1 2 3 4 5 6 7 8 9 10 11 12 13 14 15 16 17 18 19 20 21 22 23 24
And it is doon after the deth of Moyses, the seruaunt of the Lord, that the Lord spak to Josue, the sone of Nun, the seruaunt of Moyses, and seide to hym, Moyses, my seruaunt, is deed; rise, and passe ouer this Jordan, thow, and al the puple with thee, into the loond that Y shal ȝyue to the sones of Yrael. Eche place that the stap of ȝoure foot shal treed, to ȝow Y shal taak, as Y spak to Moyses, fro deseert and Libane and vnto the greet flood of Effrates; al the loond of Etheus, vnto the greet see aȝens the sunne goynge doun, shal be ȝoure teerme. Noon shal mowe to ȝow to aȝenstoond alle the dais of thi lijf; as Y was with Moyses, so Y shal be with thee; Y shal not leeue, ne forsaak thee. Tak coumfort, and be strong; forsothe thow shalt dyuyde bi lot to this puple the loond, for the which Y haue swore to thi faders, that Y take it to hem. Take coumfort therfor, and be ful strong, that thow keep, and doo al the lawe, that Moyses, my seruaunt, hath comaundid to thee; ne bowe thow aside fro it to the ryȝt or to the left, that thow vnderstoond alle thingis that thow dost. The volym of this law goo not awey fro thi mouth, but thow shalt deuowtly think in it days and nyȝtis, that thow kepe and do alle thingis that ben wryten in it; thanne thow shalt make redi thi weie, and vnderstoond it. I comaunde to thee; tak coumfort, and be strong; wole thow not drede, and wole thow not be feerd; for with thee is the Lord thi God in alle thingis, to what euere thingis thow shalt goo. And Josue comaundide to the pryncis of the puple, seiynge, Goo ȝe bi the myddil of the tentis; and comaunde ȝe to the puple, and seye ȝe, Make ȝe redi to ȝou meetis, for after the thridde day ȝe shulen passe ouer Jordan, and goo into the loond to be weeldid, that the Lord ȝoure God is to ȝyue to ȝow. Forsothe to Rubenytis, and Gaddytis, and to the half lynage of Manasse he seith, Haue mynde of the word that comaundide to ȝow Moises, the seruaunt of the Lord, seiynge, The Lord ȝoure God hath ȝyue to ȝow rest and al the loond; ȝoure wyues and ȝoure children and beestis shulen dwelle in the loond that Moyses hath taak to ȝow biȝonde Jordan; ȝe forsothe passith armed before ȝoure bretheren, alle the stronge men in hoond; and fiȝte ȝe for hem, to the tyme that the Lord ȝyue rest to ȝoure britheren, as and to ȝow he hath ȝeue; and that thei forsothe weelden the loond that the Lord ȝoure God is to ȝyue to hem; and so ȝe shulen turn aȝen into the loond of ȝoure possessyoun, and ȝe shulen dwelle in it, that to ȝow hath ȝeuen Moises, the seruaunt of the Lord, biȝond Jordan, aȝens the risynge of the sunne. And thei answerden to Josue, and seiden, Alle thingis that thow hast comaundid to vs we shulen doo, and whidir euer thow seendist, we shulen goo; as we han obeishid in alle thingis to Moises, so and we shulen obeyshe to thee; oneli the Lord thi God be with thee, as he was with Moyses. Who aȝen seith to thi mouth, and obeishith not to alle the wordis, the whiche thow hast comaundid to hym, dye he; thou oonly tak coumfort, and do manlych.
Sente thanne Josue, the sone of Nun, fro Sechym two men, aspies in hidlis, and seide to hem, Gooth, and biholdith the loond, and the cyte of Jerycho. The whiche goynge ȝeden into an hows of a womman strumpet, Raab bi name, and thei restiden anentis hir. And it is told to the kyng of Jerycho, and seid, Loo! men ben goon yn hythir bi nyȝt, of the sones of Yrael, for to aspye the loond. And the kyng of Jericho sente to Raab the strumpet, seiynge, Bryng out the men, that camen to thee, and ben comen into thin hows; forsothe aspies thei ben, and al the loond to bihold thei comen. And the womman takynge the men hidde, and seith, Y knowleche, that thei camen to me, but Y knewe not whens thei weren; and whanne the ȝate was closid in derknessis, and thei togidrys ȝeden out, Y note whidir thei wenten; pursue ȝe anoon, and ȝe shulen atake hem. Forsothe she made the men to stye vp into the soler of hir hows, and couerde hem with stuble of flaxe, that was there. Forsothe thei, that weren sent, folweden hem bi the weye that ledith to the foordis of Jordan; and hem goon out, anoon the ȝate was closid. And not ȝit thei hadden slept, that weren hid, and loo! the womman styede vp to hem, and seith, Y haue knowe that the Lord shal taak to ȝow the loond; forsothe ȝoure gastnes is faln into vs, and alle the dwellers of the loond ben abasshid. We han herd, that the Lord hath dryed vp the watres of the Reed See at ȝoure incomynge, whanne ȝe weren goon out of Egipte; and what ȝe han doon to the two kyngis of Amorreis, that weren biȝonde Jordan, Seon and Og, the whiche ȝe han slayn; and thes thingis herynge we dredden, and oure herte basshede, ne spiryt bood in vs at ȝoure yncomynge; forsothe the Lord ȝoure God he is God in heuene aboue, and in erthe bynethe. Nowe therfor swere ȝe to me bi the Lord ȝoure God, that what maner wise Y mercy haue doo with ȝow, so and ȝe doo with the hows of my fader; and ȝife ȝe to me a verrey tokne, that ȝe sauen my fader and moder, and brother, and my sisters, and alle that of hem ben, and ȝe delyueren oure soulis fro deth. The whiche answerden to hir, Oure soule be for ȝou into deth, if neuerthelater thow bitraye vs not; and whanne the Lord hath taak to vs the loond, we shulen do in thee merci and treuth. She thanne lafte hem bi a coord out of a wyndowe; forsothe the hows of hir cleuede to the wal. And she seide to hem, To the mounteyns stye ȝe, lest perauenture thei turnynge aȝens aȝens comen to ȝow; there be ȝe hid thre days, to the tyme that thei turnen aȝen; and so ȝe shulen goo bi ȝoure weye. The whiche seiden to hyr, Gyltles we shulen be fro this ooth, with the which thow hast with ooth boundun vs, yf, we comynge into the loond, this reed litil coord were not a tokne, and thow byndist it in the windowe, bi the which thow hast late vs go; and thi fader and moder, bretheren and al thi kynne thow gederist in thin hows; he that the dore of thin hows were goon out, the blood of hym shal be into his heed, and we shulen be alien; forsothe the blood of alle that with thee weren in the hows, shal rebound into oure heed, if hem eny man towchith. And if vs thou wolt bitraye, and this word brynge forth into the mydil, we shulen be clene fro this ooth, with the which thou hast made vs swere. And she answerde, As ȝe han spokun, so be it doon. And letynge hem that thei wente forth, she hongide a litil reed coord in hir wyndowe. Forsothe thei goynge camen to the mounteyns, and dwellyden there thre dais, to the tyme that thei weren comen aȝen that pursueden; forsothe sechynge bi al the weie, thei fonden hem not. The whiche comynge into the cyte, ben comen aȝen, and the spies descendiden fro the hil; and ouerpassid Jordan thei camen to Josue, the sone of Nun; and thei tolden to hym alle thingis that fellen to hem, and seiden, The Lord hath taken al this loond into oure hoondis, and thurȝ drede ben throwe down alle the dwellers of it.
Therfor Josue, fro nyȝt arysynge, meuede the tentis; and thei goynge fro Sechym camen to Jordan, he and alle the sones of Yrael, and dwelten there bi thre dais. The which ouerpassid, wenten bedels bi the mydil of the tentis, and bigunnen to crye, Whanne ȝe seen the ark of the boond of pees of the Lord oure God, and prestis of the lynage of Leuy berynge it, forsothe ȝe togidre riseth, and folwe ȝe the forgoers; and be there betwixe ȝou and the ark a space of cubitis two thowsand, that aferre ȝe mowen se, and knowe bi what weye ȝe goon, for bifore ȝe han not goon bi it; and be war, that ȝe neȝen not to the ark. And Josue seide to the puple, Be ȝe halwid; forsothe to morwe the Lord shal do amonge ȝow merueyls. And he seith to the prestis, Takith the ark of the boond of pees of the Lord, and gooth before the puple. The whiche the heestis fulfillynge token, and wenten before hem. And the Lord seide to Josue, To day Y shal bigynne to enhaunce thee before all Yrael, that thei knowen, that as I was with Moyses, so and I am with thee. Forsothe thow comaund to the preestis, that beren the ark of the boond of pees, and sey thou to hem, Whanne ȝe weren goon in a paart of the watre of Jordan, stoondith in it. And Josue seide to the sones of Yrael, Cometh hidre, and herith the word of the Lord oure God. And eft, In this, he seith, ȝe shulen wyte that the Lord God lyuynge in the mydil of ȝow is; and he shal scatre in ȝoure siȝt Chanane, Ethe, Euee, and Pherese, Gergese forsothe, and Jebuse, and Amorre. Loo! the arke of the boond of pees of the Lord of al erthe shal goo before ȝow thurȝ Jordan. Makith redy twelue men of twelue lynagis of Irael, eche bi eche lynagis. And whanne han put the steppis of her feet the preestis, that beren the arke of the boond of pees of the Lord God of al erthe, in the watres of Jordan, the watres that ben nethermore shulen renne, and fayle; forsothe tho that camen fro aboue shulen stoond togidre in o glob. Thanne wente out the puple fro her tabernaclis, that thei passen ouer Jordan; and the preestis that beren the arke of the boond of pees ȝeden before hym. And hem goon into Jordan, and the feet of hem wet yn paart of the water; Jordan forsothe fulfillide the brenkis of his trowȝ in tyme of heruest; the watris dessendynge stoden in o place, and at liknes of an hil mych swellynge thei apereden ferre fro the cyte that was clepid Edom, vnto the place Sarthan; forsothe thoo that weren nethermore, into the see of wildernes, that now is clepid deed, dessendiden, forto thei vtterly failiden. Forsothe the puple wente aȝen Jordan; and the preestis, that beren the arke of the boond of pees of the Lord, stoden gyrd vpon the drye erthe in the middil of Jordan, and al the puple passide ouere thurȝ the drye trowȝ.
The which ouergoon, the Lord seide to Josue, Chees twelue men, eche bi eche lynagis, and comaund to hem, that thei taken fro the mydil of Jordans trowȝ, where stoden the feet of the preestis, twelue hardest stonus; the whiche ȝe shulen set in the place of tentis, where ȝe this nyȝt fitchen tentis. And Josue clepide twelue men, whom he chees of the sones of Irael, eche of eche lynagis; and seith to hem, Gooth bifore the arke of the Lord ȝoure God to the mydil of Jordan, and bere ȝe thens eche eche stonus in ȝoure shuldres, after the noumbre of the sones of Irael, that it be a tokne bitwixe ȝow. And whanne the sones of Irael asken ȝow to morwe, seiynge, What to hem wolen thes stonus? ȝe shulen answere to hem, The watrys of Jordan han failid before the arke of the boond of pees of the Lord, whanne he passide it; therfor thes stonus ben set into the mynd of the sones of Yrael, vnto with outen ende. Thanne the sones of Yrael diden as Josue comaundide to hem, berynge fro the mydil of Jordanus trowȝ twelue stonus, as to hym the Lord comaundide, after the noumbre of the sones of Yrael, vnto the place in the which thei setten tentis; and there thei puttiden hem. Forsothe other twelue stonus putte Josue in the mydil of Jordans trowȝ, where stoden preestis, that beren the ark of the boond of pees of the Lord; and ben there vnto the day that is nowe. Forsothe the preestis, that beren the arke, stoden in the mydil of Jordan, to the tyme that alle thingis weren fulfillid, that the Lord comaundide to Josue, for he shulde speke to the puple, as Moises had seide to hym. And the puple hyede, and passide forth. And whanne alle weren goon ouere, ȝede ouere and the arke of the Lord, and the preestis wenten before the puple. Forsothe the sones of Ruben, and Gad, and half the lynage of Manasse, aarmed wenten before the sones of Irael, as to hem comaundide Moyses. And fourti thowsand of fiȝtynge men bi companyes and oostis wenten vpon the pleyn and wijld feeldis of the cyte of Jericho. In that day the Lord magnyfiede Josue before al Yrael, for thei shulden drede hym, as thei dredden Moyses, ȝit while he lyuede. And he seide to hym, Comaund to the preestis that beren the arke of the boond of pees, that thei styen vp fro Jordan. The which comaundide to hem, seynge, Stye vp fro Jordan. And whanne thei weren goon vp, berynge the arke of the boond of pees of the Lord, and the drye erthe hadden bigunne to treed, the watris ben turned into his trowȝ, and floweden, as bifore thei weren woned. Forsothe the puple fro Jordan stiede the tenthe day of the firste moneth, and settiden tentis in Galgalis, aȝens the este coost of the cyte of Jericho. Forsothe the twelue stonus, the whiche thei token fro Jordans trowȝ, Josue putte in Galgalis; and seide to the sones of Irael, Whanne ȝoure sones asken to morwe her fadres, and seyn to hem, What to hem wolen thes stonus? ȝe shulen teche hem, and seye, Bi the drye trowȝ we passiden this Jordan, the Lord oure God driynge the watris of it in oure siȝt, to the tyme that we weren ouerpassid, as he dide bifore in the Reed See, the which he dryede to the tyme that we weren ouerpassed, that alle the puplis of loondis leeren the moost strong hoond of the Lord, and that ȝe dreden the Lord ȝoure God al tyme.
