1 2 3 4 5 6 7 8 9 10 11 12 13 14
In the eiȝte moneth, in the secounde ȝeer of Darius, the word of the Lord is maad to Zacharie, sone of Barachie, sone of Addo, prophete, seyinge, The Lord is wroth vpon ȝour fadris with wrathe. And thou shalt saye to hem. These thingis saith the Lord of oostis. Be ȝe conuertid to me, saith the Lord of oostis, and Y shal be conuertid to ȝou, saith the Lord of oostis. Be ȝe not as ȝour fadris, to whom former prophetis crieden, sayinge, These thingus saith the Lord of oostis, Be ȝe conuertid of ȝour yuel wayes, and ȝoure warst thouȝtes; and thei herden not, nether token entente to me, saith the Lord of oostis. Wher ben ȝour faders and prophetis? wher thei shuln lyue into with outen eende? Nethelese my wordis and my lawful thingis, whiche Y comaundide to my seruauntis prophetis, wher thei tauȝten not ȝoure fadris? And thei weren to gydre turned, and saiden, As the Lord of oostis thouȝte for to do to vs vp oure wayes, and vp oure fyndyngis he dide to vs. In the foure and twentithe day of the elleuenthe moneth Sabath, in the secounde ȝeer of Darius, the word of the Lord is maad to Sacharie, sone of Barachie, sone of Addo, prophete, sayinge, Y sawȝ bi niȝt, and loo! a man styinge vp a rede hors; and he stode bitwixe the places where myrtis wexen, that weren in the deepe, and after hym horsis dyuerse, rede, and white. And Y saide, My lord, what ben these? And an angel of the Lord saide to me, that spac in me, Y shal shewe to thee what these ben. And the man that stode bitwixe places wher myrtis wexen, answerde, and saide, These ben, whom the Lord sente, that thei walke thorow erthe. And thei answerden to the aungel of the Lord, that stode bitwixe places wher myrtis wexen, and saiden, We han walkid thorou erthe, and loo! al erthe is enhabitid, and restith. And the aungel of the Lord answerde, and saide, Lord of oostis, hou longe shalt thou not haue mercy of Jerusalem, and of the citees of Juda, to whiche thou art wroth? This is now the seuentithe ȝeer. And the Lord answerde to the aungel, that spac in me, good wordis, coumfortynge. And the aungel that spac in me, saide to me, Crie thou, sayinge, These thingus saith the Lord of oostis, Y louede Jerusalem and Syon in grete feruour; and in grete wroth Y shal be wroth vpon riche folkis; for Y was wrothe a litil, forsothe thei holpen in to yuel. Therfore these thingis saith the Lord, Y shal turne aȝein to Jerusalem in mercyes. My hous shal be byldid in it, saith the Lord of oostis; and an hangynge lyne, or mesure, shal be streiȝt out vpon Jerusalem. Ȝit crie thou, sayinge, These thingus saith the Lord of oostis, Ȝit my cytees shuln flete with goodis, and ȝit the Lord shal coumforte Syon, and ȝit he shal chese Jerusalem. And Y reyside myn eeȝen, and sawȝ, and loo! foure horns. And Y saide to the aungel that spak in me, What ben these? And he saide to me, These ben hornes, that wyndewiden Juda, and Israel, and Jerusalem. And the Lord shewide to me foure smythis. And Y saide, What cummen these for to do? Whiche saith, sayinge, These ben the hornes, that wyndewiden Juda by alle men, and no man of hem reiside his hed; and these camen for to fere hem, that thei caste doun hornes of heithen men, whiche reysiden horn vpon the lond of Juda, for to scatere it.
