1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27
The Lord forsothe clepide Moyses, and spak to hym from the tabernacle of witnessyng, seiynge, Spek to the sones of Yrael, and thow shalt seie to hem, The man that offreth of ȝow an oost to God of the beestis that is, of oxen, and of sheep, offrynge slawn sacrifices, if al brent sacrifice were the offryng of hym, and of the droue, a maal with outen wemme he shal offre at the dore of the tabernacle of witnessyng, to plese to hym the Lord. And he shall putte the hondes vpon the heed of the oost, and it shal be acceptable, and profytynge into the clensyng of hym. And he shal offre a calf before the Lord, and the sones of Aaron, the preest, shulen offre the blood of it, shedynge bi enuyroun of the auter, that is before the dore of the tabernacle. And the skyn of the oost drawun of, the greet lemes thei shulen kit in gobetis; and thei schulen leye fier in the auter maad bifore the heep of wodde; and the lemes that ben kyt a boue ordeynynge, the heed, that is, and alle that cleuen to the mawe, the entrails and the feet wasshe with watir; and the preest shal brenne hem vpon the auter in to al brent sacrifice, and swete smel to the Lord. That if of the beestis is the offeryng, the al brent sacrifice of sheep, or of geyt, he shal offre a loombe of o ȝeer with outen wemme, and he shal offre at the side of the auter that biholdith to the north, bifore the Lord. The blood forsothe of it the sones of Aaron shulen heelde vpon the auter bi enuyroun, and thei shulen dyuyde the lemes, the heed, and alle that cleuen to the mawe, and leie vpon the wodde, to the which fier is to be vnder putte; the entrayls forsothe, and the feet thei shulen wasshe with water; and the preest shal brenne alle thingis offred vpon the auter into brent sacrifice, and moost swete smel to the Lord. If forsothe of the briddis the offryng of brent sacrifice were to the Lord, of turturs, or culuer briddis, the preest shal offre it at the auter; and the heed crokid aȝen to the necke, and the place of a wounde broke, he shal make the blood renne down vpon the brenke of the auter. The litil bleedre forsothe of the throot, and the fetheres, he shal cast out biside the auter, at the eest coost, in the place where askis ben wonte to be castnot kyt, ne with yrun dyuyde it; and he shal brenne it vpon the auter, fier vnder put to the wodde; al brent sacrifice it is and offryng of moost swete smel to the Lord. out; and he shal breke the wynges of it, and not kyt, ne with yrun dyuyde it; and he shal brenne it vpon the auter, fier vnder put to the wodde; al brent sacrifice it is and offryng of moost swete smel to the Lord.
Whanne a lijf offreth offryng of sacrifyce to the Lord, tryed flour shal be the offryng of him. And he shal heelde vpon it oyle, and putte cense, and brynge to the sones of Aaron, the preest, of whom oon shal take an handful of tried flour, and of oyle, and al the cense; and putte the memorial vpon the auter, into moost swete smel to the Lord. That forsothe that leeueth of the sacrifice shal be of Aaron and of his sones, holi of halowes of offrynges to the Lord. Whanne forsothe he shal offre baake sacrifice of tried flour in the ouen, that is, looues with outen sourdowȝ, spreynt with oyle, and the therf kaakis medlid with oyle; if thin offryng shal be fro the friynge panne, of tryed flour spreynt with oyle and with outen sour dowȝ, thow shalt dyuyde it in litil parties, and heelde vpon it oyle. If forsothe fro the gridil sacrifice, euen maner the tried flour shal be spreynt with oile; the which offrynge to the Lord thou shalt take in the hondis of the preest. The which whanne he shal offre it, he shal take a memorial fro the sacrifice, and make brenne vpon the auter into smel of swetnes to the Lord. What euer forsothe leeueth, shal be of Aaron and his sones, holi of halewis of offringis to the Lord. Al offryng that is offred to the Lord, shal be maad with outen sour dowȝ, ne eny thing of sour dowȝ, and of hony, shal be brent in the sacrifice of the Lord. The cheefe fruytys oonly ȝe shulen offre of hem, and ȝiftis; vpon the auter forsothe shal not thei be leyde, into smel of swetnes. What euer thow shalt offre of sacrifice, thow shal anoynte it with salt, ne thow shalt not take a wey salt of the boond of pees of the Lord thi God fro thi sacrifice; in al offring thow shalt offre salt. If forsothe thow shalt offre a ȝyfte of the cheef thingis of thi fruytis to the Lord, of eerys ȝit green, thow shal parche it with fier, and breke in maner of brysid corn; so thow shalt offre thi cheefe fruytis to the Lord, heeldynge vpon hem oyle, and encense puttynge yn, for the offryng of the Lord it is. Of the whiche the preest shal make brynne, into mynde of the ȝifte, a part of the brisde corn, and of the oyle, and al the cense.
And if the oost of pesible thingis were the offryng of hym, and of the oxen he wole offre, a maal, or a femaal, with outen wemme he shal offre before the Lord. And he shal putte the hoonde vpon the heed of his slawe sacrifice, the which shal be offred in the entryng of the tabernacle; and the sones of Aaron, the preest, shulen heelde the blood bi enuyroun of the auter. And thei shulen offre of the oost of pesible thingis into offryng to the Lord, the talwȝ that couereth the entrailes, and what euer of fatnes is with ynforth; the two reyns, with the talwȝ with the which ben couerd the reyn guttis, and the calle of the mawe with the smale reyns. And thei shulen brenne hem vpon the auter, in to al brent sacrifice, the fier vnder put to the wodde, into offryng of moost swete smel to the Lord. If forsothe of sheep were the offeryng of hym, and oost of pesible thingis, whether maal or femaal he shal offre, thei shulen be with outen wemme. If he shal offre a loombe before the Lord, he shal putte his hoond vpon the heed of his slawn sacrifice, the whych shal be offerd in the vestiarye of the tabernacle of witnessyng; and the sones of Aaron shulen heelde the blood of it bi enuyroun of the auter. And thei shulen offre of the oost of pesible thingis a sacrifice to the Lord, talwȝ, and al the tail with the reynes, and the fatnes that couereth the wombe, and alle the entrayls, and either litil reyne, with the talwȝ that ys biside the reyne guttes, and the calle of the mawe, with the litil reynes. And the preest shal brenne hem vpon the auter, into foode of the fier, and of the offryng to the Lord. If a she goet were the offryng of hym, and he shulde offre it to the Lord, he shal putte his hoond vpon the heed of it, and he shal offre it in the entre of the tabernacle of witnessyng; and the sones of Aaron shulen shede the blood of it bi enuyroun of the auter. And thei shulen take of it, into foode of the Lordis fier, talwȝ that couereth the wombe, and that helith alle the entrayles, two litil reyns with the calle that is on hem biside the reyne guttes, and the fatt of the mawe, with the litil reynes. And the preest shal brenne hem vpon the auter, into foode of the fier, and of moost swete smel; al the talwȝ shal be of the Lord, thurȝ perpetuel riȝt, in kynredes and alle ȝoure dwellyng places, and blood, and fat algatis shulen ȝe not ete.
And the Lord spak to Moyses, seiynge, Spek to the sones of Israel, Whanne a lijf synneth bi ignoraunce, and of alle the heestis of the Lord, the whiche he hath comaundide that thei shulden not be do, eny thing doth; if the preest that is anoyntid, synne, makynge the puple to trespasse, he shal offre for his synne a calf with outen wemme to the Lord; and shal lede it to the dore of the tabernacle of witnessyng before the Lord, and he shal putte the hoond vpon his heed, and he shal offre it to the Lord. And he shal take of the blood of the calf, berynge it in to the tabernacle of witnessyng. And whanne he hath wette the fyngre in the blood, he shal sprenge it seuene sithes before the Lord, aȝens the veyle of the seyntuarye. And he shal putte of the same blood vpon the hornes of the auter of moost kyndli encense to the Lord, that is in the tabernacle of witnessyng; al forsothe the laft blood he shal helde into the foot of the auter of brent sacrifice in the entre of the tabernacle. And the talwȝ of the calf he shal offre for synne, as wel it that couerith the entreyles, as alle that ben with ynforth, two lytil reynes, and the calle that is aboue hem biside the reyne guttes, and the talwȝ of the mawe, with the litil reynes, as it is doon awey fro the calf of the oost of pesible thingis; and he shal brenne hem vpon the auter of brent sacrifice. The skynne forsothe, and al the flesh with the heed, and feet, and the entreyles, and the dryt, and the laft body he shal bere out of the tentis into a clene place, where the asken ben wont to be held out; and he shal tende hem vpon the hepe of wode, the which in the place of heeld out asken shulen be brent. And if al the companye of the sones of Yrael bi vnknowyng and bi vnwisdam do that that is aȝens the comaundement of the Lord, and afterward vnderstonde his synne, he shal offre for the synne a calf, and he shal lede it to the dore of the tabernacle. And the eldre of the puple shal putte hoondes vpon the heed of it before the Lord; and the calf offred in the siȝt of the Lord, the preest that is anoyntid shal bere yn of the blood of it into the tabernacle of witnessyng, with the weet fyngre sprengynge seuen sithes aȝens the veyle. And he shal putte of the same blood in the hornes of the auter, that is before the Lord in the tabernacle of witnessyng; the lafte forsothe blood he shal helde biside the foot of the auter of brent sacrifices, that is in the dore of the tabernacle of witnessyng. And al the talwȝ of it he shal take, and he shal brenne vpon the auter; and so doynge of this calf, as he dide before, and the preest preyinge for hem the Lord shal haue mercy. That forsothe calf he shal bere out of the tentis, and he shal brenne as the other calf, for it is for the synne of the multitude. If a prynce synne, and doo oon of manye bi ignoraunce, that is defendid in the lawe of the Lord, and afterwarde vnderstonde his synne, he shal offre an oost before the Lord, an hee geit of the geetis, with outen wemme, and he shal putte his hoond vpon the heed of it. And whanne he shal offre it in the place, where is wont to be slawe the brent sacrifice before the Lord, for it is for synne; the preest shal wete the fyngre in the blood of the oost for synne, towchynge the hornes of the auter of brent sacrifice, and the relif heldynge at the foot of it. The talwȝ forsothe he shal brenne a boue, as in slawn sacrifices of pesible thingis is wont to be doon, and he shal prey for hym, and for his synne, and it shal be forȝeuen to hym. That ȝif a lijf of the puple of the loond synne bi ignoraunce, that he doo eny thing of thes thinges that ben defendid in the lawe of the Lord, and trespassith, and knowlechith his synne, offre he an hee geyt with outen wemme, and he shal putte the hoond vpon the heed of the oost that is for the synne, and he shal offre it in the place of the brent sacrifice. And the preest shal take of the blood in his fyngre, and towchynge the hornes of the auter of brent sacrifice, the relif he shal helde at the foot of it. Al forsothe the talwȝ takynge a wey, as yt is wont to be takun fro the slawn sacrifices of pesible thinges, he shal brenne vpon the auter into smel of swetnes to the Lord; and he shal preye for hym, and it shal be forȝeue hym. If forsothe of the beestis he shall offre slawn sacrifice for synne, that is, a sheep with outen wemme, he shal putte the hoond vpon the heed of it, and he shal offre it in the place where ben wonte to ben slawun the oostis of brent sacrifices. And the preest shal take of the blood of it with his fyngre, and towchynge the hornes of the auter of brent sacrifice, he shal heelde the relif at the foot of it. And al the talwȝ takynge a wey, as the talwȝ of a wether is wonte to be takun a wey that is offrid for synnes, and he shal brenne vpon the auter the encense of the Lord; and he shal preye for hym, and for his synne, and it shal be forȝouun hym.
If a lijf synne, and here the voyce of a swerer, and were witnes, that other he seeth, or to hym silf is knowun gilti, but if he shewe, he shal bere his wickidnes. The lijf that towchith eny vnclene thing, other that is slawe of a beest, other bi hym silf deed, or eny other crepynge beest, and he were forgeten of his vnclennes, he is gilti, and hath trespassid. And if he towche eny thing of the vnclennes of man, after al vnclennes with the which he is wont to be defowlid, and forȝeten afterward knowe, he shal vnderlye to the trespas. The lijf that swerith, and spekith with his lippes, that or eny thing yuel shal do, or wel, and doth not, and the same thing with ooth or word stableth, and forȝeten afterward vndirstonde his trespas, do he penaunce for the synne, and offre he of the flockis an shee lombe, or a shee geyt; and the preest shal preye for hym, and for his synne. If forsothe he may not offre a beeste, offre he two turturs, or two culuer bryddis to the Lord, oon for the synne, and another into brent sacrifice. And he shal ȝyue hem to the preest, the which, the first offrynge for the synne, shal bowe aȝen the heed of it to the fethers, so that it cleue to the nek, and not fullich it be broke. And he shal sprenge of the blood of it the wal of the auter; what euer forsothe were lefte he shal make to drop at the foundement of it, for it is for synne. The tother forsothe he shal brenne in to brent sacrifice, as it is wont to be doo, and the preest shal preye for hym and for his synne, and it shal be forȝeuen hym. And if his hoond mowe not offre two turturs, or two culuer briddes, offre he for his synne of tried flowre the tenthe part of ephi; he shal not putte into it oyle, ne leye yn eny thing of encense, for it is for synne. And he shal take it to the preest, the which takynge of it a ful hoondful, shal brenne vpon the auter, into the mynde of hym that offrede, preiynge for hym, and purgynge; that other forsothe part he shal haue in ȝifte. And the Lord spak to Moyses, seiynge, If a lijf synne, forfetynge the cerymonyes bi errour, in thes thingis that ben halowed to the Lord, offre he for his trespas a wether with out wemme of the flockis, the which may be bouȝt with two sicles, after the weiȝte of the seyntuary. And that that he hath doo of harm he shal restore, and the fifthe part he shal putte aboue, takynge to the preest, the which shal preye for hym, offrynge a wether, and it shal be forȝouen hym. The lijf that synneth bi ignoraunce, and dooth oon of thes thingis that ben defendid bi lawe of the Lord, and gilti of the synne vnderstonde his wickidnes, he shall offre a wether with outen wemme of the flockis to the preest, after the mesure and eymyng of the synne; the which shal preye for hym, for vnknowynge he dide, and it shal be forȝeue to hym, for bi errour he trespasside in the Lord.
