Wayt hym, and here his voys, ne wene thow hym to be dispisid, for he shal not forȝyue, whanne thou synnest, and my name is in hym. That if thow here hys vois, and dost alle thingis that Y speke, Y shal be enemy to thin enemyes, and Y shal turmente hem that turmenten thee; and myn aungel shal goo before thee, and he shal lede thee into Amorre, and Ethe, and Phereze, Chanane, and Eue, and Jebuze, whom Y shal totreede. Thou shalt not anowre the goddis of hem, ne thou shalt not herye hem; thow shalt not do the werkis of hem, but destrye hem, and al to breek the ymagis of hem. And ȝe shulen serue to the Lord ȝoure God, that Y blesse to thi looues, and watris, and Y shal take awey wickidnes fro the myddil of thee; ne thi loond shal be vnfructuous, ne bareyn; the noumbre of thi dayes Y shal fulfille. My feerde Y shal seende into thi before comyng, and Y shal slee al the puple, to whom thow shalt goon yn, and of alle thin enemyes before thee Y shal turne the backis; sendynge out before stynggynge flies, that ben sprungun of deed bodies, hauynge the stonges enuenymd, the which shulen make flee Eue, and Chanane, and Ethe, er thow goon yn. Y shal not throwe hem out fro thi face o ȝeer, lest the loond be turned into wildernes, and beestis growen aȝens thee; litil meele Y shal putte hem out fro thi siȝt, to the tyme thow be encreesid, and weelde the loond. Forsothe Y shal sette thi termes fro the reed see vnto the see of Palestynes, and fro the desert vnto the flood. Y shal take to ȝoure hoondes the dwellers of the loond, and Y shal throwe hem out fro ȝoure siȝt; thow shalt not goon with hem into couenaunt of pees, ne with the goddis of hem. Dwelle thei not in thi loond, lest perauentur thei maken thee synne aȝens me, if thow seruest to the goddis of hem, that certis shal be to thee into sclaundre.
To Moyses forsothe he seide, Stye vp to the Lord, thou, and Aaron, Nadab, and Abyu, and the seuenti aldren of Yrael; and ȝe shulen anowrn afer, and oonly Moyses stey vp to the Lord, and thei shulen not neiz to hym, ne the puple shal stye vp with him. Thanne Moyses came, and tolde to the puple alle the wordis of the Lord, and the domes; and al the puple answerde with o voys, Alle the wordis of the Lord that he hath spokun, we shulen do. Moyses forsothe wrote alle the wordes of the Lord; and eerli rysynge, he bildide an auteer to the Lord at the rotis of the hil, and twelue titlis by twelue lynagis of Yrael. And he sente the ȝong men of the sones of Yrael, and thei offreden alle brent sacrifices, and thei offreden pesible sacrifice to the Lord, twelue calues. And so Moyses took the half parti of the blood, and putte it into chalices; and that other party he shedde vpon the auteer. And takynge to the book of the couenaunt of pees, radde, herynge the puple, the whiche seiden, Alle thingis that the Lord hath spokun we shulen do, and we shulen be obeysaunt. He forsothe the blood takun sprengide into the puple, and seith, This is the blood of the boond of pees, that the Lord couenauntide with ȝow vpon alle thes wordes. And Moyses, and Aaron, Nadab, and Abyu, and the seuenty of the aldren of Yrael, stieden vp, and seen the God of Yrael, vndur the feet of him, as a werk of a saphire stoon, as heuene whanne it is bryȝt. Also vpon hem that ȝeden fer awey fro the sones of Yrael he sente his hoond; and thei seen God, and eten and drunken. The Lord forsothe seide to Moyses, Stye vp to me into the hil, and be there, and Y shal ȝyue to thee stonun tablis, and the lawe, and mawndementis that Y haue wrytun, that thow teche hem. And Moyses and Josue his seruaunt rysen, and Moyses stiynge vp into the hil of God, seith to the aldren, Abide ȝe here to the tyme that we turnen aȝen to ȝow; ȝe han Aaron and Hur with ȝow, if eny thing of questioun were sprongun, ȝe shulen telle it to hem. And whanne Moyses hadde styed vp, a clowd couerde the hil, and the glorye of the Lord dwellide vpon Synay, couerynge it with a clowd six dayes; the seuenthe forsothe day the Lord clepide hym fro the mydil of the derknes; and the liknes of the glorie of the Lord was as brennynge fyer vpon the cop of the hil in the siȝt of the sones of Yrael. And Moyses goon into the myddil of the clowd, styede vp into the hil, and was there fourti dayes and fourti nyȝtis.
And the Lord spak to Moyses, seiynge, Spek to the sones of Yrael, that thei taken to me the fyrst fruytis; of ech man that wilfuly offerith, ȝe shulen tak thilke thingis. And thes ben the thingis that ȝe shulen take, gold, and siluer, and brasse, and iasynkt, that is, silk of violet blew, and purpur, that is, sangwyn silk, and coctun twyes died, that is, silke of flawme colour, and biys, that is, the fynest lynen clooth of Egipte, and heeris of geyt, and skynnes of wetheres maad reed, and skynnes iacynktynes, and trees of Sychym, and oyle to make liȝtes, and swete smellynge thingis into oynement, and ensensis of good smel, onychen stoonus and gemmes to anowrn ephoth, that is, a preestis ouermest clothing, that we cleepen a coope, and the racionale, that is, the clooth in the brest of the coope, and in the brest of the preest. And thei shulen make to me a seyntuarye, and Y shal dwelle in the myddil of hem, after al the liknes of the tabernacle that Y shal shewe to thee, and of alle the vessels into the heriynge of it. And thus ȝe shulen make it; ȝe shulen ioyne of the trees of Sychym an arke, whose lengthe haue two cubites and an half, the brede o cubijt and an half, the heiȝt o cubijt also and an half. And thow shalt gilte it with moost clene gold with ynne and with oute; and thou shal make aboue a goldun coroun bi enuyroun, and foure goldun cerclis, the whiche thow shalte putte vp on the foure corners of the arke; be there two cercles in that o syde, and two in that other. And thow shalt make berynge staues of the trees of Sychym, and thow shalt couere hem with gold, and bryng yn thurȝ the cerclis that ben in the sides of the arke, that it be born in hem, the which euermore shal be in the cerclis, ne eny tyme shal be drawun out of hem. And thow shalt putte in to the arke the witnessyng, that Y shal ȝyue to thee. And thow shalt make a propiciatorye, that is, a place of purchasyng mercy, of moost cleene gold; the lengthe of it shal holde two cubitis and an half, and the brede of it o cubijt and an half. And two goldun cherubyns and forgid with hamers, thow shalt make on either party of the preiyng place; that o cherubyn be in the o syde of Goddis answeryng place, and that othere in that othere, that thei coueren either syde of the propiciatorye, strecchynge out the wenges, and couerynge Goddis answeryng place; and beholde thei hem seluen togidere, the cheeres turned into the propiciatorie, with the whiche is to be couered the arke of the Lord, in the whiche thow shalt putte the witnessyng, that Y shal ȝyue to thee. Fro thens Y shal comaunde, and speke to thee vpon the propiciatorye, that is, and fro the myddil of the two cherubyns, that shulen be vpon the arke of witnessyng, alle thingis that I shal comaunde bi thee to the sones of Yrael. And thow shalt make a meet bord of the trees of Sichym, hauynge two cubitis of lengthe, and in brede o cubiyt, and in heiȝt o cubijt and an half. And thow shalt gilte it with moost purid gold, and thow shalt make to it by enuyroun a goldun mergyn; and to thilk mergyn eueramong grauen coroun with foure fingur mele heiȝt, and vpon it another goldun coroun. And foure goldun cerclis thou shalt greithe, and thow shalt putte hem in the foure corners of the same bord, bi eche feet. Vnder the corouns shulen be goldun cerclis, that beryng staues mowen be put thurȝ hem, and the bord may be born. Thilke berynge staues thow shalt make of the trees of Sychym, and thow shalt enuyroun with gold, to be born the bord. And thow shalt greithe eysel vesselis, and phiols, censures, and litil cuppis, in the whyche sacrifices of lycours ben to be offred, of moost clene gold. And thow shalt putte vpon the bord looues of propicisioun, euermore in my siȝt. And thow shalt make a candelstik betun out with hamers, of moost cleene gold, the staf of it, and the ȝerdes, cuppes, and litil balles, and lilyes goynge out of it. Six ȝerdes shulen goon out of the sides, thre of that o side, and thre of that other. Thre cuppes as into maner of a note bi eche ȝerdes, and the litil balles togidere, and lylye, and the same wyse three cuppes at the lyknesse of a note in that other ȝerde, and balles, and lilye; and this shal be the werk of six ȝerdes, that ben to be brouȝt forth out of the candelstaf. In that forsothe candelstik shulen be foure cuppes in maner of a note, and balles bi eche and lilies; and the balles vndur the two ȝerdes bi thre places, the whiche six to gidere ben maad, goynge forth from o candelstaf; and the balles thanne, and the ȝerdes of it shulen be, al betun out of moost puyr gold. And thow shalt make seuen lanternes, and thow shalt put hem vpon the candelstik, that thei liȝten eche aȝens other. Candelquenchers, and forsothe where the snoffes ben quenchid, be thei maad of moost puyr gold. And al the weiȝt of the candelstyk with alle his vessels shal haue a talent of moost clene gold. Bihold and do after the sawmplere, that to thee is shewid in the hil.