And Y reyside myn eeȝen, and sawȝ, and loo! a man, and loo! in his hond a litil coorde of meters. And Y saide, Whider gost thou? And he saide to me, That Y mete Jerusalem, and Judee; hou myche is the breede therof, and hou myche the lengthe therof. And loo! the angel that spac in me, wente out, and an other angel wente out into meetynge of hym, and saide to hym, Renne thou, spek to this chijld, saiynge, With outen wall Jerusalem shal be enabitid, for multitude of men and beestis in the mydil therof. And Y shal be to it, saith the Lord, a wall of fijr in cumpas; and Y shal be in glorye in the mydil therof. O! O! O! flee ȝe of the lond of the north, saith the Lord, for in foure wyndis of heuen Y scatride ȝou, saith the Lord. Thou Syon, flee, that dwellist anentus the douȝter of Babyloyne. For these thingus saith the Lord of oostis, After glorie he sente me to heithen men, whiche robbiden ȝou; forsothe he that shal touche ȝou, shal touche the appil of myn eeȝe. For lo! Y reyse my hond vpon hem, and thei shuln be pray to these that seruyden to hem; and ȝe shuln knowe, for the Lord of oostis sente me. Douȝter of Syon, herye thou, and glade; for loo! Y come, and shal dwelle in the mydil of thee, saith the Lord. And manye folkis shuln be applied to the Lord in that day, and thei shuln be to me in to a peple, and Y shal dwelle in the mydil of thee; and thou shalt wite, for the Lord of oostis sente me to thee. And the Lord shal welde Juda in to his part, in the lond halewid, and shal chese ȝit Jerusalem. Be eche flesh stille fro the face of the Lord, for he roose of his holy dwellynge place.
And the Lord shewide to me the grete prest Jhesu, stondynge byfore the aungel of the Lord; and Sathan stode on his riȝt half, that he were aduersarie to hym. And the Lord saide to Sathan, The Lord blame in thee, Sathan, and the Lord blame in thee, that ches Jerusalem. Wher this is not a dead brond rauyshid of the fijr? And Jhesus was clothid with filthi clothis, and stode byfore the face of the aungel. Whiche answerde, and saith to hym that stode bifore hym, sayinge, Do ȝe awey filthi clothis fro hym. And he saide to hym, Loo! Y haue don awey fro thee thi wickidnesse, and Y haue clothid thee with chaungynge clothis. And he saide, Putte ȝe a cleene cappe, or mytre, vpon his heued. And thei puttiden a cleene cappe, or mytre, vpon his heed, and clothiden hym with clothis. And the aungel of the Lord stode, and the aungel of the Lord witnesside Jhesu, sayinge, These thingis saith the Lord of oostis, Ȝif thou shalt go in my wayes, and shalt keepe my keepyng, and thou shalt deme my hous, and shalt keepe my porchis; and Y shal ȝeue to thee men walkynge, of these that now stonden here niȝ. Heere thou, Jhesu, grete prest, thou and thi freendis that dwellen byfore thee, for thei ben men signyfyinge thing to cummynge. Loo! sothely Y shal bringe my seruaunt spryngynge vp. For loo! the stoon whom Y ȝaf byfore Jhesu, vpon oo stoon ben seuen eeȝen; and loo! Y shal graue the grauynge therof, saith the Lord of oostis, and Y shal do awey the wickidnesse of that lond in oo day. In that day, saith the Lord of oostus, a man shal clepe his frend vndir his vyne ȝerd, and vndir his fijge tree.
And the aungel turnede aȝein, that spak in me, and reyside me, as a man that is reyside of his sleep. And he saide to me, What seest thou? And Y saide, Y sawȝ, and loo! a candilstyke al of gold, and the laumpe therof vpon the hed therof, and seuen lanternes therof vpon it, and seuen vessels for to holde oyle to the lanternys, that weren vpon the hed therof. And two olyues ther vpon, oon on the riȝt half of the laumpe, and an other on the left half therof. And Y answerde, and Y saye to the angel that spak in me, sayinge, What ben these thingus, my lord? And the angel that spak in me, answerde, and saide to me, Wher thou wost not what ben these thingus? And Y saide, No, my lord. And he answerde, and saith to me, sayinge, This is the word of the Lord to Zorobabel, sayinge, Not in oost, nether in strengthe, bot in my spirit, saith the Lord of oostis. Who thou, grete hill, byfore Zorobabel in to pleyn? and he shal leede out the firste stoon, and shal make euene grace to grace therof. And the word of the Lord is maad to me, sayinge, The hondis of Zorobabel foundiden this hous, and the hondis of hym shuln perfourme it; and ȝe shuln wite, for the Lord of oostis sente me to ȝou. Who forsothe dispiside litil days? and thei shuln glade, and shuln see a stoon of tyn in the hond of Zorobabel. These ben seuen eeȝen of the Lord, that rennen aboute in to eche lond. And Y answerde, and saide to hym, What ben these two olyues on the riȝthalf of the candilstike, and at the left half? And Y answerde the secounde tyme, and sayde to hym, What ben the two eris, or rijp fruyt, of the olyues, that ben bysidis the two golden bilis, in whiche ben oyle vesselis of gold? And he saith to me, sayinge, Wher thou wost not what ben these thingis? And Y saide, No, my lord. And he saide, These ben two sonys of oyle shynynge, whiche stonden niȝ to the lordshipere of al erthe.
