1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52
The wrdis of Jeremye, sone of Elchie, of the prestus that weren in Anathot, in the lond of Beniamyn. That maad is the wrd of the Lord to hym in the daȝes of Josie, sone of Amon, king of Juda, in the threttenthe ȝer of his regne. And don it is in the daȝes of Joachym, sone of Josie, king of Juda, vn to the ful ending of the elleuenthe ȝer of Sedechie, sone of Josie, king of Juda, vnto the transmygracioun of Jerusalem, in the fifte monyth. And don is the wrd of the Lord to me, seiende, Bifor that I foormede thee in the wombe, Y knew thee; and er thou wentest out of the priue wombe, I halowede thee; and a profete in folkis of kinde I ȝaf thee. And I seide, A! A! A! Lord God, lo! I kan not speke, for a child I am. And the Lord seyde to me, Wile thou not seyn, for a child I am; for to alle thingus that I shal sende thee, thou shalt go, and alle thingis, what euere I shal sende to thee, thou shalt speke. Ne drede thou fro the face of them, for I am with thee, that I delyuere thee, seith the Lord. And the Lord sente his hond, and touchide my mouth; and the Lord seide to me, Lo! I haue ȝoue my wrdis in thi mouth; lo! I haue set thee to dai vp on folkis of kinde, and vp on reumes, that thou pulle vp, and destroȝe, and springe abrod, and waste, and bilde vp, and plaunte. And don is the wrd of the Lord to me, seiende, What seest thou, Jeremye? And Y seide, A wakende ȝerde I see. And the Lord seide to me, Wel thou hast seen, for I shal waken vp on my wrd, that I do it. And don is the wrd of the Lord the secounde tyme to me, seiende, What seest thou? And I seide, A pot tend vp I see, and his face fro the face of the north. And the Lord seide to me, Fro the north shal be schewid euel vp on alle the dwelleris of erthe. For lo! I shal clepe togidere alle the kinredis of the rewmes of the north, seith the Lord, and thei shul come, and setten eche his see in the entre of the ȝatis of Jerusalem, and vp on alle his wallis in enuyroun, and vp on alle the chef cites of Juda. And I shal speke my domes with hem vp on al the malice of hem, that forsoke me, and offreden to aliene goddis, and honoureden the werc of ther hondis. Thou thanne gird vp thi leendis, and ris, and spec to them alle thingus that I comaunde to thee; ne be thou aferd fro the face of them, ne forsothe Y shal make thee to dreden the chere of them. Y forsothe haue ȝoue thee to dai in to a strengthid cite, and in to an irene pilere, and in to a brasen wal, vp on al erthe, to the kingus of Juda, and to his princes, and to his prestes, and to al the puple of the lond. And thei shul fiȝte aȝen thee, and not han the maistri; for I with thee am, seith the Lord, that I delyuere thee.
And don is the wrd of the Lord to me, seiende, Go, and cri in the eres of Jerusalem, seiende, These thyngus seith the Lord, I recordide of thee, rewende thin waxende ȝouthe, and the charite of thi weddyng, whan thou folewedist me in desert, in the lond that is not sowen. Hoeli Irael to the Lord, the chef of his frutus; alle that deuouren hym, gilten; euelis shul come vp on hem, seith the Lord. Hereth the wrd of the Lord, ȝee hous of Jacob, and alle the kinredis of the hous of Irael. These thingus seith the Lord, What founde ȝoure fadris in me of wickidnesse, for thei longeden awei fro me, and ȝiden aftir vanyte, and veyn thei ben mad? And thei seiden not, Wher is the Lord, that made vs to steȝen vp fro the lond of Egipt, that ladde vs ouer by desert, bi the lond vnhabitable and withouten weie, bi the lond of thrist, and ymage of deth, bi the lond in whiche ȝide not a ful man, ne wonde a man. And I ladde ȝou in to the lond of Carmel, that ȝee shulden ete his frute, and the beste thingis of it; and gon in ȝee defouleden my lond, and myn eritage ȝee putten in to abhominacioun. Prestes seiden not, Wher is the Lord? and holdende the lawe, thei knewen not me; and shepperdis breeken the lawe aȝen me, and profetes profecieden in Baal, and foleweden mawmetes. Therfore ȝit Y shal striuen in dom with ȝou, seith the Lord, and with ȝoure sones Y shal dispute. Passeth to iles of Sithym, and seeth; and in to Cedar sendeth, and beholdeth hugeli; and seeth, yf don is such a maner thing, if chaungid hath the folc of kinde his goddis; and certes thei ben not goddis; my puple forsothe chaungede his glorie in to a mawmet. Waxeth stoneȝid, ȝee heuenus, vp on this, and, ȝee ȝatus of heuene, beth desolat hugeli, seith the Lord. Two forsothe euelis diden my puple; me thei forsoken, welle of quyc watir, and doluen to them wastid cisternes, that contenen watris moun not. Whether a thral is Irael, or a born bonde man? Whi thanne mad he is in to prei? Vp on hym roreden leouns, and ȝeuen ther vois; thei setteden his lond in to wildernesse, his cites ben brend vp, and ther is not that dwelle in them. The sonus also of Memfeos and of Thamnes defouliden thee bi lecherie, or mawmetrie, vp on to the top. Whether not this is do to thee, for thou hast forsaken the Lord thi God, that tyme that he ladde thee bi the wey? And now what to thee wilt thou in the weye of Egipt, that thou drinke water troublid? And what to thee with the weie of Assiries, that thou drinke water of the flod? Vndernyme thee shal thi malice, and thi turnyng away shal blame thee; wite and see, for euel and bitter it is thee to han forsaken the Lord thi God, and his drede not to ben anent thee, seith the Lord God of ostes. From the world thou hast al to-broste my ȝoc, to-broke my bondis, and seidist, I shal not serue. In eche forsothe hyȝ hil, and vnder eche braunchy tree thou were throwe doun a strumpet. I forsothe plauntede thee a chosen vyneȝerd, al verre sed; what maner thanne thou art turned to me in to a shreude thing, an aliene vyne? If thou wasshe thee with clensing cley, and multeplie to thee the clensende erbe boreth, thou art defoulid with thi wickidnesse bifor me, seith the Lord God. What maner seist thou, I am not defoulid, after Baalym I haue not go? See thi weies in the hole valey, wite what thou hast do; a liȝt corour tellende out thi weies. A feld asse vsid in wildernesse in the desyr of his soule droȝ wind of his loue; noon shal turne it awey. Alle that seechen hir, shul not failen; in hir rote blod flowingus thei shul finden hir. Forfende thi foot fro nakidhed, and thi throte fro thrist; and thou seidest, I dispeirede, I shal not do; I louede forsothe alienus, and after them I shal go. What maner is confoundid a thef, whan he is caȝt, so confoundid ben the housis of Irael; thei, and the kingus of hem, princes, and prestes, and profetes of them, seiende to the tree, My fader thou art; and to the ston, Thou me hast goten. They turneden to me bac, and not face; in tyme of ther tormenting thei shul sey, Rys, and delyuere vs. Wher ben thi goddus, whom thou hast maad to thee? Rise thei, and delyuere thei thee in the dai of thi tormenting; after the noumbre forsothe of thi cites weren thi goddus, Juda. What wile ȝee with me in dom striue? Alle ȝee han forsake me, seith the Lord. In veyn I haue smyte ȝoure sonus, disciplyne thei resceyueden not; ȝoure swerd deuourede ȝoure profetes, as a leoun is wastid ȝoure ieneracioun. Seeth the wrd of the Lord, whether wildernesse I am mad to Irael, or a lond late berende frute? Whi thanne seith my puple, Wee han gon awei, wee shul no mor come to thee? Whether forȝete shal the maiden of hir enournement? and the womman spouse of hir brest bundel? My puple forsothe forȝat me in daȝes vnnoumbred. What enforcest thou to shewe thi weie good to ben soȝt loue, that ouermor and thi malices thou hast taȝt thi weies, and in thi wengus is founde blod of pore soules and innocentus? Not in dichis Y fond them, but in alle thingus that aboue I membrede. And thou seidist, Withoute synne and ynnocent I am; and therfore be turned awei thi wodnesse fro me. Lo! Y in dom shal striue with thee; for thi that thou seidist, I synnede not. Hou foul art thou mad ful myche, rehercende thi weies? and of Egipt thou shalt be confoundid, as thou art confoundyd of Assur. For whi and of this thou shalt gon out, and thin hondis shul ben vp on thin hed; for al to-troden hath the Lord thi trost, and no thing thou shalt han welsum.
Comunly me seith, If a man lefe his wif, and she goende awei fro hym wedde an other man, whether shal she turne aȝeen any mor to hym? whether not pollut and defoulid shal be that womman? Thou forsothe hast do fornycacioun with many loueres; nerthelatere turne aȝeen to me, seith the Lord, and I shal resceyue thee. Rere vp thin eȝen in to euene riȝt, and see, where now thou art leid doun. In weies thou seete, abidende them as a thef in wildernesse, and thou defouledist the lond in thi fornycaciouns and in thi malices. For what thing ben defendid dropis of reynes, and the late comende weder was not. The forhed of a strumpet womman is maad to thee; thou woldest not shamen. Thanne namely fro now clep me, My fader, duk of my maydenhed thou art. Whether thou shalt be wroth in to euermor, and abyde stille in to the ende? Lo! thou speeke, and didist euelis, and myȝtist. And for wrdis of penaunce with wrdis of pride thou blasfemedist; and thou fulfildist thin euel thenking, and shewedist aȝen the husbonde thi strengthe, that thou mow don that in wrd thou tretedist. And the Lord seide to me, in the daȝes of kyng Josie, Whether thou hast not seen what thyngus hath do the aduersarie, Irael? She ȝide awei to hirself vp on eche heȝ mounteyn, and vnder eche braunchi tree, and dide fornycacioun there. And Y seide, whan she hadde don alle these thingus, To me turne aȝeen; and she is not turned aȝeen. And the brekeresse of lawe, Juda, hir sister, saȝ, for thi that Irael, aduersarie, hadde do leccherie, I shulde haue left her, and ȝoue to her a libel of forsaking; and the lawe brekeresse, Juda, hir sister, dradde not, but ȝide awei, and dide fornycacioun also she. And thurȝ liȝthed of hir fornycacioun defoulede the lond, and dide fornycacioun with ston, and with tree. And in alle these thingus is not turned aȝeen to me the lawe brekeresse, hir sister, Juda, in al hir herte, but in lesing, seith the Lord God. And the Lord seide to me, The aduersarie, Irael, iustefiede hir soule, bi comparisoun of the lawe brekeresse, Juda. Go, and cry these wrdus aȝen the north; and thou shalt sey, Turne aȝeen, thou aduersarie, Irael, seith the Lord, and I shal not turne awei my face fro ȝou; for I am hoeli, seith the Lord, and I shal not wrathen in to withoute ende. Ner the latere wite thou thi wickednesse; for in to the Lord thi God thou hast do lawe breche, and thou hast scatered thi weies to alienus vnder eche braunchi tree; and my vois thou herdist not, seith the Lord. Beth conuertid, ȝee sonus, turnende aȝeen, seith the Lord, for I ȝoure housebonde; and shal take ȝou to oen of the cite, and two of the kinrede, and bringe ȝou in to Sion; and ȝiue ȝou shepperdus aftir myn herte, and thei shul fede ȝou with kunnyng and doctryne. And whan ȝe shul be multeplied, and encresyn in the lond, in tho daȝes, seith the Lord, thei shul sey no more, The arke of the testament of the Lord; ne it shal steȝen vp vp on herte, ne thei shul recorde of it, ne it shal be visitid, ne be mad eft more. In that tyme thei shuln clepe Jerusalem The see of the Lord, and gedered shul be to it alle Jentiles, in name of the Lord, in to Jerusalem; and thei shul not gon after the shreudenesse of ther werste herte. In tho daȝes gon shal the hous of Juda to the hous of Irael; and come thei shuln togidere fro the lond of the north to the lond that I ȝaf to ȝoure fadris. I forsothe seide, Hou shal I putte thee in sonus, and ȝelde to thee the desirable lond, the ful cler eritage of the ostis of the folc of kinde? And I seide, A fader thou shalt clepe me, and after me to gon thou shalt not cese. But what maner if a womman dispise hir louere, so dispisede me the hous of Irael, seith the Lord. A vois in weies is herd, weping and ȝelling of the sonus of Irael; for wicke thei maaden their weie, forȝeeten of the Lord ther God. Beth conuerted, ȝee sonus, turnende aȝeen, and I shal helen ȝoure turnyngus awei. Lo! wee han come to thee; thou forsothe art the Lord oure God. Verreli lyeres weren the hillis, the multitude of mounteynes; verrely in the Lord oure God the helthe of Irael. Confusioun eet the trauale of our fadris, fro oure waxende ȝouthe; the flockes of them, and the droues of hem, the sonus of them, and the doȝtris of them. Wee shul slepe in oure confusyoun, and coueren shal vs oure shenshipe; for to the Lord oure God wee han synned, and wee and our fadris, fro oure waxende ȝouthe vn to this dai; and wee han not herd the vois of the Lord oure God.
If thou shalt turne aȝeen, Irael, seith the Lord, to me be conuertid; if thou shalt take awei thin hurtende thingus fro my face, thou shalt not be to-stirid. And thou shalt swern, The Lord lyueth, in treuthe and in dom and in riȝtwisnes; and blissen shul hym folc of kinde, and hym preisen. These thingus forsothe seith the Lord to the man of Juda and to the dwellere of Jerusalem, Newith to ȝou a newe tilid lond, and wileth not sowen vp on thornes. Beth circumcidid to the Lord, and doth awei the vtmost ȝerde felles of ȝoure hertes, ȝee men of Juda, and dwelleris of Jerusalem; lest parauenture go out as fyr myn indignacioun, and be tend vp, and ther be not that quenche, for the malice of ȝoure thoȝtus. Telleth out in Juda, and in Jerusalem maketh herd; speketh, and syngeth with a trumpe in the lond; crieth strongli, and seith, Beth gedered, and go wee in the strengthid cites. Rereth a tocne in Sion, beth coumfortid, and wileth not stonde; for euel I bringe to fro the north, and a gret to-treding. Steȝede vp a leoun fro his couche, the reuere of Jentilis hymself shal reren. He wente out fro his place, that he pute thi lond in to wildernesse; thi citees shul be wastid, abidende stille withoute dwellere. Vp on this gird ȝou aboute with heires; weileth, and ȝellith, for turned awei is not the wrathe of the wodnesse of the Lord fro ȝou. And it shal be, in that dai, seith the Lord, pershen shal the herte of the king, and the herte of princes; and become stoneid shul the prestis, and profetes in mynde shul be disturbid. And I seide, Allas! allas! allas! Lord God; thanne whether hast thou not bigilid this puple and Jerusalem, seiende, Pes shal be to ȝou, and lo! ful comen is swerd vn to the soule? In that tyme shal be seid to this puple and to Jerusalem, Brennende wynde in the weies that ben in desert, weies of the doȝter of my puple, not to wynewen, and to purgen. A spirit ful of these shal come to me; and now Y, but I shal speke my domes with them. Lo! as a cloude he shal steȝen vp, and as tempest his chares; swiftere than eglis his hors; wo to vs, for wastid wee ben. Wash fro malice thin herte, thou Jerusalem, that thou be mad saaf. Hou longe shuln abyde in thee noȝous thoȝtes? The vois forsothe of the tellende fro Dan, and of the knowen makende the mawmet fro the hil of Effraym. Stereth, ȝee Jentiles; lo! herd it is in Jerusalem keperes to come fro a ferr lond, and to ȝyue vp on the cites of Juda ther vois. As keperes of feeldis thei ben mad vpon it in cumpas; for me to wrathe it terrede, seith the Lord. Thi weies and thi thoȝtus diden to thee these thingus; this thi malice for bitter, for it touchede thin herte. My wombe I ake, my wombe I ake; the wittus of myn herte ben disturbid in me. I shal not be stille, for the vois of the trumpe herde my soule, cry of the bataile. To-treding vp on to-treding is clepid, and wastid is al erthe; feerli ben wastid my tabernacles, sodeynly my skynnes. Hou longe shal I seen a man fleende, heren shal Y the vois of the trumpe? For my fool puple me kneȝ not; vnwise sonus thei ben, and couwardus; wise thei ben that thei do eueles, wel forsothe do thei kunne not. I beheeld the erthe, and lo! voide it was, and of noȝt; and heuenus, and ther was not liȝt in them. I saȝ mounteynes, and lo! thei weren moued, and alle hillis ben disturbid. Y beheeld, and ther was not a man, and eche foul of heuene wente awey. I beheeld, and lo! Carmel desert, and alle hys cites ben destroȝed fro the face of the Lord, and fro the face of the wrathe of his wodnes. These thingus forsothe seith the Lord, Desert shal ben eche lond, but nerthelatere ful ending Y shal not do. Weile shal erthe, and sorewen shul heuenus fro aboue, for thi that Y spac; I thoȝte, and it othoȝte not me, ne Y turned awei fro it. Fro the vois of the horse man, and of the sendende an arwe fleiȝ al the cyte; thei wenten in hard thingus, and steȝeden vp on roches; alle the chef cites ben forsaken, and dwellith not in them a man. Thou forsothe wastid, what shalt thou do? Whan thou shalt clothe thee with rede silc, whan thou shalt be enourned with the goldene broche, and schal peynte thin eȝen with strumpetes oynement, in veyn thou shalt ben araied; dispiside thee han thi loueres, thi lif thei shul sechen. A vois forsothe as of the trauailende with child I herde, anguysshes as of the child berere; vois of the doȝter of Syon among men diende, and strecchende out ther hondus; Wo to me, for failide my lif for the slayne.
Goth aboute the weies of Jerusalem, and looketh, and beholdeth, and secheth in his stretes, whether ȝee fynde a man doende dom, and sechende feith; and merciful Y shal be to hem. That if also, The Lord lyueth, thei shul sey, and that falsly thei shuln swern. Lord, thin eȝen biholden feith; thou hast smyte them, and thei soreweden not; thou to-treede them, and thei forsoken to taken discipline; thei inwardli hardeden ther faces vp on the ston, and wolden not be turned aȝeen. I forsothe seid, Par auenture pore men thei ben, and foolis, vnknowende the weie of the Lord, the dom of ther God. I shal go therfor to the cheef men, and speke to them; thei forsothe knewen the weie of the Lord, and the dom of ther God. And lo! more these togidere al tobreeken the ȝoc, and brosten out the bondis. Therfore hath smyte them a leoun of the wode; a wlf at euen wastede them, a parde wakende vp on the cites of them. Eche that shal gon out of them, shal be take; for multeplied ben the lawe brekyngus of them, coumfortid ben the turnyngus awei of them. Vp on what thing to thee plesid shal Y moun be? Thi sonus forsoken me, and swern in tho thingus that ben not godis. I fulfilde them, and thei diden fornycacioun, and in the hous of the strumpet thei diden leccherie. Horses loueres in to wymmen, and courseres thei ben mad; eche to the wif of his neȝhebore neyȝede. Whether vp on these thingus Y shal not visite, seith the Lord, and in such a folc of kinde shal not be vengid my soule? Steȝeth vp his wallis, and scatereth; ful wasting forsothe wileth not do. Doth awei his forthgetingus, for thei ben not the Lordis. Thurȝ lawe breking forsothe tresspasede aȝen me the hous of Irael and the hous of Juda, seith the Lord; thei denyeden the Lord, and seiden, It is not he, nether shal come vp on vs euel; swerd and hunger wee shul not see. The profetus speeken in to the wind, and answere was not in them; these thingus therfore out come shul to them. These thingus seith the Lord God of ostis, For ȝee speeken this wrd, lo! Y ȝyue my wrdus in thi mouth in to fyr, and this puple in to trees, and it shal deuoure them. Lo! Y shal bringe to vp on ȝou a folc of kinde fro aferr, of the hous of Irael, seith the Lord; a stalwrthe folc of kinde, an old folc of kinde, a folc of kinde, whos tunge thou shalt vnknowe, ne vnderstonde what it speke. His arewe cas as a sepulcre opene; alle stronge men. And it shal ete thi cornes, and thi bred deuoure, thi sonus and thi doȝtris; it shal ete thi floc, and thi droues, and shal eten thi vyne, and thi fige tree; and to-brose thi strengthid cites, in whiche thou hast trost, with swerd. Nerthelatere in tho daȝes, seith the Lord, Y shal not make ȝou in to ful ending. That if ȝee shul seye, Whi to vs dide the Lord oure God alle these thingus? thou shalt sei to them, As ȝee han forsake mee, and seruede to an alien god in ȝour lond, so ȝee shul serue to alien goddis in the lond not ȝoure. Telleth this to the hous of Jacob, and herd maketh in Juda, seiende, Here, thou fool puple, that hast not herte; that hauende eȝen, ȝee seen not, and eres, and heren not. Me therfor ȝee shul not drede, seith the Lord, and fro my face not sorewen? Which Y putte grauel terme to the se, euere durende heste, that it shal not passe; and thei shul be to-moued, and thei shul not moun; and to-swelle shul his flodis, and shul not passen it. To this puple forsothe is mad an herte mystrowende and oute sharpende; thei wente bacward, and ȝiden awei, and seiden not in ther herte, Drede wee the Lord oure God, that ȝyueth to vs tymeli rein, and late comende in his cesoun, plentenesse of ȝeres rip comende to vs. Oure wickenesses boweden doun these thingus, and oure synnes defendeden good fro vs. For ther ben founden in my puple vnpitous men, waitende as fouleres, grenes puttende, and feet gynnes, to ben caȝt men. As a pit falle ful of briddes, so the hous of hem ful of treccherie. Therfore thei ben magnefied, and richid inwardli, grecid, and fattid, and thei passeden biside my wrdus alther werst; the cause of the widewe thei demeden not, the cause of the faderles child riȝt reuleden not, and the dom of pore men demeden not. Whether vp on these thingus I shal not visiten, seith the Lord, or vp on such maner folc shal not be vengid my soule? Stoneyng and merueiles ben mad in the erthe; profetis profecieden lesing, and prestus flappeden for ioȝe with ther hondus, and my puple louede suche thingus. What thanne shal ben don in his laste?
Beth coumfortid, ȝee sonus of Beniamyn, in the myddil of Jerusalem, and in Thecua trumpeth with a trumpe, and vp on Bethacharem rereth a baner; for euel is seen fro the north, and gret totreding. To a fair womman and a delicat Y licned the doȝter of Sion. To hir shul come shepperdis and the flockis of them; thei ficcheden in it tentus in enuyroun; feden shal eche them, that vnder his hond ben. Halewith vp on hir a bataile. Riseth, and steȝe wee vp in the myddai. Wo to ȝou, for doun bowide the dai, for lengere ben mad shadewes than to euen. Riseth, and steȝe wee vp in the nyȝt, and to-scatere wee ther houses. For these thingus seith the Lord of ostus, Hewith tree of hir, and delueth aboute Jerusalem an erthe hilloc; this is the cite of visitacioun; eche false chalenge in his myddel. As thanne cold maketh the cisterne his watir, so cold she hath mad hir malice; wickenesse and wastyte shal ben herd in hir befor me euermor, infirmyte and wounde. Be taȝt, Jerusalem, lest par auenture go awey my soule fro thee; lest par auenture I sette thee desert, a lond vndwellable. These thingus seith the Lord of ostus, Vnto the cluster braunch thei shul gedere, thei shul gedere as in a vyneȝerd the relikes of Irael; conuerte thin hond, as a grape kuttere to a basket. To whom shal Y speke, and whom shal Y witnessen, that he here? Lo! vncircumcidid the eres of hem, and heren thei moun not; lo! the wrd of the Lord don is to them in to repref, and thei shuln not taken it. Therfore of the wodnesse of the Lord Y am ful, and Y trauailede sustenende. Heeld out wodnesse vp on the litil child withoute forth, and vp on the counseil of ȝunge men togidere; a man forsothe with the wif shal be caȝt, and the olde with the ful of daȝes. And passe shul the houses of them to othere men, feldis and wyues togidere; for I shal strecche myn hond vp on men dwellende the lond, seith the Lord. Fro the lasse forsothe vnto the more, alle to auarice studien; and fro the profete vnto the prest, alle don treccherie. And thei cureden, or heliden, the to-treding of the doȝter of my puple with shenshipe, seiende, Pes, pes, and ther was not pes. Thei ben confoundid, for abhomynacioun thei didyn; but more with confusioun thei ben not confoundid, and shamen thei kouthen not. Wherfore thei shul falle among the men fallende; in tyme of ther visitacioun thei shul falle togidere, seith the Lord. These thingus seith the Lord, Stondeth vp on weies, and seeth, and asketh of the olde pathis, what is the goode weie; and goth in it, and ȝee shul fynde refreshinge to ȝoure soules. And thei seiden, Wee shul not go. And Y sette vp on ȝou tooteres, and seide, Hereth the vois of the trumpe. And thei seiden, Wee shuln not heren. Therfore hereth, ȝee folc of kinde, and knowith, ȝee congregacioun, hou grete thingus Y shal do to them. Here, thou erthe, lo! Y shal bringe to eueles vp on this puple, frut of ther thoȝtus; for my wrdus thei herden not, and my lawe thei threwen aferr. Wherto to me cens of Saba ȝee bringen, and the spices calamy swote smellende fro a ferr lond? Ȝoure brente sacrifises ben not acceptid, ȝoure victorye sacrifises pleseden not to me. Therfore these thinges seith the Lord God, Lo! Y shal ȝyue in to this puple fallyngus, and shul falle in them faderes and sonus togidere, neȝhebore and cosyn, and pershen. These thingus seith the Lord God, Lo! the puple cam from the lond of the north, and a gret folc of kinde shal togidere rise fro the costes of the lond. Arwe and sheld it shal take; cruel it is, and it shal not han mercy; his vois as the se shal sowne, and vp on hors steȝen vp thei shul beforn mad redy as a man to bataile aȝen thee, thou doȝter of Sion. Wee han herd the loes of it, losid atwynne ben oure hondus; tribulacioun caȝte vs, sorewis as the trauailende with childe. Wileth not gon out to the feeldis, and in weie goth not, for the swerd of the enemy, the ferd of the enemy in enuyroun. Thou doȝtir of my puple, be thou gird with an heire, and to-sprengd with asken; weilende of the onli geten mac to thee bitter mornyng, for feerli shal come the wastere vp on vs. A stalwrthe prouere Y ȝaf thee in my puple, and thou shalt wite, and preue the weie of them. Alle these princes of men boweden doun goende gilendely, bras and yren; alle ben shent. Failede the meltende vessel, in fyr wastid is the led, in veyn meltide togidere the ȝeetere; forsothe the malices of them ben not wastid. Repreued siluer clepeth hem, for the Lord threȝ hem aferr.