And the Lord spak to Moyses, seiynge, The lijf that synneth, and, the Lord despiside, denye to his neiȝbore the laft thing that to his feith was takun, or with fors eny thing takith, or doth wrong chalenge, or fynde lost thing, and denyynge ouermore forswerith, and eny other of manye doo in the whiche men ben wonte to synne, he ateynt of the trespas shal ȝelde alle thingis hool that thurȝ frawde he wolde with hoolde, and ferthermore the fifthe part to the lord, to whom he dide the harm. For his synne forsothe he shal offre a wether withouten wemme of the flok, and he shal ȝyue it to the preest, after the eymyng and mesure of the trespas; the which shal preye for hym before the Lord, and it shal be forȝeue to hym, for al that in doynge he synnede. And the Lord spake to Moyses, seiynge, Comaunde to Aaron and his sones, This is the lawe of the brent sacrifice; it shal be brent in the auter al nyȝt vnto the morwen; fyer it shal be of the same auter. The preest shal be clothid with a coote, and with lynnen breches; and he shal take the asken, the whiche the fier vowrynge brent out, and puttynge bisyde the auter he shal be spoylid the rather clothes, and clothid with other he shal offre hem out of the tentes, and in moost clene place vnto a litil sparcle he shal make to be wastid. The fier forsothe in the auter euermore shal brenne, the which the preest shal norishe, vnder puttynge wode eerly bi eche dayes; and putte yn aboue the brent sacrifice, he shal brenne the talwȝ of the pesible thingis. This fier is perpetuel that shal neuer fayle in the auter. This is the lawe of sacrifice and of sacrified licours, the whiche the sones of Aaron shulen offre before the Lord, and before the auter. The preest shal take an handful of tryed flour, the which ys spreynt with oyle, and al the encense that is putte vp on the tryed flour, he shal brenne it in the auter, in to mynde of moost swete smel to the Lord. The laft forsothe part of the tryed flour Aaron with his sones shal ete, with outen sour dowȝ; and he shal ete in the holi place of the porche of the tabernacle. Therfore forsothe it shal not be souryd, for the part of it is offred into the encense of the Lord; holi of halowes it shal be, as for the synne and for the trespas. The maalis oonlich of the lynage of Aaron shulen ete it; lawful and euerlastynge it is in ȝoure kynredes, of the sacrifices of the Lord; eche that touchith tho thinges shal be halowid. And the Lord spak to Moyses, seiynge, This is the offryng of Aaron, and of the sones of him, that thei shulen offre to the Lord in the day of her anoyntyng; the tenthe part of ephi thei shulen offre of the tried flour, in euerlastynge sacrifice, the half of it eerli, and the half of it at euen; the which in a panne spreynt with oyle shal be fryed. And the preest that to the fader thurȝ ryȝt cometh after, shal offre it hoote, into the moost swete smel to the Lord; and al shal be brent in the auter. Al forsothe sacrifice of preestis with fier shal be consumyd, ne eny shal eete of it. And the Lord spak to Moyses, seiynge, Spek to Aaron and his sones, This is the lawe of oost for synne; in the place where is offred brent sacrifice, shal it be offerd before the Lord; holi of halowis it is. The preest that offreth it, shal eete it in holi place, in the porche of the tabernacle. What euer shal towche the fleishe of it, shal be halowid; if a clooth be spreynt of the blood of yt, it shal be washe in an holy place. The bretil vessel forsothe in the which it is sothen, shal be broken; that if it were a brasun vessel, it shal be rubbid, and washe with water. Eche maal of the preestis kynrede shal eete of the fleshe of it; for holi of halowis it is. An oost forsothe that is slawe for synne, whos blood is born into the tabernacle of witnessyng to clense in the seyntuarie, shal not be eete, but brent with fier.
And this lawe of oost for trespas is holy of halowis. Therfore where the brent sacrifice is offred, and the sacrifice for the trespas shal be slawe; the blood of it bi enuyroun of the auter shal be heelde. Thei shulen offre of it the tayl, and the talwȝ that couereth the entrayls, the two litel reynes, and the fatnes that is biside the reyne guttes, and the calle of the mawe, with the litil reynes. And the preest shal brenne hem vpon the auter; the encense it is of the Lord for the trespas. Eche maal of the preestes kynrede in holi place shal ete this flesh, for holi of halowis it is. As for a synne is offred an oost, so and for a trespas, of either hoost shal be o lawe; to the preest that it shal offre it shal perteyne. The preest that offreth the slawn offryng of brent sacrifice, shal haue the skynne of it. And alle the sacrifice of tried floure, that is bake in the ouen, and what euer thing in the gredyrne, or in friynge panne is greithid, of that preest it shal be, of whom it is offred, whether thei ben spreynt with oyle, or drye. To alle the sones of Aaron euen mesure bi echon shal be dyuydid. This is the lawe of the oost of pesible thinges, that is offerd to the Lord. If for doynge of thankyngis were the offryng, thei schulen offre looues with outen sour dowȝ spreynt with oyle, and thinne therf cakis anoynt with oyle, and bakun tryed floure, and litil rownd looues spreynt with mengyng of oyle; and looues maad with sour dowȝ, with the oost of thankynges that is offerd for the pesible thinges; of the whiche oon for the chefe fruytis shal be offerd to the Lord, and it shal be of the preest that shal heelde the blood of the oost, whos fleshe that same day shal be etun, ne there shal leeue of it eny thing vnto the morwe. If thurȝ a vow, or wylfully, eny man offreth an oost, the same day also it shal be eten; but if eny thing leeue to the morwe, it is leful to eete; what euer forsothe the thridde day fynde, the fier shal consume. If eny man eete the thridde day of the flesh of the oost of pesible thinges, his offrynge shall be sett at noȝt, ne it shal profyte to the offrer; but rather ech lijf that defowlith hym silf with syche meete, shal be gilti of trespassyng. The flesh that eny vnclene thing touchith, shal not be etun, but brent with fier; he that is clene, shal eete it. A lijf defowlid, that etith of the flesh of the oost of pesible thingis, that is offred to the Lord, shal perishe fro his puplis. And he that towchith the vnclennes of man, or of beeste, or of eny thing that may defowle, and etith of siche maner flesh, shal spille fro his puples. And the Lord spak to Moyses, seiynge, Spek to the sones of Irael, The talwȝ of sheep, and of oxe, and of geyt, ȝe shulen not eete; the talwȝ of deed careyn, and of that beeste that is takun of a wilde beeste, ȝe shulen haue into dyuerse vses. If eny man eete the talwȝ, that shulde be offred into the encense of the Lord, he shal perishe fro his puple. And the blood of eche beeste ȝe shulen not take in meete, as wel of bryddes, as of beestis; eche lijf that etith blood shal perishe fro his puplis. And the Lord spak to Moyses, seiyng, Speke to the sones of Yrael, He that offreth slawn offryng of pesible thinges to the Lord, offre he therwith and sacrifice, that is, his offrynges of licours. He shal holde with hondes the talwȝ of the oost, and the litil brest; and whanne bothe, offred to the Lord, he hath sacred, he shal take to the preest, the which shal brenne the talwȝ vpon the auter; the litil brest forsothe shal be of Aaron and his sones; and the riȝt shuldre of the oostis of pesible thingis shal falle into chefe fruytis of the preest. He that offreth the blood, and the talwȝ, of the sones of Aaron, shal haue and the riȝt shuldre in his porcioun. The litil brest forsothe of areryng, and the shuldre of seueryng, Y haue take fro the sones of Yrael of the pesible hoostes of hem, and haue ȝyue to Aaron the preest and his sones, thurȝ perpetuel lawe, fro al the puple of Yrael. This is the anoyntyng of Aaron and his sones, in the cerymonyes of the Lord, the day that Moyses offred hem that thei shulden vse preesthod, and the thinges that the Lord comaundide to be ȝeue to hem of the sones of Yrael, thurȝ perpetuel relygioun in her generaciouns. This is the lawe of the brent sacrifice, and of sacrifice for synne, and for trespas, and for the sacryng, and for slawn offrynges of pesible thinges, that the Lord ordeyned to Moyses in the mownt Synay, whanne he comaundide to the sones of Yrael that thei shulden offre her offrynges to the Lord, in the desert of Synay.
The Lord spak to Moyses, seiynge, Tak Aaron with his sones, the clothes of hem, and the oyle of the anoyntyng, a calf for synne, two wethers, a leepe with therf loues; and thow shalt gedere togidere al the companye at the dore of the tabernacle. Moyses dyde as the Lord comaundide; and al the puple gadered before the ȝates of the tabernacle, he seith, This is the word that the Lord comaundide to be do. And anoon he offred Aaron and his sones; and whanne he hadde washe hem, he clothide the bishop with a lynnen sherte, girdynge hym with a gyrdle and clothing hym with a blewe coote, and putte aboue the coope, the which streynynge with a lace ioyned it to the brest broche, in the which was loore and sothenes. And he couerde the heed with a mytre, and vpon it, aboute the frownt, he putte a goldun plate, sacrid in halowyng, as the Lord comaundide to him. And he took the oyle of anoyntyng, with the which he anoyntide the tabernacle with alle his ournementis; and whanne halowynge he hadde spreynt the auter seuen sithes, he anoyntide it; and alle the vessels of it, and the lauatorye with his foot he halowide with oyle. The which heeldynge vpon the heed of Aaron, he anoyntide hym, and sacrede, and his sones offrede he sacride, and clothid with lynnen cootys, and girde with girdles, and putte on hem mytrys, as the Lord comaundide. And he offrede a calf for synne; and whanne Aaron and his sones hadden putte her hondes vpon the heed of it, he offrede it, takynge the blood; and the fyngre wett, he towchede the hornes of the auter bi enuyroun, the which clensid and halowid, he heelde the laft blood at the foundementis of it. The talwȝ forsothe that was vpon the entrayles, and the calle of the mawe, and the two litil reynes with her grece he brent vpon the auter; the calf with the skynne, flesh, and dryt, brennynge out of the tentes, as the Lord comaundide. And he offred a wether into brent sacrifice; vpon whos heed whanne Aaron and his sones hadden putte her hondes, he offred it, and heelde the blood of it bi enuyroun of the auter. And thilk wether cuttynge in gobetis, the heed of it, and the lemes, and the talwȝ he brente with fier, washed before the entraylis and the feete; and al the wether he tende to gidere vpon the auter, forthi that it was brent sacrifice of moost swete smel to the Lord, as he comaundide to hym. And he offrede the secounde wether, into the sacringe of preestis; and Aaron and his sones puttiden her hondes vpon the heed of it. The which whanne Moyses hadde offride, takynge of the blood towchid the ende of the riȝt eere of Aaron, and the thowmbe of his riȝt hoond, also and of the foote. And he offred the sones of Aaron. And whanne of the blood of the offred wether he hadde towchid the eende of the riȝt eere of echon, and the thoumbe of the hoond, and of the riȝt foote, the relif he heelde vpon the auter bi enuyroun. The talwȝ forsothe, and the tayle, and al the fatnes that couereth the entrayles, and the calle of the mawe, and the two reynes with her talwȝes, and the ryȝt shuldre he seuerede. Takynge forsothe of the leepe of therf looues, that was before the Lord, looues with outen sour dowȝ, and a litil rownd loof spreynt with oyle, and a thinne caake, he putte vpon the talwȝes, and the riȝt shuldre, takynge alle togidere to Aaron and hys sones. The which whanne thei hadden rerede hem beforn the Lord, eftsones takynge of the hondes of hem, he brente vpon the auter of brent sacrifice, forthi that it was the offring of consecracioun, into smel of swetnes of sacrifice to the Lord. And he took the litil breest, rerynge it before the Lord, of the wether of consecracioun into his part, as the Lord hath comaundide hym. And takynge the oynement, and the blood that weren in the auter, he spreynde vpon Aaron, and his vestementes, and upon his sones, and her clothis. And whanne he hadde halowide hem in her clothinge, he comaundide hem, seiynge, Seethe ȝe the flesh before the ȝatis of the tabernacle, and ther etith it; and the looues of consecracioun etith, that ben putte in the leepe, as God hath comaundide to me, seiynge, Aaron and his sones schulen eete hem; what euer forsothe were laft of the flesh and of the looues, the fier shal consume. Fro the dore forsothe of the tabernacle ȝe shulen not goo out seuen daies, vnto the day in the which the tyme of ȝoure consecracioun shal be fulfillid; seuen forsothe daies is endid the consecracioun, as now it is doon, that the ryte of the sacrifice be fulfild. Day and nyȝt ȝe shulen dwelle in the tabernacle, al about kepynge the wardes of the Lord, lest ȝe dien; so forsothe it is comaundide to me. And Aaron and his sones diden alle thingis, that the Lord spak bi the hoond of Moyses.
The eiȝt day forsothe doon, Moyses clepide Aaron, and his sones, and the greet men thurȝ birthe of Yrael; and he seide to Aaron, Tak fro the droue a calf for synne, and a wether into brent sacrifice, eithir with out wemme, and offre hem before the Lord. And thow shalt speke to the sones of Yrael, Take ȝe a geyt for synne, and a calf, and a lombe of o ȝeer and without wemme, into brent sacrifice, an oxe and a wether for pesible thingis; and offre ȝe hem before the Lord, in the sacrifice of echon offrynge tried flour spreynt with oyle; to day forsothe the Lord shal apere to ȝow. Thanne thei token alle thingis, that Moyses hadde comaundide, at the dore of the tabernacle, where, whanne al the multitude stoode, Moyses seith, This is the word that the Lord comaundide, do ȝe, and the glorie of hym shal apere to ȝow. And he seide to Aaron, Come nyȝ to the auter, and offre for thi synne; offre brent sacrifice, and prey for thee, and the puple; and whanne thou sleest the hoost of the puple, prey for hem, as the Lord hath comaundide. And anoon Aaron goynge to the auter offred a calf for his synne; whos blood his sones offreden to hym, in the which wetynge the fyngre he towchide the hornes of the auter, and heelde the relyf at the foot of it; and the talwȝ, and the litil reynes and the calle of the mawe that ben for synne, he brent vpon the auter, as the Lord comaundide to Moyses. The flesh forsothe, and the skynne of it with out the tentis he brent with fier. And he offrede the slawn offryng of the brent sacrifice, and his sones offreden the blood of it to hym, the which he heelde bi enuyroun of the auter; that also oost cutt in to gobetis, with the heed, and alle the lymes thei offriden; the whiche alle vpon the auter he brente with fier, before wasche with water the entrayles, and the feet. And offrynge for the synne of the puple he slewe a goote, and the auter clensid he made brent sacrifice, echynge into the sacrifyce offrynges of licours that ben offryd togidere, and brennynge hem vpon the auter, with out the cerymonyes of the morutide brent sacryfice. And he offrede an oxe, and a wether, the pesible oostes of the puple; and his sones offreden the blood to hym, the which he heelde vpon the auter in enuiroun. The talwȝ forsothe of the oxe, and the tayl of the wether, and the litil reynes with her talwȝes, and the calle of the mawe, thei putten vpon the breestes. And whanne the talwȝes weren brent in the auter, the breestis of hem, and the riȝt shuldres Aaron arerynge before the Lord seuerde, as Moyses comaundide. And strecchynge out hondes to the puple he blesside hem; and so fulfillid the oostes for synne, and the brent sacrifices, and the pesible thinges, he descendide. Moyses forsothe and Aaron goon into the tabernacle of witnessyng, and therafter goon out blissiden to the puple; and the glorie of the Lord aperyde to al the multitude. And loo! fier goon out fro the Lord deuowrede the brent sacrifice, and the talwȝes, that weren vpon the auter; the which whanne the puple hadde seen, thei preiseden the Lord, fallynge doun in to her faces.