And Y was conuertid, and reyside myn eeȝen, and sawȝ, and loo! a bok fleeȝinge. And he saide to me, What seest thou? And Y saide, Y see a bok fleeȝinge; the lengthe therof of twenti cubitis, the breed therof of ten cubitis. And he saide to me, This is the curs, that goth out vpon the face of al erthe; for eche theef, as it is writen there, shal be demyd; and eche man swerynge, of this also shal be deemid. And Y shal leede it out, saith the Lord of oostis, and it shal cum to hous of the theef, and to hous of the swerynge falsly in my name; and it shal dwelle in mydil of his hous, and shal waaste hym, and his trees, and his stoones. And the aungel wente out, that spak in me, and saide to me, Reyse thin eeȝen, and see, what this thing is, that goth out. And Y saide, What is it? And he saith, This is an amfer, or a vessel that sum men clepen a tankard, goynge out. And he saide, This is the eeȝe of hem in eche lond. And lo! a talent of lede was born; and loo! a womman syttynge in mydil of the amfer. And he saide, This is vnpitee. And he keste hir doun in mydil of the amfer, and sente a gobet of leed in the mouth therof. And Y reyside myn eeȝen, and sauȝ, and loo! two wymmen goynge out, and a spirit in the wengus of hem; and thei hadden weengus as weengus of a kijte, and reysiden the amfer bitwix heuen and erthe. And Y saide to the aungel that spac in me, Whither beren these the amfer? And he sayde to me, That an hous be beeldid therto in the lond of Sennaar, and be stablid, and putte there vpon his foundement.
And Y was conuertid, and Y reyside myne eȝen, and sawȝ, and loo! foure fourhorsid cartis goynge out of the mydil of two hillis, and the hillis hillis of brass. In the first foure horsid carte rede horsis, and in the secound foure horsid cart blake horsis; and in the thrid foure horsid cart white horsis, and in the fourth foure horsid carte dyuerse horsis stronge. And Y answerde, and saide to the aungel that spac in me, What ben these thingus, my lord? And the aungel answerde, and saith to me, These ben foure wyndis of heuen, whiche gon out, that thei stonde byfore the lordshipere of al erthe. In whiche weren blake horsis, wente out in to the lond of the north; and the white wenten out after hem; and the dyuers wenten out to the lond of the south. Forsothe thei that weren strengest wenten out, and souȝten for to go, and renne aboute bi al erthe. And he saide, Go ȝe, walke ȝe thoru the erthe. And thei walkiden thoru erthe. And he clepide me, and spac to me, saiynge, Loo! thei that gon out in to lond of the north, maden my spirit for to reste in lond of the north. And the word of the Lord is maad to me, sayinge, Take thou of the transmygracioun, or caitiftee, of Olday, and of Toby, and of Byday; and thou shalt cum in that day, and thou shalt entre in to the hous of Josye, sone of Sophonye, that camen fro Babyloyne. And thou shalt take gold and syluer, and thou shalt make crownes, and putte in the hed of Jhesu, sone of Josedech, the grete preste; and thou shalt speke to hym, sayinge, These thingus saith the Lord of oostus, sayinge, Loo! a man, Eest, or Springynge, his name, and vndir hym shal springe; and he shal beelde a temple to the Lord. And he shal ful make the temple to the Lord, and he shal bere glorie, and shal sitte, and shal be lord vpon his seete; and counseile of pees shal be bitwixe hem two. And crownys shuln be to Helem, and Toby, and Ydaie, and Hen, the sone of Sophonye, a memorial in temple of the Lord. And thei that ben fer, shuln cumme, and bylde in the temple of the Lord; and ȝe shuln witen, for the Lord of oostis sente me to ȝou. Sothely this thing shal be, ȝif bi heeryng ȝe shuln heere the voyce of the Lord ȝour God.