The tabernacle forsothe thow shalt make thus; ten curteyns of biys aȝenfoldid, and iacynkt, and purpur, and coctyn twies died, dyuersid with nedle werk, thow shalt make. The lengthe of o curtyn shal haue eiȝt and twenti cubitis, the brede shal be of foure cubitis; of o mesure shal be made alle the tentis. Fyue curtyns to hem seluen shulen be ioyned to gidere, and other fyue shulen ioyne togidere lijk manere ioynynge. Litil oyletis iacyntyns in the sides, and in the ouermest of the curtyns, thow shalt make, that thei mowen be cowplid togidere. The curtyn shal haue fifti oiletis in either parti, so set in, that o oylete may come aȝen another, and the other may be leide to the other. And thow shalt make fifty goldun cerclis, with the whiche the veyles of the curtyns ben to be ioyned, that o tabernacle be maad. And thow shalt make elleuen heeren sarges to couer the roof of the tabernacle; the lengthe of the too sarge shal haue thretti cubitis, and the brede foure; euen mesure shal be of alle the sarges. Of the whiche fyue thou shalt ioyne aside, and sixe to hem silf thou shalt couple togider, so that the sixt sarge thou double in the frount of the roof. And thou shalt make fifti oiletis in the hemme of the too sarge, that it mai be ioyned with the tother; and fifti oiletis in the hemme to the tother sarge, that it mai be couplid with the tother; and fifti knoppis of bras with whiche the oyletis mowen be ioyned, that there be maad o couertour of alle. That forsothe that leeueth of in the sarges, that ben greithid to the roof, that is, o sarge that is the larger, of the half of it, thow shalt couere the hyndermore parties of the tabernacle; and o cubijt shal hong on that o parti, and another on that other, that is more ouer in the lengthe of the sarges, either side of the tabernacle wardynge. And thou shalt make another couertour to the roof, of the skynnes of wetheres maad reed, and vpon that eftsones another couertour of blew skynnes. And thow shalt make the tables stondynge of the tabernacle, of the trees of Sichym, the whiche echon han in lengthe ten cubitis, and in brede eche oon and an half. In the sides of the tabernacle be there made two rabitis, with the whiche the to table be sett fast to the tother; and so in this manere alle the tablis shulen be greithid. Of the whiche twenti shulen be in the mydday side, that drawith toward the sowth; to the whiche and fourti silueren stakis thow shalt ȝeete, that two stakis ben vnderput to ech table, bi two corners. And in the secounde syde of the tabernacle, that drawith to the north, there shulen be twenti tablis, hauynge fourti silueren stakis; two stakis to eche table shulen be vnderput. Forsothe to the west coost of the tabernacle thow shalt make sixe tables; and eftsones other two, the whiche in the corners ben arerid, bihynde the bak of the tabernacle; and thei shulen be to hem seluen ioynd to gidere fro byneth vnto aboue, and o ioynyng shal holde hem alle. To the two forsothe tables that ben to be put in the corners lijk manere ioynyng shal be kept, and there shulen be togidere eyȝt tablis; the silueren stakis of hem sixtene, two stakys noumbrid by o table. And thow shalt make fyue beryng staues of the trees of Sichym, to be holdun to gidere the tablis in the o side of the tabernacle, and fyue other in the tother, and of the same noumbre at the west coost; that shulen be putte bi the myddel tables fro the heiȝest vnto the heiȝest. And thilke tablis thou shalt gilden, and thou shalt ȝeten in hem goldun rynges, bi the whiche the staues holden togidere the bordid sides, the whiche thow shalt couere with goldun plates. And thow shalt arere the tabernacle, after the saumplere that is shewid to thee in the hil. And thow shalt make a veyle of iacynkt, and purpur, and coctun twies died, and bijs foldun aȝen with nedle werk, and with fayre dyuersite weuyd togidere; the whiche thow shalt honge before the foure pilers of the trees of Sichym, the whiche also shulen be gilt; and thei shulen han goldun heedes, but silueren feet. The veyle forsothe be it sett yn bi cercles, with ynne the whiche thou shalt put the arke of testymonye, and with the which the seyntuarye and the seyntuarye of the seyntuarie shulen be dyuydid. And thow shalt putte the propiciatorie vpon the arke of testymonye, into the parti of the tabernacle that is clepid holi of halowes; and the bord with outen the veyle, and aȝen the bord the candelstik in the sowth side of the tabernacle; the bord forsothe shal stonde in the parti of the north. And thow shalt make a tent in the goyng ynne of the tabernacle, of iacynkt, and purpur, and coctun twies died, and bijs foldun aȝen with nedle werk. And fyue pilers thow shalt gilte of trees of Sichym, before the whiche shal the tente be lad, of the whiche shulen be goldun heedes, and brasun feet.
Thow shalt make an auteer of trees of Sichym, that shal haue fyue cubites in lengthe, and as feele in brede, that is to seye, squaar, and thre cubites in heiȝt. Hornes forsothe bi the foure corners shulen be of it; and thow shalt couere it with brasse. And thow shalt make into the vsis of yt cawdrones, to be takun the asken, and toonges, and hokes, and fyer vessels; alle the vessels thow shalt forge of brasse. And a brasun gredyrne in the manere of a nett, bi whos foure corners shulen be foure brasun rynges, the whiche thow shalt putte vnder the fier panne of the auteer; and the gredyrne shal be to the myddil of the auteer. And thow shalt make two beryng staues of the auteer, of the trees of Sichym, the which thow shalt couere with brasun plates; and thow shalt lede ynne thurȝ cercles, and thei shulen be on either side of the auteer, to bern. Thow shalt make it not massy, but with inne voyde, and with ynne holowȝ, as it is shewid to thee in the hil. And thow shalt make the porche of the tabernacle, in whos sowth coost aȝen the sowth shulen be tentes of bijs aȝen foldid; the to side shal holde an hundred cubites in lengthe, and twenti pilers, with so feele brasun feet, the whiche shulen han silueren heedes with her grauyngis. Also in the side of the north, bi the lengthe, shal be tentis of an hundryd cubites, the pilers twenti, and brasun foot stakes of the same noumbre; and the heedes of hem with here grauyngis silueren. In the brede forsothe of the porche, that biholdith to the west, there shulen be tentis bi fifti cubitis, and ten pilers, and as feele footstakis. In that forsothe brede of the porche, that biholdeth to the eest, shal ben fifty cubitis, in the whiche tentis of fiftene cubitis shulen be ordeyned to that o side, and thre pilers, and so feele footstakes; in the tother side shulen be tentis holdynge fiftene cubitis, and thre pilers, and as feele footstakis. In the entre forsothe of the porche there shal be maad a tente of twenti cubitis, of iacynkt, and purpur, and cocto twies died, and bijs foldid aȝen with nedle werk; and he shal haue foure pilers, with as feele footstakis. Alle the pilers of the porche bi enuyroun shulen be clothid with silueren platis, the heedes silueren, and the feet brasun. In lengthe the porche shal ocupie an hundred cubitis, in brede fifti; the heiȝt shal be of fyue cubitis; and it shal be maad of bijs foldun aȝen, and it shal haue brasun footstakis. Alle the vessels of the tabernacle, into alle vsis and serymonyes, as wel the litil stakes of it as of the porche, thow shalt make of brasse. Comaunde to the sones of Yrael, that thei bryngen to thee oyle of olyue trees moost puyre, and powned with a pestel, that the lanterne brenne euer more. In the tabernacle of witnes with outen the veyle, that is aȝenstrauȝt to the testymonye; and Aaron and his sones shulen sette it, that it ȝyue liȝt vnto the morwen before the Lord; it shal be euerlastynge by the successioun of hem of the sones of Yrael.