And Nadab and Abiu, the sones of Aaron, cauȝt the censerys, putten fier and encense there aboue, offrynge before the Lord alien fier, that to hem was not comaundid. And fier goon out fro the Lord, deuowrede hem, and thei ben deed before the Lord. And Moyses seide to Aaron, This is that the Lord hath spokun, Y shal be halowid in hem that neiȝen to me, and in the siȝt of al the puple Y shal be glorified; the which thing herynge, Aaron helde his pees. Moyses forsothe, Mysael, and Elizaphan, the sones of Osyel, the vncle of Aaron, clepid, seith to hem, Gothe, and takith ȝoure britheren fro the siȝt of the seyntuarie, and berith out of the tentis. And anoon goynge thei token hem, as thei lien clothid with her lynnen clothes, and thei kesten hem out, as it was comaundid to hem. And Moyses spak to Aaron, and to Eliazar and to Ytamar, his sones, Wole ȝe not make ȝoure heedes nakid, and wole ȝe not kutte ȝoure clothes, lest perauenture ȝe dien, and vpon al the cumpanie sprenge indignacioun; ȝoure bretheren and al the hous of Yrael weilen thei the brennyng that the Lord hath reryde. Ȝe forsothe shulen not goon out the ȝates of the tabernacle, ellis ȝe shulen peryshe; the oyle forsothe of the holi anoyntyng is vpon ȝow. The whiche diden alle thinges after the heeste of Moyses. And the Lord seide to Aaron, Wyn, and alle that may make dronke, thow and thi sones shulen not drynke, whanne ȝe shulen goo into the tabernacle of witnessyng, lest ȝe dien; for the euerlastynge heeste it is into ȝoure generaciouns; and that ȝe han kunnyng of demyng bitwix holy and cursid, bitwix defowlid and clene; and that ȝe techen the sones of Yrael alle my lawful thinges, that the Lord hath spokun to hem bi the hoond of Moyses. And Moyses spak to Aaron, and to Eliazar and to Ytamar, his sones, that weren laft, Tak ȝe the sacrifice that was laft of the offryng of the Lord, and etith it with outen sourdowȝ, biside the auter, for holy of halowis yt is. Ȝe shulen eete forsothe in holy place that that is ȝeuen to thee and to thi sones, of the offrynges of the Lord, as it is comaundid to me. And the litil breest that is offered, and the shuldre that is seuered, ȝe shulen eete in the moost cleene place, thow, and thi sones, and thi douȝtren with thee; to thee forsothe and to thi free children ben put vp, of the hoolsum oostis of the sones of Yrael; forthi that the shuldre, and the breest, and the talwȝes that ben brent in the auter, thei han arerede before the Lord; and perteynen to thee, and to thi sones, thurȝ perpetual lawe, as the Lord hath comaundide. Among thes thingis the goot that was offred for synne whanne Moyses souȝte, he foonde ful brent, and wrooth aȝens Eliazar and Ytamar, the sones of Aaron that laften, seith, Whi han ȝe not eetun in hooli place the oost for synne, that is holy of halowes, and ȝyue to ȝow, that ȝe bere the wickidnes of the multitude, and preye for it in the siȝt of the Lord; nameliche sith of the blood of it is not brouȝt with ynne the halowes, and ȝe shulen eete it in the seyntuarie, as the Lord hath comaundide to me? And Aaron answerde, To day is offred the slawn offryng for synne, and brent sacrifice before the Lord; to me forsothe is faln that thou seest; what manere myȝte I eete it, and plees to the Lord in cerymonyes with weilynge mynde? The which thing whanne Moyses hadde herde, he resseyuede satysfaccioun.
And the Lord spak to Moyses and Aaron, seiynge, Sey ȝe to the sones of Yrael, Kepe ȝe alle thingis that Y haue writun to ȝow, that I be ȝoure God. Thes ben the beestis that ȝe shulen eete, of alle that beren lijf on erthe; alle that han the clee dyuydid, and chewith kude, in beestis ȝe mowen eete; what euer forsothe chewith kude, and hath clee, but dyuydith it not, as camel and othere, ȝe shulen not eete it, and among vnclenne thinges ȝe shulen holde it. An vrchon, that chewith kude, and dyuideth not the clee, is vnclene; an haar forsothe, for and he chewith kude, but the clee he dyuidith not; and a sowe, that al be it that sche dyuidith the clee, she chewith not kude. Of the flesh of thes eete ȝe not, ne towche ȝe the careyns, for thei ben vnclene to ȝow. Thes ben also that ben getun in watris, and it is leeful to eete; alle that han fynnes and scaales, as wel in the see, as in the floodes and stondynge watris, ȝe shulen eete; what euer forsothe hath no fynnes and scaales, of hem that in watris ben meued and lyuen, shulen be abhomynable to ȝou, and as cursid; ȝe shulen not eete the flesh of hem, and the faln to deeth ȝe shulen shonne. Alle that han not fynnes and scaales in watris, shulen be polute. Thes ben that ȝe shulen not eete of bryddes, and ben to be shoned of ȝow; an egle, and a griffyn, and a merlyoun; and kijt, and a grijp after his kynde; and alle of crowe kynde into his liknes; an ostriche, and a nyȝt crowe, and a coote, and an hawke after his kynde; an owle, and a deuedep, and the vnclene watir foule, that with his bille puttynge water into his ars, purgith hym silf; a swan, a cormaraunt, and a pellicane; and a gerfawcoun, and a iay after his kynde; and a lapwynk, and a reremous. Alle of foules that goth on foure feete, shal be abhomynable to ȝow; what euer forsothe goth on foure feete, but hath lenger theis bihynde, bi the whiche he lepith vpon the erthe, ȝe shulen eete; as is bruk in his kynde, that is the kynde of locust er it haue wenges, and attachus, that is the kynde of locust, whanne it bigynneth to flee, and opymachus, that is a foule enemy to serpentes, and a locust, eche after his kynde. What euer forsothe of foules that oonli hath foure feete, shal be to ȝow as cursid thing; and who so euer towchith the faln to deeth of hem, shal be polutid and vnclene vnto the euentyde; and if it were nede that he bere eny of hem deed, he shal washe his clothes, and he shal be vnclene vnto the goyng doun of the sunne. Eche forsothe beeste that hath a clee, but dyuideth not it, ne chewith kude, shal be vnclene; and what euer touchith it, shal be defoulid. That that goth vpon hondes, of al that berith lijf that goon on foure feete, shal be vnclene; who so touchith the faln to deth of hem, shal be polutid vnto euen; and who so berith siche maner careyns, shal wasshe his clothis, and he shal be vnclene vnto the euen; for alle thes ben vnclennes to ȝou. Thes forsothe among polutid thinges shulen be holde, of hem that ben meued in erthe; a wesil, and a mouse, and a cokedril, eche after his kynde; that is a beest of foure feete, hauynge the nether cheke lap vnmeuable, and meuynge the ouere; a mygal, that is a beeste born trecherows to bigile, and moost gloterous, a camelion, that is a beeste varyed in to diuerse colours, after diuerse lokingis, and a stellioun, that is a werme depeyntid as with sterris, and a lacert, that is a serpent that is clepid a liserd, and a moldwerp. Alle thes ben vnclene; who toucheth the faln to deth of hem, shal be vnclene vnto the euen; and vpon what thing fal eny thing of the faln to deth of hem, shal be polut, as wel the treen vessel and clothing, as skynnes and heren shertes; and in what thing is werk maad, it shal be wett with water, and thei shulen be polut vnto the euen, and so afterward thei shulen be clensid. A britel vessel forsothe, in the which eny of thes fallith with ynne, shal be polut, and therfor it is to be broke. Al the meete that ȝe shulen eete, if water were shed vpon it, shal be vnclene; al meltynge thing, that shal be dronke of eny vessel, shal be vnclene; and what thing of siche thing faln to deeth falle vpon it, shal be vnclene, other forneyses, or ketels, shulen be destruyed, and shulen be vnclene. The welles forsothe and sisterns, and al the gederyng togidere of watris, shulen be clene. He that touchith the faln to deth of hem, shal be polutid. If it falle vpon the seede, it shal not polute it; if forsothe eny man with water helde vpon the seede, and afterward with the faln to deth were touchid, anone it shal be polutid. If the beeste that is leeful to ȝow to eete were deed, he that touchith the careyn of it shal be vnclene vnto euen; and he that etith of it eny thing, or berith, shal wasshe his clothes, and he shal be vnclene vnto euen. Al that crepith vpon erthe shal be abhomynable, ne shal be take vnto meet. What thing of foure feete goth vpon the breest, and hath many feete, or bi the erthe is drawun, ȝe shulen not eete, for it is abhomynable. Nyl ȝe defoule ȝoure soules, ne touche eny thing of hem, lest ȝe ben vnclene; Y forsothe am the Lord ȝoure God; be ȝe holy, for Y am hooli. Ne defoule ȝe ȝoure soules in eny crepynge thing that is meuyd vpon erthe; Y forsothe am the Lord, that hath ladde ȝow fro the loond of Egipte, that Y shulde be to ȝow into God; ȝe shulen be holy, for Y am holy. This is the lawe of the berynge lijf, and of foules, and of al lyuynge soule that is meuyd in water, and crepith in erthe; that ȝe mowen knowe the differences of clene and of vnclene, and that ȝe witen what ȝe owen to eete, and what to forsake.
The Lord spak to Moyses, seiynge, Spek to the sones of Yrael, and thow shalt seye to hem, A womman, if thurȝ resseyued seed she bare a maal, she shal be vnclene seuen dayes after the daies of the seueryng of the flux of rotun blood; and the eiȝt day the fawnt shal be circumcidid. She forsothe thre and thretti daies shal dwelle in the blood of hir purifiyng; al holi thing she shal not touche, ne goo in to the seyntuarie, to the tyme that the daies of hir purifiyng ben fulfillid. If forsothe she bere a maydyn child, she shal be vnclene twey wekes, after the ryte of the flux of the rotun blood, and six and sixty dayes she shal dwelle in the blood of hir puryfiyng. And whanne the daies of hir purifiyng weren fulfillid, other for sone, or for douȝter, she shal bere a lomb of o ȝeer in to brent sacrifice, and a culuer brid, or a turtil, for synne, at the dore of the tabernacle of witnessyng; and she shal take to the preest, the which shal offre it before the Lord, and shal preye for hir, and so she shal be maad clene fro the flux of hyr blood. This is the lawe of the berynge maal and femaal. And if the hoond of hir fynde not, ne may offre a lombe, she shal take two turturs, or two culuer bryddes, the oon into brent sacrifice, and that othir for synne; and the preest shal preye for hir, and so she shal be maad clene.