And it is maad in the fourthe ȝeere of Darius, kyng, the word of the Lord is maad to Zacharie, in the fourthe day of the nynthe monethe, that is Casleu. And Sarasar, and Rogumelech, and men that weren with hem, senten to the hous of the Lord, for to preye the face of the Lord; that thei shulden saye to prestis of the hous of the Lord of oostis, and to prophetis, spekynge, Wher it is to wepe to me in the fifthe moneth, or Y shal halewe me, as Y dide now manye ȝeeris? And the word of the Lord of oostis is maad to me, sayinge, Speke thou to al the peple of the lond, and to prestis, sayinge, Whenne ȝe fastiden, and weiliden in the fifthe and seuenthe monethe, by seuenty ȝeeris, wher ȝe fastiden a fast to me? And when ȝe eeten, and drunken, wher ȝee eeten not to ȝou, and drunken to ȝour self? Wher wordis of prophetis ben not, whiche the Lord spak in the hond of former prophetis, when ȝit Jerusalem was enhabited, and was ful of ritchessis, and it, and the citees therof in cumpas therof, and at the south and in feeldi place was enhabited? And the word of the Lord is maad to Zacharie, sayinge, These thingis saith the Lord of oostis, sayinge, Deme ȝe trewe dome, and mercy, and doyngus of mercy do ȝe, eche man to his brother. And nyl ȝe falsly chalenge the wydue, and fadirlesse, or moderlesse, and the cumlyng, and pore man; and a man thenke not in his herte yuel to his brother. And thei wolden not take heed, and thei turneden awey the shuldre goynge awey, and aggregiden, or maden heuy, her eeris, lest thei herden. And thei puttiden her herte as an adamaunt, lest thei herden the law, and wordis whiche the Lord of oostus sente in his holy Spirit, by hond of former prophetis; and grete indignacioun is maad of the Lord of oostis. And it is don, as he spak; and as thei herden not, thei shuln crye, and Y shal not heere hem, saith the Lord of oostis. And Y scatride hem by alle rewmys, whiche thei knewen not, and the lond is desolate fro hem, for that there was not a man goynge and turnynge aȝein; and thei han putt the desirable lond in to desert.
And the word of the Lord of oostis is maad to me, sayinge, These thingis saith the Lord of oostis, Y hatide Syon with grete feruour, and with grete indignacioun Y hatid it. These thingus saith the Lord of oostis, Y am turned aȝein to Syon, and Y shal dwelle in the mydil of Jerusalem; and Jerusalem shal be clepid a cytee of trewthe, and the hill of the Lord, an hill halewid. These thingus saith the Lord of oostis, Ȝit olde men and olde wymmen shuln dwelle in streetis of Jerusalem, and the staff of a man in his hond, for multitude of ȝeeris. And streetis of the citee shuln be fulfillid with infauntis and maydens, pleyinge in the streetis of it. These thingus saith the Lord of oostis, Ȝif it shal be seen hard in eeȝen of the relikis of this peple in tho dayes, wher in myn eeȝen it shal be hard, saith the Lord of oostis? These thingus saith the Lord of oostis, Loo! Y shal saue my peple of lond of the eest, and of the lond of goynge doun of the sunne; and Y shal leede hem to, and thei shuln dwelle in mydil of Jerusalem; and thei shuln be to me in to peple, and Y shal be to hem in to God, and in trewthe, and in riȝtwisnesse. These thingis saith the Lord of oostis, Be ȝoure hondis counfortid, whiche heeren in these days these wordis by the mouth of prophetis, in the day in whiche the hous of the Lord of oostis is foundid, that the temple shulde be beeldid. Sothely bifore tho days hijre of men was not, nether hijre of werk beestis was, nether to man entringe and goynge out was pees for tribulacioun; and Y departide alle men, eche aȝeinus his neiȝbore. Now forsothe not after the former days Y shal do to the relikis of this peple, saith the Lord of oostus, but seed of pees shal be; the vyne ȝerd shal ȝeue his fruyt, and the erthe shal ȝeue his buriownyng, and heuens shuln ȝeue her dewe; and Y shal make the relikis of this peple for to welde alle these thingus. And it shal be, as ȝe, hous of Juda, and the hous of Yrael, weren cursynge in heithen men, Y shal saaue ȝou, and ȝe shuln be blessyng. Nyl ȝe dreede, be ȝour hondis coumfortid; for