1 2 3 4 5 6 7 8 9 10 11 12 13 14
The word of the Lord that is maad to Osee, sone of Bery, in the days of Osye, Joathan, Achas, and Ezechie, kyngis of Juda, and in the days of Jeroboam, sone of Joas, kyng of Yrael. The bygynnyng of spekynge Lord in Osee. And the Lord said to Osee, Go thou, take to thee a wijf of fornicacioun, and make to thee sonys of fornicaciouns, for the erthe doynge fornicacioun shal do fornicacioun fro the Lord. And he wente, and toke Gomer, the douȝter of Debalaym; and she conceyuyde, and bare to hym a sone. And the Lord saide to hym, Clepe the name of hym Jesrael; for ȝit a lytil and Y shal visite the blode of Jesrael on the hous of Hyeu, and shal make the kyngdam of the hous of Yrael for to reste. And in that day Y shal breke to gydre the bowe of Yrael in the valey of Jesrael. And she conceyuyde ȝit, and bare a douȝter. And he saide to hym, Clepe thou the name of hir With outen mercy, for Y shal namore putte to, for to haue mercy to the hous of Yrael, bot bi forȝetyng Y shal forȝete hem. And to the hous of Juda Y shal haue mercy, and Y shal saue hem in the Lord her God; and Y shal not saue hem in bowe, and swerd, and bateil, and in horsis, and in horsmen. And she wenyde hir that was With outen mercye. And she conceyuyde, and bare to hym a sone. And he saide, Clepe thou the name of hym Not my people, for ȝe ben not my peple, and Y shal not be ȝour God. And the noumbre of sones of Yrael shal be as grauel of the see, whiche is with oute mesure, and shal not be noumbrid; and it schal be in place, where it schal be seid to hem, Not my peple ȝe; it schal be seid to hem, Sones of God lyuynge. And sones of Juda and sones of Yrael shuln be gedrid to gydre, and thei shuln putte to hem self oon hed, and shuln stie vp fro the lond, for grete is the day of Jesrael.
Saye ȝe to ȝour bretheren, My peple; and to ȝour sister, Wynnynge mercy; deme ȝe ȝour modir, deme ȝe, for she is not my wijf, and Y not hir husbond. Do she aweye hir fornicaciouns fro hir face, and hir auowtries fro the mydil of her tetis; lest perauenture Y vnclothe hir nakid, and sette hir vp the day of hir birthe. And Y shal putte hir as a wildrenesse, and ordeyne hir as a lond vnweyed, or with outen weye, and shal slea hir with thrist. And of the sones of hir Y shal not haue mercy, for thei ben sonys of fornycacioun; for the modir of hem dide fornycacioun, she is confusid that conceyuyde hem, for she saide, Y shal go after my louers that ȝiuen my looues to me, and my waters, and my wolle, and my lynnen, and myn oyle, and my drinke. For this thing lo! Y shal hegge thi weye with thornys, and I shal hegge it with a walle, and it shal not fynde his pathis. And she shal sue hir louers, and shal not cacche hem, and shal seke hem, and shal not fynde hem; and she shal saye, Y shal go, and Y shal turne aȝein to my former husbond, for wele it was to me thanne more than now. And this womman wiste not, for Y ȝaue to hir wheet, wijne, and oyle; and multiplied to hir syluer and gold, whiche thei maden to Baal. Therfore Y shal turne, and shal take my wheet in hys tyme, and my wijn in his tyme; and I shal weiȝe my wolle, and my lynnen, whiche hiliden the yuel fame of hir. And now Y shal shewe the folye of hir in the eeȝen of hir louers, and a man shal not delyuere hir fro myn hond; and I shal make alle the ioye of hir for to ceese, hir solempnyte, hir neomynye, or new feest, hir saboth, and alle feestis and tymys of hir. And I shal corrumpe, or distruye, hir vyne ȝerd, and hir fijge tree, of which she saide, These ben my hijris, whiche my louers ȝauen to me; and Y shal putte hir in to wijlde wode, and the beest of the feeld shal eet hir. And I shal visite vpon hir the days of Baalym, in whiche she brent ensence, and was ourned with hir ere ring, and hir broche, and wente aftir hir louers, and forȝate me, saith the Lord. For this thing loo! Y shal ȝeue mylk to hir, and shal lede hir in to wildernesse, and Y shal speke to hir herte; and shal ȝeue to hir vijne tyliers of the same place, and the valey of Achor, for to opyn hope. And she shal synge there vp the days of hir ȝouthe, and vp the days of hir steying vp fro the lond of Egypt. And it shal be in that day, saith the Lord, she shal clepe me Myn husbond, and she shal namore clepe me Baalym; and Y shal take aweye the names of Balym fro hir mouthe, and she shal namore haue mynde of the name of hem. And Y shal