The wrd that is mad to Jeremye of the Lord, seiende, Stond in the ȝate of the hous of the Lord, and preche there this wrd, and sey, Hereth the wrd of the Lord, al Juda, that gon in thurȝ these ȝatus, that ȝee honoure the Lord. These thingus seith the Lord of ostus, God of Irael, Good maketh ȝoure weies, and ȝoure studies, and I shal dwelle with ȝou in this place. Wileth not trosten in wrdis of lesyng, seiende, Temple of the Lord, temple of the Lord, temple of the Lord is. For if ȝee wil euene riȝt reulen ȝoure weies, and ȝoure studies; if ȝee do dom betwe man and his neȝhebore; to the comeling, and to the faderles child, and to the widewe ȝee do not wrong chaleng; ne ynnocent blod ȝe sheden out in this place, and after aliene goddis ȝee go not out, in to euel to ȝou self, Y shal dwelle with ȝou in this place, in the lond that Y ȝaf to ȝoure faders, fro the world in to the world. Lo! ȝee trosten to ȝou in wrdus of lesing, that shul not profite to ȝou; to steln, to slen, to don auoutrie, to swern liendely, to offre to Baalym, and to gon after aliene godus, whom ȝee knowe not. And ȝee camen, and stoden bifor me in this hous, in whiche is inwardly clepid my name; and ȝee seiden, Delyuered wee ben, for thi that wee han do alle these abhominaciouns. Whether thanne a spelunke, or denne, of theues mad is this hous, in whiche is inwardly clepid my name in ȝoure eȝen? I, Y am, Y saȝ, seith the Lord. Goth to my place in Silo, wher dwellide my name fro the bigynnyng, and seeth what I dide to it, for the malice of my puple Irael. And now, for ȝee han don alle these werkis, seith the Lord, and Y spac to ȝou, erly risende, and spekende, and ȝee herden not, and Y clepede ȝou, and ȝee answerden not; Y shal do to this hous, in whiche is clepid my name, and in whiche ȝee han trost, and to the place that Y ȝaf to ȝow and to ȝoure faders, as Y dide to Silo. And Y shal throwe ȝou aferr fro my face, as Y threȝ aferr alle ȝoure brethern, al the sed of Effraym. Thou thanne wile thou not preȝe for this puple, ne take thou to for them preising and orisoun; and ne withstonde thou to me, for Y shal not here thee. Whether seest thou not, what these don in the cites of Juda, and in the stretes of Jerusalem? Sonus gederen trees, and faders brennen vp fyr; and wymmen sprengen togidere talȝ, that thei make sweete cakis to the quen of heuene, and sacrifien to aliene goddis, and me to wrathe thei terre. Whether me to wrathe thei terre? seith the Lord; whether not themself in the confusioun of ther chere? Therfore these thingus seith the Lord God, Lo! my wodnes and myn indignacioun is molten vp on thys place, vp on the wallis, and vp on the bestes, and vp on the tree of the regioun, and vp on the frutus of the erthe; and it shal be tend vp, and not be quenchid. These thingus seith the Lord of ostes, God of Irael, Ȝoure brent sacrifises addeth to ȝoure victorie sacrifises, and eteth flesh. For Y spac not with ȝoure faders, and I comaundide not to them, in the dai that I ladde them out fro the lond of Egipt, of the wrd of brent sacrifises, and of victorie sacrifises. But this wrd I comaundide to them, seiende, Hereth my vois, and Y shal be to ȝou a God, and ȝee shul be to me a puple; and goth in eche weie that Y comaunde to ȝou, that it wel be to ȝou. And thei herden not, ne boweden ther ere, but wenten awei in ther foule delites, and in shreudenes of ther euele herte; and thei ben mad bacward, and not beforn, fro the day that the fadris of them wenten out fro the lond of Egipt vn to this dai. And I sente to ȝou alle my seruauns profetus, bi dai risende erli, and sendende. And thei herden not me, ne boweden in ther ere; but inwardli hardeden ther nol, and werse wroȝten than ther fadris. And thou shalt speke to them alle these wrdys, and thei shul not here thee; thou shalt clepe them, and thei shul not answern to thee. And thou shalt sey to them, This is the folc, that herde not the vois of the Lord ther God, ne resceyuede discipline; feith pershede, and is taken awei fro the mouth of them. Dodde thin her, and throȝ a ferr, and in euene riȝt tac weiling; for the Lord hath throwen aferr, and forsaken the ieneracioun of his wodnesse. For the sonus of Juda diden euel in myn eȝen, seith the Lord; thei setteden ther offendende thingus in the hous, in whiche ys inwardly clepid my name, that thei defoule it; and thei bilden vp the heȝe thingus of Tofeth, that is in the valey of the sone of Ennon, that thei brenne ther sones and ther doȝtris with fyr, the whiche thingus I comaundide not, ne thoȝte in myn herte. Therfore lo! daȝes comen, seith the Lord, and it shal not be seid no mor Tofeth, and the valey of the sone of Ennon, but the valey of slaȝter; and thei shul birien in Tofeth, for thi that ther was not place to birie for the multitude of careynes. And ben shal the moreyn of this puple in to mete to the foules of heuene, and to the bestus of erthe; and ther shal not be that dryue awey. And to resten I shal make fro the chef cytes of Juda, and fro the stretes of Jerusalem, vois of ioȝe, and vois of gladnesse, vois of the spouse man, and vois of the spouse womman; in desolacioun forsothe shal ben the erthe.
In that tyme, seith the Lord, thei shul caste out the bonus of the king of Juda, and the bones of his princes, and the bones of prestus, and the bones of profetes, and the bones of hem that dwelliden Jerusalem fro ther sepulcris; and sprede them abrod to the sunne, and the moone, and al the knyȝthed of heuene, whiche thei loueden, and to whom thei serueden, and after whiche thei ȝiden, and whiche thei soȝten, and honoureden; thei shul not be gedered, and not biried; in to a dunghil vp on the face of erthe thei shul be. And thei shul chesen more deth than lif, alle that residue shul be of this werste kinrede, in alle places that ben laft, to whiche I threȝ hem doun, seith the Lord of ostis. And thou shalt sey to them, These thingus seith the Lord, Whether he that shal falle, shal not risen aȝeen? and he that is turned awei, shal not be turned aȝeen? Whi thanne turned awei is this puple in to Jerusalem with striuous turnyng awei? Thei caȝten lesing, and wolden not turne aȝeen. Y tooc heed, and herknede; no man that good is speketh, no man is that do penaunce vp on his synne, seiende, What haue Y do? Alle ben turned to ther cours, as an hors in bure goende to bataile. The kite in heuene kneȝ his tyme; the turtir, and the swalewe, and the somer foul that is clepid cyconye, kepten the time of ther comyng; my puple forsothe kneȝ not the dom of the Lord. Hou sey ȝee, Wise men wee ben, and the lawe of the Lord is with vs? Verely lesing wroȝte the lyende poyntil of the scribis. Confoundid ben the wise men, gast and caȝt thei ben. The wrd forsothe of the Lord thei casten aferr, and no wisdam is in hem. Therfore Y shal ȝiue ther wymmen to straungeres, and ther feeldis to alien eires; for fro the leste vnto the moste auarice alle folewen, fro the profete vnto the prest alle don lesing; and heleden the tobrosing of the doȝter of my puple to shenshipe, seiende, Pes, pes, whan ther was not pes. Confoundid thei ben, for abhomynacioun thei diden; but myche more by confusioun thei ben not confoundid, and shamen thei kouthen not. Therfor thei shul falle among men fallende, in tyme of ther visitacioun thei shul falle togidere, seith the Lord. Gederende Y shal gedere them togidere, seith the Lord; ther is not grape in the vynes, and ther ben not fyges in the fige ȝerd; the lef flowede doun, and I ȝaf to them the thingus that ben go bisidis. Whi sitte wee? cometh togidere, go wee in to the strengthid cite, and holde wee oure pes there; for our Lord hath maad vs to be stille, and drinke ȝaf to vs watir of galle; wee han synned forsothe to the Lord. Wee han abide pes, and ther was not good; tyme of leching, and lo! dred. Fro Dan is herd the fnesting of his hors; fro the vois of his neiȝende fiȝteres tostirid is alle the lond; and thei camen, and deuoureden the lond, and his plente, the chef cite, and his dwelleres. For lo! I shal sende to ȝou werst edderes, to whiche is not enchaunting; and thei shul bite ȝou, seith the Lord. My sorewe vp on sorewe, in me myn herte mournende. And lo! the vois of the cry of the doȝter of my puple fro a ferr lond. Whether the Lord is not in Sion, or his king is not in it? Why thanne me to wrathe thei stereden in ther grauen thingus, and in alyene vanytes? Ryp passede, endid is somer; and wee ben not saf. Vp on the to-treding of the doȝtir of my puple Y am to-treden, and sorewid; stoneyng withheeld me. Whether gumme is not in Galaad, or a leche is not there? Whi thanne the hid wounde of the doȝter of my puple is not al helid?
Who shal ȝyue to myn hed watir, and to myn eȝen a welle of teres? And I shal wepe dai and nyȝt the slayne men of the doȝter of my puple. Who shal ȝyue me in to wildernesse of dyuers weie goeres? And I shal forsake my puple, and gon awey fro them. For alle auoutreris thei ben, and cumpanye of lawe brekeres; and thei benten out ther tunge as ther bowe of lesyng, and not of treuthe. Thei ben coumfortid in erthe, for fro euel to euel thei wenten out, and me thei knewe not, seith the Lord. Eche kepe hymself fro his neȝhebore, and in eche brother of hym haue he not trost; for eche brother supplauntende shal supplaunte, and eche frend gilendely shal go. And a man his brother shal scorne, and treuthe shal not speke; thei taȝten forsothe ther tunge to speke lesing; that wickely thei schulden don, thei trauaileden. Thi dwelling in the myddel of treccherie; in treccherie thei forsoke me to knowen, seith the Lord. Therfore these thingus seith the Lord of ostus, Lo! I shall ȝeete and preue them; what forsothe other thing shal Y do fro the face of the sone of my puple? An arwe woundende the tunge of hem, treccherie it spac; in his mouth pes with his frend he speketh, and priueli he putteth to hym aspies. Whether vp on these thingus I shal not visite, seith the Lord, or in to such a maner folc shal not be vengid my soule? Vp on mounteynes Y shall take to weping and mournyng, and vp on the faire thingus of desert weilende, for thei ben brend vp; for thi that ther was not a man passende thurȝ, and thei herden not the vois of the weldere; fro the foul of heuene vn to the bestes, thei ȝiden ouer, and wenten awei. And Y shal ȝyue Jerusalem in to hepes of grauel, and in to couches of dragounes; and the cites of Juda Y shal ȝyuen in to desolacioun, for thi that ther is not a dwellere. Who is a wis man that vnderstant this, and to whom the wrd of the mouth of the Lord be mad, that he telle this? Whi pershede the lond, ful out is brend as desert, for thi that ther ys not that thurȝ passe? And the Lord seide, For thei forsoken my lawe, that I ȝaf to them, and thei herden not my vois, and thei ȝide not in yt; and ȝiden awei after the shreudenesse of ther herte, and aftir Baalym, whom thei hadde lerned of ther fadris; therfore these thingus seith the Lord of ostus, God of Irael, Lo! I shal fede this puple with wrmod, and drinke Y shal ȝyue to them water of galle. And Y shal scatere them in Jentilis, that knewe not thei and the fadris of hem; and Y shal sende vpon hem swerd, to the tyme that thei be ful wastid. These thingus seith the Lord of ostus, God of Irael, Beholdeth, and clepeth weilende wymmen, and come thei; and to them that wise ben sendeth, and go thei forth. Heeȝe thei, and take thei to vp on vs mournyng; leden out oure eȝen teres, and oure eȝe lydis flowe thei doun with watris; for the vois of lamenting herd is fro Sion. What maner wastid wee ben, and confoundid hugely? for we han forsake the lond, for throwen doun ben oure tabernacles. Hereth therfore, ȝee wymmen, the wrd of the Lord, and taken to ȝoure eres the sermoun of his mouth; and techeth ȝoure doȝtris lamenting, and eche womman hir neȝhebore weiling. For steȝede vp deth bi ȝoure wyndowes, gon in is to ȝoure houses, to scatere the litle childer withoutforth, and the ȝunge men of the stretis. Spec, These thingus seith the Lord, And ther shal falle the dead careyn of man as drit vp on the face of the regioun, and as hey bihynde the bac of the mowere, and ther is not that gedere. These thingus seith the Lord, Glorie not a wis man in his wisdam, and glorie not a strong man in his strengthe, and glorie not a riche man in his richesses; but in this glorie he that glorieth, to witen and to knowe me, for I am the Lord, that do mercy and dom and riȝtwisnesse in erthe. These thingus forsothe plesen to me, seith the Lord. Lo! daȝes comen, seith the Lord, and Y shal visite vpon eche that hath the vtmost skyn of the ȝerde vncircumcidid; vp on Egipt, and vp on Juda, and vp on Edom, and vp on the sonus of Amon, and vp on Moab, and vp on alle tho that ben dodded in to the her, dwellende in desert; for alle Jentiles han the vtmost skyn of the ȝerde, al forsothe the hous of Irael ben vncircumcidid the herte.
Hereth the wrd that the Lord spac vp on ȝou, the hous of Irael. These thingus seith the Lord, Aftir the weies of Jentiles wileth not lerne, and fro the signes of heuene wileth not drede, that dreden Jentiles, for the lawis of puples ben veyne. For the tree of the wilde wode kut of the werc of the hondus of the craftes man in an hachet; with siluer and gold he enourneth it; with nailes and hameres ioynede it, that it be not losid atwynne. In licnesse of a formed ymage thei ben forgid, and thei shul not speke; born thei shul be taken awey, for thei moun not go; wileth not thanne drede them, for neither euele thei moun do, ne wel. Ther is not lic of thee, Lord; gret thou, and gret thi name in strengthe. Who shal not drede thee, O! thou king of Jentilis? thin is forsothe wrshipe among alle the wise men of Jentilis, and in alle the reumes of hem noen is lic of thee. Togidere vnwise men and foolis shul be preued, the doctrine of the vanyte of them a tree is with siluer enwrappid. Fro Tarsis it is broȝt, and the gold fro Ofir; the werc of the craftus man, and the hond of the metal werkere; iacynct, or as men seyn, violet blyw silc and purpre the clothing of them; the werc of craftus men alle these thingus. The Lord forsothe is verre God; he is God lyuende, and king euermor lastende; of his indignacioun shal be moued the erthe, and suffren shul not Jentiles his threting. Thus thanne ȝee shul sey to them, The goddis that maden not heuene and erthe, pershe thei fro the erthe, and fro these thingus that ben vnder heuene. That maketh the erthe in his strengthe, maketh redi biforn the world in his wisdam, and in his prudence streccheth out heuenus. At his vois he ȝyueth multitude of watris in heuene, and rereth vp litle cloudus fro the vtmostus of erthe; leitus in to reyn he maketh, and bringeth out wind of his tresores. Fool mad is eche man of his kunnyng, confoundid is eche craftes man in his grauen thing; for fals is that he ȝetede, and ther is not spirit in hem. Veyn thei ben, and the werc wrthi laȝhing; in tyme of ther visiting thei shul pershe. Lic is not to these the part of Jacob, who forsothe formede alle thingus he is, and Irael the ȝerde of his eritage; Lord of ostus name is to hym. Gedere fro the erthe thi confusion, that dwellist in seging; for these thingus seith the Lord, Lo! Y ferr shal throwe the dwelleris of the lond in this while; and troblen hem, so that thei be not founden. Wo to me vp on my to-treding, my werst veniaunce; I forsothe seide, Pleynli this myn infirmyte is, and Y shal bern it. My tabernacle is wastid, alle my litle cordis ben to-broke; my sonus wenten out fro me, and stonde not stille; ther is not that strecche out more my tent, and rere vp my skynnes. For folili diden shepperdis, and the Lord thei soȝten not; therfor thei vnderstode not, and eche floc of hem is scatered. Vois of heering lo! is comen, and gret stiring fro the lond of the north, that thei sette the cites of Juda in to wildernesse, and a dwelling place of dragounus. I wot, Lord, for of man is not his weie, ne of man is that he go, and riȝt reule hys goingus. Chastise me, Lord; ner the latere in dom and not in thi wodnesse, lest par auenture to noȝt thou bringe me. Heeld out thin indignacioun vp on Jentyles that knewen not thee, and vp on prouynces that thi name inwardli clepeden not; for thei eeten Jacob, and deuoureden hym, and wasteden hym, and his worshepe destroȝeden.
The wrd that is don to Jeremye of the Lord, seiende, Hereth the wrdus of this couenaunt, and speketh to the men of Juda, and dwelleres of Jerusalem; and thou shalt sey to them, These thingus seith the Lord God of Irael, Cursid the man that shal not here the wrdus of this couenaunt, that Y comaundede to ȝoure fadris, in the dai that Y ladde hem out fro the lond of Egipt, fro the irene furneys; seiende, Hereth my vois, and doth alle thingus that Y comaundide to ȝou, and ȝee shul be to me in to a puple, and Y shal be to ȝou in to a God; that Y rere the oth that Y swor to ȝoure fadris, me to ȝyue to them a lond flowende mylc and hony, as is this dai. And Y answerde, and seide, Amen, Lord. And the Lord seide to me, Crye out alle these wrdus in the cites of Juda, and withouteforth Jerusalem, seiende, Hereth the wrdus of this couenaunt, and doth them; for witnessende Y witnessede ȝoure faders, in the dai that Y ladde them out fro the lond of Egipte, vnto this day; erly risende Y witnessede, and seide, Hereth my vois. And thei herden not, ne boweden in ther ere, but wenten awei eche in to the shreudenesse of his euele herte; and Y broȝte in vp on hem alle the wrdus of this couenaunt, that Y comaundide that thei shulden do, and thei diden not. And the Lord seide to me, Ther is founde coniuracioun in the men of Juda, and in the dwelleris of Jerusalem; thei ben turned aȝeen to the rathere wickidnesses of ther faders, that wolden not here my wrdus; and these thanne aftir aliene goddis ȝiden awei, that thei serue to them; all voide maden the house of Irael and the hous of Juda my couenaunt, that Y couenauntede with ther faders. Wherfore these thingus seith the Lord, Lo! Y shal bringen in vp on hem eueles, of whiche gon out thei shul not moun; and thei shul crien to me, and Y shal not heren hem. And gon shul the cites of Juda and the dwelleris of Jerusalem, and crien to them, to whom thei offren; and thei shul not saue them in tyme of ther tormenting. After the noumbre forsothe of thi cites weren thi godis, Juda, and after the noumbre of thi weies, Jerusalem, thou settedest auteres of confusion, autres to offre to Balim. Thou thanne, wile thou not preȝe for this puple, and ne take thou too for them preising and orisoun; for Y shal not heren in the time of ther cry to me, in tyme of ther torment. What is, that my loued in myn hous doth many hidous giltus? whether hoeli flesh shul don awei fro thee thi malices, in whiche thou gloriest? An olyue plenteuous, fair, fructuous, semeli, clepede the Lord thi name; at the vois of the grete speche brende out fyr in it, and to-brend ben alle his busshy places. And the Lord of ostus that plauntede thee, spac vp on thee euel, for the euelus of the hous of Irael, and of the hous of Juda, that thei diden to themself, offrende to Balim, to terre me. Thou forsothe, Lord, hast shewid to me, and Y kneȝ; thou hast shewid to me the studies of hem. I as a debonere lomb, that is born to slayn sacrifise; and Y kneȝ not, for thei thoȝten vp on me counseil, seiende, Sende wee a tree in to his bred, and shaue wee hym out fro the lond of lyueres, and his name be no more membred. Thou forsothe, Lord of Sabaoth, that demest riȝtwisly, and prouest reenes and hertes, see Y thi veniaunce of them; to thee forsothe Y shewede my cause. Therfor these thingus seith the Lord to the men of Anatoth, that sechen my soule, and seyn, Thou shalt not profecien in the name of the Lord, and thou shalt not die in oure hondus. Therfor these thingus seith the Lord of ostus, Lo! Y shal visite vp on hem; ȝunge men shul die in swerd, the sonus of them and the doȝtris of them shul dien in hunger; and relikes shul not ben of hem; I shal leden in forsothe euel vp on the men of Anatoth, a ȝer of the visitynge of hem.
Riȝtwis forsothe thou art, Lord; if Y dispute with thee, nerthelatere riȝte thingus I shal speke to thee. Whi the weie of vnpitous men is maad welsum? Well is to alle that the lawe breken, and wickeli don? Thou hast plauntid hem, and roote thei senten; thei profiten, and maken frute; nyȝ thou art to the mouth of them, and aferr fro the reenes of them. And, thou, Lord, hast knowe me, seen me, and proued myn herte with thee. Gedere them as a floc to slayn sacrifise, and halewe them in the dai of slaȝter. Hou longe weilen shal the erthe, and the erbe of alle regioun shal be dried, for the malice of men dwellende in it? Wastid is the beste, and foul, for thei seiden, He shal not seen oure laste. If with foot men rennende thou trauailedest, hou shalt thou moun striue with hors? whan forsothe in the lond of pes siker thou were not, what shuldest thou do in the pride of Jordan? For whi and thi brethern and the hous of thi fader, also thei foȝten aȝen thee, and crieden after thee with pleyn vois; ne leeue thou hem, whan thei shul speke to thee goode thingus. I haue forsake myn hous, Y lafte myn eritage; Y ȝaf my loued soule in to the hondus of his enemys. Mad is to me myn eritage as a leoun in the wode; he ȝaf aȝen me a vois, and therfore Y hatede it. Whether a brid of dyuers coloures myn eritage to me? whether a brid died thurȝ out? Cometh, beth gedered, alle ȝee bestes of the erthe; haste ȝee to deuouren. Manye shepperdis wasteden my vyneȝerd, totreeden my part, ȝauen my desirable porcioun in to desert of wildernesse, putten it in to wasting, and it weilede vp on me; with desolacioun desolat is al the lond, for no man is that aȝeen thenke in herte. Vp on alle the weies of desert camen alle the wasteres of the lond, for the swerd of the Lord shal deuoure fro the vtmostus of the erthe vnto the vtmost of it; ther is not pes to alle flesh. Thei sewen whete, and repeden thornes; the erytage thei token, and to them it shal not profiten. Ȝee shul be confoundid of ȝoure frutus, for the wrathe of the wodnesse of the Lord. These thingus seith the Lord aȝen alle my werste neȝhebores, that touchen the eritage that Y delide to my puple Irael, Lo! Y shal pullen vp them fro ther lond, and the hous of Juda Y shal pullen vp fro the myddes of them. And whan Y shal pullen vp them, Y shal be turned, and han merci of them; and Y shal bringe them aȝeen, a man to his eritage, and a man to his lond. And it shal be, if taȝt men lerneden the weies of my puple, that thei swere in my name, Lyueth the Lord, as thei taȝten my puple to swern in Baal, thei shuln be bild vp in the myddel of my puple. That if thei schul not heren, Y shal pulle awei that folc with pulling awei and perdicioun, seith the Lord.
These thingus seith the Lord to me, Go, and haue to thee a lynene bregirdil; and put it vp on thi lendus, and in to water thou shalt not putten it in. And Y hadde the bregirdil, aftir the wrd of the Lord; and Y putte it aboute my lendus. And don is the wrd of the Lord the secounde tyme to me, seiende, Tac the bregirdil that thou haddest, that is aboute thi lendus; and risende go to Eufraten, and hid it there, in the hole of a ston. And Y ȝide, and hidde it in Eufraten, as comaundide to me the Lord. And don is after manye daȝes, seide the Lord to me, Ris, and go to Eufraten, and tac thennes the brigirdil, that I comaundide to thee, that thou shuldist hiden it there. And Y ȝide to Eufraten, and dalf out, and toc the bregirdil fro the place wher Y hadde hid it; and lo! rotid hadde the bregirdil, so that to noon vse it was able. And don is the wrd of the Lord to me, seiende, These thingus seith the Lord, Thus to roten Y shal make the pride of Juda, and the myche pride of Jerusalem, and this werste puple, that wile not here my wrdus, and gon in the shreudenesse of ther herte; and thei wenten after aliene godus, that thei serue to them, and honoure them; and thei shul be as this bregirdil, that to noon vse is able. As forsothe cleueth the brigirdil to the lendus of a man, so Y ioynede to me al the hous of Irael, and al the hous of Juda, seith the Lord, that thei were to me in to a puple, and in to name, and in to preising, and in to glorie; and thei herde not. Thou shalt seie therfore to them this wrd, These thingus seith the Lord God of Irael, Eche litil wyn vessel shal be fulfild with wyn. And thei shul sei to thee, Whether wee knowe not, that eche litil wyn vessel shal be fulfild with wyn? And thou shalt seyn to them, These thingus seith the Lord, Lo! Y shal fulfillen alle the dwelleris of this lond, and kingus that sitten of the stoc of Dauid vp on his trone, and prestus, and profetus, and alle the dwelleris of Jerusalem with drunkenesse. And Y shal scatere them, a man fro his brother, and faders and sonus togidere, seith the Lord; I shal not spare, and Y shal not graunte, ne han mercy, that Y scatere them not. Hereth, and with eres parceyueth; wileth not be rered vp, for the Lord spac. Ȝyueth to the Lord ȝoure God glorie, er it waxe derc, and er offenden ȝoure feet at the derc hillis; ȝee shul abide liȝt, and he shal putte it in to shadewe of deth, and in to mystynesse. That if this ȝee shul not heren, in hid shal wepe my soule fro the face of pride; wepende it shal wepe, and leden out shal myn eȝe tere, for taken is the floc of the Lord. Sei to the king, and to the lordshipende womman, Beth mekid, sitteth, for fro ȝoure hed shal go doun the croune of ȝoure glorie. The cites of the south ben closid, and ther is not that opene; translatid is al Juda with parfit transmygracioun. Rereth ȝoure eȝen, and seeth, that comen fro the north; where is the floc that is ȝoue to thee, thi noble feeld beste? What shalt thou seyn, whan he shal visite thee? thou forsothe hast taȝt them aȝeen thee, and lerned aȝen thin hed. Whether not sorewis caȝten thee, as a womman berende child? That if thou shalt sey in thin herte, Whi camen to me these thingus? for the multitude of thi wickenesse opened ben thi more shamefast thingus, defoulid ben thi foot solis. Yf chaunge mai an Ethiope his skyn, or a parde his dyuersetes, and ȝee shul moun wel do, whan ȝee han lerned euel. And Y shal sowe them abrod, as stobil that with the wynd is raueshid in desert. This thi lot, and the part of thi mesure of me, seith the Lord; for thou forȝeete me, and trostedist in lesing. Wherfore and Y nakenede thin hipes aȝen thi face, and aperede thi shenshepe, thi vouteries, and thi neȝingus, the hidous gilte of thi fornycacioun vpon hillis; in the feeld Y saȝ thin abhominaciouns. Wo to thee, Jerusalem, thou shalt not be clensid after me; how longe ȝyt?
That don is the wrd of the Lord to Jeremye, of the wrdis of droȝte. Weilede Jewerie, and his ȝatus fellen doun, and ben dercned in the erthe, and the cri of Jerusalem steȝede vp. The more senten ther lasse to water; thei camen to drawe, and thei founde not water, thei beeren aȝeen ther vesselis voide; thei ben confoundid and tormentid, and thei couerden ther hedis for the wastite of the lond, for ther cam not reyn in erthe. Confoundid ben the erthe tilieres, thei couereden ther hedis. For whi and the hynde in the feld bar, and lafte hir frutes, for ther was not erbe; and the feeld asses stoden in roches, and drowe wind as dragounes; ther eȝen faileden, for ther was not erbe. Yf oure wickenesses schul answere to vs, Lord, do for thi name, for manye ben oure turnyngys awei; to thee wee han synned. Thou biding of Irael, his saueour in tyme of tribulacioun, whi as a comeling tiliere thou art to come in the lond, and as weie goere bowende doun to dwelle? whi art thou to come as a man vagaunt, as a strong man that mai not saue? Thou forsothe in vs art, Lord, and thin hoely name is inwardly clepid vp on vs; ne forsake thou vs. These thingus seith the Lord to this puple, that louede to moue ther feet, and restede not, and to the Lord pleside not; now recorden he shal wickidnesses of them, and visite synnes of them. And the Lord seide to me, Wile thou not preȝe for this puple in to good. Whan thei shul faste, Y shal not here ther preȝeres; and if thei offre brent sacrifises and slayn sacrifises, I shal not take them, for with swerd and hunger and pestilence Y shal waste them. And Y seide, A! A! A! Lord God, ther profetus seyn to them, Ȝee shul not see swerd, and hunger in ȝou shal not be, but verre pes he shal ȝyue in this place. And the Lord seide to me, Falsly the profetus profecien in my name; I sente them not, and comaundide not to them, ne spac to them; a lying viseoun, and a gilesum deuynyng, and the deseit of ther herte thei profecien to ȝou. Therfore these thingus seith the Lord of the profetus that profecien in my name, whom Y sente not, seiende, Swerd and hungir shal not be in this lond; In swerd and hunger shul be to-wastid tho profetus. And puples, to whom thei profecieden, shul be throwen aferr in the weies of Jerusalem, for hungir and swerd, and ther shal not ben, that birie them; thei and the wyues of them, sonus and doȝtris of them; and Y shal heelden out vp on hem ther euel. And thou shalt sei to them this wrd, Leden doun myn eȝen ter by nyȝt and dai, and be thei not stille, for with gret to-treding totreden is the maiden doȝter of my puple, hugeli with the werste veniaunce. If Y shul gon out to the feeldus, loo! the slayn with swerd; and if Y shul go in to the citee, lo! the to-wastid with hunger; the profete forsothe and prest ȝiden awei in to the lond that thei knewe not. Whether throwende aferr thou threwe awei Judam, or thi soule wlatede Sion? whi thanne hast thou smyten vs, so that ther is noon helthe? Wee han abide pes, and ther is not good; and tyme of curing, and lo! disturbing. Wee han knowe, Lord, oure vnpitousnesses, and the wickenesses of oure faders, for wee han synned to thee. Ne ȝyue thou vs in to repref, for thi name, ne do thou to vs repref; of the see of thi glorie recorde, ne al voide make thou thi pes couenaunt with vs. Whether ben in grauen thingus of Jentilis that reynen, or heuenus moun ȝyue wederes? whether not thou art Lord oure God, whom wee han abide? Thou forsothe didist alle these thinges.