these thingus saith the Lord of oostis, As Y thouȝte for to tourmente ȝou, whanne ȝoure fadris hadden terrid me to wrath, saith the Lord, and Y hadde not mercy, so Y conuertid thouȝte in these days for to do wele to the hous of Juda and Jerusalem; nyl ȝe dreede. Forsothe these ben the wordis whiche ȝe shuln do; speke ȝe trewthe, eche man with his neiȝbore; deme ȝe treuthe and dom of pees in ȝour ȝatis; and thinke ȝe not in ȝoure hertis, eche man yuel aȝeinys his freend, and loue ȝe not a fals oth; forsothe alle these thingus ben, whiche Y hate, saith the Lord. And the word of the Lord of hoostis is maad to me, sayinge, These thingus saith the Lord of oostis, Fastyng of the fourthe monethe, and fastynge of the fifthe, and fastyng of the seuenthe, and fastyng of the tenthe, shal be to the hous of Juda in to ioye and gladnesse, and in to ful cleere solempnytees; loue ȝe oonly treuthe and pees. These thingis saith the Lord of oostis, On eche syde peplis shuln cume, and dwelle in many citees; and the dwellers shuln go, oon to an other, saiynge, Go we, and biseche the face of the Lord, and seeke we the Lord of oostus; also Y shal go. And many peplis shuln cumme, and stronge folkis, for to seeke the Lord of oostus in Jerusalem, for to biseche the face of the Lord. These thingus saith the Lord of oostis, In tho days, in whiche ten men of alle tungis, or langagis, of heithen men shuln cacche, and thei shuln catche the hem of a man Jew, sayinge, We shuln go with ȝou; forsothe we han herd, for God is with ȝou.
The charge of word of the Lord, in the lond of Adrach, and Damask, reste therof; for the Lord is the eeȝe of man, and of alle the lynagis of Yrael. And Emath in termes therof, and Tyrus, and Sydon; sotheli thei token to hem wisdam gretely. And Tyrus beeldide his strengthynge, and gadride syluer as erthe, and gold as fen of streetis. Loo! the Lord shal weelde it, and shal smyte in the see the strengthe therof, and it shal be deuoured in fijr. Aschalon shal se, and shal drede; and Gaza, and shal sorewe ful myche; and Acharon, for the hoope therof is confoundid; and the kyng shal perishe of Gaza, and Ascalon shal not be enhabited; and a departer shal sitte in Azoto, and Y shal distruye the pride of Philistynes. And Y shal take awey the blood therof of the mouth of it, and the abhomynaciouns therof of mydil of the teeth therof, and it also shal be left to oure God; and it shal be as a duyk in Juda, and Accharon as Jebusey. And Y shal enuyrounne myn hous of these that holden knyȝthode to me, goynge and turnynge aȝein; and the exactoure, or the vniust axer, shal namore passe vpon hem, for now Y sawȝ in myn eeȝen. Thou douȝter of Syon, ioye with outeforth ynowȝ, synge, thou douȝter of Jerusalem; loo! thi kyng shal cume to thee, he iust, and saueour; he pore, styinge vpon a she asse, and vpon a fole, sone of the she asse. And Y shal scatere the foure horsid carte of Effraym, and the hors of Jerusalem, and bowe of the bateile shal be distruyed; and he shal speke pees to heithen men, and power of hym fro se vn to se, and fro floodis vn to eendis of the erthe. And thou in blood of thi testament sentist out thi bounden fro the lake, in whiche is not water. Be ȝe conuertid to strengthing, ȝe bounden of hoope; and this day Y shewynge double thingus shal ȝeelde to thee, for Y shal stretche forth to me Juda as a bowe, Y shal fulfille the lond of Effraym. And Y shal reyse thi sones, Syon, vpon thi sones, Greece, and Y shal putte thee as swerd of stronge. And the Lord God shal be seen vpon hem, and the swerd of hym shal go out as leyt. And the Lord God shal synge in trumpe, and shal go in whirlwynd of the south; the Lord of oostis shal keuere, or defende, hem, and thei shuln deuouren, and maken suget in stones of slynge; and thei drynkynge shuln be fulfillid as with wyne, and shuln be fillid as cruetis, and as hornes of the auter. And the Lord God of hem shal saaue hem in that day, as a floc of his peple, for holy stoonys shuln be reysid vpon the lond of hym. What forsothe is the good of hym, and what the faire of hym, no but whete of chosen, and wyne buriownynge virgynes?