smyte to hem a boond of pees in that day with beest of the feeld, and with brid of heuen, and with creepynge beest of erthe. And Y shal breke to gydre bowe, and swerd, and batel of the erthe; and Y shal make hem for to sleepe tristili. And I shal spouse thee to me in to with outen eende, and Y shal spouse thee to me in riȝtwijsnesse, and in dome, and in mercy, and in doyngis of mercy. And Y shal spouse thee to me in feith; and thou shalt wite, for Y the Lord. And it shal be, in that day Y shal heere, saith the Lord, and I shal heere heuens, and thei shuln heere the erthe; and the erthe shal heere wheete, and wijn, and oyle, and these shuln heere Jesrael. And Y shal sowe hir to me in to lond, and Y shal haue mercy on hir that was with out mercy. And Y shal saye to not my peple, Thou art my peple, and he shal saye, Thou art my God.
And the Lord saide to me, Ȝit go thou, and loue thou a womman loued of a frend, and auoutresse, as the Lord loueth the sonys of Yrael; and thei byholden to alyen goddis, and louen the darstis of grapis, that leueth in hem aftir pressyng. And Y dalf hir to me with fifteen platis of siluer, and with a chorus of barly, whiche is a mesure of thritti busshels, and with an half chorus of barly. And Y saide to hir, Manye days thou shalt abyde me; thou shalt not do fornycacioun, and thou shalt not be to husbond, bot and Y shal abijde thee. For manye days the sonys of Yrael shuln sitte with out kyng, with out prince, with out sacrifice, and with out auter, and with out ephot, or prestis clothing, and with out teraphyn. And after these thingis sonys of Yrael shuln turne aȝein, and shuln seke the Lord her God, and Dauith, her kyng; and thei shuln dreede to the Lord, and to the good of hym, in the last of days.
Heere ȝe, sonys of Yrael, the word of the Lord, for dome to the Lord with dwellers of erthe; forsothe trewthe is not and mercy is not, and science, or kunnynge, of the Lord is not in erthe. Cursidness, and lesyng, and mansleaynge, and theft, and auoutrie flowiden, and bloode touchide bloode. For this thing erthe shal mourne, and eche man that dwellith theryn shal be seeke, in beest of the feeld, and in brid of heuen; bot and fishis of the se shuln be gadrid. Nethelese eche man deeme not, and be not a man reproued; forsothe thi peple as these that aȝein sayen the prest. And thou shalt falle to day, and also the prophete shal falle to gydre with thee; in nyȝt Y made thi modir for to be stille. And my peple was to gydre stille, for it hadde not science; for thou hast putte awey science, Y shal putte thee awey, that thou be not set, or vse, in presthode to me; thou hast forȝete the lawe of thi God, and Y shal forgete thi sonys. Vp the multitude of hem, so thei synnyden to me. Y shal chaunge the glorie of hem in to yuel fame. Thei shuln ete the synnys of my peple, and to the wickidnesse of hem thei shuln reyse vp the soulis of hem. And it shal be, as the peple so the prest; and I shal visite on hym the weyes of hym, and I shal ȝelde to hym his thouȝtis. And thei shuln ete, and shuln not be fulfillid; thei diden fornycacioun, and cesiden not, for thei forsoken the Lord in not kepynge. Fornicacioun, and wijn, and drunkenesse doth awey herte. My peple axide in his tree, and the staff of hym shal shewe to hym; forsothe the spirit of fornicaciouns disceyuyde hem, and thei diden fornicacioun fro her God. On hedis of hillis thei maden sacrifice, and on litil hillis thei brenneden tymyame, or encense, vnder ook, and poplere, and terebynt, for the shadew of it was good. Therfore ȝour douȝters shuln do fornicacioun, and ȝour spousis, or wijfis, shuln be auoutressis. Y shal not visite on ȝour douȝters, whan thei shuln do fornicacioun, and on ȝoure wijues, whanne thei shuln do auowtrie; for thei lyueden with hooris, and sacrifieden with men turned in to wommans maners. And peple not vndirstondynge shal be beten. Ȝif thou, Yrael, dost fornycacioun, namely thou, Juda, trespasse not; and nyl ȝe entre in to Galgala, and stye ȝe not in to Bethauen, nether swere ȝe, The Lord lyueth. For as a cowe waxinge wijlde Yrael bowide awey; now the Lord shal feede hem as a lombe in breed. Parcener of ydolis Effraym, leue ȝe hym; the feest of hem is departid. In fornicacioun thei diden fornicacioun, the defenders of hem loueden for to brynge to yuel fame. A spirit boonde hym in his weengis, and thei shuln be confoundid of her sacrifices.