And present to thee Aaron, thi brother, with his sones, fro the myddil of the sones of Yrael, that thei beren prestis office to me, Aaron, Nadab, and Abiut, Eliezer, and Ythamer. And thow shalt make to Aaron, thi brother, an holi clooth, into glorie and fayrnes. And thow shalt speke to alle the wise men in herte, that Y haue fulfillid with the spiryt of prudence, that thei make the clothis of Aaron, in the whiche he halowid mynystre to me. Thes forsothe shulen be the vestmentis that thei shulen make; the breest broche, and coope, coote, and a rochet, and a streyt myter, and a girdil thei shulen make; to Aaron, thi brother, and to the sones of hym, holi clothingis, that thei beren prestis office to me. And thei shulen take gold, and iacynkt, and purpur, and coctun twies died, and bijs; and thei shulen make the coope of gold, and iacynkt, and purpur, and coctun twies died, and bijs aȝen foldid, with nedle werk of dyuerse colours. Two hemmes ioyned he shal haue in eithir side of the heiȝtes, that thei goon into oon. That weuyng, and al the dyuersite of the werk shal be of gold, and of iacynkt, and of purpur, and of coctun twies died, and of bijs aȝen foldid. And thow shalt take two onychen stonus, and thow shalt graue in hem the names of the sones of Yrael, six names in that o stoon, and six in that other, after the ordre of her birthe; in the werk of the grauer, and in the grauyng of the gemmarye thow shalt graue hem, with the names of the sones of Yrael, enclosid with gold, and enuyround. And thow shalt put in either syde of the coope a memoryale to the sones of Yrael; and Aaron shal bere the names of hem before the Lord vpon either shuldre, for recordynge. And thow shalt make the hokys of gold, and two litil cheynes of moost puyre gold, to hem seluen togidere cleuynge to, the whiche thow shalt sett into the hokis. The breest broche forsothe of dom thou shalt make with werk of dyuerse colours, after the weuyng of the coope, of gold, iacynkt, and purpur, and coctun twies died, and bijs foldun aȝen. Foure cornerd it shal be, and dowble; the mesure of a spanne it shal haue, as wel in lengthe as in brede. And thow shalt put in it foure ordres of stonus; in the first verse shal be the sardo stoon, and topazi, and smaragdo; in the secounde, carboncle, saphijr, and iasp; in the thridde, ligyre, achates, and amatyst; in the ferthe, crisolide, onychen, and beril; thei shulen be enclosid with gold, bi her ordres, and thei shulen han the names of the sones of Yrael; with twelue names thei shulen be graued, eche stonus bi the name of eche, bi the twelue lynagis. And thou shalt make in the breest broche cheynes to hem seluen togidere cleuynge, of moost puyre gold, and two goldun ryngis, the whiche thow shalt putte in either creeste of the broche. And thow shalt ioyne the goldun cheynes to the rynges that ben in the mergyns of it, and the eendis of thilke cheynes thow shalt cowple to the two hokes in either side of the coope, that the breest broche biholdith. And thow shalt make two golden rynges, the whiche thou shalt putte in the creestis of the breest broche, and in the hemmes, the whiche ben forn aȝen of the shuldre clooth, and byholden the hyndermore of it. Also and other two goldun rynges, the whiche ben to be sette in either side of the coope benethe, that biholdeth aȝens the face of the nethermore ioynyng, that it may be leyd to with the coope. And the breest broche with his rynges be streyned with the rynges of the coope, with a iacynctyne filete, and the ioynyng dwel forgid, that the breest broche and the coope mowen not be seueryd atwynne. And Aaron shal bere the names of the sones of Yrael in the breest broche of dome vpon his breest, whanne he gothe into the seyntuarye, a memoryale before the Lord into with outen eende. And thow shalt putt in the breest broche of dome, doctryne and trewthe, that shulen be in the breest of Aaron, whanne he shal go ynne before the Lord; and he shal bere the dome of the sones of Yrael in his breest, in the siȝt of the Lord euermore. And thow shalt make the coote of the coope al iacynctyne, in whos myddil aboue shal be an hood, and a weuyd hemme bi enuyroun of it, as it is wont to be maad in the eendis of clothis, lest it liȝtly to-breke. Benethe forsothe at the feet of the same coote, bi enuyroun, thow shalt make as powm garnettis, of iacynkt, and purpur, and coctun twies died, and bijs aȝen foldid; in the myddil litel belles menged, so that the litel belle be gold, and a powm garnet; and eftsones another litel goldun belle, and a powm garnet. And Aaron shal be clothid it in the office of the seruyce, that the sown be herd whanne he gothe yn and out the seyntuarye, in the siȝt of the Lord, and that he dye not. And thow shalt make a plate of moost puyre gold, in the which thow shalt graue with werk of a grauer, the hooly to the Lord. And thow shalt bynde it with a iacynctyne filete, and it shal be vpon the coyif stondinge ouer to the forheed of the bishop. And Aaron shal bere the wyckidnes of thilke thingis that the sones of Yrael shulen offre, and halowe, in alle ȝiftis to men, and in her ȝiftes to God; and the plate shal be euermore in the frownt of hym, that the Lord be plesid to him. And thou shal streyne the coote with bijs, and the coif of bijs, and thou shalt make the girdil with werk of a broderere. Forsothe to the sones of Aaron thow shalt greithe lynnen cootes, and girdlis, and coyfes, into glorye and fayrnes. And thow shalt clothe with alle thes Aaron, thi brother, and his sones with hym; and of hem alle thow shalt sacre the hondes; and thow shalt halwe hem, that thei beren the office of presthode to me. And thow shalt make lynnen brecches, that thei coueren the flesh of her filthehed, fro the reynes vnto the hippes. And vse thei hem Aaron and his sones, whanne thei shulen goo into the tabernacle of witnes, or whanne thei neiȝen to the auteer, that thei mynystre in the seyntuarye, lest thei gylti of wickidnes dyen; lawful euerlastynge it shal be to Aaron, and to his seed after hym.
But and this thou shalt doon, that thei be sacrid to me in presthode; tak a calf from the droue, and two whetheris with outen wemme, and therf looues, and a cake with outen sour dowȝ, the whiche ben thei spreynde with oyle, and therf cramcakes wett with oyle; and of puyr whete meele thow shalt make alle thingis, and put in a leepe thow shalt offre. The calf forsothe, and the two wetheris, and Aaron and his children, thou shalt brynge to the dore of the tabernacle of witnes; and whanne thow hast wasshe the fader with the sones with water, thow shalt clothe Aaron with his clothes, that is to seie, with rocket, and coote, and coope, and breest broche, that thow shalt streyne with a girdel. And thow shalt putte a coyif in to his heed, and the holi plate vpon the coyif, and the oyle of anoyntynge thow shalt heelde vpon his heed, and with this ryte he shal be sacrid. The sones forsothe of hym thow shalt presente, and thow shalt clothe with lynnen clothes, and thow shalt girde with a girdle, that is, Aaron and his free children; and thow shalt putte vpon hem mytrys, and thei shulen be my preestis with euerlastynge religioun. And after that thow hast sacryde the hondes of hem, thow shalt brynge forth and a calf before the tabernacle of witnes, and Aaron and his sones shulen putte yn hondes vpon the heed of it; and thow shalt slee it in the siȝt of the Lord, biside the dore of the tabernacle of witnes. And that that is takun of the blood of the calf, thow shalt putte vpon the hornes of the auter with thi fyngre; the relif blood forsothe thow shalt heelde beside the foot of it. And thow shalt take al the fatnes that couereth the entreyls, and the calle of the mawe, and the two kydneers, and the fatt that is vpon hem, and thow shalt offre encense vpon the auter. The flesh forsothe of the calf, and the skynne, and the dryt, thow shalt outforth brenne out of the tentis, forthi that it is for synne. And thow shalt take o wether, vpon whos heed Aaron and his sones shal ligge the hondes; the which whanne thou hast slawe, thow shalt take of the blood of it, and thow shalt heelde aboute the auter. And thow shalt kutte that wether in gobettis, and the entrayls of it washid, and the feete, thow shalt putte vpon the cut flesh, and vpon his heed; and thow shalt offre al the wether into ensence vpon the auter; offrynge it is to the Lord, the moost swete smel of the slawn sacrifice of the Lord. And thow shalt take another wether, vpon whos heed Aaron and his sones shulen putte hondes, the which whanne thow hast offrede, thow shalt take of the blood of it, and thow shalt putte vpon the eende of the ryȝt eer of Aaron, and of his sones, and vpon the thoumbis of the hoond of hem, and of the riȝt foot; and thow shalt heelde the blood vpon the auter, bi enuyroun. And whanne thow hast takun of the blood, that is vpon the auter, and of the oyle of anoyntyng, thow shalt sprenge Aaron and his clothes, the sones and the clothingis of hem. And so hem sacryd, and the clothes, thow shalt take the talwȝ of the wether, and the tayle, and the vttermore fatnes that couereth the entrayls, and the fatt calle of the mawe, and the two reynes, and the fat that is vpon hem, and the riȝt shuldre, forthi that it is the wether of consecracioun; and a cake of a loof, a crustid cake spreynde with oyle, a crompid cake, of the leepe of therf looues, that is sett in the siȝt of the Lord. And thow shalt putte al vpon the hondes of Aaron, and of the sones of hym, and thow shalt halowe hem, areryng vp before the Lord. And thow shalt take alle the thingis fro the hondes of hem, and thow shalt teende vpon the auter, into alle brent sacrifice, the moost swete smel in the siȝt of the Lord, for it is the offryng of hym. And thow shalt take the litel breest of the wethir, with the which Aaron is sacrid, and thow shalt halowe it, arerid vp before the Lord, and it shal falle into thi part. And thou shalt halwe the sacrid litel breest, and the shuldre that thow seuerdist fro the wether, with which Aaron was halowed, and his children; and thei shulen falle into the part of Aaron, and the sones of hym, thurȝ euerlastynge riȝt, fro the sones of Yrael; for thei ben the first fruytis, and the bigynnynges of the peesible sleyne sacryfice of hem that ben offred to the Lord. And the hooli cloth that Aaron shal vse, the sones of hym shulen haue after hym, that thei ben anoyntid in it and sacrid the hondes of hem. Seuen daies he shal vse it, that shal be of his sones ordeynd bishop for hym, and that shal goo into the tabernacle of witnes, that he mynystre in the seyntuarye. And thow shalt take the wether of halowyng, and thow shalt seethe the flesh of it in the holy place, of the which Aaron shal eete, and the sones of hym; and the looues that ben in the leepe thei shulen eete in the vestiarye of the tabernacle of witnes, that it be a pesible sacrifice, and that the hondes of the offrers ben halowid. A man of other kynne than the sones of Aaron, shal not eete of thilke thingis, for thei ben holy. That if there leeue of the sacrid flesh, or of the looues, vnto the morwetide, thow shalt brenne the relif with fier; thei shulen not ben etun, for thei ben halowid. Alle thingis that Y comaundide to thee, thow shalt do vpon Aaron, and vpon the sones of hym. Seuen daies thow shalt sacre the hondes of hem, and thow shalt offre a calf for synne bi eche dayes to perfitely clense; and thou shalt clense the auter, whanne thow offrest the sacrifies of parfite clensyng, and thow shalt anoynte it into the halwyng. Seuen daies thow shalt clense the auter, and halowe, and it shal be holy of halowis; eche that towchith it shal be halowid. This is that thow shalt do in the auter; two loombes of o ȝere bi eche day bisili, o loombe at morwetide, and another at euen tide; the tenthe part of the tried flowr spreynd with oyle, powned, that haue a mesure, the fourthe part of hyn, that is a sextarye, that is a mesure of two pownd, and wyn to offre of the same mesure, in o lombe. Another forsothe lombe thou shalt offre at euen, after the riyt of the morwetide offryng, and after tho thingis that we han seid, into the smel of swetnes; a sacrifice to the Lord it is with euerlastynge offryng into ȝoure generaciouns, at the dore of the tabernacle of witnes before the Lord, where Y shal ordeyne that I speke to thee; and there Y shal comaunde to the sones of Yrael, and the auter shal be halowid in my glorye. And I shal halowe the tabernacle of witnes with the auter, and Aaron with the sones of hym, that thei beren the office of preesthod to me. And Y shal dwelle in the myddil of the sones of Yrael, and Y shal be to hem a God; and thei shulen knowe, for Y am the Lord God of hem, that hath ladde hem out of the loond of Egipte, that Y myȝt dwelle among hem; Y the Lord God of hem.