Axe ȝe reyn of the Lord in euenyng tyme, and the Lord shal make snowis, and reyn of miȝt of the cloude; and he shal ȝeue to hem, eche by hem self, erbe in the feeld. For symulacris spaken vnprofitable thing, and dyuynours sawen lesyng; and dremers spaken veynly, ydely thei confortiden; therfor thei ben ledde to as a floc, thei shuln be tourmentid, for sheperd is not to hem. Vpon sheperdis my woodnes is wrothe, and vpon goot buckis Y shal visite; for the Lord of oostis hath visited his floc, the hous of Juda, and hath putt hem as hors of his glorye in batel. Of hym corner, and of him a litil pale, of hym bowe of batel, and of hym eche exactour, or vniust axer, shal go out togidre. And thei shuln be as stronge men, defoulynge cley of wayes in bateil, and thei shuln fiȝte, for the Lord is with hem; and styers of horsis shuln be confoundid. And Y shal coumforte the hous of Juda, and Y shal saaue the hous of Joseph; and Y shal conuerte hem, for Y shal haue mercye of hem; and thei shuln be as thei weren, whanne Y hadde not cast hem awey; forsothe Y the Lord God of hem, and Y shal graciousely heere hem. And thei shuln be as stronge of Effraym, and the herte of hem shal glade, as of wyne; and the sonys of hem shuln see, and glade, and the hert of hem shal ioye with outeforth in the Lord. Y shal hisse, or softly speeke, to hem, and Y shal gedre hem, for Y aȝein bouȝte hem, and Y shal multiplie hem, as thei weren byfore multiplied. And Y shal sowe hem in peplis, and of fer thei shuln bithenke of me; and thei shuln lyue with her sonys, and shuln turne aȝein. And Y shal aȝein leede hem fro the lond of Egypt, and of Assiriens Y shal gedre hem; and to the lond of Galaad and of Liban Y shal bringe hem, and place shal not be founden in hem. And he shal passe in wawe of the se, and shal smyte wawes in the see, and alle depnessis of flood shuln be confoundid; and the pride of Assur shal be meekid, and the sceptre of Egipt shal go awey. Y shal coumforte hem in the Lord, and in the name of hym thei shuln walke, saith the Lord.
Liban, opne thi ȝatis, and fijr shal eete thi cedris. Ȝoule, thou beche, for the cedre felle doun, for the grete ben distruyed; ȝoule, ȝe ookis of Basan, for the stronge wijlde wod is kitt doun. Voice of ȝoulyng of sheperdis, for the grete doyng of hem is distruyed; voice of roryng of lyouns, for the pride of Jordan is waastid. These thingus saith the Lord my God, Feede thou beestis of slauȝter, whom thei that weeldiden slewen; and sorewiden not, and soulden hem, sayinge, Blessid the Lord, we ben maad riche. And the sheperdis of hem spariden not hem, and Y shal na more spare vpon men enabitinge the erthe, saith the Lord. Loo! Y shal bytake men, eche in the hond of his neiȝbore, and in the hond of his kyng, and thei shuln falle to gydre in to erthe; and Y shal not delyuere of the hond of hem, and Y shal feede the beest of sleaynge. For this thing, ȝe pore men of the floc, heerith. And Y toke to me two ȝerdis; oon Y clepide Fairnesse, and the tother Y clepide Litil Coorde; and Y fedde the floc. And Y kitte doun thre sheperdis in oo monethe, and my soule is drawen to gydre in hem; sothely and the soule of hem variede, or chaungide, in me. And Y saide, Y shal not feede ȝou; that that dyeth, dye; and that that is kitt doun, be it kitt doun; and the tother deuoure, eche the fleshe of his neiȝbore. And Y toke my ȝerde, that was clepid Fairnesse, and Y kitte it doun, that Y shulde make voide my couenaunt, that Y smote with alle peplis. And it is led forth void in that day; and the pore of the floc that kepen to me, knewen thus, for it is the word of the Lord. And Y saide to hem, Ȝif it is good in ȝour eeȝen, brenge ȝe my meede; and ȝif nay, reste ȝe. And thei weyȝiden my meede, thritti platis of syluer. And the Lord saide to me, Caste it awey to a feir maker of ymagis, the pris, by whiche Y am preysid of hem. And Y toke the thritti platis of syluer, and Y keste hem forthe in the hous of the Lord, to the maker of ymagis. And Y kitte doun my secounde ȝerde, that was clepid Litil Coorde, that Y shulde departe, or vnbynde, the brotherhed bitwixe Juda and Yrael. And the Lord saide to me, Ȝit take to thee vessels of a foltishe sheperd; for loo! Y shal reyse a sheperd in erthe, whiche shal not visite forsaken thingus, he schal not seeke scatered thingis, and shal not heele the broken to gydre, and shal not nurishe forth that that stondith. And he shal eete fleshis of the fatt, and shal vnbynde the clees of hem. A! sheperd, and ydol, forsakynge the floc; swerd on his arme, and on his riȝt eeȝe; the arm of hym shal be dried with dryenesse, and his riȝt eeȝe wexinge derk shal be maad derc.