After thanne that alle the kyngis of Amorreis, that dwelten biȝonde Jordan at the west coost, and alle the kyngis of Chanaan, that the niȝ places weeldiden of the greet see, herden, that the Lord hadde dryed the flodis of Jordan before the sones of Yrael, to the tyme that thei weren goon ouere, the herte of hem is discoumfortid, and abood not in hem spiryte of hem, dredynge the entre of the sones of Yrael. That tyme seith the Lord to Josue, Maak to thee stonen knyues, and circumcide the secounde tyme the sones of Yrael. He dide that the Lord comaundide, and circumcydide the sones of Yrael in the hil of mens ȝerdis. Forsothe this is the cause of the secounde circumcicioun; al the puple that wente out of Egipte of maal kynde, alle the men fiȝters, ben deed in deseert bi mooste longe enuyrounyngis of weye, the whiche alle weren circumcidid. Forsothe the puple that is bore in deseert bi fourti ȝeer, in the weye of moost wyde wildernesse, were vncircumcidid to the tyme that thei weren wastid, that han not herd the voyce of the Lord, and to whom before he swore, that he wold shewe hem the loond flowynge mylk and hony. Of thes the sones camen after into stede of the faders, and ben circumsidid of Josue; the whiche, as thei weren born, weren in hoolnes of her ȝerdes, ne hem in the weie eny man circumcidide. Forsothe after that alle ben circumcidid, thei dwelten in the same place of her tentis, to the tyme that thei weren helid. And the Lord seide to Josue, To day I haue taak aweye the reproof of Egipt fro ȝowe. And the name of that place is clepid Galgala, vnto the day that is nowe. And the sones of Yrael dwelten in Galgalis, and diden pask the fourtenthe day of the moneth at euen, in the wilde feeldys of Jerycho; and thei eeten of the fruytis of the erthe that other day, therf looues, and corn powned of the same ȝeer. And manna faylide after that thei eeten of the fruitis of the erthe; ne the sones of Yrael vseden na more that meet, but eten of the fruytis of the present ȝeer of the loond of Chanaan. Forsothe whanne Josue were in the feeld of the cytee of Jerycho, he reryde the eyen, and sawȝ a man aȝens hym stondynge, and holdynge a drawen out swerd; and he wente to hym, and seith, Oure thou art, or of the aduersaries? The which answerde, Nay, but I am prince of the oost of the Lord, and nowe Y come. Josue felle redi into the erthe, and onowrynge, seith, What thing my Lord spekith to his seruaunt? Lowse, he seith, the sho fro thi feet; forsothe the place, in the which thow stondist, is hooli. And Josue dide, as to hym was comaundid.
Jericho forsothe was closid and waardid, for drede of the sones of Irael, and no man dorst goo in, or goo out. And the Lord seide to Josue, Loo, Y haue ȝeue into thin hoondis Jericho, and the kyng of it, and alle the stronge men. Gooth about the cytee, alle ȝe fiȝters, to gidre bi the day; so ȝe shulen do six days. Forsothe the seuenthe day the prestis shulen taak seuen trompes, whos vse is in the iubile; and go thei before the arke of the boond of pees; and seuen sithis ȝe shulen goo about the cyte, and the prestis shulen crye with the trompes. And whanne the voyce of the trompe lenger and thicker ful sowneth, and in ȝoure eeris braggith, al the puple shal crye with moost out crye; and the wallis of the cyte shulen fuldoun falle, and eche shal goon in bi the place, aȝens the which thei stoden. Josue thanne, the sone of Nun, clepide the prestis, and seide to hem, Taak ȝe the arke of the boond of pees, and seuen other prestis taak thei seuen trompes of the iubilees, and goo thei before the arke of the Lord. Forsothe to the puple he seith, Gooth, and enuyrowneth the cite, aarmed goynge before the arke of the Lord. And whanne Josue hadde eendid the wordis, and seuen preestis with seuen trompes crieden before the arke of the boond of pees of the Lord, and al the puple aarmed wente before, the left comouns folowid the arke, and with trompes alle thingis thei sowneden. Forsothe Josue comaundide to the puple, seiynge, Ȝe shulen not crye, ne shal be herd ȝoure voyce, ne eny word of ȝoure mouth shal goon out, to the tyme that the day come, in the which Y schal seye to ȝow, Crieth, and with an out voyce crieth. Thanne the arke of the Lord enuyrounde the cyte onys bi day, and turned aȝen into the tentis dwellide there. Thanne Josue rysynge fro nyȝt, the preestys token the arke of the Lord; and seuen of hem seuen trompes, of the whiche vse is in the iubilee; and thei wenten before the arke of the Lord, goynge and trompynge; and the puple armed wente before hem. Forsothe that other comouns folwide the arke, and with trompis sownede. And thei wenten a boute the citee the secounde day onys, and turneden aȝen into the tentis; so thei diden sixe days. Forsothe the seuenthe day eerly rysynge wenten about the cytee, as it was disposid, seuen sithes. And whanne the seuenthe goynge about the prestis cryeden with trompes, Josue seyde to al Yrael, With an out voice crie ȝe; forsothe the Lord hath taak to vs the citee; and be this cyte cursid, and alle thingis that in it ben to the Lord. Alone Raab the strompet lyue, with alle that with hir in hows ben; forsothe she hidde messangeris the whiche we senten. Ȝe forsothe beth war, lest of thes thingis that ben comaundid eny thing ȝe towchen, and ben gilti of trespasse; and alle the tentes of Yrael be vndur synne, and distourblid. Forsothe what euer thing of gold and of siluer were, and of brasen vesselis, and of yren, to the Lord be it halowid, put vp in the tresours of hym. Thanne al the puple criynge out, and criynge the trumpis, after that into the eeris of the multitude the sown braggide, the wallis anoon fellen down; and echon styeden vp bi the place that aȝens hem was. And thei token the cytee, and slewen alle that weren in it, fro man vnto womman, fro ȝonge vnto oold; forsothe oxen, and sheep, and assis, in mouth of the swerd thei smyten. To the two men forsothe, that aspiers weren sente, seide Josue, Gooth into the hows of the womman strompet, and brynge hir forth, and alle that ben of hir, as to hir bi ooth ȝe han stedefastly seide. And the ȝonge goon yn, ladden out Raab, and hir eldris, bretheren forsothe, and al purtenaunce to houshold, and al the kynrede of hir; and out of the tentis of Yrael thei maden to dwelle. Forsothe the cyte, and al that were foundun in it, thei brenten, with outen the gold, and siluer, and brasen vessels, and yren, the whiche into the tresory of the Lord thei sacriden. Forsothe Raab strompet, and the hows of hir fader, and al that she hadde, Josue made to lyue; and thei dwelten in the myddil of Irael, vnto the present day; forthi that she hidde the messangers, the whiche he hadde sent for to aspie Jerycho. In that tyme Josue curside, seiynge, Cursid the man before the Lord, that rerith vp or bildith Jericho cyte! In his first goten ligge he the foundementis of it, and in the last of the free children putte he the ȝatis of it. Was thanne the Lord with Josue, and the name of hym is pupplishid in al the loond.
The sones forsothe of Yrael han ouerpassid the maundement, and han mystakun of the curse; for Achor, the sone of Charmy, sone of Zabdi, sone of Zare, of the lynage of Juda, took sum what of the curse; and wrooth is the Lord aȝens the sones of Yrael. And whanne Josue wolde send fro Jericho men aȝens Hay, that is biside Bethauen, at the eest coost of the burȝ town Bethel, he seide to hem, Stieth vp, and aspye ȝe the loond. The whiche fulfillynge the heestis, aspieden Hay; and turned aȝen thei seiden to hym, Stye not vp al the puple, but two thowsandis or thre of men goon, and doon a wey the cytee; whi al the puple in veyn is traueyld aȝens moost fewe enemyes? Styeden thanne vp thre thowsand of fiȝtynge men, the whiche anoon turnynge backis, ben smyten of the men of the cytee of Hay; and fellen down of hem thretti and sixe men; and the aduersaryes pursueden hem fro the ȝate vnto Sabarym; and thei fellen bi lowe and short weyes fleynge. And the herte of the puple myche dredde, and at the lickenesse of water is molten. Forsothe Josue kitte his clothis, and redi felle doun into the erthe before the arke of the Lord, vnto euen, as wel he as alle the aldren of Yrael; and thei putten powdre vpon her heedes. And Josue seide, Alas! alas! Lord God, what woldist thow this puple brynge ouer Jordan flood, for to taak vs in the hoond of Amorrei, and for to leese? Wolde God, as we bigunnen, we hadden dwellid biȝonde Jordan. My Lord God, what shal Y seye, seynge Yrael to his enemyes backis turnynge? Chananees shulen here, and alle the dwellers of the loond and togidre gedryd thei shulen enuyroun vs, and doon awey oure name fro the loond; and what shal thou doo to thi greet name? And the Lord seide to Josue, Ryse, whi lijst thow bowid in the erthe? Yrael hath synned, and hath broken my couenaunt; and thei han taak of the corse, and han stoln, and liȝed, and han hidde among her vessels. Ne Yrael shal mowe stoond before her enemyes, and hem he shal flee, for he is polut with the curs; I shal not be more with ȝou, to the tyme that ȝe han alto troden hym that is gilti of that hidows trespas. Ryse, halwe the puple, and sey to hem, Be ȝe halwid aȝen to morwe; forsothe thes thingis seith the Lord God of Yrael, Cursynge is in the mydil of thee, Irael; thow shalt not mowe stoond before thin enemyes, to the tyme that he be doon awey fro thee, that is defoulid with this hidows gilt. And ȝe shulen come eerly eche bi ȝoure lynagis; and what euer lynage the lot fynde, he shal come bi his kynredis, and kynrede bi howsis, and hows bi men. And so euer he in that gilt were taak, he shal be brent with fier with al his substaunce, for he hath brokun the couenaunt of the Lord, and hath do sacrilege in Yrael. And so Josue rysynge eerly, sette Irael bi her lynagis; and it is founden the lynage of Juda; which, whanne after his meynees was offred, it is founden the meynee of Zare; forsothe thilk bi men offrynge he foonde Zabdi; whos hows in sondry men dyuydyng, he foonde Achor, the sone of Charmy, sone of Zabdi, sone of Zare, of the lynage of Juda. And he seide to Achor, My sone, ȝif glorye to the Lord God of Yrael, and knowlech, and shewe to me, what thow hast doon; ne hyde thou. And Achor answerde to Josue, and seide to hym, Trewly, Y haue synned before the Lord God of Yrael, and thus and thus Y haue do; Y sawȝ forsothe among the spuylis a ful good reed mantil, and two hundreth siclis of siluer, and a goldun rewle of fifti siclis; and coueytynge took a wey, and hidde in the erthe, aȝens the myddil of my tabernacle; forsothe the siluer Y couerde with the doluen erthe. Sente thanne Josue seruauntis, the whiche rennynge to the tabernacle of hym, thei founden alle thingis hid in the same place, and the siluer togidre; and thei takynge a wey fro the tent token the thingis to Josue, and to alle the sones of Yrael; and threwen forth before the Lord. And so Josue takynge Achor, the sone of Zare, and the siluer, and the mantil, and the golden rewle, and sones and douȝtres of hym, oxen, and asses, and sheep, and thilk tabernacle, and al the purtenaunce, and al Yrael with hym, ladden hem to the valey of Achor; where seide Josue, For thow hast disturblid vs, out stourbe thee the Lord in this day. And al Irael stonede hym; and alle thingis, that his weren, ben wastid with fier. And thei gedreden vpon hym a greet heep of stonus, the which abidith stil vnto the day that is nowe. And the wodenesse of the Lord is turned awey fro hem; and the name of the place is clepid unto this day the valey of Achor.