The Lord spak to Moyses and Aaron, seiynge, A man in whos skynne and flesh were sprongun dyuerse colour, or bleyne, other eny thing liȝtyng, that is to seie, a plaage of lepre, he shal be brouȝt forth to Aaron, the preest, or to oon of eny of his sones; the which whanne he seeth the lepre in the skynne, and the heeris chaungid into whijt colour, and thilk spice of lepre lower than the skynne and that other flesh, a plaage of lepre it is, and at the dom of hym he shal be seuered. If forsothe liȝtynge whitnesse were in the skynne, and no more lowe than that other flesh, and the heeris of before hadden colour, the preest shal recluse hym seuen daies; and he shal beholden the seuenthe day, and if forsothe the lepre be no forthermore runne, ne passe in the skynne the former termes, eftsones he shal recluse hym seuen other dayes; and the seuenthe day he shal loke, if more derker were the lepre, and not waxed in the skynne, he shal clense hym, for it is a scab; and the man shal wasshe his clothis, and he shal be clene. That if afterward that he is seen of the preest, and ȝoldun to clennesse, eftsone the lepre wexith, he shal be brouȝte to hym, and of vnclennes he shal be condempnyd. The plaage of lepre if it were in a man, he shal be brouȝt to the preest, and he shal se hym; and whanne whijt colour were in the skynne, and of the heeres chaungith the siȝt, thilke forsothe quyk flesh apeerith, the moost olde lepre it shal be demyd, and fulle rootid to the skynne; and so the preest shal defoule hym, and not recluse, for it is of vnclennesse ful open. If forsothe out flowe the rennynge lepre in the skynne, and couer al the flesh, fro the heed vnto the feet, what thing vndir the siȝt of the eyen fallith; the preest shal beholde hym, and deme it to be holdun moost clene lepre, for thi that al be turned into whitnes, and therfor the man shal be clene. Whanne forsothe quyk flesh aperyde in hym, thanne thurȝ the dome of the preest he shal be polut, and among vnclene he shal holdun; if the quyk flesh is spreynt with lepre, it is vnclene. That if eftsones it were turned into whitnesse, and couereth al the man, the preest shal behoolde hym, and deme to be clene. The flesh and the skynne, in the whiche a bocche is growun, and helid, and in the place of the bocche aperith a fel wounde, whijt, or derk reed, the man shal be brouȝt to the preest; the which whanne he hath seen the place of the lepre lower than that other flesh, and the heeris turned into whitnes, he shal defoule hym; a plaage forsothe of lepre is sprongun in the bocche. That if the heere is of the rather colour, and the fel wounde vnder derk, and thanne the nyȝ flesh is not lower, he shal recluse hym seuen dayes; and if forsothe it wax, he shal deme hym of the lepre; if forsothe it stoonde in his place, it is the fel wounde of the bocche, and the man shal be clene. The flesh and the skynne, that the fyer brekith out, and, heelid, haue a whijt or a reed fel wounde, the preest shal biholde it, and loo! if it is turned into whijtnes, and the place of it is lower than that other skynne, he shal defoule hym, for the plaage of the lepre is sprongun in the fel wounde. That if the colour of the heeres were not fulle chaungid, ne the plaage lower than that other flehs, and thilke spice of lepre were vnder derk, he shal recluse hym seuen daies; and the seuenthe day he shal loke; and if the lepre wax in the skynne, he shal defoule hym; if forsothe in his place stonde whijtnes not cleer ynowȝ, a plaage of brennyng it is, and therfor it shal be clensid, for a fel wounde of brennyng it is. Man or womman, in whos heed or beerde boriouneth a lepre, the preest shal loke hem; and if forsothe the place were lower than that other flesh, and the heer ȝalow, and sotiler than it is wont, he shal defoule him, for lepre of the heed it is, and of the beerde. If forsothe he se the place of the wemme euen to the nyȝ flesh, and the heer blak, he shal recluse hym seuen daies, and the seuenthe day loke; and if the wemme growe not, and the heer is of his colour, and the place of the plage to that other flesh euen, the man shal be shauen, out-take the place of the wemme, and he shal be reclusyd seuen other daies. If the seuenthe day the plaage were seen to haue stoonde in his place, ne lower than that other flesh, he shal clense hym, and his clothes wasshid he shal be clene. If forsothe after the clensyng eftsones growe a wemm in the skynne, he shal na more seche, wher the heer be chaungid in to ȝalow colour, for apertly he is vnclene. Forsothe if the wemme stoonde, and the heeris weren blak, know he that the man is hool, and trustili pronounce he hym clene. A man or a womman, in whos skynne whijtnes aperith, the preest shal loke hem; if he perceyue vnder derk whijtnes to shyne in the skynne, know he that it is no lepre, but a wemme of whijt colour, and that the man is clene. A man of whos heed the heeres fallen, he is ballid, and clene; and if fro the frount fallen the heeres, he is bihynde ballid, and clene; if forsothe in the ballidnes, or in the bihynde ballidnes, whijt or reed colour were sprongun out, and that the preest seeyȝ, he shal condempne hym, not of dowtows lepre it is, that is sprongun in the ballidnes. Whoso euer were thanne defoulid with lepre, and seuered at the dome of a preest, he shal haue his clothis vnsewyd, the heed nakid, the mouth couered with the cloothe, and he shal crye hym wemmed, and foule; al tyme that he is leprows and vncleene, alone he shal dwelle out of the tentes. A wullun clooth, or lynnen, that hath a lepre in the oof, or in the werpe, other of a certeyn skynne, or ouȝt that is maad of skynne, if it were infect with whijt or reed wemme, it shal be holdun a lepre, and shal be shewid to the preest; the which, it lokid, shal recluse seuen daies. And the seuenthe day eftsones biholdynge, if he perseyue that it hath wox, it shal be a stedfast lepre; he shal deme the clooth polut, and al thing in the which it were founde; and therfor it shal be brent with flawmes of fier. That if he se that it hath not waxen, he shal comaunde, and thei shal wasshe it in the which is the lepre, and he shal recluse it seuen other daies; and whanne he seeth forsothe the rather face not turned aȝen, and neuerthelater the lepre not to haue woxe, he shal deme vnclene, and with fier he shal brenne, forthi that it is spred in the vttermost of the clooth, other al thurȝ. A lepre, if forsothe the place of the lepre were derker, after that the clooth is wasshun, he shal breke it, and fro the hoole dyuyde. That if forthermore apere in that places, the whiche weren before vndefoulid, the lepre fleynge and vagaunt, shal be brent with fier; and if it ceese, he shal wasshe secoundlich tho thinges that ben pure, and thei shal be clene. This is the lawe of the lepre of wullen clooth, and lynnen, of oof and of warpe, and of al letherin purtenaunce, how thei shal be clensid, or be defoulid.
And the Lord spak to Moyses, seiynge, This is the rijt of the leprows, whanne he is to be maad clene. He shal be brouȝt to the preest, the which goon out of the tentis, whanne he fyndith that the lepre is clensid, he shal comaunde to hym that is purified, that he offre for hym silf two quyk sparowes, whom it is leeful to eet, and cedre tree, and flawm reed silk, and ysope. And oon of the sparows he shal comaunde to be offred in a britil vessel, vpon quyk watris; that other forsothe quyk, with cedre tree, and reed silk, and ysope, he shal weete in the blood of the sparowe that is offred, with the which he shal sprenge hym that is to be clensid seuene sithes, that thurȝ riȝt he be purgid; and he shal late goo the quyk sparowe, that she flee awei into the feelde. And whanne the man hath wasshide his clothes, he shal shaue alle the heeres of the bodi, and he shal be wasshe with water, and purified he shal goo into the tentis; so oonli that he dwelle out of his tabernacle seuen daies; and the seuenthe day that he shaue the heeris of the heed, and beerde, and browes, and the heeres of al the body. And eftsones the clothes and the body wasshid, the eiȝt day he shal take two lombes with outen wemme, and a sheep of o ȝeer with outen wemme, and thre dymes of tried floure, into sacrifice, that be spreynt with oyle, and bisides a sextarie of oyle. And whanne the preest, puryfiynge the man, ordeyneth hym and alle thes thingis before the Lord, in the dore of the tabernacle of witnessyng, and he shal take a lombe, and offre it for trespas, and a sextarye of oyle; and alle thingis offred before the Lord, he shal offre a lombe, where is wont to be offred the oost for synne and the brent sacrifice, that is, in holy place; forsothe as for synne so for trespas to the preest perteyneth the oost; holi of halowes it is. And the preest takynge of the blood of the oost that is offrid for trespas, he shal putte vpon the ende of his riȝt ere that is clensid, and vpon the thoumbes of the riȝt hoond and foot. And of the sextarie of oyle he shall putte in his left hoond, and he shal wete the riȝt fyngre in it, and he shal sprenge before the Lord seuen sithes. That forsothe of the oile that is laft in the left hoond, he shal heelde vpon the eende of his riȝt eere that is clansid, and vpon the thoumbes of hoonde and of riȝt foot, and vpon the blood that is shed for trespas, and vpon his heed. And he shal preye for hym before the Lord, and he shal doo sacrifice for synne; thanne he shal offre brent sacrifice, and putte it in the auter with his offryng of licours, and the man lawfullich shal be clensid. That if he is a pore man, and his hoonde may not fynde that ben seyde, he shal take for the trespas a lombe to the offryng, that the preest preye for hym, and the tenthe part of tried flour spreynt with oyle, into sacrifice, and a sextarie of oyle, and two turturs, and two culuer bryddis, of whom the oon be for synne, and the other into brent sacrifice; and he shal offre hem the eiȝt day of his purifiyng to the preest, at the dore of the tabernacle of witnessyng, before the Lord. The which takynge a lombe for trespas, and a sextarie of oile, shal rere togidris; and the lombe offryd, of the blood of it he shal putte vpon the eende of the riȝt eere of hym that is clensid, and vpon the thoumbes of his hoonde and of the ryȝt foote. Of the oyle forsothe a part putte he into his left hoonde, in the which wetynge the fyngre of the riȝt hoonde, sprenge he seuen sithes aȝens the Lord; and weet he the eende of the ryȝt eere of hym that is clensid, and the thoumbes of the hoonde, and of the riȝt foot, in the place of the blood that is shed out for trespas. The laft forsothe part of the oyle that is in the lefte hoonde, putte he vpon the heed of the purified, that he plese the Lord for hym. And a turtre, or a culuer bryd, he shal offre, oon for trespas, and another into brent sacrifice, with her offrid licours. That is the sacrifice of the leprows, that may not haue alle thingis in the clensyng of hym. And the Lord spak to Moyses and Aaron, seiynge, Whanne ȝe weren goon into the loonde of Chanaan, that Y shal ȝyue to ȝow into possessyoun, if there were a plaage of lepre in howsis, whos is the hows shal goon tellynge to the preest, and seie, As a plage of lepre it is seen to me to be in myn hows. And he shal comaunde, that alle thingis be born out of the hows or he goo into it, and be seen whether it be a lepre, lest alle thinges that ben in the hows ben maad vnclene; and afterward he shal goon yn, that he behoolde the lepre of the hows. And whanne he seeth in the walles of it as litil valeys defourmed with paalnes, or with reednes, and lower than that other vttermore partie, he shal goo out of the dore of the hows, and anoon he shal close it seuen dayes. And the seuenthe day turned aȝen he shal beholde it; and if he fynde that the lepre hath waxen, he shal comaunde the stonus, in the whiche is the lepre, to be drawe out, and hem to be throwe a ferre out of the cyte, in an vnclene place; that forsothe hows to be parid with ynforth bi enuyroun, and the powdre of the paryng to be spreynt out of the citee, in an vnclene place, and other stonus to be put aȝens for hem that were takun awey, and with other cley the hows to be dawbid. If forsothe after that the stonus ben drawen out, and the powdre born out, and with other erthe dawbid, and the preest goon yn se the lepre turned aȝen, and the walles aȝen spreynt with spottis, it is a stedfast lepre, and the hows vnclene; the whiche anoon thei schulen distruy; and the stonus of it, and trees, and al the powdre thei shulen throwe afer out of the wallid town, in an vnclene place. Who goth into the hows, whanne it is closid, shal be vnclene vnto the euen, and who slepith in it, and etith eny thing, shal wasshe his clothes. That if the preest goynge in se that the lepre hath not waxen in the hows, after that it is newe dawbid, he shal purifie it, helthe ȝoldun aȝen. In the purifiynge of it he shal take two sparows, and the cedre tree, and fier reed silk, and ysop. And that oon sparow offred in a britil vessel, vpon quik watris, he shal take the cedre tree, and ysop, and fier reed silk, and a quyk sparow, and he shal weete alle thingis in the blood of the offrid sparow, and in quyk watres; and he shal sprenge the hows seuen sithes; and he shal purifie it, as wel in the blood of a sparow as in quyk watrys, and in the quyk sparow, and in the cedre tree, and ysop, and fier reed silk. And whanne he hath late the sparow freliche flee awey in the feelde, he shal preye for the hows, and thurȝ ryȝt it shal be maad clene. This is the lawe of al lepre, and hurtynge, and of lepre of clothes, and howsis, and of fel wounde, and of bleynes brekynge out, and of wemme liȝtynge, and in dyuerse spices the colours chaungid, that it may be knowe what tyme eny thing be clene, or vnclene.
And the Lord spak to Moyses and Aaron, seynge, Speke ye to the sones of Yrael, and seith to hem, The man that suffreth the flux of seede, shal be vnclene; and thanne he shal be demyd to vndur ligge to this vice, whanne bi eche momentis it cleueth to the flesh of hym, and to gidere groweth the foule humour. Al the bed that he sleepith yn shal be vnclene, and where euer he sitteth. Who so euer of men towchith hys bed, he shal washe his clothes, and he washid with water shal be vnclene vnto the euen. And if he sitte where he satt, he shal wassh his clothes, and wasshid with water shal ben vnclene vnto the euen. He that towchith the fleshe of hym, shal wasshe his clothes, and he wasshid with water shal be vnclene to the euen. And if siche a man caste out spotil vpon hym that is clene, he shal wasshe his clothes, and wasshid with water shal be vnclene vnto the euen. The sadel vpon the which he shall sytt, shal be vnclene; and what euer were vnder hym that suffreth flux of seede, shal be vnclene vnto the euen. He that berith eny thing of thes, shal wasshe his clothes, and he wasshid with water shal be vnclene vnto the euen. Eche whom he that is suchon towchith with not wasshun hondes before, shal wasshe his clothes, and wasshid with water shal be vnclene vnto the euen. The britil vessel that he towchith, shal be tobrokun; the treen vessel forsothe shal be wasshid with water. If he were helid, that suffreth siche a maner passioun, he shal noumbre seuen daies after his clensyng, and the clothes wasshid, and al the bodi in qwik watris, he shal be clene. The eiȝt day forsothe he shal take two turturs, other two culuer briddes, and he shal come in the siȝt of the Lord, at the dore of the tabernacle of witnessyng, and he shal ȝyue hem to the preest; the which shal doon oon for synne, and that other into brent sacrifice; he shal preye for him bifor the Lord, that he be clene fro the flux of his seede. The man of whom goth out the seede of goyng togidris, shal wasshe with water al his body, and he shal be vnclene vnto the euen. Clooth and skynne that he hath, he shal wasshe with water, and it shal be vnclene vnto the euen. The womman with whom he goth togider with, shal be wasshe with water, and she shal be vnclene vnto the euen. The womman that, turnynge aȝen the moneth, suffreth the flux of blood, seuen daies shal be seuerd; eche that towchith hir shal be vnclene vnto euen, and the place in which she sleepith or sittith the daies of her seueryng, shal be polut. He that towchith her bed, shal wasshe his clothes, and he wasshid with water shal be vnclene vnto the euen. Eche vessel vpon which she sittith who so euer towchith, shal wasshe his clothes, and he wasshid with water shal be polut vnto the euen. If man goth togidere with hir in the tyme of hir blood flowynge bi monethes, he shal be vnclene seuen daies, and al the bed in which he slepith shal be polut. The woman that suffrith manye daies the flux of blood, not in tyme of the flux bi the moneth, other that aftir the flux of blood bi the moneth cesith not to flowe blood, as longe as she shal vnderligge to this passioun she shal be vnclene, as it be in tyme of the flux of blood bi the moneth. Al the bed in which she slepith, and the vessel in which she sittith, shal be polut. Who so towchith hir, shal wasshe hys clothis, and he wasshid with water shal be vnclene vnto the euen. If the blood stoonde, and ceese to flowe, she shal noumbre seuen daies of hir purifiyng, and the eiȝtith day she shal offre for hir silf to the preest two turturs, or two culuer briddis, at the dore of the tabernacle of witnessyng; the which shal do oon for the synne, and that other into brent sacrifice; and he shal preye for hir before the Lord, and for the flux of the vnclennes of hir. Ȝe shulen teche therfore the sones of Yrael, that thei shonnen vnclennes, and die not in her fluxes, whanne thei defoulen my tabernacle that is among hem. This is the lawe of hym that suffreth flux of seede, and that is polutid thurȝ goynge togidris, and of hyr that thurȝ moneth tymes of flowing of blood is seuerd, and that flowith ful oft blood, and of the man that slepith with hir.