The charge of word of the Lord on Yrael. The Lord saide, stretchynge forth heuen, and foundynge erthe, and makynge the spirit of a man in hym, Loo! Y shal putte Jerusalem a threshfold of glotonye to alle peplis in cumpas, bot and Juda shal be in aseegynge aȝeinus Jerusalem. And it shal be, in that day Y shal putte Jerusalem a stoon of charge to alle peplis; alle that shuln lifte it, with conscicioun, or kittyng to gidre, shuln be to-drawen, and alle rewmys of erthe shuln be gadrid aȝeinus it. In that day, sayth the Lord, Y shal smyte eche hors in to dreed, or leesyng of mynde, and the styer of hym in to wodenesse; and on the hous of Juda I shal opyn myn eeȝen, and Y shal smyte with blyndnesse eche hors of peplis. And duykis of Juda shuln saye in her hertis, Be the dwellers of Jerusalem counfortid to me in the Lord of oostis, the God of hem. In that day Y shal putte the duykis of Juda as a chymney of fijr in trees, and as a brond of fijr in hay; and thei shuln deuoure at the riȝt half and left alle peplis in cumpas. And Jerusalem shal be enhabitid eftsoone in his place, in Jerusalem. And the Lord shal saaue the tabernaclis of Juda, as in the bygynnyng, that the hous of Dauid glorie not greetly, and the glorie of men dwellynge in Jerusalem aȝeinus Juda. In that day the Lord shal defende the dwellers of Jerusalem; and it shal be, he that shal offende of hem in that day as Dauyd, and the hous of Dauyd as of God, as the aungel of the Lord in the siȝt of hym. And it shal be, in that day Y shal seeke for to breke to gydre alle folkis that cummen aȝeinus Jerusalem. And Y shal heelde out on the hous of Dauid, and on dwellers of Jerusalem, the spirit of grace, and of prayers; and thei shuln biholde to me, whom thei to gidre ficchiden. And thei shuln weile hym with weilyng, as on the oon bigoten; and thei shuln sorewen on hym, as it is wont for to be sorewid in deth of the first bygoten. In that day grete weilyng shal be in Jerusalem, as the weilyng of Adremon in the feeld of Magedon. And erthe shal weyle; meynees and meynees by hem self; the meynees of the hous of Dauid by hem self, and the wymmen of hem by hemself; meynees of the hous of Nathan bi hem self, and the wymmen of hem by hem self; meynees of the hous of Leuy by hem self, and the wymmen of hem by hem self; meynees of Semey bi hem self, and the wymmen of hem bi hem self. Alle meynees, and other meynees, and meynees by hem self, and wymmen of hem by hem self.
In that day shal be a welle opnynge to the hous of Dauith, and to men dwelling at Jerusalem, in to washyng awey of the synful, and of the menstruate. And it shal be, in that day, saith the Lord of oostis, Y shal distruye names of ydolis of the lond, and thei shuln namore be thouȝte on; and Y shal take awey fro erthe fals prophetis, and the vnclene spirit. And it shal be, whan eny man shal prophecie ouere, his fader and moder that gendriden hym, shuln saye to hym, Thou shalt not lyue, for thou hast spoken lesyng in name of the Lord; and his fadir and modir, gendrers of hym, shuln to gidre ficche hym, whanne he hath prophecied. And it shal be, in that day prophetis shuln be confoundid, eche of his visioun, whan he shal prophecie; nether thei shuln be hillid with mantil of sac, that thei leeȝe; bot thei shuln sey, Y am not a prophete; a man erthe tilier Y am, for Adam my ensaumple fro my ȝongthe. And it shal be said to hym, What ben these woundis in mydil of thin hondis? And he shal say, With these Y was woundid in the hous of hem that loueden me. Swerd, be thou reysid on my sheperd, and on the wall cleuynge to me, saith the Lord of oostis; smyte thou the sheperd, and the sheep of the floc shuln be scaterid. And Y shal turne my hond to the litil; and ther shuln be in eche lond, saith the Lord, two parties in it, and shuln be scatered, and shuln faile, and the thrid part shal be left in it. And Y shal leede the thrid part bi fijr, and Y shal brenne, as syluer is brent, and Y shal proue hem, as gold is proued. He shal incleepe my name, and Y shal graciously heere hym; and Y shal saye, Thou art my peple, and he shal saye, The Lord my God.