And thou shalt make an auter, for to brenne the maad ensence of the trees of Sichym, hauynge o cubijt of lengthe, and another of brede, that is foure cornerd, and two cubites in heiȝt; hornes shulen goo out of it. And thow shalt clothe it with moost puyr gold, as wel the litel fier panne of it, as the walles bi enuyroun, and the hornes; and thow shalt make to it a coroun of gold bi enuyroun, and two rynges of gold vnder the hornes bi eche sides, that the berynge staues mowen be putte into hem, and the auter born. And thilke berynge staues thow shalt make of the trees of Sichym, and gilden; and thow shalt sette the auter aȝens the veyle, that hongith before the arke of testymonye before the propiciatorye, with the which is couerd the witnessynge, where Y shal speke to thee. And Aaron shal brenne the ensence swete smellynge vpon it erly; whanne he shal araye the lanternes, he shal teenden it; and whanne he settith hem at euen, he shal brenne the euerlastynge maad ensense before the Lord, into ȝoure generaciouns. Ȝe shulen not offer vpon it ensence of other makynge, ne offrynge, ne sacrifice, ne offrynge loues ȝe shulen taste. And Aaron shal preye vpon the hornes of it ones bi the ȝeer, in blood that is offerd for synne, and he shal plese vpon it in ȝoure generaciouns; the holy of halowen it shal be to the Lord. And the Lord spake to Moyses, seiynge, Whanne thow takist a sowme of the sones of Yrael, eche shal ȝyue prijs after the noumbre for her soules to the Lord, and there shal be no veniaunce in hem, whanne thei shulen be nowmbred. And eche shal ȝyue this that passith to a name, half an nounce after the mesure of the temple; a sicle, that is, a nounce, hath twenti half scripilles; the half perty of a sicle shal be offerd to the Lord. He that is had in the noumbre, fro twenti ȝeer and aboue, shal ȝyue the prijs; the riche shal not adde to an half sicle, and the pore no thing shal lesse. And the money takun, that is gederid of the sones of Yrael, thow shalt take in to the vses of the tabernacle of witnessynge, that there be the mynde of hem before the Lord, and he haue mercy to the soules of hem. And the Lord spake to Moyses, seyynge, And thow shalt make a brasun lauatory with his foot to washe with, and thow shalt putte it betwix the tabernacle of witnes and the auter; and the water put yn, Aaron and his sones shulen washe in it her hondes and feete, whanne thei ben to goynge ynto the tabernacle of witnessyng, and whanne thei ben neiȝynge to the auter that thei offren in it maad ensence to the Lord, lest perauenture thei dyen; lawful euerlastynge it shal be to hym and to the seed of hym bi successyouns. And the Lord spak to Moyses, seiynge, Tak to thee swete smellynge thingis, of the first myrre and chosen, fyue hundryd siclis; and the half of the canel, that is, two hundrid and fifti siclis; and of chaalamy also two hundryd and fifti, and of chasee fyue hundryd sicles, in the weiȝt of the seyntuarye; oyle of the olyues, the mesure of hyn, that is, of two pownd; and thow shalt make the holy oyle of anoyntyng, an oynement maad with the werk of ungwentarye. And thow shalt anoynt of it the tabernacle of witnessynge, and the arke of testament, and the bord with his vessels, and the candelstik, and the necessaryes of it, the auter of ensence, and of al brent sacrifice, and al the necessarye that perteyneth to the heriying to hem. And alle thow shalt halowe, and thei shulen be the holi thingis of halowes; he that towchith hem, shal be halowid. Thow shalt anoynt Aaron, and the sones of hym, and thow shalt halwe hem, that thei beren the office of preesthod to me. And to the sones of Yrael thow shalt seie, This oyle of anoyntyng holy it shal be to me into ȝoure generaciouns. The flesh of man shal not be anoyntyde of it, and biside the composicioun of it ȝe shulen not make another, for it is halowid, and hooli shal be to ȝow. What euer man make sich on, and ȝyue of it to an alyen, he shalle be putte out of his puple. The Lord forsothe seyde to Moyses, Tak to thee swete smellynge thinges, stacten, and onycha, galbantum of good smel, and ensence moost liȝtynge, and alle thei shulen ben of euen weiȝte. And thow shalt make the maad ensence with werk of oynement makynge, meyngid bisily, and puyr, and moost worthi with halowyng. And whanne thow hast pownede alle togidere into moost smal powdre, thow shalt putte of it before the tabernacle of wytnessynge, in the which place Y shal apere to thee; hooly of halowes shal be to ȝow the maad ensence. Siche a makynge ȝe shulen not make into ȝoure owne vses, for hooli it is to the Lord. Eche man that doth lyik thing, that he ful vse the smel of it, he shal peryshe fro his puplis.
And the Lord spak to Moyses, seiynge, Loo! I haue clepid Beseleel bi name, the sone of Hury, sone of Hur, of the lynage of Juda; and Y haue fulfillid hym with the spiryt of God, with wisdom, and vnderstondyng, and kunnyng in al werk, to caste what euer thing may be forgid of gold, and of siluer, and of brasse, marble, and gemmes, and dyuerste of trees. And Y haue ȝeuen to hym a felaw, Ooliab, the sone of Achisamech, of the lynage of Dan; and in the herte of eche tawȝt I haue putte wisdomes, that thei maken alle thingis that I haue comaundide to thee; the tabernacle of the boond of pees, and the arke of witnessyng, and the propiciatorye that is vpon it, and alle the vessels of the tabernacle; and the meet bord, and the vessels of it, the moost puyr candelstik with his vessels, and the auteers of the maad ensence, and of the albrent sacrifice, and alle the vessels of hem; the lauatorie with his foot; the holi clothes in the seruyis to Aaron the preest, and to the sones of hym, that thei vsen hyr office in sacrid thingis; the oyle of anoynting, and the maad ensence of swete smellynge thingis in the seyntuarye; alle thingis that I haue comaundide to thee, thei shulen make. And the Lord spak to Moyses, seiynge, Spek to the sones of Yrael, and thow shalt seie to hem, Looketh that ȝe kepen myn holy day, for it is a tokne bitwix me and ȝow in ȝoure generaciouns; that ȝe witen for Y a Lord, that halowith ȝow. Kepith myn holi day, holi forsothe it is to ȝow; who so poluteth it, with deth dye he; who so doth in it werk, shal perishe the lijf of hym fro the myddil of his puple. Six dayes ȝe shulen do werk; in the seuenthe day is holy day, the holi reste to the Lord; eche that doth werk in that day shal dye. The sones of Yrael kepe thei the holy day, and halowe thei it in her generaciouns; a couenaunt it is euer durynge bitwix me and the sones of Yrael, and a perpetuel tokyn; six forsothe dayes God made heuene and erthe, and in the seuenthe day fro the werk he ceside. And the Lord ȝaf to Moyses fulfillid thes maner wordes, in the mownt of Synay, two stonen tablis of witnessyng, writun with the fyngre of God.