And the Lord spak to Moyses, after the deeth of the two sones of Aaron, whanne thei offrynge alien fier were slawn, and comaundide to hym, seiynge, Spek to Aaron, thi brother, lest alle tymes he goo into the seyntuarye, that is with ynne the veile before the propiciatory, with the which the arke is couerd, that he dye not; for in a clowde Y shal apeere vpon the heuenli answerynge place; but if thes thinges he do before. He shal offre a calf for synne, and a wether in to brent sacrifice; with a lynnen coote he shal be clothid, and with lynnen breches he shal hile the shame worthi membres; he shal be gyrd with a lynnen gyrdil, and a lynnen mytre he shal putte to the heed; thes forsothe ben the holy clothes, with the whiche al he shal be clothed, whanne he were wasshid. And he shal take of al the multitude of the sones of Yrael two gootes for synne, and a wethir into brent sacrifice; and whanne he offreth a calf, and preieth for hym silf, and for his hows, two gootes he shal make stoonde before the Lord, in the dore of the tabernacle of witnessyng; puttynge vpon either loot, oon to the Lord, and another to the goot that shal be sent out. Whos loot goth out to the Lord, shal offre thilke for synne; whos forsothe into the goot that shal be sent out, shal ordeyne him quik before the Lord, that he heelde preiers vpon hym, and sende hym out into wildernes. Thes thingis lawfully solempnysid, he shal offre a calf, and preiynge for hym silf, and for his hows, shal offre it. And the censure taken to, the whiche he hath fulfillide of the coolis of the auter, and takynge with hoond the maad ensence of dyuers spices into ensensyng, he shal goo yn biȝonde the veile, in to the hooli thingis; that the swete smellynge spices putt vp on the fier, the clowde of hem and the breeth couer Goddis answeryng place, that is vpon the witnessynge, and die not. And he shal take of the blood of the calf, and he shal sprenge with the fyngre seuen sithes aȝens the propiciatorye, at the eest. And whanne he hath slawe the goot, for the synne of the puple, he shal bere ynne his blood with ynne the veile, as it is comaundid of the blood of the calf, that he spreynge forn aȝen Goddis answeryng place, and purge the seyntuarye fro the vnclennes of the sones of Yrael, and fro the trespassynges of hem, and fro alle synnes. After this rijt he shal doo in the tabernacle of witnessyng, that is ficchid betwix hem, in the myddil of the sortes of dwellyng of hem. No man be in the tabernacle, whanne the bishop shal goo into the seyntuarye, that he preye for hym silf, and for his hows, and for al the companye of Yrael, to the tyme that he goo out of the tabernacle. And whanne he goth out to the auter that is before the Lord, prey he for hym silf, and the taken blood of the calf, and of the goot, heelde he vpon the hornes of it, bi enuyroun; and sprenge with the fyngre seuen sithes, purge he, and halowe it fro the vnclennes of the sones of Yrael. After that he hath clenside the seyntuarye, and the tabernacle, and the auter, thanne offre he a quyk goot; and either hoond put on his heed, knowleche he al the wickidnes of the sones of Yrael, and alle the giltis, and alle the synnes of hem, the which inwardly preiynge to his heed, he shal sende it out bi a man al redy into desert. And whanne the goot hath born al the wickidnes of hem into solitarye loonde, and were left in desert, Aaron shal turne aȝen into the tabernacle of witnessyng; and the clothes doon of, with the whiche he was clothed before, whanne he entride the seyntuarye of God, and hem laft there, he shal wasshe his flesh in an holi place, and shal be clothid with his owne clothes, and afterward that he, goon out, hath offred his and the puples brent sacrifice, he shal preye as wel for hym silf, as for the puple; and the talwȝ that is offred for synne he shal brenne vpon the auter. He forsothe that letith goo the sent out goot, shal wasshe his clothes and his bodi with water, and so he shal goo into the tentis. The calf forsothe and the goot, that weren offred for synne, and whos blood is brouȝt in seyntuarye, that the clensyng were fulfillid, thei shulen bere out of the tentis; and thei shulen brenne with fier, as wel the skynnes, as the flesh of hem and the drit. And who so euer brenne hem, shal wasshe his clothes and the flesh with water, and so he shal go into the tentes. And this shal be to ȝow lawful euerlastyng; the seuenth moneth, the tenthe day of the moneth, ȝe shulen traueyle ȝoure soules, and no werke ȝe shulen do, whether with ynne bore or comlyng that pilgrimagen among ȝow. In this day shal be the purgyng of ȝow, and clensyng fro alle ȝoure synnes, before the Lord ȝe shulen be maad clene; the holiday forsothe of restyng it is, and ȝe shulen traueil ȝoure soules thurȝ perpetuel religioun. The preest forsothe, that were anoynt, shal purgen out, and whos hondes ben sacrid, that he bere the office of preesthod for his fader; and he shal be clothid with a lynnen stoole, and with holy clothes, and he shal purge the seyntuarie, and the tabernacle of witnessing, and the auter, and the preestis, and alle the puples. And this shal be lawful to ȝow euermore, that ȝe preyen for the sones of Yrael, and for alle the synnes of hem, ones in the ȝeer. He dide thanne, as the Lord hadde comaundide to Moyses.
And the Lord spak to Moyses, seiynge, Spek to Aaron and his sones, and to alle the sones of Yrael, seiynge to hem, This is the word that the Lord hath comaundide, seiynge, Eche man of the hows of Yrael, if he slee an oxe, or a sheep, or a she goot in the tentes, or out of the tentes, and offreth not at the dore of the tabernacle offrynge to the Lord, he shal be gilti of blood; as he hadde shedde blood, so he shal perishe fro the myddil of his puple. Therfor the sones of Yrael shulen offre to the preest her oostes, that thei slewen in the feelde, that thei ben halowid to the Lord, before the dore of the tabernacle of witnessyng, and offre thei the oostes pesible to the Lord. And the preest shal heelde the blood vpon the auter of the Lord, at the dore of the tabernacle of witnessyng; and he shal brenne the talwȝ into smel of swetnes to the Lord. And thei shulen no more offre her oostes to feendes, with the whiche thei han do fornycacioun; lawful euerlastynge it shal be to hem, and to the after comers of hem. And to hem thow shalt seye, A man of the hows of Yrael, and of the comlinges that pilgrimagen anentis ȝow, that offrith brent sacrifice, other slayn offryng, and to the dore of the tabernacle of witnessyng bryngith it not, that it be offred to the Lord, he shal spille fro his puple. Eche man of the hows of Yrael, and of comlyngis that pilgrimagen among ȝow, if he eete blood, Y shal aȝen fastne my face aȝens the soule of hym, and Y shal lese hym fro his puple; for the soule of flesh is in blood, and I haue ȝouun it to ȝow, that ȝe purgen myn auter for ȝoure soules, and blood be fore the hidows gilt of soule. And therfor Y seide to the sones of Yrael, Eche lijf of ȝow ete no blood, ne of the comlyngis that pilgrymagen among ȝow. Eche man of the sones of Yrael, and of the comelyngis that pilgrymagen anentis ȝow, whether with huntyng or with foulyng, take wilde beeste, or bridd, the which it is leeful to eete, sheed he his blood, and couer it the erthe; the soule forsothe of al flesh is in blood. Wherfor Y seide to the sones of Yrael, The blood of al flesh ȝe shulen not eete, for the soule of flesh is in blood, and who so euer etith it, shal dye. The lijf that etith faln to deth, other the takun of a beeste, as wel of with ynne getun, as of comlyngis, shal washe his clothis and hym silf with water, and he shal be defowlid vnto the euen, and bi this ordre he shal be maad clene; that if he wasshe not his clothes, or body, he shal bere his wickidnes.
And the Lord spak to Moyses, seiynge, Speke to the sones of Yrael, and thow shalt seie to hem, Y am the Lord ȝoure God; after the custome of the loond of Egipte, in the which ȝe han dwellid, ȝe shulen not doo; after the maner of the regioun of Chanaan, to the whiche Y am to bryng ȝow yn, ȝe shulen not don, ne in the lawful thingis of hem ȝe shulen goo. Ȝe shulen doo my domes, and the heestis ȝe shulen kepe, and ȝe shulen goo in hem; Y the Lord ȝoure God. Kepith my lawes and domes, the whiche doynge, a man shal lyue in hem; Y the Lord ȝoure God. Eche man to the nexte woman of his blood shal not goo to, that he opne the filthed of hir; Y Lord. The filthheed of thi fader and the filthheed of thi moder thow shalt not discouer; thi moder she is, thow shalt not opne the filtheheed of hir. The filthheed of the wijf of thi fader thow shalt not discouer; the filthheed forsothe of thi fader it is. The filthheed of thi sister, of fader or of moder, that at home or with outen is gotun, thow shalt not opne. The filthheed of the dowȝter of thi sone, or of thi douȝter douȝter, thow shalt not opne, for thi filthheed it is. The filthheed of the douȝter of the wijf of thi fader, that she hath bore to thi fadir, and is thi sister, thow shalt not opne. The filth of the sister of thi fader thow shalt not discouer; the flesh she is of thi fader. The filthhed of the sister of thi moder thow shalt not opne, for thi that she is flesh of thi moder. The filthheed of the brother of thi fadir thow shalt not opne, ne thow shalt goo to the wijf of hym, the which is ioyned to thee thurȝ affynyte. The filthheed of the wijf of thi sone thow shalt not opne, for the wijf of thi sone she is, ne thow shalt dyscouer the shenshyp of hir; and no man take the wijf of his brother. The filthheed of the wijf of thi brother thow shalt not opne, for the filthhed of thi brother it is. The filthheed of thi wijf, and of the douȝter of hir, thow shalt not opne; the douȝter of the sone of hir, and the douȝter of the douȝter of hir thou shalt not take, that thow opne hir shenship, for the flesh of hir thei ben, and siche a goyng togidere is incest. The sister of thi wijf into liggyn bi hir thow shalt not take, ne opne the filthhede of hir, ȝit she lyuyng. To the womman that suffreth flux of blood thow shalt not goo, ne opne the stynkyngnes of hir. With the wijf of thi neiȝbore thow shalt not goo togidir, ne with mengyng togidere of seede thow shalt be defoulid. Of thi seede thow shalt not ȝyue, that it be sacryd to the mawmet of Moloch, ne thow shalt defowle the name of thi God; Y a Lord. With a maal thow shalt not be mengid, bi maner of goyng to gidere with womman, for abhomynacioun it is. With alle beestis thow shalt not goo to gidere, ne thow shalt be defoulid with it. A womman shal not vnder ligge to a beeste, ne shal be mengid to it, for hidows synne it is. Ne be ȝe polut in alle thes thinges, with the whiche alle gentilis ben defoulid, that Y shal throwe out before ȝoure siȝt, of whom the erthe is polut, whos hidows synnes Y shal visite, that it caste out his dwellers. Kepe ȝe my lawes and my domes, that ȝe do not of alle thes abomynaciouns, as wel the with ynne gotun as the dwellers that pilgrymagen anentis ȝow. Alle forsothe thes cursidnessis diden the tiliers of the erthe that weren bifore ȝow, and polutide it. Shoneth therfor, lest and also ȝow it caste out, whanne the same thinges ȝe doon, as it keste out folk that was before ȝow. Eche lijf that doth of thes abomynaciouns eny thing, shal perisch fro the myddil of his puple. Kepe ȝe myn heestis, and wole ȝe not doo thingis that diden thes that weren before ȝow, lest ȝe ben polut in hem; Y the Lord ȝoure God.