Seyde forsothe the Lord vnto Josue, Ne drede thow, ne be feerd; tak with thee al the multitude of fiȝters, and risynge sty vp into the burgh toun of Hay; loo, Y haue taak into thin hoond his kyng, and puple, and cytee, and loond. And thou shalt do to the citee of Hay and to his kyng, as thow didist to Jericho, and to the kyng of it; the pray forsothe and alle the lyuynge beestis ȝe shulen taak to ȝow; put busshementis to the cyte bihynde it. And Josue roos, and al the oost of fiȝters with hym, for to stye vp into Hay; and he sente the nyȝt thretti thowsand chosen of stronge men; and he comaundide to hem, seiynge, Putte ȝe busshementis bihynde the cytee, ne ferther goo ȝe awey; and ȝe shulen be al redi; forsothe Y and that other multitude that is with me, fro forn aȝens we shulen come aȝens the cite; and whanne thei weren gon out aȝens vs, as we diden before, we shulen flee, and turne backis, to the tyme that thei pursuwynge more along fro the cyte ben drawen a ferre; forsothe thei shulen wene vs to flee as before. Vs thanne fleynge and hem pursuynge, ȝe shulen ryse fro the busshement, and ȝe shulen waast the cytee; and the Lord ȝoure God shal taak it into ȝoure hoondis. And whanne ȝe han taak it, sette ȝe it a fier; so alle thingis ȝe shulen doo, as Y haue comaundide. And he lefte hem, and thei wenten to the place of the busshement, and thei seten betwixe Bethel and Hay, at the west coost of the cytee of Hay. Forsothe Josue that nyȝt dwellide in the mydil of the puple. And rysynge eerly he tolde felawis, and he styede with the eldren in the frownt of the oost, biset with help of fiȝters. And whanne thei weren comen, and hadden styed vp fro aȝens of the citee, and thei stoden at the north coost of the cytee, bitwix the whiche and hem was a mydil valey. Forsothe fyue thousand men he chees, and putte in the busshement bitwix Bathauen and Hay, fro the west paart of the same cyte. Forsothe al that other oost at the north made redi the poynt, so that the last of the multitude atteyneden the west coost of the cytee. Josue thanne wente that nyȝt, and stood in the mydil of the valey; that whanne the kyng of Hay had seen, he hiede eerli, and wente out with al the oost of the cyte, and he dresside the poynt aȝens the deseert, vnknowynge that bihynde the bak weren hid busshementis. Forsothe Josue and al the multitude of Yrael ȝauen steede to the place, feynynge dreed, and fleynge bi the weie of wildirnesse; and thei criynge out to gidre, and hem self to gidre gladly clepynge pursueden hem. And whanne thei weren goo fro the cytee, and not oon forsothe in the cytee of Hay and Bethauen was laft, that pursuwede not Yrael, as thei breken out leeuynge the borgh towns open, the Lord seide to Josue, Heue vp the sheeld that is in thin hoond, aȝens the cyte of Hay; for to thee Y shal taak it. And whanne he hadde houen vp the sheld fro aȝens the citee, the busshementis that weren hid, rysen anoon, and goynge to the cytee token, and sett it a fier. Forsothe the men of the citee, that pursuweden Josue, beholdynge and seynge the smook of the cite vnto heuene stie vp, thei myȝten no more hidir and thidir fleynge atwynne, namelich whanne thei that feyneden fliȝt, and wenten to wildirnesse, aȝens the pursuwers moost myȝtili hadde with stonden. And seynge Josue and al Yrael, that the citee was takun, and smook of the citee stiede vp, turned aȝen smoot the men of Hay. Forsothe and thei that token, and hadden sett the cytee a fier, goon out fro the citee aȝens her mydlis of enemyes, thei bigunnen to smyit; and whanne on eithir partye aduersaries weren slayn, so that no man of so myche a multitude were saaf, forsothe the kyng of Hay thei token lyuynge, and offerden to Josue. Thanne alle slayn that Yrael to deseert goynge pursuweden, and in the same place bi swerd fallynge, the sones of Yrael turneden aȝen smyten to the cytee. Forsothe there weren that in the same dai dieden, fro man vnto womman, twelue thowsand of men, of al the cyte of Hay. Forsothe Josue withdrewe not the hoond, that in hiȝth he putte vp holdynge the sheeld, to the tyme that alle the dwellers of Hay weren slayn. Forsothe the beestis and the praye of the cytee the sones of Yrael dyuydeden to hem silf, as the Lord hadde comaundid to Josue; the which brente the cytee, and made it an euerlastynge toumbe. Forsothe the kyng of it he hongid in a gybet, vnto euen and the sunne goynge doun. And Josue comaundide, and thei putten doun the careyn of hym fro the cros; and thei threwen in that entre of the cytee, throwen togidre vpon hym a greet heep of stonus, the which abidith stil vnto the day that is nowe. Thanne Josue bilde vp an auter to the Lord God of Yrael in the hil of Hebal, as Moyses, the seruaunt of the Lord, hadde comaundid to the sones of Irael, and it was wryten in the volym of the lawe of Moyses, an auter of stonus vnhewid, the whiche yren hath not towchid. And he offerde vpon it brent sacrifice to the Lord, and he offrede pesible slayn sacrifices; and wroot vpon the stonus short declaracioun of the lawe of Moyses, that he tolde before the sones of Yrael. Forsothe al the puple, and the more thurȝ birth, and duykis, and iugis stoden on either paart of the arke, in the syȝt of prestis and Leuytis, that beren the arke of the boond of pees of the Lord; as the comlynge, so and the withyn goten; the half paart of hem biside the hil of Garysym, and half biside the hil of Hebal, as Moyses comaundide, the seruaunt of the Lord. And first forsothe he blessede to the puple of Yrael. After thes thingis he radde alle the wordis of blessynge, and cursynge, and alle that weren wryten in the volym of the lawe. No thing of thes thingis, that Moyses comaundide, he left vntowchyd; but alle thingis he openyde before al the multitude of Yrael, the wymmen, and litil children, and comlyngis, that among hem dwelliden.
The whiche thingis herd, alle the kyngis biȝond Jordan, that dwelten in mountens, and in the wilde feeldis, and in the see sydes, and in the brenke of the greet see, and thes that dwelten biside Liban, Ethe, and Amorre, Chanane, and Phareze, and Euee, and Jebuse, ben gedryd togidre for to fiȝt aȝens Josue and Irael, with oon inwit, and with the same accord. And thei that dwelten in Gabaon, herynge alle thingis that Josue hadde doo to Jerycho and to Hay, and fellich thenkynge, token to hem meetis, olde sackis to the assis on puttynge, and rent wyn botels and sowed, and ful olde shoon, the whiche to the doom of oldnes ben sowid with patchis; thei clothiden with oold clothes; forsothe the looues, that thei beeren for lyuelood bi the weye, weren hard and in gobetis broken. And thei wenten to Josue, that thanne dwellide in the tentis of Galgale, and seiden to hym, and to al Yrael togidre, Fro a long loond we han comen, pees coueytynge to make with ȝow. And the men of Irael answerden to hem, and seiden, Lest perauenture in the loond, that to vs is owed bi lot, ȝe dwellen, and we mowen not make boond of pees with ȝow. And thei to Josue, Thi seruauntis, thei seyn, we ben. To whom Josue forsothe, Who, he seith, ben ȝe, and whens ben ȝe comen? Thei answerden, Fro a ful ferre cuntre thi seruauntis ben comen in the name of the Lord thi God, we han herd the loos of his power, alle thingis that he hath doo in Egipt, and to the two kyngis of Ammorreis biȝonde Jordan; to Seon the kyng of Esebon, and to Og the kyng of Basan, that weren in Astaroth. And seiden to vs the elders and alle the dwellers of oure loond, Takith in ȝoure hoondis meetis for the moost long weye; and aȝen come ȝe to hem, and seie ȝe, Ȝoure seruauntis we ben; boond of pees make ȝe with vs. And loo! the looues, whanne we wenten out of oure howsis for to come to ȝow, we token hoote, nowe thei ben maad drye, and of greet eeld to breek; the botels of wyn newe we fulfilliden, nowe thei ben brooke and loosid; clothis and shoon, with the whiche we ben clothid, and the whiche we han in feet, for the length of lenger weye ben to troden, and almeest wered. Thei token thanne of the meetis of hem, and the mouth of the Lord thei askeden not. And Josue with hem made pees. And the boond of pees goon yn he bihiȝte, that thei shulden not be slayn; forsothe the princes of the multitude sworen to hem. Forsothe after three daies of the goon yn couenaunt, thei herden, that in nyȝ thei dwelten, and thei weren to comen among hem. And the sones of Yrael meueden tentis, and camen into the citees of hem the thridde day, of the whiche thes ben the names, Gabaon, and Saphyra, and Beroth, and Charyathiarym. And thei smyten not hem, forthi that the princis of the multitude hadden sworn to hem in the name of the Lord God of Yrael. And so grutchide al the comoun aȝens the princis; the whiche answerden to hem, We han sworn to hem in name of the Lord God of Yrael, and therfor we mowen not hem towche; but this we shulen doo to hem, be thei reserued forsothe that thei lyuen, lest aȝens vs the wraththe of the Lord be styrid, if we forsweren vs to hem; but so lyue thei, that in to the vses of al the multitude, trees thei kutten, and watris thei beren. The whiche spekynge thes thingis, Josue clepide Gabonytis, and seide to hem, Whi wolden ȝe disseyue vs bi gijl, for to seie, Ful ferre we dwellen fro ȝow, sith in the mydil of vs ȝe ben? And so vnder cursynge ȝe shulen be, and there shal not fayl of ȝour lynage, kyttynge trees, and watris berynge, in to the hows of my God. The whiche answerden, It is told to vs thi seruauntis, that the Lord thi God hadde bihoot to Moyses, his seruaunt, that he shulde taak to ȝow al the loond, and scatre alle the dwellers of it; we therfor moyche dredden, and purueiden to oure lyues, constreyned with ȝoure dreed, and this counseil we maden. Forsothe nowe in thin hoond we ben; that to thee ryȝt and good is seen, do thow to vs. Than Josue dide, as he seide, and delyuerde hem fro the hoondis of the sones of Irael, that thei weren not slayn. And Josue demyde in that day hem to be into seruyse of al the puple, and of the auter of the Lord, kuttynge trees and watres berynge, vnto the tyme that is nowe, in the place that the Lord hath chosun.