And the Lord seide to me, If Moises shulde stonde, and Samuel bifor me, my soule is not to this puple; throȝ out them fro my face, and go thei out. That if thei shul sey to thee, Whider shul wee go out? thou shalt sei to them, These thingus seith the Lord, Who to deth, to deth, and who to swerd, to swerd, and who to hunger, to hunger, and who to caitifte, to caytifte. And Y shal visete vp on hem foure spices, seith the Lord; swerd to slaȝter, and houndis to tern, and foules of heuene, and bestus of erthe to deuouren and wasten. And Y shal ȝyue them in to gret hete to alle reumes of erthe, for Manassen, the sone of Ezechie, king of Juda, vpon alle thingus that he dide in Jerusalem. Who forsothe shal han merci of thee, Jerusalem, or who shal sorewe for thee, or who shal go to preȝe for thi pes? Thou hast forsake me, seith the Lord, bacward thou ȝidist awei; and I shal strecchen out myn hond vp on thee, and sle thee; I trauailede preȝende. And Y shal scatere them with a fan in the ȝatus of the lond; I sloȝ, and loste my puple, and nerthelatere fro ther weies thei be not turned aȝeen. Multiplied ben to me his widewes vp on the grauel of the se; and Y broȝte in to them vp on the moder of the ȝunge waxen a wastere in mydday, Y sente vp on the cites feerli ferd. Feblid ys she that bar seuene, failede hire soule; fel doun to hir the sunne, whan ȝit to hir was day. Confoundid she is, and ful out shamede; and hir remnauntus in to swerd Y shal ȝyue in the siȝte of hir enemys, seith the Lord. Wo to me, my moder; whi geete thou me, a man of strif, a man of discord in eche lond? I vsurede not, ne to me vsurede any man; alle cursen to me. Seith the Lord, if not thi relikes in to good, if Y aȝen cam not to thee in tyme of affliccioun, and in tyme of tribulacioun and of anguysh, aȝen the enemye. Whether shal be ioyned iren to iren fro the north, and bras? Thi richesses and thi tresores in to taking awei Y shal ȝyue freely, in alle thi synnes, and in alle thi termes. And I shal bringe thin enemys fro the lond that thou knowist not; for fyer tend vp is in my wodnesse, vp on ȝou it shal brenne. Thou wost, Lord, recorde thou of me, and visite me, and delyuere me fro them that pursuen me; wile thou not in thi pacience take me, wite thou, for for thee Y suffrede repref. Found ben thi wrdys, and Y eet hem; and don is to me thi wrd in to ioȝe, and in to gladnesse of myn herte; for inwardli clepid is thi name vp on me, Lord God of ostis. I sat not in counseil of pleieres, and gloriede fro the face of thin hond; alone I sat, for of bitternesse thou hast fulfild me. Whi mad is my sorewe perpetuel, and my wounde despeirable forsoc to be cured? mad she is to me, as lesing of vnfeithful watris. For this these thingis seith the Lord, Yf thou art conuertid, Y shal conuerte thee, and befor my face thou shalt stonde; and if thou seuere precious thinge fro foul, as my mouth thou shalt be; thei shul be conuertid to thee, and thou shalt not be conuertyd to them. And I shal ȝyue thee to this puple in to a strong brasene wal, and thei shul fiȝte aȝen thee, and thei shul not han the maistry; for I am with thee, that I saue thee, and delyuere thee, seith the Lord. And Y shal delyuere thee fro the hond of the werst men, and aȝeen bie thee fro the hond of stronge men.
And don is the wrd of the Lord to me, seiende, Thou shalt not take a wif, and ther shul not be to thee sonus and doȝtris in this place. For these thingus seith the Lord vp on sonus and doȝtris, that ben goten in this place, and vp on the moders of them, that geeten them, and vp on the faders of hem, of whos stoc thei ben born in this lond. With dethes of siknyngus thei shul die, thei shul not be weilid, ne ben biried; in to a dunghil vp on the face of the erthe thei shul be, and with swerd and hunger thei shul be wastid; and be shal the careyn of them in to mete to the foulis of heuene, and to the bestes of erthe. These thingus forsothe seith the Lord, Thou shalt not gon in to the hous of the feste, ne go to weilen, ne coumforte thou them; for Y haue taken awey my pes fro this puple, seith the Lord, mercy and mercy doyngis. And dien shul the grete and the litle in this lond; thei shul not be biried, ne be weilid; and thei shul not kutte themself, ne ballidnesse shal ben do for hem. And thei shul not breke among hem bred to the weilende, to coumforte vp on the deade, and thei shul not ȝyue to them drinc of the chalis, to coumforten vp on ther fadir and modir. And the hous of feste thou shalt not gon in, that thou sitte with them, and ete, and drinke. For these thingus seith the Lord of ostus, God of Irael, Lo! Y shal don awey fro this place, in ȝoure eȝen and in ȝoure daȝes, vois of ioȝe, and vois of gladnesse, and vois of man spouse, and vois of womman spouse. And whan thou hast told to this puple alle these wrdus, and thei sey to thee, Whi spac the Lord vp on vs al this grete euel? what oure wickenesse, and what oure synne that wee han synned to the Lord oure God? thou shalt sey to them, For forsoken me ȝoure fadris, seith the Lord, and ȝiden awei aftir aliene goddis, and serueden to them, and honoureden hem, and me forsoken, and my lawe kepten not. But and ȝee wers wroȝten than ȝoure fadris; lo! forsothe eche goth after the shreudenesse of his euel herte, that me he here not. And Y shal caste ȝou out fro this lond, in to the lond that ȝee and ȝoure fadris knowe not; and ȝee shul serue there to alien goddis dai and nyȝt, that shul not ȝiue to ȝou reste. Therfore lo! daȝes comen, seith the Lord, and it shal be no mor seid, Lyueth the Lord, that ladde out the sonus of Irael fro the lond of Egipt; but lyueth the Lord, that ladde out the sonus of Irael fro the lond of the north, and fro alle londus to whiche I caste them out; and Y shal bringe them aȝeen to ther lond that I ȝaf to the fadris of them. Lo! Y shal senden many fissheres, seith the Lord, and thei shul fisshen hem; and after these thingus I shal sende to them manye hunteres, and thei shul hunte them fro eche mounteyn, and fro eche hil, and fro the caues of stones. For myn eȝen vp on alle the weies of them; thei ben not hid fro my face, and hid was not the wickenesse of them fro myn eȝen. And Y shal ȝelde first the double wickenesses and the synnes of hem, for thei defouleden my lond in dead smyten thingus of ther maumetus, and with ther abhominaciouns thei fulfilden myn heritage. Lord, my strengthe, and my stalwrthenesse, and my refute in the dai of tribulacioun, to thee Jentiles shuln come fro the vtmostus of erthe, and seyn, Vereli lesing weldeden oure fadris, vanyte that to them profitede not. Whether a man shal maken to hym goddis? and thei ben not goddis. Therfore lo! Y shal shewe to them bi this while, I shal shewe to them myn hond and my vertue; and thei shul wite, for name to me is Lord.
The synne of Jude writen is with an irene pointel, in an adamantyne nail, grauen out vp on the brede of ther herte, and in the hornes of their auteres. Whan recorde shul the sonus of them of ther auteres, and of ther maumet wodus, and of ther braunching trees in heeȝe mounteynes, sacrifiende in the feld, thi strengthe and alle thi tresores in to taking awei Y shal ȝyue, thin heeȝe thingus for the synnes in alle thi coestes. And thou shalt be forsake alone of thin eritage that Y ȝaf to thee; and to seruen Y shal make thee to thin enemys, in the lond that thou knewest not; for fyr thou brendist vp in my wodnesse, vnto euermor it shal brenne. These thingus seith the Lord, Cursid the man that trostith in man, and putteth flesh his arm, and fro the Lord his herte goth awei. Forsothe it shal ben as iencian trees in desert, and he shal not see, whan shal come good; but he shal dwelle in droȝte in desert, in the lond of briyn, and vnabitable. Blessid the man that trosteth in the Lord, and the Lord shal ben his trost. And he shal be as a tree, that is ouer plauntid vp on watris, that at the humour sendith his rootes; and he shal not drede, whan shal come gret hete; and his lef shal be grene, and in tyme of droȝte shal not be bysy, ne any tyme shal cese to make frut. Shreude is the herte of man, and vnserchable; who shal knowen it? I the Lord serchende herte, and prouende reenes, that ȝyue to eche man after his weie, and after the frut of his findingus. The partrich nurshede that she bar not, made richesses, and not in dom; in the myddil of ther daȝes she shal forsake them, and in hir laste she shal ben vnwis. The dignete see of glorie of heiȝte fro the bygynnyng, place of oure halewing, abiding of Irael. Lord, alle that thee forsaken, shul be confoundid; goende awei fro thee in the erthe shul be writen, for thei forsoken the veyne of lyuyng watris, the Lord. Hele me, Lord, and Y shal ben helid; saf mac me and Y shal be saf; for my preising thou art. Lo! thei seyn to me, Wher is the wrd of the Lord? come it. And Y am not disturbid, thee shepperde folewende, and the dai of man I disirede not, thou wost. That that is gon out fro my lippis riȝt in thi siȝte was. Be thou not to me to ferd; myn hope thou in the dai of tormenting. Be thei confoundid, that me pursuen, and confoundid be not Y; inwardly drede thei, and inwardly drede not Y; bring in vp on hem dai of tormenting, and with double to-treding to-tred hem. These thingus seith the Lord God to me, Go, and stond in the ȝate of the sonus of the puple, bi whiche gon in kingus of Juda and gon out, and in alle the ȝatus of Jerusalem. And thou shalt sei to them, Hereth the wrd of the Lord, ȝee kingus of Juda, and al Jewerie, and alle the dwelleris of Jerusalem, that gon in bi these ȝatus. These thingus seith the Lord God, Kepeth ȝoure soules, and wilith not berthenus bern in the dai of sabat, ne bringe ȝee in bi the ȝatus of Jerusalem. And wileth not caste out burthenus fro ȝoure houses in the dai of sabat, and eche werc ȝee shul not do; halewith the day of sabat, as Y comaunde to ȝoure fadris. And thei herden not, ne boweden in ther ere, but inwardly hardeden ther nol, lest thei herde me, and lest thei toke discyplyne. And it shal be, if ȝee shul heren me, seith the Lord, that ȝee bringe not in birthenus bi the ȝatus of this cite in the day of sabat, and if ȝee halewe the dai of sabat, that ȝee don not in it alle werc, gon in shul bi the ȝates of this cite kingus and princes sittende vpon the see of Dauid, and steȝende vp in chares and hors; thei, and the princes of them, men of Juda, and the dwelleris of Jerusalem; and dwellid shal be this cite in to euermor. And comen shul fro the cite of Juda, and fro the cumpas of Jerusalem, and fro the lond of Beniamyn, and fro the wilde feldus, and fro the mountuous places, and from the south, berende brent sacrifise, and slayn offring, and sacrifise, and encens; and thei shul bringe in offring in to the hous of the Lord. If forsothe ȝee shul not here me, that ȝee halewe the day of sabat, and that ȝee bere not berthene, and ne bringe in bi the ȝatus of Jerusalem in the dai of sabat, Y shal tende vp fyr in his ȝatus; and it shal deuoure the housys of Jerusalem, and shal not be quenchid.
The wrd that don is to Jeremye fro the Lord, seiende, Ris, and cum doun in to the hous of the crockere, and there thou shalt here my wrdis. And Y cam doun in to the hous of the crockere, and lo! he made a werc vp on a whel. And scatered is the vessel, that he made of clei with his hondus; and turned he made that vessel other, as it pleside his eȝen that he shulde make. And don is the wrd of the Lord to me, seiende, Whether as maketh this crockere, shal not Y moun make to ȝou, hous of Irael? seith the Lord. Lo! as the cley in to the hond of the crockere, so ȝee in myn hond, the hous of Irael. Sodeynli Y shal speke aȝen folc, and aȝen reume, that Y drawe vp bi the roote, and destroȝe, and scatere it. If penaunce shul do that folc of his euel, for whiche I spac aȝen it, don shal and Y othenking vp on the euel, that Y thoȝte that I shulde do to it. And sodeynli Y shal speken of the folc, and of the rewme, that Y bilde vp, and plaunte in it. If it shul don euel in myn eȝen, that it here not my vois, othinking Y shal do vp on the good that Y spac, that Y shulde do to it. Now thanne sei to the man of Jewerie, and to the dwellere of Jerusalem, seiende, These thingus seith the Lord, Lo! Y make aȝen ȝou euel, and thenke aȝen ȝou thenking; be turned aȝeen eche fro his euel weie, and right reulith ȝoure weies and ȝoure studies. The whiche seiden, Wee han dispeired, after oure thoȝtus forsothe wee shul go, and eche aftir the shreudenesse of his euel herte wee shul do. Therfore these thingus seith the Lord, Asketh folc of kinde, who herde such orrible thingus, the whiche to myche dide the maiden Irael? Whether of the ston of the feld shal faile the snoȝ of Liban? or ben pullid awei moun watris brekende out, colde and ful myche flowende doun? For forȝat me my puple, in veyn offrende licoures, and stumblende in ther weies, and in the styes of the world, that thei go bi them in a weye not berdid; that be mad the lond of hem in to desolacioun, and in to whistling euere durende; eche forsothe that passeth bi it, shal become stoneid, and mouen his hed. As a brenende wind Y shal scatere them bifor the enemy; bac and not face Y shal shewe to them, in the dai of perdicioun of hem. And thei seiden, Cometh, and thenke wee aȝen Jeremye thoȝtus; forsothe pershe shal not the lawe fro the prest, ne counseil fro the wise man, ne sermoun fro the profete; cometh, and smyte wee hym with tunge, and take wee not heed to alle the sermouns of hym. Tac heed, Lord, to me, and here the vois of myn aduersaries. Whether ȝolden is for good euel, for thei deluen a dich to my soule; recorde, that Y stod in thi siȝt, that I schuld speke for them good, and turne awei thin indignacioun fro them. Therfore ȝif the sonus of them in to hunger, and bring doun hem in to the hondus of swerd; mad be the wifes of them withoute free childer, and widewes, and the men of hem be slayn with deth; the ȝunge of them be thei stikid with swerd in bataile. Herd be the cri fro the houses of them, thou shalt bringe to forsothe vp on hem a thef sodeynly; for thei doluen a dich that thei take me, and grynes thei hidden to my feet. Thou forsothe, Lord, wost al the counseil of hem aȝen me in to deth; ne be thou plesid to the wickidnesse of them, and the synne of hem fro thi face be not don awei; be thei mad togidere fallende in thi siȝt, in tyme of thi wodnesse; awei fro good vse them.
These thingus seith the Lord, Go, and tac the erthene litil wyn vessel of the crockere, and fro the elderes of the puple, and fro the elderes of the prestus. And go out to the valei of the sonus of Ennon, that is biside the entre of the britil ȝate; and thou shalt preche there wrdys that Y shal speke to thee; and seyn, Hereth the wrd of the Lord, ȝee kingus of Juda, and dwelleris of Jerusalem. These thingus seith the Lord of ostus, God of Irael, Lo! Y shal bringe in tormenting vp on this place, so that eche that shal heren it, tyncle hys eres. For thi that thei forsoke me, and alien maden this place, and offreden to alien godis, in that that knewen not thei, and ther faders, and the kingis of Juda; and fulfilden this place with blod of innocentus, and bilden vp the heȝe thingus of Baalym, to ben brent ther sonus with fyr, in to brent sacrifise to Balim; whiche thingus Y comaundide not, ne spac, ne steȝede vp in to myn herte. Therfor seith the Lord, Lo! daȝes comen, and clepid shal no mor be this place Tofeth, and the valei of the sone of Ennon, but the valei of slaȝter. And Y shal scatere the counseil of Jude and of Jerusalem in this place, and Y shal turne them vpsodoun with swerd, in siȝte of ther enemys, and in the hond of men sechende ther lyues; and Y shal ȝyue the careynes of them mete to the foules of heuene, and to the bestus of erthe. And Y shal sette this cite in to stoneyng, and in to whistling; and eche that shal passe by it, shal stoneyn, and whistlen vp on al the veniaunce of it. And Y shal fede them with the flesh of ther sonus, and with the flesh of ther doȝtris; and eche the flesh of his frend shal ete in segyng and in anguysh, in whyche close them shul ther enemys, and that sechen their lyues. And thou shalt to-brose the litle wyn vessel in the eȝen of the men, that shul go with thee. And thou shalt sei to them, These thingus seith the Lord of ostus, Thus Y shal tobrose this puple, and this cyte, as is tobrosid the vessel of the crockere, that mai no more be restored; and in Tofeth thei shul ben biried, for ther is not other place to birie in. So Y shal do to this place, seith the Lord, and to his dwelleris, that Y sette this cite as Tofeth. And ben shul the houses of Jerusalem, and the houses of the kingus of Juda, as the place Tofeth; vnclene alle the houses, in whos rooues thei sacrifieden to al the knyȝthed of heuene, and offreden sacrifise of licoures to alien godus. Cam forsothe Jeremye fro Tofeth, whider hadde sent hym the Lord to profecien; and stod in the porche of the hous of the Lord, and seide to al the puple, These thingus seith the Lord of ostes, God of Irael, Lo! Y shal bringen in vp on this cite, and vp on alle his cheef citees, alle the euelis that Y spac aȝen it; for thei inwardly hardeden ther nolles, and herde not my sermouns.
And ther herde Fassur, the sone of Emyner, prest, that was ordeyned prince in the hous of the Lord, Jeremye profeciende these sermownus. And Fassur smot Jeremye, profete, and putte hym in to the stockes, that was in the ouere ȝate of Beniamyn, in the hous of the Lord. And whan it hadde liȝtid in to the moru, Fassur ladde out Jeremie out of the stockus. And Jeremye seide to hym, Not Fassur clepede the Lord thi name, but Inwardli ferd on eche side. For these thingus seith the Lord, Lo! Y shal ȝyue thee in to inward ferd, thee and alle thi frendus, and to gidere thei shul falle with the swerd of ther enemys; and thin eȝen shul see; and al Juda Y shal ȝyue in the hond of the kyng of Babiloyne, and he shal ouer lede them in to Babiloyne, and smyte them with swerd. And Y shal ȝyue al the substaunce of this cite, and al his trauaile, and al the pris; and al the tresores of the king of Juda I shal ȝyue in the hond of the enemys of them; and they shul reue them, and taken, and bringe them in to Babyloyne. Thou forsothe, Fassur, and alle the dwelleris of thin hous, shul gon in to caitifte; and in to Babyloyne thou shalt come, and there thou shalt die; and there thou shalt be biried, and alle thi frendus, to whyche thou profeciedist lesing. Thou leddest me a syde, Lord, and Y am lad aside; strengere than Y thou were, and thou haddest the maistrie; I am mad in to scorn al day. Alle scorneden me, for now ȝore Y speke, criende out the wickidnesse, and the wastite I ofte crie. And don is the sermoun of the Lord to me in to repref, and in to scornyng al day. And Y seide, I shal not recorden of it, ne speke more in the name of hym. And mad it is in myn herte, as fyr gretly hetende, and closid in my bones; and Y failede, to bern not sustenende. I herde forsothe the wrong blamyngus of manye, and the ferd in enuyroun, Pursueth, and pursue wee hym, of alle men that weren my pesible, and kepende my side; if any maner he be bigilid, and wee haue the maistri aȝen hym, and wee gete veniaunce of hym. The Lord forsothe is with me as a strong fiȝtere, therfor that pursuen me shul falle, and syc shul be; and thei shul be shent hugeli, for thei vnderstoden not the euere durende repref, that neuer shal be don awei. And thou, Lord of ostus, prouere of the riȝtwis, that seest the reenes and the herte, see I, Y beseche, thi veniaunce of hem; to thee forsothe Y shewide my cause. Syngeth to the Lord, preiseth the Lord, for he hath delyuered the soule of the pore fro the hond of euelis. Cursid the dai in the whiche Y am born, the dai in whiche bar me my moder, be not blessid. Cursed the man, that tolde to my fader, seiende, Born is to thee a knaue child, and as with ioȝe gladide hym. Be that man as ben the cites, that the Lord turnede vpsodoun, and it othoȝte hym not; here he cry erly, and ȝelling in mydday tyme, that me sloȝ not fro the priue wombe; that mad were to me my moder a sepulcre, and hir priue wombe conceyuyng euerlastende. Whi fro the priue wombe Y ȝide out, that Y shulde seen trauaile and sorewe, and wast ben in confusioun my daȝes?
The wrd that don is to Jeremye fro the Lord, whan sente to hym king Sedechie Fassur, the sone of Melchie, and Sofonye, the sone of Masie, prest, seiende, Aske for vs the Lord, for Nabugodonosor, king of Babiloyne, fiȝteth aȝen vs; if par auenture the Lord do with vs after alle his merueyles, and he go awei fro vs. And Jeremye seide to them, Thus ȝee shul sey to Sedechie, These thingus seith the Lord God, Lo! Y shal turne the vesselis of the bataile that in ȝoure hondus ben, and with whom ȝee fiȝten, aȝen the king of Babiloyne, and Caldeis, that besegen ȝou in cumpas of the wallis; and Y shal gedere them in the myddes of this cite. And Y shal ouercome ȝou in a straȝt out hond, and in a strong arm, and in wodnesse, and in indignacioun, and in gret wrathe; I shal smyte the dwelleris of this cite, men and bestus with gret pestylence shul dien. And after these thingus, seith the Lord, Y shal ȝyue Sedechie, king of Juda, and his seruauns, and his puple, and that ben laft in this cite of pestylence, and swerd, and hunger, in the hond of Nabugodonosor, king of Babiloyne, and in the hond of ther enemys, and in the hond of men sechende ther lif; and he shal smyte them in mouth of swerd; and he shal not be bowid, ne sparen, ne han reuthe. And to this puple thou shalt sey, These thingus seith the Lord God, Lo! Y ȝyue bifor ȝou weie of lif, and weie of deth. Who shal dwelle in this cite, shal die with swerd, and hunger, and pestilence; who forsothe shul go out, and flee to the Caldeis that besegen ȝou, shal lyue, and be shal to hym his soule as spoile. Forsothe Y haue set my face vp on this cite in to euel, and not in to good, seith the Lord; in the hond of the king of Babiloyne it shal be ȝoue, and brenne it out he shal with fyr, and the hous of the king of Juda. Hereth the wrd of the Lord, ȝe the hous of Dauid. These thingus seith the Lord, Demeth erli dom, and delyuereth out the oppressed with force fro the hond of the wrong chalengere; lest par auenture go out as fir myn indignacioun, and be tend vp, and be not that quenche, for the malice of ȝoure studies. Lo! Y to thee, dwelleresse of the sadde valey and wilde feld, seith the Lord, ȝee that seyn, Who shal smyten vs, and who shal go in to oure houses? And Y shal visite vp on ȝou after the frute of ȝoure studies, seith the Lord; and Y shal tende vp fyr in his wilde wode, and deuoure it shal alle thingus in his cumpas.
These thingus seith the Lord, Cum doun in to the hous of the king of Juda, and thou shalt speke there this wrd, and seyn, Here thou the wrd of the Lord, thou king of Juda, that sittest vp on the see of Dauid, thou, and thi seruauntis, and thi puple, that gon in bi these ȝatus. These thingus seith the Lord, Doth dom, and riȝtwisnesse, and delyuereth the opressid bi force fro the hond of the wrong chalengere; and the comeling, and faderles child, and the widewe wileth not sorewen, ne opresseth wickeli, and the innocent blod ne shedeth out in this place. If forsothe doende ȝee shul do this wrd, gon in shul bi the ȝatus of this hous kingus sittende of the kinrede of Dauid vp on his trone, and the steȝing men vp chares and hors, thei, and seruauns, and the puples of them. That if ȝee shul not here these wrdus, in myself Y swor, seith the Lord, for in to wildernesse shal be this hous. For these thingus seith the Lord vp on the see of the king of Juda, Galaad, thou to me hed of Liban; yf Y shal not sette forth thee wildernesse, cheef citees vnabitable. And Y shal halewe vp on thee the sleende man, and his armes; and thei shul kutte doun thi chosen cedris, and throwe doun in to fyr. And passen shul manye Jentiles thurȝ this cite, and sei shal eche to his neȝhebore, Whi dide the Lord thus to this grete cite? And thei shul answern, For thi that thei forsoke the couenaunt of the Lord ther God, and honoureden alien godis, and serueden to them. Wileth not wepe the deade, ne weilen vp on hym with weping; weileth hym that goth out, for he shal no mor be turned aȝeen, ne seen he shal the lond of his birthe. For these thingus seith the Lord to Sellum, sone of Josie, king of Juda, that regnede for Josie, his fader, That is gon out fro this place, he shal not turne aȝeen hider more; but in the place to the whiche Y translatide hym, there he shal die, and this lond he shal see no more. Wo that bildeth vp his hous in vnriȝtwisnes, and his souping places not in dom; his frend he shal opresse in veyn, and his meede he shal not ȝelde to hym. The whiche seith, I shal bilde vp to me a large hous, and spacious souping places; that openeth to hym wyndowes, and maketh cedre couples, and peynteth with cynoper. Whether shalt thou regne, for thou licnest thee to a ceder? thi fader, whether he eet not, and dranc, and dide dom and riȝtwisnesse, thanne whan wel it was to hym? He demede the cause of the pore, and of the helpeles, in to his good; whether not therfor for he kneȝ me? seith the Lord. Thine forsothe eȝen and herte to auarice, and to innocent blod to be shed, and to wronge chalenge, and to the ending of euel werc. Therfore these thingus seith the Lord to Joachym, sone of Josie, king of Juda, Thei shul not weilen hym, Wo brother! and wo sister! thei shul not togidere trumpe to hym, Wo lord! and wo glorious! In the biriyng of an asse he shal be biried, roten, and throwen aferr out of the ȝatis of Jerusalem. Steȝ thou vp Liban, and crye, and in to Basan ȝif thi vois, and crie to the passeres, for to-trode ben alle thi loueres. I spac to thee in thi plenteuousnesse, and thou seidist, I shal not heren; this is thi weie fro thi waxende ȝouth, for thou herdist not my vois. Alle thi shepperdus wind shal fede, and thi loueres in to caitifte shul go; and thanne thou shalt be confoundyd, and shamen of al thi malice, that sittist in Liban, and nestlist in cedris. Hou togidere weiledist thou, whan comen hadde to thee sorewes, as sorewis of the trauailende with childe? I lyue, seith the Lord, for if shul be Jeconyas, the sone of Joachym, king of Juda, a ring in my riȝt hond, thennus I shal pullen hym awey. And Y shal ȝyue thee in the hond of men sechende thi soule, and in the hond of hem whos face thou dredist, and in the hond of Nabugodonosor, king of Babiloyne, and in the hond of Caldeis. And Y shal sende thee, and thi moder that gat thee, in to an alien lond, in whiche ȝee ben not born, and there ȝee shul die; and in to the lond to whiche thei reren ther soule, that thei turne aȝeen thider, and thei turne aȝeen shul not. Whether a britil vessel and a brosid this man Jeconyas? whether a vessel withoute al voluptuouste? Whi throwen awei ben he and his sed, and cast aferr in to the lond that thei knewe not? Erthe, erthe, erthe, here the sermoun of the Lord. These thingus seith the Lord, Writ this man a bareyn man, that in his daȝes shal not be welsum; ne forsothe ben shal of his sed a man, that sitte vp on the see of Dauid, and power haue more yn Juda.