The puple forsothe, seynge that Moyses made abidyng of comyng doun fro the hil, gederid to gidere aȝens Aaron, seith, Arise, mak to vs goddis, that goon beforn vs; to this man Moyses, that hath ladde vs out fro the loond of Egipte, we knowen not what is fallyn. And Aaron seide to hem, Tak ȝe the goldun eer rynges fro the eerys of wyues, and of sones, and of ȝoure dowȝtres, and bryngith to me. The puple dide that he comaundide, bryngynge the eer rynges to Aaron; the whiche whanne he hadde takun, he fourmyde with ȝetun werk, and made of hem a ȝotun calf. And thei seiden, Thes ben thi goddis, Yrael, that ladde thee out of the loond of Egipte. The whiche thing whanne Aaron hadde seeyn, he made vp an auter before it, and in voys of a bedel he cryede, seiynge, To morwe is the solempnyte of the Lord. And thei arysun erly offreden sacrifices al brent and peesible sacrifices; and the puple sat to ete and to drynke, and arysen to pleyen. The Lord forsothe spak to Moyses, seiynge, Go, descende, thi puple hath synned, whom thow hast ladde out of the loond of Egipte. Soone thei han goon backward fro the weie that thow shewedist to hem, and thei han made to hem a ȝotun calf, and anourden, and offrynge to it sacrifices seiden, Thes ben thi goddis, Israel, that han ladde thee out of the loond of Egipte. And eftsones the Lord seith to Moyses, Y se wel that this puple is of hard nol; late me that my woodnes wreth aȝen hem, and that I do hem awey; and thee I shal make into a greet folk of kynde. Moyses forsothe preyede the Lord his God, seiynge, Whi, Lord, wraththith thi woodnes aȝen thi puple, whom thow hast ladde out of the loond of Egipte in greet strengthe, and in a stroong hoond? Lest, Y biseche, the Egipciens seyn, fellich he hath ladde hem out, that he myȝte slee in the hilles, and doon a wey fro the erthe, reste thi wraththe, and be peesyble vpon the wickidnes of thi puple. Record of Abraham, Ysaac, and of Yrael, thi seruauntis, to whom thow hast sworn bi thi seluen, seiynge, Y shal multiplie ȝoure seed as the sterres of heuene, and al this loond of the which Y haue spokun, Y shal ȝyue to ȝoure seed, and ȝe shulen welde it euermore. And the Lord was plesid that he dide not the harme, that he spake aȝens his puple. And Moyses is turned aȝen fro the hil, berynge in hoond two tablis of testymonye wrytun on eithir side, and maad with the werk of God; the wrytyng forsothe of God was grauen in the tables. Josue forsoth herynge the noyse of the puple criynge out, seide to Moyses, Ȝellynge of fiȝtynge is herd in the tentis. To whom he answerde, It is not a crye of men biddynge to fiȝtyng, ne an out crye of men compellynge to flee, but a voys of men syngynge Y here. And whanne he was nyȝ to the tentis, he sawȝ the calf, and companyes of men al abowt; and ful wrooth he threwe the tablis out of the hoond, and he brake hem at the rotes of the hil. And cacchynge the calf that thei hadden made, he brente, and gronde it al to dost, the which he sprengide in to water, and ȝaf of it drynke to the sones of Yrael. And Moyses seide to Aaron, What dide this puple to thee, that thow woldest brynge vpon hem the moost synne? To whom he answerde, Ne endeyn, my lord, thou forsothe knewe this puple, that it is redy to yuel; thei seiden to me, Make to vs goddis, that goon beforn vs, to this Moyses forsothe, that ladde vs out of the loond of Egipte, we knowen not what is befaln. To whom Y seide, Which of ȝow hath gold? Thei token, and ȝauen to me, and Y threwe it into the fier, and there ȝede out this calf. Seynge thanne Moyses the puple, that it was nakid; Aaron forsothe hadde spoylde it for the senship of the filthe, and among the enemyes he hadde sette it nakid; and stondynge in the ȝatis of the tentis, seith, If eny man be of the Lord, be he ioyned to me; and there ben gedered to hym alle the sones of Leuy. To whom he seith, Thes thinges seith the Lord God of Yrael, Put a man a swerd vpon his hippe, goth, and turneth aȝen fro ȝate vnto ȝate by the myddel of the tentis, and slee echon brother, and frende, and his neiȝbore. The sones of Leuy diden after the word of Moyses, and there fellen in that day as thre and twenti thowsynd of men. And Moyses seith, Ȝe han sacrid ȝoure hoondes to day to the Lord, echon in sone, and in his brother, that there be ȝeue to ȝow blissyng. And another dai begun Moyses spake to the puple, Ȝe han synned the moost synne; Y shal stye vp to the Lord, if eny manere Y may preye hym for ȝoure gilt. And he goon aȝen to the Lord, seith, Lord, Y biseche, this puple hath synned a greet synne, and thei han made to hem goldun goddis; outher forȝif hem this gilt, or if thow dost not, do me out of thi book, that thou hast wrytun. To whom the Lord answerde, Who so synneth to me, Y shal do hym out of my book; thow forsothe goo, and lede this puple whider Y spake to thee; myn aungel shall goo before thee, and Y in the day of veniaunce shal visite this synne of hem. Than the Lord smoot the puple for the gilt of the calf, that Aaron made.
And the Lord spak to Moyses, seiynge, Go, and stye vp fro this place, thow, and thi puple, that thow hast ladde out of the loond of Egipte, in to the loond that Y swore to Abraham, Ysaac, and Jacob, seiynge, To thi seed Y shal ȝyue it. And Y shal sende an aungel, thi before renner, that Y throwe out Chanane, and Amorre, and Ethe, and Phereze, and Eue, and Jebuze, and thow go into the loond flowynge mylk and hony; forsothe Y shal not stie vp with thee, for a puple it is of hard nol, lest perauenture Y skater thee in the weie. The puple herynge this werst word weilide, and noon after the wonne was clothid his ournyng. And the Lord seide to Moyses, Spek to the sones of Yrael, A puple of hard nol thow art; ones Y shal stye vp in the myddil of thee, and Y shal do thee awey; now riȝt put down thin ournement, that I knowe, what Y shal do to thee. Thanne the sones of Yrael diden doun her ournement fro the hil of Oreb. And Moyses takynge a tabernacle strauȝte it afer out of the tentis, and he clepyde the name of it the tabernacle of the boond of pees. And al the puple that hadde eny questioun, ȝede out to the tabernacle of the boond of pees, out of the tentis. And whanne Moyses ȝede out to the tabernacle, alle the puple aroos, and echon stode in the dore of his tente, and thei biheelden the bak of Moyses, to the tyme he ȝede into the tente. He forsothe goon into the tabernacle of the boond of pees, discendide a piler of a clowde, and stode at the dore; and the Lord spak with Moyses, alle men beholdynge that the piler of the clowde stode at the dore of the tabernacle; and thei stoden, and lowtiden thurȝ the ȝates of her tabernaclis. The Lord forsothe spak to Moyses face to face, as a man is wonte to speke to his freende; and whanne he turnede aȝen into the tentis, the seruaunt of hym, child Josue, the sone of Num, ȝede not fro the tabernacle. And Moyses seide to the Lord, Thow comaundis, that I lede out this puple, and thow shewist not to me, whom thow art to sendynge with me, namelich sith thow seist, Y knewe thee bi name, and thow hast founde grace before me. If thanne Y haue founde grace in thi siȝt, shew to me thi face, that I knowe thee, and fynde grace before thin eyen; behold thi puple, and this folk. And God seide, My face shal goo before thee, and reste Y shal ȝyue to thee. And Moyses seith, If thow thi silf gost not before, ne lede thow vs fro this place; in what forsothe mowen we knowe, I and this puple, that we han founde grace in thi siȝt, but if that thow go with vs, that we ben glorrifyed of alle puples that dwellen vpon the erthe? The Lord forsothe seith to Moyses, And this word that thow hast spokun, Y shal do; thow hast forsothe founde grace before me, and thi silf Y haue knowe bi name. The which seith, Shew to me thi glorie. He answerde, Y shal shewe al good to thee, and Y shal be clepid in the name of the Lord before thee, and Y shal haue mercy to whom Y wole, and goodliche Y shal be to whom it likith to me. And eft he seith, Thow shalt not mowe se my face, forsothe there shal not mowe se me a man, and lyue. And eft, Loo! he seith, there is a place anentis me, and thow shalt stonde vpon a stoon; and whanne my glorie shal passe, Y shal putte thee in the hool of the stoon, and I shal defende with my riȝt hoond, to the tyme that Y passe; and I shal take myn hoond, and thow shalt se myn hyndermore, my face forsothe thow shalt not mowe se.