Heere ȝe, prestis, these thingis, and perceyue ȝe, hous of Yrael, and herken ȝe, hous of the kyng; for with ȝou is dome, for ȝe ben maad a graue to byholdyng, and as a nette sprad abrood on Thabor. And ȝe bowiden doun slayn sacrifice for victorie in to depnesse; and Y the lerner of hem alle. Y wote Effraym, and Yrael is not hid fro me; for now Effraym dide fornicacioun, Yrael is defoulid. Thei shul not ȝeue her thouȝtis, that thei turne aȝein to her God; for the spirit of fornicacioun in the mydil of hem, and thei knewen not the Lord. And the pryde of Yrael shal answere in to his face, and Yrael and Effraym shuln falle to gydre in her wikkidnesse; also Juda shall falle with hem. In her flockis, and in her droues thei shuln go for to seke the Lord, and shuln not fynde; he is taken awey fro hem. In the Lord thei trespassiden, for thei gendriden alien sonys; now the monethe with her partis shal deuoure hem. Sowne ȝe with an horn in Gabaa, with trumpe in Rama; woule ȝe in Bethauen, aftir thi bac, Beniamyn. Effraym shal be in to desolacioun, in the day of correctioun, and in lynagis of Yrael Y shewide feith. The princis of Juda ben maad as takynge to the termes on hem; Y shal shede out as water my wrath. Effraym is suffrynge fals chalenge, he broken in dome; for he byganne for to go after filthis. And Y as a mouȝthe to Effraym, and as rot to the hous of Juda. And Effraym sawȝ his seekenesse, and Juda his boond. And Effraym wente to Assur, and sente to the kyng veniour. And he shal not mowe saue ȝou, nether shal mowe vnbynde the boond fro ȝou. For Y as a lyonesse to Effraym, and as a whelp of lyoun to the hous of Juda. Y, Y shal take, and shal go, and shal take awey, and ther is not whiche shal delyuere. Y goynge shal turne aȝein to my place, til ȝe fayle, and seeke my face. In her tribulacioun erly thei shuln ryse to gyder to me.
Cum ȝe, and turne we aȝein to the Lord; for he toke, or bigan, and shal hele us; he shal smyte, and shal cure us. He shal quycken us aftir two days, in the thrydde day he shal reyse vs, and we shuln lyue in the siȝt of hym. We shuln wite, and sue, that we knewe the Lord. As the spryng of day his out goyng is maad redy, and he shal cum as rayne tymely to vs, and late to erthe. What shal Y do to thee, Effraym? what shal Y do to thee, Juda? Ȝour mercy as a morew cloude, and as dewe erly passynge forth. For this thing Y haue hewun in prophetis, and slayn hem in wordis of my mouthe; and thi domys shuln go out as liȝt. For Y wolde mercy, and not sacrifice, and science of God, more than brente sacrifices. Forsothe thei as Adam braken my couenaunt; there thei trespassiden in me. Galaad the cite of men wirchynge ydol, supplauntid by blood; and as cheekis of men theeues. Parcener of prestis in the waye of men sleaynge men goynge of Sychem, for thei wrouȝten grete trespas. In the hous of Yrael Y saw an orrible thing; there the fornycaciouns of Effraym. Israel is defoulid; bot and thou, Juda, putte to thee rijp corn, whanne Y shal turne to gydre the caitiftee of my peple.
