Lord God Almyȝty of our faders, Abraham, Ysaac, and Jacob, and to the riȝtwise seede of hem, the whiche madist heuen and erth with al the ournynge of hem, the whiche markedist the se with the word of thin heste, whiche closedist the depnesse, and merkedist to thi ferful and preysable name, that alle inwardly dreeden, and tremblen fro thi chere of thi vertue, and vnsuffrable wrath vpon the synnful of thi thretynge. Forsothe with oute mesure grete and vnserchable the mercy of thi beheste; for thou art Lord altherheeȝest vpon al erth, long abidyng and miche mercyful, and othinkyng vpon the malices of men. Thou forsothe, Lord, after thi goodnesse hast bihoten penaunce of remissioun of synnes; and thou, God of riȝtwijs men, hast not putte penaunce to the riȝtwijse, Abraham, Ysaac, and Jacob, to hem that to thee synnede not. For I haue synnede ouer the noumbre of grauel of the see; multiplied ben my wickidnesses. I am myche croked with myche bond of yren, and there is not aȝeyn brething to me; for I stirede thi wrath, and euyl before thee I dide, settyng abomynacyouns and multiplying offenciouns. And nowe I bowe the knees of myn herte, preyinge of thee goodnesse, Lord. I synnede, Lord, I synnede, and my wickidnesse I knowe. I aske, preyinge thee, Lord; forȝeue to me, forȝeue to me, ne togidre leese thou me with my wickidnesses, ne without eend reserue thou euyls to me. For vnworthi thou schalt sauen me after thi grete mercy, and I schal preysen thee euermore alle the days of my lyue; for thee preyseth al the vertue of heuens, and to thee is glorie in to world of worldis. Amen.
Copyright © 2013–2026 Jeremy J. Johnson. All rights reserved.