And therafter, Cut, he seith, to thee two stonun tables at the liknes of the former, and Y shal write vpon hem the wordes that hadden the tablis, that thow brak. Be redi eerli, that thow stie vp anone into the hil of Synay; and thow shalt stonde with me vpon the cop of the hil; no man stie vp with thee, ne be seen eny man thurȝ out al the hil; oxen forsothe and sheep, be thei not fedde there aȝens. Thanne he hewide out two stonun tables, what manere thei weren before, and fro nyȝt arysynge he stiede vp into the hil of Synay, as the Lord comaundide to him, berynge with hym the tables. And whanne the Lord had stiede vp bi the clowde, Moyses stood with hym, inwardli clepynge the name of the Lord, whom passynge before hym, seith, Lordshiper, Lord God, mercyable, and goodliche, and pacient, and of myche mercy, and verrey, that kepist couenaunt and mercy into thowsandes, that dost awei wickidnes, and hidows giltis, and synnes, and no man anentis thee bi him silf is innocent, that ȝeldist wickidnes of fadris to sones and neces, into the thridde and the ferthe progenye. And Moyses hastynge is bowid redi into the erthe, and anowrynge, seith, If Y haue founde grace in thi siȝt, Lord, I biseche that thow goo with vs, forsothe the puple is of hard nol, and that thow do awey oure wickidnes, and synnes, and that thow welde vs. The Lord answerde, Y shal goo in couenaunt, seynge alle men, I shal do signes, that neuere weren seen vpon erthe, ne in eny folkis of kynde, that this puple seen, in whos myddil thow art, the feerful werk of the Lord, that Y am to do. Kep alle thingis that to day I haue comaundide to thee; Y my silf shal throwe out before thi face Amorrey, Chananey, and Ethei, Pheresei forsothe, and Euei, and Jebuzei. Be war, lest eny tyme thow ioyne frendships with the dwellers of that loond, that ben to thee into fallyng. But and the auteers of hem destrye, brek togidere the ymages, and the mawmete woodes hew down; wole thow not anowre an alien God; the Lord gelows the name of hym, God is a louer; ne go thow not into couenaunt with men of that regioun, lest whanne thei han do fornycacioun with her goddes, and anourden the mawmetis of hem, eny man clepe thee, that thow eete of the thingis that ben offerd. Ne wijf of the dowȝtris of hem thow shalt tak to thi sones, lest after that thei han do fornycacioun, thei maken to do fornycaciouns and thi sones into her goddis. Ȝotun goddis thow shalt not make to thee. The solempnyte of therf looues thow shalt kepe; seuen dayes thow shalt eete therf looues, as I haue comaundide to thee, in the tyme of the moneth of new thinges; in the moneth forsothe of veer tyme thow ȝedest out of Egipte. Al that openith the wombe of maal kynde shal be myn, of alle hauynge lijf, as wel of oxen, as of sheep, shal be myne. The first goten of an asse thow shalt bigge with a sheep; ellis forsothe if thow ȝyuest not for it the priys, it shal be slawn. The first gotun of thi sones thow shalt aȝenbigge; ne thow shalt not apere in my siȝt voide. Six dayes thow shalt worche, the seuenthe day thow shalt ceese to eeren and to repen. The solempnyte of weekis thow shalt make to thee in the first bigynnyng of fruytis of thi whete heruest, and the solempnete whanne, the tyme turnynge aȝen of the ȝeer, alle thinges ben putte vp. Thre tymes of the ȝeer shal apere eche maal child that is thin in the siȝt of the Almyȝti Lord, thi God, Yrael. Whanne forsothe Y shal take the gentiles fro thi face, and I shal sprede abrood thi teermes, no man shal putte spies to thi loond, thee styinge vp and apperynge in the siȝt of the Lord thi God, thries in the ȝeer. Thou shalt not offre vpon the sowr dowȝ the blood of my sacrifice, nether shal not leeue vnto the morwe tide of the sacrifice of the solempnyte of pask. The chefe of the fruytes of thi loond thow shalt offre in the hows of the Lord thi God. Thow shalt not seethe a kidde in the mylk of his moder. And the Lord seide to Moyses, Write to thee thes wordes, with whiche Y haue couenauntide a boond of pees, with thee and with Yrael. Thanne Moyses was there with the Lord fourti dayes and fourti nyȝtis, and eete no breed, ne drank water; and he wroot in the tables the ten wordes of the boond of pees. And whanne Moyses descendide fro the mownt of Synay, he held two tables of testymonye, and he wiste not that his face was horned of the cumpanye of the word of God. Aaron forsothe and the sones of Yrael, seynge the face of Moyses horned, thei dredden to comen nyȝ, and thei clepid of hym turneden aȝen, as wel Aaron as the princes of the synagoge; and after that he had spokun, comen to hym also alle the sones of Yrael; to whom he comaundide alle thinges that he hadde herd of the Lord in the mownt of Synay. And fulfillid the wordes, he putte a veyle vpon his face; the which, he goon yn to the Lord, and spekynge with him, dide awey, to the tyme that he shulde goo out; and thanne he spak to the sones of Yrael alle thinges, that to hym weren comaundid; the whiche seen the face of Moyses goynge out be horned, but eft he couerde his face, if eny tyme he spak to hem.
Therfore alle the cumpanye of alle the sones of Yrael gedered, he seid to hem, Thes ben that the Lord hath comaundide to be doon. Six daies ȝe shulen doo werk, the seuenthe day shal be to ȝow holy, an holi day and the reste of the Lord; who so doth werk in it he shal be slayn. Ȝe shulen not tiende fier in al ȝoure dwellyng place bi the holi day. And Moyses seith to alle the companyes of the sones of Yrael, This is the word that the Lord comaundide, seiynge, Seuer ȝe anentis ȝow the chefe fruytis to the Lord; eche wilful and of redi inwit offer hem to the Lord, gold, and siluer, and brasse, iacynct, and purpur, and cocto twies died, and bijs, heeris of goote, and the skynnes of wethers maad reed, and iacynctyne, the trees of Sichym, and oyle to the liȝtes to be maad, and that there be maad an oynement, and the moost swete ensence, onychyn stonus and gemmes, to the anowrnnyng of the coope, and of the breest broche. Who so euere of ȝow is wijs, come he, and mak that the Lord hath comaundide, that is, the tabernacle, and the roof of it, and the coueryng; rynges, and the tablid sides, with the berynge staues, litil stakes, and feet; the arke, and the berynge staues; the propicyatorie, and the veyle, that before it is sprad abrood; the meetbord with berynge staues, and the vessels, and the looues of proposicioun; the candelstik to susteyne the liȝtes, the vessels of it, and lanternes, and oyle to the norishyng of fyres; the auter of the maad ensence, and the beryng staues; oyle of anoynting, and the maad ensence of the swete smellynge spices; the tente at the dore of the tabernacle; the autere of the al brent sacrifice, and the brasun gredeyrne of it, with the berynge staues, and his vessels; the lauatorie, and the feet of it; the cortynes of the porche, with pilers, and feet; the tentis in the ȝatis of the vestiarie; the litil stakis of the tabernacle, and of the porche, with her cordes; the clothes whose vse is in the seruyce of the seyntuarye; the clothes of Aaron the bishop, and of his sones, that thei beren the office of preesthod to me. And al the multitude of the sones of Yrael goon out fro the siȝt of Moyses, offerde with moost redi mynde and deuoute the chefe thinges to the Lord, to make the werk of the tabernacle of testymonye, what thing to the heriyng and to the holy clothes was nessessarye. Men with wymmen ȝeuen hongynge rynges, and eer rynges, and hoond rynges, and beeȝis; al gilden vessel is seuerd into the ȝiftis of the Lord. Who so euer hadde iacynct, and purpur, and cocco twies died, bijs, and heeris of goote, wether skynnes maad reed, and blew, the metals of siluer, and of brasse, thei offreden to the Lord, and the trees of Sichym into dyuerse vsis. But and wymmen ȝyuen that come thurȝ dower, iacynct, and purpur, and reed silk, and bijs, and the heeris of goote, wilfully alle propre thingis ȝeuynge. The princes forsothe offerden onychyn stonus and gemmes, to the coope and breest broche, and swete smellynge spices, and oyle to make the liȝtes, and to greithe the oynement, and to make the encense of moost swete smel. Alle men and wymmen with a deuowt mynde offerden ȝiftis, that the werkis shulden be maad, that the Lord comaundide bi the hoond of Moyses; alle the sones of Yrael halowiden wilful thinges to the Lord. And Moyses seide to the sones of Israel, Loo! the Lord hath clepid Beseleel bi name, the sones of Hury, the sone of Hur, of the lynage of Juda; and he hath fulfillede hym with the spiryt of God, of wisdom, and vnderstondyng, and of kunnyng, with al doctrine, to cast and to make the werk, in gold, and siluer, and brasse, and in stonus to ben graued, and in carpentarye werk; what thing craftily may be founde, he hath ȝouun in his herte; and Ooliab, the sone of Achymasech, of the lynage of Dan; bothe he hath tauȝte with wisdom, that thei maken the werkis of carpentarye, of browdrye, and of werkyng with needlis, of iacynct, and purpur, and cocto twies died, and of bijs, and alle thinges weue thei, and alle newe thingis fynde thei.