Wo to the shepperdis, that scateren and to-tern the floc of my leswe, seith the Lord. Therfore these thingus seith the Lord God of Irael to the shepperdus, that feden my puple, Ȝee scatereden my floc, and threwen out hem, and han not visitid hem; lo! Y shal visite vp on ȝow the malice of ȝoure studies, seith the Lord. And Y shal gedere the remnauntus of my floc fro alle londis, to whiche Y shal caste hem out thider; and Y shal turne them to ther wilde feldus, and thei shul growe, and be multepliede. And Y shal rere vp on hem shepperdus, and thei shul fede them; thei shuln no mor ben aferd, ne inwardly dreden; and no man shal be soȝt of the noumbre, seith the Lord. Lo! daȝes comen, seith the Lord, and I shal rere Dauid a riȝtwis buriownyng; and regne he shal king, and wys he shal be, and don he shal dom and riȝtwisnesse in erthe. In tho daȝes saued shal ben Juda, and Irael shal dwelle trostili; and this is the name that thei shul clepen hym, Oure riȝtwis Lord. For this lo! daȝes comen, seith the Lord, and thei shul sei no more, The Lord lyueth, that ladde out the sonus of Irael fro the lond of Egipt; but, The Lord lyueth, that ladde out, and broȝte to the sed of the hous of Irael fro the lond of the north, and fro alle londus to the whiche Y hadde cast them oute thider; and thei shul dwelle in ther owne lond. To the profetus; To-brosid is my herte in the myddel of me, al to-trembleden alle my bonus; I am mad as a drunke man, and as a man drunken of wyn, fro the face of the Lord, and fro the face of his hoeli wrdus; for of auoutreres fulfild is the lond. For fro the face of cursing weilide the lond; dried ben the wilde feldus of desert, mad ys the cours of them euel, and the strengthe of hem vnlic. The profete forsothe and the prest ben defoulid; and in myn hous I fond the euel of hem, seith the Lord. Therfore the weie of hem shal be as slydery in dercnesses, thei shul be put doun forsothe, and falle togidere in it; for I shal bringe to vpon hem eueles, a ȝer of the visiting of them, seith the Lord. And in the profetis of Samarie Y saȝ folie, and thei profecieden in Baal, and disceyueden my puple Irael. And in the profetus of Jerusalem Y saȝ licnesse auoutreres, and weie of lesing; and thei coumforteden the hondus of werst men, that conuertid were not eche fro his malice; alle thei ben mad to me Sodome, and alle hyse dwelleris as Gomorre. Therfore these thingus seith the Lord of ostus to profetis, Lo! Y shal fede hem with wrmwed, and drunken hem with galle; fro the profetus forsothe of Jerusalem is gon out defouling vp on al erthe. These thingus seith the Lord of ostus, Wileth not heren the wrdus of the profetes, that profecien to ȝou, and desceyuen ȝou; the viseoun of ther herte thei speken, not of the mouth of the Lord. They seyn to them that blasfemen me, The Lord spac, Pes shal be to ȝou; and to eche that goth in the shreudnesse of his herte thei seiden, Ther shal not come vp on ȝou euel. Who forsothe was nyȝ in the counseil of the Lord, and saȝ, and herde the sermoun of hym? who biheeld his wrd, and herde? Lo! the whirlewind of the Lordus indignacioun shal gon out, and tempest brekende out vp on the hed of vnpitous men shal come. The wodnesse of the Lord shal not turne aȝeen, vnto the tyme that he do, and vnto the tyme that he fulfille the thenking of his herte. In hise laste daȝes ȝee shul vnderstonde his counseil. I sente not the profetes, and thei runnen; Y spac not to them, and thei profecieden. If thei hadden stonde in my counseil, and knowen hadden mad my wrdis to my puple, I shulde han turned awei hem forsothe fro ther euel weie, and fro ther werst thenkingus. Wenest thou, whether a Lord fro anyȝ Y am, seith the Lord, and not God fro afer? If hid shal be a man in hid thingus, and Y shal not seen hym? seith the Lord. Whether not heuene and erthe Y fulfille? seith the Lord. Y herde what thingus seiden profetus, profeciende in my name lesing, and seiende, Sweuenes Y sweuenede. Hou longe this is in the herte of profetes, profeciende lesing, and profeciende the begiling of ther herte? The whiche wiln make, that the puple forȝete of my name for ther sweuenes, whiche telleth eche to his neȝhebore, as forȝeeten ther fadris of my name for Baal. The profete that hath a sweuene, telle he the sweuene; and that hath my sermoun, speke he my sermoun verely. What to the chaf at the whete? seith the Lord. Whether not my wrdus ben as fyr brennende, seith the Lord, and as an hamer tobrekende the ston? Therfor lo! Y to the profetes, seith the Lord, that stelun my wrdus, eche fro his neȝhebore. Lo! Y to the profetys, seith the Lord, that taken to their tunges, and seyn, The Lord seith. Lo! Y to the profetys, sweuenende lesing, seith the Lord; that tolden them, and bigileden my puple in ther lesing, and in ther myracles, whan Y hadde not sent hem, ne beden hem; the whiche no thing profiteden to this puple, seith the Lord. If therfore shul aske thee this puple, or profete, or prest, seiende, What is the charge of the Lord? thou shalt sey to them, Ȝee ben the charge, forsothe Y shal throwe ȝou aferr, seith the Lord; and profete, and prest, and puple, that seith, The charge of the Lord, Y shal visite vp on that man, and vp on his hous. These thingus ȝee shuln seyn, eche to his neȝhebore, and to his brothir, What shal answern the Lord? and what spac the Lord? For the charge of the Lord no more shal abide, and charge shal be to eche man his wrd; and ȝee han mysturned the wrdus of lyuende God, Lord of ostus, oure God. These thingus thou shalt seyn to the profete, What answerde to thee the Lord? and what spac the Lord? If forsothe, The charge of the Lord, ȝee shul sey, for this these thingus seith the Lord, For ȝee seiden this sermoun, The charge of the Lord, and Y sente to ȝou, seiende, Wileth not seyn, The charge of the Lord; therfore lo! Y beryng shal take ȝou, and forsake ȝou, and this cite that Y ȝaf to ȝou, and to ȝoure fadris, fro my face. And Y shal ȝyue ȝou in to euermor repref, and in to euermor shenshipe, that neuer bi forȝetynge shal ben don awey.
The Lord shewede to me, and lo! two basketus ful of figus put bifor the temple of the Lord, aftir that Nabugodonosor, king of Babiloyne, translatede Jeconye, the sone of Joachym, king of Juda, and his princes, and the smyth, and his iueler fro Jerusalem, and broȝte them in to Babiloyne. And oe fraiel hadde good figus ful myche, as ben wont figys to be of the firste tyme; and the oe fraiel hadde euele figis ful myche, that myȝten not ben ete, for thi that thei weren euele. And the Lord seide to me, What seest thou, Jeremye? And Y seide, Figis, figes goode, goode gretli, and euele, euele gretly, that moun not be ete, forthi that thei ben euele. And don is the wrd of the Lord to me, seiende, These thingus seith the Lord, God of Irael, As these figis goode, so Y shal knowe the transmygracioun of Juda, that I sente fro this place in to the lond of Caldeis, in to good. And Y shal putte myn eȝen vp on hem to plesen, and Y shal bringe them aȝeen in to this lond; and Y shal bilde them vp, and not destroȝe, and plaunte them, and not pullen awei. And Y shal ȝyue to them an herte, that thei knowe me, for Y am a Lord; and thei shul be to me in to puple, and Y shal be to them in to a God, for thei shul turne aȝeen to me in al ther herte. And as the werst figus, that moun not ben ete, forthi that thei ben euele, these thingus seith the Lord, So Y shal ȝyue Sedechie, king of Juda, and his princes, and the remnaunt of Jerusalem, that abiden in this cite, and that dwellen in the lond of Egipt. And Y shal ȝyue them in to weri trauailing and tormenting to alle rewmes of erthe, in to repref, and in to parable, and in to prouerbe, and in to cursing, in alle places to whiche I caste out them. And I shal sende in hem swerd, and hunger, and pestilence, to the tyme thei be wastid from the lond that I ȝaf to them, and to their fadres.
The wrd that is don to Jeremye, of al the puple of Jude, in the ferthe ȝer of Joachym, sone of Josie, king of Juda, aftir that Jeconye is translatyd in to Babiloyne; it is the firste ȝer of Nabugodonosor, king of Babiloyne; that spac Jeremye, the profete, to al the puple of Juda, and to alle the dwelleris of Jerusalem, seiende, Fro the threttenthe ȝer of the regne of Josie, sone of Amon, king of Juda, vnto this dai, this is the thre and twentithe ȝer, don is the wrd of the Lord to me; and Y spac to ȝou, fro nyȝt risende and spekende, and ȝee herden not. And the Lord sente to ȝou alle his profetus seruauns, risende the morutid, and sendende, and ȝee herden not, ne boweden in ȝoure eres, that ȝee here; whan he shulde seyn, Turneth aȝeen, eche fro his euel weie, and fro ȝoure werste thoȝtus, and ȝee shul dwelle in the lond that the Lord ȝaf to ȝou, and to ȝoure fadris, fro the world and vnto the world. And wileth not gon aftir alien godis, that ȝee serue to them, and honoure them, ne me to wrathe ȝee terre, in the werkes of ȝoure hondus, and Y tormente ȝou not. And ȝee herden not me, seith the Lord, that me to wrathe ȝee terreden in the werkus of ȝoure hondus, in to ȝoure owne euel. Therfore these thingus seith the Lord of ostus, For thi that ȝee herden not my wrdus, lo! Y shal sende, and taken to alle the kinredus of the north, seith the Lord, and Nabugodonosor, king of Babiloyne, my seruaunt; and Y shal bringe them vp on this lond, and vpon his dwelleris, and vp on alle his naciouns, that in his cumpas ben; and Y shal slen hem, and sette them in to stoneyng, and in to whistling, and in to wildernesse euerdurende. And Y shal leese fro them vois of ioȝe, and vois of gladnesse, vois of the womman spouse, and vois of the man spouse, vois of the querne, and liȝt of the launterne. And ben shal al his lond in to wildernesse, and in to stoneyng; and seruen shuln alle these folkis to the king of Babiloyne seuenty ȝer. And whan shul be fulfild seuenti ȝer, Y shal visite vp on the king of Babiloyne, and vp on that folc, seith the Lord, the wickenesse of them, and vp on the lond of Caldeis, and putten it in to euermor wildernesses. And Y shal bringe vpon that lond alle my wrdus that Y spac aȝen it, al that ys write in this boc; what euere thingus profeciede Jeremye aȝen alle Jentilis; for they serueden to them, whan thei weren many Jentiles, and grete kingus; and Y shal ȝelde to them after ther werkes, and aftir the deedus of ther hondus. For thus seith the Lord of ostus, God of Israel, Tac the chalis of the wyn of this wodnesse fro myn hond, and thou shalt heelde drinc of it to alle Jentilis, to whiche Y shal senden thee. And thei shul drinke, and be disturbid, and waxe wod fro the face of the swerd, that Y shal sende among hem. And Y toc the chalis of the hond of the Lord, and Y helde oute drinc to alle Jentilis, to whiche sente me the Lord; to Jerusalem, and to alle the cites of Juda, and to his kingus, and to his princes; that Y shulde ȝyue them in to wildernesse, and in to stoneyng, and in to whistling, and in to cursing, as is this dai; to Farao, king of Egipt, and to his seruauns, and to his princes, and to al his puple; and to alle men ienerali, to alle kingus of erthe of the est kuntree, that is clepid Hus, or Ansitidis, and to alle kingus of the lond of Filisteym, and of Ascalon, and of Gaze, and of Accharon, Ydume, Asote, and to othere; and to Moab, and to the sonus of Amon; and to alle kingus of Tiri, and to alle kingus of Sidon, and to kingus of the lond of iles that ben biȝunde the se; and to Dedan, and to Theman, and to Bus, and to alle that ben dodded in to the her; and to alle kingus of Arabie, and to alle kingis of the west, that dwellen in desert; and to alle kingus of Samri, and to alle kingus of Elam, and to alle kingus of Medus; and to alle kingus of the north, and fro nyȝ and fro aferr, to eche aȝen his brother; and to alle reumes of erthe, that ben vp on his face; and king Cesac shal drinke aftir hem. And thou shalt sei to them, These thingus seith the Lord of ostus, God of Irael, Drinketh, and beth drunken, and vometh, and falleth, and wileth not rise fro the face of the swerd that Y shal sende among ȝou. And whan thei wiln not take the chalis fro thin hond, that thei drinke, thou shalt sei to them, These thingus seith the Lord of ostus, Drinkende ȝee shul drinke; for lo! in the cite in whiche is inwardliche clepid my name, Y bigynne to tormente, and ȝee as ynnocentus harmles shul be? ȝee shul not ben harmlis, forsothe I clepe a swerd vp on alle dwelleris of erthe, seith the Lord of ostus. And thou shalt profecien to them alle these wrdus, and sei to them, The Lord fro an hiȝ shal rore, and fro his hoeli dwelling place shal ȝyue his vois; rorende he shal roren vp on his fairnesse; a merie faring song, as of men tredende in presses, shal be sunge togidere aȝen alle the dwelleris of erthe. The soun ful cam vnto the vtmostus of erthe, for dom to the Lord with Jentylis, he is demed with alle flesh; vnpitous men I toc to swerd, seith the Lord. These thingus seith the Lord of ostus, Lo! tormenting shal gon out fro folc in to folc, and a gret whirlewind shal gon out fro the ouermostus of erthe. And ther shul be the slayne of the Lord in that day fro the ouermost of erthe vn to the ouermost of it; thei shul not be weilid, ne be gedered, ne be biried; in to a dunghil vp on the face of the erthe thei shul lyn. Ȝelleth, ȝee shepperdus, and crieth, and sprengeth ȝou with askes, ȝee most wrshepeful of the floc; for fulfild ben ȝoure daȝes, that ȝee shul be slayn, and ȝoure scateringus, and ȝee shul falle as precious vesseles. And pershe shal fliȝt fro the shepperdus, and sauyng fro the best of the floc. Vois of the cri of shepperdus, and ȝelling of the best of the floc, for the Lord wastede the leswes of hem. And al stille weren the wilde feldis of pes, fro the face of the wrath of the wodnesse of the Lord. He forsoc as a leoun his tabernacle, for mad is the lond of hem in to desolacioun, fro the face of the wrathe of the culuer, and fro the face of the wrathe of the wodnesse of the Lord.
In the bigynnyng of the regne of Joachym, sone of Josie, king of Juda, don is this wrd fro the Lord, seiende, These thingus seith the Lord, Stond in the porche of the hous of the Lord, and thou shalt speke to alle the cites of Juda, whiche comen that thei honoure in the hous of the Lord, alle wrdus that I comaunde to thee, that thou speke to them; wile thou not withdrawen a wrd; if par auenture thei here, and be conuertid, eche fro his euel weie, and it othenke me of the euel that I thoȝte to do to them for the malices of ther studies. And thou shalt sei to them, These thingus seith the Lord, If ȝee shul not here me, that ȝe go in my lawe that Y ȝaf to ȝou, that ȝee here the sermounus of my seruauns, profetus, that Y sente to ȝou, the nyȝt risende, and riȝt reulende, and ȝee herde not; Y shal ȝyuen this hous as Cilo, and this cite I shal ȝyue in to cursing to alle folkus of erthe. And ther herden the prestus, and profetus, and al the puple Jeremye spekende these wrdus in the hous of the Lord. And whan fulfild hadde Jeremye spekende alle these thingus, that comaundid hadde to hym the Lord, that he shulde speke to al the puple, token hym the prestus, and the false profetus, and al the puple, seiende, Bi deth die he; whi profeciede he in the name of the Lord, seiende, As Cylo shal be this hous, and this cite shal be desolat, for thi that ther is not a dwellere? And gedered is al the puple aȝen Jeremye, in the hous of the Lord. And herden the princes of Juda alle these wrdis; and thei steȝeden vp fro the hous of the king in to the hous of the Lord, and thei seeten in the entre of the newe ȝate of the hous of the Lord. And speeken the prestus and the profetus to the princes, and to al the puple, seiende, Dom of deth is to this man, for he profeciede aȝen this cite, as ȝee han herd with ȝoure eres. And Jeremye seith to alle the princes, and to al the puple, seiende, The Lord sente me, that Y shulde profecien to this hous, and to this cite, alle the wrdus that ȝee han herd. Now thanne goode maketh ȝoure weies, and ȝoure studies, and hereth the voys of the Lord ȝoure God; and it shal othinke the Lord of the euel that he spac aȝen ȝou. I forsothe lo! in ȝoure hondis am; doth to me that good is and riȝt in ȝoure eȝen. Nerthelatere witeth, and wel knowith, that if ȝee shul sle me, an ynnocent blod ȝee shul betraȝe aȝen ȝou self, and aȝen this cite, and his dwelleris; in treuthe forsothe sente me the Lord to ȝou, that Y shulde speke in ȝoure eres alle these wrdus. And seiden the princes and al the puple to the prestys and profetus, Ther is not to this man dom of deth; for in the name of the Lord oure God he spac to vs. Risen thanne the men of the elderes of the lond, and seiden to al the cumpanye of the puple, spekende, Michie of Morasten was a profete in the daȝes of Ezechie, king of Jude; and he seith to al the puple of Jude, seiende, These thingus seith the Lord of ostus, Sion as a feeld shal ben ered, and Jerusalem in to an hep of stonus shal be, and the mount of the hous of the Lord in to heiȝtus of wodus. Whether bi deth condempnede hym Ezechie, king of Juda, and al Juda? Whether not thei dredden the Lord, and louli preȝeden the face of the Lord, and it othoȝte the Lord of the euel that he hadde spoke aȝen hem? And so do we not gret euel aȝen oure soules. Also ther was a man profeciende in the name of the Lord, Vrias, the sone of Semmei, of Cariathiarym; and he profeciede aȝen this cite, and aȝen this lond, aftir alle the wrdis of Jeremye. And herde king Joachym, and alle the myȝti men, and his princes these wrdus; and the king soȝte to slen hym; and Vrie herde, and dredde, and fleiȝ, and wente in to Egipt. And king Joachym sente men in to Egipt, Elnathan, the sone of Achabor, and men with him, in to Egipt; and broȝten out Vrie fro Egipt, and broȝten hym to king Joachym; and he smot hym with swerd, and threȝ aferr his careyne in sepulcris of the vnnoble comun. Therfore the hond of Aicham, sone of Safan, was with Jeremye, that he shulde not be take in to the hondus of the puple, and it schulde slen hym.
In the bigynnyng of the regne of Joachym, sone of Josie, king of Juda, don is this wrd to Jeremye fro the Lord, seiende, These thingus seith the Lord to me, Mac to thee bondis and cheynus, and thou shalt putte them in thi necke; and sende them to the king of Edom, and to the king of Moab, and to the king of the sonus of Amon, and to the king of Tiri, and to the king of Sidon, in the hond of the messageres that camen to Jerusalem, and to Sedechie, king of Juda. And thow shalt comaunde to them, that to ther lordys they speke, These thingus seith the Lord of ostys, God of Irael, These thingus ȝee shul sey to ȝoure lordus, I made erthe, and man, and bestus that ben vp on the face of al erthe, in my grete strengthe, and in myn arm straȝt out; and Y ȝaf it to hym that plesede in myn eȝen. And now also Y ȝaf alle these londus in the hond of Nabugodonosor, king of Babiloyne, my seruaunt; ferthermor and the bestus of the feld Y ȝaf to hym, that thei serue to hym. And serue shul to hym alle folc of kinde, and to his sone, and to the sone of his sone, to the tyme that come the tyme of his lond, and of hym; and seruen shul to hym manye folc of kinde, and grete kingus. Folc forsothe and rewme that serue shal not to Nabugodonosor, king of Babylonye, and whoso euere shal not bowe his necke vnder the ȝoc of the king of Babilonye, in swerd, and hunger, and pestilence Y shal visite vp on that folc, seith the Lord, to the tyme Y waste them in his hond. Ȝee forsothe wileth not heren ȝoure profetus, and deuynoures, and sweueneres, and brid deuyneres, and deuel cleperes, that seyn to ȝou, Ȝee shul not serue to the king of Babiloyne; for thei profecien to ȝou lesing, that aferr thei make ȝou fro ȝoure lond, and caste ȝou out, and ȝee pershe. But the folc that shal vnderleyn his nol vnder the ȝoc of the king of Babiloyne, and serue to hym, Y shal leuen it in his lond, seith the Lord; and yt shal tiln it, and dwelle in it. And to Sedechye, king of Juda, Y spac after alle these wrdus, seiende, Vnderleith ȝoure neckus vnder the ȝoc of the king of Babyloyne, and serueth to hym, and to his puple, and ȝee shul lyue. Whi shul ȝee die, thou and thi puple, with swerd, and hunger, and pestilence, as spac the Lord to the folc, that wile not serue to the king of Babiloyne? Wileth not heren the wrdus of profetys seiende to ȝou, Ȝee shul not serue to the king of Babiloyne; for lesing they speken to ȝou, for Y sente them not, seith the Lord; and thei profecien in my name liendely, that I throwe ȝou out, and ȝee pershe, bothe ȝee and the profetes that profecien to ȝou. And to the prestus, and to this puple I spac, seiende, These thingus seith the Lord God, Wileth not heren the wrdus of ȝoure profetus, that profecien to ȝou, seiende, Lo! the vesselis of the Lord shul turne aȝeen fro Babiloyne now soone; lesyng forsothe thei profecien to ȝou. Wileth not thanne heren hem, but serueth to the king of Babiloyne, that ȝee lyue; whi ȝouen ys this cite in to wildernesse? And if profetes thei ben, and the wrd of God is in hem, aȝeen come thei to the Lord of ostis, that come not the vesselis, that weren laft in the hous of the Lord, and in the hous of the king of Juda, and in Jerusalem, in to Babiloyne. For these thingus seith the Lord of ostus to the pileres, and to the se, and to the feet, and to the remnaunt of the vesselis, that laften in this cite, the whiche bar not Nabugodonosor, king of Babiloyne, whan he shulde translate Jeconye, the sone of Joachym, king of Juda, fro Jerusalem in to Babiloyne, and alle the best men of Juda and of Jerusalem. For these thingus seith the Lord of ostis, God of Irael, to the vesselus that ben laft in the hous of the Lord, and in the hous of the king of Juda, and in Jerusalem, In to Babiloyne thei shul be translatid, and there thei shul be vnto the dai of ther visitacioun, seith the Lord; and I shal make them to be broȝt to, and to ben restored to this place.
And don it is in that ȝer, in the bigynnyng of the regne of Sedechie, king of Juda, in the ferthe ȝer, in the fifte moneth, seide to me Ananye, the sone of Asur, a profete of Gabaon, in the hous of the Lord, befor the prestes, and al the puple, seiende, These thingus seith the Lord of ostus, God of Irael, I haue tobrosid the ȝoc of the king of Babiloyne. Ȝit two ȝer of daȝes, and Y shal make to be born aȝeen to this place alle the vesselis of the Lord, that toc Nabugodonosor, king of Babiloyne, fro this place, and translatede them in to Babiloyne. And Jechonye, the sone of Joachym, king of Juda, and al the transmygracioun of Juda, that wenten in to Babiloyne, Y shal turne to this place, seith the Lord; I shal to-trede forsothe the ȝoc of the king of Babiloyne. And Jeremye, the profete, seide to Ananye, the profete, in the eȝen of prestus, and in the eȝen of al the puple that stoden in the hous of the Lord. And Jeremie, the profete, seith to Ananye, Amen! thus do the Lord; rere the Lord thi wrdus that thou hast profecied, that broȝt aȝeen be the vesselis in the hous of the Lord, and al the transmygracioun fro Babiloyne, to this place. Nerthelatere here thou this wrd, that Y speke in thin eres, and in the eres of al the puple. Profetus that weren bifor me, and bifor thee, fro the bigynnyng, and profecieden vp on manye londus, and vp on manye rewmes, of bataile, and of tormenting, and of hunger. The profete that profeciede pes, whan shal comen his wrd, shal be wist a profete whom sente the Lord in treuthe. And Ananye, the profete, toc the cheyne of the necke of Jeremye, profete, and brac it. And Ananye, the profete, seith in the siȝte of al the puple, seiende, These thingus seith the Lord, Thus Y shal to-breke the ȝoc of Nabugodonosor, king of Babiloyne, after two ȝeris of daȝes, fro the necke of alle Jentilis. And Jeremye, the profete, wente awei in to his weye. And don is the wrd of the Lord to Jeremye, aftir that Ananye, the profete, brac the cheyne fro the necke of Jeremye, seiende, Go, and sey to Ananye, These thingus seith the Lord, Treene cheynes thou hast tobroke, and thou shalt make for them irene cheynes. For these thingus seith the Lord of ostis, God of Irael, An irene ȝoc Y haue set vp on the necke of alle these Jentilis, that thei serue to Nabugodonosor, king of Babiloyne, and thei shul seruen to hym; ferthermor and the bestus of erthe Y ȝaf to hym. And Jeremye, the profete, seide to Ananye, the profete, Here thou, Ananye; the Lord sente not thee, and thou madist this puple to troste in lesing. Therfore these thingus seith the Lord, Lo! I shal throwen out thee fro the face of the erthe; this ȝer thou shalt die, forsothe aȝen the Lord thou speeke. And dead is Ananye, the profete, in that ȝer the seuenthe moneth.
And these ben the wrdus of the boc, that sente Jeremye, the profete, fro Jerusalem to the remnaunt of the elderes of the transmygracioun, and to the prestus, and to the profetes, and to al the puple, whom ouerlad hadde Nabugodonosor fro Jerusalem in to Babiloyne, after that wente out Jechonye, the king, and the lady, and the geldingus, and the princes of Juda, out of Jerusalem, and the smyth, and the iueler fro Jerusalem, in the hond of Elaasa, sone of Safan, and of Gamaliel, sone of Elchie, whom sent Sedechie, king of Juda, to Nabugodonosor, king of Babiloyne, in to Babiloyne, seiende, These thingus seith the Lord of ostus, God of Irael, to al the transmygracyoun, that Y translatede fro Jerusalem in to Babiloyne, Bildeth vp houses, and dwelleth, and plaunteth gardynes, and eteth the frute of hem; taketh wyues, and geteth sonus and doȝtris, and ȝyueth to ȝoure sonus wyues, and ȝoure doȝtris ȝyueth to men, and bere thei sonus and doȝtris; and be ȝee multeplied there, and wileth not be fewe in noumbre. And secheth the pes of the cyte, to the whiche Y made ȝow gon ouer; and preȝeth for it the Lord, for in his pes shal be pes to ȝou. These thingus seith the Lord of ostus, God of Irael, Bigile not ȝou ȝoure profetus, that ben in the myddel of ȝou, and ȝoure dyuynours; and ne taketh heed to ȝoure sweuenes, that ȝee sweuenen; for thei falsly profecien to ȝou in my name, and Y sente them not, seith the Lord. For these thingus seith the Lord, Whan schal bigynne to be fulfilid in Babiloyne seuenti ȝeer, Y shal visite ȝou, and reren vp ȝou my good wrd, and bringe ȝou aȝeen to this place. I forsothe wot the thoȝtus that Y thenke vp on ȝou, seith the Lord, thoȝtus of pes, and not of tormenting, that Y ȝyue to ȝou ende and pacience. And ȝee shul inwardly clepe me, and gon, and honoure me, and Y shall ful out here ȝou; ȝee shul seche me, and finden, whan ȝee han soȝt me in al ȝoure herte. And Y shal be founde of ȝou, seith the Lord, and Y shall bringe aȝeen ȝoure caitifte, and gedere ȝou fro alle Jentiles, and fro alle places, to whiche I putte ȝou out, seith the Lord; and to turne aȝeen I shal make ȝou fro the place, to whiche Y made ȝou to gon ouer. For ȝee seiden, Reren shal to vs the Lord profetus in Babiloyne. For these thingys seith the Lord to the king, that sit vp on the see of Dauid, and to al the puple, dwellere of this cyte, to ȝoure brethern, that ben not gon out with ȝou in to transmygracioun, These thingus seith the Lord of ostus, Lo! Y shal sende in hem swerd, and hunger, and pestilence; and putten hem as the euel figus, that moun not ben ete, for thi that they ben werst. And Y shal pursue them in swerd, and in hunger, and in pestilence; and Y shal ȝyue them in to wery trauailing to alle rewmes of erthe, in to cursing, and in to stoneyng, and in to whistling, and in to repref to alle Jentilis, to whiche I caste hem out. For thi that they herden not my wrdys, seith the Lord, whiche Y sente to them by my seruauns, profetes, fro nyȝt risende, and sendende, and ȝee herden not, seith the Lord. Ȝee therfore hereth the wrd of the Lord, al transmygracioun, that Y sente out fro Jerusalem in to Babiloyne. These thingus seith the Lord of ostys, God of Irael, to Achab, sone of Cholie, and to Sedechie, sone of Maasie, that profesien to ȝou in my name lesinge, Lo! Y shal taken hem in the hond of Nabugodonosor, king of Babiloyne, and he shal smyte them in ȝoure eȝen. And ther shul ben taken of them cursing to al the transmygracioun of Jude, that is in Babiloyne, of men seiende, Putte thee the Lord as Sedechie, and as Achab, whom friede the king of Babiloyne in fyr, for thi that thei diden folie in Irael, and diden auoutre in to the wyues of ther frendus; and speeken wrd in my name liendely, that Y comaundide not to them; I am domesman and witnesse, seith the Lord. And to Semeiam Neelamytem thou shalt seyn, These thyngus seith the Lord of ostus, God of Irael, For thi that thou sentest bokes in my name to al the puple that is in Jerusalem, and to Sofonye, sone of Maasie, prest, and to alle the prestus, seiende, The Lord ȝaf thee prest for Joiade, prest, that thou be a duke in the hous of the Lord vp on eche man caȝt with wodnesse, and profeciende, that thou sende hym in to the stockus, and in to prisoun. And now whi blamest thou not Jeremye of Anatoth, that profecyeth to ȝou? For vpon this he sente to vs in to Babiloyne, seiende, Longe it is; bildeth out houses, and dwelleth, and plaunteth gardynes, and eteth the frute of them. Radde thanne Sofonye, the prest, this boc in the eres of Jeremye, the profete. And don is the wrd of the Lord to Jeremye, seiende, Sendeth to al the transmygracyoun, seiende, These thingus seith the Lord to Semeie Neelamyte, For thi that profeciede to ȝou Semeie, and Y sente hym not, and made ȝou to trosten in lesing; therfore these thingus seith the Lord, Lo! Y shal visite vp on Semeie Neelamyte, and vp on his sed; ther shal not be to hym a man sittende in the myddel of this puple; and he shal not seen the good, that Y shal do to my puple, seith the Lord, for lawe breking he spac aȝen the Lord.