Whanne Y wolde hele Yrael, the wickidnesse of Effraym is shewid, and the malice of Samarie, for thei wrouȝten lesyng. And a nyȝt theef wente in robbynge; a litil day theef with out forth. And lest perauenture thei sayen in her hertis, me hauynge mynde on al the malice of hem, now her fyndyngis han gon about hem, thei ben maad byfore my face. In her malice thei gladden the kyng, and in her lesyngus the princis. Alle doynge auoutrie, as fourneice kyndlid of a man seethinge. The citee restide a litil in mengyng to gydre of soure dowe, til it were sourdowid all. The day of oure kyng; princis bygunnen for to wexe wode of wijn; he streiȝte out his hond with scorners. For thei applieden as a fourneys her herte, whanne he aspiede, or sette, tresoun to hem. Al niȝt he slepte seethinge hem, erly he set on fijr, as fijr of flawme. All ben maad hoot as a fourneice, and deuoureden her domesmen. All kyngis of hem fellen doun, and ther is not in hem that shal crie to me. Effraym in peplis he was meynt to gydre; Effraym is maad a loof baken vndir ashis, whiche is not turned aȝein. Aliens eeten the strengthe of hym, and he wist not; bot and whijt heeris ben shed out in hym, and he knewe not. And the pride of Yrael shal be mekid in the face of hym; nether thei ben turned aȝein to the Lord her God, and thei souȝten not hym in alle theese thingus. And Effraym is maad as a culuer disceyued, not hauynge herte. Thei inclepiden Egypt, to Assiriens thei wenten. And whanne thei shuln go, Y shal sprede abrode on hem my nett, as a brid of heuen Y shal drawe hem doun. Y shal bete hem, vp the heeryng of the cumpanye of hem. Wo to hem, for thei wenten awei fro me; thei shuln be waastid, for thei trespassiden in me. Y aȝein bouȝte hem, and thei spaken aȝeinus me lesyng. And thei crieden not to me in her herte, bot thei wouliden in her couchis. Thei chewiden cud vpon whete, and wijne, and departiden fro me. And I lernyde hem, and coumfortide the armys of hem, and in me thei thouȝten malice. Thei turneden aȝein, that thei shulden be with out ȝoc; thei ben maad as a gylful bowe. The princis of hem shuln falle in swerd, of the wodenesse of her tunge; this the mowyng, or scornyng, of hem in the lond of Egypt.
In thi throte be a trumpe, as an egle on the hous of the Lord; for that that thei braken my bond of pees, and thei trespassiden, or braken, my lawe. Thei inclepiden me, My God, we Yrael knewen thee. Yrael castide awey good thing, an enemy shal pursue hym. Thei regneden, and not of me; thei weren princis, and I knewe not. Thei maden her syluer and gold and her ydolis to hem, that thei shulden perishe. Samarie, thi calf is cast awey; my woodnesse is wrothe in hem. Hou long miȝten thei not be clensid? for of Yrael and he is. A craftise man made hym, and he is not god; for the calf of Samarie shal be into webbis of yreinus. For thei shuln sowe wynd, and repe whirlwynd. A stondynge stalk is not in hem, the buriownyng shal not make mele; that and ȝif it shal make, aliens shuln ete it. Yrael is deuoured; now he is maad in naciouns, as an vnclene vessel, for thei stieden to Assur. Effraym a solitarie feeld asse to hym self. Thei ȝauen ȝiftis to her louers; bot and with meed thei hijriden naciouns. Now Y shal gedre hem, and thei shuln reste a litil of charge of the kyng and princis. For Effraym multipliede autris for to synne, autris ben maad to hym in to trespasse. Y shal write to hym my manyfolde lawis, whiche ben acomptid as alyen. Thei shulen brenge to oostis, and shuln offre fleshis, and shuln ete; and the Lord shal not resceyue hem. Now he shal recorde the wickidnesse of hem, and shal visite the synnes of hem; thei shuln be turnyd in to Egypt. And Yrael forȝate his maker, and beeldide templis, and Judas multipliede stronge citees; and Y shal sende fijr in to the citees of him, and it shal deuoure the housis of hym.