Thanne diden Beseleel, and Oliab, and eche wise man, to whom the Lord ȝaue wisdom and vndirstondynge, that thei cowden craftili worche that ben necessarie into the vses of the seyntuarie, and that the Lord hath comaundide to be maad. And whanne Moyses hadde clepide hem, and eche tawȝt man, to whom the Lord hadde ȝeue wisdome, and that wilfulli hadden offerd hem to make the werk, he toke to hem alle the ȝiftis of the sones of Yrael. The whiche whanne thei stoden stedfastly to her werk eche daye, eerly the puple offerde the auowes. Wherfor the crafti men constreyned to come, seiden to Moyses, The puple more offerith than is nede. Thanne Moyses comaundide in the voyce of a bedel to be cryde, Neither man ne womman eny thing more offre in the werk of the seyntuarie; and so was ceesside fro the ȝiftis to ben offerd, forthi that the offred thinges sufficeden, and aboundide more ouer. And alle the wise men in herte maden to fille the werk of the tabernacle ten cortyns of bijs foldun aȝen, and iacynct, and purpur, and cocto twies dyed, with diuers werk, and with browdrye craft. Of the whiche oon hadde in lengthe eiȝte and twenti cubites, and in brede foure; o mesure was of alle the cortyns. And he ioynede fyue cortyns either to other, and othere fyue he cowplede togidere to hem seluen; and he made iacynctyne oyletis in the hemme of the o cortyn on either syde, and in the hemme of the other also, that the oyletis myȝten come aȝens hem seluen togidere, and togidere be ioyned; wherfore and fifti golden cerclis he ȝeetide, that myȝten hold the oiletes of the cortyns, and that there were maad o tabernacle. And he made enleuen sarges of the heeris of goote, to couere the roofe of the tabernacle; o sarge in lengthe hadde thretti cubitis, and in brede foure cubitis; of o mesure weren alle the sarges; of whom fyue he ioynede a side, and othere six atwynne. And he made fifty oyletis in the hemme of the o sarge, and fifti in the hemme of the tothir sarge, that to hem seluen thei myȝten be ioynede to gidere; and fifti brasun knoppis with whiche the roof myȝte be knyt, and o mantil be made of alle the sarges. And he made the couertour of the tabernacle of skynnes of wethers maad reed, and another aboue the veyle of skynnes maad blew. And he made the tablis of the tabernacle of the trees of Sichym stondynge; of ten cubites was the lengthe of the to table, and other half cubijt the brede heeld. Two rabitynges weren bi eche tables, that the tone to that other myȝt be ioyned; so he made in alle the tablis of the tabernacle. Of the whiche twenti weren at the mydday coost aȝens the sowth, with fourti silueren footstakys; two footstakis vndur o table weren put at eithir parti of the corners, where the rabityngis of the sides in the corners weren endid. At the coost forsothe of the tabernacle that biholdith to the north he made twenti tablis, with fourti silueren footstakis, two footstakis bi eche tablis. Aȝens the west forsothe, that is at that parti of the tabernacle that biholdith the see, he maad six tables, and two other bi eche corners of the tabernacle bihynde, the whiche weren ioyned fro benethe vnto abouen, and in to o ioynyng togidere thei weren born; so he made on eithir parti bi the corners, that eiȝt tablis weren togidere, and hadden sixtene silueren footstakis, that is, two silueren footstakis vnder eche tablis. And he made berynge staues, fyue of the trees of Sichym to hold togidere the tablis of the to side of the tabernacle, and fyue othere to make togidere the tables of the tother side, and withouten thes, fyue othere berynge staues at the west coost of the tabernacle aȝens the see. And he made another berynge staf, that shulde come thurȝ the myddil tables fro corner vnto corner. And thilk tablid thingis he giltide, ȝotun the siluer footstakis of hem, and he made the cercles of hem golden, bi the whiche the berynge barres myȝten be lad ynne, the whiche and hem he couerde with golden platis. And he made the veyle dyuerse and sondrye, of iacynct, and purpur, reed silk, and bijs foldid aȝen, with browdrye werk; and foure pileris of the trees of Sichym, the whiche with the heedis he gildide, ȝoten the siluer footstakis of hem. And he made a tente in the entre of the tabernacle, of iacynct, and purpur, reed silk, and bijs foldid aȝen, with the werk of nedlis; and fyue pylers with her heedis, the whiche he couerde with gold, and the brasun footstakis of hem he ȝetide, the whiche he couerde with gold.
Beseleel forsothe made also the arke of the trees of Sichym, hauynge two cubites and an half in lengthe, and other half cubijt in brede, and the hiȝte was of other half cubijt; and he clothid it with moost puyr gold with ynne, and with oute. And he made to it a goldun crown bi enuyroun, ȝetynge foure goldun rynges bi foure corners of it, two rynges in the to side, and two in the tother. And he made berynge staues of the trees of Sichym, which he clothide with gold, and the whiche he putte into the rynges that weren in the sides of the arke, to bere it. And he made the propiciatorye, that is, Goddis spekynge place, of moost puyr gold, of two cubites and an half in lengthe, and of other half cubijt in brede. Also two cherubyn of gold forgid, whiche he putte on either side of the propicyatorie, o cherub in the ouermest heiȝt of the o parti, and that other cherub in the ouermest heiȝt of that other parti; two cherubyn in either heiȝtis of the propiciatorye, strecchynge out the wenges, and couerynge the propiciatorye, and hem seluen togidere, and it aȝenbiholdynge. And he made the meet bord of trees of Sichym, in lengthe of two cubites, and in brede of o cubijt, that hadde in heiȝt o cubijt and an half. And he enuyrounde it with moost clene gold, and he made to it a goldun brerde bi enuyroun; and to thilke brerde a goldun coroun bitwix grauen of foure fyngris, and vpon it another goldun coroun. And he ȝetide foure goldun cercles, the whiche he putte into the foure corners, bi eche feet of the bord aȝen the coroun, and he putte into hem berynge staues, that the bord myȝte be born. And thilk berynge staues he made of trees of Sichym, and enuyrounde hem with gold. And the vessels to dyuerse vses of the bord, eysel vessels, fiols, and litil cuppes, and ensensers of moost clene gold, in the whiche ben sacrifice of licours to ben offerd. And he made a candilstik, forgid of moost clene gold, of whose berynge staf, ȝeerdis, cuppis, and bollis, and lilies ȝeden out; sixe in either side, three ȝeerdes on o side, and thre on the tother; thre cuppes in the maner of a note thurȝ eche ȝerdes, and litil ballis togidere, and lilies; and three cuppes at the liknes of a note in o ȝeerde, and ballis togidere, and lilyes; the werk was euen of six ȝeerdes, that ȝeden out of the stok of the candelstik. In that forsothe berynge staf were foure cuppes, in maner of a note, and balles thurȝ ech, and lilies; and the balles vnder the two ȝeerdes bi thre places, the whiche togidere maken six ȝeerdes, goynge out of o berynge staf; and thanne the ballis, and ȝeerdes of it weren alle forgid of moost clene gold. And he maad seuen lanternes with her candelquenchers, and the vessels, where the snuffes ben quenchid, of moost clene gold. A talent of gold peyside the candelstik with alle his vessels. And he maade the auter of maad ensence of the trees of Sichym, hauynge thurȝ square eche cubitis, and in heiȝt two, of whose corners ȝeden out hornes. And he clothide it with moost clene gold, with the fier panne, and walles, and hornes; and he made to it a litel golden crown by enuyroun, and two goldun rynges vnder the crown, bi eche sides, that in hem ben put yn the berynge staues, that the auter may be born. Thilke forsothe berynge staues he made of the trees of Sichym, and he couerde with goldun plates. And he made oyle to oynement of halowyng, and the maad ensence of moost clene swete smellynge spices, with the werk of pymentarye.
And he made the auter of brent sacrifyce of the trees of Sichym, of fyue cubitis bi square, and of three in heiȝt; whose hornes ȝeden out of the corners; and he couerde it with brasun plates. And he greithide into the vses of it dyuerse vessels of brasse, cawdrowns, toonges, fleshhokes, hokes, and fier pannes. And the gredyrne of it in manere of a nett he made brasun, and vnder it in myddil of the auter a fier panne. Foure ryngis ȝotun, be so feele heiȝtes of the netwise gredyrne, to the berynge staues to be put yn, for to bere; the whiche and hem he made of the trees of Sichym, and he couerde with brasun plates. And he ladde yn cercles, the whiche stoden ouer in the sides of the auteer. And thilk auter was not massye, but holwȝ of tabled thingis, and with ynne voyde. And he made a brasun lauatorye, with his foot, of the shewers of wymmen, the whiche wacchiden in the porche of the tabernacle. And the porche, in whos sowthe coost weren the tentis of bijs folden aȝen of an hundrid cubites, twenti brasun pilers with her feet, the heedes of the pilers and al the grauyng of the werk siluer; euen at the north coost the tentis, pilers, and feet, and the heedes of pilers weren of the same mesure and of werk and of metal. In that forsothe coost the which biholdeth the west, weren tentis of fifti cubites, ten pilers with her feet brasun, and the heedes of the pilers, and al the grauyng of the werk, silueren. Forsothe aȝen the est he greithide tentis of fifti cubites, of the whiche o side helde fiftene cubites of three pilers with his feet; and in that other party, for bitwix either he made the entre of the tabernacle, weren the tentis euen of fiftene cubites, thre pilers, and so feele feete. Alle the tentis of the porche bijs folden aȝen hadde couerde. The feet of the pilers weren brasun, the heedes forsothe of hem with alle her grauyngis silueren; but and thilk pilers of the porche he clothide with siluer. And in the entre of it he made a tent with nedle werk, of iacynct, and purpur, and reed clooth, and of bijs folden aȝen, the whiche hadde twenti cubites in lengthe, the heiȝt forsothe was of fyue cubitis, aftir the mesure that alle the tentis of the porche hadden. The pilers forsothe in the comyng ynne weren foure, with brasun feete, and the heedes of hem, and the grauynges silueren; the litil stakis forsothe of the tabernacle and of the porche by enuyroun he made brasun. Thes ben the instrumentis of the tabernacle of witnessyng, that ben noumbred out after the heestis of Moyses in the serymonyes of Leuytis, by the hoond of Ythamer, sone of Aaron, preest. The whiche thingis Beseleel, the sone of Hury, the sone of Hur, of the lynage of Juda, the Lord bi Moyses comaundynge, hadde fulfillid; ioyned to hym a felawe, Ooliab, the sone of Achisamech, of the lynage of Dan, the which and he was a noble crafti man of trees, and a browdrer, and a worcher with nedlis, of iacynct, and purpur, reed clooth, and bijs. Al the gold that was spendid in the werk of the seyntuarye, and that was offerd in ȝiftis, was of twenti and nyne talentis, and of seuen hundrid and thretti siclis, at the mesure of the seyntuarie. There was forsothe offerd of hem that camen to the noumbre, fro twenti ȝeer and aboue, of six hundrid thre thowsynd and of fyue hundrid and fifti men of aarmes. There weren forthermore an hundryd talentes of siluer, of the which ben ȝotun the footstakis of the seyntuarye, and of the entre, where the veyle hongith; an hundred footstakis ben maad of an hundrid talentes, eche talentis countid bi eche footstakis. Of a thowsynd forsothe and seuen hundrid and seuenti and fyue sicles he made the heedes of the pilers, the whiche and hem he clothide with siluer. Of brasse forsothe there weren offred talentis seuenti and two thowsynd, and foure hundrid ouermore sicles. Of the whiche ben ȝoten footstakis in the entre of the tabernacle of witnessyng, and a brasun auter with his fier panne, and alle the vessels that perteyneden to the vse of it, and the footstakis of the porche, as wel in the enuyroun as in the comyng yn of it, and litle stakis of the tabernacle, and of the porche al aboute.