The whiche thingis, whanne hadde herd Adonysedech, kyng of Jerusalem, that is, that Josue hadde taak Hay, and hadde vndurturned it; forsothe as he dide to Jericho and to the kyng of it, so he dide to Hay and to the kyng of it; and that Gabonytis weren ouerflowen to Irael, and weren bounden in pees with hem, he dradde greetly; forsothe a greet cite was Gabaon, and oon of the kyngis citees, and more than the burgh toun Hay, and alle the fiȝters of it moost stronge. Thanne sente Adonysedech, kyng of Jerusalem, to Ocham, kyng of Ebron, and to Pharam, kyng of Herymoth, and to Japhye, kyng of Lachis, and to Addabir, king of Eglon, seiynge, Stye ȝe vp to me, and bryngeth help, and out fiȝte we Gabaon, for he is ouerflowen to Josue, and to the sones of Yrael. Thanne thei gedrid styeden vp, fyue kyngys of Amorreis, kyng of Jerusalem, kyng of Ebron, kyng of Herymoth, kyng of Lachis, kyng of Eglon, togidre with her hoostis; and thei settiden tentis about Gabaon aȝenfiȝtynge it. Forsothe the dwellers of the citee of Gabaon bisegid, senten to Josue, that thanne dwellide in tentis at Galgalam, and seide to hym, Ne with drawe thou thin hoond fro the help of thi seruauntis; sty vp anoon, and delyuer vs, and bryng help; forsothe there ben comen to gidre aȝens vs alle the kyngis of Ammorreis, that dwellen in mounteyns. And Josue stiede vp fro Galgalis, and al the oost of fiȝters with hym, moost stronge men. And the Lord seide to Josue, Drede thow not hem, forsothe into thin hoondis Y haue taken hem; noon of hem to thee shal mowe aȝenstoond. And so Josue felle on hem feerlich, al nyȝt stiynge vp fro Galgalis; and the Lord distourbide hem fro the face of Yrael, and defowlide bi a greet veniaunce in Gabaon; and pursuede hem bi weye of the stiynge vp of Betheron, and smoot vnto Azecha and Maceda. And whanne thei flowen the sones of Yrael, and weren in the goynge doun of Bethoron, God sente vpon hem greet stonus fro heuene, vnto Azecha; and ben deed manye mo with stoonus of hawl, than whom with swerd had smytun the sones of Yrael. Thanne Josue spak to the Lord, in the day that he took Ammorre in the siȝt of the sones of Yrael; and seide before hem, Sunne, aȝens Gabaon be thow not meued, and mone, aȝens the valey of Haylon. And the sunne and the mone stoden, to the tyme that the folk vengide hem self of her enemyes. Is not this wryten in the book of riȝtwise men? And so stood the sunne in the mydil of heuene, and hyede not to goo doun the space of o day; there was not before ne afterward so loong a day; obeishynge the Lord to the voyce of man, and fiȝtynge for Yrael. And Josue turnede aȝen, with al Yrael, into the tentis of Galgala. Forsothe fyue kyngis flowen, and hidden hem in the spelunk of the citee of Maceda. And it is told to Josue, that there weren foundun fyue kyngis lurkinge in the spelunk of the cite of Maceda. The which comaundide to felawis, and seith, Ouerturne ȝe greet stoonus at the mouth of the spelonk, and putte ȝe redi men, that kepen hem closid; ȝe forsothe wole ȝe not stoond, but pursue ȝe enemyes, and al the eendis of hem fleynge sleeth; ne lette ȝe hem goon into the socours of ȝoure citees, the whiche the Lord ȝoure God hath taak into ȝoure hoondis. Slayn thanne the aduersaries with a greet veniaunce, and vnto the deeth almest consumpt, thilk that fro Irael myȝten flee, wenten into the strengthid citees. And al the oost turnede aȝen to Josue, in Maceda, where thanne weren the tentis, thei hoole and in hoole noumbre; and no man aȝens the sones of Yrael was hardy to grucche. And Josue comaundyde, seiynge, Opyn the mouth of the spelonk, and bryngith to me fyue kyngis that in it lorken. And the seruauntis diden, as to hem was comaundid; and thei brouȝten to hym fyue kyngis fro the spelonk; the kyng of Jerusalem, the kyng of Ebron, the kyng of Hermoth, the kyng of Lachis, the kyng of Eglon. And whanne thei weren brouȝt out to hym, he clepide alle the men of Yrael, and seith to the pryncis of the oost, that with hym weren, Goth, and puttith ȝoure feet vpon the neckis of thes kyngis. The which whanne thei hadden goon, and troden the neckis of hem suget with the feet, eft he seith to hem, Wole ȝe not drede, ne be ȝe afeerd, take ȝe coumfort, and be ȝe stronge; forsothe so the Lord shal doo to alle ȝoure enemyes, aȝens whom ȝe shulen fiȝt. And Josue smoot, and slewȝ hem, and hongide vpon fyue stokkis; and thei weren hongid vnto the euen. And whanne the sunne cam down, he comaundide to felows, that thei doon hem doun fro the gibetis; the whiche doon doun, thei threwen hem into the spelonk, in the which thei lorkiden; and thei puttiden vpon the mouth of it greet stoonus, that abiden stil to the tyme that is nowe. Forsothe the same day Josue took Maceda, and smoot in mouth of swerd; and the kyng of it, and alle his dwellers he slewȝ; and he lefte not in it, nameli, litil relikis; and he dide to the king of Maceda as he dide to the kyng of Jericho. He wente with al Yrael fro Maceda into Lebna, and he fauȝt aȝens it, the which the Lord took, with his kyng, in the hoond of Irael; and thei smyten the cite in the mouth of swerd, and alle the dwellers of it, and thei leften not in it eny relikis; and thei diden to the kyng of Lebna as thei diden to the kyng of Jericho. Fro Lebna he passide into Lachis, with al Yrael; and the oost disposid bi enuyroun, aȝenfauȝt it. And the Lord took Lachis in the hoond of the sones of Yrael; and he took it that other day, and smoot in mouth of swerd, and eche lijf that was in it, as he dide to Lebna. That tyme stiede vp Yram, the kyng of Gazer, for to helpe Lachis; whom Josue smoot with al his puple vnto the deth. And wente fro Lachis vnto Eglon, and enuyrounde, and out fauȝt it the same day; and smoot in mouth of swerd alle the lyues that weren in it, after alle thingis that he dide to Lachis. Forsothe he stiede with al Yrael fro Eglon vnto Ebron, and fauȝt aȝens it, and took, and smoot in mouth of swerd; the kyng forsothe of it, and alle the burgh touns of that regioun, and alle the lyues that dwelliden in it; he lafte not in it eny relikis; as he dide to Eglon so he dide to Ebron, al thingis that in it he foond wastynge with swerd. Thens turned aȝen into Dabyr, he took it, and waastid; the kyng forsothe of it, and alle the burȝ towns bi enuyroun he smoot in mouth of swerd; he lafte not in it eny relikis; as he dide to Ebron, and Lebna, and to the kyngis of hem, so he dide to Dabir and to the kyng of it. And so Josue smoot al the mounteyn loond, and south, and feeldi, and Assedoch with his kyngis; and he lafte not in it eny relikys, but alle that myȝten breeth he slowȝ, as the Lord God of Yrael comaundide to hym; fro Cades Barne vnto Gazam, and al the loond of Josson vnto Gabaon, alle the kyngis and regiouns of hem, with o feersnes he took, and wastide; forsothe the Lord God of Israel fauȝt for him. And he turnede aȝen with al Yrael to the place of the tentis in Galgala.
The whiche thingis whanne herd Jabyn, the kyng of Asor, he sente to Jodab, kyng of Madiam, and to the kyng of Semeron, and to the kyng of Acsaph, and to the kyngs of the north, that dwelten in mounteyns, and in the pleyn aȝens the south of Seneroth, and in the wijld feeldis, and regiouns of Dor, bisidis the see, and to Chanane fro the eest and west, and Ammorre, and Ethee, and Phereze, and Jebuse in the mounteyns, and Euee, that dwelt in the rotis of Hermon, in the loond of Maspha. And alle wenten out with her companyes, ful myche puple, as the grauel that is in the brenk of the see, and hors, and chaaris, of multitude with outen noumbre. And alle thes kyngis camen to gydre in oon at the watris of Meron, for to fiȝt aȝens Yrael. And the Lord seide to Josue, Ne drede thow hem, to morwe forsothe this same our Y schal taak hem alle to be woundid in the siȝt of Yrael; the hors of hem thow shalt kut of the synewis at the knees, and the chaaris thow shalt brenne with fier. And Josue cam, and al his oost with hym, aȝens hem, at the watris of Meron sodeynlich, and felle vpon hem. And the Lord took hem into the hoondis of Yrael; the whiche smyten hem, and pursuden vnto greet Sydon, and to watris of Maserephoh, and to the feeld of Masphe, that is at the est part of it. So he smoot alle, that noon of hem relikis he lefte; and he dide as the Lord comaundide to hym; the hors of hem he kuttide the sinewis at the knee, and the charys he brente. And turned aȝen anoon he took Asor, and the kyng of it he smoot with swerd; forsothe Asor bi oold tyme among alle these rewmes heelde the princehod. And he smoot alle lyues that there dwelten, he lefte not in it eny relikis, but vnto the deeth alle thingis he waastide; and that cytee he destruyede with brennynge. And alle the citees bi enuyroun and the kyngis of hem he took, and smoot, and dide awey, as Moyses, the seruaunt of the Lord, comaundide to hym, with out the citees that weren in the hillis, and in the hillokis set; and the other Yrael brente vp; oon onelich, the moost strengthid, Azor, flawme brente vp. And al the praye of thes citees, and beestis, the sones of Yrael dyuydeden to hem self, alle the enemyes slayn. As the Lord comaundide to his seruaunt Moyses, so Moyses comaundide to Josue, and he alle thingis fulfillide; and he passide not biside of alle the maundementis, forsothe ne o word, that the Lord comaundide to Moyses. And so Josue took al the mounteyn loond, and the south loond, and Gosen, and the pleyn, and the west coost, and the hil of Yrael, and the wijld feeldis of it; and a paart of the hil that steieth vp to Seyr vnto Baalgath, bi the pleyn of Libany vndur the hil of Hermon; alle the kyngis of hem he took, and smoot, and slewȝ. Myche tyme fauȝt Josue aȝens thes kyngis; there was no cyte, that took hym not to the sones of Yrael, saue Euee that dwellid in Gabaon; alle with fiȝtynge he took. Forsothe the sentence of the Lord it was, that the hertis of hem weren ful hardid, and shulde fiȝte aȝens Yrael, and falle, and thei shulde not disserue eny mercy, but shulden perisshe, as the Lord hadde comaundid to Moyses. In that tyme Josue cam, and slewȝ Enachym, fro the mownteyns of Ebron, and Dabir, and Anab, and of al the hil of Juda, and of Yrael, and the cytees of hem he dide awey. He lefte not eny of the stok of Enachym in the loond of the sones of Yrael, out taak the cytees of Gaza, and Geth, and Azoto, in the whiche aloon thei ben left. Thanne Josue took al the loond, as the Lord spak to Moyses, and took it into possessioun to the sones of Yrael, after paarties and her lynagis; and the loond restyde fro bateil.
Thes ben the kyngis whom the sones of Yrael smyten, and weeldiden the loond of hem, byȝond Jordan, at the sonne arisynge, fro the streem of Arnon vnto the hil of Hermon, and al the est coost that biholdith the wildernes. Seon, kyng of Amorreis, that dwellid in Esebon, hadde lordship fro Aroer, that is set vpon the brenk of the streem of Arnon, and of the mydil paart in the valey, and of half Galaad, vnto the streem of Jaboch, that is the teerme of the sones of Amon, and fro the wildernes vnto the see of Cenoroth, aȝens the est, and vnto the see of deseert, that is the moost salt see, at the est coost, bi the weye that ledith to Bethessymoth, and fro the south paart that vnderlieth to Assedoch, vnto Phasga. The teerme of Og, kyng of Basan, of the relikis of Raphaym, that dwelten in Astaroth and in Edram, and he hadde lordship in the hil of Hermon, and in Salacha, and in al Basan, vnto the teermes of Gessury and Machati, and of the half paart of Galaad, and the teerme of Seon, kyng of Esebon. Moyses, the seruaunt of the Lord, and the sones of Yrael smyten hem; and Moyses took the loond of hem into possessioun to Rubenytis and to Gaditis and to the half lynage of Manasse. Thes ben the kyngis of the loond, whom Josue smoot and the sones of Yrael biȝond Jordan, at the west coost, fro Algad in the feeld of Liban, vnto the hil whos paart steieth into Seyr; and Josue took it into possessyoun to the lynagis of Yrael, to eche her paartis, as wel in mounteyns, as in pleyn and wijld feeldis; in Asseroth, and in the wildernes, and in the south was Ethee, and Ammorree, Cananee, and Phereze, Euee, and Jebusee. The kynge of Jericho, oon; the kyng of Hay, oon, that is of the side of Betel; the kyng of Jerusalem, oon; the kyng of Ebron, oon; the kyng of Herymoth, oon; the kyng of Lachis, oon; king of Eglon, oon; king of Gazer, oon; king of Dabir, oon; kyng of Gader, oon; kyng of Herma, oon; kyng of Hedreth, oon; kyng of Lebna, oon; kyng of Odollam, oon; kyng of Maceda, oon; kyng of Betel, oon; kyng of Thaphua, oon; kyng of Affer, oon; kyng of Affeth, oon; kyng of Saron, oon; kyng of Madan, oon; kyng of Azor, oon; kyng of Sameron, oon; kyng of Axaph, oon; kyng of Thenach, oon; kyng of Maggedo, oon; kyng of Cetes, oon; kyng of Jachanaen of Carmel, oon; kyng of Dor and of the prouynce of Dor, oon; kyng of the Gentils of Galaad, oon; kyng of Thersa, oon; alle the kyngis, oon and thretti.