Yrael, nyl thou glade, nyl thou ioye with outforth as peplis; for thou hast do fornicacioun fro thi God. Thou louedist hijris on alle feeldis of whete. Feeld and pressour shal not feede hem, and wijne shal lye to hem. Thei shuln not dwelle in the lond of the Lord. Effraym turnyde aȝein in to Egypt, and in Assiriens eete defoulid thing. Thei shuln not sacrifice wijn to the Lord, and thei shuln not plese to hym. The sacrifices of hem as breede of mournynge men; alle that eten it shuln be defoulid. For the breed of hem, of the soule of hem, shal not entre in to the hous of the Lord. What shuln ȝe do in the solempne day, in day of the fest of the Lord? Loo! sothely thei ben gon fro wastnesse. Egypt shal gedere hem, Memphis shal birie hem. A nettil shal enherit the desirable syluer of hem, a cloote in the tabernaclis of hem. Days of visityng camen, days of ȝeldyng camen. Yrael, wite thou thee a fool, a wood prophete, a spirituel man, for the multitude of thi wickidnesse, and multitude of madnesse. A spier of Effraym with my God; the prophete is maad a gnare of fallynge, on alle the wayes of hym, wodenesse in the hous of his God. Thei synneden depely, as in days of Gabaa. He shal recorde her wickidnesse, and shal visite the synnys of hem. Y foonde Yrael as grapes in desert, as the first applis of a litil fyge tree. In the heeȝt therof Y seeȝ the faders of hem; forsothe thei entriden to Belphagor, and ben alienyd aweye in to confusioun, and ben maad abomynable as tho thingus that thei loueden. Effraym as a brid fleeȝ awey; the glorie of hem of chijld beryng, and of wombe, and of conceyuynge. That and ȝif thei shuln nurishe out her sonys, Y shal make hem with out free childre in men. Bot and wo to hem, whanne I shal go awey fro hem. Effraym, as I syȝ Tyrus, was foundid in fairnesse; Effraym schal leede out his sones to the slear. Lord, ȝyue thou to hem; what schalt thou ȝyue to hem? ȝeue thou to hem a ȝate of wombe with oute free children, and drie tetis. Al wickidnesse of hem in Galgal, for there Y hadde hem hateful; for the malice of her wickidnesse Y shal caste hem out of myn hous. Y shal not putte to, that Y loue hem. Alle princis of hem goynge awey; Effraym is smyten, the root of hem is dried vp; thei shuln not make fruyte. That and ȝif thei shuln gendre, Y shal slea the most loued thingus of the wombe of hem. The Lord my God shal caste hem awey, for thei herden not hym; and thei shuln be wagringe in naciouns.
Yrael a vijne ful of bowis, fruyte is maad euen to hym; vp the multitude of his fruyte he multipliede auters, vp the plente of his lond he was plenteous in symulacris, or fals goddis. The herte of hem is departid, now thei shuln perishe. He shal breke to gydre the symulacris of hem, he shal spuyle the auters of hem. For now thei shuln saye, Kyng is not to vs, forsothe we dreeden not God. And what shal a kyng do to vs? Speke ȝe wordis of vnprofitable visioun, and ȝe shuln make a couenaunt with lesyng; and dome shal buriowne as bitternesse on forowis of the feeld. The dwellers of Samarie wirshipen the kijn of Bethauen. For the peple therof mournyde vpon hym, and kepers of the hous of hym ioyeden with outforth in glorie of hym, for it passide fro hym. Forsothe and he is born in to Assur, a ȝift to the king venier. Confusioun shal take Effraym, and Yrael shal be confoundid in his will. Samarie made his king for to passe, as frooth on the face of water. And the heeȝ thingis of ydol, the synne of Yrael, shulen be distruyed. Cloote and breere shal stye on the auters of hem. And thei shuln seye to mounteyns, Hille ȝe vs, and to smale hillis, Falle ȝe vpon vs. Of the days of Gabaa Yrael synnyde; there thei stoden. Bateyl shal not cotche hem in Gabaa, on the sonys of wickidnesse. Vp my desijre Y shal chastise hem; puplis shuln be gadrid on hem, whanne thei shuln be chastisid for her two wickidnessis. Effraym a cow calf, tauȝt for to loue thresshyng; and Y passide on the fairnesse of hir neck. Y shal stye vp on Effraym. Judas shal ere, Jacob shal breke to gydre to hym forowis. Sowe ȝe to ȝow in riȝtwijsnesse, and repe ȝe in the mouth of mercy, and make newe to ȝou a newe feeld. Tyme sothely for to aȝein seeke the Lord, whanne he shal cum, that shal teche ȝou riȝtwijsnesse. Ȝe han sowe vnpite, ȝe repiden wickidnesse, ȝe eeten the fruyte of lesyng. For thou tristidist in thi wayes, and in multitude of thi stronge men. Noyse shal ryse to gydre in thi peple, and alle thi strengthus shuln be distruyed; as Salmana is distruyed of the hous of hym, that veniede Baal; in the day of bateyle, the modir hurtlid on sones. So Bethel shal do to ȝou, fro the face of malice of ȝour wickidnessis. As the morewnyng passith, the kyng of Yrael passith.