Off iacynct forsothe, and purpur, reed clooth, and bijs, he made the clothis, with whiche Aaron was clothid yn, whanne he mynystryde in the hoolise, as the Lord comaundide to Moyses. Thanne he made a coope of gold, iacynct, and purpur, and cocto twies died, and bijs aȝen foldid, with browdrye werk; and he cutte ther yn goldun peeses, and he made hem into thredes, that thei myȝten be plattid with the weft of the rather colours; and two hemmes to hem seluen cowplid to gidere in either side of the heiȝtis, and a girdil of the same colours, as the Lord comaundide to Moyses. And he greithide two onychyn stonus, boundun and closid with gold, and grauen with gemmarye craft with the names of the sones of Yrael; six names in that o stoon, and six in that other, after the ordre of the birthe of hem. And he putte hem in the sydes of the coope, into mynde of the sones of Yrael, as the Lord comaundide to Moyses. And he maade the breest broche with browdrye craft, after the werk of the coope, of gold, iacynct, purpur, and cocto twies died, and bijs foldun aȝen, dowble, foure cornerd, of the mesure of a spanne. And he putte in it foure ordres of gemmes; in the first veers was saarde, topazi, smaragd; in the secounde, carbuncle, saphijr, iasp; in the thridde, ligury, achatese, amatist; in the ferthe, crisolit, onychin, and beril; enuyround and enclosid with gold, bi her ordres. And thilke twelue stonus weren graued with the names of the twelue lynages of Yrael, eche after the name of eche. And thei maden in the breest broche litle cheynes, cleuynge to hem seluen togidere, of moost puyr gold, and two hokis, and as feele goldun rynges. Forsothe the rynges thei putten in either side of the breest broche, fro the whiche shulden honge the two goldun cheynes, the whiche thei setten yn with hokis, the whiche stoden ouer aferre in the corners of the coope. Thes thingis and beforn and bihynde so acordiden to hem seluen, that the coope and the breest broche streyt myȝten be knyt to gidere to the girdil, and with rynges strengere cowplid, the whiche the iacynctyne filete ioyned, lest large thei myȝten loose, and be meuyd togidere fro hem seluen, as the Lord comaundide to Moyses. And thei maden the coope coote, al iacynctyne; and a hode in the ouerest parti, aȝens the myddel, and a hemme weuyd al aboute the hode; benethe forsothe at the feete powmbe garnettis of iacynct, purpur, and reed clooth, and bijs folden aȝen; and litil bellis of moost puyr gold, the whiche thei puttiden bitwix the powmbe garnettis, in the nether more party of the coote bi enuyroun; a litel golden belle and a powmbe garnet; with which anowrned the bishop ȝede, whanne he vsid the office, as the Lord comaundide to Moyses. And thei maden bijs cootis, with weuen werk, to Aaron and to sones of hym, and mytrys with her litil crownes of bijs, and bijs lynnen breches; the girdil forsothe of bijs foldun aȝen, iacynct, purpur, and reed clooth, twynned with nedle craft, as the Lord hath comaundide to Moyses. And thei maden the plate of holi worshipyng of moost puyr gold, and thei graueden in it with gemmary werk, The holi of the Lord. And thei streyneden it with the mytre with a iacynctyne filete, as the Lord comaundide to Moyses. Thanne was ful maad al the werk of the tabernacle, and of the roofe of witnessyng; and the sones of Yrael maden alle thingis that the Lord comaundide to Moyses. And thei offerden vp the tabernacle, and the roofe, and alle the necessaries, rynges, tablis, berynge staues, pilers, and footstakis; a couertour of wether skynnes maad reed, and another couertour of blew skynnes; the veyle, the arke, the berynge staues, the propiciatorye; the meetbord with the vessels, and the looues of proposicioun; the candelstik, lanterns, and the vsable thingis of it, with the oyle; the goldun auter, and the oynement, and the maad ensence of the swete spices; and the tente in the entree of the tabernacle; the brasun auter, the netwise gredyrne, berynge staues, and alle the vessels of it; the lauatorie with hys foote; the tentis of the porche, and the pilers with her feet; the tente in the entre of the porche, and the litil cordis of it, and the litil stakis. No thing failide of the vessels, that weren comaundid to be maad into the seruyce of the tabernacle, and into the roofe of the boond of pees. And the clothes whiche the prestis vsen in the seyntuarye, Aaron, that is, and the sones of hym, offerden the sones of Yrael, as the Lord comaundide. The whiche thingis after that Moyses sawȝ alle thingis fulfillid, blisside to hem.
And the Lord spak to Moyses, seiynge, The first moneth, the first day of the moneth, thow shalt rere the tabernacle of witnessyng. And thow shalt putte in it the arke, and thow shalt leue before it the veile. And the meetbord browȝt forth thow shalt putte vpon it, that with riȝt ben comaundid. The candelstyk shal stonde with his lanterns, and the goldun auter, in whiche shal be brent the encense before the arke of witnessyng. The tente in the entre of the tabernacle thow shal sett; and beforn it the auter of alle brent sacrifices, the lauatorie betwix the auter and the tabernacle, which thow shalt fulfille with water. And thow shalt enuyroun the porche with tentis into the comyng yn of it. And the oyle of an oyntyng takun thow shalt anoynte the tabernacle, with his vessels, that thei ben halowid; the auter of al brent sacrifice, and al the vessels of it; the lauatorye with his foot. Al with the oyle of an oynting thow shalt sacre, that thei ben holi of halowes. And thow shalt sett Aaron and the sones of hym at the dore of the tabernacle of witnessyng; and, wasshen with water, thow shalt clothe with holi clothes, that thei mynystre to me, and the anoyntyng of hem profit into euerlastynge presthod. And Moyses dide alle thinges that the Lord comaundid. Thanne the first moneth of the secounde ȝeer, the first day of the moneth, the tabernacle was sett. And Moyses areryde it, and sette the tables, and the footstakis, and the berynge staues, and he sette the pilers. And he strauȝte the roofe vpon the tabernacle, the couertour in sett aboue, as the Lord comaundide. And he putte the witnessyng in the arke with ynne, berynge staues vnder sett, and Goddis answerynge place ther aboue. And whanne he hadde brouȝt yn the arke into the tabernacle, he hongide beforn it the veyle, that he fulfille the heest of the Lord. And he putte the meetbord in the tabernacle of witnessyng, at the north coost, with outen the veyle, ordeynd before the looues of proposicioun, as the Lord comaundide to Moyses. And he putte the candestik in the tabernacle of witnessyng, forn aȝens the meetbord, in the sowth parti, sett bi ordre the lanterns, after the heest of the Lord. And he putte the goldun auter vnder the roofe of witnessyng, aȝens the veile, and he brent vpon it encense of swete smellynge spices, as the Lord comaundide to Moyses. And he putte the tente in the entre of the tabernacle, and the auter of alle brent sacrifices in the vestiarie of witnessyng, offrynge in it al brent sacrifice, and sacrifices, as the Lord hadde comaundide. The lauatorie forsothe he sette betwix the tabernacle of witnessyng and the auter, fulfillynge it with water. And Moyses and Aaron and the sones of hym wasshen her hoondes and feet, whanne thei ȝeden in the roof of the couenaunt of pees, and neiȝe ȝeden to the auter, as the Lord hadde comaundide to Moyses. And he reride the porche, bi enuyroun of the tabernacle and of the auter, a tent lad in the entre of it. After that alle thingis ben fulfillid, a clowd couerde the tabernacle of witnessyng, and the glorie of the Lord fulfillide it; ne Moyses myȝte goo in the roofe of the couenaunt of pees, the clowd couerynge alle thinges, and the maieste of the Lord liȝtnynge, for alle thingis the clowd hadde couerede. And if eny tyme the clowd lafte the tabernacle, the sones of Yrael ȝeden forth bi her companyes; if it hongide there aboue, thei dwelten in the same place; the clowd forsothe of the Lord lenyde in day to the tabernacle, and fier in the nyȝt, and the puple of Yrael seynge, bi alle her dwellyngis.
Copyright © 2013–2026 Jeremy J. Johnson. All rights reserved.