Josue was old and of greet age; and the Lord seyde to hym, Thow hast eeldid, and art of loong age; and the moost wide loond is left, that not ȝit is dyuydid bi lot; that is, al Galile Philistiym, and al Gessury, fro the trubli flood that weetith Egipt, vnto the teermys of Accharon aȝens the north; the loond of Chanaan, that in fyue litil kyngis of Philistiym is dyuydid, Gazeus, and Azotyus, Ascalonytes, Getheus, and Accharonytes. At the south forsothe ben Euees, al the loond of Chanaan, and fro Mara of Sydonys, vnto Affecha, and the teermes of Ammorrei, and his niȝ coostis; forsothe the regioun of Liban aȝens the est, fro Baalgat, vndur the hil of Hermon, to the tyme that thou goo into Emath, of alle that dwelliden in the hil, fro Liban vnto the watris of Masserephoth, and al Sydonys; Y am, that shal doon awey hem fro the face of the sones of Yrael; come it thanne in to the paart of the herytage of Yrael, as Y haue comaundid to thee. And nowe diuyde the loond into possessioun to nyne lynagis, and to the half lynage of Manasse, with the which Ruben and Gad weeldiden the loond, that Moyses, the seruaunt of the Lord, biȝond the flodis of Jordan took to hem, at the est coost; fro Aroer, that is set in the brenk of the streeme of Ernon, in the mydil of the valey, and al the wijld feeldis of Medaba, vnto Dibon, and alle the citees of Seon, the kyng of Amorreis, that fauȝt in Esebon, vnto the teermes of the sones of Amon, and Galaad, and to the teermys of Gessuri and Machati, and al the hil of Hermon, and al Basan vnto Selecha; al the kyngdom of Og in Basan, that regnede in Astaroth, and in Edraym; and he was of the relikis of Raphaym; and Moyses smoot hem, and dyde hem awey. And the sones of Yrael wolden not destruye Gessery and Machati; and dwelliden in the mydil of Yrael vnto the day that is nowe. Forsothe to the lynage of Leuy he ȝaue no possessioun, but the sacryfices, and the slayn offryngis of the Lord God of Yrael; that is his herytage, as he hath spokun to hym. Thanne Moyses ȝaf possessioun to the linage of the sones of Ruben, after her kynredis; and the teerme of hem was fro Aroer, that is set in the brenk of the streeme of Arnon, and in the mydil valey of the same streeme, al the pleyn that ledith to Medaba, and Esebon, and alle the litil towns of hem, that ben in the wijld feeldis; forsothe Dibon, and Baal Bamoth, and the burgh toun of Baal Meon, and Gesa, and Sedymoch, and Mephe, and Caryathaym, and Sabama, and Sarathaphar, in the hil of the valey of Betheroeth, and Assedoch, Phascha, and Bethaissymoth; alle the feeldi citees, and alle the rewmes of Seon, kyng of Ammorrei, that regnede in Esebon, whom Moyses smoot, with his princis, Madian, Euee, and Recten, and Sur, and Hur, and Rebee, dukys of Seon, dwellers of the loond. And Balaam, the sone of Beor, dyuynour, the sones of Yrael slewen with swerd with other slayn. And the teerme of the sones of Ruben is maad the flood of Jordan; this is the possessioun of Rubenytis bi her kynredis of citees and litil touns. And Moyses ȝaf to the lynage of Gad, and to his sones, bi her kynredis, possessioun, of the which the dyuysioun is this; the teermys of Jaser, and alle the citees of Galaad, and half paart of the loond of the sones of Amon, vn to Aroer that is aȝens Tabba; and fro Esebon vnto Ramoth Masphe, and Bethamyn, and Manayn, vn to the teermys of Dabir; in the valey also of Betharan and Bethnenar, and Sochoth, and Saphan, that other paart of the kingdom of Seon, kyng of Esebon; forsothe of this eend of Jordan is the vttermost part of the see of Cenereth biȝond Jordan, at the eest coost. This is the possessyoun of the sones of Gad, bi her meynees, citees and towns of hem. And he ȝaf to the half lynage of Manasse, and to his sones, after her kynredis, possessioun, of the which this is the bigynnynge; Ammyneym, and al Basan, and alle the kyngdoms of Og, the kyng of Basan, and alle the touns of Jayr, that ben in Basan, sexti burȝ touns; and half part of Galaad, and Ascharoth, and Edrai, citees of the kingdom of Og, kyng of Basan; to the sones of Machir and to the sones of Manasse, and to the half paart of the sones of Machir, after her kynredis. This possessioun dyuydede Moyses, in the wijld feeldis of Moab biȝond Jordan, aȝens Jericho, at the est plage. Forsothe to the lynage of Leuy he ȝaf no possessioun; for the Lord God of Yrael he is the possessioun of hym, as he hath spokun to hym.
This is that the sones of Yrael weeldiden in the loond of Chanaan, the whiche ȝeuen to hym Eleazar the preest, and Josue, the sone of Nun, and princis of the meynees bi the lynagis of Yrael, bi lot alle thingis dyuydynge, as the Lord comaundide in the hoond of Moyses, to nyne lynagis and to an half lynage. Forsothe Moyses ȝaf to the two lynages and to the half lynage biȝond Jordan possessioun; with outen the Leuytis, that no thing of erthe token among her britheren; but into the place of hem camen the sones of Joseph, into two lynagis dyuydid, Manasse, and Effraym. And Leuytis token noon other paart in the loond, but cytees to dwelle yn, and suburbis of hem to howsbeestis and his feeld beestis to be fed. As the Lord comaundide to Moyses, so the sones of Yrael diden, and dyuydeden the loond. And so the sones of Juda wenten to Josue in Galgalis; and Caleph, the sone of Jephone Cenezeus, spak to hym, Thou hast knowun, what the Lord hath spokun to Moyses the man of God of me and of thee in Cades Barne. Of fourti ȝeer Y was, whanne Moyses, the seruaunt of the Lord, sente me fro Cades Barne forto bihold the loond, and I toolde to hym, that me semed sooth. Forsothe my bretheren, that stieden vp with me, discoumfortiden the herte of the puple, and neuerthelater Y folwide the Lord my God. And Moyses swore in that day, seiynge, The loond, that thi foot shal treed, shal be thi possessioun, and of thi sones with out eend; for thou hast folwid the Lord thi God. Forsothe the Lord hath grauntid to me lijf, as he hath bihoot vnto the day that is nowe. Fyue and fourti ȝeer ben, sith the Lord spak this word to Moyses, whanne Yrael wente thurȝ wildirnes. To day Y am of fyue and eiȝti ȝeer, so myȝti, as that tyme Y was myȝti, whanne Y was sent to aspie; the strength of that tyme in me vnto to day abydith stil, as wel to fiȝt, as to goo. Ȝyf thanne to me this hil, the which the Lord hath bihoot to me, thee forsothe herynge, in the which ben Enachym, and greet citees and strengthid; if perauenture the Lord be with me, and shal mowe doo aweye hem, as he hath bihoot to me. And Josue blisside to hym, and took to hym Ebron into possessyon. And fro that tyme Ebron was to Caleph, the sone of Jephone Ceneze, vnto the present day; for he folwide the Lord God of Yrael. The name of Ebron before was clepid Caryatharbe. Adam moost greet there in the loond of Enachym was set; and the loond ceesside fro bataylis.
Thanne the lot of the sones of Juda, bi her kynredis, was this; fro the teerme of Edom vnto the deseert of Syn aȝens the south, and vnto the last paart of the south coost, the bigynnynge of it fro the heiȝt of the moost salt see, and fro the tonge of it, that biholdith to the south. And it gooth out aȝens the stiynge vp of Scorpion, and passith into Syna; and stiede vp into Cades Barne, and cometh into Efron, stiynge vp to Daran, and enuyrounynge Cariacaa, and thens passynge into Asemona, and comynge to the streeme of Egipt; and the teermes of it shulen be the greet se; this shal be the eend of the south coost. Fro the est the bigynnynge forsothe shal be the salt see, vnto the eendis of Jordan, and tho thingis, that biholden the north, fro the tonge of the see vnto the same flood of Jordan. And the terme stiede into Bethaegla, and gooth fro the north into Betharaba, stiynge vp to the stoon of Roen, the sone of Ruben, and strecchynge vnto the termys of Debara, fro the valey of Achor aȝens the north, biholdynge Galgala, that is forn aȝens of the stiynge vp of Adomyn, fro the south part of the streem, and passith the watris, that ben clepid the welle of the sunne; and shulen ben the goyngis out of it to the welle of Rogel. And it stieth vp bi the valey of the sone of Ennon, fro the side of Jebusei, to the south; this is Jerusalem; and fro thennus hym self arerynge to the cop of the hil, that is aȝens Jehennon at the west, in the heiȝt of the valey of Raphaym, aȝens the north; and passith fro the cop of the hil vnto the welle of the water of Nepthoa, and cometh vnto the touns of the hil of Ephron; and is bowid into Bala, that is Caryathiarym, that is of the cyte of wodis; and gooth about fro Baala aȝens the west, vn to the hil of Seir, and passith bisidis the side of the hil of Jarym to the north into Selbon, and gooth down into Bethsamys, and passith into Thanna; and cometh aȝen the north partis of Accharon fro the side, and is bowid to Sechrona, and passith the hil of Baala, and cometh into Gebnel, and of the greet see aȝens the west in the eend it is closid to gidrys. Thes ben the teermes of the sones of Juda, bi enuyroun in her kynredis. To Caleph, the sone of Jephone, he hath ȝouun part in the mydil of the sones of Juda, as the Lord comaundyde to hym, Caryatharbe, of the fader of Enach; it is Ebron. And Caleph dide awey fro it thre sones of Enach, Sysay, Achyman, and Tolmay, of the stok of Enach. And fro thens comynge doun he cam to the dwellers of Dabir, that before was clepid Caryathsepher, that is, citee of lettrys. And Caleph seide, Whoso smytith Caryathsepher, and takith it, Y shal ȝyue to hym Axam, my douȝter, wijf. And Othonyel, the sone of Zeneth, the brother of Caleph, the ȝonger, took it; and he ȝaf to hym Axam, his douȝter, wijf. The which, whanne she wente togidres, hir man meuede to hir for to axe of hir fader a feeld; and she siȝide, as she sat in the asse; to whom Caleph, What hast thow, he seith? And she answerd, Ȝif to me a blessynge; the south loond and drye thou hast ȝyue to me; ioyn and a water loond. And Caleph ȝaf to hir a watry loond, aboue and bynethe. This is the possessioun of the lynage of the sones of Juda, bi her kynredis. And her citees weren fro the last parties of the sones of Juda, biside the teermes of Edom, fro the south of Capsahel, and Edel, and Jagur; Eccyna, and Dymona, Edada, and Cades, and Alor, and Jethnan, and Ypheth, and Thelem, and Balaoth, and Asor, Nobua, and Caryoth, Effron; this is Assoromam; Same, and Molida, and Aser, Gabda, and Assemoth, Bethfeleth, and Acertual, and Bersabee, and Baiuhia, and Baala, and Hymesen, and Betholad, and Exil, and Herma, and Sichelech, and Meacdemena, Sensena, Lebioth, and Selymetem Remmoth; alle the citees nyyn and thretti, and the touns of hem. Forsothe in the feeldis of Eschoal, and Saraa, and Asena, and Azanoe, and Eugannem, and Thaphua, and Enaym, and Jesemoth, Adulam, Socco, and Azecha, and Sarym, Aditaim, and Gedam, and Giderothaim; the cytees fourteen, and the touns of hem; Sanam, and Eseba, and Magdalgad, Delen, and Melcha, Betel, Lachis, and Baschath, and Eglon, Esbon, and Leemas, and Cethlis, and Gideroth, and Bethdagon, and Nenna, and Maceda; cytees sexteen, and the townes of hem; Jambane, and Ether, and Asam, Jepta, and Jesua, and Nesib, and Ceyla, and Asib, and Maresa, cytees nyne, and the towns of hem; Accharon with towns and his villagis; from Accaron vnto the see, alle that drawen to Azaot, and the villagis of it; Azaoth with touns and his villagis; Gaza with towns and his villagis, vnto the streeme of Egipt; and the greet see the teerme of it; and in the hil of Samyr, and Jecther, and Socco, and Edenna, Charyath Senna; this is Dabir; Anab, and Yschemo, and Ammygosen, and Olom, and Gilo, citees enleuen, and the towns of hem; Arab, and Roma, and Esaam, and Ammin, and Bethfasua, and Aphecha, and Anymacha, Caryatharbe; that is Ebron; and Sior, citees nyne, and towns of hem; Maon, and Hermen, and Ziph, and Jothae, Zerahel, and Zachadamer, and Anoe, and Chaym, Gabaa, Canna, citees ten, and the towns of hem; Alul, and Bethsur, and Jodor, Mareth, and Bethanoth, and Bethecen, citees sixe, and the touns of hem; Caryathbaal; that is Caryathiarym, citee of wodis; and Rebda, citees two, and the touns of hem; in the deseert of Betharaba, Medyn, and Cyriacha, and Nebsan, and the citee of salt, and Engadi, citees six, and the touns of hem; thei weren togidre an hundryd and fifteen. Forsothe Jebuse, the dweller of Jerusalem, myȝte not the sones of Juda doon a wey; and Jebuse dwelt with the sones of Juda in Jerusalem vnto the day that is now.