Byfore Yrael a chijld, and Y louede hym; and of Egypt Y clepide my sone. Thei clepiden hem, so thei wenten awey fro the face of hem. Thei offreden to Baalym, and maden sacrifice to symulacris. And Y as a nurishe of Effraym bare hem in myn armys, and thei wisten not, that Y helide hem. In litil boondis of Adam Y shal drawe hem, in boondis of charitee. And Y shal be to hem as reysynge ȝoc on the cheekis of hem; and Y bowide doun to hym, that he shulde ete. He shal not turne aȝein in to the lond of Egypt. And Assur the kyng therof, for thei wolden not be conuertid. Swerd toke, or bigan, in the citees therof, and schal waaste the chosun therof, and schal ete the heedis of hem. And my peple schal hange, at my comynge aȝein. Forsoth a ȝok shal be putte vpon hem to gydre, whiche shal not be don awey. Hou shal Y ȝeue thee, Effraym? shal Y hille, or defende, thee, Yrael? hou shal Y ȝeue thee as Adama? shal Y putte thee as Seboym? Myn hert is conuertid in me; my forthinkyng is trublid to gidre. Y shal not do the woodnesse of my wrath. Y shal not be conuertid, that Y distruye Effraym; for Y God, and not man; holy in the mydil of thee, and Y shal not entre in to cytee. After the Lord thei shuln go. As a lyoun he schal roore, for he schal roore, and sones of the see schulen drede. And thei shuln flee awey as a brid fro Egypt, and as culuer of the lond of Assiriens. And Y shal to gydre sette hem in her housis, saith the Lord. Effraym disceyuede me in marchaundise, and in ydol of the hous of Yrael. Forsothe Judas witnes wente doun with God, and with feithful saintis.
Effraym feedith the wijnd, and sueth heete. Al day he multiplieth lesyng, and distruccioun; and made pees with Assiriens, and bare oyle in to Egypt. Therfore the dome of the Lord with Juda, and visitacioun on Jacob; vp the wayes, and vp the fyndyngus of hym he shal ȝeelde to hym. In the wombe he supplauntide, or disceyuyde, his brother, and in his strengthe he was dressid with an aungel. And he hadde victorie at the aungel, and he was coumfortid; he wepte, and preiede hym; in Bethel he fonde hym, and there he spac with ȝou. And the Lord God of oostis, the Lord, memorial of hym. And thou shalt be conuertid to the Lord thi God. Keepe thou mercy and dome, and hoope thou euermore in thy God. Canaan, in his hond a gyleful balaunce, louede fals chalenge. And Effraym saide, Netheles Y am maad riche, Y fonde an ydol to me; alle my trauailis shuln not fynde to me wickidnesse, whiche Y synnyde. And Y the Lord thi God, whiche ledde thee out of the lond of Egypt; ȝit Y shal make thee for to sytte in tabernaclis, as in days of feest. And Y spac on prophetis, and Y multipliede visioun, and in the hond of prophetis Y am lickenyd. Ȝif in Galaad an ydol, therfore veynly they weren in Galgal offrynge to oxis; forwhi and the auters of hem as hepis on forowis of the feeld. Jacob fleiȝ into the cuntrie of Sirie, and Irael seruyde into wyf, and seruyde into wyf. Forsothe in a prophete the Lord ledde out Yrael of Egypt, and in a prophete he is kepte. Effraym terride me to wrath in his bitternessis, and his blood shal cum on hym; and the Lord his God shal restoren hym his shenship.