The Lord spak to Moyses, seiynge, Spek to al the companye of the sones of Yrael, and thow shalt seie to hem, Be ȝe holy, for Y am holy, the Lord ȝoure God. Echon drede his fader and moder. Kepe ȝe myn holy day; I the Lord ȝoure God. Nyle ȝe be conuertid to mawmetis, ne goddis ȝotun to gidere make ȝe to ȝow; I the Lord ȝoure God. If ȝe offren an oost of pesible thingis to the Lord, that he be plesable, thilk dai that it were offryd ȝe shulen eete it, and that other day; what euer thing forsothe were laft into the thridde day, ȝe shulen brenne with fier. If eny after two dayes etith of it, he shal be cursid, and gilti of vnpitowsnes; he shal bere his wickednes, for the holy of the Lord he hath polutide, and that soule shal perish fro the myddil of his puple. Whanne thow repist the tilthes of thi loond, thow shalt not kitte vnto the grounde the vttermost of the erthe, in the leeuyng eerys thow shalt gedere; ne in thi vyne ȝeerd the reysonus and cornes fallynge down thow shalt not gedere, but to pore men and pilgrimes to ben lesid thow shalt leeue; Y the Lord ȝoure God. Ȝe shulen do no theft. Ȝe shulen not liȝe, ne desseyue eny man his neiȝbore. Thou shalt not forswere in my name, ne thou shalt polut the name of thi God; Y a Lord. Thow shalt not doo wronge chalenge to thi neiȝbore, ne with force bere hym down. Ther shal not bide anentis thee the werke of thin hyred seruant vnto the morwen. Thou shalt not curse to the deef, ne before the blynde thow shalt putte thing of offence; but thou shalt drede the Lord thi God, for I am a Lord. Thow shalt not do that is wickid, ne vnryȝtwisly thow shalt deme; thou shalt not biholde the persone of the pore, ne thow shalt onoure the chere of the myȝti; riȝtwisly deme thow to thi neiȝbore. Thow shalt not be a wrongful acuser of greuous synne, ne a pryue yuel speker in peplis; ne thou shalt stoonde aȝens the blood of thi neiȝbore; Y a Lord. Haat thow not thi brother in thin herte, but opynli vndernym hym, lest thow haue on hym synne. Thow shalt not seche veniaunce, ne thow shalt haue mynde of the wronge of thi citeseynes; thow shalt loue thi frende as thi silf; Y a Lord. Kepe ȝe my lawes. Thi beestis thow shalt not make goo to gidere with beestis of another kynde. A feelde thow shalt not sowe with dyuerse seede. A clooth that is wouen of two, thow shalt not be clothid. A man if he sleepe with a womman, bi goyng to gidere of seede, the which is boond womman, also noble, and neuerthelater bi prijs not bouȝt, ne the fredam ȝyuen, bothe shulen be scourgid, and thei shulen not die, for she was not free. For her trespas forsothe, he shal offre to the Lord at the dore of the tabernacle of witnessyng, a wether; and the preest shal preye for hym, and for his trespas, before the Lord; and he shal eft haue mercy to hym, and the synne shal be forȝeuen. Whanne ȝe weren gon in to the loond, and plauntiden in it apple trees, ȝe shulen doo awey the first fruytis of hem; the apples that buriounen shulen be vnclene to ȝow, ne ȝe shulen eete of hem. The ferthe forsothe ȝeer al the fruyt of hem shal be halowid and preysable to the Lord; the fift ȝeer forsothe ȝe shulen eete the fruytis, gedrynge to gidere apples that thei bringen forthe; Y the Lord ȝoure God. Ȝe shulen not eete flesh with the blood. Ȝe shulen not dyuyne in bryddis, ne ȝe shulen sette kepynges vpon sweuenes; ne ȝe shulen in rownde dodde heer, ne shaue beerde; and vpon the deed ȝe shulen not kitte ȝoure flesh, ne eny figuris, or pryckyngis, ȝe shulen make to ȝow; Y a Lord. Ne putt thow thi douȝter to bordel, and the loond be defoulid, and it be fulfillid with trespas vnto deth. My holi dayes kepe ȝe, and my seyntuarie drede ȝe; Y a Lord. Ne declyne thow to dyuynours, ne aserche eny thing of takers her answeris of deuels, that ȝe ben polut bi hem; I the Lord ȝoure God. Before the hoor heed aryse, and onour the persone of the oolde, and drede the Lord thi God; Y am a Lord. If a comlyng dwelle in ȝoure loond, and were abidynge amonge ȝow, ne myssey ȝe to hym, but be he among ȝow as a with inne born; and ȝe shulen loue hym as ȝoure self; forsothe and ȝe weren comelyngis in the loond of Egipte; Y the Lord ȝoure God. Nyle ȝe do eny wickid thing in dome, in rewle, in weiȝt, in mesure; riȝt balaunce, and euen ben the weiȝtis, ryȝt bushel, and euen sextarye; Y the Lord ȝoure God, that haue ladde ȝow out of the loond of Egipte. Kepe ȝe myn heestis, and alle the domes, and do ȝe hem; I the Lord.
And the Lord spak to Moyses, seiynge, Thes thinge spek to the sones of Yrael, The man of the sones of Yrael, and of the comlyngis that dwellen in Yrael, if eny of his seede ȝyue to the mawmet of Moloch, thurȝ deth die he; the puple of the loond shulen stonen hym. And Y shal putte my face aȝens hym, and Y shal kitte hym doun fro the myddil of my puple, forthi that he ȝaue of his seede to Moloch, and hath defowlide my seyntuarye, and polut myn holy name. That if the puple of the loond necgligent, and as despisynge myn heestes, forȝyue the man that hath ȝouun of his seede to Moloch, ne wole slee hym, Y shal putte my face vpon that man, and his kynrede, and I shal kitte hym down, and alle that consenten to hym, that thei doon fornycacioun with Moloch, fro the myddil of his puple. The lijf that declyneth to dyuynours, and herkeners to deuels, and doth fornycacioun with hem, I shal putte my face aȝens hym, and I shal slee hym fro the myddel of his puple. Be ȝe maad holy, and beth holy, for I am holi, the Lord ȝoure God. Kepe myn heestes, and doth hem, for Y am the Lord that halowith ȝou. Who so cursith to his fader, or moder, with deeth die he; who so to his fader or moder cursith, his blood be vpon hym. Who so doth leccherie with wijf of another, and hath wrouȝte auowtrye with the wijf of his neiȝbore, thurȝ deth dye both the lecchour and the auowtres. He that slepith with his stepdam, and opneth the shenship of his fader, thurȝ deth dien thei bothe; the blood of hem be vpon hem. If eny man sleepe with his sones wijf, either be deed, for hidows trespas thei han wrouȝt; the blood of hem be vpon hem. He that slepith with a maal, bi maner of goyng togidere with a womman, either hath wrouȝt ful vnleeful thing, thurȝ deth die thei; the blood of hem be vpon hem. He that vpon the wijf takith the douȝter, the moder of hyre, hidows trespas hath wrouȝt; ful myche he shal bren with hem, and so greet vnleeful thing shal not dwelle in the myddil of ȝow. He that with hows beeste or feelde beeste goth togider, with deth die he, and the beeste slee ȝe. The womman that lieth to eny beeste, to gidere be she slayn with it; the blood of hem be vpon hem. He that takith his sistir, the douȝter of his fader, or the douȝter of his moder, and seeth the filthheed of hir, and she bihoolde the shenship of the brother, a ful vnleeful thing thei han wrouȝt, bothe shulen be slayn in the siȝt of her puple; forthi that her filthheed thei opneden to gidere, and thei shulen bere her wickidnes. He that goth to gidere with a womman in the flux of the moneth blood, and opneth hir filthehed, and she opneth the welle of hir blood, bothe shulen be slayn fro the myddel of her puple. The filthheed of thi moder sister, and thi fader sister, thow shalt not discouer; who that doth this, the shenship of his flesh he shal nakyn, and both shal bere her wickidnes. He that goth togidere with the wijf of his fader brother, or of his vncle, and opneth the shenship of his kynrede, bothe thei shulen ber her synne, and with out free children thei shulen dye. Who so weddeth the wijf of his brother, an vnleeful thing doth; the filthheed of his brother he hath opned, and with out fre children he shal be. Kepe ȝe my lawes, and my domes, and doth hem, lest and the loond cast ȝow out, that ȝe ben to goynge yn, and to dwellynge. Nyle ȝe goo in the lawful thingis of naciouns, the whiche Y am to puttynge out before ȝow; alle forsothe thes thinges thei han do, and Y haue wlatid hem. To ȝow forsothe Y speke, Weeldith the loond of hem, that Y shal ȝyue to ȝow in to erytage, the loond flowynge mylk and hony; Y the Lord ȝoure God, that hath seuerde ȝow fro other puples. And ȝe thanne seuer a clene beeste from vnclene, and clene bryd fro vnclene, lest ȝe poluten ȝoure soules in beestis, and in bryddis, and in alle that mouen in erthe, and that to ȝow Y haue shewid to be polut. Ȝe shulen be holi to me, for Y the Lord am holy, and haue seuerd ȝow fro other puples, that ȝe ben myne. A man or womman, in the which is a spirit of wicchecraft, or of dyuynynge, with deth die thei, and with stonus men shulen ouer-falle hem; the blood of hem be vpon hem.
And the Lord seide to Moyses, Spek to the preestis, sones of Aaron, and thow shalt seye to hem, Be not the preest defoulid in the deed of her cyteseyns, but oonly in cosyns, and nyȝ, that is, vpon fader and moder, and sone and douȝter, and brother, and sister, mayden, that is not spousid to man; but and in the prynce of his puple he shal not be defoulid. Thei shulen not shaue heed, ne beerd, ne in her flesh thei shulen make in kyttynge; holi thei shulen be to her God, and thei shulen not polute his name; ensence forsothe of the Lord, and the looues of her God thei offren, and therfor holi thei shulen be. A strompet, and foule hordam, ȝe shulen not take to wijf, ne hir that is forsakun of her housboond, for he is sacryd to his God, and looues of proposicioun he offreth; be thanne he holi, for Y am holi, the Lord that halowith ȝow. The douȝter of the preest, if she were takun in hordam, and defouleth the name of hir fader, with fier flawmes she shal be brent. The bishop, that is the moost preest amonge his britheren, vpon whos heed is heelde the oyle of anoyntyng, and whos hondes in preesthod ben sacrid, and is clothid with holi clothes, his heed he shal not discouer, his clothis he shal not kitt, and to al deed he shal not goo yn algate; and vpon his fader and moder he shal not be defoulid, ne he shal goo out fro the halowes, lest the seyntuarie of the Lord be polut, for the oyle of holi anoyntynge of his God is vpon hym; I the Lord. A mayden he shal take to wijf; a widewe, and a departid, and a defoulid oon, and a strompat, he shal not take, but a maydyn child of his puple; ne menge he the lynage of his kynde to the comounte of his puple, for Y a Lord, that halowe hym. And the Lord spak to Moyses, seiynge, Spek to Aaron, A man of thi seed, bi the meynees, that hath a wemme, offre he not breed to his God, ne go he to the seruice of hym; if he were blynde; if halt; if other with litil, or with greet, and crokid noose; if with brokun foot, or hoond; if crokid rigge, or bleer eyed; if whijt perle hauynge in the eye; if contynuel scab; if a drye scab in the body; or brosten. Eche that hath a wemme, of the seed of Aaron the preest, he shal not goo to offre oostis to the Lord, ne looues to his God; he shal neuerthelater eete looues that ben offred in the seyntuarye, so oonli that with ynne the veyle he goo not, ne goo to the auter, for a wemme he hath, and he shal not defoule my seyntuarie; I a Lord that halewe hem. Thanne Moyses spak to Aaron, and his sones, and to al Yrael, alle that weren comaundid to hym.
And the Lord spak to Moyses, seiynge, Speke to Aaron, and his sones, that thei shunnen fro thes thingis that ben sacrid of the sones of Yrael, and defoule thei not the name of halowid thingis to me that thei offren; Y a Lord. Sey to hem, and to the aftercomers of hem, Eche man that goth to, of ȝoure lynage, to thilk thinges that ben sacrid, and that the sones of Yrael offreden to the Lord, in the whiche is vnclennes, he shal perishe before the Lord; Y am a Lord. The man of the seed of Aaron that were leprows, or suffrynge flux of seed, shal not eete of thes thingis that ben halowid to me, to the tyme that he be heelid. He that towchith the vnclene vpon the deed, and of whom goth out the seed as of goynge togidere, and that shal touche crepynge beeste, and eny vnclene, whos touchynge is hoory, shal be vnclene vnto the euen, and he shal not eete thes thinges that ben halowid to me; but whanne he wasshith his flesh with water, and the sunne is goon down, thanne, clensid, he shall eete halowid thinges, for it is the meete of hym. The fallid to deth, and taken of a beeste, he shal not eete, ne he shal be polut in hem; I the Lord. Thei shulen kepe myn heestis, that thei vndur liggen not to synne, and dyen in the seyntuarie, whanne thei poluten it; I the Lord that halowe ȝow. Eche alyen shal not eete of the halowid thingis; the alien tilier of the preest, and hyrid seruaunt, shulen not eete of thilk thinges. Whom forsothe the preest biggith, and he that were a free man of his hows, thes shulen eete of thilk thingis. If the douȝter of the preest to eny of the puple were spousid, of thes thinges that be halowid, and of the cheef fruytys she shal not eete; if forsothe a widewe, or departyd, and with oute free children weren turned aȝen to the hows of hir fader, as a child mayden was wont she shal be norisshid of the meetis of hir fader; eche alien of etyng of thilk thingis hath no power. He that etith of the halowid thinges bi ignoraunce, shal adde the fifthe part with that he etith, and he shal ȝyue to preest in the seyntuarie, ne thei shulen defoule the halowid thingis of the sones of Yrael, that thei offren to the Lord, lest perauenture thei susteynen the wickidnes of his trespas, whanne halowid thingis thei eeten; I the Lord that halowe hem. The Lord spak to Moyses, seiynge, Spek to Aaron, and his sones, and to alle the sones of Yrael, and thou shalt seie to hem, A man of the hows of Yrael, and of comlynges that dwellen anentis hem, that offrith his offrynge, other vowes ȝeeldynge, or wilfuly offrynge, what thing that he offreth into brent sacrifice of the Lord, that it be offrid bi ȝow, a maal with outen wemme it shal be, of the oxen, and of the sheep, and of the geet; if it haue a wemme, ȝe shulen not offre, ne shal be acceptable. The man that offreth slayn sacrifice of pesible thingis to the Lord, other vowes ȝeeldynge, other wilfully offrynge, as wel of oxen as of sheep, with outen wemme he shal offre, that it be acceptable; al wemme shal not be in it. If it were blynde, if broken, if hauynge fel wounde, if litil bleynes, or shab, or drye rownd shab, ȝe shulen not offre hem to the Lord, ne ȝe shulen brenne of hem vpon the auter of the Lord. Ox and sheep, with eer and tayl kit, wilfully may be offred; the vowe forsothe of thes thingis may not be quyt. Al beeste, that outher with al tobrokun, or crippid, or kitt and taken awey the ballokes is, ȝe shulen not offre to the Lord, and in ȝoure loond thes thinges algatis ȝe shulen not do. Of the hoond of the alyen ȝe shulen not offre looues to ȝoure God, and what euer other thing he wole ȝyue, for alle thei ben corrupt and defoulid; ȝe shulen not take hem. And the Lord spak to Moyses, seiynge, Oxe, sheep, and geet, whanne thei weren geten, seuen dayes thei shulen be vnder the teete of her damme; the eiȝt forsothe day, and therafter, thei mowen be offrid to the Lord, whether shee oxe, other shee sheep; thei shulen not be offryd o day with fruytis in her wombe. If ȝe offren an oost for doynge of thonkyngis to the Lord, that it may be plesable, the same day that it is offred ȝe shulen eete it; there shal not leeue eny thing vnto the morwe of that other day; I a Lord. Kepe ȝe myn heestis, and do ȝe hem; Y a Lord. Ne polute ȝe myn holy name, that Y be halowid in the myddel of the sones of Yrael; Y the Lord that halowe ȝow, and haue ladde ȝow out of the loond of Egipte, that Y were to ȝow into God; I the Lord.