And the lot of the sones of Joseph felle fro Jordan aȝens Jericho, and to the watrys of it, fro the est; the wildirnes that stieth vp fro Jericho to the hil of Bethel, and goth out fro Bethel Luzan, and passith the teerme of Architaroth, and cometh doun to the west biside the teerme of Jefleti, vnto the teermes of the nethermore Betheron, and of Gazar; and the regiouns of it ben endid in the greet see, that weeldiden the sones of Joseph, Manasses and Effraym. And the teerme of the sones of Effraym, bi her kynredis, is maad, and the possessioun of hem aȝens the est, Acharothaddar vnto the ouermore Betheron. And goon out the side coostis into the see; forsothe Mathmethath biholdith the north, and enuyrouneth the teermys aȝens the est in Thanarselo, and passith fro the streme of Janoe; and goth doun fro Janoe into Atharoth and Noathara, and cometh into Jericho; and goth out to Jordan fro Thaphua, and passith aȝens the see in to the valey ful of reedis; and the goyngis out of it ben to the moost salt see. This is the possessioun of the lynage of the sones of Effraym, bi her meynees; and the citees ben seuerd to the sones of Effraym in the mydil of the possessioun of the sones of Manasse, and the towns of hem. And the sones of Effraym slewen not Chanane, that dwelt in Gaser; and Chanane dwellid in the mydil of Effraym vnto this day tribitarye.
And the lot felle to the lynage of Manasse, forsothe he is the first goten of Joseph; to Machir, the first goten of Manasses, the fader of Galaad, that was a man fiȝter, and hadde the possessioun of Galaad and Basan; and to the relikis of the sones of Manasse, after her meynees; to the sones of Abieser, and to the sones of Heleph, and to the sones of Hesryel, and to the sones of Sichem, and to the sones of Epher, and to the sones of Semyda; thes ben the sones of Manasse, sone of Joseph, maalis, bi her kynredis. To Salphat forsothe, the sone of Epher, sone of Galaad, sone of Machir, sone of Manasse, were no sones, but oonli douȝtres; of the whiche thes ben the names, Maala, and Noa, and Negla, and Melcha, and Tersa. And thei camen in the siȝt of Eliazar, preest, and of Josue sone of Nun, and of the princis, seiynge, The Lord hath comaundid bi the hoond of Moyses, that possessioun were ȝouun to vs in the mydil of oure britheren. And he ȝaf to hem, after the heest of the Lord, possessioun in the mydil of the britheren of the fader of hem. And the litil cordis fellen to Manasse ten, with out the loond of Galaad and Basan biȝond Jordan; forsothe the douȝtres of Manasse hadden herytage in the mydil of the sones of hym. Forsothe the loond of Galaad felle into the lot of the sones of Manasse, that weren left. And the teerme of Manasse was fro Aser Machynathat, that biholdith Sichem, and gooth out to the riȝt biside the dwellers of the welle of Taphue. And forsothe in the lot of Manasse felle the loond of Taphue, that is biside the teermes of Manasse, and of the sones of Effraym. And the teerme of the valey ful of reedis cometh doun in the south of the streeme of the cytees of Effraym, that ben in the mydil of the cytees of Manasse. The teerme of Manasse fro the north of the streem, and the goynge out of it gooth to the see; so that the possessioun of Effraym be fro the south, and fro the north of Manasse, and either closith the see; and thei ben ioyned to hem self in the lynage of Aser fro the north, and in the lynage of Ysachar fro the est. And the herytage of Manasse was in Ysachar and in Aser, Versan and the litil touns of it, and Jeblaan with his litil touns, and the dwellers of Dor, with her borgh touns; forsothe the dwellers of Endor, with her litil touns, and also the dwellers of Thanath, with her litil touns, and the dwellers of Magedo, with her litil touns, and the thridde part of the cytee of Nophet. Ne the sones of Manasse myȝten these cytees vndurturn, but Chanane bygan to dwelle in this loond. Forsothe after that the children of Yrael weren recouerd, thei sugetiden the Chananeis, and maden tributaryes to hem, and slewen hem not. And the sones of Joseph speken to Josue, and seiden, Whi hast thow ȝeue to me loond into possessioun of lot and of o litil coord, sith Y am of so myche multitude, and the Lord hath blessid me? To whom Josue seith, If thow art a myche puple, sty into the wode, and hew to thee spacis in the loond of Pherezei, and Raphaym; for streyt is to thee the possessioun of the hil of Effraym. To whom answerden the sones of Joseph, We shulen not mowe stie vp to the mounteyns, sith yren charys vsen the Chananees, that dwellen in the feeldi loond; in the which ben set Bersan, with his litil touns, and Jerazel hauynge the mydil valey. And Josue seide to the hous of Joseph, that is, Effraym and Manasse, Thow art a myche puple, and of greet strengthe; thow shalt not haue o soort, but thow shalt passe to the hil, and hew to thee, and purge spacis to dwelle. And thow shalt mowe forthermore goo forth, whanne thow hast vndur turned Chananee, whom thow seist yren charis to han, and to be moost strong.
And alle the sones of Yrael ben gedryd in Sylo, and there thei piȝten the tabernacle of witnessynge; and the loond was suget to hem. Forsothe there dwelten of the sones of Yrael seuen lynagis, that ȝit not hadden taak her possessiouns. To whom seith Josue, How long welewen ȝe with slewth, and ȝe goon not into the loond to be weeldid, that the Lord God of ȝoure faders hath ȝyue to ȝou? Chesith of eche lynagis thre men, that Y sende hem, and thei goon, and enuyroun the loond, and discryue it after the noumbre of eche multitude, and thei tellen to me, that thei han discryued. Dyuyde ȝe to ȝou the loond into seuen partis; Judas be in hys teermes at the south coost, and the hows of Joseph fro the north; the mydil loond bitwix thes discryue ȝe into seuen partise; and thanne ȝe shulen come to me, that before the Lord oure God I sende to ȝow her lot; for there is not a mong ȝou paart of Leuytis, but preesthod of the Lord, this is the herytage of hem. Forsothe Gad, and Ruben, and the half lynage of Manasse now han taak her possessiouns biȝond Jordan, at the est coost, the whiche Moyses, the seruaunt of the Lord, hath ȝeue to hem. And whanne the men weren rysen for to goon, to discryue the loond, Josue commaundide to hem, seiynge, Gooth aboute the loond, and discryue ȝe it, and torneth aȝen to me, that here bifore the Lord ȝoure God in Sylo Y sende to ȝou lot. And so thei wenten, and goynge about it in seuen parties dyuydeden, wrytynge in volym; and thei turneden aȝen to Josue, into the tentis of Sylo. The whiche leide lottis before the Lord God in Silo, and dyuydede the loond to the sones of Yrael, into seuen parties. And stiede vp the first lot of the sones of Beniamyn, by her meynees, that thei weelden the loond bitwix the sones of Juda and the sones of Joseph. And the teerme of hem was aȝens the north fro Jordan, goynge bisyde the side of Jerycho of the north coost; and fro thens aȝens the west to the mounteyn stiynge, and comynge to the wildirnes of Bethanen, and passynge biside Luzan to the south; that is Bethel; and he cam doun into Astaroth of Adar, into the hil that is at the south of the nether Betheron; and is bowid goynge about aȝens the see, to the south of the hil that biholdith Betheron aȝens Affrijk; and the goyngis out of it ben Scaryathabaal, and the whiche is clepid Caryathiarym, the cytee of the sones of Juda; this is the greet coost aȝens the see, to the west. Forsothe fro the south, of the part of Caryathiarym, gooth out the teerme aȝens the see, and cometh vnto the welle of watris of Nepthoa; and comith doun into the paart of the hil that biholdith the valey of the sones of Ennon, and is aȝens the north coost, in the vttermoost paart of the valey of Raphaym; and Gehennon, that is, the valey of Ennon, cometh doun by side the side of Jebusei, to the south, and cometh to the welle of Rogel, passynge to the north, and goynge out to Empsemes, that is, the welle of the sunne, and passith vnto the litil hillis that ben forn aȝens of the stiynge vp of Adomyn; and cometh doun to Thabem Boen, that is, the stoon of Boen, sone of Ruben, and passith fro the side of the north to the wijld feeldis; and cometh doun into the pleyn, and gooth biside aȝens the north of Bethagalam; and the goyngis out of it ben aȝens the tong of the saltest see, fro the north, in the eend of Jordan to the south coost, that is the teerme of it fro the est. This is the possessioun of the sones of Beniamyn, bi her teermys in enuyroun, and her meynees; and his citees weren Jericho, and Bethegla, and the valey of Casis, Betharacha, and Samaraym, and Bethel, and Anym, and Affara, and Offyra, the toun Hesmona, and Offym, and Gabee, cytees twelue, and the touns of hem; Gabaon, and Rama, and Beroth, and Mesphe, Chaphera, and Anymosa, and Recen, Jerephel, and Tharela, and Sela, and Heleph, and Jebus, that is Jerusalem, Gabaath, and Curiath, citees fourteen, and the touns of hem; this is the possessioun of the sones of Beniamyn, aftir her meyneis.