Effraym spekynge, errour assailide Yrael; and he trespasside in Baal, and is dead. And now thei puttiden to for to synne, and maden to hem a ȝoten thing of her syluer, as the licknesse of ydols; the makyng of crafty men it is al. To these thei sayen, Offre, ȝe men, wirshippynge calues. Therfore thei shuln be as a morewe clowde, or myst, and as morewe dewe passynge, as dust rauyshid with whirlwynd of the feeld, and as smoke of the chymney. Forsothe Y the Lord thi God, of the lond of Egypt; and thou shalt not knowe God, with outen me, and saueour is not, out take me. Y knewe thee in desert, in the lond of wildernesse. Bysidis her lesewis and thei ben fulfillid, and ful crammyd; thei lyftiden vp her herte, and forȝaten me. And Y shal be to hem as a lyounesse, and as a paard in the waye of Assyriens. Y shal renne to hem as a she bere, the whelpis rauyshid; and Y shal breke the ynner thingis of her mawe, and Y shal waastye hem there as a lyoun. A beest of the feeld shal kitte hem. Thi losse, Yrael; oonly of me thin help. Wher is thi kyng? most now saue he thee in alle thi citees; and thi domysmen, of whom thou saidist, Ȝeue thou to me a kyng, and princis? And Y shal ȝeue to thee a kyng in my wodenesse, and Y shal take awey in myn indignacioun. The wickidnesse of Effraym is bounden to gidre; the synne of hym hydde. Sorewis of a womman berynge chijld shuln cume to hym; he is a sone not wijse. Now forsothe he shal not stonde in contricioun of sonys. Of the hond of deth Y shal delyuere hem, Y shal aȝein bye hem fro deth. Thou deth, Y shal be thi deth; thou helle, Y shal be thi morsel. Coumfort is hid fro myn eeȝen, for he departith among bretheren. The Lord shal brenge a brennynge wynd, of desert steiynge vp; and shal drye the veynis therof, and discoumforte, or leeue aloon, the welle therof; and he shal rauyshe tresour of eche desirable vessel. Perishe Samarie, for to bitternesse she stiride hir God; in swerd perishe it. The litil childre of hem ben hurtlid, and wymmen with chijld of it ben coruen out.
Yrael, be thou conuertid to the Lord thi God, for thou hast fallen to gydre in thi wickidnesse. Take with ȝou wordis, and be ȝe conuertid to the Lord; and saye ȝe to hym, Do awey alle wickidnesse, and resceyue good; and we shuln ȝeelde the calues of our lippis. Assur shal not saue vs, we shuln not steye on hors; nether we shuln saye more, Our goddis werkis of oure hondis; for thou shalt haue mercy of the ylke fadrelesse chijld, that is in thee. Y shal heele the contricioun of hem; Y shal loue hem of my free wille, for my woodnesse is turned awey fro hem. Y shal be as dew, and Yrael shal buriowne as lilie. And the roote of hym shal birst out as of Lyban; the braunchis of hym shuln go. And as olyue his glorie shal be, and his sauour as of Liban. Thei shuln be conuertid sittynge in the shadewe of hym; thei shuln lyue in whete, and shuln burioune as a vyne ȝerd. The memoriel of hym as wijn of Lyban. Effraym, what ouer to me ydolis? Y shal heere hym, and Y shal dresse hym as a beeche wexinge green. Of me thi fruyte is founden. Who is wijse, and shal vndirstonden these thingis? vndirstondynge, and shal wite these thingis? For riȝtful the wayes of the Lord, and iust men shuln walke in hem; forsothe trespassours shuln falle in hem.
Copyright © 2013–2026 Jeremy J. Johnson. All rights reserved.