And the Lord spak to Moyses, seiynge, Speke to the sones of Yrael, and thow shalt seie to hem, Thes ben the cesynge dayes of the Lord, the whiche ȝe shulen clepe holi. Sixe daies ȝe shulen do werk, the seuenthe day, for it is the reste of the weke, it shal be clepid holi; al werk ȝe shulen not do in it; the day of the Lord it is in alle ȝoure dwellynges. Thes ben the holy cesyng daies of the Lord, the whiche ȝe shulen halowe in ȝoure tymes. The first moneth, the fourtenthe day of the moneth, at euen, is the pask of the Lord; and the fiftenthe day of this moneth is the solempnyte of the therf looues of the Lord; seuen dayes ȝe shulen eete therf looues; the fyrst day shal be to ȝow moost solempne and holy; al seruyle werk ȝe shulen not doo in it, but ȝe shulen offre sacrifice in fier to the Lord seuen dais; the seuenthe forsoth dai shal be more solempne and holier, and no seruyle werk ȝe shulen do in it. And the Lord spak to Moyses, seiynge, Spek to the sones of Yrael, and thow shalt seie to hem, Whanne ȝe weren goo into the loond that I shal ȝyue to ȝow, and han ropun the tilthe, ȝe shulen bere hondfullis of eeris, the first fruytis of ȝoure repyng, to the preest; the which shal rere vp the litil birthen before the Lord, that it be acceptable for ȝow, that othir day of the weke; and he shal halowe it; and in the same day that the hondful is sacryd, shal be slayn a lomb with outen wemme of o ȝeer into brent sacrifice of the Lord; and the offryngis of the licours shal be offred with it, two dymes of tryed flour spreynt with oyle, into the ensence of the Lord, and moost swete smel, and offryngis of wyn, the fourth part of hyn. Breed, and brokun corn, and potage ȝe shulen not ete of the corn, vnto the day that ȝe offren of it to ȝoure God; euerlastynge heest it is in ȝoure generaciouns, and in ȝoure dwellynge places. Ȝe shulen noumbre thanne fro that other day of the weke, in the which ȝe han offred the hoondful of first fruytis, seuen wekis fulle, vnto that othir day of fulfillynge of the seuenth weke, that is, fifti daies; and so ȝe shulen offre a newe sacrifice to the Lord of alle ȝoure dwellynge places, two looues of the first fruytes, of the two dymes of tried flour, soured, the which ȝe shal baake into the first fruytis to the Lord. And ȝe shal offre with the looues seuen loombes vnwemmed of o ȝeer, and a calf of the droue, and two wethers, and thei shulen be in brent sacrifice, with her offryngis of licours, into the moost swete smel to the Lord. And ȝe shulen do a geit for synne, and two lombes of o ȝeer, the oost of pesible thingis. And whanne the preest arereth hem, with the looues of the fyrst fruytes, before the Lord, thei shulen falle into the vse of hym. And ȝe shulen clepe this day moost solempne, and moost holi; al seruyle werk ȝe shulen not do in it; lawful euerlastynge it shal be in alle dwellynge places, and ȝoure generaciouns. And afterward, whanne ȝe repen the tilthe of ȝoure loond, ȝe shulen not kitt it vnto the ground, ne the leeuyng eeris ȝe shulen gadere, but to pore men and pilgrymes ȝe shulen leeue hem; Y the Lord ȝoure God. And the Lord spak to Moyses, seiynge, Spek to the sones of Yrael, The seuenthe moneth, the first day of the moneth, shal be to ȝow an holi day memoryale, with sownynge trompes, and it shal be clepyd holi; alle seruyle werkes ȝe shulen not do in it, and ȝe shulen offre brent sacrifice to the Lord. And the Lord spak to Moyses, seiynge, The tenthe dai of this seuenthe moneth, a day of purgynge shal be moost solempne, and it shal be clepid holy; ȝe shulen traueyl ȝoure soules to God, and ȝe shulen offre brent sacrifice to the Lord; al werk ȝe shulen not doo in tyme of this day, for a day of hauynge mercy it is, that the Lord ȝoure God haue mercy to ȝow. Al soule that were not traueilid this day, shal peryshe fro his puple, and he that doth eny thing of werk, Y shal do hym a wey fro his puple; no thing therfore of werk ȝe shal do in it; lawful euerlastynge shal be to ȝow in alle generaciouns and ȝoure dwellyngis; the dai of restynge it is. Ȝe shulen traueyl ȝoure soules the nynthe day of the moneth; fro euen to euen ȝe shulen halowe ȝoure holi dayes. And the Lord spak to Moyses, seiynge, Spek to the sones of Yrael, Fro the fiftenthe day of this seuenthe moneth shulen be the cesynge dayes of the tabernacles, in seuen dayes to the Lord; the first day shal be clepid moost solempne and moost holy, alle seruyle werkes ȝe shulen not do in it; and seuen dayes ȝe shulen offre brent sacrifices to the Lord, the eiȝt forsothe day shal be moost solempne and moost holy; and ȝe shulen offre brent sacrifice to the Lord, it is forsothe of companye, and of quelet; al seruyle werk ȝe shulen not doon in it. Thes ben the cesynge dayes of the Lord, the whiche ȝe shulen clepe moost solempne and moost holy; and ȝe shulen offre in hem offryngis to the Lord, brent sacrifices, and sacrifices of licours, after the ryte of euery day, out take the holy dayes of the Lord, and ȝoure ȝiftis, and the whiche ȝe shulen offre of a vowe, othere the whiche wilfullich ȝe han ȝeuen to the Lord. Thanne fro the fiftenthe day of the seuenthe moneth, whanne ȝe shulen gadere to gidere alle the fruytis of ȝoure erthe, ȝe shulen halowe the cesynge day of the Lord seuen dayes; in the first day and the eiȝt day shal be holy day, that is, rest. And ȝe shulen take to ȝow the first day fruytis of the moost fayr tree, and the braunches of palmes, and braunches of a tree of thykke burionyngis, and withies of the rennynge water, and ȝe shulen glaad before the Lord ȝoure God; and ȝe shulen halowe the solempte of hym seuen dayes, bi the ȝeer; lawful euerlastynge it shal be in ȝoure generaciouns. The seuenthe moneth ȝe shulen halowe the feeste daies, and ȝe shulen dwelle seuen dayes in shadewe places; eche that is of the lynage of Yrael, shal dwelle in tabernaclis, that ȝoure aftercomers leernen, that in tabernaclis Y haue made to dwelle the sones of Yrael, whanne Y ladde hem out of the loond of Egipte; Y the Lord ȝoure God. And Moyses spak vpon the solempnytees of the Lord to the sones of Yrael.
And the Lord spak to Moyses, seiynge, Comaund to the sones of Yrael, that thei bryngen to thee oyle of olyues, moost pure, and bryȝt, to the lanternes to ben tende contynueli with oute the veyle of witnessynge, in the tabernacle of the boond of pees; and Aaron shal sette hem fro euen vnto morwen before the Lord, thurȝ heriynge and ryte perpetuel in ȝoure generaciouns; vpon the moost clene candilstik thei shulen be sett euermore in the siȝt of the Lord. Thow shalt take forsothe tried floure, and thow shalt baak of it twelue looues, the whiche echon shal haue two dymes, of whom thou shalt sette syx anentis other six, vpon the moost clene bord before the Lord; and thow shalt putt on hem ensence moost briȝt, that the breed be into mynde of the offrynge of the Lord; bi eche holi day thei shulen be chaungid before the Lord, takne of the sones of Yrael thurȝ euerlastynge boond of pees; and thei shulen be of Aaron and his sones, that thei eten hem in holy place, for holy of halowes it is, of the sacrifices of the Lord, thurȝ perpetuel riȝt. Loo! forsothe a sone goon out of a womman of Yrael, that beer of an Egipcyen man, amonge the sones of Yrael, hath streuen in tentis with a man of Yrael, and whanne he hadde blasfemyd the name of the Lord, and hadde cursid to hym, is brouȝt forthe to Moyses; and the moder of hym was clepid Salumyth, the douȝter of Dabry, of the lynage of Dan; and thei puttiden hym in to prisoun, to the tyme that thei knewen what the Lord comaundide. The which spak to Moyses, seiynge, Leed thow out the blasfeme out of the tentis, and putt alle that herden her hoonden vpon his heed, and al the puple stone hym. And to the sones of Yrael thou shalt speke, The man that cursith to his God, shal bere his synne, and he that blasfemeth the name of the Lord, thurȝ deth die he; al the multitude of the puple with stonus shal throwe hym down; whether he were cyteseyn or pilgrym that blasfemeth the name of the Lord, thurȝ deth dye he. He that smytith and sleeth a man, thurȝ deth die he; he that smyteth a beeste, ȝeeld he another of the same kynde, that is, lijf for lijf. He that wrongfuli ȝyueth a wemme to eny of his cyteseyns, as he hath doon, so be it do to hym; brusur for brusur, eye for eye, tooth for tooth he shal ȝeelde; what maner of wemme he wrongfuli ȝyueth, sichon be he constreyned to suffre. He that smytith a beeste, ȝeeld he another; he that smytith a man, be he punyshid. Euen doom be there among ȝow, whether pilgrime or cyteseyn synne, for I am the Lord ȝoure God. And Moyses spak to the sones of Yrael, and thei brouȝten hym forthe that blasphemede out of the tentis, and thei beren hym down with stonus. And the sones of Yrael diden, as the Lord comaundide to Moyses.
And the Lord spak to Moyses in the mownt of Synay, seiynge, Spek to the sones of Yrael, and thow shalt seye to hem, Whanne ȝe weren in goon into the loond that I shal ȝyue to ȝow, halowe ȝe the holiday of the Lord; six ȝeer thow shalt sowe thi feelde, and six ȝeer thou shalt kytte thi vyn, and geder the fruytis of it; the seuenthe forsothe ȝeer of the loond shal be the saboth of the restynge of the Lord; feelde thow shalt not sowe, and vyn thow shalt not kitte, thingis that the erthe frely bryngith forth thow shalt not reepe, and grapes of thi first fruytis and vyndage thou shalt not gedere; the ȝeer forsothe it is of the restynge of the loond; but thei shulen be to ȝow into meet, to thee, and to thi seruauntis, to thin handmayde, and to thin hyryd man, and to the comlyng that pilgrimagith anentis thee; to hous beestis and thi feelde beestes, alle thingis that growen shulen ȝyue meete. And thow shalt noumbre to thee seuen wekes of ȝeerys, that is, seuen sithes seuen, the whiche togidere maken nyn and fourty ȝeer; and thow shalt sowne with trompe the seuenthe moneth, the tenthe day of the moneth, in the tyme of doyng mercy, in al ȝoure loond. And thow shalt halowe the fyftith ȝeer, and clepe it forȝifnesse to alle the dwellers of thi loond; he is forsothe the iubilee; a man shal turne aȝen to his possessioun, and eche shal turne aȝen to his before hadde meyne, for the iubilee it is, and the fyftethe ȝeer. Ȝe shulen not sowe, ne reepe the free growynge thingis in the feelde, and the first fruytis of the vyndage ȝe shulen not gedere, for the halowynge of the iubile; but anone offryd ȝe shulen eete; the ȝeer of iubilee alle goo thei aȝen to her possessiouns. Whanne thow shalt selle eny thing to thi cyteseyn, other bigge of hym, ne peire thow thi brothir, but aftir the noumbre of the ȝeeris of iubilee thow shalt bigge of hym, and after the noumbre of fruytis he shal selle to thee. As myche as mo ȝeeris dwellen after the iubilee, so myche and the prijs shal creese, and as myche as lasse of tyme thow shalt nowmbre, so myche lasse and the biggynge shal coste; the tyme forsothe of fruytis he shal selle to thee. Nyle ȝe wrongfully traueyl ȝoure men of o lynage, but echon drede his God; for Y the Lord ȝoure God. Do ȝe myn heestis and domes, kepith and fulfille ȝe hem, that ȝe mowen dwelle in the loond with outen eny drede, and the erthe brynge forth to ȝow his fruytis, the whiche ȝe eten vnto fulfillynge, dredynge the feersnes of no man. And if ȝe seyn, what shulen we eete the seuenthe ȝeer, if we sowen not, ne gadren oure fruytis? Y shal ȝyue my blessynge to ȝou the sixte ȝeer, and it shal make the fruytis of three ȝeer; and ȝe shulen sowe the eiȝtthe ȝeer, and ȝe shulen eete oolde fruytes vnto the nynthe ȝeer; to the tyme that newe be growen ȝe shulen eete oolde. The loond forsothe shal not be solde in to with outen ende, for myn it is, and ȝe comlingis and myn erthe tyliers ben; wherfor al the regioun of ȝoure possessioun vndur condicioun of aȝenbiggyng shal be solde. If thi brother maad pore, selle his litil possessioun, and he wole, the nyȝ kyn of hym may aȝenbigge that that he solde; if forsothe he haue noon neiȝbore, and he mowe fynde the pryse to aȝenbigge, the fruytis shulen be countid fro that tyme that he solde, and that that is laft ȝeelde he to the bigger, and so he shal resseyue his possessyoun. And if his hoond fynde not, that he ȝeelde the prijs, the bigger shal haue that he bouȝte, vnto the iubilee ȝeer; in that forsothe ȝeer al biggyng shal turne aȝen to the lord, and to the rather hauer. Who sellith his hows, with ynne the walles of the cytee, he shal haue leue of biggynge aȝen to the tyme that o ȝeer be fulfillid; and if he bigge not aȝen, and the cercle of the ȝeer were ouer caste, the bigger shal welde it, and his aftercomers into with outen ende, and it may not be bouȝt aȝen, also in the iubilee. If forsothe in a town that hath no wallis were the hows, thurȝ riȝt of the feeldes it shal be sold; if forsothe it were not aȝenbouȝt in the iubilee, it shal turne aȝen to his lord. The hows of the Leuytes, that ben in the cytees, euermore mowen be aȝenbouȝt; if thei weren not aȝenbouȝt, in the iubilee thei shulen turne aȝen to the lordes; for the houses of cytees of Leuytes ben for the possessiouns among the sones of Yrael; the suburbes forsothe of hem thei shulen not selle, for euerlastynge possessioun it is. If thi brother were maad pore, and feble in hoond, and thow resseyuest hym as a comlyng and a pilgrym, and lyueth with thee, ne take thow of hym vsurys, ne more ouer than thow hast ȝouun; dreed thi God, that thi brother mowe lyue anentis thee. Thi money thow shalt not ȝyue to him to vsure, and of the fruytes ouer aboundaunce thou shal not axe; Y the Lord ȝour God, that haue ladde ȝou out of the lond of Egipte, that I ȝyue ȝow the loond of Chanaan, and that Y were ȝoure God. If thurȝ porenesse compellid, thi brother selle hym silf to thee, thow shalt not oppresse hym thurȝ thraldom of seruauntis, but as an hiryd man and a dweller he shal be; vnto the iubilee ȝeer he shal worche anentis thee, and aftirward he shal goo out with his free children, and turne aȝen to the kyn, and to the possessioun of his fadres. Forsothe thei ben my seruauntis, and Y haue ladde hem out of the loond of Egipte; thei shulen not be sold bi condiciouns of thralles; ne ouer traueyle thou him bi thi power, but drede thow thi Lord. Thral and boond womman ben to ȝow of the naciouns that ben in ȝoure enuyroun, and of the comlynges that pilgrimagen anentis ȝow, other that of hem weren bore in ȝoure loond; thes ȝe shulen haue seruauntis, and thurȝ riȝt of erytage ȝe shulen ouerleeuen hem to the after comers, and ȝe shulen welde hem with outen ende; ȝoure forsothe britheren, the sones of Yrael, ȝe shulen not oppresse bi power. If anentis ȝow the hoond of the comlyng and of the pilgrym wax greet, and thi brother bicome pore, selle him silf to hym, or to eny of the lynage of hym, after the selling he may be aȝenbouȝt; who so wole of his britheren, bigge he hym; and the fadres brother, and the fader brother sone, and the cosyn, and the alye. If forsothe and he mowe, aȝenbie he hym silf, noumbred oonli the ȝeeris fro the tyme of his sillynge vnto the iubilee ȝeer; and the money with the which he was soold, after the noumbre of ȝeeris, and thurȝ resoun of an hirid man rekened. If there were many ȝeris that leeuen vnto the iubilee, and after that he shal ȝeelde the prijs; if fewe, he shal leye resoun with hym after the noumbre of ȝeeres; and he shal ȝeelde to the bigger that that is laft of the ȝeeris, in the whiche before he seruede, the medis with ynne rekenyd; he shal not traueil hym violentlich in thi siȝt. And if bi that he may not be aȝeynbouȝt, the iubilee ȝeer he shall goon out with his free children; myn forsothe seruauntis ben the sones of Yrael, the whiche Y haue ladde out of the loond of Egipte; I the Lord ȝoure God.