And the secounde lot of the sones of Symeon is goon out, bi his kynredis; and was the herytage of hem in the mydil of the possessioun of the sones of Juda, Bersabee, and Sabee, and Melada, and Asersualbala, and Asem, and Beltholaad, and Bethularma, and Sicelech, and Bethmarthaboth, and Asersua, and Bethelaboth, and Saroem, cytees thretteen, and the touns of hem; Aym, and Remmon, and Athar, and Asam, citees foure, and the touns of hem; alle the litil touns bi enuyroun of thes citees, vnto Balath Brameth, aȝens the south coost, were cytees seuenteen. This is the herytage of the sones of Symeon, after her kynredis, in the possessioun and litil coord of the sones of Juda, for he was more; and therfor the sones of Symeon hadden possessioun in the mydil of the herytage of hym. And the thridde lot felle of the sones of Zabulon, bi her kynredis; and the teerme of the possessioun of the sones of Zabulon is maad vnto Sarith, and stiede vp fro the see, and Medala, and cometh in to Debbaseth, vnto the streem that is aȝens Jesenam; and turneth fro Saryth, aȝens the est, into the eendis of Secelech Thabor; and gooth out to Dabereth; and stieth vp aȝens Jasie; and thens passith to the est coost, Gethepher, and Thachasym; and geeth out into Remmon, Amphar, and Noa; and gooth about to the north, and Nachon; and the goynge out of it ben of the valey of Jeptael, and Cathel, and Neamay, and Semrom, and Jedaba, and Bethleem, citees twelue, and the touns of hem. This is the herytage of the lynage of the sones of Zabulon, bi her kynredis, and citees, and touns of hem. Of Ysachar wente out the feerth lot, bi his kynredis; and his heritage was Jezrael, and Cathsaloth, and Symeon, and Effraym, and Seon, and Anaarath, and Cabith, and Cesyon, Hames, and Ramech, and Enganym, and Enadda, and Bethfeses. And the teerme of it cometh vnto Thabor, and Seesyma, and Hethsemes; and the goyngis out of it weren of Jordan, cytees sexteen, and the touns of hem. This is the possessioun of the sones of Ysachar, bi her kynredis, cytees, and litil touns of hem. And felle the fifthe lot to the lynage of the sones of Aser, bi her kynredis; and the teermes of hem was Alchat, and Acly, and Bethen, and Mesaph, and Elmelech, and Amaad, and Messal; and cometh unto Carmyl of the see, and Syor, and Labanath; and tornith aȝens the est of Bethdagan, and passith vnto Zabulon, and the valey of Jeptael, aȝens the north, into Bethemeth, and Neiel; and gooth out to the left of Cabul, and Acram, and Roab, and Omynon, and Chane, vnto greet Sydon; and turneth aȝen into Horma, vnto the moost strengthid cytee Tyrum, and vnto Osam; and the goyngis out of it shulen be into the see, fro the litil coord Aczima, and Affeth, and Roab; cytees two and twenti, and the touns of hem. This is the possessioun of the sones of Aser, bi her kynredis, citees, and the touns of hem. Of the sones of Neptalym the sext lot fel, bi her meynees; and bigunne the teerme fro Heleth, and Helon, and Sannayra, and Adarny, that is Neseb, and Jebnael, vnto Letun; and the goynge out of hem unto Jordan; and cometh aȝen the teerme, aȝens the west, in Arnoth Thabor; and thens gooth out in to Hucota, and passith into Zabulon, aȝens the south, and into Asor, aȝens the west, and into Juda, at Jordan, aȝens the rysyng of the sunne; of the moost strengthid cite Assedyn, Ser, and Amraath, and Rechath, and Cenereth, and Edema, and Arama, Asor, and Cedes, and Edray, and Nason, and Jeron, and Magdael, Horem, and Bethanath, and Bethsemes; citees nynteen, and the touns of hem. This is the possessyoun of the lynage of the sones of Neptalym, bi her kynredis, citees, and the litil touns of hem. To the lynage of the sones of Dan, bi her meynees, wente out the seuenthe lot; and was the teerme of his possessioun Saraa, and Aschahol, and Darsemes, that is, the cytee of the sunne, Selenym, and Haylon, and Jethela, and Helom, and Thenna, and Acrom, and Hethesem, and Jebtom, and Baalath, Lud, and Benebarach, and Jethremmon, and Yharchon, and Arechon, with the teerme that biholdith Joppen, and with that eend is closid. And the sones of Dan stieden vp, and fouȝten aȝens Lesem, and token it, and smyten it in mouth of swerd, and weeldiden, and dwelten in it, clepynge the name of Lesan Dan, of the name of Dan, his fader. This is the possessioun of the lynage of the sones of Dan, bi her kynredys, cytees, and litil touns of hem. And whanne he hadde fulfillid bi lot the loond to dyuyde to eche bi his lynagis, ȝeuen the sones of Yrael possessioun to Josue, the sone of Nun, in her mydil, after the heest of the Lord, the citee that he askide, Thannath Sara, in the hil of Effraym; and he bildide the cytee, and dwellide in it. Thes ben the possessiouns that bi lot dyuydeden Eleazar, the preest, and Josue, the sone of Nun, and the princes of the meynees, and of the lynagis of the sones of Yrael, in Silo, before the Lord, at the dore of the tabernacle of witnessynge, and partiden the loond.
And the Lord spak to Josue, seiynge, Spek to the sones of Yrael, and sey to hem, Seuer ȝe the cytees of fugityues, of whiche I spake to ȝou bi the hond of Moises, that fleȝe to hem, whoso euer a lijf hath smytun vnwitynge; that he mowe ascaap the wrath of the neiȝbore, that is wreker of the blood, whanne to oon of these cytees he fleeth. And he shal stoond before the ȝatis of the citee, and he shal speke to the aldren of that citee tho thingis that hym silf preuen innocent; and so thei shulen take hym, and ȝyue hym a place to dwelle. And whanne the blood wreker hym pursue, thei shulen not take hym in to his hoondis; for vnwitynge he smoot the neiȝbore of hym, ne before two dayes or thre daies he shal be preued the enemye of hym. And he shal dwelle in that citee to the tyme that he stoond before dom, cause ȝeeldynge of his deede. And abide he stille that hath slayn, to the tyme that the greet preest dye, that were in that tyme; thanne shal the mansleer turne aȝen, and go into the citee and his hows, fro the which he fleiȝ. And thei seuerden Cedes in Galile, of the hil of Neptalim, and Sichem in the hil of Effraym, and Caryatarbe, that is Ebron, in the hil of Juda. And biȝond Jordan, aȝens the est coost of Jericho, thei ordeynden Bozor, that is set in the feeldy wildirnes of the lynage of Ruben, and Ramoch in Galaad, of the lynage of Gad, and Gaulon in Basan, of the linage of Manasse. Thes ben the citees ordeynd to the sones of Irael, and to comlyngis that dwellen among hem, that he fleeȝe to tho, the whiche vnwitynge a lijf hath smyten; and he die not in the hoond of the neiȝbour, coueytynge to wreek the shad blood, to the tyme that he to expounen his cause, stoond before the puple.
And the princes of the meynees of Leuy camen to Eleazar, the preest, and to Josue, the sone of Nun, and to the dukys of the kynredis, bi eche lynagis of the sones of Yrael; and thei speken to hem in Silo, of the loond of Chanaan, and seiden, The Lord comaundide bi the hoond of Moyses, that there shulden be ȝeue to vs cytees to dwel, and suburbis of hem to beestis to be fed. And the sones of Irael ȝauen of her possessiouns, after the heest of the Lord, citees and suburbs of hem. And the lot wente out in to the meynee of Chaat, of the sones of Aaron, preest, of the lynage of Juda, and of Symeon, and of Beniamyn, citees thretteen; and to that other of the sones of Chaath, that is, to the Leuytis that weren ouer, of the lynagis of Effraym, and of Dan, and of half the lynage of Manasse, cytees ten. Forthermore to the sones of Gerson wente out lot, that thei taken of the lynagis of Ysachar, and Aser, and Neptalym, and of the half lynage of Manasse in Basan, cytees in noumbre thretteen; and to the sones of Merary, bi her kynredis, of the lynagis of Ruben, and of Gad, and of Zabulon, citees twelue. And the sones of Yrael ȝauen to the Leuytis citees, and suburbs of hem, as the Lord comaundide bi the hoond of Moyses, eche bi lot ȝyuynge. Of the lynagis of the sones of Juda, and of Symeon, Josue ȝaf citees, of the whiche thes ben the names; to the sones of Aaron, bi the meynees of Chaath, of Leuy kynde; forsothe the fyrst lot goon out to hem is; Caryatharbe, of the fader of Enach, that is clepid Ebron, in the hil of Juda, and the suburbs of it bi enuyroun; forsothe feeldis and the touns of it he ȝaf to Caleph, the sone of Jephone, to weeld. He ȝaf thanne to the sones of Aaron, preest, Ebron, the citee of fliȝt, and the suburbs of it, and Lebna with his suburbs, and Gether, and Yschymon, and Elon, and Dabyr, and Aym, and Lethan, and Bethsames with his suburbs; citees nyne, of the lynagis, as it is seid, of two; forsothe of the lynage of the sones of Beniamyn, Gabaon, and Gabae, and Anathot, and Almon with his suburbs; citees foure. Alle togidre the citees of the sones of Aaron, preest, thretteen, with her suburbis. Forsothe to that other of Leuyte kynde, bi the meynees of the sones of Caath, this the ȝouen possessioun; of the lynage of Effraym, the cytee of fliȝt, Sichem, with hys suburbs, in the hil of Effraym, and Gaser, and Cebseyn, and Bethoron with his suburbs; citees foure; and of the lynage of Dan, Helthece, Gebethon, and Hayhalon, and Gethremmon with his suburbs; cytees foure; forsothe of the half lynage of Manasse, Thanach, and Gethremon, with his suburbs, citees two. Alle the ten cytees and suburbs of hem ben ȝeue to the sones of Caath, of the lower degree. Forsothe to the sones of Gerson, of Leuyte kynde, he hath ȝouun, of the half lynage of Manasse, citees of fliȝt, Gaulon in Basan, and Bosram, with his suburbis; citees two; forsothe of the lynage of Ysachar, Thesion, Dabireth, and Geromoth, and Enganym with his suburbs; citees foure; of the lynage of Azer, Masal, and Abdon, and Elechat, and Roob with his suburbs; cytees foure; and of the lynage of Neptalym, citee of fliȝt, Cedes in Galile, and Amodor, and Carthan with his suburbs; cytees three. Alle the citees of the meynees of Gerson, thretteen, with his suburbs. Forsothe to the sones of Merary, Leuytis of the lower degre, bi her meynees, is ȝouun, of the lynage of Zabulon, Getheron, and Carcha, and Demna, and Nalol; cytees foure, with her suburbs; of the lynage of Gad, the cytee of fliȝt, Ramoth in Galaad, and Manahym, and Esebon, and Jazer; citees foure, with her suburbs; and of the lynage of Ruben, biȝond Jordan, aȝens Jericho, citee of refuyt, Bozor in the wildernes of Mysor, and Jazer, and Jecson, and Maspha; citees foure, with her suburbs. Alle the cytees of the sones of Merary, bi meynees and her kynredis, twelue. And so alle the citees of Leuytis, in the mydil of the possessioun of the sones of Yrael, weren eiȝt and fourti, with her suburbs, eche bi meynees delid. And the Lord God hath ȝouun to Yrael al the loond that he swore hym self to ȝeue to faders of hem, and thei weeldiden it, and dwelten in it. And of hym is ȝouun pees in alle naciouns bi enuyroun; and noon of the enemyes is hardi to withstoond hem, but alle ben brouȝt into the lordship of hem. Forsothe ne o word that to hem he bihiȝte hym self to be to ȝeue, was maad in veyn, but in dedys alle thingis ben fulfillyd.