This is the wrd, that is don to Jeremye fro the Lord, seiende, These thingus seith the Lord God of Irael, seiende, Writ to thee alle these wrdus that Y spac to thee, in the boc. Loo! forsothe daȝes comen, seith the Lord, and Y shal turne the conuerting of my puple of Irael and of Juda, seith the Lord; and Y shal turne them to the lond that Y ȝaf to the fadris of them, and thei shul welde it. And these the wrdus, that the Lord spac to Irael, and to Juda. For thes thingus seith the Lord, Voys of huge drede wee han herd; ferd, and ther ys not pes. Asketh, and seeth, if the male geteth; whi thanne saȝ Y of eche man the hond vpon his leende, as of the trauailende with childe, and turned ben alle ther faces in to ȝelȝ? Wo! for gret that day, ne ther is his lyc; and tyme of tribulacioun is to Jacob, and of it he shal ben saued. And it shal be, in that dai, seith the Lord of ostus, Y shal to-brose his ȝoc fro thi necke, and his bondus Y shal tobreke; and no mor shul lordshipen to hym alienus, but thei shul serue to the Lord, ther God, and to Dauid, ther king, whom Y shal rere to them. Thou therfore ne drede thou, my seruaunt Jacob, seith the Lord, ne inwardly drede thou, Irael; for lo! Y shal saue thee fro a ferr lond, and thi seed fro the lond of the caitifte of them. And turned shal ben aȝeen Jacob, and resten, and with alle goodus flowen; and ther shal not be whom he shal dreden. For Y with thee am, seith the Lord, that Y saue thee. Forsothe Y shal don ful ending in alle Jentiles, in which Y scaterede thee; thee forsothe Y schal not make in to ful ending, but Y shal chastise thee in dom, that thou be not seen to thee gilteles. For these thingus seith the Lord, Vnheleable thi brosure, werst thi wounde. Ther is not, that deme thi dom to bynde to; of curingus ys not profit to thee. Alle thi loueres forȝeeten thee, thee shul not sechen; with the wounde forsothe of the enemy Y smot thee, by cruel chastising; for the multitude of thi wyckenesse, hard ben mad thi synnes. What criest thou vp on thi to-treding? vnheleable is thi sorewe; for the multitude of thi wickidnesse, and for thin harde synnes, Y dide these thingus to thee. Therfore alle that eten thee, shul ben deuoured, and alle thin enemyes in to caityfte shul be lad; and that thee wasten, shuln ben wasted, and alle thi robberes Y shal ȝyue in to prei. Forsothe Y shal helen parfitly thi felle wounde to thee, and of thi woundus Y shal hele thee, seith the Lord; for cast awei thei clepeden thee, Sion; this is she that hadde not aȝeen serchere. These thingus seith the Lord, Lo! I shal conuerte the conuerting of the tabernacles of Jacob, and to his rooues Y shal han mercy; and bild vp shal be the cite in his heiȝte, and the temple after his order shal be foundid. And gon out shal preising of hem and vois of pleieres, and Y shal multeplie them, and thei shul not ben lassid; and Y shal glorifie them, and thei shuln not be thynned. And the sonus of it shul ben as fro the bygynnyng, and the cumpanye of it before me shal abide stille; and I shal visete aȝen alle that troblen hym. And ther shal ben his duke of hym, and a prince from his myddel shal be broȝt forth; and Y shal presenten hym, and he shal neȝhe to me; who forsothe is this, that leye to his herte, that he neȝhe to me? seith the Lord. And ȝee shul be to me in to puple, and Y shal be to ȝou in to God. Lo! in Jentilis the whirlewind of the Lord, wodenes goende out, tempest fallende, in the hed of vnpitous men thei shul alle togidere resten. Shal not turne awei the wrathe of indignacioun the Lord, to the tyme he do, and fulfille the thenking of his herte; in the laste of daȝes ȝee shul vndurstonden thoe thynges.
In that tyme, seith the Lord, I shal be God to alle the kinredus of Irael; and thei shul be to me in to puple. These thingus seith the Lord, Founde grace in desert the puple that lafte fro swerd; go shal to his reste Irael. Aferr the Lord aperede to me, and in euere lastende charite Y louede thee; therfore Y rewende droȝ thee. And eft Y shal bilden vp thee, and bild vp shal thou be, maiden Irael; ȝit thou shalt ben enourned with thi tymbris, and thou shalt gon out in the daunce of pleieres. And ȝit thou shalt plaunte vynes in the mount of Samarie; plaunte shul plaunteres, and for to tyme come thei shul not pulle grapes. For the dai shal ben, in whiche crien shul keperes in the mount of Samarie, and in the mount of Effraym, Riseth, and steye wee vp in to Sion, to the Lord oure God. For these thingus seith the Lord, Ful out ioȝeth in gladnesse of Jacob, and neyȝeth aȝen the heued of Jentilis; parfitly sowneth, and singeth, and seith, Saf, Lord, thi puple, the remnauntis of Irael. Lo! Y shal bringe them fro the lond of the north, and gedere them fro the vtmostus of erthe; among whom shal be the blinde, and the lame, and the womman with childe, and the trauailende with childe togidere, a gret cumpanye of men turnende aȝeen hider. In weping thei shul come, and in mercy Y shal bringe them aȝeen; and Y shal lede them bi stef stremes of watris in a riȝt weie, thei shul not stumble in it; for Y am mad to Irael a fader, and Effraym my first goten is. Hereth the wrd of the Lord, ȝee Jentiles, and telleth in ilis that ben aferr, and seith, Who scaterede Irael, shal gaderen hym, and kepen hym, as a shepperde his floc. Forsothe the Lord boȝte aȝeen Jacob, and delyuerede hym fro the hond of the myȝtiere. And thei shul come, and preisen in the mount of Sion; and togidere flowen to the goodus of the Lord, vp on whete, wyn, and oile, and frut of bestes, and of droues; and the soule of them shal be as a watri gardyn, and no more thei shul hungre. Thanne gladen shal the maiden in the daunce, ȝunge men and maidenus togidere; and Y shal turne ther weiling in to ioȝe, and coumforte them, and gladen fro ther sorewe. And Y shal inwardly drunkne the soule of the prestus with fatnesse, and my puple with my goodus shal be fulfyld, seith the Lord. These thingus seith the Lord, Vois in heiȝte is herd of lamentacioun, and weping, and weiling, of Rachel wepende hir sonus, and not willende to be coumfortid vp on hem, for thei ben not. These thingus seith the Lord, Reste thi vois fro weping, and thin eȝen fro teres; for ther is meede to thi werc, seith the Lord; and thei shul be turned aȝeen fro the lond of the enemy. And ther is hope in thi laste, seith the Lord, and ben turned aȝeen shul the sonus to ther termes. Herende Y herde Effraym ouergoende; thou chastisedist me, and Y am lerned as a ȝungling vntamed; conuerte me, and Y schal be conuertid, for thou Lord my God. After forsothe that thou haddest conuertid me, Y dide penaunce; and after that thou haddest shewid to me, Y smot my hipe; I am confoundid, and Y shamede, for Y suffrede the repref of my ȝunge waxen age. If a wrshypeful sone to me Effraym, if a child delicat; for sithen Y spac of hym, ȝit Y shal recorden of hym; therfore ben disturbid my bowelis vpon hym, rewende Y shal han mercy of hym, seith the Lord. Ordeyne to thee a toting place, sett to thee bitternesses; riȝt reule thin herte in to an euene weie, in whiche thou hast go; turne aȝeen, thou maide Irael, turne aȝeen to these thi cites. Hou longe with delices shalt thou be loosid atwynne, thou doȝter vagaunt? for shapen hath the Lord newe thing vp on erthe, the womman shal go abouten the man. These thingus seith the Lord of ostis, God of Irael, Ȝit thei shul sey this wrd in the lond of Juda, and in his cheef cites, whan Y shal conuerte the caitifte of hem, Blesseth to thee the Lord, the fayrnesse, of riȝtwisnesse the hoeli mount. And dwelle shul in it Juda, and alle his cites, togidere erthe tilieres, and men dryuende flockes. For Y haue mad drunke the weri soule, and eche hungrende soule Y haue fulfild. Therfore as fro slep I am rered, and saȝ; and my slep sweete is to me. Lo! daȝes comen, seith the Lord, and Y shal sowen the hous of Irael and the hous of Juda with the sed of men, and with the sed of bestus. And as Y woc vp on hem, that Y schulde pullen out, and destroȝen, and wasten, and scateren, and tormenten; so Y shal waken vp on hem, that Y bilde vp, and plaunte, seith the Lord. In tho daȝes men shul seyn no more, Fadris eeten the soure grape, and the teeth of the sonus stoneȝeden; but eche in his wickenesse shal die, eche man that shal ete the soure grape, shul stoneȝe the teeth of hym. Lo! daȝes comen, seith the Lord, and Y shal smyte to the hous of Irael, and to the hous of Juda newe pes couenaunt; not after the couenaunt that Y couenauntede with ȝoure fadris, in the day that Y toc the hond of hem, that Y shulde bringe them out fro the lond of Egipt, couenaunt that thei maden voide; and Y lordshepede of hem, seith the Lord. But this shal be the couenaunt, that Y shal smyte with the hous of Irael after tho daȝes, seith the Lord; Y shal ȝyue my lawe in the boweles of hem, and in the herte of hem Y shal write it, and Y shal be to them in to God, and thei shal be to me in to a puple. And techen shul no more the man his neȝhebore, and the man his brother, seiende, Knowe thou the Lord; alle forsothe shul knowe me, fro the leste vnto the moste, seith the Lord; for Y shal han mercy to the wickenes of them, and of the synne of hem Y shal no mor be myndeful. These thingus seith the Lord, that ȝyueth the sunne in the liȝt of the dai, ordre of the moone and of the sterres in liȝt of the nyȝt, that disturbeth the se, and his flodis sownen, the Lord of ostus name to hym. If failen shuln these lawes bifor me, seith the Lord, thanne and the sed of Irael shal faile, that ther be not folc bifor me alle daȝes. These thingus seith the Lord, Yf heuenus shul moun be mesured fro aboue, and be serched the foundemens of the erthe bynethe, and Y shal casten awei al the sed of Irael, for alle thingus that thei diden, seith the Lord. Lo! daȝes comen, seith the Lord, and bild vp shal be a cyte to the Lord fro the tour of Ananeel vn to the ȝate of the corner. And it shal gon out ouer the reule of the mesure, in his siȝte, vp on the hyl of Gared, and it shal gon aboute Goacha, and al the valei of careynus, and the askes, and al the regioun of deth, vnto the stef strem of Cedron, and vnto the corner of the est ȝate of hors; the hoeli of the Lord shal not be pullid vp, and no mor be destroȝed in to euermore.
The wrd that is don to Jeremye fro the Lord, in the tenthe ȝer of Sedechie, king of Juda; it is the eiȝtetenthe ȝer of Nabugodonosor. Thanne the ost of the king of Babiloyne besegede Jerusalem; and Jeremye, the profete, was closid in the porche of the prisoun, that was in the hous of the king of Juda. Closed hadde forsothe hym Sedechye, king of Juda, seiende, Whi profeciest thou, seiende, These thingus seith the Lord, Lo! Y shal ȝyuen this cite in to the hond of the king of Babiloyne, and he shal taken it; and Sedechie, king of Juda, shal not scape fro the hond of Caldeis, but he shal be taken in the hond of the king of Babiloyne; and speken shal his mouth with the mouth of hym, and his eȝen the eȝen of hym shul seen; and in to Babiloyne he shal lede Sedechie, and there he shal be, to the tyme Y visite hym, seith the Lord; yf forsothe ȝee shul fiȝte aȝen the Caldeis, no thing welsum ȝee shuln han? And Jeremye seide, Don is the wrd of the Lord to me, seiende, Lo! Ananeel, the sone of Sellum, thin emys sone, shal come to thee, seiende, Bye to thee my feld, that is in Anathoth; to thee forsothe falleth of nyȝ kinrede, that thou bie it. And cam to me Ananeel, the sone of myn em, after the wrd of the Lord, to the porche of the prisoun, and he seith to me, Weld my feld, that is in Anatot, in the lond of Beniamyn; for to thee fallith the eritage, and thou art the neer kin, that thou welde. Y vnderstood forsothe, that it was the wrd of the Lord. And Y boȝte the feld of Ananeel, the sone of myn em, that is in Anatot. And Y peisede to hym siluer, seuene halue ounces, and ten siluerne platys; and wrot in the boc, and selede, and toc witnesses. And Y peisede seluer in a balaunce; and Y toc the boc of the possessioun selid, and the behestus to the askingus, and the fermed thingus, and the tocnes withouteforth. And Y ȝaf the boc of the possessioun to Baruch, the sone of Nery, sone of Maasie, in the eȝen of Ananeel, myn emys sone, and in the eȝen of wytnesses that weren writen in the boc of the biyng, in the eȝen of alle Jewis, that seeten in the porche of the prisoun. And Y comaundide to Baruch befor them, seiende, These thingus seith the Lord of ostis, God of Irael, Tac these bokis, this seled boc of biyng, and this boc that is opened, and put them in a britel vessel, that abide stille thei moun manye daȝes. These thingus forsothe seith the Lord of ostus, God of Irael, Ȝit weldid shul be houses, and feldus, and vyneȝerdis, in this lond. And Y preȝede to the Lord, aftir that Y hadde take the boc of possessioun to Baruch, the sone of Neery, seiende, Allas! allas! allas! Lord God, lo! thou madest heuene and erthe in thi grete strengthe, and in thi straȝt out arm; shal not be to thee hard eche wrd; that dost mercy in thousendus, and ȝeldist wickenesse of faders in to the bosum of the sonus aftir hem. O! thou most strong, gret, and myȝty, Lord of ostus name to thee; gret in counseil, and incomprehensible in thenking, whos eȝen ben opened vp on alle the weies of the sonus of Adam, that thou ȝelde to eche after his weies, and after the frute of his fyndingus; that settedest tocnes and wnders in the lond of Egipt, vn to this dai, and in Irael and in men; and thou madist to thee a name, as is this day. And thou laddest out thi puple Irael fro the lond of Egipt, in tocnes and in wndris, and in stalwrthe hond, and in straȝt oute arme, and in gret ferd; and ȝeue to them this lond, that thou swore to ther faders, that thou shuldist ȝyue to them, the lond flowende mylc and hony. And thei wenten in, and weldeden it; and obesheden not to thi vois, and in thi lawe ȝiden not; alle thingus that thou comaundedest to them, that they shulde do, thei diden not; and ther camen to them alle these eueles. Lo! strengthingus ben mad out aȝen this cite, that it be take, and the cyte is ȝouen in to the hondus of Caldeis, and in to the hondus of the king of Babiloyne, that fiȝten aȝen it, fro the face of the swerd, and of hunger, and of pestilence; and what euere thingus thou speeke, thei fellen, as thiself biholdist. And thou seidist to me, Lord God, Bie thou the feeld with syluer, and tac witnesses, whan the cheef cite is ȝouen in the hond of Caldeis. And don ys the wrd of the Lord to Jeremye, seiende, Lo! Y the Lord God of alle flesh. Whether to mee hard shal ben eche wrd? Therfore these thingus seith the Lord, Lo! Y shal take this cite in to the hondus of Caldeis, and in the hond of the king of Babiloyne, and they shul taken it. And come shul Caldeis fiȝtende aȝen this cite, and thei shul teende it vp with fyr, and brenne it, and the houses, in whos rooues thei sacrifieden to Baal, and offreden to alien godis sacrifises of licoures, to terre me. Weren forsothe the sonus of Irael and the sonus of Juda contynueli doende euel in myn eȝen, fro ther waxe ȝouthe, the sonus of Irael that vnto now sharpeden out me in the werkes of ther hondus, seith the Lord. For in wodnes and in myn indignacioun mad is to me this cyte, fro the dai that thei bilden it vp, in to this day, in whiche it shal be don awei fro my siȝt; for the malice of the sonus of Irael, and of the sonus of Juda, that thei diden, to wrathe me terrende, thei, and ther kingus, ther princes, and prestes, and ther profetus, men of Juda, and dwelleris of Jerusalem. And thei turneden to me backes, and not faces, whan Y shulde teche them the morutid, and lernen; and thei wolden not heren, that thei shulden take disciplyne. And thei setteden ther mawmetes in to the hous, in whiche is inwardly clepid my name, that thei schulden defoule it. And thei bilden vp heȝe thingus of Baal, that ben in the valey of the sone of Ennon, that thei sacrifie ther sonus and ther doȝtris to Moloch, that Y comaundide not to them, ne steȝede vp in to myn herte, that thei shulde do this abhominacioun, and in to synne bringe doun Judam. And now for these thingus, seith the Lord God of Irael to this cite, of whiche ȝee seyn, that it be taken in to the hondus of the king of Babiloyne in swerd, and in hunger, and in pestilence, Lo! Y shal gedere them fro alle londus, to whiche Y caste them out in my wodnesse, and in my wrathe, and in my great indignacioun; and Y shal bringe hem aȝeen to this place, and to wonen hem Y shal make trostily. And thei shul be to me in to puple, and Y shal be to them in to God. And Y shal ȝyue to hem oen herte and o soule, that thei drede me alle daȝes, and wel be to them, and to ther sonus after hem. And Y shal smyte with them couenaunt euere durende, and Y shal not cese to wel do to them, and my drede Y shal ȝyue in ther herte, that thei go not awei fro me. And Y shal gladen up on hem, whan wel to them I shal do; and Y shal plaunte hem in this lond in treuthe, in myn herte, and in al my soule. For these thingus seith the Lord, As Y haue broȝt in to this puple al this grete euel, so Y shal bringe to vp on hem al the good, that Y shal speke to them. And weldid shul be feldus in this lond, of whiche ȝee seyn, that desert it is, for thi that ther shal not leuen a man and beste; and ȝouen is in to the hondus of Caldeis. Feldus with monee shal be boȝt, and writen in boc, and prented in shal be the sel; and witnesses shul be take to, in the lond of Beniamyn, and in the cumpas of Jerusalem, and in the cites of Juda, and in the mountewous cites, and in the feldi cites, and in the cites that at the south ben; for Y shal turne the caitifte of hem, seith the Lord.
And don is the wrd of the Lord to Jeremye, the secounde tyme, whan ȝit he was closid in the porche of the prisoun, seiende, These thingys seith the Lord, that is to make and to foorme it, and to greithe, Lord the name of hym; Crie to me, and Y shal ful out here thee, and Y shal telle to thee grete thingus, and faste, that thou wost not. For these thingus seith the Lord God of Irael to the houses of this cite, and to the houses of the king of Juda, that ben destroȝed, and to the strengthingus, and to the swerd of men comende, that thei fiȝte with the Caldeis, and fulfille hem with the careynes of men, the whiche Y smot in my wodnesse, and in myn indignacioun; and Y hidde my face fro this cite, for alle the malice of hem. Lo! Y shal close aȝeen to them the wounde and helthe, and helen hem; and Y shal opene to them the lowely preȝyng of pes, and of treuthe; and turne the turnyng of Juda, and turne the turnyng of Jerusalem, and Y shal bilde vp hem, as fro the bigynnyng. And Y shal clense out hem fro ther wickednesse, in whiche thei synneden to me, and mercifull Y shal be to alle the wickenesses of hem, in whiche thei trespasiden to me, and dispisiden me. And it shal be to me in to name, and in to ioȝe, and in to preising, and in to ful out ioȝing, to alle Jentiles of erthe, that herden alle goodis that Y am to do to them; and thei shuln inwardly dreden, and ben disturbid in alle goodus, and in alle pes, that Y shal do to them. These thingus seith the Lord, Ȝit shal ben herd in this place, whom ȝee seyn to be desert, for thi that ther is not a man ne beste in the cites of Juda, and withouteforth Jerusalem, that ben desolat withoute man, and withoute dwellere, and withoute beste, vois of ioȝe, and vois of gladnesse, vois of man spouse, and vois of womman spouse, vois of men, seiende, Knoulecheth to the Lord of ostus, for good the Lord, for withoute ende his mercy, and of men berende vouwis in to the hous of the Lord; forsothe Y shal bringe aȝeen the turnyng of the lond, as fro the bigynnyng, seith the Lord. These thingus seith the Lord of ostus, Ȝit shal be in this desert place, withoute man and withoute beste, and in alle his cites, a dwelling place of shepperdus, of liggende flockus. And in the mountewous cites, and in the feldi cites, and in the cites that at the south ben, and in the lond of Beniamyn, and in the cumpas of Jerusalem, and in the cites of Juda, ȝit shul passe flockes, at the hond of the noumbrere, seith the Lord. Lo! daȝes comen, seith the Lord, and Y shal rere a good wrd, that Y spac to the hous of Irael, and to the hous of Juda. In tho daȝes, and in that tyme, to buriowne Y shall make Dauid, a buriownyng of riȝtwisnesse; and he shal do dom and riȝtwisnesse in the lond. In tho daȝes shal be saued Juda, and Irael shal dwelle trostili; and this is the name that they shul clepen hym, The Lord oure riȝtwis. For these thingus seith the Lord, Dien shal not of Dauid a man, that sit vp on the trone of the hous of Irael; and of the prestus and Leuytus shal not die a man fro my face, that offreth brent sacrifices, and brenne sacrifise, and sle victorie sacrifise alle daȝes. And don is the wrd of the Lord to Jeremye, seiende, These thingus seith the Lord, Yf voide mai be mad my couenaunt with dai, and my couenaunt with nyȝt, that ther be not dai and nyȝt in his tyme; and my couenaunt voide shal moun be with Dauid, my seruaunt, that ther be not of hym a sone, that regne in his trone, and Leuytus, and prestus, my seruauns; as noumbred out moun not be the sterres of heuene, and mesured the grauel of the se, so Y shal multeplie the sed of Dauid, my seruaunt, and Leuytus, my seruauntys. And don is the wrd of the Lord to Jeremye, Whether thou haue not seen, that this puple spac, seyende, Two kinredus that the Lord hadde chose, ben cast awei, and my puple thei dispiseden, for thi that ther is no more a folc of kinde biforn hem. These thingus seith the Lord, If my couenaunt betwe dai and nyȝt, and lawes to heuene and erthe Y sette not; forsothe and the sed of Jacob and of Dauid, my seruaunt, Y shal throwe aferr, that Y take not of his sed princes, of the sed of Abraham, Isaac, and of Jacob; I shal bringe forsothe aȝeen the turnyng of hem, and han mercy to them.
The wrd that is don to Jeremye of the Lord, whan Nabugodonosor, king of Babiloyne, and al his ost, and alle reumus of the erthe, that weren vnder the power of the hond of hym, and alle puples foȝten aȝen Jerusalem, and aȝen alle his cites, seiende, These thingus seith the Lord God of Irael, Go, and spec to Sedechie, king of Juda; and thou shalt sey to hym, These thingus seith the Lord, Lo! Y shal take this cyte in the hond of the king of Babiloyne, and he shal brenne it vp with fyr. And thou shalt not scape fro his hond, but with taking thou shalt be take, and in his hond thou shalt be take; and thin eȝen the eȝen of the king of Babiloyne shuln see, and his mouth with thi mouth shal speke, and Babiloyne thou shalt go in. Nerthelatere here the wrd of the Lord, thou, Sedechie, king of Juda, These thingus seith the Lord to thee, Thou shalt not die in swerd, but in pes thou shalt die, and aftir the brennyngus of thi fadris rathere kingus that weren bifor thee, so thei shal brenne togidere thee, and with Wo! lord, thei shul weile thee; for the wrd Y spac, seith the Lord. And Jeremye, the profete, spac to Sedechie, king of Juda, alle these wrdus in Jerusalem. And the ost of the king of Babiloyne faȝt aȝen Jerusalem, and aȝen alle the cites of Jude, that weren laft; aȝen Lachis, and aȝen Azecha; these forsothe laften ouer of the cites of Jude strengthid cites. The wrd that is don to Jeremye fro the Lord, aftir that king Sedechie smot pes couenaunt with al the puple in Jerusalem, prechende that eche shulde leuen his thral, and eche his thral womman, Ebru man and Ebru womman free, and not lordshipen to them, that is, in Jew, and in his brother. Herden therfore alle the princes and al the puple, that wenten in couenaunt, that thei shulden leue eche his thral, and eche his thral womman free, and no more thei shulden lordshipen to them; herden thanne thei, and laften; and ben turned theraftir, and drowen aȝeen thrallis, and ther thrallessis, that thei hadden laft free, and vnderȝokeden in to seruauns, and in to wymmen seruauns. And don is the wrd of the Lord to Jeremye fro the Lord, seiende, These thingus seith the Lord God of Irael, I smot pes couenaunt with ȝoure fadris, in the dai that Y ladde them out fro the lond of Egipt, fro the hous of thraldam, seiende, Whan shul be fulfild seuene ȝer, lefe eche his Ebru brother, that is sold to hym, and he shal serue to hym sixe ȝer, and thou shalt lefe hym fro thee free; and herden not ȝoure fadris me, ne boweden in ther ere. And ȝee ben turned to day, and diden that is riȝt in myne eȝen, that ȝee shulden preche eche fredam to his frend, and wenten in couenaunt in my siȝt, in the hous in whiche is inwardly clepid my name vp on it. And ȝee ben turned aȝeen, and defouleden my name, and ȝee han broȝt aȝeen eche his thral, and eche his thrallesse, the whiche ȝee hadden laft, that thei were free, and of ther power; and ȝee han vnderȝokid hem, that thei ben to ȝou thralles and thrallesses. Therfore these thingus seith the Lord, Ȝee han not herd me, that ȝee shulden preche freedam, eche to his brother, and eche to his frend; lo! Y preche to ȝou freedam, seith the Lord, and to swerd and to hunger and to pestilence I shal ȝyue ȝou, in to quauyng to alle rewmus of erthe. And Y shal ȝyue the men, that breeke my pes couenaunt, and kepten not the wrdus of the pes couenaunt, to whiche thei ben assentid in my siȝt, a calf that thei toheewen in to two parties; and passeden bitwen his deuyseouns the princes of Juda, and the princes of Jerusalem, and geldingus, and prestus, and al the puple of the lond, that passeden bitwene the deuyseouns of the calf; and Y shal ȝyue them in to the hond of ther enemys, and in to the hond of men sechende ther lif; and shal ben the deth smyting of hem in to mete to the foulis of heuene, and to the bestus of erthe. And Sedechie, king of Juda, and his princes Y shal ȝyue in to the hond of ther enemys, and in to the hond of men sechende ther lif, and in to the hond of the ostus of the king of Babiloyne, that wenten awei fro ȝou. Lo! Y comaunde, seith the Lord, and Y shal bringe them aȝeen to this cite; and thei shul fiȝten aȝen it, and taken it, and brenne it vp with fyr; and the cites of Juda Y shal ȝyue in to wildernesse, for thi that ther is not a dwellere.