Ȝe shulen not make to ȝou a mawmett, and grauen thing, ne titlis ȝe shulen rere, ne huge stoon ȝe shulen putte in ȝoure erthe, that ȝe honouren it; Y forsothe am the Lord ȝoure God. Kepe ȝe myn halidaies, and inwardli drede ȝe at my seyntuarye; Y a Lord. If ȝe goon in myn heestis, and my maundementis kepen, and doon hem, Y shal ȝyue to ȝow reynes in her tymes, and the loond shal brynge forth his burionynge, and with apples the trees shulen be fulfillid; and the thresshynge of repyn tilthes shal atake the vyndage, and the vyndage shal occupie the sowynge tyme, and ȝe shulen ete ȝoure breed in plente in fulnes, and with outen drede ȝe shulen dwelle in ȝoure loond. I shal ȝyue pees in ȝoure coostis; ȝe shulen sleepe, and there shal not be that shal afeere ȝou; I shal take aweie yuel beestis, and swerd shal not thurȝ passe ȝoure termes. Ȝe shulen pursue ȝoure enemyes, and thei shulen falle before ȝow; fyue of ȝow shal pursue an hundryd aliens, and an hundred of ȝow ten thousyndes; ȝoure enemyes shulen falle with swerd in ȝoure siȝt. Y shal beholde ȝow, and make growe; ȝe shulen ben multiplied, and I shal fastne my couenaunt with ȝow; ȝe shulen ete the moost oold thingis of oold, and the newe vpon comynge, the oold ȝe shulen cast aweye; and I shal sette my tabernacle in the myddil of ȝow, and my soule shal not cast ȝow aweie; I shal goo among ȝow, and I shal be ȝoure God, and ȝe shulen be to me a puple. I the Lord ȝoure God, that haue ladde ȝow out of the loond of Egipcyens, that ȝe seruen not to hem, and the whiche haue brokun the chaynes of ȝoure nolles, that ȝe myȝten goo vp ryȝt. But if ȝe heren me not, ne doon alle myn heestis, and if ȝe spurne my lawes, and my domes despisen, that ȝe doon hem the whiche ben ordeyned of me, and my couenant ȝe fulli bryngen to nouȝt, I thanne this thing shal do to ȝow; Y shal visyte ȝow swiftly in nedynes, and in brennynge, that make fayl ȝoure eyen, and waste ȝoure lyues; in veyn ȝe shulen sowe ȝour seed, that of the enemyes shal be deuowryd; I shal putte my face aȝens ȝow, and ȝe shulen falle before ȝoure enemyes, and ȝe shulen be suget to hem that hatiden ȝow; ȝe shulen flee, no man pursuynge. If forsothe and so ȝe obeishen not to me, I shal adde ȝoure correccions seuen foold for ȝoure synnes; and I shal altobreke the prijd of ȝoure hardnes, and I shal ȝyue heuene to ȝow aboue as of yrun, and the erthe brasun; ȝoure traueyl in veyn shal be wastyd, ne the erthe shal brynge forth burionyng, ne the trees shulen ȝyue apples. And if ȝe goon ouerthwart to me, ne wolen here me, I shal adde ȝoure veniaunces vnto the seuenth foold for ȝoure synnes; and I shal sende out to ȝow beestis of the feeld, that wasten and ȝow and ȝoure beestis, and to skarsnes alle thinges thei shulen brynge, and that ȝoure weies be maad desert. And if ȝe wolen not resseyue disciplyne, but goon ouerthwart to me, I forsothe contrarius aȝens ȝow shal goo, and I shal smyte ȝow seuen sithes for ȝoure synnes; and I shal brynge vpon ȝow a swerd, vengesoure of my boond of pees; and whanne ȝe fleen into ȝoure cytees, I shal sende pestilence into the myddil of ȝou, and ȝe shulen be take in the hoondes of ȝoure enemyes, after that I breke the staf of ȝoure breed, so that ten wymmen in oon ouen baken looues, and ȝelden hem at weiȝt; and ȝe shulen eete, and not be fulfillid. If forsothe and bi thes thinges ȝe heren not me, but goon aȝens me, and I shal go aȝens ȝow in contrarye woodnes, and I shal vndernym ȝow with seuen veniaunce for ȝoure synnes, so that ȝe eten the flesh of ȝoure sones, and of ȝoure douȝtres; and I shal destruye ȝoure heyȝ thinges, and ȝoure mawmetis Y shal breke; ȝe shulen falle amonge the fallynges of ȝoure mawmetis, and my soule shal wlaate ȝow, in so myche that ȝoure cytees Y shal brynge down in to wildernes, and the desertis I shal make ȝoure seyntuaries, ne more ouer Y shal resseyue the moost swete smel; and I shal scater ȝoure loond, and ȝoure enemyes, whanne thei weren dwellers of it, shulen wondre vpon it; ȝow forsothe Y shal scatre amonge gentiles and I shal drawe out a swerd after ȝow, and ȝoure loond shal be desert, and ȝoure cytees fallen down. Thanne her holi dayes shulen pleese to the erthe, alle the daies of her wildirnes; whanne ȝe weren in enemyes loond, it shal halowe, and rest in the seuenthe tymes of his wildernes, forthi that it restide not in ȝoure seuenthe tymes, whanne ȝe dwelten in it. And whiche of ȝow leeuen, Y shal ȝyue drede in the hertes of hem, in regiouns of the enemyes; the sown of a fleynge leef shal fere hem, and so thei shulen flee it as the swerd; thei shulen falle, no man pursuynge, and eche vpon his britheren shal falle togidere, as men fleynge batailes; no man of ȝow shal be hardi to withstoonde to enemyes; ȝe shulen perishe among the gentiles, and the enemyes loond shal waste ȝow. But and if of hem eny leeuen stille, thei shulen wax stynkynge in her wickidnes, in the loond of her enemyes, and for the synne of her fadres and her owne thei shulen be turmentid, to the tyme that thei knowlechen her wickidnesses, and of her yuels thei recorden, in the whiche thei han trespassid aȝens me, and han goo ouerthwert to me. Therfor Y shal goo aȝens hem, and I shal lede hem into the enemyes loond, to the tyme that the vncircumsidid thouȝt of hem wax ashamed; than thei shulen preie for her vnpytownesses, and I shal recorde of my boond of pees, that I haue couenauntide with Jacob, Ysaac, and Abraham; of the loond forsothe I shal haue mynde, that whanne it were forsakun of hem, it shal pleese to hym silf in his seuenthe tymes, suffrynge wildernesses for hem; thei forsothe shulen preye for her synnes, forthi that thei han cast aweie my domes, and my lawes despiseden; and neuertheles also whanne thei weren in the enemyes loond, Y keste hem not aweie fulli, ne so Y despiside, that thei weren consumed, and that I shulde make my couenaunt brouȝt to nouȝt with hem; Y forsothe am the Lord God of hem. And I shal recorde of my rather boond of pees, whanne I ladde hem out of the loond of Egipte, in the siȝt of gentils, that I were the God of hem; Y the Lord God. Thes ben the heestis, and domes, and lawes, that the Lord ȝaf bitwix hym and betwix the sones of Yrael, in the mownt of Synay, bi the hoond of Moyses.
And the Lord spak to Moyses, seiynge, Spek to the sones of Yrael, and thow shalt seie to hem, The man that doth avowe, and bihotith to God hijs soule, vndir eymyng he shal ȝyue the prijs. And if it were a maal, fro the twentithe ȝeer vnto the sixtithe ȝeer, he shal ȝyue fifty sicles of siluer, at the mesure of the seyntuarye, if a womman, thritti; fro the fifthe forsothe ȝeer vnto the twentithe, a maal shal ȝyue twenti cycles, the womman ten; fro o moneth vnto the fifthe ȝeer, for the maal shal be ȝyue fyue cyclis, and for the femaal three; of sixti wynter and more, a maal shal ȝyue fiftene siclis, the womman ten. If he were a pore man, and at the eymynge he shal not mowe ȝeelde, he shal stoonde before the preest, and how myche he eymeth, and seeth that he may ȝeelde, so myche he shal ȝyue. A beeste forsothe that may be offred to the Lord, if eny auowith, holi it shal be, and it may not be chaungid, that is, nother betere for yuel, ne the wors for good; but if he shal chaunge, and that that is chaungid and it for the which it is chaungid shal be sacryd to the Lord. The vnclene forsothe beeste that may not be offred to slauȝtre, whoso auowith, it shal be brouȝt before the preest, the which demynge whether it be good or yuel, shal sette the prijs; and if he that offreth wole not ȝyue, he shal adde aboue the eymynge the fifthe part. A man if he auowe his hows, and halowe it to the Lord, the preest shal behoolde, whether it be good or yuel, and after the prijs, that of hym were ordeyned, it shal be soold; if forsothe he that auowith wole bigge it aȝen, he shal ȝyue the fifthe part of the eymynge aboue, and he shal haue the hows. And if the feelde of his possessioun he auowe, and halowe to the Lord, after the mesure of the seed shal be eymed the prijs; if with thritti busshels of barly the feelde is sowun, for fifti siclis of siluer it shal be soold. And if anoon fro the ȝeer of the biginnyng iubilee he auowe the feeld, as myche as it may be worth, so myche shal be eymed; if forsothe a litil of tyme, the preest shal noumbre the money after the noumbre of ȝeeris that ben laft vnto the iubilee, and it shal be drawe aweie fro the prijs. And if he that auowide wole bigge the feeld aȝen, he shal adde the fifthe part of the eymed money, and he shal weelde it; if forsothe he wole not aȝenbigge, but to eny other were sold ouer hym that auowede, he may not aȝenbigge; for whanne the day of the iubilee cometh, it shal be halowid to the Lord, and the possessioun sacrid perteyneth to the ryȝt of preestis. If a feelde is bouȝt, and not of the possessioun of the more men, were halowid to the Lord, the preest shal noumbre the prijs, after the noumbre of ȝeeres vnto the iubilee, and he shal ȝyue, the which auowide it to the Lord; in the iubilee forsothe it shal turne aȝen to the rather lord that solde it, and hadde into the soort of his possessioun. Al eymynge shal be peysid with the cycle of the seyntuarye; the sicle hath twenty halpens. The first getun that perteyneth to the Lord no man may halowe and vowe, whether oxe or sheep it were, of the Lord thei ben. And if the beeste is vnclene, he that offreth shal aȝenbigge aftir his eymynge, and shall adde the fifthe part of the prijs; if he wole not aȝenbigge, it shal be soold to another, how myche euer it were eymed. Al that to the Lord is sacrid, whether it were man, or beeste, or feelde, it shal not be soold, ne may be aȝenbouȝt; what euer thing ones were sacrid, holi of halowes it shal be to the Lord, and eche sacrid thing that is offryd of man, shal not be bouȝt aȝen, but thurȝ deeth die. Alle the dymes of the erthe, whether of the cornes, or of the apples of trees, ben of the Lord, and to hym thei ben halowid; if eny man wole bigge aȝen his dymes, adde he the fifthe part of hem; of alle the dymes of sheep, or of oxe, and of geyte, that vndur the ȝeerde of the sheepherd goon, what euer dyme come, it shal be halowid to the Lord; it shal not be chosen, nothir good nother yuel, ne for another chaungid; if eny man chaunge, and that, that is chaungid, and that, for what it is chaungid, shal be halowid to the Lord, and shal not be aȝenbouȝt. Thes ben the heestis that the Lord comaundide to Moyses, and to the sones of Yrael, in the mownt of Synay.
Copyright © 2013–2026 Jeremy J. Johnson. All rights reserved.