Loo! days cummen, saith the Lord, and thi spuylis shuln be departid in mydil of thee. And Y shal gadre alle folkis to Jerusalem, in to bateyl; and the citee shal be taken, and housis shuln be distruyed, and wymmen shuln be defoulid. And the mydil part of the citee shal go out in to caitiftee, and the tother of the peple shal not be taken awey fro the citee. And the Lord shal go out, and shal fiȝte aȝeinus the folkis, as he fauȝte in the day of stryf. And his feet shuln stonde in that day on the hill of olyues, that is aȝeins Jerusalem at the eest. And the hill of olyues schal be coruen of the myddel part therof to the eest and to the west, the greet valey bifore brokyn; and the myddel of that hill be departid to the north, and the myddil therof to the mydday, or southe. And ȝe shuln flee to the valey of myn hillis, for the valey of hillis shuln be ioyned togidre vn to the next. And ȝe shuln flee, as ȝe fledden fro face of the erthe mouynge in the days of Osee, kyng of Juda; and the Lord my God shal cumme, and alle sayntis with hym. And it shal be, in that day liȝt shal not be, bot colde and frost. And ther shal be oo day, whiche is knowen to the Lord, not day, nether niȝt, and in tyme of euyn liȝt shal be. And it shal be, in that day quyck waters shuln go out of Jerusalem, the mydil of hem to the eest see, and the mydil of hem to the last see; in somer and in wynter thei shuln be. And the Lord shal be kyng on al erthe; in that day ther shal be oo Lord, and his name shal be oon. And eche erthe shal turne aȝein vnto desert, fro the litil hill Remmon to the south of Jerusalem. And it shal be reysid, and shal dwelle in his place, fro the ȝate of Beniamyn til to the place of the former ȝate, and vn to the ȝate of corners, and fro the tour of Ananyel vnto pressours of the kyng. And thei shuln dwelle therynne, and cursidnesse shal namore be, bot Jerusalem shal sitte sykir. And this shal be the plage, by whiche the Lord shal smyte alle folkis, that fouȝten aȝeinus Jerusalem; the fleshe of eche man stondinge vpon his feet shal fayle, or rote, and his eeȝen shuln faile to gydre in her hoolis, and his tunge shal faile to gydre in his mouth. In that day grete noyse of the Lord shal be in hem, and a man shal catche the hond of his neiȝbore; and his hond shal be lockid to gidre on the hond of his neiȝbore. Bot and Judas shal fiȝte aȝeinus Jerusalem; and ricchessis of alle folkis in cumpas shuln be gadred to gider, gold, and syluer, and many clothis ynowe. And so fallyng shal be of hors, and mule, and camel, and asse, and of alle werc beestis, that weren in tho castellis, as this fallyng. And alle that shuln be residu of alle folkis, that camen aȝeinus Jerusalem, shuln stye vp fro ȝeere in to ȝeer, that thei wirshipen the kyng, Lord of oostis, and halewe the feest of tabernaclis. And it shal be, thei that shuln not stye vp of the meynees of erthe to Jerusalem, that thei wirshipe the kyng, Lord of oostus, reyn shal not be on hem. That and ȝif the meynee of Egypt shal not stye vp, and shal not cum, nether on hem shal be; bot fallynge shal be, bi whiche the Lord shal smyte alle folkis, whiche stieden not vp, for to halewe the fest of tabernaclis. This shal be the synne of Egypt, and this the synne of alle folkis, that stieden not vp, for to halewe the fest of tabernaclis. In that day, it shal be, on whiche thing the bridil of hors is hooly to the Lord; and caudrons shuln be in the hous of the Lord, as cruetis byfore the auter. And euery caudron in Juda and Jerusalem shal be halewid to the Lord of oostis. And alle men shuln cum offrynge, and shuln take of hem, and shuln seethe in hem; and a marchaunt shal namore be in hous of the Lord of oostus in that day.
Copyright © 2013–2026 Jeremy J. Johnson. All rights reserved.