The wrd that is don to Jeremye fro the Lord, in the daȝes of Joachym, sone of Josie, king of Juda, seiende, Go to the hous of Rechabitus, and spec to them; and thou shalt bringe them in to the hous of the Lord, in to o pryue chaumbre of the tresores, and thou shalt ȝyue them to drinke wyn. And Y toc Jeconye, sone of Jeremye, sone of Absenye, and his brethern, and alle his sonus, and al the hous of Rechabitis. And I broȝte them in to the hous of the Lord, to the tresorie hous of the sonus of Eman, sone of Jezedelie, man of God; that was biside the tresorie hous of the princes, vp on the tresor of Maasie, sone of Sellum, that was kepere of the vestiarie. And Y sette bifor the sonus of the hous of Recabitis cuppis ful of wyn, and chalices; and Y seide to them, Drinketh wyn. The whiche answerden, Wee shul not drinke wyn; for Jonadab, the sone of Rechab, oure fader, comaundide to vs, seiende, Ȝee shul not drinke wyn, ȝee and ȝoure sonus, in to euermor; and hous ȝee shul not bilde, and sed ȝee shul not sowe, and vyne ȝee shul not plaunte, ne han, but in tabernacles ȝee shul dwelle alle ȝoure daȝes, that ȝee lyue manye daȝes vp on the face of the lond, in whiche ȝee pilgrimagen. Wee han obeshid therfore to the vois of Jonadab, sone of Rechab, oure fader, in alle thingus that he comaundide to vs; so that wee drunke not wyn alle oure daȝes, and wee, and oure wyues, sonus, and oure doȝtris; and wee bilde not vp houses to dwelle, and vyne, and feld, and sed wee hadde not; but we dwelleden in tabernacles, and obeisaunt wee weren, after alle thingus that comaundede to vs Jonadab, oure fader. Whan forsothe shulde steȝen vp Nabugodonosor, king of Babiloyne, to oure lond, wee seiden, Cometh, and go wee in to Jerusalem, fro the face of the ost of Caldeis, and fro the face of the ost of Cirie; and we dwelten in Jerusalem. And don is the wrd of the Lord to Jeremye, seiende, These thingus seith the Lord of ostus, God of Irael, Go, and sei to the men of Juda, and to the dwelleres of Jerusalem, Whether ȝee shul not take disciplyne, that ȝee obeshe to my wrdus, seith the Lord? Hadden the maistrie the wrdus of Jonadab, sone of Recab, whiche he comaundide to his sonus, that thei shulde not drinke wyn; and thei drunke not, vnto this dai; for thei obesheden to the heste of ther fader; lo! forsothe Y spac to ȝou, fro erly risende, and spekende, and ȝee obesheden not to me. And Y sente to ȝou alle my seruauns profetis, Y risende erly, and sendende, and seiende, Beth conuertid, eche fro his werst wey, and goode maketh ȝoure studies, and wileth not folewe alien godis, ne herien hem, and ȝee shul dwelle in the lond, that Y ȝaf to ȝou, and to ȝoure fadris; and ȝee boweden not in ȝoure ere, ne herden me. Fastneden therfore the sonus of Jonadab, sone of Recab, the heste of ther fader, that he hadde comaundid to them; this puple forsothe obeshede not to me. Therfore these thingus seith the Lord of ostus, God of Irael, Lo! Y shal bringe vp on Juda, and vp on alle dwelleres of Jerusalem, al the tormenting that Y spac aȝen hem, and thei herden not; I clepede hem, and thei answerden not to me. To the hous forsothe of Recabitis seide Jeremye, These thingus seith the Lord of ostus, God of Irael, For thi that ȝee obesheden to the heste of Jonadab, ȝoure fader, and kepten alle his hestus, and diden alle thingus, that he comaundide to ȝou; therfore these thingus seith the Lord of ostus, God of Irael, Ther shal not faile a man of the stoc of Jonadab, sone of Recab, stondende in my siȝt alle daȝes.
And don it is, in the ferthe ȝer of Joachym, sone of Josie, king of Juda, don is this wrd to Jeremye fro the Lord, seiende, Tac the volum of the boc, and thou shalt write in it alle the wrdus, that Y spac to thee aȝen Irael and Judam, and aȝen alle Jentilis, fro the day that Y spac to thee, of the daȝes of Josie vnto this day. If par auenture herende the hous of Juda alle the eueles that Y thenke to do to them, ben turned eche fro his werst weie, and mercyful Y shal be to the wickenesse and to the synne of them. Clepede therfore Jeremye Baruch, the sone of Nery; and Baruch wrot of the mouth of Jeremye alle the wrdus of the Lord, that he spac to hym, in the volume of the boc. And Jeremye comaundide to Baruch, seiende, I am closid, and mai not gon in to the hous of the Lord. Go in therfore thou, and rede of the volum, in whiche thou hast write of my mouth the wrdus of the Lord, herende the puple, in the hous of the Lord, in the dai of fasting; ferthermor and herende al Juda, that comen fro ther cites, thou shalt rede to them; if par auenture falle the orisoun of them in the siȝt of the Lord, and be turned eche fro his werste weie; for grete is the wodnesse, and the indignacioun, that the Lord spac aȝen this puple. And Baruch, the sone of Nery, dide aftyr alle thingus, that hadde comaundid to hym Jeremye, the profete; redende of the volume the wrdus of the Lord, in the hous of the Lord. Don is forsothe, in the fifte ȝer of Joachym, sone of Josie, king of Juda, in the nynthe moneth, thei precheden fasting in the siȝt of the Lord, to al the puple in Jerusalem, and to al the multitude, that hadde come togidere fro the cites of Juda in to Jerusalem. And Baruch radde of the volume the wrdus of Jeremye, in the hous of the Lord, in the tresorie place of Gamarie, sone of Safan, scribe, in the ouere vestiarie, in the entre of the newe ȝate of the hous of the Lord, herende al the puple. And whan herd had Michie, the sone of Gamarie, sone of Safan, alle the sermownus of the Lord, of the boc, he wente doun in to the hous of the king, to the tresorie place of the scribe. And lo! alle the princes seeten there, Elisama, scribe, and Dalaias, sone of Semye, and Elnathan, sone of Achabor, and Gamarie, sone of Safan, and Sedechie, sone of Ananye, and alle the princes. And tolde to them Mychie alle the wrdus, that he herde Baruch redende of the volume, in the eres of the puple. And so alle the princes senten to Baruch Judy, sone of Nathatie, sone of Selemye, sone of Cusy, seiende, The volume, of the whiche thou reddest herende the puple, tac in thin hond, and cum. Toc thanne Baruch, the sone of Neri, the volum in his hond, and cam to them. And thei seiden to hym, Sit, and red these thingus in oure eres; and Baruch radde in the eres of hem. Thanne whan thei hadden herd alle the wrdus, thei stoneieden eche to his neȝhebore, and seiden to Baruch, Owe wee to telle to the king alle these wrdus? And thei askeden hym, seiende, Shew to vs, hou thou hast write alle these wrdus of his mouth. Baruch forsothe seide to them, Of his mouth he spac, as redende to me, alle these wrdus; and Y wrot in the volum with enke. And alle the princes seiden to Baruch, Go, and be hid, thou and Jeremye; and no man wite wher ȝee be. And thei wenten in to the king, in to the porche; but the volume thei leiden vp in to the tresorie hous of Elisame, scribe. And thei tolden, herende the king, alle the wrdus. And so the king sente to Judi, that he shulde take the volum. The whiche takende it fro the tresorie place of Elisame, scribe, radde, herende the king and alle the princes, that stoden aboute the king. The king forsothe sat in the winter hous, in the nynthe moneth; and put was the herth, or chymney, biforn hym ful of colys. And whan Judi hadde rad thre litle pagens, or foure, he kutte it with a scraping knyf of the scribe, and threȝ it in to the fyr, that was vpon the herth, to the tyme that were wastid al the volum with fyr, that was in the herth. And thei dradde not, ne kutte ther clothis, the king and alle his seruauns, that herden alle these wrdus. Nerthelater Elnathan, and Alaias, and Gamarie withseiden to the king, lest he shulde brenne the boc; and he herde not hem. And the king comaundide to Jeremyel, sone of Amalech, and to Saraie, sone of Esreel, and to Selemye, sone of Abdehel, that thei schulden take Baruch, scribe, and Jeremye, the profete; forsothe the Lord hidde them. And don is the wrd of the Lord to Jeremye, the profete, after that the king hadde brent the volum and the wrdus, that Baruch hadde write of the mouth of Jeremye, seiende, Eft tac an other volum, and writ in it alle the rathere wrdus, that weren in the first volum, the whiche brende Joachym, king of Juda. And to Joachym, king of Juda, thou shalt sey, These thingus seith the Lord, Thou hast brend this volum, seynde, Whi hast thou writen in it, tellende, Hastif shal come the king of Babiloyne, and waste this lond, and to cesen shal make of it man and beste? Therfor these thingus seith the Lord aȝen Joachym, king of Juda, Ther shal not be of hym, that sitte vpon the see of Dauid; and his careyn shal be cast forth at the hete bi the dai, and at the frost bi the nyȝt. And Y shal visite aȝen hym, and aȝen his sed, and aȝen his seruauns, ther wickednesses. And Y shal bringe vpon hem, and vpon the dwelleres of Jerusalem, and vp on the men of Juda, al the yuel that Y spac to them, and thei herden not. Jeremye forsothe toc an other volum, and ȝaf it to Baruch, sone of Neri, scribe, that wrot in it of the mouth of Jeremye alle the wrdus of the boc, whiche Joachym, king of Juda, hadde brent with fyr; and ferthermor added ben wrdus many mo than befor weren.
And regnede king Sedechie, sone of Josie, for Jeconye, the sone of Joachym, whom Nabugodonosor, king of Babiloyne, sette king in the lond of Juda. And obeshede not he, and his seruauns, and his puple of the lond, to the wrdus of the Lord, that he spac in the hond of Jeremye, the profete. And king Sedechie sent Jothal, the sone of Selemye, and Sofone, sone of Maasie, prest, to Jeremye, the profete, seiende, Prei for vs the Lord oure God. Jeremye forsothe freeli ȝide in the myddel of the puple; forsothe thei hadden not put hym in to warde of prisoun. Thanne the ost of Farao wente out fro Egipt, and herende the Caldeis, that besegeden Jerusalem, such a maner messager wenten awei fro Jerusalem. And don is the wrd of the Lord to Jeremye, the profete, seiende, These thingus seith the Lord God of Irael, Thus ȝee shul sei to the king of Juda, that sente ȝou to aske me, Lo! the ost of Farao, that is gon out to ȝou to helpe, shal turne aȝeen in to his lond, in to Egipt. And Caldeis shul turne aȝeen, and fiȝten aȝen this cite, and taken it, and brenne it vp with fyr. These thingus seith the Lord, Wileth not disceyue ȝoure soulus, seiende, Goende out Caldeis shul go awei, and turne aȝeen fro vs; for thei shul not gon awei. But and if ȝee shul smyte al the ost of Caldeis, that fiȝten aȝen ȝou, and shul be laft of them summe woundid, eche fro his tent shal rise, and brenne vp this cite with fyr. Thanne whan hadde gon awey the ost of Caldeis fro Jerusalem, for the oost of Farao, wente out Jeremye fro Jerusalem, that he shulde go in to the lond of Beniamyn, and deuyde there possessioun in the siȝte of the citeseynus. And whan he hadde comen to the ȝate of Beniamyn, was there the kepere of the ȝate bi whiles, bi name Jerias, sone of Selemye, sone of Ananye, and toc Jeremye, the profete, seiende, To the Caldeis thou fleest. And Jeremye answerde, It is fals; Y flee not to the Caldeis. And he herde hym not, but Jereias toc Jeremye, and broȝte hym to the princes. For what thing wroth the princes aȝen Jeremye, beten putten hym in to prisoun, that was in the hous of Jonathe, scribe; he forsothe was prouost vp on the prisoun. And so Jeremye wente in to the hous of the lake, and in to the hardere prisoun; and Jeremye sat there manye daȝes. And so king Sedechie sendende toc hym, and askede hym in his hous hidli, and seide, Wenest thou, whether ther is not a wrd fro the Lord? And Jeremye seide, Ther is. And he seith, In the hond of the king of Babiloyne thou shalt be take. And Jeremye seide to Sedechie, the king, What haue Y synned to thee, and to thi seruauns, and to thi puple, for thou hast sent me in to the hous of the prisoun? Wher ben ȝoure profetus, that profecieden to ȝou, and seiden, The king of Babiloyne shal not come vpon vs, and vpon this lond? Now thanne here thou, Y beseche, lord my king, vaile my preȝeres in thi siȝt, and ne sende thou me aȝeen in to the hous of Jonathe, scribe, lest Y die there. Thanne Sedechie comaundide, that Jeremye shulde be take in to the vestiarie of the prisoun, and that ther shulde be ȝoue to hym a cake of bred eche dai, out take sowyl, to the tyme that shulde be wastid alle the loeues of the cyte; and Jeremye bod in the vestiarie of the prisown.
Herden forsothe Safacie, sone of Nathan, and Jedelias, sone of Fassur, and Jochal, sone of Selemie, and Fassur, sone of Melchie, the wrdus that Jeremye spac to al the puple, seiende, These thingus seith the Lord, Who so euere shal abide in this cite, shal die bi swerd, and hungur, and pestilence; who forsothe shal flee to the Caldeis, shal lyue, and his lif shal ben hoel and lyuynge. These thingus seith the Lord, To be take shal be take this cite in to the hond of the ost of the king of Babiloyne, and he shal taken it. And the princes seiden to the king, Wee preȝen, that be slayn this man; of purpos forsothe he looseth atwynne the hondus of the fiȝteres, that han abide in the cite, and the hondus of al the puple, spekende to them alle these wrdus. Forsothe this man secheth not pes to this puple, but euel. And king Sedechie seide, Lo! he in ȝoure hondus is, ne forsothe leeful is the king any thing to ȝou to denye. Thanne thei toke Jeremye, and threwen hym in to the lake of Elchie, sone of Amalech, that was in the vestiarie of the prisoun; and thei putte doun Jeremye in cordis and in to the lake, in whiche was not water, but clei; and so Jeremye descendide in to the foule cley. Forsothe Abdemelech Ethiope, a man gelding, that was in the hous of the king, herde that thei hadden put Jeremye in to the lake; but the king sat in the ȝate of Beniamyn. And Abdemelech wente out fro the hous of the king, and spac to the king, seiende, My lord king, euele han do these men alle thingus, what euere thei diden aȝen Jeremye, the profete, sendende hym in to the lake, that he die there for hungir; ther ben no mo loeues in the cite. And so the king comaundide to Abdemelech Etheope, seiende, Tac with thee hennus thretti men, and rere vp Jeremye, the profete, fro the lake, er he die. Thanne Abdemelech take to with hym men, wente in to the hous of the king, that was vnder the celer; and toke thennus olde clothis, and olde vestemens, that hadden rotid; and he putte doun hem to Jeremye, in to the lake, bi litle cordis. And Abdemelech Ethiope seide to Jeremye, Put the olde clothis, and these kut and roten vnder the arm of thin hondus, and vp on the cordis. Thanne Jeremye dide so. And thei drowen out Jeremye with cordus, and broȝten hym out fro the lake. Jeremye forsothe abod in the vestiarie of the prisoun. And king Sedechie sente, and toc to hym Jeremye, the profete, at the thridde dore that was in the hous of the Lord. And the king seide to Jeremye, Y aske thee a wrd; ne hide thou fro me any thing. Jeremye forsothe seide to Sedechie, If Y shal tellen to thee, whether thou shalt not slen me? And yf Y schul ȝyue counseil to thee, thou shalt not here me. Thanne king Sedechie swor to Jeremye, priuyli seiende, The Lord lyueth, that dide to vs this lyf, Y shal not slee thee, and Y shal not take thee in to the hondus of these men, that sechen thi lif. And Jeremye seide to Sedechie, These thingus seith the Lord of ostus, God of Irael, If gon forth thou shalt gon out to the princes of the king of Babiloyne, lyue shal thi soule, and this cite shal not be brend vp with fyr, and saaf thou shalt be, and thin hous. If forsothe thou shalt not gon out to the princes of the king of Babiloyne, take shal be this cite in to the hondus of Caldeis; and thei shul brenne it vp with fyr, and thou shalt not scape fro the hond of them. And king Sedechie seide to Jeremye, I am bisy for the Jewes that ouerfloun to the Caldeis, lest par auenture Y be take in to the hondus of hem, and thei bobbe to me. Answerende forsothe Jeremye seide to hym, Thei shul not take thee; here, Y beseche, the vois of the Lord, that Y shal speke to thee, and weel shal be to thee, and lyue shal thi soule. That if thou wilt not go out, this is the wrd that shewede to me the Lord, Lo! alle the wymmen, that abiden in the hous of the king of Juda, shul be broȝt out to the princes of the king of Babiloyne; and thei shul sey, Han bigilid thee, and hadden the maistri aȝen thee thi pesible men; thei han drenchid thee doun in the myre, and in the sledery thing thi feet, and thei wenten awei fro thee. And alle thi wyues and thi sonus shul be lad out to the Caldeis, and thou shalt not scape the hondus of hem; but in to the hondus of the king of Babiloyne thou shalt be take, and this cite thei shul to-brenne with fyr. Thanne Sedechie seide to Jeremye, No man wite these wrdus, and thou shalt not die. If forsothe heren shul the princes, for Y haue spoke with thee, and thei shul come to thee, and sei to thee, Shew to vs what thou hast spoke with the king, ne hile thou vs, and wee shul not sle thee; and what spac with thee the king, thou shalt sei to them, I haue throwe doun my preȝeres befor the king, lest he comaundede me to be broȝt aȝeen in to the hous of Jonathan, and there Y shulde die. Camen thanne alle the princes to Jeremye, and askeden hym; and he spac to them after alle the wrdus that the king hadde comaundid to hym, and thei ceseden fro hym; no thing forsothe was herd. Thanne Jeremye abod in the vestiarie of the prisoun, vnto the dai that taken is Jerusalem; and don it is, that Jerusalem shulde ben taken.
The nynthe ȝer of Sedechie, king of Jude, the tenthe moneth, cam Nabugodonosor, king of Babiloyne, and al his ost to Jerusalem, and thei besegeden it. The elleuenthe ȝer forsothe of Sedechie, the ferthe moneth, the fifte dai of the moneth, opened is the cite; and wenten in alle the princes of the king of Babiloyne, and seeten in the myddel ȝate, Neregel, Fererer, Semegar, Nabusarrachym, Rapsaces, Neregel, Ferezer, Rebynag, and alle the othere princes of the king of Babiloyne. And whan hadde seen hem Sedechie, king of Juda, and alle the men fiȝteres floun, and wenten out the nyȝt fro the cite, bi the weie of the gardyn of the king, and bi the ȝate that was betwe two wallis; and thei wenten out to the weie of desert. Forsothe pursuede them the ost of Caldeis, and toke Sedechye in the feld of wildernesse of the kuntre of Jerichon; and taken thei broȝten to Nabugodonosor, king of Babiloyne, in to Reblatha, that is in the lond of Emath; and he spac to hym domes. And the king of Babiloyne sloȝ the sonus of Sedechie in Reblatha, in his eȝen; and alle the noble men of Juda sloȝ the king of Babiloyne. Also the eȝen of Sedechie he pullide out, and bond hym in gyues, that he shulde be ladde in to Babiloyne. The hous also of the king and the hous of the comun brenden vp the Caldeis with fyr, and the wal of Jerusalem thei turneden vpsodoun. And the remnaunt of the puple, that abiden in the cite, and the ferr floun, that hadden ouerfloun to hym, and the wast of the comun, that hadde abiden, Nabusardan, maister of knyȝtes, translatede in to Babiloyne. And of the folc of pore men, that no thing vnnethe hadde, Nabusardan, the maister of knyȝtus, lafte in the lond of Juda, and ȝaf to them vynes and cesternes in that dai. Forsothe Nabugodonosor, king of Babiloyne, of Jeremye hadde comaundid to Nabusardan, maister of the chyalrie, seiende, Tac hym, and put vp on hym thin eȝen, and no thing of euel to hym do thou; but as he shal wiln, so do thou to hym. Sente thanne Nabusardan, prince of the chyualrie, and Lesban, and Rapsaces, and Meregel, and Seresel, and Rebynag, and alle the beste of the king of Babiloyne, senten, and toke Jeremye fro the vestiarie of the prisoun, and token hym to Godolie, sone of Aicham, sone of Safan, that he shulde gon in to the hous, and dwelle in the puple. To Jeremye forsothe don is the wrd of the Lord, whan he was closid in the vestiarie of the prisoun, seiende, Go, and sey to Abdemalech Ethiope, seiende, These thingus seith the Lord of ostus, God of Irael, Lo! Y shal bringe in my wrdus vp on this cite in to euel, and not in to good; and thei shul be in thi siȝt in that dai. And Y shal delyuere thee in that dai, seith the Lord, and thow shalt not be take in to the hondus of the men, that thou dredist; but delyuerende Y shal delyuere thee, and bi swerd thou shalt not falle; but shal ben to thee thi soule in to helthe, for in me thou haddest trost, seith the Lord.
The wrd that ys maade to Jeremye fro the Lord, aftir that he is laft of Nabusardan, maister of the chyualrie, fro Rama, whan he toc hym bounde with cheynes, in the myddel of alle that passeden fro Jerusalem, and fro Juda, and thei weren lad in to Babiloyne. Thanne the prince of the chyualrie, takende Jeremye, seide to hym, The Lord thi God spac this euel vp on this place, and the Lord broȝte to, and dide, as he spac; for ȝee synneden to the Lord, and herden not the voys of hym, and don is to ȝou this wrd. Now thanne lo! Y haue loosid thee to dai of the cheynes that ben in thin hondis; yf it plese to thee that thou come with me in to Babiloyne, cum, and Y shal putte myn eȝen vp on thee; yf forsothe it displese to thee to come with me in to Babiloyne, sit stille heer; lo! al the lond in thi siȝte is, that thou shalt cheese, and whider shal plese to thee that thou go, thider go, and with me wile thou not come. But dwel anent Godoliam, sone of Aicham, sone of Safan, whom beforsette the king of Babyloyne to the cites of Juda; dwel therfore with hym in the myddel of the puple, or whider euer it shal plese to thee that thou go, go. The maister of the chyualrie ȝaf also to hym metus, and litil ȝiftus, and lafte hym. Jeremye forsothe cam to Godolie, sone of Aicham, in to Masfa, and dwelte with hym, in the myddel of the puple that was laft in the lond. And whan herd hadden alle the princes of the ost, that weren scatered bi regiownus, thei and ther felawis, that the king of Babiloyne hadde bifor maad Godolie, sone of Aicham, to the lond, and that hadde bitake to hym men, and wymmen, and litil childer, and of the pore men of the lond, that weren not translatid in to Babiloyne, camen to Godolie in to Masfa; and Ismael, the sone of Nathanye, and Johannan, the sone of Caraie, and Jonathan, and Sareas, the sone of Thenoemeth, and the sonus of Offi, that weren of Nethofati, and Jeconye, the sone of Mechati, and thei and the men of hem. And swor to them Godolie, the sone of Aicham, sone of Safan, and to the felawes of hem, seiende, Wileth not drede to serue to the Caldeis; dwelleth in the lond, and serueth to the king of Babiloyne, and weel shal be to ȝou. Lo! Y dwelle in Masfath, that Y answere to the heste of the Caldeis, that ben sent to vs; ȝee forsothe gedereth vyndage, and rep, and oile, and leith vp in ȝoure vesselis, and dwelleth in ȝoure cites that ȝee holden. But and alle the Jewis, that weren in Moab, and in the sonus of Amon, and in Ydume, and in alle the regiouns, herd that the king of Babiloyne hadde ȝoue the remnaunt in Jewerie, and that he hadde mad prouost vp on hem Godoliam, sone of Aicham, sone of Safan, turneden aȝeen forsothe alle the Jewis of all the places, to whiche thei hadde floun, and camen to the lond of Juda, to Godolie in to Masfath, and gedereden wyn and rep ful myche. Johanna forsothe, the sone of Charaie, and alle the princes of the ost, that weren scatered in the regiouns, camen to Godolie in to Masfa, and seiden to hym, Wite thou, for Bahalis, king of the sonus of Amon, sente Ysmael, the sone of Nathanye, to smyte thi lif. And Godolie, sone of Aicham, trowede not to them. Johannan forsothe, sone of Chare, seide to Godolie, aside in Masfath spekende, I shal go, and smyte Ismael, the sone of Nathanye, no man witende, lest he sle thi lif, and be scatered alle the Jewes, that ben gedered to thee, and pershe shul the relikes of Juda. And Godolie, the sone of Aicham, seith to Johannan, the sone of Chare, Wile thou not do this wrd, fals forsothe thou spekist of Ismael.
And don is in the seuenthe moneth, cam Ismael, the sone of Nathanye, sone of Elisame, of the kingus sed, and the beste men of the king, and ten men with hym, to Godolie, sone of Aicham, in Masfa; and thei eete there loeues to gydere in Masfa. Rysen forsothe Ismael, the sone of Nathanye, and the ten men that with hym weren, and smyten Godolie, the sone of Aicham, sone of Safan, with swerd, and slowen hym, whom bifore hadde mad the king of Babiloyne to the lond. Also alle the Jewis that weren with Godolie in Masfa, and the Caldeis, that ben founde there, and the men fiȝteres, Ismael smot. The secounde forsothe dai, after that he hadde slayn Godolie, no man ȝit witende, camen men of Sichym, and of Silo, and of Samarie, eiȝteti men, shauen the berd, and the clothis kut, and defoulid; ȝiftus and encens hadden in the hond, that thei shulden offre in the hous of the Lord. Gon out thanne Ismael, the sone of Natanye, in to aȝen comyng to them fro Masfath, goende and wepende wente. Whan forsothe he hadde aȝen come to them, he seide to them, Cometh to Godolie, sone of Aicham; the whiche whanne hadden comen to the myddel of the cite, slooȝ hem Ismael, the sone of Nathanye, aboute the myddel of the lake, he and the men that weren with hym. Ten men forsothe ben founden among hem, that seiden to Ismael, Wile thou not slen vs, for wee han tresor in the feld, of whete, and of barly, and of oile, and of hony. And he cesede, and sloȝ hem not with ther brethern. The lake forsothe in to whiche Ismael threȝ alle the careynus of the men, whom he smot for Godolie, it is whiche made Asa the king for Basa, the king of Irael; Ismael, the sone of Natanye, fulfilde it with slayn men. And Ismael broȝte caitif alle the relikis of the puple, that weren in Masfath, the doȝtris of the king, and al the puple that abiden in Masfath, whom Nabusardan, prince of the chyualrie, hadde betake to Godolie, sone of Aicham. And Ismael, the sone of Nathanye, toc them, and wente awei, that he shulde go to the sonus of Amon. Herde forsothe Johanna, the sone of Carae, and alle the princes of fiȝteres, that weren with hym, al the euel that don hadde Ismael, the sone of Natanye. And taken to alle the men, thei wente forth, that thei schuld fiȝte aȝen Ismael, the sone of Natanye; and founden hym at manye watris, that ben in Gabaon. And whan seen hadde al the puple, that was with Ismael, Johannan, sone of Carae, and al the princes of fiȝteres, that weren with hym, gladeden. And turned aȝeen is al the puple, that Ismael hadde taken in Masfath; and turned aȝeen, it ȝide awei to Johannan, the sone of Carae. Ismael forsothe, the sone of Nathanye, fleiȝ with eiȝte men fro the face of Johanna, and ȝide awei to the sonus of Amon. Toc thanne Johanna, the sone of Carae, and alle the princes fiȝteres, that weren with hym, al the remnaunt of the comun, that he hadde broȝt aȝeen fro Ismael, the sone of Nathanye, fro Masfa, aftir that he hadde smyte Godolie, sone of Aicham, stronge men to bataile, and wymmen, and childer, and geldingus, that he hadde broȝt aȝeen fro Gabaon. And thei wenten awei, and seten pilgrimagende in Canaan, that is byside Bethlem, that thei shulde go, and weende in to Egipt fro the face of Caldeis; forsothe thei dredden hem, for smyten hadde Ismael, sone of Natanye, Godolie, sone of Aicham, whom biforn hadde put the king of Babiloyne in the lond of Juda.