The same tyme Josue clepide Rubenytis, and Gadditis, and half the lynage of Manasse, and seide to hem, Ȝe han doo alle thingis that to ȝou comaundide Moyses, the seruaunt of the Lord, and to me in alle thingis ȝe han obeishid; ne ȝe han left youre britheren long tyme vnto the present day, kepynge the heest of the Lord ȝoure God. For thanne the Lord ȝour God hath ȝeue to ȝoure britheren rest and pees, as he hath bihoot, turne ȝe aȝen, and gooth yn to ȝour tabernaclis, into the loond of ȝoure possessioun, that took to ȝow Moyses, the seruaunt of the Lord, biȝond Jordan; so oonli that ȝe kepen attentifly, and in dede fulfil, and the maundement and the lawe, that comaundide to ȝow Moyses, the seruaunt of the Lord; that ȝe louen the Lord ȝoure God, and goon in alle his weies, and kepe wel the heestis of hym, and drawe to hym, and serue in al herte, and in alle ȝoure soule. And Josue blesside to hem, and lafte hem, the whiche ben turned aȝen into her tabernaclis. And Moyses ȝaf to the half lynage of Manasse possessioun in Basan; and therfor to the half that lefte ouere, Josue ȝaf lot among his other britheren biȝond Jordan, at the west coost. And whanne he shulde leeue hem into her tabernaclis, and hadde blessid hem, he seide to hem, In myche substaunce and rytches turne ȝe aȝen to ȝoure seetis; with siluer, and gold, and bras, and yren, and manyfold clothinge; deuyde ȝe the praye of enemyes with ȝoure britheren. And the sones of Ruben, and the sones of Gad, and the half lynage of Manasse turneden aȝen, and wenten fro the sones of Yrael fro Silo, that is set in Chanaan, that thei goon into Galaad, the loond of her possessioun, that thei hadden after the heest of the Lord in the hoond of Moyses. And whanne thei weren comen to the mynde hyllis of Jordan, into the loond of Chanaan, thei bildiden biside Jordan an auter of mychilnes with out mesure. The which whanne the sones of Yrael hadden herd, and to hem certeyn messangeris hadden toold, the sones of Ruben, and of Gad, and the half lynage of Manasse to haue bilde an auter in the loond of Chanaan, vpon Jordans mynde hillis, aȝens the sones of Yrael, alle thei camen togidre in Cylo, that thei stien vp, and fiȝten aȝens hem. And in the mene tyme thei senten to hem into the loond of Galaad, Phynees, the sone of Eleazar, preest, and ten princes with hym; eche of eche lynages. The whiche camen to the sones of Ruben, and of Gad, and of the half lynage of Manasse, vnto the loond of Galaad, and seiden to hem, Thes thingis sendith al the puple of the Lord; What is this transgressioun? Whi han ȝe forsakun the Lord God of Yrael, bildynge a sacrilege auter, and fro the heriynge of hym goynge a wey? Whether litil it is to ȝou that ȝe synneden in Belphegor, and vnto the day that is nowe the spot of this hidows gilt in ȝou dwellith, and many of the puple han faln doun? And ȝe to day han forsakun the Lord, and to morwe in to al Israel the wrath of hym shal wexe wood. And if ȝe wenen the loond of ȝoure possessioun to be vnclene, gooth to the loond, in the which is the tabernacle of the Lord, and dwelle ȝe among vs, oonly that fro the Lord ȝe goon not awei, and fro oure felawship, an auter bilden vp biside the auter of the Lord oure God. Whether not Achor, the sone of Zare, passide biside the heest of the Lord, and vpon al the puple of Yrael the wrath of hym felle? And he was o man; and wolde God he alone hadde perishid in his hidows gilt. And the sones of Ruben, and of Gad, and of the half lynage of Manasse, answerden to the princes of the message of Yrael, The moost strong Lord God of Israel he hath knowun, and Yrael togidre shal vndurstoond; if bi inwit of trespassynge this auter we han maad vp, keep he vs not, but punyshe nowe; and if bi that mynde we han doon, that brent sacrifices, and sacrifice, and pesible slayn offryngis vpon it we han put, he seche, and deme; and not more bi that thenkynge and treet that we shulen say, To morwe shulen seye ȝoure sones to oure sones, What to ȝow and to the Lord God of Yrael? The Lord hath put a teerme bitwix vs and ȝow, O sones of Ruben and sones of Gad, Jordan flood; and therfor ȝe han no part in the Lord; and bi this occasioun ȝoure sones shulen turne a wey oure sones fro the dreed of the Lord. And so we troweden better, and seiden, Make we out to vs an auter, not into brent sacrifices, ne to slayn offryngis to be offrid, but into witnessynge bitwix vs and ȝow, and ȝoure children and progenye and oure, that we seruen to the Lord, and of oure riȝt ben to offre brent sacrificis, and slayn offringis, and pesible oostis; and ȝoure sones seyn not to morwe to oure sones, There is not paart to ȝou in the Lord. And if thei wolen seye, thei shulen answere to hem, Loo! the auter of the Lord, that maden oure fadres, not into brent sacrificis, ne into sacrifices, but into oure and ȝoure witnessynge euerlastynge. God shilde fro vs this hidows gilt, that we goon a weye fro the Lord, and his steppis we forsaken, an auter made out to brent sacrificis, and sacrificis, and slayn offryngis to ben offred, biside the auter of the Lord oure God, that is maad out before the tabernacle of hym. The whiche thingis herd, Phinees, the preest, and princis of the message of Yrael, that weren with hym, ben plesid; and the wordis of the sones of Ruben, and of Gad, and of half lynage of Manasse gladli thei token. And Phynees, the sone of Eleazar, preest, seide to hem, Now we witen, that with ȝou is the Lord; for alien ȝe ben fro this trespas, and ȝe han delyuerd the sones of Yrael fro the hoond of the Lord. And he turned aȝen with the princis fro the sones of Ruben and of Gad, fro the loond of Galaad of the coostis of Chanaan, to the sones of Yrael; and tolde to hem. And the word pleside to alle men herynge; and the sones of Yrael preysiden God, and seiden, that no more thei shulden goo vp aȝens hem, and fiȝte, and do aweie the loond of the possessioun of hem. And the sones of Ruben and the sones of Gad clepen the auter, that thei hadden maad, Oure Witnessynge, that the Lord he be God.
Ouerturned forsothe myche tyme after that the Lord hadde ȝeue pees to Irael, sugettid alle naciouns in enuyroun; and Josue now of long lijf, and of ful old age, Josue clepid al Yrael, and the more thurȝ birth, and princis, and dukys, and maystris, and seide to hem, I haue eeldid, and am of more goon forth age; and ȝe biholden alle thingis that the Lord ȝoure God hath doon to alle naciouns bi enuyroun, what maner wise for ȝou he hath fouȝten. And nowe for he hath dyuydid to ȝou bi lot al the loond, fro the est paart of Jordan vnto the greet see, and manye ȝit naciouns ouerleeuen, the Lord ȝoure God shal scater hem, and doo awey fro ȝoure face; and ȝe shulen weeld the loond, as he hath bihoot to ȝow. Oonly takith comfort, and beth bisy, that ȝe kepen alle thingis that ben writun in the volym of the lawe of Moyses, and that ȝe bowen not aside fro hem, ne to the riȝt ne to the left, lest after that ȝe goon into the gentylis, that among ȝou ben to come, ȝe sweren in the name of the goddis of hem, and serue to hem, and honoure hem. But cleue ȝe to the Lord ȝoure God, the which thing ȝe han doon vnto this day; and thanne the Lord God shal doo awey in ȝoure siȝt greet gentilis, and moost stronge; and no man shal withstoond to ȝow. Oon of ȝou shal pursue a thousand men of enemyes, for the Lord ȝoure God for ȝou he shal fiȝt, as he hath bihoot. This oonli moost bisily be ȝe war before, that ȝe louen the Lord ȝoure God. And if that ȝe wolen drawe to the errours of thes gentilis that among ȝou dwellen, and with hem mengith maryagis, and frenships cowple, nowe thanne wite ȝe, that the Lord ȝoure God do hem not a wey bifore ȝoure face, but to ȝow thei shulen be in to a diche, and grene, and hurtynge of ȝoure side, and a staak in ȝoure eyen, to the tyme that he doo ȝou a wey, and scater fro this best loond, that he hath taak to ȝou. Loo! I to day goo into the weie of al erthe; and with al inwit ȝe shulen knowe, that of alle the wordis the whiche the Lord hath bihoot hym self to be to doo to ȝou, he hath not passid biside oon in veyn. Thanne as he hath fulfillid in dede that he hath bihoot, and welsumli alle thingis ben comen, so he shal brynge vpon ȝow what thing of yuels he hath thrett, to the tyme that he do ȝow a wey, and scater fro this best loond, that he hath taak to ȝou. Forthi that ȝe han biside passid the couenaunt of the Lord ȝoure God, that he hath couenauntid with ȝow, and ȝe han serued to alien goddis, and honourde hem, soone and swiftli shal aryse in ȝow the woodnes of the Lord; and ȝe shulen be takun a wey fro this best loond, that he hath taak to ȝow.
And Josue gedride al the lynages of Yrael in Sechym; and clepide the more thurȝ birth, and princes, and iugis, and maystris; and stoden in the siȝt of the Lord. And to the puple thus he spak, Thes thingis seith the Lord God of Yrael, Biȝond the flood dwelten oure fadres fro the bigynnynge, Thare, the fader of Abraham, and Nachor, and serueden to alien goddis. I haue taak ȝoure fader Abraham fro the eendis of Mesopotanye, and haue brouȝt hym in to the loond of Chanaan; Y haue multiplied his seed, and ȝaf to hym Ysaac; and to hym eft I ȝaf Jacob and Esau; of the whiche to Esau Y ȝaf the hil of Seyr to weeld; Jacob forsothe and his sones descendiden into Egipt. And Y sente Moyses and Aaron, and smoot Egipt bi manye signes and wondris, and ladde out ȝou and ȝoure fadres fro Egipt. And ȝe camen to the see, and Egipciens pursueden ȝoure fadris with charis, and rydynge, vnto the Reed See. And the sones of Yrael cryeden to the Lord, the which putte derknes bitwix ȝow and the Egipciens, and brouȝte vpon hem the see, and couerde hem. Ȝoure eyen han seen alle thingis, that Y haue doo in Egipt. And ȝe han dwelt in wildirnes myche tyme. And I haue brouȝt ȝow in to the loond of Amorrey, that dwellid byȝond Jordan; and whanne thei shulden fyȝt aȝens ȝou, Y took hem into ȝoure hoondis, and ȝe weldiden the loond of hem, and slewen hem. Forsothe Balac, the sone of Sephor, the kyng of Moab, roos, and fauȝt aȝens Irael; and he sente, and clepide Balaam, the sone of Beor, for he shulde curse to ȝou. And I wolde not here hym, but aȝenward bi hym I blesside to ȝou, and delyuerde ȝow fro his hoondis. And ȝe passiden ouer Jordan, and camen to Jericho; and men of that citee fauȝten aȝens ȝow, Amorre, and Phereze, and Chanane, Ethee, and Gergese, and Euee, and Jebuse; and I took hem into ȝoure hoondis. And I sente before ȝou hors fleeȝis, and I keste hem out fro her placis, the two kyngis of Amorreis, not in swerd and in thi bowe. And Y haue ȝyue to ȝou the loond, in the which ȝe han not trauayld, and citees the whiche ȝe han not bild, that ȝe shulen dwelle in hem, vynes and olyues, the whiche ȝe han not plauntid. Nowe thanne drede ȝe the Lord, and serue ȝe to him with perfit herte and moost trewe; and doth awey goddis, to the whiche ȝoure faders serueden in Mesopotanye and in Egipt; and serue ȝe to the Lord. Forsothe if yuel it semeth to ȝou, that ȝe seruen to the Lord, choys is ȝouun to ȝou; chese ȝe to day to ȝou, that plesith, to whom moost cheefly ȝe owen to serue; whether to goddis, to the whiche han serued ȝoure faders in Mesopotanye, or to the goddis of Amorreys, in whos loond ȝe dwellen; forsothe I and myn hows shulen serue to the Lord. And al the puple answerith and seith, Awey be fro vs that we forsaken the Lord, and seruen to alien goddis. The Lord oure God he ladde vs out and oure fadris fro the loond of Egipt, fro the hows of seruage, and vs seynge dide greet toknes; and kepte vs in al the weie, bi the which we wenten, and in alle puplis, bi the whiche we passiden; and keste out alle gentils, Amorre, the dweller of the loond, that we ben comen yn. We shulen therfor serue to the Lord, for he is the Lord oure God. And Josue seide to the puple, Ȝe shulen not mowe serue to the Lord; God forsothe is holi, and a strong louer, ne forȝyueth to ȝoure hidows synnes and giltis. If ȝe leue the Lord, and seruen to alien goddis, he shal turne hymself, and tourment ȝou, and turne vpsedoun, after that he hath ȝeue to ȝow good thingis. And the puple seide to Josue, It shal not be so, as thou spekist, but to the Lord we shulen serue. And Josue to the puple, Witnessis, he seith, ȝe ben, that ȝou self han choosun to ȝou the Lord, that ȝe seruen to hym. And thei answerden, Witnessis. Now thanne, he seith, do ȝe awey alien goddis fro the myddil of ȝou, and bowe ȝoure hertis to the Lord God of Yrael. And the puple seide to Josue, To the Lord oure God we shulen serue, and obeishynge we shulen be to the heestis of hym. Thanne Josue smoot boond of pees in that day, and purposide to the puple heestis and domys in Sichem. And he wroot alle thes wordis in the volym of the lawe of God. And he took a ful greet stoon, and putte it vndur an ook, that was in the seyntuarye of the Lord. And he seide to al the puple, Loo! this stoon shal be to ȝow into witnessynge, that ȝe han herd alle the wordis of the Lord, the whiche he hath spokun to ȝou, lest perauenture afterward ȝe wolden denye, and leiȝe to the Lord ȝoure God. And he lefte the puple, eche into his possessioun. And after thes thingis dyede Josue, the sone of Nun, the seruaunt of the Lord, of an hundryd and of ten ȝeer. And thei biryeden him in the eendis of his possessioun, in Thanathsare, that is set in the hil of Effraym, fro the north part of the hil of Gaas. And Yrael seruede to the Lord alle the days of Josue, and of the eldren, that long tyme lyueden after Josue, and the which knewe alle the werkis of the Lord, that he dide in Irael. Forsothe the boones of Joseph, the whiche the sones of Yrael token fro Egipt, thei birieden in Sichem, in a paart of the feeld that Jacob bouȝte of the sones of Emor, fader of Sychem, for an hundrid ȝonge sheep; and it was into possessioun of the sones of Joseph. Forsothe Eleazar, the sone of Aaron, preest, diede; and Phynees and his sones birieden him in Gabaa, that is ȝyue to hym in the mount of Effraym.
Copyright © 2013–2026 Jeremy J. Johnson. All rights reserved.