And wenten nyȝ alle princes of fiȝteres, and Johanna, sone of Carae, and Jeconye, the sone of Josie, and the tother comun, fro litil vnto myche; and seiden to Jeremye, the profete, Falle oure orisoun in thi siȝt, and preȝe thou for vs to the Lord thi God, for alle these remnauns; for wee ben laft fewe of manye, as thin eȝen biholden vs; and telle to vs the Lord thi God the weie, bi whiche wee go, and the wrd that wee do. Seide forsothe to them Jeremye, the profete, I haue herd; lo! Y preȝe to the Lord oure God, after alle ȝoure wrdus; eche wrd, what euere he shal answere to me, Y shal shewe to ȝou, ne Y shal hile ȝou any thing. And thei seiden to Jeremye, Be the lord among vs witnesse of treuthe and of feith; and if not after eche wrd in whiche shal sende thee thi God to vs, so wee shal do, whether good or euel. To the vois of the Lord oure God, to whom wee sende thee, wee shul obeshe, that wel be to vs, whan wee shul here the vois of the Lord oure God. Whan forsothe fulfild weren ten daȝes, don is the wrd of the Lord to Jeremye. And he clepide Johannan, the sone of Carae, and alle the princes of fiȝteres, that weren with hym, and al the puple fro the leste to the meste; and seide to them, These thingus seith the Lord God of Irael, to whom ȝee han sente me, that Y shulde lei forth ȝoure preieres in the siȝt of hym. If restende ȝee schulen abide in this lond, I shal bilde ȝou vp, and not destroȝen; Y shal plaunte, and not pulle vp; now forsothe Y am plesid vpon the euel that Y dide to ȝou. Wileth not drede fro the face of the king of Babiloyne, whom ȝee aferd dreden; wileth not dreden hym, seith the Lord, for with ȝou Y am, that Y make ȝou saf, and delyuere fro his hond. And Y shal ȝyue to ȝou mercies, and han reuthe of ȝou, and to dwelle ȝou Y shal make in ȝoure lond. If forsothe ȝee shul sei, Wee shul not dwelle in this lond, ne wee shul here the vois of the Lord oure God, seiende, Nai, but to the lond of Egipt wee shul go, where wee shul not see bataile, and noise of trumpe wee shul not heren, and hunger wee shul not suffre, and there wee shul dwelle; for that now hereth the wrd of the Lord, ȝee remnaunt of Juda. These thingus seith the Lord of ostus, God of Irael, If ȝee shul sette ȝoure face, that ȝee go in to Egipt, and ȝee shul gon in, that there ȝee dwelle, swerd that ȝee drede shal there take ȝou in the lond of Egipt, and hunger for whiche ȝee be besy shal cleue to ȝou in Egipt; and there ȝee shul die. And alle the men that setteden ther face, that they go in to Egipt, and dwelle there, shul die with swerd, and hunger, and pestilence; no man of hem shal lefe, ne scape fro the face of the euel, that I shal bringe to vp on hem. For these thingus seith the Lord of ostus, God of Irael, As ȝoten out is my woodnesse and myn indignacioun vp on the dwelleres of Jerusalem, so shal be ȝoten out myn indignacioun vpon ȝou, whan ȝee shul go in to Egipt; and ȝee shul ben in to an oth of riȝt, and in to stoneyng, and in to cursing, and in to repref; and ȝee shul no more see this place. The wrd of the Lord vp on ȝou, ȝee remnauns of Juda; wileth not go in to Egipt; witende ȝee shul wite, that aȝenwitnessid Y haue to ȝou this day; for ȝee han disceyued ȝoure soules, ȝee forsothe han sente me to the Lord ȝoure God, seiende, Preȝe thou for vs to the Lord oure God, and after alle thingis what euere shal sei to thee the Lord oure God, so tel to vs, and wee shul don. And Y haue told to ȝou to day, and ȝee han not herde the vois of the Lord oure God, vpon alle thingus for whiche he sente me to ȝou. Now therfore witende ȝee shul wite, for with swerd, and hunger, and pestilence ȝee shul die, in the place to whiche ȝee wolde go in, that ȝee dwelle there.
Don is forsothe, whan fulfild hadde Jeremye spekende to the puple alle the wrdus of the Lord God of hem, for whiche sente hadde hym the Lord God of hem to them, alle these wrdis, seide Azarye, sone of Josie, and Johanna, sone of Carae, and alle the proude men, seiende to Jeremye, Lesing thou spekest; sente not thee the Lord oure God, seiende, Ne go ȝee in to Egipt, that ȝee dwelle there; but Baruch, the sone of Neri, stireth thee aȝen vs, that he take vs in the hondus of Caldeis, that thei sle vs, and make to ben ouerlad into Babiloyne. And herde not Johanna, sone of Carae, and alle the princes of fiȝteres, and al the puple, the vois of the Lord, that thei shulden dwelle in the lond of Juda. But takende Johanna, sone of Carae, and alle the princes of fiȝteres, alle the men of the remnauntis of Juda, that weren turned aȝeen fro alle Jentiles, to whiche thei weren befor scatered, that thei shulde dwelle in the lond of Juda; men, and wymmen, and litil childer, and the doȝtris of the king, and eche soule, that laft hadde Nabusardan, prince of the chyualrie, with Godolie, sone of Aicham, sone of Safan; and toc Jeremye, the profete, and Baruch, the sone of Neri, and wenten in to the lond of Egipt; for thei obeshiden not to the vois of the Lord, and camen in to Tapnys. Don is the wrd of the Lord to Jeremye in Tapnys, seiende, Tac to thee in thin hond grete stones, and hyd hem in the caue, that is vnder the tily wal, in the ȝate of the hous of Farao, in Tapnys, byholdende the men Jewis. And thou shalt sei to them, These thingus seith the Lord of ostus, God of Irael, Lo! Y shal sende, and take Nabugodonosor, king of Babiloyne, my seruaunt, and setten his trone vp on these stonus, that Y haue hid; and he shal sette his see vp on hem. And comende he shal smyte the lond of Egipt, whom in deth in to deth, and whom in caitifte in to caitifte, and whom in swerd in to swerd. And he shal teende fyr in the washing templis of the godus of Egipt, and to-brenne them, and caitif he shal lede them; and shal ben coouered the lond of Egipt, as is coouered a shepherde with his mantil; and he shal gon oute thennus in pes. And he shal altobrose the ymages of the hous of the sunne, that ben in the lond of Egipt; and the wasshing templis of the godus of Egipt he shal to-brenne with fyr.
The wrd that is don to Jeremye, and to alle the Jewis, that dwellen in the lond of Egipt, dwellende in Magdalo, and in Tannys, and in Memphis, and in the lond of Fatures, seiende, These thingus seith the Lord of ostus, God of Irael, Ȝee han seen al thys euel, that Y haue broȝt vp on Jerusalem, and vp on alle the cites of Juda; and lo! thei ben desert to dai, and ther is not in hem a dwellere; for the malice that thei diden, that me to wrathe thei shulde terre, and gon, and sacrifien, and herien alien godus, that thei knewe not, and ȝee, and thei, and ȝoure fadris. And Y sente to ȝou alle my seruauns and profetus, fro nyȝt risende, and sendende, and seiende, Wileth not do the wrd of this maner abhominacioun. And thei herden not, ne boweden in ther ere, that thei were conuertid fro ther eueles, and sacrifieden not to alien godis. And ȝot out is myn indignacioun and wodnesse, and tend vp it is in the cytes of Juda, and in the stretus of Jerusalem; and turned thei ben in to wildernesse, and wastite, after this day. And now these thingus seith the Lord of ostus, God of Irael, Whi do ȝee this grete euel aȝen ȝoure soulus, that die of ȝou man and womman, litil child and soukende, fro the myddel of Jude, ne be laft to ȝou any thing residue, terrende me in the werkes of ȝoure hondus, in sacrifiende to aliene godus in the lond of Egipt, in to whiche ȝee ben come, that ȝee dwelle there, and pershe, and be in to cursing, and in to repref to alle Jentilis of erthe? Whether ȝee han forȝete the euelis of ȝoure fadris, and the euelis of the kingus of Juda, and the euelis of the wyues of hem, and ȝoure eueles, and the euelys of ȝoure wyues, that thei diden in the lond of Juda, and in the regiouns of Jerusalem? Thei ben not clensid vnto this day, and thei dredde not, and wente not in the lawe of the Lord, and in myn hestus, that Y ȝaf bifor ȝou, and bifor ȝoure fadris. Therfore these thingus seith the Lord of ostus, God of Irael, Lo! Y shal sette my face in ȝou in to euel, and destroȝen al Juda, and take the remnauns of Juda, that setteden ther faces, that thei shulden go in to the lond of Egipt, and dwelle there; and thei shul be wastid alle in the lond of Egipt, and thei shul falle in swerd, and in hunger shul be wastid, fro the leste vn to the meste, in swerd and in hunger thei shul die, and thei shul be in to riȝt of swering, and in to myracle, and in to cursing, and in to repref. And Y shal visite vp on the dwelleres of the lond of Egipt, as Y visitede vp on Jerusalem, in swerd, and hunger, and pestilence. And ther shal not be that scape, and be the residue of the remnaunt of Jewis, that gon that thei pilgrimage in the lond of Egipt, and be turned aȝeen to the lond of Juda, to whiche thei reren vp ther soules, that thei be turned aȝeen, and dwelle there; thei shul not be turned aȝeen thidur, no but thei that floun. Answerende forsothe to Jeremye alle the men, witende that ther wyues shulden sacrifien to alien godus, and alle the wymmen, of whiche stod a gret multitude, and al the puple of dwelleris in the lond of Egipt, in Fatures, seiende, The wrd that thou speeke to vs in the name of the Lord oure God, wee shul not heren of thee, but doende wee shul do eche word that shal gon oute of oure mouth, that wee sacrifie to the queen of heuene, and offre to hir sacrifise of licoures, as diden wee, and oure fadris, oure kingus, and oure princes, in the cheef cites of Juda, and in the stretus of Jerusalem; and we weren fulfild with loeues, and wel it was to vs, and euel wee seȝen not. Fro that forsothe tyme, that wee ceseden to sacrifien to the queen of heuene, and to offre to hir sacrifises of licoures, wee nededen alle thingus, and with swerd and hunger wee ben wastid. That if wee sacrifien to the queen of heuene, and offre to hir sacrifises of licoures, whether withoute oure men wee shul do to hir plesaunt cakes, for to herie hir, and sacrifises of licoures to ben offred? And Jeremye seide to al the puple, aȝen the men, and aȝen the wymmen, and aȝen al the folc, that answereden to hym the wrd, seiende, Whether not the sacrifise that ȝee sacrifieden in the cites of Juda, and in the stretus of Jerusalem, ȝee, and ȝoure fadris, ȝoure kingus, and ȝoure princes, and the puple of the lond, of these thingus recordide the Lord, and it steȝede vp vpon his herte; and the Lord myȝte no mor bern, for the malice of ȝoure studies, and for the abhomynaciouns that ȝee diden? And don is ȝoure lond in to desolacioun, and in to stoneing, and in to cursing, for thi that ther is not a dwellere, as ys this dai. Therfore for ȝee sacrifieden to maumetus, and synneden to the Lord, and ȝee herden not the vois of the Lord, and in the lawe, and hestus, and in his witnesses ȝee han not gon, therfore camen to ȝou these eueles, as is this dai. Jeremye forsothe seide to al the puple, and to alle the wymmen, Hereth the wrd of the Lord, al Juda, that ben in the lond of Egipt. These thingus seith the Lord of ostus, God of Irael, seiende, Ȝee and ȝoure wyues speeken with ȝoure mouth, and with ȝoure hondus fulfilden, seiende, Do wee oure vouwis that wee vouweden, that wee sacrifie to the quen of heuene, and offre to hir sacryfises of licoures; ȝee han fulfild ȝoure vouwis, and in werc ȝee han do them. Therfore hereth the wrd of the Lord, al Juda, that dwellen in the lond of Egipt; Lo! Y swor in my gret name, seith the Lord, for no mor shal be clepid my name of the mouth of eche man Jew, seiende, The Lord God lyueth, in the lond of Egipt. Lo! Y shal waken vp on hem in to euel, and not in to good; and to-wastid shul ben alle the men of Juda, that ben in the lond of Egipt, with swerd and hungur, to the tyme that fulli thei ben wastid. And they that shul flee swerd, shul turne aȝeen fro the lond of Egipt in to the lond of Juda, fewe men; and wite shul al the remnaunt of Juda, of the men goende in to the lond of Egipt, that thei dwelle there, whos sermoun be fulfild, myn or theris. And this to ȝou a tocne, seith the Lord, that Y visite vp on ȝou in this place, that ȝee wite, for verrely shul be fulfild my wrdus aȝen ȝou in to euel. These thingus seith the Lord, Lo! Y shal take Farao, king of Egipt, in the hond of his enemys, and in the hond of men sechende the soule of hym, as Y toc Sedechie, king of Juda, in the hond of Nabugodonosor, king of Babiloyne, his enemy, and sechende his soule.
The wrd that spac Jeremye, the profete, to Baruch, the sone of Neri, whan he hadde write these wrdus in the boc, of the mouth of Jeremye, the ferthe ȝer of Joachym, sone of Josie, king of Juda, seiende, These thingus seith the Lord God of Irael to thee, Baruch. Thou seidist, Wo to me wrecche, for addid hath the Lord sorewe to my sorewe; I trauailede in my weiling, and reste Y fond not. These thingus seith the Lord, Thus thou shalt sei to hym, Lo! whom Y bildide, Y destroȝe, and whom Y plauntede, Y pulle vp, and al this lond. And thou sechest to thee grete thingus; wile thou not seche, for lo! Y shal bringe euel vp on eche flesh, seith the Lord, and Y shal ȝyue to thee thi soule in to hele, in alle places, to whiche euer thou shalt go.
The wrd of the Lord that is don to Jeremye, profete, aȝen Jentiles; to Egipt, aȝen the ost of Farao Nechao, king of Egipt, that was biside the flod of Eufraten, in Carkamys, whom smot Nabugodonosor, king of Babiloyne, in the ferthe ȝer of Joachym, sone of Josie, king of Juda. Greitheth sheeld and target, and goth forth to bataile. Ioyneth hors, and steȝeth vp, ȝee hors men; stondeth in helmes, pulsheth speres, clotheth ȝou with habiriownus. What thanne? I saȝ hem ferd, and the backes turnende, the stronge men of hem hewen doun; and thei floun togidere hastid, ne thei beheelden; ferd on eche syde, seith the Lord. Flee shal not the swifte, ne the stronge weene hymself to be saued; to the north, biside the flod of Eufraten, thei ben ouercome, and felden doun. Who is this, that as the flod steȝeth vp, and as of flodis swellen his swolewis? Egipt at licnesse of a flod steȝeth vp, and as flodus shul be moued his flowingus; and he shal sey, Steȝende vp Y shal couere the erthe destroȝe cite, and his dwelleres. Steȝeth vp hors, and ful out ioȝe thin chares; and go forth, stronge men, Ethiope and Libie, holdende sheeld, and Liddy, takende and throwende arwis. That dai forsothe of the Lord God of ostus, dai of veniaunce, that he take veniaunce of his enemys; deuouren shal the swerd, and be fulfild, and be todrunke with the blod of hem; victorie sacrifise forsothe of the Lord of ostus in the lond of the north, biside the flod of Eufraten. Steȝe vp in to Galaad, and tac the gumme, that is clepid recyne, thou maiden doȝter of Egipt. In veyn thou hast multeplied medecynes; helthe shal not be to thee. Herden Jentiles thi shenshepe, and thi ȝellinge fulfilde the erthe; for the stronge man putte aȝen the stronge man, and bothe togidere fellen. The wrd that the Lord spac to Jeremye, the profete, vp on that that to come was Nabugodonosor, king of Babyloyne, and to smyte the lond of Egipt. Telleth to Egipt, and herd maketh in Magdalo, and eft sowne it in Memfys, and in Tapnys seith, Stond, and greithe thee, for deuoure shal swerd tho thingus that in thin enuyroun ben. Whi to-rotide thi stronge? He stod not, for the Lord turnede hym vp so doun. He multepliede men fallende, and the man fel to his neȝhebore; and thei shul seyn, Ris, and turne wee aȝeen to oure puple, and to the lond of oure birthe, fro the face of the swerd of the culuer. Clepeth the name of Farao, king of Egipt; tyme hath broȝt noise. I lyue, seith the king, Lord of ostus his name; for as Thabor in mounteynes, and as Carmel in the se, he shal come. Vesseles of transmygracioun mac to thee, thou dwelleresse, doȝter of Egipt; for Memfys in wildernesse shal ben, and be forsoken and vnhabitable. The she calf fair and shapli Egipt; the prickere fro the north shal come to hir. Also his hirid men, that woneden in his myddel as fattyd calues, ben turned, and floun togidere, ne myȝte stonde; for the dai of the slaȝter of them shal come vp on hem, tyme of ther visiting. His vois as of bras shal sowne, for with the ost thei shul go forth, and with axes thei shul come to hym. As fallende doun trees thei heewe doun his wilde wode, seith the Lord, that mai not be noumbred; they ben multeplied aboue locustus, and ther is not in them noumbre. Confoundid is the doȝter of Egipt, and take in the hond of the puple of the north, seide the Lord of ostus, God of Irael. Lo! Y shal visite vp on the noise of Alisaundre, and vp on Farao, and vp on Egipt, and vp on his godus, and vp on his kinges, and vp on hem that trosten in hym. And Y shal ȝyuen hem in the hond of men sechende the lif of hem, and in to the hondus of Nabugodonosor, king of Babiloyne, and in to the hondus of his seruauns; and after these thingus it shal be dwellid, as in the rathere daȝes, seith the Lord. And thou, my seruaunt Jacob, ne drede thou, ne take ferd, thou Irael; for lo! Y saaf shal make thee fro aferr, and thi sed fro the lond of his caitifte; and turnen aȝeen shal Jacob, and resten, and be mad welsum, and ther shal not ben, that fere hym. And wile thou not drede, thou my seruaunt Jacob, seith the Lord, for Y am with thee; for Y shal waste alle Jentiles, to whiche I caste thee out; thee forsothe I shal not waste, but Y shal chastise thee in dom, ne as to an ynnocent Y shal sparen to thee.
That don is the wrd of the Lord to Jeremye, profete, aȝen Palestynus, er Farao shulde smyte Gasam. These thingus seith the Lord, Lo! watris shul steȝen vp fro the north, and ben shul as a styff strem flowende, and couere shul the lond, and his plente, the chef cite and his dwelleris. Crie shul men, and ȝelle shul alle the dwelleris of the lond, fro the noise of the bost of the armede men, and of his fiȝteres, and fro the stiring of his foure horsid carres, and fro the multitude of his whelis. Beheelden not the fadris the sonus with hondus losid atwynne, for the comyng of the dai in whiche shul be wastid alle Filisteis; and ben scatered Tirus and Sidon, with alle his othere helpes. The Lord forsothe destroȝede Palestynes, the remnauns of the yle of Capadoche. Ther cam ballidnesse vp on Gasam; al stille was Ascalon, and the remnauns of the valei of hem. Hou longe thou shalt be throwe doun, O! thou swerd of the Lord, hou longe shalt thou not reste? Go in to thi shethe, be thou refreshid, and be stille. What maner shal it reste, whan the Lord shal comaunde to it aȝen Ascalon, and aȝen his regiouns nyȝ the se, and there he shal withsei to it?
To Moab these thingus seith the Lord of ostus, God of Irael. Wo vp on Nabo, for wastid she is, and confoundid; taken is Cariathiarym, confoundid is the stronge, and tremblede; and ther is no mor ful out ioȝing in Moab, aȝen Esebon thei thoȝten euel. Cometh, and scatere wee it fro the folc of kynde. Therfore stille thou shalt be stille, and swerd shal folewe thee; vois of the cry fro Oronaym, wastite, and gret to-treding. To-treden is Moab, telleth out the cry to his litil childer. Bi the steȝing vp forsothe Luyth wepende steȝede vp in weping, for in the going doun of Oronaym the enemys the ȝelling of to-treding herden. Fleeth, saueth ȝoure soulis; and ȝee shul be as iencian trees in desert; for thi forsothe that thou hadde trost in thi strengthingus, and in thi tresores, thou also shalt ben take. And Camos shal go in to transmygracioun, his prestus and his princes togidere; and the robbere shal come to eche cheef cite, and no cheef cyte shal be saued; and pershen shul valeys, and wastid shul be wilde feldis, for the Lord seyde. Ȝyueth flour to Moab, for flourende he shal gon out; and his cites shul be desert, and vnhabitable. Cursid that doth the werc of God gilendeli; and cursid, that forfendeth his swerd fro blod, or repreuynge of synne. Fructuous was Moab fro his waxende ȝouthe, and he restede in his drestis, ne is ouerheld fro vessel in to vessel, and in to transmygracioun he ȝide not; therfore abod stille his tast in hym, and his smel is not chaungid. Therfore lo! daȝes comen, seith the Lord, and Y shal sende to hym ordeyneres, and araieres of litle wyn vesselus; and thei shul araien hym, and his vesseles heelden out, and the litil wyn vesselis of hem hurtlen togidere. And confoundid shal be Moab fro Camos, as confoundid is the hous of Irael of Bethel, in whiche it hadde trost. What maner sey ȝee, Stronge men wee ben, and stalwrthe men to fiȝte? Wastid is Moab, and his cites thei brenden vp, and hys chosen ȝunge men wente doun in to slaȝter, seith the king, Lord of ostus his name. Nyȝ is the deth of Moab, that it come, and his euel swiftli cometh nyȝ ful myche. Coumforteth hym, alle ȝee that ben in his cumpas; alle ȝee that witen his name, seith, What maner is to-broke the stronge ȝerde, the glorious staf? Cum doun fro glorie, sit in thrist, thou dwelling o
f the doȝter of Dibon; for the wastere of Moab shal steȝe vp to thee, shal scatere thi strengthingus. In the weie stond, and bihold thou the dwelling of Aroer; aske hym fleende that scapede; sei, What fel? Confoundid is Moab, for he is ouercome; ȝelleth, and crieth; telleth in Arnon, for wastid is Moab. And dom cam to the feldi lond, vp on Elon, and vp on Jesa, and vp on Mefath, and vp on Dibon, and vp on Nabo, and vp on the hous of Debalthaym, and vp on Cariathiarym, and vp on Bethgamul, and vp on Bethmaon, and vp on Scarioth, and vp on Bosra, and vp on alle the cites of the lond of Moab, that aferr and that nyȝ ben. Kut awei is the horn of Moab, and his armes tobrosid, seith the Lord. Drunkneth hym with the chalus of the wrathe of the Lord, for aȝen the Lord he is rered out; and he shal hurtle the hond of Moab in his vomyng, and be shal in to scornyng and he. Forsothe he was in to scornyng to thee, Irael, as among theues thou shuldist han founde hym; therfore for thi wrdus that aȝen hym thou speeke, caitif thou art lad. Lefeth cites, and dwelleth in a ston, ȝee dwelleris of Moab, and beth as a culuer bildende in the ouerest mouth of the hole. Wee han herd the pride of Moab; proud he is gretli; his heiȝte forsothe, and his owne enhaunsyng, and pride, and the heiȝte of his herte, Y wot, seith the Lord; his bost, and his owne enhauncing, and that ther is not biside it his vertue, ne after that he myȝte, it forcede to do. Therfore vp on Moab I shal weile, and to al Moab Y shal crien, to the men of the britil wal weilende. Of the weiling of Jaser Y shal wepe to thee, thou vyne of Sabama; thi railingus passeden the se; vn to the se of Jaser thei ful camen vp on thi rep, and thi vyndage thi reuere fel. Don awei is ful out ioȝing and glading fro Carmel, and fro the lond of Moab, and wyn fro the presses Y toc doun; the tredere of the grape the wont myrie song shal not synge. Of the cri of Esebon vnto Eleale and Jeesa ȝeeuen ther vois, fro Segor vnto Oronaym the stoneid she calf; the watris forsothe of Nemrym shul be werst. And Y shal take awey fro Moab, seith the Lord, the offrende in heeȝe thingus, and the sacrifiende to his godus. Therfore myn herte to Moab as a trumpe of bras shal sowne, and myn herte to the men of the tili wal shal ȝyue soun of trumpis; for more he dide than he myȝte, therfore thei persheden. Eche forsothe hed ballidnesse, and eche berd shauen shal be; in alle hondus the binding togidere, and vp on eche bac heire. And vp on alle the rooues of Moab, and in alle his stretus alle weiling, for he to-brosede Moab as a vessel vnprofetable, seith the Lord. What maner she is ouer come, and thei ȝelleden? hou Moab threȝ doun the noll, and is confoundid? And Moab shal be in to scornyng, and in to exsaumple to alle men in his cumpas. These thingus seith the Lord, Lo! as an egle he shall fleen out, and strecchen out his wengus to Moab. Taken is Carioth, and strengthingus ben caȝte; and ben shal the herte of stronge men in that dai, as the herte of a womman trauailende with child. And cese shal Moab to ben a puple, for aȝen the Lord it gloriede. Inward ferd, and dich, and grene vp on thee, O! dwellere of Moab, seith the Lord. Who shal flee fro the face of the ferd, shal falle in to the dich; and who shul steȝe vp fro the dich, shul be take with grene. Y shal bringe to forsothe vp on Moab the ȝer of visiting of hem, seith the Lord. In the shadewe of Esebon stode thei fro the grene fleende, for fyr wente out fro Esebon, and flaume from the myddel of Sion; and deuoure it shal the parte of Moab, and the top of the sonus of noise. Wo to thee, Moab; pershedist, thou puple of Camos, for caȝt ben thi sonus, and thi doȝtris in to caitifte shul be lad. And Y shal turne the caitifte of Moab in the last daȝes, seith the Lord. Hyderto the domes of Moab.
Also to the sonus of Amon these thingus seith the Lord. Whether ben not the sonus of Irael, or eir is not to it? whi thanne the eritage weldith Melchon Gad, and his puple in his cheef cites dwellide? Therfore lo! daȝes comen in thee, seith the Lord, and herd Y shal make vp on Rabath of the sonus of Amon the gnasting of bataile; and he shal be in to noyse scatered, and his doȝtris with fyr shal be brend, and Irael shal welde his welderes, seith the Lord. Ȝelle thou, Esebon, for wastid is Hai; crieth, ȝee doȝtris of Rabath, girdeth ȝou with heires, weileth, and goth aboute bi hegges; for Melchon in to transmygracioun shal be broȝt, his prestus and his princes togidere. What gloriest thou in valeis? Flowede doun thi valei, thou doȝter delicat, that trostedist in thi tresores, and seidist, Who shal come to me? Lo! Y shal bringen in ferd vp on thee, seith the Lord God of ostus, God of Irael, of alle that ben in thi cumpas; and ȝee shul be scatered, eche fro ȝoure siȝt, ne shal be, that gedere the fleeres. And after these thingus Y shal make to turne aȝeen the fleeres and the caitifes of the sonus of Amon, seith the Lord. To Idume these thingus seith the Lord God of ostus. Whether no mor is wisdam in Theman? Pershede counseil fro sonus, vnprofitable mad is the wisdam of hem. Fleeth, and turneth backus; goth doun in to a swolewe, ȝee dwelleres of Dedan, for the perdicioun of Esau Y haue broȝt vp on hym, tyme of his visiting. Yf grape kutteres hadden come, vp on thee thei shulden han laft a cluster braunch; if theues in nyȝt hadden stoln, that shulde han suffisid to them. I forsothe discouerede Esau, and openede his hid thingus, and he shal not moun be coouered; wastid is his seed, and his brethern, and his neȝhebores, and he shal not be. Lef thi faderles childer, and Y shal make them to lyue, and thi widewis in me shul hope. For these thingus seith the Lord, Lo! to whom was not dom, that thei shulde drinke chalis, drinkende thei shul drinke; and thou as innocent shalt be laft? thou shalt not be innocent, but drinkende thou shalt drinke. For bi myself Y swor, seith the Lord, for in to wildernesse and in to repref, and in to desert, and in to cursing shal be Bosra; and alle his cites shul ben in to euere lastende wildernessis. Herd thing Y herde of the Lord, and a legat to Jentilis is sent; beth gedered, and cometh aȝen it, and rise wee togidere to bataile. Lo! forsothe a litil child Y ȝaf thee in Jentilis, despisable among men. Thin owne hauncyng desceyuede thee, and the pride of thin herte, that dwellist in cauys of the ston, and to cacche forcest the heiȝte of the hil; whan thou shalt enhaunce as an egle thi nest, thennus Y shal drawe thee, seith the Lord. And be shal Idume desert; eche that shal passe bi it, shal stoneyn, and whistle vp on alle his veniaunces; as turned vp so doun is Sodom and Gomor, and his nyȝ wonyngus, seith the Lord. Ther shal not dwelle there a man, and ther shal not tiln it the sone of man. Lo! as a leoun he shal steȝe vp, and of the pride of Jordan to a stalwrthe fairnesse; for sodeynli to renne Y shal make hym to it; and who shal be the chosen, whom Y shal bifor pute to hym? Who forsothe lic me, and who shall susteyne me, and who is this shepperde, that withstant to my chere? Therfore hereth the counseil of the Lord, that he wente in of Edom, and his thoȝtus, that he thoȝte of the dwelleres of Theman. Yf the litle childer of the floc shul not throwe them doun, no but they shuln scatere with them ther dwelling. Fro the vois of the falling of hem to-stirid is the erthe; cry in the rede se is herd of his vois. Lo! as an egle he shal steȝen vp, and fleen awei, and he shall spreden out his wengus vp on Bosra; and shal ben the herte of stronge men of Idume in that dai, as the herte of a womman trauailende with childe. To Damasch. Confoundid is Emath and Arfath, for werst heering thei herden; thei ben disturbid in the se, for bisynesse thei myȝten not reste. Losid atwynne is Damasch, turned is in to fliȝt; trembling caȝte it, anguysshes and sorewis heelden it, as a trauailende with childe. Hou thei forsoke the preisable cyte, the chef cite of gladnesse? Therfore fallen shul his ȝunge men in his stretes, and alle the men of bataile shul become stille in that dai, seith the Lord of ostus. And Y shal teende vp fyr in the wal of Damasch, and deuoure the wallis of Benadab. To Cedar, and to the reumys of Asor, that Nabugodonosor, king of Babiloyne, smot, these thingus seith the Lord. Riseth, and steȝeth vp to Cedar, and wasteth the sonus of the est. Ther tabernaclis and ther flockes thei shul taken; ther skynnus, and alle ther vesseles, and ther camailes thei shul gedere to them; and thei shul clepe vp on hem ferd in his cumpas. Fleeth, goth awei hugeli in swolewes, sitteth, that dwellen Asor, seith the Lord. Nabugodonosor, king of Babiloyne, wente in forsothe aȝen ȝou conseil, and thoȝte aȝen ȝow thoȝtis. Riseth, and steȝeth vp to a quyete folc of kinde, and dwellende trostili, seith the Lord; not dores ne his barres, alone dwellen. And ben shul ther camailes in to reuyng, and the multitude of bestus in to prei; and Y shal scatere them in to eche wind, that ben dodded in to the her, and of eche coest of hem Y shal bringe deth vp on hem, seith the Lord. And Asor shal be in to dwelling of dragounus, desert vnto withoute ende; ther shal not dwelle there a man, ne tiln it the sone of man. That don is the wrd of the Lord to Jeremye, the profete, aȝen Elam, in the bigynnyng of the regne of Sedechie, king of Juda, seiende, These thingus seith the Lord of ostus, God of Irael, Lo! I shal to-breke the bowe of Elam, and take ther strengthe. And Y shal bringe in vp on Elam foure wyndus fro the foure coestus of heuene, and Y shal wynewe them in to alle these windus; and ther shal not be folc of kinde, to whiche come not the ferr fleende of Elam. And Y shal make Elam to dreden biforn alle his enemys, and in the siȝte of men sechende the soule of hem; and Y shal bringe in vp on hem euel, the wrathe of my wodnesse, seith the Lord, and Y shal sende vp on hem swerd, to the tyme that Y to-waste them. And Y shal sette my see in Elam, and leese thennus kingus and princes, seith the Lord. In the laste forsothe daȝes Y shal make to be turned aȝeen the caitifes of Elam, seith the Lord.
The wrd that the Lord spac of Babiloyne, and of the lond of Caldeis, in the hond of Jeremye, profete. Telleth in folkus of kinde, and herd maketh; rereth vp a tocne; precheth, and wileth not hilyn; seith, Taken is Babilon, confoundid is Bel, ouercomen is Maradac; confoundid ben his grauen thingus, ouercome ben ther mawmetes. For steȝen vp shal aȝens it folc of kinde fro the north, that shall setten his lond in to wildernesse; and ther shal not be that dwelle in it, fro man vn to beste; and thei ben moued, and wenten awei. In tho daȝes, and in that tyme, seith the Lord, comen shul the sonus of Irael, they and the sonus of Juda togidere, goende and wepende shul go forth; and the Lord ther God thei shul seche in Sion, and aske the weie. Hider ther faces shul come, and ben set to the Lord with euere durende pes couenaunt, that with no forȝeting shal be don awey. The floc lost mad is my puple, ther shepperdus bigiliden hem, and maden to be vagaunt in mounteynus; fro mounteyn in to hil thei passeden, thei forȝeeten of ther couche. Alle that founden, eete them, and ther enemys seiden, We han not synned, for thi that thei han synned to the Lord, to the fairnesse of riȝtwisnesse, and to the abiding of ther fadris, to the Lord. Goth awei fro the myddel of Babiloyne, and fro the lond of Caldeis; goth out, and beth as goet bifor the floc. For loo! Y shal rere, and bringe in to Babiloyne the congregacioun of manye Jentilis, fro the lond of the north; and thei shul be greythed aȝen it, and in dai it shal be taken; his arewe as of the most strong man sleere, shal not be turned aȝeen voide. And Caldee shal be in to prei, and alle men wastende it shul be fulfild, seith the Lord. For ȝee ful out ioȝen, and grete thingus speken, reuende awei myn eritage; for heeld out ȝee ben as calues vpon gres, and ȝee looweden as boolis. Confoundid ys ȝoure moder ful myche, and euened to pouder that gat ȝou; lo! the laste she shal be in folkes of kinde, and desert with oute weie, and driende. Fro the wrathe of the Lord it shall not ben enhabitid, but be turned al in to wildernesse; eche that shal passe bi Babiloyne, shal stoneyn, and whistlen vp on alle his veniaunces. Beth redi aȝen Babilon bi enuyroun, alle that beenden bowe to fiȝten it doun; spareth not to dartes, for to the Lord it synnede. Crieth aȝen it, oueral it ȝaf hond; fellen his foundemens, and destroȝed ben his wallis; for the veniaunce of the Lord it is. Veniaunce taketh of it; as it dide, doth to it. Scatereth the sowere fro Babilon, and the holdende sikel in the tyme of rip, fro the face of the swerd of the culuer; eche to his puple shal be turned, and eche to ther lond shal fleen. Scatered is the floc of Irael, leownus threwen hym out; first eet hym king Assur, this the laste threȝ out his boenus, Nabugodonosor, king of Babiloyne. Therfore these thingus seith the Lord of ostus, God of Irael, Lo! I shal visite the king of Babiloyne, and his lond, as Y visitede king Assur; and Y shal bringe aȝeen Irael to his dwelling. And be fed shal Carmeel and Basan, and the mount of Effraym and Galaad shal be fulfild his soule. In tho daȝis, and in that tyme, seith the Lord, shal be soȝt the wyckenesse of Irael, and shal not be; and the synne of Juda, and shal not be founde; for mercyful Y shal be to them, whom I shal leeue. Vp on the lond of the lordshipende steeȝ thou vp, and vp on his dwelleres visite; waste, and sle, that after hem ben, seith the Lord; and do aftir alle thingus that Y comaunde to thee. Vois of bataile in the lond, and gret to-brosing. Hou to-broke and to-brosid is the hamer of al erthe? what maner is turned in to desert Babilon, in Jentilus? I grenede thee, and take thou art, Babilon, and wistist not; founde thou art, and caȝt, for the Lord thou terredist. The Lord openede his tresor, and broȝte forth vesselis of his wrathe; for werc is to the Lord God of ostus in the lond of Caldeis. Cometh to it fro vtmost coestus, openeth, that thei go out that to-treden it; taketh fro the weie stones, and doth in to hepes, and sleth it, ne be ther any thing laft. Scatereth alle his stronge men, come thei doun in to slaȝter; wo to them, for comen is the dai of hem, tyme of ther visiting. Vois of the fleeres, and of hem that scapeden fro the lond of Babiloyne, that thei telle in Sion the veniaunce of the Lord oure God, veniaunce of his temple. Telleth out in to Babilon to manye, to alle that beenden bowe. Stondeth togidere aȝen it bi cumpas, and no man scape; ȝeldeth to it after his werc, after alle thingus that it dide, doth to it; for aȝen the Lord it is rered, aȝen the hoeli of Irael. Therfore falle shuln his ȝunge men in his stretus, and alle his men fiȝteres shul bicome stille in that dai, seith the Lord. Lo! Y to thee, thou proude, seith the Lord God of ostus, for thi dai is come, tyme of thi visiting. And falle shal the proude, and at ones falle, and ther shal not be that rere hym; and Y shal teende vp fyr in his cites, and deuoure it shal alle thingus in his cumpas. These thingus seith the Lord of ostus, Chalenge suffren the sonus of Irael and the sonus of Juda togidere; alle that token hem, holden, thei wiln lefe not them. Ther aȝeenbiere strong, Lord of ostus his name; bi dom he shal defende ther cause, that he fere the lond, and to-stere the dwelleris of Babiloyne. Swerd to the Caldeis, seith the Lord, and to the dwelleris of Babilon, and to the princes, and to his wise men. Swerd to his deuynoures, that foolis shul be; swerd to his stronge men, that shul drede. Swerd to his hors, and to his chares, and to al the comun that is in his myddel, and thei shul be as wymmen; swerd to his tresores, for thei shul be reued awei. Droȝte vp on his watris shal be, and thei shul become drie; for the lond of grauen thingus it is, and in wndris glorieth. Therfore dwelle shal dragounus with fonned woode theues, and dwelle in it shul ostricchis; and me shal no more dwelle in it vn to euermore, ne shal be mad vp vn to ieneracioun and ieneracioun; as the Lord turned vp so doun Sodom and Gomor, and his nyȝ townes, seith the Lord. Ther shal not dwelle a man, ne tiln it the sone of man. Lo! a puple cam fro the north, and a gret folc of kinde, and manye kingus shul rise fro the coestus of the lond. Boewe and sheld thei shul take, cruel thei ben and vnmerciable; the vois of them as the se shal sowne, and vp on hors shul steȝen vp as a man redi to bataile, aȝeen thee, thou doȝter of Babilon. The king of Babiloyn herde the loes of hem, and loosed atwynne ben his hondus; anguysh caȝte hym, sorewe as the trauailende with childe. Lo! as a leoun steȝeth vp fro the pride of Jordan to a stalwrthe fairnesse, for to renne sodeynli I shal make hym to it; and who shal be the chosen, whom Y shal bifor putte to hym? Who forsothe lijc me? and who shal sustene me? and who is this shepperde that withstant to my chere? Therfore hereth the counseyl of the Lord, that in mynde he conseyuede aȝen Babylon, and his thoȝtis, that he thoȝt vpon the lond of Caldeis, no but with drawen hem the litil childer of flockus, no but scatered with them ther dwelling. Fro the vois of the caitifte of Babilon stirid is the lond, and cry among Jentiles is herd.
These thingus seith the Lord, Lo! Y shal reren vp on Babilon, and vp on his dwelleris, that ther herte rereden aȝen me, as a wind bringende in pestilence. And Y shal sende in to Babilon wyneweres, and thei shul wynewe it, and destroȝen his lond; for they camen vp on it on eche side in the dai of his tormenting. And he shal not wone, that beendith his bowe, and steȝen vp shal not the clothide with an habirioun; wileth not spare to his ȝunge men, sleth al his chyualrie. And falle shuln the slayne in the lond of Caldeis, and the woundid in his regeouns. For Irael was not forsake, or maad wydow, and Juda fro the Lord ther God, Lord of ostus; the lond forsothe of hem folfild is of gilte fro the hoely of Irael. Fleeth fro the myddel of Babilon, that eche man saue his soule; wileth not be stille vp on his wickenesse, for tyme of his veniaunce is to the Lord; his while he shal ȝelde to hym. A goldene chalis of Babiloyne in the hond of the Lord, drunknende al the lond; of his wyn drunke the Jentilis, and thennus thei ben to-stirid. Sodeynly fel Babilon, and is to-brosid; ȝelleth vpon yt, taketh recyne gumme to his sorewe, if parauenture he be helid. Wee han cured Babilon, and he is not helid; forsake wee it, and go wee eche in to his lond; for ful cam vn to heuenus hys dom, and vp rered is vn to the cloudus. The Lord broȝte forth oure riȝtwisnesses; come, and telle wee in Sion the werc of the Lord oure God. Sharpeth arwes, fulfilleth arwe cases; the Lord rerede his spirit of kingus of Medes, and aȝen Babilon is his mynde, that he leese it, for the veniaunce of the Lord is, the veniaunce of his temple. The king of Medus aȝen Babilon of the Lord is rered. Vp on the wallis of Babilon rereth a tocne, eecheth the warde, rereth the keperes, greithith busshemens; for the Lord thoȝt, and dide, what euere thingus he spac aȝen the dwelleris of Babilon. That dwellist vp on manye watris, riche in tresores, comen is thin ende, the foot mesure of thi kutting of. The Lord of ostus swor bi his lyf, for Y shal fulfille thee of men, as with bruc werm, and vp on thee a merie faring song shal be sunge. That made the erthe in his strengthe, biforn made redi the world in his wisdam, and bi his prudence straȝte out heuenus. Hym ȝyuende vois, ben multeplied watris in heuene; that rereth cloudus fro the vtmost of the erthe, leitus in to reyn made, and broȝte forth wind of his tresores. Fool is mad eche man of kunnyng, confoundid is eche ȝeetere in grauen thing; for fals is his ȝeting, ne ther is spyrit in hem. Veyne ben the werkus, and wrthi scornyng; in tyme of ther visityng thei shul pershe. Not as this the part of Jacob; for that made alle thingus he is, and Irael the kingus dignete of his eritage, the Lord of ostus his name. Thou hurtlist to me the vesselis of bataile, and Y shal hurtle in thee Jentilis, and scatere in thee reumus; and Y shal hurtle in thee the hors, and his hors man; and Y shal hurtle in thee the char, and his steȝere; and I shal hurtle in thee the man and the womman; and I shal hurtle in thee the old man and the child; and I shal hurtle in thee the ȝunge man and the maide; and I shal hurtle in thee the shepperde and his floc; and Y shal hurtle in thee the erthe tiliere and his ȝoc oxen; and I shal hurtle in thee dukes and the maister ȝugis. And I shal ȝeelde to Babilon, and to alle the dwelleris of Caldee, alle his euel, that he dide in Sion, in ȝoure eȝen, seith the Lord. Lo! Y to thee, thou hil berende pestilence, seith the Lord, that corumpist al the erthe. I shal strecche out myn hond vp on thee, and turne out thee fro stonus, and Y shal ȝyue thee in to mount of brennyng. And Y shal not take of thee a ston in to a corner, and a ston in to foundemens; but lost thou shalt be in to with oute ende, seith the Lord. Rereth a tocne in the lond, crieth with a trumpe in mounteynes; halewith vp on it Jentilis, telleth out aȝen it to the kingus of Ararath, of Menny, and of Ascheneth; noumbreth aȝen it Thasor, bringeth to vp on it hors, as bruke hauende tonge. Halewith vp on it Jentilis, kingus of Mede, his dukus, and alle his maister iugis, and al the lond of his power. And al to-moued shal be the lond, and disturbid; for wakide out aȝen Babilon the thoȝt of the Lord, that he poote the lond of Babilon desert, and vnabitable. Ceseden the stronge men of Babilon fro bataile, thei dwelten in places of refut; deuoured is ther stalwrthenesse, and made thei ben as wymmen; brend vp ben his tabernaclis, to-brosid ben his barres. The rennere to meete with the rennere shal come, and the messager to meete with the tellere, that he telle out to the king of Babiloyne, for taken is his cite fro the ouermost to the ouermost; and the forthis ben bifor ocupied, and the mershis ben brend vp with fyr, and the men fiȝteres ben disturbid. For these thingus seith the Lord of ostis, God of Irael, The doȝter of Babilon as a corn floor, tyme of his thresshing; ȝit a litil, and come shal the tyme of his reping. Eet me, deuourede me Nabugodonosor, king of Babiloyne; he ȝeeld me as a voide vessel, soupede me vp as a dragoun; he fulfilde his wombe with my tendernesse, and caste me out. Wickenesse aȝen me, and my flesh vp on Babiloyne, seith the dwelling of Sion; and my blod vp on the dwelleres of Calde, seith Jerusalem. Therfore these thingus seith the Lord, Lo! Y shal deme thi cause, and venge thi vengyng; and desert shal make his se, and shal drien his veyne. And Babylon shal be in to mynde hepis, the dwelling of dragounus, stoneing and whistling, for thi that ther is not a dwellere togidere. And leouns shul rore, and shake out shul her lockus, as the whelpus of leouns. In the hete of hem Y shal putte ther drinc; and Y shal drunkne them, that thei ben greeued with slep, and slepen an euere durende slep, that they rise not, seith the Lord. I shal lede them doun as lombis to slayn sacrifise, and as wetheris with kidus. Hou taken is Cisac, and caȝt is the glorious of al erthe? What maner mad is in to stoneyng Babilon among Jentilis? And steȝede vp vp on Babilon the se, with the multitude of his flodus it is couered. Mad ben his cites in to stoneyng, the lond vnabitable and desert; the lond in whiche no man dwelle, ne passe thurȝ it the sone of man. And Y shal visite vp on Bel in to Babilon, and throwen awei that, that it hadde soupid vp fro his mouth, and shul no mor flowe to it Jentilis; forsothe and the wal of Babiloyne shal at ones falle. Goth out fro his myddel, my puple, that eche man saue his lif fro the wrathe of the wodnesse of the Lord; and lest par auenture waxe nesshe ȝoure herte, and ȝee drede the heering, that shal be herd in the lond; and come shal in a ȝeer heering, and after this ȝer heering and wickenesse in the lond, and lordshipere vp on lordshipere. Therfore lo! daȝes comen, seith the Lord, and Y shal visite vp on grauen thingus of Babiloyne; and al hys lond shal be confoundid, and alle his slayne shuln falle in his myddel. And preise shul vp on Babiloyne heuenus, and erthe, and alle thingus that in hem ben; for fro the north shul come to it reueres, seith the Lord. And hou dide Babilon, that fallen shulde slayn men in Irael, so fro Babylon falle shul slayn men in al the lond. Ȝee that fledden the swerd, come, and wileth not stonde; recordeth aferr of the Lord, and Jerusalem steȝe vp on ȝoure herte. Confoundid wee ben, for wee han herd repref; couerede shenshype oure faces, for ther camen alienus vp on the halewing of the hous of the Lord. Therfore lo! daȝes comen, seith the Lord, and Y shal visite vp on the grauen thingus of Babiloyne, and in al his lond loowen shal the woundid. If steȝen shul Babilon in to heuene, and fastne in heiȝte his stalwrthenesse, to me shul come his wasteres, seith the Lord. Vois of the criende fro Babilon, and gret to-treding fro the lond of Caldeis, for the Lord wastide Babilon, and lost of it a gret vois; and sowne shuln his flodus as many watris. Ȝaf soun the vois of hem, for ther cam vp on it, that is, vp on Babilon, the reuere; and caȝt ben his stronge men, and driede out the bowe of them, for a stronge vengere the Lord; ȝeldende aȝeyn he shal ȝelde. And Y shal drunkne his princes, and his wise men, his dukis, and his maister iugis, and his stronge men; and thei shul slepen an euere lastende slep, and thei shul not ben wakid, seith the king, Lord of ostus his name. These thingus seith the Lord God of ostus, The wal of Babilon he the heiest with vndermynyng shal be vndermyned, and his heȝe ȝatus shul be brend with fyr; and the trauailis of puples at noȝt, and of Jentilis in to fyr thei shul ben, and pershen. And the wrd that Jeremye, the profete, comaundide to Saraie, sone of Nerie, sone of Masie, whan he shulde go with king Sedechie in to Babiloyne, in the ferthe ȝer of his regne; Saraie forsothe was prince of profecie. And Jeremye wrot al the euel, that was to com vp on Babilon, in o boc, alle these wrdus that ben write aȝen Babilon. And Jeremye seide to Saraie, Whan thou shalt come in to Babilon, and seen, and reden alle these wrdus, thou shalt sei, Lord, thou speeke aȝen this place, that thou shuldist destroȝe it, that ther be not that in it dwelle, fro man vn to beste, and that ther be perpetuel wildernesse. And whan thou hast ful endid to rede this boc, thou shalt binde to it a ston, and throwen it in to the myddel of Eufraten; and sey, So shal be dreynt Babilon, and not rise fro the face of the tormenting, that Y bringe vp on it, and it shal be loosed. Hiderto the wrdus of Jeremye.
The sone of oon and twenti ȝer was Sedechie, whan he to regnen hadde bigunne, and elleuene ȝer he regnede in Jerusalem; and name of his moder Amycal, doȝter of Jeremye of Lobna. And he dide in the eȝen of the Lord euelis, after alle thinges that don hadde Joachym. For the wodnesse of the Lord was in Jerusalem, and in Juda, for to that he shulde aferr throwe them fro hys face. And Sedechye wente awei fro the king of Babiloyne. Don is forsothe in the nynthe ȝer of his regne, in the tenthe moneth, the tenthe dai of the moneth, cam Nabugodonosor, king of Babiloyne, he and al his ost, aȝen Jerusalem; and besegeden it, and bilden aȝen it strengthingus in cumpas. And the cite was besegid, vnto the elleuenthe ȝer of the regne of Sedechie. The ferthe forsothe monyth, the nynthe dai of the moneth, hunger withheeld the cite; and ther were not foodis to the puple of the lond. And broken is the cyte, and alle his men fiȝteres floun; and thei wenten out of the cite the nyȝt, bi the weie of the ȝate, that is betwen two wallis, and ledeth to the gardyn of the king, the Caldeis besegende the cite in cumpas; and thei wenten awei bi the wey that ledeth in to wildernesse. Forsothe the ost of Caldeis pursueden the king, and caȝten Sedechie in desert, that is biside Jericho; and al his ost fleiȝ awei fro hym. And whan thei hadden take the king, thei broȝten hym to the king of Babiloyne in Reblatha, that is in the lond of Emath; and he spac to hym domus. And the king of Babiloyne kutte the throtus of the sonus of Sedechie in his eȝen; but and al the princes of Jude he sloȝ in Reblatha. And the eȝen of Sedechie he putte out, and bond hym in gyues; and the king of Babiloyne broȝt hym in to Babiloyne, and putte hym in to the hous of the prisoun, vnto the dai of his deth. In the fifte forsothe moneth, in the tenthe dai of the moneth, it is the nyntenthe ȝer of Nabugodonosor, king of Babiloyne, cam Nabusardan, prince of the chyualrie, that stod bifor the king of Babiloyne, in to Jerusalem. And he brende vp the hous of the Lord, and the hous of the king, and alle the houses of Jerusalem; and eche gret hous with fyr he brente. And al the ost of Caldeis, that was with the maister of chyualrie, destroȝede al the wal of Jerusalem bi enuyroun. Of the pore men forsothe of the puple, and of the tother comun, that hadde abiden in the cite, and of the fugitifes, that floun to the king of Babilon, and the tothere of the multytude, translatede Nabusardan, prince of the chyualrie. Of the pore men forsothe of the lond, lafte Nabusardan, the prince of the chyualrie, in to vyne tilieres, and in to feld tilieres. Also the brasene pileeres, that weren in the hous of the Lord, and the feet, and the brasene se, that was in the hous of the Lord, Caldeis to-breeken; and token al the bras of hem in to Babiloyne; and cawdrones, and fleshokes, and sautrees, and violis, and litil morteres, and alle the brasene vesselis, that weren in seruyse; and thei toke the stenes, and the sense vesselis, and the water vesselis, and bacynes, and candilstickes, and litil morteres, and cuppes; hou fele goldene, goldene, and hou fele siluerene, siluerene. Toc the maister of chyualrie two pileres, and o se, and the twelue brasene calues that weren vnder the feet, that king Salamon hadde mad in the hous of the Lord. Ther was no peis of the bras of alle thes vesselus. Of the pileres forsothe, eiȝtetene cubitis of heiȝte weren in the o piler, and a litil corde of twelue cubitus wente aboute it; but his gretnesse of foure fingris, and with ynne forth it was holȝ. And the hedus vp on either braȝene; and the heȝte of oen hed of fyue cubitus; and the litil nettus and the poumgarnetus vp on the crowne in cumpas, al was brasene. Lic maner was the secounde piler, and the poumgarnetus; and ther weren vp on the hed in cumpas alle brasene, lic maner of the tother piler. And ther weren nynty poumgarnetes and sixe hangende, and alle the poumgarnetus weren cumpassid with an hundrid litil nettus. And the maister of chyualrie toc Saraiam, the first prest, and Sofonyam, the secounde prest, and the thre keperes of the vestiarie. And of the cite he toc o gelding, that was prouost vp on the men fiȝteres; and the seuen men of hem that seȝen the face of the king, that ben founde in the cite; and the scribe, prince of the knyȝtus, that proueden the newe maad knyȝtus; and the sixti men of the puple of the lond, that ben founde in the myddel of the cite. Toc forsothe them Nabusardan, maister of the chyualrie, and broȝte hem to the king of Babiloyne in Reblatha. And smot hem the king of Babiloyne, and sloȝ hem in Reblatha, in the lond of Emath; and translatede is Juda fro his lond. This is the puple, whom translatede Nabugodonosor, in the seuenthe ȝer; Jewis, thre thousend and thre and twenty. In the eiȝtetenthe ȝer, Nabugodonosor translatede fro Jerusalem eiȝte hundrid lyues and two and thretty. The thre and twentithe ȝer of Nabugodonosor, translatide Nabusardan, maister of the chyualrie, of Jewes seuene hundrid lyues and fyue and fourty. Alle thanne the lyues foure thousend and sixe hundred. And don is, in the seuene and threttithe ȝeer of the transmygracioun of Joachym, king of Juda, the twelfthe moneth, the fyue and twentithe dai of the moneth, rerede vp Euilmeredoc, king of Babiloyne, that ȝer of his regne the hed of Joachym, king of Juda; and broȝte hym out of the hous of the prisoun, and spac with hym goode thingus; and putte his trone vpon the tronus of kingis, that weren after hym in Babiloyne, and chaungede the clothis of his prisoun; and eet bred bifor hym euermor, alle daȝes of his lif. And his metus, metus perpetuel weren ȝoue to hym of the king of Babilon, ordeyned bi daȝes arewe, vnto the dai of his deth, alle the daȝes of his lif.
And don is, after that in to caitifte is broȝt Irael, and Jerusalem is destroȝed, sat Jeremye, the profete, wepende, and weilede with this lamentacioun Jerusalem; and with bitter inwit siȝhende, and criende Weile awei! seide.
Copyright © 2013–2026 Jeremy J. Johnson. All rights reserved.